Month: February 2025

Më 28 shkurt 2025, shënohet dyvjetori i aksidentit tragjik në Temp, ku 57 persona humbën jetën. Ky përvjetor do të shënohet me mitingje dhe protesta në 233 vendbanime në Greqi dhe në mbarë botën.

Shoqata e Familjarëve të Viktimave Tempi ka shpërndarë një hartë interaktive ku shtohen vazhdimisht qytetet që do të organizojnë aktivitete, me qëllim shprehjen e kërkesës për drejtësi dhe transparencë mbi ngjarjen.

Ky mobilizim ka tejkaluar çdo pritshmëri, duke përfshirë pjesëmarrës nga vende si Qipro, Toronto, Kreta dhe Islanda. Pjesëmarrësit do të dalin në rrugë dhe sheshe për të kërkuar sqarim të plotë të rrethanave të aksidentit.

Shoqata e të afërmve falënderon për mbështetjen dhe thotë: “Ejani të bashkojmë forcat në luftën për drejtësi.” Po ashtu, dhjetëra federata dhe konfederata të punëtorëve kanë njoftuar mbështetje për protestën e përgjithshme./Zougla/

Avokati shqiptaro-amerikan Peter Lumaj ka hedhur poshtë zërat se ish-ambasadorja amerikane në Tiranë, Yuri Kim është pushuar nga puna në Departamentin amerikan të Shtetit dhe se është nën hetim.

Lajmi u përhap në disa media dhe në rrjetet sociale në Shqipëri, por sipas deklaratës që Lumaj bëri në emisionin “Breaking” në Top News, Yuri Kim vijon të jetë në detyrë dhe nuk është nën hetim.

Ai tha se këto pretendime kanë dalë vetëm nga dy burime shqiptare ndërsa në SHBA as që nuk flitet për diçka të tillë. Sipas Lumajt, tashmë në DASH po diskutohet nëse Kim do të qëndrojë apo të do largohet nga posti që ka mbajtur.

“Janë vetëm dy burime që nuk janë zyrtare që tregojnë që Yuri Kim mund të jetë nën hetim në SHBA. Kjo nuk është e vërtetë. Të dy burimet janë shqiptare. Nëse kontakton Departamentin e Shtetit, ta japin informacionin si gazetar menjëherë. Nuk ekziston hetim i fshehtë.

Yuri Kim vazhdon të jetë në pozicionin që ka dhe po diskutohet nëse do të vazhdojë të jetë në këtë pozicion. Është në seksionin për Azinë dhe Europën. Nuk ekziston hetim dhe këto janë deklarata të bëra në rrjetet sociale”, u shpreh avokat Lumaj.

Pak javë më parë mori vëmendje të madhe nga Kuvendi Kombëtar i Forumit Rinor të Partisë Socialiste kur e quajti veten dhe të rinjtë e PS-së si petalet më të bukura të trëndafilit socialist.

Por tani, Dasho Veizaj duhet të përballet me prokurorët e SPAK-ut teksa është kallëzur në Prokurorinë e Posaccme me akuzën e falsifikimit të dokumenteve.

Ai deklaroi publikisht se ka lindur dhe është rritur në Lushnjë, ndërkohë që sikurse provohet nga lista e zgjedhësve, por edhe një foto e publikuar në rrjetet sociale, rezulton se ka votuar në zgjedhjet e pjesshme për bashkinë e Himarës vitin e kaluar.

Ish-kandidati i opozitës në këto zgjedhje, Petro Gjikuria, i ka kërkuar SPAK-ut që krahas kallëzimit që ka bërë për lëvizjen e votuesve në favor të rivalit të tij, Vangjel Tavo, të hetohet edhe ky rast.

