Author: admin

“Unë dhe Edi Rama kemi qenë shokë klase.” Kështu është shprehur Ferdinand Duka në një intervistë për gazetaren Rudina Xhunga, në emisionin “Shqip” në DritareTV. Duka, i cili jeton prej shumë vitesh në Toronto, ka rrëfyer një anë tjetër, më pak të njohur, të kryeministrit shqiptar.

Ai tregon se Rama ka qenë që në fëmijëri një nxënës i veçantë, i cili spikaste jo vetëm për pamjen, por edhe për mënyrën e të menduarit dhe krijimtarinë e tij. Sipas Dukës, hartimet e Ramës ishin aq të ndjera, sa mësueset shpesh përloteshin kur i lexonin.

“Qysh në fillore, në shkollën ‘Alqi Kondi’, Edi ishte ndryshe nga të gjithë. Ishte një njeri që bënte dallimin. Kur shkruante ai, mësueset qanin. Kishte një ndjeshmëri dhe thellësi që nuk e gjeje te të tjerët,” – tha Duka.

Ai shton se frymëzohet edhe sot nga piktura e Ramës dhe e vlerëson për stilin e tij abstrakt dhe të pazakontë. Madje, kujton edhe një episod nga koha e zborit, ku Rama kishte vizatuar një plak, por në mjekrën e tij kishte fshehur dy luftëtarë spartanë – një detaj që nuk dukej menjëherë, por duhej ta shpjegonte vetë.

“Unë nuk pata mundësi të ndiqja shkollën e arteve. Ishte shumë e vështirë atëherë, duhej të kishe miq. Rama nuk kishte nevojë për miq për të ecur përpara,” – shprehet ai.

Duka rrëfen se ai ishte në Shqipëri kur u rrëzua busti i Enver Hoxhës dhe vendosi të largohej nga vendi. Ndërsa Rama, sipas tij, qëndroi, luftoi dhe ia doli.

“Unë ika. Rama qëndroi dhe ia doli. E bëri këtë vend. Ndaj them se Rama është fati i këtij populli,” – përfundon ai.
Ferdinand Duka ndodhet aktualisht në Shqipëri për të promovuar librin e tij të parë, “Fati”, të cilin e prezantoi në studion e emisionit “Shqip” nga Rudina Xhunga në DritareTV.

Nga Ylli Manjani

E përshëndes nismën e Ministrit të Drejtësisë për amnisti penale.

Padyshim, kemi sistemin më agresiv penal në Europë dhe si i tillë duhet patjetër të ketë masa relaksuese. Jemi shumë pak njerëz dhe me këtë ritëm burgu për çdo gjë po bëhet rracion për të gjithë.

Nisma meriton respekt.

Jam i gëzuar që disa shqiptarë do përfitojnë nga kjo amnisti.

Por njëkohësisht ndjej edhe pak trishtim sepse janë po ato argumente që kanë qenë gjithmonë për bërjen e një amnistie.

Kjo tregon se asgjë skemi mësuar nga e shkuara.

Më ka qëlluar të jem nismëtar i dy amnistive penale në të shkuarën, ku shumica politike parlamentare nuk ka qenë kaq e qartë sa sot. Na është dashur të luftojmë shumë dmth për çdo votë deputeti. Por këto argumente si këto të sotmet përdorëm.

Për fat të keq, as në kohën time e as sot, nuk dalim dot nga një mentalitet disi hipokrit. Totalisht i pasinqertë dhe, i mbushur me 100 komplekse krejt idiote.

Vendi, sot më shumë sesa në të shkuarën, ka nevojë për një amnisti penale të mirfilltë POLITIKE.

Duhet një amnisti që të peshojë më fort tek ndjekja penale. Në fakt për këtë fazë është shpikur koncepti amnisti. Se për të dënuarit ka falje të individualizuar.

