Author: admin

Një aksident i rëndë rrugor tronditi komunitetin e Bellaria Igea Marina në Rimini pasditen e 29 tetorit, ku Evan Oscar Delogu, 18 vjeç, humbi jetën.

I riu, djali i Walter Delogu dhe vëllai i prezantuesit dhe shkrimtarit Andrea Delogu, po udhëtonte me një motoçikletë Benelli 750 në Via Vittor Pisani kur humbi kontrollin e automjetit dhe u përplas me dy shtylla ndriçimi pranë rrugës.

Pavarësisht ndërhyrjes së menjëhershme të paramedikëve të 118, përpjekjet për të shpëtuar të riun rezultuan të pasuksesshme. Rruga u mbyll përkohësisht ndërsa Policia Lokale nisi një hetim për të përcaktuar shkakun e aksidentit, duke marrë parasysh mundësinë e një defekti mekanik, shpërqendrimi apo probleme shëndetësore. Motoçikleta u sekuestrua për analiza të mëtejshme.

Babai i Evanit, Walter Delogu, ndau një mesazh prekës në Facebook: “Ndonjëherë zemra rreh edhe kur ai është i vdekur… Faleminderit të gjithëve për mbështetjen tuaj në këtë kohë zie… Dua që ta kujtoni fëmijën tonë kështu… Mirupafshim Evan… Babai yt… dhe mamaja jote…”

Mesazhi i tij i mbushur me dhimbje dhe dashuri mori qindra komente ngushëlluese nga miq dhe të njohur.

Sipas raporteve fillestare, aksidenti ndodhi rreth orës 15:40 në një segment të drejtë rrugor pranë parkut të qytetit, pa përfshirë automjete të tjera. Policia po mbledh deklarata dhe prova për të përcaktuar rrethanat e sakta të tragjedisë.

Kjo ngjarje ka tronditur jo vetëm familjen Delogu, por edhe të gjithë komunitetin lokal, duke rikujtuar rëndësinë e sigurisë në rrugë dhe pasojat e papritura që mund të sjellin aksidentet me motoçikleta.

Pas më shumë se 4 vitesh nga një prej ngjarjeve më të rënduara që tronditi opinionin publik shqiptar, Gjykata e Lartë ka dhënë vendimin përfundimtar në çështjen penale ndaj ish-efektivit të forcave “Shqiponja”, Nevaldo Hajdaraj, i akuzuar për vrasjen me dashje të 25-vjeçarit Klodian Rasha.

Me këtë vendim, Gjykata e Lartë ka rrëzuar rekursin e paraqitur nga Hajdaraj, duke lënë në fuqi vendimin e Gjykatës së Apelit, e cila e kishte shpallur fajtor për vrasje me dashje dhe e kishte dënuar me 18 vite burg. Por për shkak të përfitimit nga gjykimi i shkurtuar, Hajdaraj do të vuajë 12 vite burgim efektiv.

Po ashtu, u rrëzua edhe rekursi i Prokurorisë, e cila kishte kërkuar dënimin maksimal prej 20 vitesh dhe mospranimin e gjykimit të shkurtuar, duke pretenduar se rrethanat e veçanta të ngjarjes nuk përmbushnin kushtet për këtë procedurë. Por Gjykata e Lartë nuk i pranoi këto argumente dhe i qëndroi vendimit të Apelit.

Si ndodhi vrasja e Klodian Rashës?
Ngjarja e rëndë ndodhi në orët e para të mëngjesit të 8 dhjetorit 2020 në Tiranë, gjatë orës policore të vendosur për shkak të pandemisë. Klodian Rasha, një 25-vjeçar që po ecte në rrugë pranë banesës së tij, u qëllua për vdekje nga efektivi Nevaldo Hajdaraj.

Sipas akt-ekspertimit dhe pamjeve filmike të sekuestruara nga Prokuroria e Tiranës, Rasha ishte në ikje e sipër, ndërsa Hajdaraj kishte hapur zjarr nga një distancë prej 4–5 metrash. Në një moment, ish-polici u shtri në trotuar dhe qëlloi dy herë me armën e shërbimit, një nga plumbat duke e goditur viktimën në shpinë, duke i shkaktuar vdekjen e menjëhershme.

Ngjarja shkaktoi reagime të forta në publik dhe në politikë. Mijëra qytetarë dolën në protestë në ditët që pasuan, duke kërkuar drejtësi për të riun dhe duke denoncuar dhunën policore. Si pasojë e presionit publik, atëherë-ministri i Brendshëm Sandër Lleshaj dha dorëheqjen.

Babai i Klodian Rashës: “Drejtësia është e verbër”
Pas vendimit të Gjykatës së Lartë, babai i Klodian Rashës, Qazim Rasha, është shprehur i zhgënjyer. Ai e cilësoi dënimin si “të butë” dhe tha se “drejtësia shqiptare ka zgjedhur të mbyllë sytë përballë një vrasjeje të qartë, të dokumentuar dhe të rëndë”.

“Për një jetë të marrë padrejtësisht, për një djalë që nuk mbante armë, që vraponte për të shpëtuar, për një veprim që shkatërroi familjen time, 12 vite janë një tallje. Ky është një dënim për të larë ndërgjegjen e shtetit, jo për të dhënë drejtësi”, u shpreh ai për mediat.

Mbyllet procesi penal, por jo dhimbja publike

Me vendimin e Gjykatës së Lartë, mbyllet përfundimisht procesi penal ndaj Nevaldo Hajdarajt, duke i dhënë fund një sage gjyqësore që la plagë të thella në shoqërinë shqiptare. Megjithatë, debati për përdorimin e forcës nga strukturat e rendit, abuzimin me armën e shërbimit dhe mungesën e transparencës në rastet e ngjashme mbetet ende i hapur.

Ngjarja e dhjetorit 2020 u shndërrua në një simbol të pakënaqësisë ndaj sistemit të drejtësisë dhe strukturave shtetërore, ndërsa emri i Klodian Rashës vazhdon të përmendet në çdo protestë ku kërkohet llogaridhënie për jetën e qytetarëve përballë autoritetit të shtetit.

Nga Dorian Kodra

Kthimi i Shqipërisë në bisedimet politike për kufirin detar me Greqinë ndodh në një moment kur qeveritë e dy vendeve takohen në pozicione asimetrike. Aq të thella janë diferencat sa argumentat në tryezë rrezikojnë të kalojnë në plan të dytë në formati që; s’ka rëndësi çfarë negociohet, por se kush qëndron në pozita force dhe kush në pozita të dobëta. Udhëtimi i 16 dhjetorit i ministres së Jashtme Elisa Spiropali drejt Athinës hyn pikërisht në këtë kategori.

Në tryezën e bisedimeve me homologun grek Giorgos Gerapetritis, sipas mediave greke, në krye të agjendës do të jetë rihapja e negociatave për kufirin detar, pra për delimitimin e Zonës Ekonomike Ekskluzive. Në titullin me shkrimin “Një udhërrëfyes i ri me Tiranën” media greke To Vima shkruante se “në krye të axhendës së takimit të dy ministrave të jashtëm do të jenë diskutimet për delimitimin e ZEE”, duke shtuar se kjo po ndodh “në një moment të ri, në sfondin e projekteve aktuale dhe të ardhshme energjitike”.

