Month: August 2024

Orët e para të mëngjesit të djeshëm në Bajron të Greqisë, një 86-vjeçare ka përjetuar terror absolut nga duart e një grabitësi shqiptarë, i cili i ka hyrë në shtëpinë e saj teksa flinte, e ka rrahur dhe i ka marrë bizhuteritë.

Mirëpo, makthi për të moshuarën nuk u ndal me kaq pasi gjysmë ore më vonë, kur ajo ndodhej në shtëpinë e së bijës për të kërkuar ndihmë, u ndesh sërish ballë për ballë me banditin që kishte shkuar në objektivin e tij të radhës.

Gjithçka ka ndodhur pak pas orës 5 të mëngjesit të së enjtes me 40-vjeçarin shqiptar që kishte thyer qepenin dhe kishte hyrë në banesën përdhese në rrugën Kordeliou.

Në atë kohë 86-vjeçarja ishte duke fjetur dhe u zgjua duke parë një burrë të panjohur duke i vjedhur kryqin nga sipër shtratit të saj.

“Dëgjoj grilat dhe shoh një djalë përpara meje. Ai ulet në shtrat, merr floririn tim, gjithçka që kisha, kryqin dhe ulet. E kthen shtëpinë përmbys dhe më thotë ‘Dua para dhe florinj”, përshkruan për protothema.gr 86-vjeçarja, e cila shihet me plagët nga goditjet e banditit të pamëshirshëm.

Mavijosjet, gërvishtjet dhe një sy i fryrë tregojnë tërbimin me të cilin sulmuesi goditi të moshuarën fatkeqe .

“Më thotë ‘kujdes, mos shko në Polici se nesër do të jem sërish këtu dhe do të të vras’. Ai kishte një stilolaps dhe po kërkonte dhomën e vogël. Unë i them ‘të lutem djali im, a ke nënë? A ke baba? Largohu, të lutem.’ Ai donte të më shtrinte në shtrat. Kisha frikë se mos më vriste.

‘Ju nuk keni para, apo jo? ’, thotë dhe më godet. Më thoshte ‘a ke ngrënë bukën, për çfarë do të jetosh?’“, thotë e moshuara që ka parë sulmuesin duke dalë nga dera, duke menduar se kishte shpëtuar.

Më pas ajo shkoi në shtëpinë ngjitur, ku jeton vajza e saj, për t’i treguar se çfarë kishte ndodhur. Aty, për fatin e saj të keq, ajo pa sërish grabitësin që kishte hyrë në shtëpi dhe po kërcënonte këtë herë fëmijën e saj.

Dy gratë pasi i kanë dhënë të gjithë floririn që kishin në banesë, kanë arritur fusnin në kurth dhe të lajmërojnë Policinë. Disa orë më vonë, policia ka gjetur autorin dhe e ka vënë në pranga.

Siç u konstatua, bëhet fjalë për një kriminel, i cili është arrestuar disa herë për grabitje dhe raste droge, ndërsa kishte hyrë ilegalisht në Greqi, nga Shqipëria.

Fundjava pritet të jetë në ndikim të kushteve atmosferike relativisht të qëndrueshme.

Sipas Shërbimit Meteorologjik Ushtarak, moti parashikohet të jetë me kthjellime dhe vranësira të cilat do të vijnë në zhvillim në orët e mesditës kryesisht përgjatë relieveve malore.

Në mesditë dhe pasdite përgjatë relieveve malore të vendit (kryesisht në juglindje) reshje lokale shiu.

Era parashikohet të jetë nga veriperëndimi-jugperëndimi me shpejtësi deri në 6m/sek, e cila hera-herës në bregdet dhe lugina fiton shpejtësi deri në 12m/sek.

Valëzimi në dete pritet të jetë i forcës 1-2 ballë.

