Month: January 2026

Mbrëmja e sotme në “Big Brother VIP 5” pritet të jetë vendimtare për ekuilibrat e shtëpisë, e cila tashmë është e ndarë në dy ambiente, duke nxjerrë në pah ndjesi të fshehura dhe tensione të reja.

Sipas promos zyrtare, spektakli i sotëm do të fokusohet te marrëdhëniet e mbetura pezull dhe te pyetja se kush ka të drejtë në konfliktet e fundit.

Por dinamika pritet të ndryshojë sërish, pasi produksioni ka konfirmuar se do të ketë hyrje të reja që do t’i bashkohen garës.

“Shtëpia nuk është më e njëjta. Ndarja e banorëve në dy ambiente nxjerr në pah ndjesi të fshehura,” thuhet në njoftimin zyrtar.

Përveç surprizave emocionuese dhe debateve të pashmangshme, sonte është gjithashtu një natë e rëndësishme për lojën strategjike, pasi do të zhvillohen nominimet e para, duke vënë zyrtarisht banorët përballë rrezikut të eliminimit.

E ftuara speciale e kësaj radhe në podcastin e Grida Dumës ka qenë motra e saj, Geris. Një figurë që prej vitesh ka zgjedhur të qëndrojë larg kamerave dhe vëmendjes publike, Geris ka vendosur që këtë dalje të parën televizive ta ndajë pikërisht përballë motrës së saj, në një intervistë të veçantë dhe personale.

Gjatë bisedës, ajo ka rrëfyer për jetën e saj në Shtetet e Bashkuara të Amerikës, ku është zhvendosur që në moshë të vogël. Geris ka ndalur te rrugëtimi i saj akademik dhe profesional, duke treguar se fillimisht ishte fokusuar në muzikë, pasi kishte studiuar për kanto, por më pas kishte vendosur të linte këtë fushë për t’iu përkushtuar kriminalistikës.

Një nga aspektet më interesante të rrëfimit të saj ishte përvoja në kuadër të studimeve, ku ajo ka intervistuar të burgosur shqiptarë në burgje amerikane.

Sipas saj, një element që i bashkonte këta individë ishte karizma dhe aftësia e tyre për t’u përshtatur socialisht, një tipar që ajo e lidhte me mënyrën e socializimit në Shqipëri.

Geris: Shqipëria të jep një lloj socializimi kaq të shëndetshme, ulesh, flet e përmend, komunitetet e vogla njihen. Ndërsa në Amerikë nuk mund të njihesh me të gjithë. Pjesë e doktoraturës, të cilët nuk e përfundova ishte që të shkoja nëpër burgje edhe ishte shumë interesante kur i flisje këtyre njerëzve që ishin shqiptarë

Grida: Që ishin shqiptarë të krimit të organizuar dhe që ti mi dërgoje mua, u shfaq ky, u shfaq ky.

Geris: Ishin nga Shqipëria, Maqedonia edhe Kosova. Edhe ishte shumë e bukur ajo gjëja, pasi të shkoje aty duhet të hiqje tualetin, duhet të visheshe me gjëra të mëdha. Do futeshe në atë gjënë që ai personi të ishte komod. Dhe unë dalloja një gjë shumë interesante që kishin ata si avantazh. Meqenëse ishte një avantazh për keq. Shqiptarët ishin karizmatikë. Kam mbarë mbi 47 orë intervista me këta individë. Ishin karizmatikë.

Kur i thoja që çfarë të bëri të vazhdoje këtë rrugë, pasi ishe mirë, pasi në Amerikë ke një standart jetese më mirë se ccfarë ke pasur dhe thoshin:” Mundësitë ishin të mëdha dhe unë brenda natës mund të ndryshoja jetën e të gjithë familjarëve të mi”. Edhe e kam dalluar këtë, ka një socializim shumë të mirë në Shqipëri. Nëse themi që këtu adoleshentët janë më dembelë, pasi aty sa mbushin 18 apo 16 vjeç nisin punën këtu ka diçka që mungon.

Mënyra se si drejtuesit e shteteve në Ballkan reaguan ndaj sulmit amerikan në Venezuelë ka nxjerrë në pah një kontrast në qëndrimet politike mes vendeve të rajonit, por edhe brenda hapësirës shqiptare.

Shqipëria dhe Kosova, dy nga aleatë të zellshëm të Uashingtonit në Evropën Juglindore, u pozicionuan hapur në krah të SHBA, por mënyra dhe niveli i këtij pozicionimi tregojnë dallime domethënëse politike dhe simbolike.

Në Tiranë, reagimi erdhi nga Ministria e Jashtme. Ministrja Elisa Spiropali deklaroi se Shqipëria “qëndron pa mëdyshje përkrah Shteteve të Bashkuara” dhe presidentit Donald Trump në veprimin kundër asaj që ajo e quajti “regjimi narko-terrorist i Venezuelës”. Ajo shtoi gjithashtu mbështetjen për Sekretarin amerikan të Shtetit, duke vlerësuar “udhëheqjen e fortë” të Marco Rubios në “përballjen me autoritarizmin, korrupsionin dhe rrjetet kriminale transnacionale”. Deklarata e qeverisë shqiptare ishte e drejtpërdrejtë dhe pa nuanca, por mbeti e kufizuar në nivel ministror.