Spiropali për “TA NEA”: Po vij në Athinë për të diskutuar gjithçka

Mbetet ende në pikëpyetje fakti nëse qeveria shqiptare është tërhequr nga pozicioni, me të cilin ishte rënë dakort me Greqinë, që çështja e kufirit detar do të vendosej nga Gjykatën Ndërkombëtare të Hagës, ku palët do të uleshin formalisht të barabarta.

Megjithatë udhëtimi i Spiropali drejt një tryeze negociatash të rihapura, me një axhendë të imponuar në Athinë është sinjal se qëndrimi i Shqipërisë tashmë ka ndryshuar. Dhe kjo nuk është rastësi.

Athina rihyn në negociata e fuqizuar nga një rol i ri strategjik në politikën energjitike amerikane, pasi është shndërruar në portën hyrëse të gazit të lëngshëm të SHBA drejt Europës Lindore. Nga ana tjetër Tirana hyn e dobësuar nga një krizë e thellë e brendshme politike dhe institucionale, nën presionin e drejtësisë së mbështetur fort nga SHBA.

Më shumë se një qeveri e fortë që mund të përfaqësojë denjësisht interesat e Shqipërisë jashtë vendit, për momentin kjo e Edi Ramës sot i ngjan një trupe të dëshpëruar, nën presionin e provave të korrupsionit dhe të vjedhjeve skandaloze, që kanë dalë hapur tashmë. Dhe këtu është pikënisja e problemit.

Greqia, pika kyçe e projekteve energjitike amerikane

Për të kuptuar pse Athina sot negocion nga një pozicion shumë më i fortë se disa vite më parë, duhet parë roli i ri që Greqia ka marrë në politikën energjitike të SHBA dhe të Europës. Në muajt e fundit, zhvillimet kanë qenë të shpejta.

Për administratën e re amerikane, energjia është shndërruar në instrument shumë të rëndësishëm të politikës së jashtme.

Shprehja “Drill, baby, drill” një slogan elektoral i Donald Trump, paralajmëronte një politikë të re ekonomike; me rritjen e prodhimit të naftës dhe gazit brenda SHBA dhe tek aleatët, pa u kufizuar nga objektivat klimatike, për të siguruar fuqi ekonomike, pavarësi energjetike nga Rusia dhe epërsi gjeopolitike. SHBA synon të zëvendësojë gazin rus në Europë “deri në molekulën e fundit”, siç e formulojnë vetë zyrtarët amerikan.

Sekretari amerikan i Energjisë Chris Wright e artikuloi këtë pa asnjë ekuivok në Athinë, gjatë vizitës kur u nënshkruan disa marrëveshje të rëndësishme, kur deklaroi: “Ne kemi një mundësi të jashtëzakonshme për të zëvendësuar gjithë gazin rus, të gjithë, deri në molekulën e fundit, nga Europa Perëndimore”

Në këtë skemë, Greqia është shndërruar në portën kryesore të hyrjes së gazit të lëngshëm amerikan në Europë përmes dy porteve strategjike, Revithoussa dhe Alexandroupoli.

Revithoussa, terminali ekzistues LNG pranë Athinës, pas vitit 2022 u zgjerua dhe u vu në funksion jo vetëm për nevojat e brendshme, por edhe për eksport drejt Ballkanit, kryesisht Bullgarisë.

Ndërkohë, më 2023 hyri në fazë operative edhe terminali lundrues LNG i Alexandroupolit, një projekt kyç që u mbështet drejtpërdrejt nga SHBA dhe BE, si pjesë e planit për të zëvendësuar gazin rus në Europën Lindore.

Më 2024 dhe 2025, Greqia nënshkroi marrëveshje afatgjata për importin e gazit të lëngshëm amerikan, përfshirë kontrata 20 vjeçare që nga viti 2030 për rreth 700 milion metra kub gaz në vit, duke u pozicionuar si nyje tranziti për korridorin vertikal të gazit, që lidh Greqinë me Bullgarinë, Rumaninë, Hungarinë, Moldavinë dhe Ukrainën. Kjo e ka kthyer Athinën nga një konsumator periferik në shpërndarës rajonal, duke i dhënë një rol të pazëvendësueshëm në sigurinë energjetike të Europës Juglindore.

Rëndësia politike e këtyre zhvillimeve është thelbësore. Me dy porte funksionale LNG dhe me mbështetje të drejtpërdrejtë amerikane, Greqia ka fituar peshë gjeopolitike, ndikim në Bashkimin Europian dhe në marrëdhëniet me fqinjët.

Energjetika i ka dhënë Athinës statusin e partnerit strategjik të SHBA në rajon, duke e forcuar ndjeshëm pozicionin e saj negociues në çdo çështje dypalëshe, përfshirë edhe ato që formalisht nuk lidhen me energjinë, si kufijtë detarë dhe marrëdhëniet politike në Ballkan.

Sekretari amerikan i energjisë Chris Wright, pas firmosjes së marrëveshjes me Mitsotakis në nëntor, e përshkroi këtë ndryshim historik me një fjali shumë domethënëse: “Greqia ishte në fund të një sistemi furnizimi energjetik të dominuar nga Rusia. Sot, Greqia bëhet pikë nisjeje, porta hyrëse e energjisë amerikane në Europë.”

Po ashtu, projekti i të ashtuquajturit “Korridori vetikal i gazit”, që nis nga brigjet greke dhe shtrihet drejt Bullgarisë, Rumanisë, Hungarisë dhe Ukrainës, e vendos Athinën në qendër të një arkitekture të re sigurie energjetike europiane.

Në praktikë, kjo e bën Greqinë një partnere akoma më të ngushtë të Shteteve të Bashkuara të Amerikës, por edhe një faktor që Bashkimi Europian nuk mund ta anashkalojë. Dhe një vend që është kaq i rëndësishëm për SHBA dhe BE, e shfrytëzon momentin për të negociuar ndryshe me fqinjët e vegjël.

Gjigandi amerikan ExxonMobil nis kërkimet për gaz në detin Jon

Në këtë kontekst, hyrja e ExxonMobil në detin Jon dhe marrëveshja për kërkimet e gazit në bllokun “Joni 2” e ndryshon rrënjësisht lojën. ExxonMobil është një aktor me buxhete gjigande, që historikisht ka ndikuar drejtpërdrejt në formësimin e politikave energjitike amerikane.

Në fillim të muajit nëntor, ExxonMobil ka nënshkruar marrëveshjen për kërkime gazi në ujërat perëndimore të Greqisë, duke marrë 60 për qind të aksioneve në një bllok detar, në partneritet me Energean dhe Helleniq Energy. Investimi fillestar llogaritet nga 50 deri në 100 milionë dollarë, ndërsa shpimet e para priten në fund të vitit 2026 ose fillim të 2027.

Ambasadorja amerikane në Athinë, Kimberly Guilfoyle, një ish prezantuese e Fox që ka nxitur fort për marrëveshjet energjitike të Greqisë me SHBA dhe Ukrainën, e shpalli këtë hap me një fjali simbolike: “Amerika është kthyer dhe po nis kërkimet në detin Jon.”

Kjo do të thotë se aty ku kompania ExxonMobil nis aktivitetin tregtar dhe investon dollarët e saj, SHBA ka interes të drejtpërdrejtë. Dhe aty ku SHBA ka interes të drejtpërdrejtë, kufijtë duhet të jenë të qartë, me stabilitet të garantuar dhe pa surpriza politike. Kjo e forcon automatikisht pozicionin grek në çdo diskutim për kufijtë detarë në rajon. Investimet shumë miliardëshe amerikane nuk mund të investohen në terren të paqartë.