Sot është momenti që Parlamenti ti japë një mesazh të fortë drejtësisë, veçanërisht ndjekjes penale për fjalë goje apo mesazhe celularësh; ndekjes penale për inate politike kundërshtarësh; ndjekjes penale ndaj medias e gazetarëve; ndjekjes penale pa pasojë e fakte kriminale; ndjekjes penale që kënaq turmat dhe nxit drejtësinë popullore.

Po, po, parlamenti duhet të amnistojë Erion Velinë si njeri i votuar ende në detyrë dhe Ilir Metën si president i këtij shteti, që nuk provohet ende ti ketë sjellë dëm shtetit. Mund ti ketë sjellë dëme vetes e partisë së tij, por jo shtetit.

Sigurisht që po, amnistia duhet të çlirojë kryetarin e opozitës nga çështje penale që janë pa asnjë lidhje me të shkuarën e tij si Kryeministër. Bashkë me të edhe familjarët e Tij, që janë në ndjekje penale vetëm pse janë familjarët e tij.

Duhet me se s’bën një amnisti penale për bisnesin që të gjendet në ndjekje penale kot fare. Po fare fare. Të bësh tregëti, të lidhësh kontrata e të fitosh nuk mund të quhet krim, o njerëz!

Gjykimi në një amnisti, padyshim që është POLITIK. Nuk ka pse kompleksohet politika me teori pislliqesh jokobine mbi “pandëshkueshmërinë”.

Çdo me thënë pandëshkueshmëri, kap e fut në paraburgim njerëz pa prova?!

Ky është momenti, amnistia është instrumenti kushtetues, që i jep drejtim këtyre fenomeneve jakobine.

Po mor po, jakobinët do duhet të jenë të palumtur nga amnistia politike penale.

Parlamenti e ka këtë të drejtë kushtetuese që të vlerësojë politikën penale në vend dhe të japë mesazhe dhe zgjidhje për parregullsitë, kur bëhen normë sjellje.

Dhe mos na thoni se amnisti të tilla nuk na i lejoka Amerika. Pash zotin mos na fyeni të paktën!

Cili amerikan do ishte kundër një amnistie sovrane të një vendi sovran?

Po Donald Trunpi që amnistoi e amniston ende njerëz që kanë vrarë atje. E pra e bën politikisht e pa e pyetur parlamentin fare. E keni dëgjuar që thotë se polici që vrau atë aktivisten e majtë është në mbrojtje federale, apo jo?!

Apo doni faljen që presidenti Biden i bëri të birit?!

Ndaj mos na hapni barkun me amerikanizma e me jakobinizma.

Vendi e ka të nevojshme një amnisti, pse jo një paqe penale për të krijuar një qetësi që duhet ti paraprijë reformave shumë të thella që kërkohen.

Parlamenti është krejt legjitim ta bëjë, pavarësisht nismës së cunguar të qeverisë për amnisti. I duhet vetëm përgjegjmëri dhe qytetari që ta bëjë këtë gjë.

Komisioni Europian ka njoftuar zyrtarisht qeverinë shqiptare për ngrirjen pa afat të financimeve me argumentin e mbrojtjes së interesit të taksapaguesve të BE-së.

Vjedhjet e pandalshme të fondeve publike në Shqipëri i kanë hapur punë edhe Brukselit. Pas ndërprerjes të fondeve për fermerët, Bashkimi Europian ka vendosur të ngrijë financimet edhe për një tjetër komponent të rëndësishëm të ndihmës për Shqipërinë. Këtë herë bëhet fjalë për sektorin dixhital, por arsyeja është e njëjtë; korrupsioni.

Tre burime të pavaruara i thanë Kapitalit se vendimi për të ndërprerë urgjentisht financimet e axhendës dixhitale për Shqipërinë është marrë pas shpërthimit të aferës AKSHI. Të njëjtat burime bënë të ditur se Komisioni Europian ka njoftuar zyrtarisht qeverinë shqiptare për ngrirjen pa afat të financimeve me argumentin e mbrojtjes së interesit të taksapaguesve të BE-së.