Kombëtarja shqiptare do të luajë dy ndeshje në shtator ndaj Ukrainës dhe Gjeorgjisë, të vlefshme për UEFA Nations League. Përgatitjet për dy ndeshjet e para në Grupin B1 do të nisin të hënë më 2 shtator, teksa trajneri Silvinjo ka publikuar sot listën me 24 lojtarë të grumbulluar.

Përsa i përket portës janë Thomas Strakosha, Alen Sherri dhe Simon Simoni. Në mbrojtje rikthehet futbollisti i Partizanit, Andi Hadroj. Emrat e tjerë që përbëjnë repartin e prapavijës janë Berat Gjimshiti, Elseid Hysaj, Ivan Balliu, Mario Mitaj, Marash Kumbulla, Ardian Ismajli dhe Enea Mihaj.

Në repartin e mesfushës dhe të sulmit ka dy risi. Trajneri Silvinjo ka vendosur të thërrasë për herë të parë në Kombëtaren A mesfushorin Sebastjan Spahiun dhe sulmuesin Agim Zeka. Të dy futbollistët më parë kanë qenë pjesë e Shqipërisë U-21. Spahiu aktivizohet në Iran me skuadrën e Mes Rafsanjan, ndërsa Zeka në kampionatin “Abissnet Superiore” me Partizanin.

Pjesa tjetër e lojtarëve që përbëjnë repartin e mesfushës dhe të sulmit janë Ylber Ramadani, Amir Abrashi, Kristjan Asllani, Medon Berisha, Qazim Laçi, Nedim Bajrami, Arbër Hoxha, Jasir Asani, Rey Manaj, Armando Broja dhe Taulant Seferi.

Grumbullimi i lojtarëve do të nisë që të dielën në Tiranë me futbollistët që do të përfundojnë më herët impenjimet me skuadrat e tyre, ndërsa grupi i lojtarëve pritet të jetë i plotë të hënën më 2 shtator.

Seancat stërvitore do të zhvillohen në “Shtëpinë e Futbollit”, ndërsa të premten kuqezinjtë do të udhëtojnë drejt Çekisë, aty ky më 7 shtator do të luhet ndeshja e parë në Grupin B1 të Nations League ndaj Ukrainës, në stadiumin “Epet Arena”, në orën 20:45.

Tre ditë më pas më 10 shtator, Kombëtarja shqiptare do të luajë ndaj Gjeorgjisë në stadiumin “Air Albania”, në orën 20:45.

Deklaratat e forta të aktorit, Osman Azemi, se Shqipëria e ka zili Kosovën, kanë sjellë reagime të shumta në rrjet.
Mes personave publikë që kanë reaguar, është edhe Rigels Rajku, reperi i njohur me emrin Noizy, i cili përmes një postimi në Instagram, ka ‘shpërthyer ndaj aktorit.

“Kjo video shkon për Osman Agaun, o aga, ndërroje mallin o aga, merre pak më të butë. Po nuk e ka zili vëllai vëllain more aga. O Osman, ndërroje mallin, ndërroje edhe emrin,- është shprehur reperi teksa ka vënë edhe një përshkrim mbi videon në të cilin thuhej: “Paske pi i çikë o jetë, me bo me t’dëgju gjyshi tu fol e kish nem babain tënd o Osman.”

Por çfarë deklaroi konkretisht Osman Azemi?

“Ne nuk jemi krahinë e Shqipërisë. E kuptoj që Shqipëria i ka disa komplekse që nuk e ka një trajner si Toni Kuka, Majlinda Kelmendi. Nuk e ka Rita Orën, Dua Lipa. E kuptoj.

E kuptoj xhelozinë që nuk e kanë një Xherdan Shaqiri, një Granit Xhaka…që janë të gjithë kosovarë. Ne jemi më të mirë në futboll, kemi dhënë kontribut shumë të madh në…i kemi mësuar si të jenë tifozë të mirë.

Dhe tani çfarë më mbetet mua që kur të udhëtoj, të mos udhëtoj më nga Kukësi, por nga Rozhaja. Unë e di dhe kështu të bojkotoj. Ama unë ia dëshiroj të gjitha të mirat Shqipërisë, por boll kemi probleme me Shqipërinë, mos na bëhen dhe këta”, tha Osmani.