“Sa kohë që shtetasi Dasho Veizaj, publikisht deklaron se ka lindur dhe është rritur në Lushnjë, ka dyshime të arsyeshme se transferimi prej tij i gjendjes civile në bashkinë Himarë është kryer në shkelje të ligjit nr. 10129/2009 duke përdorur dokumentacion të falsifikuar për të provuar vendbanimin apo qëndrimin e tij në Bashkinë Himarë, me qëllim mbështetjen e një subjekti të caktuar zgjedhor, konkretisht kandidatit të Partisë Socialiste, “petal” i së cilës është edhe ai”, shkruan ndër të tjera Gjikuria.

Pas akuzave të kreut të PD-së, Sali Berisha ndaj bashkëshortes së Bledi Çuçit, Delina Fico, ka reaguar kjo e fundit.

Berisha e akuzoi Ficon se ka marrë 10 milionë dollarë fonde nga USAID, teksa i bëri thirrje FBI-së amerikane ta hetojë atë për shpërdorim të parave të taksapaguesve amerikanë.

Por Fico thotë se ajo nuk ka përfituar asnjë fond prej vitit 2010, dhe se deklarimet e të ardhurave i bën rregullisht në ILDKPKI. Ajo shton se një fond prej 10 milionë dollarësh nga USAID e ka marrë organizata me bazë në Nju Jork “EËMI” ku ajo mban postin e Drejtores për Programet e Shoqërisë Civile.

Reagimin e Ficos e ka shpërndarë edhe bashkëshorti i saj Bledi Çuçi, i cili shkruan: “Për transparencën e akuzave që dalin nga puseta e Saliut.”

Reagimi i plotë:

Ky sqarim është për dashamirësit dhe për ata që duan të mësojnë fakte e ta formojnë mendimin mbi bazën e tyre. Kurse ata që ngrihen në mëngjes me etjen për të urryer këdo që ju del përpara, dhe që punonjë gjithollogë, as mos lodhen ta lexojnë fare këtë sqarim e aq më pak të komentojnë, sepse ata shkojnë për Delete dhe Block.

E para, që nga viti 2010, UNË NUK KAM MARRË ASNJË PAGESË, PRA, 0 (ZERO) DOLLARË/EURO/LEKË, NGA FONDE TË USAID OSE TË DEPARTAMENTIT TË SHTETIT TË SHBA-VE PËR SHQIPËRINË. Po ashtu, që prej vitit 1997, të ardhurat e mia burojnë nga punësimi me organizata jofitimprurëse dhe kompani amerikane, si dhe agjensi të OKB-së. Kurse puna ime e paguar që prej vitit 2010 nuk ka asnjë lidhje financiare ose programatike me Shqipërinë.

E dyta, që prej vitit 2014, unë bëj deklarim vjetor të të ardhurave dhe aseteve në ILDKPKI, për shkak të faktit që bashkëjetoj me Bledi Çuçin, i cili ka pasur e ka detyra, të cilat e bëjnë të detyrueshëm deklarimin e aseteve në këtë Inspektoriat. Gjatë kësaj periudhe, kemi kaluar me sukses dy herë kontroll të detajuar të deklarimit të të ardhurave dhe aseteve nga ILDKPKI. Kushdo mund të marrë lirisht informacion nga ILDKPKI për të ardhurat e asetet e mia.

E treta, që prej vitit 2010, unë jam e punësuar nga Instituti i Menaxhimit Lindje-Perendim (EËMI), një organizatë jofitimprurëse amerikane me qendër në Nju Jork, si Drejtore për Programet e Shoqërisë Civile. Në 30 vitet e fundit, EËMI ka zbatuar disa programe të financuara nga qeveria amerikane për forcimin e sundimit të ligjit në Shqipëri. Për shembull, gjatë periudhës 2016 – 2021, EËMI zbatoi në Shqipëri programin “Drejtësi për të Gjithë”, të financuar nga USAID, me vlerën totale 10 milionë dollarë. Ky program nuk pati asnjë angazhim ose aktivitet që lidhej me reformën në drejtësi. Gjatë periudhës prill 2021 – janar 2025, EËMI zbatoi një program të financuar nga Departamenti i Shtetit të SHBA, me buxhet total rreth 2 milionë dollarë, program që ndihmoi Gjykatën e Lartë të adresojë problemin e dosjeve të prapambetura.