Bashkimi Europian financon sektorin dixhital në Shqipëri përmes një sërë programeve. Në verën e këtij viti, qeveria shqiptare miratoi marrëveshjen e financimit ndërmjet Republikës së Shqipërisë, përfaqësuar nga Këshilli i Ministrave i Republikës së Shqipërisë, dhe Komisionit Evropian, për programin operacional shumëvjeçar për ekonominë dhe shoqërinë digjitale, në favor të Republikës së Shqipërisë për periudhën 2024-2027, në kuadër të Instrumentit të Asistencës së Paraanëtarësimit. Programi “Ekonomia dhe shoqëria dixhitale” ka një buxhet prej 44 milionë eurosh nga të cilat 30 milionë financohen nga Bashkimi Europian. Këto fonde tashmë janë të ngrira.

Një tjetër instrument përmes të cilit financohet sektori dixhital është Kuadri i Investimeve për Ballkanin Perëndimor. Përmes këtij kuadri, Bashkimi Europian financon programin e pajisjes së 600 shkollave të vendit me laboratorët smart. Ky projekt ka një kosto prej 44.3 milionë eurosh, nga të cilat 14 milionë financohet me grant nga BE.

Ndërkohë që financimet për axhendën dixhitale janë pjesë edhe të ashtuquajtur Plani i Ritjes, ku BE ka angazhuar të financojë 6 miliardë euro për vendet e Ballkanit Perëndimor.

Për këtë arsye ende nuk është plotësisht e qartë se sa është në total paketa e fondeve që BE ka vendosur të pezullojë për Shqipërinë. Por ky është rasti i dytë, ku Bashkimi Europian detyrohet të ngrijë donacionet për Shqipërinë për shkak të korrupsionit qeveritar.

E gjitha kjo po shndërrohet thuajse në një garë, ku qeveria vjedh paratë pa dallim prejardhje, ndërsa BE bllokon fondet për të mbrojtur taksapaguesit e saj. Ajo që mbetet për t’u parë tashmë është se cila nga palët do të lodhet e para? Ndonëse pala e parë nuk ka gjasa të heqë ndonjëherë dorë.

Një tjetër vendim i rrufeshëm është marrë nga presidenti i Shteteve të Bashkuara të Amerikës, Donald Trump. Pas pezullimit përkohësisht të lotarisë amerikane, ai ka vendosur që të pezulloi edhe vizat për emigrantët.

Përmes një reagimi zyrtar, ka qenë vetë Departamenti i Shtetit Amerikan ai i cili ka bërë me dije këtë vendim të minutave të fundit. Sipas këtij njoftimi zyrtar, Amerika do të pezullojë vizat për 75 vende, mes tyre edhe Shqipëria.

Kjo masë është ndërmarrë pas abuzimit që emigrantët kanë bërë ndër vite duke përfituar sipas tyre mbi “kurrizin” e Amerikës.

“Departamenti i Shtetit do të pezullojë përpunimin e vizave për emigrantë nga 75 vende, emigrantët e të cilave marrin ndihmë sociale nga populli amerikan me çmime të papranueshme. Ngrirja do të mbetet aktive derisa SHBA-të të mund të sigurohen që emigrantët e rinj nuk do të nxjerrin pasuri nga populli amerikan.

Pauza ndikon në dhjetëra vende – përfshirë Somalinë, Haitin, Iranin dhe Eritrenë – emigrantët e të cilave shpesh bëhen barrë publike në Shtetet e Bashkuara pas mbërritjes. Ne po punojmë për të siguruar që bujaria e popullit amerikan të mos abuzohet më”, thuhet në reagimin zyrtar të DASH, duke theksuar më tej se Administrata Trump do ta vendosë Amerikën gjithmonë në plan të parë.

Pauza do të fillojë më 21 janar dhe do të vazhdojë për një kohë të pacaktuar derisa departamenti të kryejë një rivlerësim të përpunimit të vizave të imigrantëve.

