Month: November 2024

Nga nesër deri të premten, vendi ynë do të përfshihet nga reshjet e shiut dhe të dëborës dhe ulja e temperaturave. Paralajmërimi u dha nga meteorologia, Tanja Porja, e cila theksoi se dëbora do të zbresë në 700 metra lartësi, por sipas saj nuk ka vend për panik.

“Tri ditë me reshje shiu dhe dëbore. Nuk ka vend për panik. Rrebeshe të shpeshta në jug dhe në zonat qendrore dhe në ditët vijuese në të gjithë territorin dëbora do të zbresë në 700 metra. Do të kemi temperatura nga minus 2 në 19 gradë celsius. Nesër paradite do të ketë rrebeshe dhe reshje dëbore në zonat malore”.

Por çfarë ndodhë në 3 ditët në vijim? Meteorologia e A2 thekson se deri mëngjesin e së premtes do të kemi rrebeshe afatshkurtra në të gjithë vendin, ndërsa termometri zbret në minus 3 gradë. “Mbrëmjen e së mërkurës, të enjten dhe deri mëngjesin e së premtes kemi reshje dëbore dhe rrebeshe afatshkurtra në të gjithë vendin. Të premten ulje e temperaturave deri në minus 3 gradë”, tha Porja.

Sipas saj e njëjta tablo sinoptike do të jetë edhe në rajon.

“Në Kosovë e RMV dhe Mal të zi kemi të njëjtën tablo sinoptike. Rrebeshe të shpeshta në Maqedoninë e Veriut nga nata e sotme, reshje bore ne 500 metra lartësi. Në Kosovë reshje dëbore në disa zona, veriu mbetet me vranësira, jugu me rrebeshe, ndërsa Mali i zi do të ketë reshje të pakta dhe rritje të vlerave termike”.

Moderatorja Fjodora Fjora, e cila është nënë e një djali të birësuar, ka rrëfyer se dëshironte që të kishte tetë fëmijë.

Por, prezantuesja ka rrëfyer se është shumë e vështirë të gjesh një burrë, që të angazhohet për të pasur fëmijë, duke shtuar se “ky është problem i madh”.

“Edhe meshkujt me të cilët kam pasur lidhje serioze, e kanë pasur shumë të vështirë të angazhohen në pasjen e një fëmije”, theksoi ajo.

Fjodora Fjora u shpreh se ky është një trend shumë i çuditshëm i shoqërisë shqiptare që e vuajnë të gjitha vajzat.

“Unë nuk jam pesimiste, vetë personalisht do kisha dashur të bëja 8 fëmijë. Jeta ma solli kështu, nuk ka lidhje… Po, po 8! Me shpirt aq sa kanë bërë gjyshërit e mi. Kam jetuar në një familje fantastike, shtriheshin përtokë, na shijonte…Të kisha pasur mundësitë, unë sot jam thirrur për përvojën time personale e cila vjen ndryshe. Me vetëm dy gjyshër, që me sa munden më ndihmojnë.

Pra kam arsyet e mia pse nuk mund të kem 3 apo 4 apo 5. Por një arsye shumë e madhe është se edhe meshkujt me të cilët kam pasur lidhje serioze, e kanë pasur shumë të vështirë të angazhohen në pasjen e një fëmije. Ky mendoj që është një problem i madh.

Të gjitha vajzat sot vuajnë një trend shumë të çuditshëm të shoqërisë shqiptare, për të gjetur një njeri që angazhohet. Angazhim do të thotë familje dhe fëmijë. Është kaq i hapur si fenomen. Në momentin e parë që një grua i bashkohet një burri, atij i duket si kurth për të pasur fëmijë. Pse është kaq terror ky fëmija?!”, tha ajo në emisionin “Opinion”.

Fjodora Fjora zgjodhi të ishte një mama single pas birësimit të djalit të saj, Alteos 10 vite më parë.

Dhe padyshim që gazetarja është përballur me pyetjen e pashmangshme nga djali, se ku është babai i tij.