Siç mund të vërtetohet lehtësisht nga dokumentat e ketyre programeve dhe nga të gjithë punonjësit dhe bashkëpunëtorët amerikanë dhe shqiptarë të të dy programeve, UNË NUK KAM MARRË ASNJË PAGESË, PRA, 0 (ZERO) DOLLARË/EURO/LEK, NGA FONDET E KËTYRE DY PROGRAMEVE, dhe unë nuk kam luajtur dhe nuk luaj asnjë rol drejtues, menaxhues, ose këshillues për këto dy programe. Në momente të caktuara, kam luajtur vetëm rolin e përfaqësueses ligjore të EËMI në Shqipëri. 

Ata që më njohin për hir të aktivizmit tim në përkrahje të barazisë gjinore e integrimit social, kjo ka qenë dhe vazhdon të jetë kontributi im vullnetar.

Këto janë faktet. Me shpifësit do të shihemi në gjyq.

Kryeministri Edi Rama ka bërë të ditur se bonusi për pensionistët do të nisë të shpërndahet që nga data 1 mars.

Komentet Rama i bëri përmes një postimi në rrjetin social ‘X’, ku tha se vendimi për bonusin është marrë që në datën 9 janar.

Rama hodhi akuza edhe ndaj opozitës, për të cilën tha se përhapte shpifje dhe lajme të pavërteta, në vend që sipas tij, të kishte vizion dhe program.

Sipas vendimit të qeverisë, bonusin prej 10 mijë lekësh e përfitojnë vetëm ata që kanë pension më pak se 20 mijë lekë.

“Jo vetëm që unë nuk gënjej po flas me përgjegjësi të plotë për çka ka të bëjë me detyrën që më ka dhënë populli, e meqë vizion kanë akuzën, program kanë shpifjen dhe forcë udhëheqëse kanë gënjeshtrën, kudo, kurdoherë e për çdo gjë, e përhapën edhe lajmin që s’ka bonus për pensionistët! Por ja që vendimi për bonusin është marrë që në 9 janar dhe shpërndarja nis në 1 mars. Ta gëzojnë pensionistët dhe Zoti paftë e bëftë për ata që luajnë edhe me nervat e tyre”

Presidenti amerikan Donald Trump tha se ishte “i zhgënjyer” kur dëgjoi se Kievi u ankua për përjashtimin nga bisedimet midis Shteteve të Bashkuara dhe Rusisë në Arabinë Saudite të martën për t’i dhënë fund luftës në Ukrainë.

“Jam shumë i zhgënjyer, dëgjoj se ata janë të mërzitur sepse nuk kanë vend në bisedime, por ata kishin një vend për tre vjet dhe shumë kohë përpara kësaj,” u tha ai gazetarëve në Mar-a-Lago kur u pyet se çfarë do t’u thoshte ukrainasve që ndihen të “tradhtuar”.
Trump foli për herë të parë që kur delegacioni amerikan nisi një dialog pune me Rusinë për Ukrainën gjatë bisedimeve në Riad gjatë ditës së djeshme.

Ai tha gjithashtu se Ukraina mund të kishte bërë një marrëveshje vite më parë dhe përsëriti se mund t’i japë fund kësaj lufte.

“Unë mendoj se kam fuqinë për t’i dhënë fund kësaj lufte,” shtoi ai, pasi tha se ishte “shumë më i sigurt” për një marrëveshje me Rusinë pas bisedimeve të së martës në Arabinë Saudite.
Presidenti amerikan tha se Zelensky nuk duhej ta kishte nisur luftën dhe u bëri thirrje ukrainasve të shkojnë në zgjedhje.