Rënia e shpejtë e numrit të nxënësve ka ndikuar në mbylljen e një së katërtës së shkollave 9-vjeçare në rang vendi, referojnë të dhënat zyrtare të Ministrisë së Arsimit.

Nga viti shkollor 2012-2013 në vitin shkollor 2021-2022 janë mbyllur 295 shkolla të arsimit 9-vjeçar në të gjithë vendin duke e çuar numrin total të tyre në 1051 nga 1346 që ishte në vitin 2013.

Mbyllja e shkollave ka ardhur në raport të drejtë me rënien e nxënësve, pasi nga 2011 më 2023, INSTAT referon se numri i nxënësve në arsimin 9-vjeçar ka shënuar tkurrje me rreth 30%.

Zonat rurale kryesojnë me mbylljen e shkollave, pasi numri i fëmijëve është pakësuar ndjeshëm. Mirëpo mbyllja e shkollave në zonat rurale të vendit është bërë shkak për emigrimin e mëtejshëm e atyre pak familjeve me fëmijë të vegjël.

Që nga viti 2000 janë mbyllur 42% e shkollave 8-9-vjeçare në rang vendi. Arsimi bazë nga klasa e parë deri në të nëntën me kohë të plotë është i detyrueshëm për të gjithë fëmijët që janë nga mosha 6 vjeç deri në moshën 16 vjeç, me përjashtim të rasteve të parashikuara në ligj.

Arsimi Bazë përfshin: Arsimin Fillor (klasat 1-5) dhe Arsimin e Mesëm i Ulët (klasat 6 -9). Arsimi fillor përbëhet nga pesë klasa, nga klasa i deri në klasën V. Ndërsa arsimi i mesëm i ulët përbëhet nga katër klasa, nga klasa VI deri në klasën IX. Mosha e nxënësve është 12-15 vjeç.

Shqipëria financonte më shumë se 4-5% të PBB së saj para viteve 1990 për sektorin e arsimit, ky nivel ishte i krahasueshëm me financimet që edhe vendet e tjera të OECD-së jepnin në atë kohë.

Por gjatë viteve të tranzicionit, sektori është financuar më pak se 3% të PBB-së, nivel gati 40% më i ulët se financimet që vendet e zhvilluara ka dhënë në këtë periudhë dhe 20% më pak se financimet që japin vendet e rajonit.

Shqipëria hyri në periudhën e tranzicionit me 2200 shkolla të arsimit 8-vjeçar dhe të mesëm dhe tani po përballet me një tkurrje të fortë që nuk po ndikon në rritjen e cilësisë së nxënësve të mbetur. Vendi ynë shënoi rënien më të madhe globale në rezultatet e Testit global PISA 2022.

Mësuesit pohojnë se reformat e në arsim më vitet e fundit kanë rritur barrën rregullatore dhe ngarkesën e mësuesve që nuk ka lidhje në mënyrë të drepërdrejtë me mësimdhënien.

Ndryshimi i kurrikulës, përdorimi i gabuar i teknologjisë, mungesa e motivimit për mësuesit, rënia e nivelit profesional të mësuesve, notat fiktive anë disa nga shkaktarët e rezultateve të dobëta.

Teksa niveli i mësuesve të rinj është më i dobët. Financimet e ulëta për arsimin dhe sidomos pagat e ulëta të mësuesve po çojnë gjithnjë e më shumë nxënës, studentë të dobët, në degët e mësuesisë, duke vënë në diskutim cilësinë e arsimit në vijim./ Monitor

Pushimet janë kthyer në tragjedi për një 37-vjeçare, e cila shkoi në Turqi për tu relaksuar por humbi jetën. Ajo po merrte rreze dielli në pishinën e hotelit ku po qëndronte, në momëntin kur një kapak oxhaku i ra sipër, për shkak të erës së fortë.