Negociatat me Shqipërinë, nëpërmjet një qeverie të hetuar nga SPAK

Në anën tjetër të tryezës është Shqipëria, qeveria e të cilës është nën presionin e fortë të drejtësisë së re. Që SPAK dhe GJKKO janë të mbështetura fort nga SHBA, ky nuk është një sekret.

Kronologjia/ 23 ditët që e kthyen Ramën në ushtar të Ballukut

Dy zyrtarë të lartë amerikanë që së fundmi kanë vizituar Tiranën nuk kanë preferuar të trokasin në zyrën e kryeministrit të Shqipërisë, Edi Rama.

Zv/Ndihmës Sekretari i Shtetit Marc Fleming dhe zëvendësi i tij Lyn Debevoise erdhën në Tiranë dhe kërkuan posaçërisht të vizitojnë SPAK-un, për të theksuar fort partneritetin me prokurorët shqiptarë që kanë në duar dosje të nxehta të korrupsionit qeveritar.

Hetimet për Belinda Ballukun, mesazhet kompromentuese në celularët e saj, pezullimi nga detyra i zv.kryeministres, përplasja me Gjykatën Kushtetuese dhe lufta e hapur e kryeministrit me gjyqësorin kanë krijuar një klimë konfrontuese mes institucioneve.

Shefi i ri i SPAK, prokurori i ambasadorëve

Kthesa e SPAK në hetimet për zv.kryeministren Belinda Balluku ishte e menjëhershme. Për herë të parë, hetimet u shtrinë përtej një vije të kuqe të vizatuar po nga amerikanët dhe që kishte shërbyer si mburojë për kryeministrin Edi Rama.

Ndërkohë, hetimi dhe më pas masa e pezullimit të Belinda Ballukut nga detyra u lexua si një kërcënim i drejtpërdrejtë për postin e Ramës në kryeministri.

Përfaqësuesit e Shteteve të Bashkuara jo vetëm i nxitën prokurorët të vazhdojnë me hetimin, por mesazhet që mbërritën nga Departamenti i Shtetit ishin të forta, si për të treguar se koha e përkëdheljeve amerikane për qeveritarët shqiptarë tashmë kanë marrë fund.

I tillë ishte mesazhi i Donald Trump për festën e pavarësisë në 28 Nëntor, që bashkë me urimet përmendte kërkesën për të luftuar kundër organizatave kriminale. Po aq i drejtpërdrejtë ishte edhe mesazhi i sekretarit të Shtetit Marco Rubio në të njëjtën ditë, në festën e flamurit.

Washingtoni i kujton Ramës kartelet e drogës në Ditën e Flamurit

Me tone paralajmëruese, Marco Rubio kërkonte luftë ndaj karteleve të trafikut të drogës dhe ndaj bandave të trafikut transnacional. Mesazhet qenë të paprecedenta për asnjë vend tjetër të rajonit.

Oferta e humbur amerikane për Shqipërinë

Duhet thënë se Shqipëria ishte e para që mori ofertën për të qenë nyje energjitike e gazit të lëngshëm amerikan në Evropë.

Në vitin 2021, Belinda Balluku udhëtoi drejt Shteteve të Bashkuara të Amerikës dhe firmosi në Houston me Exxon Mobil dhe Excelerate Energy një memorandum mirëkuptimi.

Marrëveshja do të përmbante 3 pika kryesore: 1) futjen e gazit të lëngshëm (LNG) në Shqipëri, 2) konvertimin e TEC-it të Vlorës që të punojë me këtë gaz dhe 3) ndërtimin e një terminali të ri gazifikimi, e deri tek shpërndarja në shkallë të vogël e gazit, duke shndërruar Vlorën në një treg rajonal.

Mes qeverisë shqiptare dhe zyrtarëve të lartë të ExxonMobil u zhvillua edhe një bisedë në Zoom, me ndërmjetësimin e ambasadores amerikane Yuri Kim. (VIDEO KETU)

Ideja e kompanisë amerikane dhe dëshira e ambasadores Yuri Kim ishte që TEC-in e Vlorës në një nyjë strategjike të gazit amerikan për Ballkanin, me terminalin LNG që do ta shndërronte Vlorën “në portin rajonal të gazit”.

Në takimin online me përfaqësues të Exxon Mobil në mars të 2021, Rama shprehej: “Sot për Shqipërinë nis epoka e artë e gazit. Nuk do të ishte e mundur pa ambasadoren Yuri Kim.” Ndërsa Balluku shtonte: “Kjo është një marrëveshje historike që do ta bëjë Vlorën port rajonal të gazit.”

Nuk dihet pse, por gjërat nuk ecën siç ishin parashikuar. Ndoshta për mungesë të kapaciteteve, ndoshta për shkak të një administrate thellësisht të korruptuar, Shqipëria humbi shansin të ishte partnerja e dëshiruar e SHBA për energjinë.

Katër vite më vonë, TEC-i nuk punon, terminal nuk ka, asnjë metër kub gaz i lngëshëm nuk ka hyrë në vendin tonë, dhe Shqipëria është zhdukur nga harta e projekteve rajonale që financohen e drejtohen nga amerikanët.
Exxon Mobil zgjodhi Athinën firmos për kërkimet e para të këtij lloji pas 40 vitesh në ujërat greke, duke tejkaluar pakënaqësitë e së shkuarës mes dy vendeve.

Negociatat për kufirin detar, një formalitet?

Kuptohet se një qeveri e intimiduar nga hetimet si kjo e Edi Ramës është në kërkim të qetësisë. Jo më kot, Ministrja e Jashtme Elisa Spiropali, është gati të udhëtojë kokëulur drejt Athinës për të negociuar edhe një herë kufirin detar.

Në këtë kontekst duhen parë edhe fakti që, sapo ishte marrë e pandehur për korrupsionin tek tuneli i Llogarasë në fillim të nëntorit, Belinda Balluku u shfaq në Athinë në ceremoninë e kompanive amerikane për kërkime në detin Jon. Ishte udhëtimi i saj i fundit jashtë vendit, para se GJKKO t’i bllokonte pasaportën.

Belinda në Athinë/ “E pandehura”, që feston fitoren e Greqisë në projektet e gazit

Të legenosur nga aferat korrupsionit dhe të shtrënguar nga darët e një drejtësie që u ka dalë nga duart, qeveritarët shqiptarë janë më të dobët se kurrë. Dhe dobësia, në marrëdhënie me të huajt, gjithmonë paguhet.

Në fund, kufiri detar mund të jetë një kompromis i mirë politik duke parë rrethanat. Por kompromiset e diktuara nga frika dhe presionet s’mund t’i shërbejnë interesit kombëtar./Lapsi.al

Keisi Medini, një nga vajzat më të ndjekura në rrjetet sociale shqiptare, ka tërhequr sërish vëmendjen me paraqitjen e saj më të fundit. Influencerja bukuroshe ka ndarë në Instagram disa foto ku shfaqet me një fustan elegant të zi, të gjatë dhe pa reçipeta, duke sjellë një pamje sa sensuale, aq edhe tërheqëse.

Pozat e reja të Keisit janë realizuar në një ambient modern, me ndriçim të butë që e vë në pah linjat dhe stilin e saj të veçantë.
Pamja e thjeshtë, por provokuese, ka bërë që ndjekësit të shpërthejnë me komente, ku pjesa më e madhe e komplimentojnë për elegancën dhe vetëbesimin që përcjell.