Në Kosovë, tabloja ishte ndryshe, pasi reagimi erdhi nga maja e shtetit. Presidentja Vjosa Osmani doli publikisht në mbështetje të operacionit amerikan, duke shkruar se “Kosova qëndron fuqishëm përkrah Shteteve të Bashkuara” dhe Donald Trumpit. Ajo e justifikoi ndërhyrjen duke sjellë madje shembullin e Kosovës dhe duke e quajtur shtet narkotik atë që udhëhiqte deri dje Nikolas Maduro. “Presidenti Trump qëndroi përkrah popullit të Venezuelës dhe u përball me shtetin narkotik të Maduros, duke mbrojtur Amerikën dhe pjesën tjetër të botës nga kartelet dhe krimi i organizuar. Kjo është se si duket forca dhe udhëheqja amerikane”, shkroi Osmani, duke e lidhur këtë qëndrim me historinë e Kosovës “Kosova e kupton ndikimin e vendosmërisë amerikane, çlirimi ynë është vetë një dëshmi e saj” shkroi ajo.

Dallimi mes deklaratave që vijnë nga Tirana dhe atyre që vijnë nga Shqipëria kanë një diferencë që nuk mund të shpërfillet. Në Kosovë, krerët më të lartë të shtetit morën përsipër politikisht mbështetjen për SHBA, kurse në Shqipëri, kryeministri dhe presidenti heshtën.

Reagimi iu delegua një niveli më të ulët hierarkik, Ministrisë së Jashtme, duke krijuar përshtypjen e një qëndrimi institucional të kontrolluar, por politikisht të distancuar nga figura kryesore e pushtetit ekzekutiv, që është kryeministri Edi Rama.

Rreth një muaj më parë, në urimin që Rama dhe Begaj morën për festën e pavarësisë në 28 Nëntor, urimet e presidentit të SHBA Donald Trump dhe sekretarit të shtetit, Marko Rubio tingëllonin si paralajmërime dhe përmbanin një kërkesë të qartë për të luftuar kartelet dhe bandat e trafikut transnacional të drogës.

Mungesa e zërit të Edi Ramës bie në sy edhe për faktin se këtë fundjavë, si rrallëherë, u shmang dalja e tij në podkastin e përjavshëm të titulluar “Flasim”. Jo më kot, kreu i Partisë Demokratike, Sali Berisha ironizoi heshtjen e kryeministrit Edi Rama kur iu referua podcastit “Flasim”, me këshillën se ai duhet të ndryshojë emrin në “Heshtim”.

Kontrasti mes Kosovës dhe Shqipërisë bëhet edhe më i dukshëm kur shihet panorama rajonale. Disa prej vendeve të Ballkanit Perëndimor, njësoj si Rama zgjodhën të jenë më të përmbajtur duke lëshuar mesazhe përmes ministrive të jashtme, ndërsa disa të tjerë e kapën shansin për ta përshëndetur arrestimin e Maduros.

Presidenti i Turqisë Rexhep Taip Erdogan nuk reagoi vetë, por ministria e jashtme bëri thirrje për qetësi dhe stabilitet, duke theksuar rëndësinë e “paqes dhe mirëqenies së popullit të Venezuelës” dhe duke u kërkuar palëve të “tregojnë përmbajtje”.

Krejt i ndryshëm ishte reagimi i Greqisë, fillimisht përmes Ministrisë së Jashtme u fol për monitorim të situatës dhe mbrojtje të komunitetit grek, por më pas kryeministri Kyriakos Mitsotakis shprehu qartë mbështetjen e tij për SHBA. “Nicolas Maduro kryesoi një diktaturë brutale dhe represive që solli vuajtje të paimagjinueshme për popullin venezuelian. Fundi i regjimit të tij ofron shpresë të re për vendin”, shkroi ai.

Serbia reagoi në nivelin më të lartë politik, por në kahun e kundërt. Presidenti Aleksandër Vuçiç e shfrytëzoi rastin për të artikuluar një kritikë të ashpër ndaj rendit ndërkombëtar, duke deklaruar se “e drejta publike ndërkombëtare nuk ekziston, rendi i OKB-së ekziston në letër” dhe se “bota dominohet nga ligji i forcës dhe ligji i më të fortit”. Një qëndrim që përputhet më shumë me atë të Spanjës dhe të disa vendeve të tjera të Amerikës Latine.

Heshtja e Ramës duket një përpjekje për ta shmangur ekspozimin personal përballë një Donald Trump gjithnjë e më të paparashikueshëm në politikën e jashtme.