Në një intervistë disa vite më parë, Fjodora Fjora rrëfeu se si i ka shpjeguar Aletos mungesën e të atit.

“Sheh fëmijët e tjerë, ata kanë babin dhe përballesh menjëherë me pyetjen se përse se kam babin. Unë jam përpjekur t’i shpjegoj këtë, që ka të gjitha format e familjeve në këtë botë. Ka që kanë mamin dhe babin, ka që kanë vetëm babin, ka që kanë vetëm mamin, po ka që edhe mund të mos ketë as njërin as tjetrin, dhe familje i bëhet dikush tjetër, i cili bëhet shumë i rëndësishëm për ta. Është e rëndësishme në jetë të kesh një njeri dhe model që të rrisë mirë dhe bukur e dashuri. Ne kemi histori plot që disa fëmijë i ka rritur gjyshi me gjyshen, tezja apo daja”, u shpreh Fjodora.

Ajo tregoi se si reaguan prindërit e saj kur gazetarja i tha se kishte marrë vendimin për të birësuar një fëmijë.

“Kur mora vendimin për të birësuar fëmijën, prindërit e mi kishin hallin se do kisha vështirësi për të gjetur një partner,”– tha Fjodora.

Por pavarësisht këtij vendimi, ajo ka rrëfyer në atë kohë se është e hapur për të gjetur një partner

Fjodora u shpreh se nëse do pranonte në jetën e saj një mashkull që e meriton të jetë prindi i Alteos, duke shtuar se është e lumtur që s’ka bërë zgjedhjen e gabuar.

“I kam thënë vetes nëse dikush e meriton të jetë prindi i djalit tim, pse të mos vijë. Sot kemi forcën, këllqe dhe vetëbesimin për të ndërtuar dhe krijuar jetë edhe një fëmijë që varet nga ne. I inkurajoj edhe të gjitha vajzat që ndihen të padashuruara, në sfidë të vazhdueshme, sepse ka shumë vajza që punojnë, ia dalin vetë dhe meshkujt e kanë të vështirë të pëballen me to e t’ia dalin. Më janë shtuar njohjet e reja. Mendoj me vetëvlerësimin që kam për veten, ndoshta jam unë difekti dhe jo ai djali që duhet të ishte burri im por në idealin time kam menduar se do bëja 3 fëmijë. Jeta erdhi ashtu e paparishikuar. Jam e lumtur që nuk kam bërë zgjedhjen për një prind të gabuar,”- tha ajo e ftuar në emisionin “E diell” në 2020.

Një tragjedi e dyfishtë ka goditur familjen Plummer, pas humbjes së dy anëtarëve të saj të dashur. Alan Plummer, bashkëshorti i prezantueses së njohur Erin Jayne Plummer, është gjetur i vdekur të dielën në plazhin e ujërave të ëmbla në Sydney, dhe besohet se ka kryer vetëvrasje. Vdekja e tij pasoi humbjen tragjike të gruas së tij, Erin, e cila ka ndërruar jetë pas një beteje të gjatë me shëndetin mendor në vitin 2022.

Kjo ka lënë pas tri vajzat e çiftit – 18, 15 dhe 11 vjeç – që tani janë jetimë dhe përballen me dhimbjen e humbjes së dy prindërve të dashur. Erin Jayne Plummer ishte një figurë e dashur për miliona shikues në Australi dhe më gjerë. Me buzëqeshjen e saj të njohur “megavat” dhe natyrën energjike, ajo bëri emër si prezantuese e Studio 10, shfaqjeve të njohura stërvitjeje dhe reklamave televizive.

Ajo ishte gjithashtu një sportiste e talentuar, duke përfaqësuar Australinë në notin sinkronizuar dhe shpëtimin e jetës. Erin u bë një simbol i shëndetit dhe aktiviteteve fizike, dhe kaloi shumë vite duke udhëhequr programe si Aerobics Oz Style, që kishte një audiencë globale prej 40 milionësh në kulmin e saj. Pas vdekjes së saj, shikuesit dhe kolegët në Studio 10 kujtuan Erinën për energjinë dhe rrezatimin që ajo sjellë në ekran. Bashkëprezantuesja e saj, Sarah Harris, e përshkroi atë si një person “të mrekullueshëm brenda dhe jashtë”, duke theksuar se gjithmonë do t’i mungonte “dielli” i saj në studio.