Në vetëm pak orë, postimi i saj ka marrë mijëra pëlqime dhe qindra reagime, ndërsa fansat nuk kanë ngurruar ta quajnë “një nga paraqitjet më të guximshme të saj deri më sot”.

Keisi, e cila njihet si një nga emrat më të ndjekur në Instagram, ka ndërtuar një imazh të fortë përmes stilit të saj unik dhe prezencës së vazhdueshme në rrjetet sociale. Herë pas here ajo arrin të kombinojë elegancën me provokimin, duke ruajtur një ekuilibër që e bën ndër figurat më të komentueshme të showbiz-it shqiptar.

Ndërkohë, përveç botës së modës dhe rrjeteve sociale, Keisi ka paralajmëruar se po përgatit një projekt të ri artistik, që sipas burimeve të afërta, do të publikohet gjatë muajve në vijim.

“Bukuria nuk është vetëm ajo që vesh, por mënyra si ndihesh kur e vesh”, ka shkruar Keisi në mbishkrimin e postimit, duke e shoqëruar me një emoji zemre të zezë — një detaj që fansat e kanë interpretuar si simbol të stilit të saj “dark glam”.

Fotoja e Keisit po qarkullon me shpejtësi në rrjetet sociale, duke u bërë ndër më të klikuarat e ditës. 

Gazeta e njohur greke “Protothema” ka publikuar një shkrim të gjatë për prejardhjen e heroit tonë kombëtar Skënderbeut. Shkrimi mban titullin “Sa “shqiptar” ishte Gjergj Kastrioti apo Skënderbeu, çfarë fsheh varri i harkuar në Manastirin e Çilandarit në Malin Athos?”.

Ai është i mbushur me një sërë të dhënash të njëanshme pasi duke e konsideruar Epirin grek, dhe duke qenë se Skënderbeu ka pasur edhe epitetin “Mbret i Epirit” edhe ai konsiderohet grek. Sipas shkrimit, Skënderbeu ishte ortodoks dhe fliste greqisht. Një tjetër pretendim është se për të nuk ka këngë të vjetra në gjuhën shqipe.

Më pas thuhet se njëri nga vëllezërit e Skënderbeut, Reposhi u bë murg dhe jetoi në malin Athos. Në atë vend ekziston një vend që quhet “Kulla e Shqiptarit” dhe besohet se u ble nga babai i Skënderbeut, Gjoni dhe ku ai u varros së bashku me djalin e tij murg.

Shkrimi i plotë:

“Sa “shqiptar” ishte Gjergj Kastrioti apo Skënderbeu, çfarë fsheh varri i harkuar në Manastirin e Çilandarit në Malin Athos?”

E kemi përmendur gjerësisht Gjergj Kastriotin (ose Skënderbeun) në artikullin tonë të 5 majit 2018, i cili shkaktoi diskutime të nxehta. Ne e dimë që Kastrioti është heroi kombëtar i Shqipërisë. Megjithatë, ka disa fakte të paqarta rreth origjinës së tij. Një studim shumë interesant nga Paschalis Androudis, Profesor-Ndihmës i Arkeologjisë dhe Artit Bizantin dhe Islamik, në Departamentin e Historisë dhe Arkeologjisë të Universitetit “Aristoteli” të Selanikut, mbi të ashtuquajturën “Kulla Shqiptare” në Malin Athos dhe marrëdhënien e babait të Gjergjit, Gjon Kastriotit, dhe njërit prej vëllezërve të tij me Gadishullin Athos na bëri ta rishqyrtojmë këtë temë.

Dëshirojmë ta falënderojmë ngrohtësisht Androudis, i cili na dha leje të mbështetemi në të dhënat nga studimi i tij dhe në informacionin shtesë që na dha.
Gjon Kastrioti: babai i “Skënderbeut”

Gjergj Kastrioti (1404 ose 1405-1468) ishte djali i Gjon Kastriotit, udhëheqësit të Shqipërisë së sotme veriore dhe Vojvodinës, i cili vinte nga familja fisnike serbe e Brankoviçëve. Silvius Enea (pseudonimi letrar i Papa Pius II, 1405-1464), një bashkëkohës i Kastriotëve, besonte se Kastriotët ishin maqedonas nga Imathia (një artikull Achilleas G. Lazaros, me titull “Albania” u botua në “Nea Estia” për krishtlindjet 1994). Pothuajse kudo përmendet se gjyshi i Gjergjit, Konstandini, i cili vdiq në vitin 1390, ishte sundimtar i Imathisë dhe Kosturit, nga e cila vjen mbiemri i tij (Kastriotis < Kastoriotis). Babai i tij, Gjoni, ishte sundimtar i Krujës.

Është e pamohueshme që Kastriotët ishin të krishterë në fe. Gjon Kastrioti (1380-1437), një vasal fillimisht i osmanëve, pastaj i venedikasve dhe më vonë përsëri i osmanëve, e shtriu sundimin e tij deri në Alesio, Lezhën e sotme dhe grykëderdhjen e lumit Mat, duke arritur deri në det. I korruptuar nga venedikasit, ai u bashkua me ta. Megjithatë, Sulltan Murati I, me fushatën e tij të re në Ballkanin Perëndimor, e bëri Kastriotin përsëri vasal të tij. Për të shmangur një federatë të re, ai e detyroi atë të dërgonte si pengje 4 djemtë e tij Stanishin, Reposhin, Kostandinin dhe Gjergjin në Adrianopojë, në atë kohë kryeqyteti i Perandorisë Osmane. Gjon Kastrioti dhe gruaja e tij Vojsava patën 9 fëmijë (5 vajza, emrat e të cilave nuk i dimë përveç njërës, Marës dhe 4 djemve që përmendëm).

Sulltan Murati, duke vlerësuar trimërinë, inteligjencën dhe bukurinë e Gjergjit, u mor veçanërisht me edukimin e tij. Ai u edukua me trashëgimtarin e fronit të Mehmetit II, i njohur edhe si “Pushtuesi”. Në një moshë shumë të re, Murati e emëroi atë komandant në një betejë me serbët. Gjergji tregoi trimëri të madhe dhe e udhëhoqi ushtrinë e tij drejt fitores. Murati shprehu admirimin e tij duke e quajtur Iskender Bej (Skënderbej) që do të thotë “Aleksandri i sundimtarëve”. Duhet theksuar se si Gjergji ashtu edhe vëllezërit e motrat e tij ishin konvertuar në Islam. Megjithatë, disa ngjarje filluan ta tronditnin Gjergjin.

Vdekja misterioze e dy vëllezërve të tij (i treti, Reposhi, u bë murg, detajet do t’i shohim më vonë), emërimi i një apostati, Hasan Bej Versezenda, nga Murati si komandant garnizoni në Kroaci nga Muradi, i cili e dëboi nënën e tij, e cila vdiq pak më vonë (babai i tij kishte vdekur në vitin 1437), dhe nostalgjia për atdheun e tij, e çuan përfundimisht Gjergj Kastriotin të largohej nga radhët e osmanëve, gjatë një beteje me sundimtarin hungarez Huniadi në vitin 1443, dhe pasi e detyroi sekretarin e sulltanit të nënshkruante një ferman për dorëzimin e Kroacisë, ai u nis për në atdheun e tij me 300 burra të besuar.