Herën e fundit që e përmendi emrin e Donald Trump në publik, Rama ishte duke bërë gallatë me presidentin azer, Ilham Aliev dhe atë francez Emanuel Makron për një gafë të Donald Trump që kishte ngatërruar Shqipërinë me Armeninë, ndërsa mburrej për luftrat që kishte mbyllur në pak muaj në Shtëpinë e Bardhë.

Por pa kaluar 24 orë nga kjo shaka e pamenduar gjatë, kryeministri i Shqipërisë Edi Rama u detyrua të kërkojë falje për batutat që bëri xhiron e rrjetit X dhe u shndërruan në lajm me miliona klikime në mediat ndërkombëtare./Lapsi.al

TITULLI: Altin Dumani ka në dorë “fatin” e Shkëlzen Berishës, priten zhvillime “bombë” me dosjen e tragjedisë së Gërdecit, gati arrestimi i “sy peshkaqenit”

TEKSTI: Dosja e “Gërdecit” po hyn në një fazë vendimtare, ndërsa Prokuroria e Posaçme (SPAK) ka dorëzuar së fundmi në Gjykatën e Posaçme (GJKKO) prova të reja që lidhen drejtpërdrejt me procesin penal të kësaj ngjarjeje tragjike. Në qendër të zhvillimeve të fundit del emri i Shkëlzen Berishës. Bëhet fjalë për një faks, të sekuestruar në Ministrinë e Mbrojtjes, pa numër dhe pa datë, i cili mban shënimin “për z. Shkëlzen Berisha”. SPAK deklaroi disa ditë më parë se shënimi rezulton pjesë e përmbajtjes origjinale të dokumentit të ardhur nga Ministria e Drejtësisë dhe jo një shtesë e mëvonshme.

Shkëlzeni është përmendur me pseudonimin “djali me sy peshkaqeni”, në librin e “Armët dhe çunat”, të gazetarit të njohur të New York Times-it Guy Lawson që rrëfen skandalin e trafikut të armëve shqiptare drejt Afganistanit dhe shpërthimit të frikshëm në Gërdecit. Hetimi po ndiqet nga prokurori Altin Dumani, i cili më herët ka mbajtur edhe postin e kreut të SPAK, dhe tashmë ka në dorë fatin e një prej dosjeve më të rënda të Shqipërisë post-komuniste, ku 26 persona humbën jetën dhe ku, sipas dëshmive dhe indicieve, të gjitha fijet çojnë drejt familjes Berisha. Juristja Brizida Gjikondi paralajmëroi së fundmi në një intervistë televizive se hetimi mund të prodhojë zhvillime të forta, ndërsa nuk përjashtohet goditja ndaj Shkëlzen Berishës dhe hapja e një zinxhiri përgjegjësish penale që mund të shkojë edhe më lart. Kjo sipas juristes varet nga Altin Dumani.

Çfarë deklaron Gjikondi? “Mos harrojmë që kanë vdekur 26 persona të pafajshëm, si dhe mos të harrojmë edhe diçka tjetër; po bëhen 18 vjet që kur ka ndodhur kjo ngjarje dhe, për më tepër, të gjitha tentakulat çojnë te familja Berisha. Kjo i tregon të gjitha. Është një fakt që të gjithë shqiptarët e kanë ditur pa përjashtim. E dimë të gjithë që edhe zoti Mediu, edhe kush ka qenë ministër i Drejtësisë, dhe të gjitha strukturat kanë qenë në funksion të Shkëlzen Berishës. Por, më në fund, po merret guximi që t’i vihet emër dhe mbiemër atij krimi, që është një nga krimet flagrante që ka ndodhur në Shqipërinë post-komuniste, ku 26 veta kanë humbur jetën.

Është skandaloze, sepse ky fakt dihej, por më në fund tashmë po merr emër dhe mbiemër. A rrezikon që edhe Shkëlzen Berisha të merret i pandehur për Gërdecin? Kjo varet e gjitha nga serioziteti i hetimeve të SPAK-ut, nga prokurori i çështjes, i cili përpara pak ditësh ka qenë edhe kryesuesi i SPAK-ut, zoti Altin Dumani. Gjithçka varet nga aftësia e tij për t’i shkuar hetimit deri në fund; të mos mbetet me një faks dhe me një emër sipër, edhe me ca tabulate telefoni, por realisht me anë të dëshmive të dëshmitarëve. Pavarësisht se ne e dimë që shumë prova janë zhdukur – edhe kamerat, edhe sistemi i verifikimit të Ministrisë së Mbrojtjes dhe shumë prova të tjera janë zhdukur – besoj se një prokuror i aftë arrin të bëjë lidhjen shkak-pasojë. Ai mund të vërtetojë që ai biznes – siç e ka thënë me emër dhe mbiemër i ndjeri Trebicka – ai biznes i demontimit të armëve në mënyrë aq joprofesionale ishte i gjithë biznesi i familjes Berisha, i djalit të zotit Berisha.”