Lista e plotë e vendeve përfshin: Afganistanin, Shqipërinë, Algjerinë, Antigua dhe Barbudën, Armeninë, Azerbajxhanin, Bahamas, Bangladeshin, Barbadosin, Bjellorusinë, Belizen, Butanin, Bosnjën, Brazilin, Burmën, Kamboxhian, Kamerunin, Kepin e Gjelbër, Kolumbinë, Bregun e Fildishtë, Kubën, Republikën Demokratike të Kongos, Dominikën, Egjiptin, Eritrenë, Etiopinë, Fixhin, Gambinë, Gjeorgjinë, Ganën, Grenadën, Guatemalën, Guinenë, Haitin, Iranin, Irakun, Xhamajkën, Jordaninë, Kazakistanin, Kosovën, Kuvajtin, Kirgistanin, Laosin, Libanin, Liberinë, Libinë, Maqedoninë, Moldavinë, Mongolinë, Malin e Zi, Marokun, Nepalin, Nikaraguanë, Nigerinë, Pakistanin, Republikën e Kongos, Rusinë, Ruandën, Shën Kitsin dhe Nevisin, Shën Luçinë, Shën Vincenti dhe Grenadinet, Senegalin, Sierra Leonen, Somalinë, Sudanin e Jugut, Sudanin, Sirinë, Tanzaninë, Tajlandën, Togon, Tunizinë, Ugandën, Uruguain, Uzbekistanin dhe Jemenin.

Autoritetet ruse kanë nisur një hetim penal pas vdekjes së 9 të porsalindurve gjatë këtij muaji në një maternitet në Siberi, njoftuan zyrtarët të hënën. Komiteti Hetimor Shtetëror bëri të ditur se dyshohet për vepra penale që lidhen me neglizhencë dhe shkaktim vdekjeje nga neglizhenca, pa specifikuar ende se ndaj kujt janë përqendruar hetimet.

Sipas autoriteteve, hetuesit kanë sekuestruar dokumentacionin mjekësor në spitalin e qytetit Novokuznetsk dhe po kryejnë ekzaminime mjeko-ligjore për të përcaktuar shkaqet e sakta të vdekjeve. Ndërkohë, stafi i spitalit është marrë në pyetje lidhur me veprimet ose mosveprimet e tyre.

Guvernatori i rajonit njoftoi se mjeku kryesor i spitalit është shkarkuar nga detyra, si masë paraprake pas ngjarjes së rëndë.

Nga ana e tij, spitali deklaroi në faqen zyrtare të internetit se ka pezulluar përkohësisht pranimin e pacienteve, për shkak të një shpërthimi të infeksioneve të frymëmarrjes, dhe se po zbatohen masa karantine për të parandaluar përhapjen e mëtejshme të infeksionit.

Romeo dhe Donald Veshaj janë bërë xhaxhallarë për herë të parë nga vëllai i tyre më i vogël, Mario.

Ka qenë vetë ky i fundit që ka dhënë lajmin e lindjes së vajzës tij të parë, të cilën bashkë me partneren e  tij e kanë pagëzuar me emrin Bluem.

Emri duket se ka një kuptim të veçantë për prindërit e rinj, pasi siç shkruan ai, “deti mban kujtimet tona më të bukura dhe ngjyra blu e dallgëve sot jeton ne sytë e të voglës sonë”.

“Bekimi ynë i vogël. Mire se erdhe tek ne, Bluem. Jeni lumturia ime me e madhe. Ju dua”, ka shkruar Mario Veshaj ndër të tjera.

Po ashtu ai ka publikuar edhe disa momente nga rrugëtimi i shtatzënisë së partneres deri tek dita e lindjes, ku të pranishëm janë familjarët e tyre, si Donald Veshaj e Bora Zemani.

Por, urimin më të veçantë vogëlushja Bluem e ka marrë nga dy xhaxhallarët e saj. Përmes një postimi në rrjetet sociale, Romeo Veshaj e ka bërë të qartë që mbesa e tij i ka tashmë dy badigardë, dy xhaxhallarët e saj.

“Ajo tashmë ka badigardë”, ka shkruar Romeo krahas një fotoje me Donaldin, ku ky i fundit mban mbesën në krah.