Duke parë fermanin, komandanti i garnizonit të Krujës dorëzoi fortesën. Të nesërmen, qyteti u mbush me flamuj me emblemën e Kastriotit, shqiponjën me dy koka. Populli shpërtheu në brohoritje. Më 28 nëntor 1443, Kastrioti filloi revolucionin kundër osmanëve. Kastrioti (shih edhe artikullin e 5 majit 2018) u bë një makth për osmanët.

Ai humbi vetëm një betejë, kundër Evren Beut, i cili kishte një ushtri shumë të fortë prej 40 000 burrash, më 26 korrik 1455. Ai shkoi në Itali për të marrë ndihmë, por nuk arriti asgjë të veçantë. Ai u martua me më të voglën nga 8 vajzat e Arianit Gjergj Komnenit, një sundimtar që luftoi gjithashtu kundër osmanëve. Skënderbeut iu ofrua roli i udhëheqjes së një kryqëzate, pasi ishte ripagëzuar si i krishterë, dhe ai dukej i gatshëm ta bënte këtë, por u sëmur nga malaria dhe vdiq në janar 1467 në Lezhë dhe u varros në kishën e Shën Nikollës në këtë qytet.

Sa “shqiptar” ishte Kastrioti?

Tani do të bëjmë disa pyetje rreth origjinës së Kastriotit, i cili është shpallur hero kombëtar i Shqipërisë sepse lindi dhe veproi kryesisht në territoret, sot, shqiptare.

A është mbiemri Kastrioti shqiptar? Dhe nëse po, cila është etimologjia e tij? Sa veta e dinë që aktivitetet e tij arritën deri në Pogonin e sotëm? Rrënojat e njërës prej fortesave të tij ekzistojnë ende në Oreokastro. Kjo fortesë u pushtua nga turqit vetëm kur ia prenë furnizimin me ujë nga lumi fqinj Gormos (një nga përrenjtë origjinalë të Kalamas).

A është shqiponja dykrenare, emblema e Kastriotit, me origjinë bizantine apo jo? (Shih artikullin tonë përkatës më 26 qershor 2021). Cila ishte gjuha zyrtare në zonat e kontrolluara nga Kastrioti?

Maria Michaēl-Dede në veprën e saj “Arvanitasit grekë” shkruan: “…e njëjta gjë ndodh edhe me arvanitasit që zbritën (domethënë në territorin grek) pas rënies së Kastriotit, i cili dihet jo vetëm se ishte grek, por edhe se e kishte greqishten si gjuhë zyrtare të shtetit.”

Ioannis Touloumakos, në një fjalim të botuar në procedurat e Konferencës së 2-të Shkencore Panhelenike, me titull: “Qytetet e lashta greke të Epirit të Veriut”, shkruan: “… (Kastrioti) përdori emrin e Aleksandrit të Madh dhe ishte mësuar të mbante përkrenaren e lashtë maqedonase me bririn e dyfishtë, ndërsa në të njëjtën kohë paraqitej si pasardhës i epirotëve (konkretisht i Pirros)”.

Zëvendëskryetari i Kastriotit ishte i afërm i tij dhe quhej Vrana, (Konti) një mbiemër i një familjeje të shquar bizantine.

Pse nuk ka këngë popullore (në gjuhën e folur) shqipe për heroizmin e Kastriotit, ndërsa ka të ngjashme për heronj me rëndësi të vogël? A kishte një vetëdije kombëtare shqiptare në mesin e shekullit të 15-të? Shqiptarët në atë kohë ishin një grup fisesh ndërluftuese, pa traditë kombëtare, pa unitet kombëtar dhe gjuhësor.

A është e vërtetë që kur Kastrioti u kthye në Krujë, u tha bashkëqytetarëve të tij myslimanë të zgjidhnin midis krishterimit dhe vdekjes dhe meqenëse shumica e tyre refuzuan të bëheshin të krishterë, u masakruan? Fan Noli famëkeq e konsideron këtë veprim të Kastriotit si një luftë të shenjtë kundër myslimanëve.

Sipas gazetarit dhe shkrimtarit francez Rene Pio, grekët morën pjesë edhe në luftërat e Kastriotit. Himariotët, për shembull, me flamuj që kishin një kryq blu dhe të bardhë. Andruçët, Boçarët etj. morën pjesë në mbrojtjen e Krujës. Siç shkruan D.N. Boçari: “…pas vdekjes së Skënderbeut, Boçarët, duke luftuar kundër turqve dhe turko-shqiptarëve, zbritën drejt Dragani. Në fillim të shekullit të 17-të, ata themeluan Lidhjen Suliotike me grekë të tjerë të lirë”.

Mbrojtësit e Mesolongjisë (1825) e konsideronin Kastriotin një hero model, prandaj i dhanë njërës prej artilerisë së tyre, të tretën me radhë pas atyre të Drakoulisit (një personazh dhe luftëtar i vitit 1821 që u vra në Dragatsani) dhe Kanarisit, emrin “Skenderbej”. Ata ishin disa nga shqiptarët që çliruan Greqinë, do të thonë disa…

Duke iu drejtuar Mehmetit II, Kastrioti shkruan: “Gjergj Kastrioti, i riemëruar Skënderbej, sundimtar i Epirit dhe i Shqiptarëve, ushtar i Jezu Krishtit për Mehmetin, monarkun e muhamedanëve, gëzohuni… 30 maj 1461”.

Murati II, në përgjigjen e tij ndaj Kastriotit, e quan atë “sundimtar i Shqiptarëve dhe i Epirit”. Ai vetë, duke iu drejtuar Mbretit Alfonso, e quan veten “Princ i Epirotëve” ndërsa duke iu drejtuar princit të Tarantos, Gjon Antonius, shkruan: “Paraardhësit tanë ishin epirotët nga të cilët lindi ai Pirro… Ju nuk keni burra mjaftueshëm të fortë për t’u rezistuar epirotëve.”

Edhe në pullat shqiptare të emetuara në vitin 1968 me rastin e 500-vjetorit të vdekjes së Kastriotit, emri i tij është shkruar si Gjergji Kastrioti (në njërën prej 25 pullave), ndërsa në një tjetër, është kopertina e historisë së biografit të parë të Barletit me titull: “HISTORIA DE VITA ET GESTIS SCANDERBERGI EPIROTARUM PRINCIPIS” (“HISTORIA E JETËS DHE ARRITJEVE TË SKËNDERBERGUT, PRINCI I EPIRIT”).

Së fundmi, historiani i madh Pavlos Karolidis shkoi në Itali dhe takoi pasardhës të Kastriotit. Ata e quajnë veten grekë, janë ortodoksë fanatikë dhe qendra e tyre kryesore në Siçili quhet Piana de Greci (Vendi i Grekëve). (Në fakt ajo quhet “Piana dei Albanesi” – Pllaja e shqiptarëve)

Babai dhe vëllai i Skënderbeut janë varrosur në manastirin e Chilandarit në malin Athos! Çfarë është “Kulla e Shqiptarit”?

Arsyeja e rikthimit të angazhimit tonë për Gjergj Kastriotin ishte zbulimi në internet i një artikulli rreth “Kullës Shqiptare” në Malin Athos. Ky artikull bazohet në një studim të gjerë dhe të shkëlqyer nga Profesori Ndihmës i Universitetit Aristoteli të Selanikut, Paschalis Androudis. Ne e kontaktuam atë dhe ai me dëshirë ndau disa informacione me ne.