“Ne kemi një situatë ku nuk kemi pasur zgjedhje në Ukrainë, pasi ka gjendje ushtarake ku lideri në Ukrainë, dua të them, e urrej ta them këtë, por ai ka rënë në 4% popullaritet dhe ku një vend është copëtuar…

“Nëse Ukraina dëshiron një vend në tryezë, a nuk duhet të thotë populli se ka kaluar shumë kohë që kur ka pasur zgjedhje

Në shtëpinë e Big Brother VIP Albania 4, banorët kanë marrë disa dhurata.

Një nga dhuratat që tërhoqi më shumë vëmendje ishte një bluzë e dhuruar për Gjestin, në të cilin ishin të vizatuara tri figura historike: Gjergj Kastrioti – Skënderbeu, komandanti legjendar Adem Jashari dhe luftëtari patriot Çerçiz Topulli.

Por një moment i çuditshëm dhe njëkohësisht humoristik ndodhi kur Gjesti, duke parë figurat, kishte vështirësi të njihte Çerçiz Topullin.

Ai e ngatërroi me Jezusin, duke ngjallur reagime dhe të qeshura mes banorëve. Pasi vërejti paqartësinë e tij, ai pyeti banorët e tjerë se kush ishte në të vërtetë figura e tretë në vizatim.

Ky episod u bë menjëherë viral në rrjetet sociale. 

Gjesti ka deklaruar edhe më parë se “nuk e ka pasur qejf shkollën”. Kjo mbase tregon edhe mungesën e njohurive nga ana e tij.

Duket se marrëdhënia mes presidentit amerikan Donald Trump dhe presidentit të Ukrainës Volodymyr Zelensky po shkon drejt krisjes.

Tensionimi i marrëdhënieve erdhi pas deklaratës së Trump të martën, ku fajësoi Ukrainën për nisjen e luftës.

Zelensky në kundërpërgjigje këtë të mërkurë, kritikoi presidentin Trump duke thënë se ai është “i bllokuar në një flluskë dezinformimi”.

Deklarata iu referua pretendimeve të Trump se vlerësimi i miratimit të presidentit ukrainas është vetëm 4%. Zelenskyy tha se ky pretendim ishte një dezinformatë që vjen nga Rusia dhe se Ukraina ka prova që tregojnë se shifrat janë diskutuar në takimin mes zyrtarëve amerikanë dhe rusë.

“Ne e pamë këtë dezinformim. E kuptojmë se vjen nga Rusia. Ne e kuptojmë dhe kemi prova që ato shifra janë diskutuar midis SHBA-së dhe Rusisë,” tha Zelenskyy.

Komentet e Trump erdhën menjëherë pas takimit të delegacionit amerikan me zyrtarë të lartë rusë në Arabinë Saudite. Trump gjithashtu fajësoi Ukrainën për shpërthimin e luftës.

Zelenskyy vuri në dukje se propaganda ruse ka promovuar narrativën se ai është një lider i paligjshëm, duke pretenduar se mandati i tij i parë presidencial duhej të kishte përfunduar në maj të vitit 2024. Ai theksoi se ky pretendim shpërfill kushtetutën ukrainase, e cila ndalon mbajtjen e zgjedhjeve gjatë gjendjes së jashtëzakonshme, e cila ka hyrë në fuqi që nga pushtimi i plotë i Ukrainës nga Rusia në vitin 2022.

Përkundër kritikave, Zelenskyy shprehu respekt për Trumpin dhe popullin amerikan, por shtoi, “mjerë ata që jetojnë në këtë hapësirë dezinformimi”. Ai gjithashtu tregoi dhe sondazhet e fundit ku tregohej një mbështetje 57% për të.

Kujtojmë se Shtetet e Bashkuara dhe Rusia zhvilluan të martën raundin e parë të negociatave për arritjen e një marrëveshjeje paqeje në Ukrainë.