Një ngjarje tronditëse ka ndodhur në Hayden, në shtetin amerikan të Alabamës, ku një fëmijë ka gjetur një armë zjarri të mbushur në banesë dhe ka qëlluar për vdekje një djalë 2-vjeçar. Viktima, Noah, ndërroi jetë pasi u qëllua në kokë, ndërsa autoritetet kanë arrestuar dhe akuzuar nënën e tij, 40-vjeçaren Evelyn Etress.

Në momentin e tragjedisë në shtëpi ndodheshin gjashtë fëmijë dhe vetëm një i rritur. Fëmijët po luanin në dhomën e gjumit të nënës, kur u dëgjua një krismë. Kur gruaja hyri në dhomë, gjeti djalin e saj të vogël të plagosur rëndë dhe një pistoletë të lënë në një dollap.

Policia konfirmoi se Noah ishte ende gjallë kur mbërritën shërbimet e emergjencës dhe u dërgua me urgjencë në spital, por përpjekjet për ta shpëtuar dështuan. Ai u shpall i vdekur pak më vonë nga mjekët. Prokuroria e Qarkut Blount bëri të ditur se arma nuk ishte siguruar dhe se në banesë janë gjetur edhe armë të tjera që fëmijët mund t’i arrinin lehtësisht. Hetuesit theksuan se plaga nuk ishte vetëshkaktuar dhe se bëhet fjalë për një aksident fatal për shkak të neglizhencës.

Irani ka paralajmëruar vendet e rajonit se do të sulmojë bazat ushtarake amerikane në rast të një sulmi nga SHBA-të, tha një zyrtar i lartë i Teheranit për Reuters, pas kërcënimeve të Donald Trump për të ndërhyrë mes protestave antiqeveritare në të gjithë vendin.

“Teherani ka informuar vendet rajonale, nga Arabia Saudite dhe Emiratet e Bashkuara Arabe deri në Turqi, se bazat amerikane në këto vende do të sulmohen nëse SHBA-të synojnë Iranin, duke u kërkuar këtyre vendeve të parandalojnë Uashingtonin nga sulmi ndaj Iranit”, tha zyrtari. Ditë më parë, iranianët e kishin paralajmëruar gjithashtu Izraelin me sulme.

Dje, presidenti amerikan, gjatë një fjalimi në Detroit, i dërgoi një mesazh popullit iranian që të vazhdojë të protestojë. “Për të gjithë patriotët iranianë: Vazhdoni të protestoni, pushtoni institucionet tuaja, nëse është e mundur, dhe zbuloni emrat e vrasësve dhe abuzuesve që po ju abuzojnë shumë keq”, tha ai, ndër të tjera, ndërsa më parë kishte thënë se “ndihma (për ju) është në rrugë e sipër”. Në të njëjtën kohë, ai tha se u ka këshilluar aleatëve të SHBA-së të largohen nga Irani: “Mendoj se ata duhet të largohen, nuk është një ide e keqe”.

Komunikimi Teheran-Uashington është ndërprerë, ndërkohë, një zyrtar i lartë iranian zbuloi se komunikimet e drejtpërdrejta midis Ministrit të Jashtëm iranian Abbas Araghchi dhe të dërguarit të posaçëm të SHBA-së Steve Witkoff janë ndërprerë, pas kërcënimeve të Trump.

Zyrtari i lartë shtoi se kërcënimet e SHBA-së po dëmtojnë përpjekjet diplomatike dhe se diskutimet rreth takimeve të mundshme midis Araghchi dhe Witkoff për të gjetur një zgjidhje diplomatike për mosmarrëveshjen bërthamore të të dy vendeve kanë ngecur

Arredimi dhe rikualifikimi urban i superstradës Tiranë – Durrës, nga kthesa e Kamzës, deri në urën e Limuthit parashikohet të kushtojë rreth 1.4 mld lekë. Autoriteti Rrugor Shqiptar ka bërë gati tenderin që përfshin fazat I, II dhe III, ku aktualisht po punohet për zgjerimin e këtij aksi të rëndësishëm rrugor.