37-vjeçarja e cila ishte një infermiere, përfundoi menjëherë në spital, por nuk arriti të mbijetonte për shkak të plagëve të marra. Ngjarja ka ndodhur më 24 gusht, ku lajmi i vdekjes së saj ka tronditur familjarët dhe miqtë e saj.

Trupi i pajetë i Hanım Kaya Orakcı, nënë e dy fëmijëve, u dërgua në morgun e Institutit të Mjekësisë Ligjore në Antalia për autopsi.

Pas autopsisë trupi i saj është pritur nga vëllai dhe të afërmit e tij. Pasi trupi i Orakçit u mor nga morgu i Institutit të Mjekësisë Ligjore, të afërmit e Orakçit e dërguan atë në vendlindjen e saj në Hakkari për ta varrosur.

Nga ana tjetër mediat turke bëjnë me dije se avokatët e familjes kanë ngritur një padi kundër hotelit për shkak se mbulesa e oxhakut prej 40 centimetrash nga era u shkëput dhe shkaktoi vdekjen e Hanım Kaya Orakcı, e cila ishte ulur pranë pishinës.

Menaxheri i hotelit MD, i cili u ndalua për ngjarjen, u la i lirë me urdhër të prokurorisë pas deklaratës së tij në polici.

Një çift që po kryenin marrëdhënie seksuale në një makinë “Range Rover” gjatë natës, kanë përfunduar në lumë. Makina filloi të ecte ndërkohë që çifti ishte në sediljen e pasme.

Ngjarja ka ndodhur në lumin në Fairmount Park rreth orës 4:15 të mëngjesit të së mërkurës, këmba e njërit prej tyre shtypi frenat e dorës dhe makina filloi të ecte, sipas policisë.

Pak çaste më vonë, Range Rover u rrëzua dhe u fundos në ujë, rreth dy milje nga Bashkia e Filadelfias. Çifti i paidentifikuar u hodh nga fuoristrada para se automjeti të binte ujë. Asnjëri prej tyre nuk u lëndua gjatë incidentit.

Nga fotot e publikuara makina ishte fundosur e gjitha në ujë.

Nga fillimi i vitit 2023, pasagjerët në Terminalin 1 të Aeroportit Fiumicino të Romës kanë një arsye më pak të shqetësohen për kapjen e fluturimit të tyre, pasi kalojnë kohë minimale duke kontrolluar çantat e dorës.

Sistemi modern i skanerit të Sistemit të Zbulimit të Eksplozivëve të standardit C3 lejon personelin e sigurisë të kontrollojë përmbajtjen e bagazheve të dorës, veçanërisht lëngjet dhe pajisjet elektronike, pa kufizime sasiore dhe pa pasur nevojë që pasagjerët t’i heqin ato nga çantat e tyre dhe t’i vendosin në rripin e skanerit.

“Pajisjet e reja, të cilat përdorin skanera me rreze X, janë të afta të prodhojnë imazhe volumetrike tredimensionale me rezolucion të lartë me zbulimin automatik të substancave potencialisht të rrezikshme”, thuhet në njoftimin përkatës të administratës së Fiumicino.

Sistemi i ri kaloi një periudhë prove në aeroportin e Romës, fillimisht duke u nisur për pasagjerët e rregullt dhe më pas u shtri në të gjitha pikat e kontrollit. Pasagjerët kalojnë pa zbrazur çantat e dorës, duke minimizuar kohën e pritjes dhe duke ndihmuar aeroportin të përmbushë trafikun e lartë të kësaj vere. Ata gjithashtu mund të kenë lëngje më shumë se 100 ml në kabinën e avionit. Megjithatë, nga 1 shtatori, ky sistem do të shfuqizohet.