Në revistën “Byzantium” (2002) (f. 219-245), ekziston një studim i gjerë nga P. Androudis me titull: “Dëshmi historike dhe arkeologjike për “Kullën Shqiptare” në Malin Athos.”

Atje lexojmë se në manastirin serb të Hilandarit në Malin Athos, është varrosur Reposio ose Reposhi, “Duka i Ilirisë” i cili vdiq në Hilandari si murg i thjeshtë në vitin 1430. Ky është ndoshta vëllai i Gjergj Kastriotit, i cili deri vonë besohej se ishte bërë murg në Sinai. Reposhi me sa duket është vëllai që u shpëtoi osmanëve.

Megjithatë, siç shkruan P. Androudis, një i afërm tjetër i Reposhit u bë gjithashtu murg dhe u varros në Hilandari. Ky ndoshta ishte Gjon Kastrioti, babai i Gjergjit, i cili në vitet e fundit të jetës së tij u bë murg në Athos!

Babai dhe djali janë varrosur në një arcosolium, një lloj varri me hark. “Kulla Shqiptare” shoqërohet gjithashtu me fjalët Ioannis Kastriotis. Është një kullë gjysmë e rrënuar në zonën e pyllëzuar në jug të Manastirit të Hilandarit, mbi sketin e braktisur të Trinisë së Shenjtë. Kulla është ndërtuar ndoshta në shekullin e 12-të (sipas një versioni tjetër në vitin 1270 në vendin e manastirit të vjetër të Agios Georgios) dhe ishte një fortesë mbrojtëse kundër bastisjeve pirate. Ajo ka mbështetëse (këmbë) në secilën anë, gjë që tradhton një stil bizantin. Lartësia e saj që ka mbijetuar sot arrin 6 metra.

Sipas një dokumenti të viteve 1421-1422, Gjon Kastrioti bleu kullën nga Manastiri i Hilandarit për 60 florinj venecianë. Në të njëjtën kohë, ai bleu edhe 4 adelfata, për vete dhe tre nga djemtë e tij. Një “adelfata” ishte e drejta për të banuar në një tokë të një manastiri në Malin Athos, e cila shoqërohej me të drejtën për të shfrytëzuar të mbjellat përreth. Reposhi jetoi për disa vite në “Kullën e Shqiptarit”. Këtu, sigurisht, lind një çështje me datat.

Në vitin 1423, Gjon Kastrioti u detyrua të dërgonte 4 djemtë e tyre në Adrianopojë. Kur jetoi Reposhi në Malin Athos? Ai vdiq në vitin 1430. A iku ai nga kryeqyteti i atëhershëm osman dhe shkoi në Malin Athos? Në vitin 1468, meqenëse nuk kishte të drejtë trashëgimie për Kullën kur të gjithë përfituesit e vëllezërve vdiqën, “Kulla e Shqiptarëve” ose Kulla e Shën Gjergjit, iu kthye Manastirit të Hilandarit.

Më vonë, një bashkësi murgjish u vendos atje për disa vite, duke marrë, të paktën deri në vitin 1528, subvencione bujare nga sundimtarët e Vllahisë. Një gravurë në bakër nga viti 1757 përshkruan manastirin e Hilandarit me “Kullën e Shqiptarit”, ku duket se kanë jetuar murgjit. Nuk dihet se kur u braktis kulla. Skiti i Trinisë së Shenjtë u braktis në fillim të shekullit të 20-të. Pastaj, ose shumë më herët, ndoshta u braktis edhe “Kulla e Shqiptarit”… Ky emër u përdor për herë të parë në vitin 1512. Deri atëherë, quhej Kulla e Shën Gjergjit.
Epilog

Siç e përmendëm, Gjergj Kastrioti u varros në kishën e Shën Nikollës në Lezhë. Në vitin 1474, Mehmeti II pushtoi qytetin. Ai urdhëroi që varri i Skënderbeut të hapej, por skeleti i tij të mos dëmtohej ose përdhosej. Megjithatë, turqit, duke u atribuar kockave të tij veti magjike ose të mrekullueshme, i thyen ato në copa dhe i morën, si fatsjellëse. Megjithatë, përkrenarja e tij u shpëtua, e cila mbahet në një muze në Vjenë. Ky fakt ngre një pyetje: a fsheh arkosoliumi i Manastirit të Hilandarit ndonjë sekret, të cilin e kanë identifikuar edhe disa historianë shqiptarë?

Pas intervistës së bujshme të ish-bashkëshortit të saj, Bes Kallaku, këngëtarja Xhensila Myrtezaj duket se ka dhënë një përgjigje publike përmes “kodit” të muzikës.

Deklaratat e fundit të aktorit, i cili u shpreh se “e shkuara ka vdekur” dhe “i dhash dorën dhe bukën”, u interpretuan gjerësisht në rrjet si mesazhe të koduara drejtuar këngëtares.

Në kundërpërgjigje, Xhensila ka zgjedhur të rishpërndajë në “Instagram” një video specifike nga koncertet e saj, ku mes qindra postimeve të mundshme, ka veçuar momentin kur këndon vargjet: “Xhelozon, mashtrues ti je”.

Ky postim ka rihapur menjëherë diskutimet mes fansave, të cilët e shohin zgjedhjen e këtyre vargjeve si një replikë të drejtpërdrejtë ndaj akuzave të tërthorta për të shkuarën e tyre të përbashkët.

ë podcastin e Grida Dumës, aktori Bes Kallaku ka dhënë intervistën e tij të parë pas një periudhe të gjatë mungese, duke folur hapur për zhgënjimet personale, mosmirënjohjen dhe raportin e tij me besimin.

Duke u ndalur te marrëdhëniet me njerëzit e afërt, aktori theksoi se zhgënjimet më të forta vijnë pikërisht nga ata me të cilët ke ndarë jetën dhe bukën.

“Zhgënjimet më të mëdha janë nga ata që i ke pasur afër, nga ata me të cilët ke ngrënë bukë”, tha Kallaku, duke shtuar se thyerja e bukës për shqiptarët është një ligj i pashkruar.

Në bisedë me Grida Dumën, ai foli edhe për mosmirënjohjen, duke e lidhur atë me ndihmën e dhënë pa kushte.

“Ka diferencë mes me t’dhonë një dorë dhe me t’dhonë bukën. Unë mendoj se shumë njerëzve u kam dhënë jo vetëm dorën, por edhe bukën e përditshme”, u shpreh ai.

Një pjesë e rëndësishme e intervistës ishte dimensioni shpirtëror i jetës së tij. Sipas Kallakut, pastërtia e shpirtit shpesh sjell përplasje me të tjerët.

“Kur shpirti yt është i pastër, pastërtia e tij irriton demonët e të tjerëve përreth”, tha ai.

Duke folur për mungesën e shpresës, sidomos te të rinjtë, Kallaku e cilësoi atë si një problem serioz të kohës. Ai u ndal edhe te përplasja mes së mirës dhe së keqes, duke theksuar besimin e tij se e mira, pavarësisht vështirësive, triumfon.

“Sado të zgjasë nata, do lindë dielli. Kur Zoti është me mua, kush mund të jetë kundër meje?”, tha ai.

Në fund, Bes Kallaku theksoi se rreziku më i madh nuk vjen nga armiku i hapur.