Prapaskenat Gjikondi ka folur edhe për dyshimet se vdekja e Kosta Trebickës ishte aksident apo vrasje. “Nuk do të përjashtoja asnjë pistë, sidomos këtë të dytën. Këtu në Shqipëri ndodhin shumë gjëra, sidomos krime me petk shtetëror, por ndërkohë stimulohen sikur janë aksidentale. Nuk do ta përjashtoja, biles personalisht mendoj që nuk ka qenë aksidentale që gjoja zoti Trebicka, duke shkuar për gjueti, pati atë rrotullimin e makinës në një rrugë, në një lëndinë të drejtë. Kjo ndodhi pas pak kohësh që ai kishte bërë denoncimin në lidhje pikërisht me mënyrën se si po bëhej demontimi dhe shitja e armatimeve të Shqipërisë për në tregun e zi dhe në tregun e trafikimit të armëve”, tha ajo ndër të tjera.

E pyetur nëse prokurorët e SPAK-ut do të arrijnë që këtij hetimi t’i shkojnë deri në fund, a rrezikon Shkëlzen Berisha të merret i pandehur? Dhe nëse do të rrezikojë Shkëlzen Berisha, a do të thotë kjo që i pandehur më pas mund të merret edhe Sali Berisha për Gërdecin, Gjikondi tha: Tani, ne e kemi vënë re që Berisha, në të dy rastet – si me rastin që tani doli “non grata” dhe me problemet që ka me SPAK-un ku çështja e tij për klubin “Partizani” është në GJKKO, si dhe me rastin e djalit të tij – ai patjetër që ka lidhje indirekte me çfarë ka ndodhur me abuzimin e fëmijëve të tij. Ai ka lehtësuar komplet procedurat, por i ka lehtësuar në mënyrë joligjore se si të përfitonin fëmijët e tij në të dy rastet; si Shkëlzen Berisha në lidhje me demontimin e armëve, po ashtu edhe vajza e tij ose dhëndri i tij në lidhje me klubin “Partizani”, por edhe me shumë afera të tjera që janë përmendur. Për procedimin e tyre ose jo nuk kam ndonjë informacion, por klubi “Partizani” dhe Gërdeci janë dy raste flagrante se si Berisha, direkt ose indirekt, ka ndikuar në pasurimin e paligjshëm të fëmijëve të tij, duke vënë në dispozicion shtetin në funksion të tyre. Ndaj, edhe ai faksi me shënimin sipër për zotin Shkëlzen Berisha dhe “Selimi poshtë”, është patjetër një provë e re që SPAK po i jep forcë ligjore dhe formë ligjore. Por mos harrojmë që SPAK është aty për të zbuluar të tjera gjëra. Duhet të ketë kurajën, integritetin dhe dinjitetin t’u vërë emër të gjitha gjërave që kanë ndodhur. Puna është të ketë kurajo të flasë hapur dhe të provojë hapur që edhe zoti Mediu, edhe shumë të tjerë, kanë qenë ndihmës, por jo personazhet kryesorë të asaj që ka ndodhur atje.”/SOT.COM.al

SQARIM: Çdo person prezumohet i pafajshëm deri sa nuk vërtetohet fajësia e tij me vendim gjyqësor të formës së prerë.

E ftuar në episodin e radhës të Apostrof Podcast, shkrimtarja Lea Ypi ofroi një vlerësim tejet të kthjellët të asaj se çfarë mund të prodhojë në Shqipëri ndjesia në rritje e braktisjes dhe përjashtimit politik që një pjesë e konsiderueshme e shoqërisë përjeton.

E pyetur nëse ky akumulim i mllefit mes atyre që ndihen të pafuqishëm dhe të padëgjuar mund të transformohet në një lëvizje të re politike apo shoqërore, Ypi u shpreh se hapësira për forca realisht transformuese demokratike në Shqipëri mbetet tepër e kufizuar.

“Sot në Shqipëri ka shumë pak hapësirë për të patur një lëvizje vërtetë transformuese demokratike,” tha Ypi, ndërsa e lidhi këtë jo vetëm me kulturën e brendshme politike, por edhe me pozitën gjeopolitike të vendit. “Fati i Shqipërisë është i lidhur me fatin e Ballkanit dhe me fatin e Europës, dhe sidomos procesi i integrimit në Bashkimin Evropian që është një proces që nuk vihet në dyshim nga asnjë nga aktorët politikë, i vë kufij shumë të mëdhenj dinamikave të brendshme transformuese.”

Sipas Ypit, ky consensus thuajse absolut rreth integrimit në BE, i kufizon së tepërmi dinamikat e brendshme politike: “Ky është një aspekt, pra fakti që ne nuk është se kemi shumë mundësi zgjedhjeje këtu, jemi ose me Bashkimin Europian, ose në një kontekst që ka aq shumë të papritura, sa askush nuk do as ta marri parasysh si skenar të mundshëm hipotetik.”