Vendimi u mor nga Komisioni Evropian, pas një raporti teknik, i cili konkludon se softueri i skanerëve të rinj “nuk mund të garantojë besueshmërinë e tij për kontejnerët me përmbajtje të lëngshme më shumë se 330 ml”. Bazuar në këtë raport, Komisioni i BE-së vendos, nga 1 shtatori, një ndryshim në Rregulloren e BE-së për Sigurinë e Aviacionit, duke ndaluar efektivisht përdorimin e skanerëve të gjeneratës së re në aeroportet e BE-së, si dhe në Islandë, Zvicër, Lihtenshtajn dhe Norvegji.

Kundër Këshillit të Aeroporteve Evropiane

Vendimi i Komisionit shkaktoi reagime të forta nga Këshilli Ndërkombëtar i Aeroporteve Evropiane (ACI Europe), i cili përfaqëson më shumë se 500 aeroporte në 46 vende evropiane. Skanerët e gjeneratës së re janë instaluar tashmë në disa aeroporte evropiane në Gjermani, Irlandë, Itali, Holandë, Suedi, Lituani dhe Maltë.

Ata kushtojnë tetë herë më shumë se skanerët konvencionalë me rreze x dhe kostot e mirëmbajtjes së tyre janë katër herë më të larta. Por tani aeroportet duhet t’i tërheqin ato, “deri në një njoftim tjetër”.

Një ngjarje horror ka ndodhur në Itali, në zonën e Parmës ku një shtetas me origjinë shqiptare teksa ishte duke kërkuar për tartuf ka gjetur një kafkë njeriu.

I tronditur dhe i frikësuar 43-vjeçari shqiptar ka telefonuar menjëherë policinë, e cila pasi konstatoi faktin se kafka i përkiste një njeriu nisi menjëherë hetimet.

Karabinierët kryen një inspektim në zonat përreth , duke kërkuar për veshje apo objekte të tjera.

Hetimet e mëvonshme policore gjyqësore dhe teknike do të përcaktojnë shkaqet e mundshme të vdekjes dhe datën e saktë. Hetimet do të shikojnë edhe listën e personave të zhdukur në zonë vitet e fundit.

Talo Çela, një nga njerëzit më të kërkuar të Policisë së Shtetit, strukturave të Antiterrorit dhe Shërbimit Informativ Shtetëror, besohet shumë se është larguar nga Shqipëria, duke u vendosur në një vend të Amerikës Latine, me identitet të ndryshuar.

Njeriu që mes anëtarëve të grupit thirrej “Moma”, “Katnari” dhe më pas mori nofkën “Dhelpra”, për shkak të ikjes dhe fshehjes me shumë sukses, duke sjellë dështimin e dhjetëra operacioneve policore, del në komunikimet e “Sky” se po përgatiste largimin e tij nga vendi, duke shfaqur mendim se do vendosej në Brazil me emër tjetër.
“…do iki në Brazil, andej me emër tjetër po doli prova këtu për Rinasin, s’kam ku rri më kot këtu në Shqipëri. Këtu merr 20 vjet, plus dhe këto vrasjet e leshit…”-thotë Talo Çela në “Sky”.

Nga ky komunikim kupton se Talo Çela i ndruhej një dënimi tek çështja e “Rinasit” dhe duke ndjerë presionin e madh nga instancat shtetërore, ai mendon për një plan ikje përfundimtare nga Shqipëria.

Biseda për planin e ikjes së Talos në Brazil zhvillohen në muajin 14 korrik 2020, gati 1 vit e 3 muaj nga supergrabitja e miliona eurove të kryer brenda barkut të avionit të linjës Tiranë-Vjenë në aeroportin e Rinasit.

Ngjarja që tronditi sistemin bankar dhe sigurinë kombëtare, aq sa bëri të mblidhet me urgjencë Komisioni i Sigurisë dhe Aeroporti i Rinasit të rrethohet nga Policia Ushtarake dhe Forcat “Komando” të Ushtrisë , ndodhi në muajin Prill 2019.