Në takim morën pjesë vetëm zyrtarë amerikanë dhe rusë, ndërkohë që evropianët janë përjashtuar nga bisedimet. Në takim mungonin edhe përfaqësues nga Ukraina.

Si kundërpërgjigje ndaj lënies jashtë në negociata, Evropa ka vendosur këtë të mërkurë një raund të ri sanksionesh ndaj Rusisë.

Sekretari i Shtetit i Trump, Marco Rubio, sugjeron që evropianët të thirren në tryezën e bisedimeve për të diskutuar lehtësimin e sanksioneve ndaj Kremlinit.

Nga ana tjetër, Moska refuzon kategorikisht përfshirjen e Evropës, pasi sipas tyre mund të hidhnin ide dinake që mund të çojnë në dështimin e negociatave.

Një nga elementët kyç që u diskutua në Riad ishte mbajtja e zgjedhjeve të reja në Ukrainë, me supozimin se presidenti aktual, Volodymyr Zelenskyy, ka gjasa të ulëta për t’u rizgjedhur.

Moska beson se një kandidat tjetër do të ishte më fleksibël dhe më i gatshëm për negociata.

Plani i diskutuar përfshin armëpushim në Ukrainë, zgjedhje të reja dhe më pas firmosjen e një marrëveshjeje paqeje.

Një bllok shënimesh në formë ditari, ku përshkruhen shpenzimet financiare për arredimin dhe mirëmbajtjen e “Vilës 4A” në Qerret nxjerr zbuluar, pronësinë faktike të kryebashkiakut Erjon Veliaj dhe Ajola Xoxa, mbi këtë pasuri luksoze.

Blloku me shënime është sekuestruar në 6 dhjetor 2024, në prezencë të dy bashkëpunëtorëve të Ajola Xoxës, Ereald Simixhiut dhe Dashamir Allaraj

Nga ky kontroll ka rezultuar një sërë sendesh, të cilat lidhen me Ajola Xoxën, Valbona Xoxën apo dhe familjarë të tyre.

Ajo çfarë paraqet interes, janë sendet të cilat dokumentojnë lidhjen e Ajola Xoxës me mirëmbajtjen e objektit.

Konkretisht, në banesë është gjetur një bllok i vogël shënimesh, ku në brendësinë e tij dallohet një shënim në dukje i shkruar nga vetë Valbona Xoxa.

Konkretisht kjo e fundit shkruan në datën 3 korrik 2023:

”…sot pagova Kujtimin X Muajt, Mars, Prill, Maj, Qershor, Korrik = 350 mijë lekë. I dhashë 400 mijë (më tha Jolka), meqë ujit edhe oborrin tjetër. Siç më tha Jolka i thashë se që nga Gushti do ta risim rrogën…”.

Ndërsa është pyetur si person që ka dijeni për veprën penale mbi mënyrën se si e thëret në përditshmëri nëna e saj Valbona Xoxa, shtetasen Ajola Xoxa, ajo është përgjigjur shkurtimisht “Jolka”.

Ndër të tjera, në “Vilën 4A”, janë gjendur dhe sekuestruar shënime dore, të cilat kanë lidhje me arredimin dhe mobilimin e vilës si më poshtë vijon:

1. Me tapa + bamboo + koshi i madh.

2. Dhoma e vogël: Pikturë dhe dekor mbi krevat

3. Dhoma e madhe: Bambo, dollap, komodinë, komo, dekor.

4. Dorezat e Shkallëz

Sipas SPAK, këto shënime duket se i përkasin shtetases nën hetim, Ajola Xoxa.

Por përveç sa më lart në bllokun e sekuestruar evidentohen pagesa të tjera mirëmbajtje për pasurinë në fjalë, të cilat shënohen me kujdes nga shtetasja Valbona Xoxa, për faktin se i duhet të raportojë për to tek vajza e saj, Ajola Xoxa, e cila paguan në të vërtetë shpenzimet për këto shërbime.