“Armikun e njeh dhe i ruhesh. Frika më e madhe është miku-armik”, u shpreh ai.

Teksa Gjykata Kushtetuese këtë të premte mori vendimin për rikthimin e zv/kryeministres Belinda Balluku në detyreë, një nga votat kyçe që siguroi shumicën ishte ajo e gjyqtares Sonila Bejtja. Ky moment ka hapur spekulime të forta në korridoret e politikës, ku burimet flasin se kryeministri Edi Rama mund t’i ofrojë Bejtjës postin e Komisioneres për Mbrojtjen nga Diskriminimi pas përfundimit të mandatit në Kushtetuese.

Bejtja, e perceptuar si një nga figurat më të pavarura në gjyq, duket se ka bërë një lëvizje vendimtare, duke siguruar rikthimin e Ballukut dhe, sipas burimeve të brendshme, duke krijuar mundësinë për një shpërblim strategjik. Nga 15 kandidatë për Komisioneren, vetëm 14 u paraqitën për intervistë, dhe askush nuk arriti të mbledhë 28 firmat e nevojshme për seancën plenare.

Dorëheqja e disa kandidatëve dhe mbështetja e Bejtjes ka transformuar procesin formal në një lojë pushteti me ndikime të dukshme politike. Ekspertët paralajmërojnë se çdo shpërblim i mundshëm nga Rama do të dëmtonte perceptimin e pavarësisë së institucioneve, duke krijuar precedent të rrezikshëm për të ardhmen.

Ndërkohë flitet se vota pro Ballukut nga Bejtja nuk ishte thjesht një vendim ligjor, por mund të shihet si një veprim strategjik që hap rrugë shpërblimeve të mundshme.

Analistët politikë e përshkruajnë situatën si një “shkëmbim të sofistikuar pushteti”: vendimi për Ballukun në këmbim të një posti të lartë institucional më vonë. Kjo situatë ka tronditur opinionin publik dhe opozitën, duke rritur dyshimet për ndikim politik mbi procesin gjyqësor.

Nëse oferta e Ramës do të realizohet, Bejtja do të fitojë postin e Komisioneres, pasi pritet të hyjë në garë. Megjithatë në një kohë kur integriteti i institucioneve është në fokus të publikut, ky zhvillim ngre pyetje dramatike: A ishte vota e Bejtjes e lirë dhe e bazuar në ligj, apo pjesë e një marrëveshjeje strategjike me kryeministrin?

Detajet
Në Kuvend ka dështuar procesi për të zgjedhur një Komisioner kundër Diskriminimit. 15 vetë dorëzuan dokumentet si kandidatë, por vetëm 14 u paraqitën për intervistë pranë Komisionit për të Drejtat e Njeriut. Kandidatja e perceptuar si më e forta në garë, gjyqtarja Kushtetuese Sonila Bejtja, u dorëhoq nga kandidimi.

Siç shpjegoi në atë kohë, kreu i grupit parlamentar demokrat Gazment Bardhi, “Znj. Bejtja nuk kishte llogaritur mirë kohën kur i mbaron mandati në gjykatë me procedurat kur duhej të zgjidhej Komisionere dhe kishte papajtueshmëri mes këtyre dy momenteve”.

Kandidatëve ju dha kohë për të sjellë nga 28 firma për të kaluar për votim në seancën plenare, por askush nuk mundi të marrë mbështetjet e duhura brenda afatit.

Në këtë “braktisje” të kandidatëve nga deputetë të të gjitha krahëve, procesi ka dështuar, dhe mësohet se fillimisht kandidatëve do tu jepet një kohë shtesë nëse mund të mbledhin firmat, dhe nëse kjo dështon, gara do të hapet edhe një herë nga e para.

Kandidatët që garuan

Arben Shkëmbi
Brunilda Menalla
Edison Hoxha
Endri Papajorgji
Ermal Hoxha
Ermonela Xhafa
Fatjona Male
Genta Tafa
9. Gëzim Allaraj
10. Ismail Tafani
Lulzim Hamitaj
Mirela Rrumbullaku
Robert Gajda
Sonila Bejtja (tërhequr)
Sonila Hysi

Ish-deputeti Dashnor Sula, i ftuar në një studio televizive, ka deklaruar se situata politike në Tiranë është mjaft e ndërlikuar, duke theksuar përçarjet e brendshme në Partinë Socialiste dhe tensionet mes forcave kryesore politike.

Sipas Sulës, përveç kryeministrit Edi Rama që kërkon fitoren në kryeqytet, ekzistojnë figura brenda PS që nuk e mbështesin kandidaturën e Ogerta Manastirliut. Ai foli për një “komplot ndaj Ramës” dhe për konflikte të brendshme që ende nuk janë bërë publike.

Sula komentoi edhe qëndrimet e Partisë Demokratike dhe propozimin e Sali Berishës, duke e interpretuar si një lëvizje që, sipas tij, nuk i shërben më opozitës, por interesave personale të Berishës. Ish-deputeti theksoi se zhvillimet e fundit mes PS dhe PD pritet të zbulojnë shumë për dinamikat reale politike në ditët në vijim.

Situata në Tiranë është shumë më e komplikuar. Përveç Ramës që kërkon fitoren në Tiranë, ka të tjerë brenda PS që nuk duan triumfin e Manastirliut. Brenda PS ka probleme shumë të forta, pavarësisht nuk janë shfaqur. Ka një komplot ndaj Ramës. Rama kërkon kontrollon gjithçka, por që të ketë kontroll mbi drejtësinë dhe SPAK siç pretendon PD nuk ka sens.

Sepse i bie që Rama ka futur të gjithë të tijtë në burg dhe ka liruar Berishën. Berisha me këtë propozim që ka bërë sot do të thotë që nuk ka më opozitë, nuk i intereson më PD, vetëm interesat e veta. Ia bën këtë ofertë Ramës , i ofrohet Ramës ‘unë do të jem shpëtimtari jot’. Lëvizjet mes PS-PD mes këtyre ditëve, kemi për të kuptuar shumë”, tha Dashnor Sula.

Gazetari Basir Çollaku, i ftuar në një emision televiziv, deklaroi se sjellja e fundit e kryeministrit Edi Rama tregon nervozizëm të theksuar dhe humbje të kontrollit përballë zhvillimeve të reja hetimore.

Sipas Çollakut, veprimet e intensifikuara të SPAK, mbështetja e drejtpërdrejtë e Shteteve të Bashkuara dhe ardhjet e zyrtarëve të lartë amerikanë në Tiranë janë sinjale të qarta se qeveria është nën presion të fortë ndërkombëtar. Ai theksoi se dosjet e lidhura me korrupsionin dhe krimin e organizuar po avancojnë dhe se figura të rëndësishme të pushtetit, përfshirë edhe ministra, rrezikojnë masa të rënda penale në javët në vijim.