Përtej gjeopolitikës, Ypi vuri në dukje një problem më të thellë strukturor në jetën politike shqiptare, që është personalizimi i politikës. “E dyta, dhe ndoshta kjo është një pyetje që ka të bëjë më shumë me natyrën e zhvillimeve historike dhe politike në Shqipëri, mendoj që në Shqipëri akoma ka një kulturë të personalizimit të politikës,” theksoi Ypi, ndërsa sugjeron se kjo vjen si pasojë e trashëgimisë së komunizmit por edhe për shkak të modeleve më të hershme historike.

“Po të shikojmë e gjithë, edhe pas rënies së diktaturës, edhe pas vdekjes Enver Hoxhës e gjithë politika shqiptare bashkëkohore, është politikë që lexohet në kontekstin e ndërveprimeve midis 3, 4, 5 individëve të caktuar me emra dhe vazhdimisht edhe akuzat, edhe kritikat, edhe debati publik merr gjithmonë formën që e lidh ndërhyrjen në politikë me gjykimin ndaj këtyre aktorëve si individë.”

Në këtë kontekst, ajo paralajmëron se pakënaqësitë kanë pak gjasa të kristalizohen në transformim demokratik. “Në këtë kontekst politika demokratike kur bëhet personale, kur bëhet individuale, kur lidhet gjithmonë me liderin – ose me liderin e qeverisë, opozitës të një fuqie të tretë politike – dhe kur nuk flitet për aktorët dhe për projektet, nuk mund të jetë politikë demokratike.”

Megjithatë, pavarësisht kësaj diagnose, Ypi e refuzon idenë se Shqipëria nuk ka shpresë. “Shpresa është diçka që lidhet me veprimin dhe për sa kohë që ne i ngremë, shtrojmë probleme, shtrojmë kritika, për sa kohë ka zëra që arrijnë që ta artikulojnë ose që të diskutojnë, ta diskutojnë këtë si problem, nuk besoj që mund të themi që jemi të pashpresë.”

Ajo thekson se demokracia nuk është një arritje e vetme në një moment të caktuar, por një proces i vazhdueshëm. “Demokracia është dithçka që ndërtohet çdo ditë, ndërtohet me ndërhyrjet tona, të secilit nga ne dhe të qytetarëve, të mediave, të gazetarëve etj. Pra është një punë e përbashkët për sa kohë që ne mbetemi të aktivizuar dhe vazhdojmë ta bëjmë këtë, ta marrim këtë përgjegjësi nuk mund të them që nuk ka shpresë.”

Episodi i plotë i Apostrof Podcast me Lea Ypin publikohet të dielën, ora 17:00, në kanalin e gazetës TemA në Youtube.

Kreu i ri i SPAK miraton strukturën e re: Altin Dumani, Dorina Bejko dhe Vladimir Mara me role kyçe

Kryeprokurori i ri i SPAK, Klodian Braho, ka firmosur strukturën e re drejtuese të Prokurorisë së Posaçme, duke përcaktuar rolet e reja për disa prej prokurorëve më të njohur të institucionit.

Mësohet se prokurori Altin Dumani është emëruar shef i seksionit për marrëdhëniet me jashtë, një sektor kyç për bashkëpunimin ndërkombëtar në hetimet penale. Ky është një ndër postet më të mira që i hap rrugën Dumanit të bëjë udhëtime të shpeshta nëpër botë.

Ndërkohë, prokurorja Dorina Bejko do të drejtojë seksionin për hetimin e korrupsionit, ndërsa prokurori Vladimir Mara është vendosur në krye të seksionit kundër krimit të organizuar.

Më herët, departamenti për marrëdhëniet me jashtë ishte drejtuar nga Dorina Bejko, e cila kishte zëvendësuar Arben Krajën pas përfundimit të mandatit të tij si kryeprokuror i SPAK. Kraja e mbajti këtë detyrë për rreth tre vite, përpara se të rikthehej si prokuror i thjeshtë, pas konflikteve të lidhura me drejtimin e Byrosë Kombëtare të Hetimit.

Sektori i krimit të organizuar drejtohej deri më tani nga prokurori Adnand Xholi, i cili mbetet në këtë strukturë si prokuror. Vendin e tij e zë Vladimir Mara, i njohur për eksperiencën në drejtimin e skuadrave të përbashkëta hetimore me antimafian italiane.

Klodian Braho, në detyrën e kryeprokurorit të posaçëm, vlerësohet për karrierën e tij të gjatë në hetimin e çështjeve të nivelit të lartë. Ai ka qenë pjesë e disa dosjeve të rëndësishme, përfshirë dënimin e ish-prokurorit të përgjithshëm dhe së fundmi angazhimin në grupin hetimor që vendosi nën akuzë zëvendëskryeministren Belinda Balluku. /noa.al

Shënim: Disa imazhe gjenden nga interneti, që konsiderohen të jenë në domenin publik. Nëse dikush pretendon pronësinë, ne do të citojmë autorin, ose, sipas kërkesës, do të heqim menjëherë imazhin.