Lidhur me “Vilën 4A”, është marrë në pyetje në 17 dhjetor 2024 dhe artisti Driant Zeneli, i cili para hetuesve të SPAK ka shpjeguar se kishte dijeni që i përket Ajola Xoxa.

Konkretisht ka deklaruar se: “…më ka thënë Ajola disa herë që mund të shkoja me djalin tek shtëpia-në Qerret, por nuk kam shkuar asnjëherë. Unë kam bërë pushimet tek resorti “Marea” Qerret, por i kam paguar vetë. E kam njoftuar dy tre herë që jam te resort “Marea”. Më ka thënë që do vinte, por në të vërtetë nuk e ka takuar…”.

Ndërsa kryetari i bashkisë Tiranë po përpiqet nga dhomat e paraburgimit të Durrësit, të nxjerë fakte dhe fotografi për të provuar se “Vila 4A” në resortin “Marea” në Qeret është e vjehrit të tij,Arben Xoxa, ndryshe ka deklaruar në SPAK shoferi personal i të ndjerit Xoxa.

Veliaj ka pretenduar se “Vila 4A” është në pronësi të Arben Xoxës, qysh përpara se ai të lidhte kororë martesore me vajzën e tij, Ajola.

Por këto pretendime rrëzohen nga SPAK duke sjellë si kundërprova dëshminë e shoferit personat dhe një blloku shënimesh, ku tregohen se të gjitha lëvizjet financiare për mobilimin e vilës së re, e deri tek mirëmbajtja e pishinës, janë kryer nga Ajola Xoxe dhe Erjon Veliaj.

Dëshmia e shoferit Armand Manahasa ndodhet në dosje dhe është marë në 16 Janar 2025, i cili ka shpjeguar se për disa vite me rradhë ka shërbyer si shofer personal i të ndjerit Arben Xoxa.Por pas vdekjes së tij në 2019, ai ka vijuar të shërbejë si shofer personal, për vajzën e Arbenit, Ajola Xoxa deri në vitin 2021.

I pyetur nëse ka shoqëruar ndonjëherë shtetasin Arben Xoxa tek Vila në Qerret, shoferi Armand Manahaas është shprehur në SPAK se nuk ka qënë asnjëherë atje me Arben Xoxën dhe vetë nuk e ka dëgjuar ndonjëherë të përmendej kjo vilë prej, shtetasit Arben Xoxa.

Kjo hedh poshtë pretendimin e Veliaj se “Vila 4A” është trashëguar nga Arben Xoxa.

Për më tepër oficerët e BKH-së dhe prokurorët e SPAK ka gjetur dhe sekuestruar bllokun e shënimeve ku pasqyrohen shpenzimet për arredimin dhe mobilimin e vilës./Oranews

Meteorologia Tanja Porja ka parashikuar sesi do të jenë kushtet e motit gjatë ditëve në vijim.

Porja tha se deri në datën 22 shkurt na pret një mot i ftohtë, por i qëndrueshëm, me kthjellime dhe vranësira kalimtare

Sipas meteorologes, temperaturat e ulëta do të zgjasin deri në datën 25 shkurt, datë pas së cilës do të ketë një përmirësim të dukshëm të kushteve të motit.

“Moti stabël, kryesisht me kthjellime dhe vranësira kalimtare, por edhe me temperatura të ulëta, do të na shoqërojnë të paktën deri nga data 22-23. Fillon pas datës 22 një rritje e lehtë, por nuk është se do ta ndiejmë.

Në fakt temperaturave të fillimit të shkurtit do i rikthehemi pas datës 24 shkurt. Domethënë fundjava që ne lamë pas pati temperatura shumë pranë 18 gradë. Pra pas datës 25 shkurt fillon të ndihet rritja e temperaturave”, tha mes të tjerash meteorologia Tanja Porja.