Pas grabitjes zëdhënësja e “Austrian Arlines”, Tanja Gruber deklaroi në atë periudhë për agjencinë e lajmeve AFP-ë, se kjo kompani ajrore nuk do të kryejë më transferime të parave cash nga Tirana drejt Vjenës

Talo Çela, ishte shpallur në kërkim nga Krimet e Rënda pasi Alkond Bengasi, njëri nga të arrestuarit fillimisht kishte pranuar të bashkëpunonte dhe tregonte çfarë dinte për ngjarjen.

Për policinë Talo Çela ishte organizatori i kësaj super-grabitje së bashku me vëllezërit Çala dhe Gramoz Murataj. Por nga ana tjetër vetë Talo Çela në komunikimet e “Sky” pranon se ishte njëri nga kryesorët e grabitjes dhe shoferi i furgonit të bardhë me mbishkrimin “Hetimi Tatimor”.

Por njeriu më i kërkuar Talo Çela shprehet, se shteti nuk ka prova kundër tij për këtë ngjarje. Në 7 janar 2021 Talo Çela i shkruan shtetases Mariola Mandit duke i thënë se Alkond Bengasi ka kundërshtuar çdo akuzë kundra nesh.

”…spiuni e tërhoqi akuzën për çështjen e Rinasit dhe ka mohuar çdo akuzë kundra nesh…”-i shkruan Talo Çela.

Një ditë më pas në 8 janar 2020, komunikon me Mariola Mandin duke i thënë kësaj të fundit se spiuni i Durrësit, ku i referohet Klevis Allës, ka qënë në një dhomë me atë të Rinasit, Alkond Bengasin. Në këtë bisedë data e komunikimit nuk korrespondon pasi Klevis Alla është arrestuar në muajin Maj 2020.

Sipas bisedës Alkond Bengasi e ka kthyer 360 gradë deklarimin e tij. Gjithashtu nga biseda e zhvilluar ndërmjet Talo Çelës dhe Mariola Mandit, evidentohet se vëllezërit Çala, kanë biseduar me të dy spiunët, Alkond Bengasi dhe Klevis Alla.

Më tej në 14 korrik 2020 Talo Çela ka biseduar me një person tjetër duke i thënë se:”…shpreson mos të ketë prova për Rinasin…”.

Ndërkohë në 28 korrik 2020 Talo Çela bisedon me një person tjetër, të cilit i shkruan se do largohet në Brazil, ku do marrë identitet tjetër nëse dalin prova për përfshirjen e tij në grabitjet e Rinasit.

Kjo pasi sipas tij këtu në Shqipëri mund të dënohet me 20 vjet burgim. Gjithashtu Talo Çela shprehet i shqetësuar edhe për vrasjet e ndodhura.

“…do iki në Brazil, andej me emër tjetër po doli prova këtu për Rinasin, s’kam ku rrij më kot këtu në Shqipëri. Këtu merr 20 vjet, plus dhe këto vrasjet e leshit…”-thotë Talo Çela në “Sky”.

Për ngjarjen e grabitjes spektakolare të 4.6 milionë euro në mes të aeroportit kombëtar të Rinasit, në prill të vitit 2019, Gjykata e Posaçme dha vendimin në muajin Tetor 2023 duke dënuar me 122 vite burgim për 7 të pandehurit e grupit kriminal.

Numri dy i bandës, Klement Çala do të qëndrojë pas hekurave për 20 vite, ndërsa për gjashtë të tjerët të arrestuar për grabitjen: Oltion Veseli, Renaldo Sulaj, Saimir Cela, Oltion Pikli, Alkon Bengasi dhe Eldi Çala, trupa gjykuese dha nga 17 vite burg për secilin.

Dënimet janë më të ulëta se ato të pretenduara nga Prokuroria e Posaçme, e cila për Klement Çalën kërkoi 24 vite burg, ndërsa për gjashtë të pandehurit e tjerë nga 19 vite.

Ndërsa i akuzuari si pjesë e bandës është edhe Talo Çela, por gjykimi për të vijon të jetë i ndarë sepse ai është ende në arrati, duke u zhvilluar në mungesë.