Tërheqja e dhëndrit të Donald Trump, Jared Kushner nga Ballkani, nxjerr në pah krizën diplomatike të qeverive…

Më 15 dhjetor 2025, kompania “Affinity Partners”, në pronësi të dhëndrit të Presidentit Amerikan Donald Trump, Jared Kushner, njoftoi tërheqjen nga marrëveshja me Qeverinë e Serbisë për projektin e ndërtimit të një hoteli luksoz në Beograd.

Të njëjtin sinjal tërheqjeje, investitori Jared Kushner ka dhënë edhe për projektin “Resorti Turistik – Ishulli i Sazanit”, duke zvarritur afatet e nisjes së procedurave për zbatimin e kontratës, përmes një njoftimi të dërguar qeverisë shqiptare.

Më 15 dhjetor 2025, në të njëjtën datë me anulimin e marrëveshjes për investimin në Beograd, kompania “Atlantic Incubation Partners LLC”, investitore e projektit të resortit në Sazan, ka njoftuar shtyrjen edhe me një vit të sigurimit të marrëveshjes.

Sipas informacionit të ardhur në “Pamfleti”, për shtyrjen e afatit të sigurimit të marrëveshjes, kompania “Atlantic Incubation Partners LLC”, në pronësi të dhëndrit të Trump, ka vënë në dijeni Komitetin e Investimeve Strategjike, Ministrinë e Ekonomisë dhe Inovacionit, Korporatën Shqiptare të Investimeve dhe kompaninë kontraktore shqiptare “Albanian State Development Real Estate”.

Nuk dihen arsyet pse Jared Kushner ka shtyrë sigurimin e marrëveshjes për procedurat e nisjes së projektit të resortit në Ishullin e Sazanit, duke zvarritur afatet.

Ky vendim i Kushner ka alarmuar kryeministrin Edi Rama, jo për shkak të shqetësimit real për investimin në Sazan, por sepse shtyrja e marrëveshjes erdhi pas bllokimit total të kontakteve me Shtëpinë e Bardhë, refuzimit nga Zëvendëspresidenti JD Vance dhe Sekretari i Shtetit Marco Rubio për ta takuar Edi Ramën në dy samite botërore, mungesës së urimit për fitoren e zgjedhjeve të 11 majit 2025 dhe mungesës së çdo kontakti nga Ambasada e SHBA-së në Tiranë.

Në Vendimin nr. 23, datë 30 dhjetor 2024, të Komitetit të Investimeve Strategjike, të firmosur nga Edi Rama, përcaktoheshin këto kushte:

– Brenda 15 ditëve, pra më 20 janar 2025, Grupi Qeveritar i Negocimit të Marrëveshjes duhej të kontaktonte subjektin investues “Atlantic Incubation Partners LLC” për të nisur procedurat e zbatimit të marrëveshjes për ndërtimin e resortit në Sazan.

– Brenda 60 ditëve, pra më 2 mars 2025, subjekti investitor strategjik duhej të dorëzonte në Korporatën Shqiptare të Investimeve planin e biznesit, studimin e plotë të fizibilitetit, relacionin shpjegues, projektin e infrastrukturës së brendshme të resortit dhe garancitë që i ofroheshin Shtetit Shqiptar nga ana e investitorit.

– Brenda 90 ditëve, pra deri më 31 mars 2025, duhej të negociohej marrëveshja me subjektin investues, me mundësi shtyrjeje edhe për 90 ditë të tjera, deri më 30 qershor 2025.

Por kompania “Atlantic Incubation Partners LLC” nuk iu përgjigj kërkesave të Qeverisë Shqiptare për të nisur negociatat për resortin në Sazan.

Ndërsa më 15 dhjetor 2025, kompania e dhëndrit të Trump njoftoi për shtyrjen e sigurimit të marrëveshjes deri në fund të vitit 2026, gjë që në gjuhën e kontratës përkthehet si bllokim i investimit dhe paralajmërim se projekti në Sazan mund të anulohet.

Arsyet i di Jared Kushner, ndërsa Edi Rama këtë zvarritje po e përjeton si një vendim politik të familjes Trump dhe të Presidentit Donald Trump, për të mos bashkëpunuar në asnjë formë me kryeministrin e Shqipërisë./Pamfleti

NGA PAOLO FOX

DASHI

Kjo është koha ideale për të marrë përsipër një projekt që e keni pritur ose për të sqaruar një situatë me të cilën nuk ndiheni më rehat. Në dashuri, jeni të drejtpërdrejtë dhe pasionantë, por edhe pak të paduruar: kini kujdes të mos thoni gjithçka menjëherë. Beqarët dëshirojnë emocione të forta, por duhet të jenë selektivë. Energjia juaj po rritet.