Basir Çollaku: Ka diçka që shoh unë në këto, nervozizëm të theksuar dhe me një çekuilibër të kryeministrit të vendit. E humbi kontrollin totalisht. Departamenti i Shtetit i ka dhënë përgjigjen, le të themi siç e shoh unë edhe interesimit të Fox News, por e ka dhënë në Tiranë. Ardhja e Fleming dhe menjëherë merret e pandehur zonja Balluku. Ardhja e zëvendësdrejtorit pastaj dhe zgjedhja e kreut të ri të SPAK, veprime të cilat do intensifikohen edhe brenda dy javëve të mbetur të këtij viti ndaj veprimeve hetimore por edhe me raste konkrete, jo vetëm për Ballukun, janë një tregues që Shtetet e Bashkuara, Departamenti i Shtetit, DEA, kanë një adresë në Tiranë, është Edi Rama, është të cilin ata e shohin si ortaku zyrtar i Sinaloas. Rama dhe Sinaloa në Shqipëri janë të pashkëputur. Vizita e kreut të kësaj familje të sanksionuar në Shqipëri, pastrimi marramendës i parasë në katër shtete europiane që kishte familja Hysa, pra me paratë e kartelit meksikan, ëhë, janë një, them, dosje më vete të cilët amerikanët e ndjekin me vëmendje të shtuar. Miliardat që çekohen nga zonja Balluku janë me fasoneri e Edi Ramës. Ortakët që u futën aty, njerëz e grupeve kriminale që pastrojnë kokainën, pra miliardat e kokainës, në këtë pellg, në këtë shtek, janë dosja e përbashkët Rama-Balluku dhe Rama duhet të ketë të qartë diçka, që kur shkojnë agjentët e BKH-së, ata shkojnë dhe për të arrestuar njerëz. Shkojnë dhe për të arrestuar, ajo historia e pathëllakës, mua më kujton dëshpërimin e Ramës kur e tha publikisht që, ore mos kujtoni se do merrni edhe celularin tim. Mos guxoni të merrni se do i marrin edhe celularin. Do i marrin edhe brekët, le të themi zyrtare, në kuptimin metaforik të dosjes.

Siç e tha dhe Dumani, vetëm në dosjen e tanishme ne kemi pasur 70 oficerë policie, prokurorë, gjyqtarë, pra trupa e paçekuar në këtë mënyrë siç është SPAK-u, pra filtri i besueshmërisë, i jep të drejtë atyre që, duke qenë se rritet dendësia e veprimeve dhe e njerëzve të rëndësishëm në pushtet që do shkojnë atje, në SPAK, ai lajmëroi prokurorin e zgjedhur që do jenë ata 20 prokurorë dhe 60 oficerë policie, BKH-së, 60 agjentë, që do të ketë dijeni se kujt do t’i trokasin me dhe pa pathëllake.

Zgjodhi, zgjodhi të reagojë Rama sepse Rama ka dijeni edhe për veprimet e tjera që kryhen. Ajo çfarë shoh unë te struktura e posaçme… Rama po e humbet kontrollin e dikurshëm. Po fillon t’i dalin, ata janë njerëz të zgjuar ata atje që dikur e kanë dëgjuar fjalën e Ramës.

Është kthyer një e pandehur, është kthyer një e pandehur në mbledhje qeverie dhe unë besoj që akoma s’kam informacion unë të paktën, nuk e di për kolegët e tjerë, por struktura e posaçme duhet ta ketë gati kërkesën për në kuvend për heqje e imunitetit dhe masë arresti për Belinda Ballukun. Të lësh një të pandehur të 100 milionë dollarëve të rikthehet në zyrë, t’i kapë me radhë, a e sheh ai, të, dëshmitarë, prova, shkresa, t’i bëjë lëmsh. Sigurisht që nuk e ka ndonjë luks të madh se atje një pjesë e madhe e materialeve kanë rënë në duart e duhura të hetimit dhe investigimit, po kjo pjesë lirie e përkohshme dhe në zyrë mund të shërbejë edhe nga gjurmimet dhe përgjimet që janë, jo vetëm Belinda por gjithë ekipi, zonja Balluku, pra gjithë enturazhi i saj dhe i Ramës.

Moderatorja dhe drejtuesja e Top Story në Top Channel, Grida Duma ka komentuar përmes një mesazhi video edhe sjelljen e drejtuesve të opozitës lidhur me qëndrimin e mbajtur pas zgjedhjes së Avokatit të Popullit, por edhe debatit të disa javëve më parë mes sekretarit të përgjithshëm, Flamur Noka dhe një anëtare në PD-në e Kamzës.

Duma thotë se lidershipi demokrat fal deputetët që firmosën për kandidatin Endri Shabani, por përjashton anëtarët kur një debat ku përfshihet sekretari i Përgjithshëm i PD-së, del në media.

“Del Sali Berisha dhe thotë që ia dhamë firmat Endri Shabanit se na mbështeti për Florian Binaj, pasi del një deklaratë tjetër, Sajmir Korreshi thotë “na tha Flamur Noka firmosni të gjithë se kur të vijë votimi do ta zgjidhim”.

Pastaj del Flamur Noka i thotë Gon Dukës te studio ime në Top Story që “thuaj një çik asaj se nuk e di si ma merr, se s’jemi mirë këto kohë se këto 28 firmat nuk janë tonat, se pa dashje na i mori Salianji”. Pastaj del Sali Berisha dhe thotë “bëjmë edhe ne gabime”.

Po si ndodh që këto gabime që bën kreu janë të falshme dhe gabimet që bën anëtarësia nuk falen ndonjëherë. Si ndodh kjo që shkon Mul Noka atje me ca të tjerë, i thotë ajo zonja “pse nuk respekton statutin ti” dhe ai i bërtet asaj, pastaj del video dhe çuditet i madh dhe i vogël se si mund të kapet Sekretari i përgjithshëm dhe anëtari i kryesisë me anëtarësinë dhe ti pret që “këta t’i thërrasin trurit. Si mund të merresh me atë zonjën, ajo ka 13 vjet në opozitë. Shkojnë bëjnë si servilë kur duan votën dhe pastaj një burrë në atë moshë i thotë asaj “dil jashtë”.

Partia ka aksionerë, me sa duket po kuptohet kush janë aksionerët. Del Sali Berisha dhe për të mbrojtur Flamur Nokën dhe thotë “nuk ishte mirë ajo që doli në mbledhje, gabim ajo gruaja që doli në media”. Po ku do shkojnë këta? Atë nga grupi i Whatsapp e nxorën, ty nuk të takon dot, ka ngelur që me mikrofon përpara të thotë fjalën e saj. Si sillet PD me gabimet? Berisha bëri foltoret e veta dhe demokratët i thanë “ti vetë e zgjodhe Lul Bashën”. Berisha tha “gabim bëra”. Ia falën demokratët. Këta e falën që kishte zgjedhur Lulin gabim, po Berisha pse nuk i fal këta që ishin me Lulin dhe vazhdon e përçan partinë. Si sillet kjo parti, lidershipi i saj, që me gabimet që bëjnë ata sipër janë ndryshe, gabimet që bëjnë ata poshtë janë ndëshkime?.

Unë nuk lashë mandatin dhe ika nga PD-ja se isha keq. Unë ika nga PD-ja në fillim të nëntorit 2022 kur në mes të tetorit 2022, që Berisha kishte deklaruar për mua “është Nora e Kelmendit”. Pse e bëri këtë Berisha? Sepse unë dola në Parlament, ndërsa isha aty duke dëgjuar Edi Ramën që për foltoret e Berishës kundër Bashës na drejtohej neve dhe na thoshte “jo foltore, por gojore? Dal dhe them ato pesë minuta që u bënë virale. Ku ishin këta burrat që duhet të flisnin? Pse duhet që lidershipi i partisë të falet pa fund dhe çohen një ditë të premte që janë në hall dhe më përmendin mua vetëm se janë vetë në paqartësi absolute dhe u bëjnë gola gjithandej”, tha Duma.