Ajo u nderua për personalitetin e saj të ngrohtë dhe përkushtimin ndaj familjes, duke u përshkruar nga miqtë si një “mama me medalje ari” për tri vajzat e saj. Pasi humbi gruan e tij në maj 2022, Alan Plummer ka luftuar me shëndetin mendor dhe problemet personale. Thuhet se pas vdekjes së Erinës, ai ishte në një periudhë të vështirë dhe kishte shfaqur shenja të trishtimit dhe ndihmës të pamjaftueshme. Tragjikisht, Alan ka humbur jetën në një mënyrë që ka tronditur të gjithë ata që e njihnin. Ai u gjet i vdekur pranë plazhit të ujërave të ëmbla, një vend i njohur për Erinën, dhe besohet se ka kryer vetëvrasje.

Ky lajm ka sjellë një tjetër valë dhimbjeje për vajzat e çiftit, që tani janë të detyruara të rriten pa të dy prindërit e tyre. Vajza më e madhe e familjes, që sapo kishte përfunduar provimet e shkollës së mesme, ishte jashtë për të festuar ditëlindjen e një shoqeje kur mori lajmin tronditës për vdekjen e babait të saj. Tri vajzat e familjes Plummer tani janë jetimë, duke përballuar një dhimbje të paimagjinueshme, që u është imponuar në një periudhë shumë të vështirë të jetës së tyre.

Është arrestuar nga policia në Kosovë autori i dyshuar i një vrasjeje të dyfishtë, mbrëmjen e sotme në ambientet e një lokali në Klinë.

Ai është 21-vjeçari Adrian Hoti, djali i ish-kandidatit të LDK-së për kryetar të Klinës, rreth 21 vjeçar nga fshati Jashanicë.

Ngjarja e rëndë ndodhi në një lokal, dyshohet pas një konflikti, ku autori nxorri armën dhe qëlloi drejt dy personave duke lënë njërin të vdekur në vend dhe tjetrin të plagosur rëndë.

Personi i plagosur ndërroi jetë pak çaste më pas në spital.

Ende janë të paqarta motivet e ngjarjes së rëndë.

Një ngjarje e rëndë para pak minutash ka tronditur qytetarët e Klinës në Kosovë.

Dy persona raportohet se kanë mbetur të vrarë në një lokal pas një përleshje me armë zjarri.

Sipas autoriteteve policore ngjarja ka ndodhur në sheshin “Mujë Krasniqi” në një lokal.

“Rreth ores 17:15 policia është njoftuar për të shtëna me armë zjarri në sheshin “Mujë Krasniqi” në një lokal sipas informatave të para një person është pa shenja jete vdekjen e ka konstatuar mjeku kujdestar, ndërsa një person tjetër është dërguar në emergjencë”, ka thënë zëdhënësi i policisë.

Momentalisht nuk ka informacion shtesë për motivet e ngjarjes apo identitetin e personave të përfshirë.

Në emisionin “Ndryshe” ishte e ftuar artistja e njohur Albërie Hadërgjonaj, e cila ndau detaje të reja për jetën e saj personale dhe profesionale, si dhe për projektet që pritet të publikohen këtë muaj. Albëria u bë nënë në moshën e hershme të 16 vjeç, dhe kur u pyet për mendimin e saj mbi martesën në rini, ajo dha një këshillë për vajzat e reja:

“Martesa në moshë të re nuk është gjithmonë e shëndetshme. Në kohën time, ishte një mentalitet i prapambetur, por sot vajzat duhet të bëjnë kujdes me vendimet e tyre.”
Në bisedën e saj, ajo foli edhe për marrëdhënien aktuale me ish-bashkëshortin, me të cilin nuk kishte folur për vite të tëra. “Nuk e doja ta shikoja me sy për një kohë të gjatë, por tani jemi mirë, secili ka jetën e tij dhe jam e lumtur për të,” u shpreh ajo.E pyetur për arsyen pse nuk është martuar sërish, Albëria shtoi me një buzëqeshje:“Kur bën një gabim një herë, të dytën jo. Kam mësuar që lumturia vjen nga brenda dhe askush nuk mund ta japë atë nëse nuk je mirë me veten.”Duke u ndalur në rolin e saj si nënë, Albëria pranoi se ka qenë një nënë shumë e përkushtuar, ndonjëherë edhe më shumë sesa do të dëshironte. Sot, vajzat e saj janë të realizuara, dhe Albëria është krenare që i sheh të angazhuara në projekte të reja, të cilat kanë kërkuar një vit përgatitje.“Jeta vazhdon,” përfundon ajo, “dhe lumturia ime është të shoh vajzat e mia të suksesshme dhe të lumtura.”

Më pak se një javë pas votimit që ia ktheu Shtëpinë e Bardhë dhe, me sa duket, kontrollin e Dhomës dhe Senatit në duart e republikanëve, kancelaritë e vendeve aleate me Shtetet e Bashkuara po presin me ankth inaugurimin më 20 janar 2025 të Donald Trump. Partnerët historikë të SHBA-së kanë frikë se mandati i dytë i manjatit mund të karakterizohet nga një politikë e jashtme izoluese me pasoja katastrofike, ndër të tjera, për Evropën, Japoninë, Korenë e Jugut dhe Tajvanin.

Megjithatë, sipas asaj që u pretendua nga bashkëpunëtorët më të afërt të Donald Trump, të intervistuar nga “Wall Street Journal”, ajo që ne mund të dëshmojmë në katër vitet e ardhshme, raporton gazeta e Nju Jorkut, nuk do të jetë tërheqja e Shteteve, por kthimi i tyre në skenën botërore në emër të rivendosjes së marrëveshjeve parandaluese dhe transaksionale me aleatët.

Paqe përmes forcës

Ka shumë zona krize, nga Ukraina në Lindjen e Mesme përmes Detit të Kinës Jugore, të cilat Shtëpia e Bardhë nuk mund t’i lejojë vetes t’i injorojë dhe të cilat, pavarësisht qasjes më tradicionale në politikën e jashtme të ndjekur nga Biden, janë prekur nga një përkeqësim i balancimi i fuqive pikërisht në dëm të ndikimit amerikan. “Do të ketë një kthim të paqes përmes forcës,” thotë Robert O’Brien, ish-këshilltar për sigurinë kombëtare gjatë presidencës së parë të Trump. O’Brien, i cili mund të gjejë një vend në administratën e re, pretendon se “parandalimi do të rivendoset” dhe se armiqtë e Amerikës e kuptojnë se nuk mund t’i shpëtojnë më siç bënë me Biden në pushtet. Gjenerali në pension Keith Kellogg, i cili punoi në Shtëpinë e Bardhë në vitet e Trump I, shpjegon se republikani “do të kontaktojë liderët kryesorë për të kërkuar dhe gjetur një zgjidhje për problemet.” Për Kellogg, miratimi i sanksioneve dhe përdorimi i forcës brutale do të jenë gjithmonë opsione në tryezën e presidentit, por ato nuk do të jenë zgjedhja e tij e parë.

Politika e jashtme

Edhe nëse nuk është e qartë se si Trump dëshiron të zhvillojë marrëdhëniet me Kontinentin e Vjetër dhe me NATO-n dhe e pranon se ai mund të shtyjë për tërheqjen e trupave amerikane nga Siria dhe Iraku, sipas burimevenga “Wall Street Journal”, Kina dhe Irani do të jenë në krye të listës prioritare të manjatit. Trump nuk i beson më udhëheqësit kinez Xi Jinping dhe dëshiron të nisë një luftë të re tregtare kundër gjigantit aziatik duke synuar të ushtrojë një politikë ” presioni maksimal” ndaj Teheranit. Të panjohurat më të mëdha mbeten padyshim dy frontet e luftës në Izrael dhe Ukrainë dhe evoluimi i mundshëm i marrëdhënieve të Donaldit me kryeministrin izraelit Benjamin Netanyahu , nga njëra anë, dhe me rusin Putin dhe ukrainasin Volodymyr Zelensky, nga ana tjetër. Trump do të donte gjithashtu t’i jepte fund konfliktit në Ukrainë shpejt dhe me çdo kusht.