DEMI

Sipas horoskopit të Paolo Fox (e martë, 6 janar 2026), pas javësh të tëra duke u munduar fort, tani mund të filloni të shihni rezultate konkrete. Në punë, qëndrueshmëria dhe aftësia për t’i rezistuar presioneve të jashtme janë thelbësore. Në dashuri, keni nevojë për siguri: nëse një marrëdhënie është e fortë, ajo bëhet më e fortë; nëse është e paqartë, mund të ndjeni nevojën për t’u distancuar. Rimëkëmbja fizike është e dobishme.

BINJAKËT

Kjo është një periudhë e shkëlqyer, dinamike, plot lidhje. Binjakët janë rikthyer në qendër të vëmendjes falë të menduarit të tyre të shpejtë dhe komunikimit efektiv. Vetëm kini kujdes të mos premtoni shumë. Në dashuri, jeni simpatikë, por të pakapshëm: ata përreth jush kërkojnë më shumë prani. Beqarët mund të kenë takime interesante, veçanërisht në mjedise të reja ose të lidhura me punën. Energjia është e lartë, por duhet të kanalizohet.

GAFORRJA

Kjo është një fazë emocionalisht intensive. Duhet të sqarosh gjërat brenda vetes përpara se të bësh me të tjerët. Në punë, mund të ndihesh i nënvlerësuar: kjo nuk është koha për t’u mbyllur në vetvete, por për të shpjeguar më mirë atë që bën. Në dashuri, nevojiten fjalë të sinqerta: ata që janë në një lidhje duhet të adresojnë një bisedë të vonuar, ata që janë vetëm duhet të ndalojnë së menduari për të kaluarën. Ndjeshmëria është rritur.

LUANI

Sipas horoskopit të Paolo Fox (e martë, 6 janar 2026), qielli ju fton të guxoni, veçanërisht në punë: një propozim ose kërkesë e bërë tani mund të japë fryte. Në dashuri, jeni pasionantë, bujarë, por edhe krenarë: shmangni shndërrimin e një debati të vogël në një sfidë. Beqarët janë magnetikë. Energjia juaj po rritet dukshëm.

VIRGJËRESHA

Kjo është një kohë reflektimi dhe riorganizimi. Virgjëreshat ndiejnë nevojën për t’u organizuar, për të hequr qafe të panevojshmen dhe për t’u përqendruar në atë që ka vërtet rëndësi. Në punë, jeni të saktë dhe të besueshëm, por rrezikoni ta mbingarkoni veten. Në dashuri, jeni më kërkues: dëshironi qartësi dhe konkretësi. Ata që nuk janë në sinkron mund të distancohen. Kini kujdes nga stresi.

PESHORJA

Keni vendime për të marrë, veçanërisht në marrëdhëniet personale. Në dashuri, jeni më të ndjeshëm se zakonisht: shmangni idealizimin e tepërt të një situate. Në punë, nevojitet diplomaci, por edhe vendosmëri: shtyrja nuk do të ndihmojë. Kjo është një kohë e mirë për t’u përqendruar përsëri te vetja dhe nevojat tuaja.

AKREPI

Sipas horoskopit të Paolo Fox (e martë, 6 janar 2026), është një kohë e fuqishme dhe transformuese. Akrepët ndiejnë se diçka e thellë po ndryshon. Në punë, ju keni intuitë të shkëlqyer: ndiqni intuitën tuaj, por shmangni konfliktet e panevojshme. Në dashuri, ju doni të vërtetën dhe intensitetin: s’ka më lojëra të paqarta. Çiftet e forta bëhen më të forta, ato të brishta përballen me krizën. Energjia është e lartë, por nervoze.

SHIGJETARI

Lëvizje dhe liri. Shigjetari dëshiron të shohë përpara dhe të ndryshojë perspektivat. Hapen mundësi të reja karriere, veçanërisht për ata që studiojnë ose punojnë jashtë vendit. Në dashuri, jeni të sinqertë dhe të drejtpërdrejtë, por të paduruar: jini të qartë për atë që dëshironi vërtet. Beqarët mund të përjetojnë flirtime stimuluese. Energjia po rritet.

BRICJAPI

Kjo është një periudhë sfiduese, por konstruktive. Bricjapët po ndërtojnë diçka të rëndësishme, edhe nëse rezultatet nuk janë të menjëhershme. Në punë, disiplina dhe një vizion afatgjatë janë thelbësore. Në dashuri, jeni më të hapur, por keni vështirësi të shprehni ndjenjat tuaja: përpiquni të flisni më shumë. Qëndrueshmëria fizike është e mirë, por kini kujdes nga lodhja.

UJORI

Sipas horoskopit të Paolo Fox (e martë, 6 janar 2026), jeni në një fazë ndryshimi dhe paqëndrueshmërie krijuese. Ujori ndjen nevojën për të thyer modelin dhe për të rishpikur veten. Ide të reja vijnë në punë, por ato duhet të zbatohen. Në dashuri, jeni të paparashikueshëm: ata që ju duan duhet t’ju ndjekin pa u përpjekur t’ju kontrollojnë. Beqarët tërhiqen nga njerëz që janë jokonvencionalë. Energjia juaj është alternative.