Ndërkaq, brenda këtij muaji pritet të hapen për qarkullimin e automjeteve korsitë e reja që janë ndërtuar në segmentin që nis pas kthesës së Kamzës dhe përfundon te mbikalimi i Rinasit.

Më hërët përfaqësues të ARRSH-së kanë deklaruar se kjo të varet shumë nga koha sepse një mot i ftohtë nuk e favorizon shtresën e asfaltit të fundit që ka ngelur, por pritshëmritë janë që të mos ketë pengesa.

Hapja për qarkullimin e automjeteve do të bëhet përpara afatiti kontraktual, pasi njëra prej tyre e ka afatin deri në maj dhe tjetra e ka në shtator të këtij viti.

Ndërkohë, kontrata e tretë është nënshkruar gjatë 3-mujorit të fundit të vitit 2025, por synohet që brenda vitit të ketë rezultate konkrete.

Kjo fazë përfshin ndërtimin e nyjes që lidh rrugën e Laknasit me projektin e zgjerimit të autostradës, teksa në dokumentet e tenderit specifikohej se zona ku kërkohet të realizohet ky projekt është një zonë me zhvillim të lartë industrial dhe së fundmi edhe me zhvillim të rëndësishëm urban.

Pas përfundimit, autostrada do të ketë 8 korsi në total, nga 4 në secilin drejtim, ndërsa shpejtësia e lejuar do të variojë nga 90 -140 km në orë.

Danimarka ka filluar vendosjen e pajisjeve ushtarake dhe trupave të avancuara në Groenlandë, mes tensioneve në rritje mbi rëndësinë strategjike të ishullit Arktik dhe retorikës së ripërtërirë nga Shtetet e Bashkuara të Amerikës (SHBA), sipas raportimeve të medias daneze.

Një komandë avancuese është dërguar tashmë në Groenlandë për të përgatitur logjistikën dhe infrastrukturën për mbërritjen e mundshme të forcave më të mëdha daneze dhe aleate, raportoi transmetuesi lokal DR të mërkurën.

Roli i njësisë avancuese përfshin sigurimin që objektet dhe linjat e furnizimit të jenë gati për të pritur forcat kryesore në një fazë të mëvonshme.

Përforcimet pritet të përfshijnë ushtarë nga njësitë e Ushtrisë Daneze, që synojnë forcimin e pranisë së Forcave të Armatosura Daneze në ishull.

Megjithatë, pjesa më e madhe e aftësisë luftarake të mbetur të Danimarkës është aktualisht e lidhur me angazhimet e NATO-s në shtetet baltike.

Groenlanda, një territor vetëqeverisës brenda Mbretërisë së Danimarkës, ka tërhequr interesin e SHBA-së për shkak të vendndodhjes së saj strategjike dhe burimeve të mëdha minerale.

Danimarka dhe Groenlanda kanë refuzuar propozimet për të shitur territorin, duke riafirmuar sovranitetin danez mbi ishullin.

Të martën, ministri danez i Mbrojtjes, Troels Lund Poulsen, konfirmoi planet për një gjurmë ushtarake më të fortë dhe më të përhershme në Groenlandë.

“Tani po ecim përpara me të gjithë çështjen e një pranie më të përhershme dhe më të madhe në Groenlandë nga mbrojtja daneze, por edhe me pjesëmarrjen e vendeve të tjera”, u tha ai gazetarëve. “Ashtu siç pamë në vitin 2025, ku pamë se kishte vende të tjera të NATO-s që merrnin pjesë në aktivitete të stërvitjeve dhe trajnimeve në Groenlandë, do ta shohim këtë edhe në vitin 2026”, tha ai.

Të dielën, Trump tha se SHBA-të duhet ta “blejnë” Groenlandën për të parandaluar marrjen e ishullit nga Rusia ose Kina. Ai më parë e përshkroi zotërimin e Groenlandës si një “domosdoshmëri absolute” për sigurinë ekonomike të SHBA-së, duke e krahasuar atë me një “marrëveshje të madhe pasurish të paluajtshme”.