Ultimatumi për Izraelin

Nëse është e vërtetë që Trump do t’i kishte dhënë Bibit dritën jeshile për të përdorur një grusht të hekurt në luftën kundër Teheranit, republikani ka çdo interes të shohë një përfundim të shpejtë të krizës së Lindjes së Mesme me një objektiv në mendje: të përfshijë Arabinë Saudite në Marrëveshjet e Abrahamit, seria e marrëveshjeve të nënshkruara me ndërmjetësimin e Shteteve të Bashkuara midis Izraelit dhe disa fqinjëve të tij arabë. Nga ana e tij, ndërsa është plotësisht pas Izraelit, Trump dëshiron që luftërat në Gaza dhe Liban të përfundojnë deri në inaugurimin e tij më 20 janar, dhe këtë ia bëri të qartë Netanyahut. Ai gjithashtu informoi administratën Biden se pret përparim në përpjekjet për të arritur një armëpushim midis Izraelit dhe Hezbollahut. Por Joe Biden është ende në pushtet në SHBA, kështu që Ministri i Çështjeve Strategjike të Netanyahut, Ron Dermer, udhëtoi në Uashington për të provuar të negociojë me amerikanët një mënyrë për të bërë përparim në armëpushimin në Liban. Megjithatë, qeveria e Netanyahut nuk po llogarit në një fund të afërt të luftës.

Komisioni Parlamentar i Mbrojtjes i Kroacisë në seancën e sotme mbështeti njëzëri blerjen e tetë sistemeve raketore HIMARS, me vlerë gati 290 milionë dollarë.

“Me HIMARS-in, Forcat e Armatosura po marrin një aftësi të re që nuk e kishin më parë. Bëhet fjalë për aftësitë e goditjeve të sakta dhe efektive me raketa me rreze të gjatë veprimi”, tha Tihomir Kundid, Shefi i Shtabit të Përgjithshëm të Forcave të Armatosura.

“Padyshim që paraqet një kërcim kuantik në kuadrin e aftësisë së forcave të armatosura kroate në zbatimin e goditjeve me raketa precize dhe me rreze të gjatë, përfaqëson një epokë të re në njësitë e raketave artilerie, si sistem është më precizi dhe më efektivi në krahasim me sistemet e tjera”, vuri në dukje ai, shkruan index.hr.

Ministri kroat i Mbrojtjes Ivan Anushiq shpjegoi se paketa përfshin tetë raketa-hedhës HIMARS dhe 394 raketa, si dhe mallra të tjera, shërbime, trajnime dhe mbështetje logjistike të nevojshme për funksionimin efektiv të sistemit. Sistemi do të dorëzohet në vitin 2028 dhe raketat do të vijnë me të, tha ministri.

HIMARS është një sistem artilerie jashtëzakonisht i lëvizshëm. Sistemi, i zhvilluar në fund të viteve 1990, përfshin një kamion, një sistem kontrolli dhe një raketë. Ai u krijua si një version më modern, më i lehtë dhe më i shkathët i sistemit të raketave të gjurmuara M270 MLRS.

HIMARS mund të ketë një kapsulë të parapërgatitur me gjashtë raketa të drejtuara me kalibër 227 mm. ose një kapsulë të madhe të ngarkuar me raketën taktike ATACMS që ka një rreze veprimi prej 300 kilometrash. Një ekip i vogël prej tre personash mund të heqë kapsulën e përdorur dhe të ngarkojë një të re brenda disa minutash, pa ndihmën e mjeteve të tjera.