PESHQIT

Kjo është një kohë shumë e ndjeshme dhe intuitive. Peshqit zotërojnë perceptime të forta dhe thellësi të madhe emocionale. Në dashuri, jeni romantikë, por të prekshëm: mbroni zemrën tuaj dhe zgjidhni ata që ju respektojnë. Në punë, keni nevojë për më shumë qartësi dhe më pak shpërqendrime. Dëgjoni intuitën tuaj, por qëndroni me këmbë në tokë. Energjia duhet të matet.

Sinoptikania Lajda Porja në një lidhje televizive dha parashikimin se si pritet të luhatet moti dhe temperaturat në vend këtë javë.

Ditën e hënë, vendi ynë do të ndikohet nga kushte atmosferike të paqëndrueshme.

Moti parashikohet me vranësira mesatare deri të dendura, të shoqëruara me reshje shiu të herëpashershme dhe lokalisht të vazhdueshme, me intensitet të ulët deri mesatar, në pjesën më të madhe të territorit.

Temperaturat tha Porja, do të jenë kryesisht të ngrohta, ndërsa të premten do të jetë dhe dita më e ftohtë e javës.

“Është një janar tipik dimri me temperatura të ulëta, reshje të bollshme shiu që do të vijojnë gjatë gjithë muajit”, u shpreh ndër të tjera Lajda Porja.

Kryedemokrati Sali Berisha u paraqit paraditen e sotme në SPAK në kuadër të zbatimit të masës së sigurisë për aferën “Partizani”.

Teksa mbajti deklaratën e përhershme para gazetarëve, Berisha tha se SPAK i kishte shtuar një tjetër akuzë që lidhej me investimet e fëmijëve të tij në pasuritë e paluajtshme.

Berisha tha se bëhet fjalë për apartamentin 3 plus 1 në pronësinë e tij, për të cilin përfitonin 1/3 e pronësisë dhe fëmijët e tij pasi ishin mbi 18 vjeç.

Sipas tij fëmijët e tij kishin përfituar nga ligji për privatizimin njëjtë si 1 milionë shqiptarë të tjerë.

Pjesë nga deklarata e Berishës:

Sa për t’ju informuar se në akuzat kundër Sali Berishës rezulton edhe fakti se pasi në vitin 1992, shtetasi Sali Berisha është zgjedhur president i republikës së Shqipërisë duke qëndruar në pushtet gjer në vitin 1997, shtetasit Malltezi, që në atë kohë nuk kanë asnjë lidhje me dosjen Partizani, konstatohet se kanë filluar investimet në përfitim të drejtash mbi pasuri të paluajtshme.

Tani dëgjojeni se cilat janë pasuritë.

Referuar deklaratave të dorëzuara në ILDKP të pasurisë, konstatohet se shtetasja Argita Malltezi ka evidentuar në deklaratën e saj për vitin 1993 pronësinë vetëm të një apartamenti banimi me sipërfaqe 77 metër katrorë në rrugën Myzeqari, përfituar nga privatizimi, pjesa që zotëron një e treta e apartamentit.

Gjithashtu Sali Berisha deklaron se zotëron një apartament 3 plus 1, të privatizuar, të drejtë reale zotërojnë bashkëjetuesit, bashkëshortja dhe djali.

Tani kjo, se vajza ime dhe djali im, në përputhje me ligjin, vajza ime ka zotëruar një të tretën e apartamentit siç i takonte në atë kohë sepse ishte mbi 18 vjeç dhe ligji i privatizimit të banesave parashikonte që fëmijët mbi 18 vjeç të përfitojnë.

Kjo është dhënë si një akuzë për korrupsion nga prokuroria politike.

Edhe njëherë, prokuroria jep konkluzione që jo vetëm nuk kanë lidhje me faktet, por janë alogjike.

Për shembull, Prokuroria e Posaçme në mënyrë që të rëndojë sa më shumë faktet, pavarësisht se nuk jep natyrë penale, shprehet se pasi në vitin 1992, shtetasi Sali Berisha është zgjedhur president duke qëndruar në pushtet deri në vitin 1997, shtetasit Malltezi konstatohet se kanë filluar investime për fitim të drejtash mbi pasuri të paluajtshme.

Shtetasit Malltezi kanë përfituar siç kanë përfituar 1 milion shqiptarë nga privatizimi i banesave.

Në atë kohë që të dy nuk kanë qenë kryefamiljarë, por kanë qenë anëtarë të familjeve që kanë privatizuar në përputhje me ligjin 7652.

Ky është pra noviteti i akuzës së Altin Troplinit dhe ish-xhelatit të Sigurimit të Shtetit, sikundër dhe Enkelejda Fetahut. Sepse kjo është Balla ose Fetahu mund ta quajmë këtë.