Blerja e një sistemi të tillë do të ndryshojë ekuilibrin në rajon, ku askush nuk ka HIMARS. Në Evropë, sipas informacioneve të disponueshme, atë e kanë vetëm Polonia, Rumania dhe Ukraina, ndërsa Italia, Letonia dhe Estonia janë në proces të pajisjes me të.

HIMARS pritet të rrisë ndjeshëm fuqinë zjarrit të ushtrisë tokësore kroate dhe do të jetë një mjet i fuqishëm parandalimi.

VIDEO

Rroga e presidentit të Amerikës është gjashtë herë më e lartë se paga mesatare në këtë vend.

Megjithatë, njeriu i parë i Shteteve të Bashkuara nuk merr miliona – siç mund të mendojnë disa.

Paga e tij vjetore është 400,000 dollarë ose mbi 33.000 dollarë në muaj. Ai po ashtu ka një bonus shtesë prej 50,000 dollarë për shpenzime tjera.

Megjithatë, presidenti amerikan nuk duhet të paguajë qiranë, ai ka staf falas, makinë dhe mjete të tjera transporti.

Kur del në pension, ai ka të drejtë për një pension vjetor prej 240,000 dollarë për pjesën tjetër të jetës së tij./INA/

Gjatë një bashkëbisedimi online me qytetarët, kretari i Partisë Demokratike, Sali Berisha, shpalosi edhe objektivat ekonomikë të opozitës, kur të vijë në pushtet.

Në fjalën e tij, Berisha tha se objektivi i padiskutueshëm i PD-së kur të vijë në pushtet, është rroga minimale 500 euro.

“Problem themelor sot, krahas rivendosjes së gjyqeve politike, burgosjeve politike, është problemi ekonomik. Sot, në qoftë se marrim disa tregues, në qoftë se marrim rritjen ekonomike dhe kontot apo portofolët e qytetarëve, në një zhvillim ndër më dramatikët, por jo i vetëm se është tipik i diktaturave, konstatohet se rritja ekonomike u dyfishua, por varfëria u trefishua.

Dhe të dy llojet e varfërisë, si varfëria ekstreme apo mjerimi, i cili ishte 1.04 përqind në vitin 2013 dhe sot është 3.4 përqind, pra është mbi 3 herë më shumë, ashtu edhe varfëria relative, e cila nga 13 përqind ka arritur në 46 përqind. Për ta bërë më të qartë për qytetarin, po marrim pensionistët. Pensionisti në vitin 2013 merrte një pension 140 mijë lekë. Sot, pa asnjë rritje por vetëm duke pretenduar për indeksim, ky pension është 180 mijë lekë. Por sot me 180 mijë lekë, ky pensionist blen 50 përqind më pak nga sa blinte me 140 mijë lekë. Sot buka është dy herë më shtrenjtë se në vitin 2013. Sot qumështi, gjalpi, djathi, domatet, zarzavatet kanë një çmim dy herë më të shtrenjtë se në vitin 2013.

Dhe, ku është dramatikja, janë nga 10 gjer në 250 përqind gjërat më bazë se shtrenjtë se në Itali, Greqi, Gjermani, në vendet që kanë një rrogë minimumi 4 deri në 8 herë më të lartë se shqiptarët. Pensionisti shqiptar, pse po rikthehem, më i dhimbshmi, se qëndrimi ndaj tyre përbën një qëndrim thellësisht çnjerëzor.

Pensionisti shqiptar sot merr 3 herë më pak se pensionisti maqedonas. Merr 3 herë më pak se pensionisti serb, malazez, boshnjak, etj. Merr 30-40 përqind më pak se pensionisti i Kosovës.

Po marr vendimin e fundit të qeverisë së Kosovës. Albin Kurti vendosi të rrisë pensionet 20 përqind. Fondi i përgjithshëm i pensioneve ishte 500 milionë euro. Ai mori 100 milionë euro nga buxheti dhe i vendosi te fondi i pensioneve.

Çfarë bëri Edi Rama? Edi Rama tha do të indeksoj pensionet 4 përqind në mars. Erdhi marsi, zero indeksim. Dhe indeksoi vetëm në tetor. Mirëpo indeksimi në mars ishte ligj parlamenti. Nuk ka kryeministër që mund të lëvizë buxhetin e miratuar në parlament.

Kurse ai ua mbajti indeksimin e pensioneve nga marsi gjer në tetor dhe ua dha për tre muajt e fundit nga 400 gjer në 700 lekë shtesë. Pjesën që nuk e dha do e ofrojë për bonus në dhjetor, në një kohë kur në parlament është një buxhet 8.2 miliardë euro.

A mund të imagjinoni ju qytetarë që në 8.2 milardë euro, rreth 800 mijë pensionistëve t’u lihen vetëm 16 milionë euro. Indeksim për vitin e ardhshëm vetëm 16 milionë euro.

A mund të imagjinoni ju, 40 përqind të shqiptarëve që jetojnë në fshat, t’u lihen për mbështetje fermerëve 40 milionë, një një kohë kur ata japin 40 përqind të prodhimit të brendshëm.

Çfarë ka bërë ky me rrogat e larta? Sot janë rrogat më të larta në rajon. Rrogat e Skapistëve janë më të larta se rrogat e kardinalëve në Vatikan, se të ministrave që është një shtet i pasur. Sepse i duhen për t’i përdorur për gjah kundër opozitës.

Pra, ky nuk ishte indiferent, por i përdori të gjitha këto për të ndëshkuar shumicën dhe për të shpërblyer pakicën.

Ajo që ndodh me Shqipërinë nuk ndodh në asnjë vend tjetër. Praktikat e vjedhjeve në bashki të Edi Ramës janë bërë praktika shtetërore. Edi Rama kur një ndërtues aplikonte për lejen e ndërtimit të një pallati me tre shkallë, i jepte leje për shkallën e parë. Për të vazhduar punën për shkallën e dytë duhej të paguante prapë.

Çfarë bën sot Lubi Balluku? Këta tejkalojnë çdo lloj imagjinate. Unaza e Tiranës, e cila ka filluar në vitin 2010, e cila është gjithsej 27 km, në një hark kohor 3-vjeçar ne kemi ndërtuar 20 km tunel, këto 27 km pa tunel në terren të butë, nga viti 2013 gjer tani, tre lotet e para u ndërtuan në vitet 2010-2013, këtë vit ka arritur të ndërtohet vetëm gjysma e unazës. Dhe del Lubia e mashtron në parlament.

Çfarë ka bërë? E ka copëtuar në 14 kontrata. Po ka hajdutë më të shpërfytyruar se këta? Dhe ajo ulet në tryeza me biftek 1 mijë euro, se nuk mund ta ketë biftekun nën 1 mijë euro.

Pa dyshim që PD ka një përgjigje të shkëlqyer, së pari ne në parlament u futëm për të mbrojtur minimumin jetik prej 200 eurosh, që do vendoset me buxhetin e parë.

Sigurisht për një buxhet me 8 miliardë është e paimagjinueshme që të ketë njerëz të marrin thërrime.

Buxheti është i mirëqenies së qytetarëve, i shpërblimit të qytetarëve, i investimit te kapitali njerëzor mbi të gjitha.

Pra, këto marrin fund.

Së dyti, objektiv i padiskutueshëm është rroga minimale 500 euro. Nuk do rriten rrogat maksimale, ta dinë. Krim, rroga maksimale sot në Shqipëri janë më të larta se në Slloveni, që i ka të ardhurat për frymë 4 herë më të larta.

Rrogat sot duhet të ishin absolutisht të trefishuara me ritmet që ndoqëm ne. Kurse ky bëri një rritje vitin e kaluar, asnjë rritje nuk bëri këtë vit.

Për ta mbyllur, fondet publike dhe pasuritë publike të shqiptarëve do shpërndahen me pasurimin: e mira më e madhe, numrit më të madh. Është një parim xheksonian që ka frymëzuar dhe duhet të frymëzojë çdo qeveri në të gjitha kohërat”, u shpreh Berisha.