Author: admin

Fjoralba Dule, mësuesja nga Korça nuk arriti që të fitonte betejën me kancerin! Pavarësisht forcës që mësuese Fjorin e karakterizonte, dashurisë për jetën, sëmundja e keqe doli e pamëshirshme dhe e shkëputi atë përgjithmonë nga gjiri i ngrohtë i familjes, duke ja hequr kështu mundësinë për të parë duke u rritur dy engjëjt e saj të cilët i donte fort.

Përpos familjarëve, humbja e saj ka lënë në zi të gjithë komunitetin e juglindjes, të cilët patën fatin të njohin një njeri si ajo ishte, plot vlera, gojë ëmbël dhe që gjithmonë dhe kurdoherë ishte aty, për nxënësit e saj.

Në dhimbje të madhe janë dhe kolegët e Fjorit të cilët këtë dhimbje që po ua mban shpirti e kanë shprehur mes rreshtave nëpër rrjetet sociale.

Një prej tyre ka qenë edhe Danjela, kolegia e saj, por dhe mësuesja e birit të Fjoralbës, Gentonit, të cilin e “dogji malli” përgjatë gjithë kësaj kohe kur e ëma ishte duke u kuruar në Stamboll.

“E mira Fjori….Luftove shumë me sëmundjen e rëndë sepse ti ishte plot jetë dhe dashuri. Të jepte forcë të luftoje dashuria dhe meraku për fëmijët e tu të mrekullueshëm. Gentoni dhe ti, kishit shumë mall për njëri-tjetrin dhe herë pas here të dërgonim foto që të çmalleshe sado pak.

Vetëm para pak ditësh në një detyre klase, Gentoni i formoi të gjitha fjalitë rreth teje dhe Pegit. – Të ka marrë malli?- e pyeta. -Po, më tha dhe uli kokën. Qofsh e Parajsës e dashur Fjori! Do të na mungosh të gjithëve”, shkruan ajo.

Fjori, do të kujtohet gjithmonë nga miqtë, të afërmit, familjarët e nxënësit e saj, si një njeri plot dritë e dashuri dhe e përkushtuar në profesionin e saj. Sëmundja e tmerrshme e mposhti, por kujtimi i saj do të jetojë përgjithmonë në zemrat e atyre që e deshën dhe e respektuan.

Presioni diplomatik, negociatat për mandatin e SPAK dhe lëvizjet që po trazojnë mazhorancën socialiste.

Sali Berisha është i vetmi që ka komentuar persiatjen e gjatë të Edi Ramës, duke sjellë modelin e prokurorit amerikan Robert H. Jackson.

Sipas kreut të opozitës, Rama ka tentuar të shantazhojë prokurorët, pasi në qasje kishte një frazë ku e quan një prokuror, vrasës.

Edhe pse i ashpër, qëndrimi i Sali Berishës, fshihte një lloj kënaqësie të dukshme për hyrjen në linjën e hapur të sulmit ndaj SPAK, edhe të kolegut të tij “të dashur-armik”.

Është në stilin e tij që kënaqësinë ta tregojë me një mazokizëm politik që tashmë është kthyer në një model në gjithë politikën shqiptare, veçanërisht në atë që e konsiderojmë “të djathtë”.

Sali Berishës i leverdiste ta kthente këtë çështje në drejtimin që kërkon ai, por e vërteta duket se fle diku tjetër.

Edi Rama, ‘pamfletin’ e tij në lidhje me veprimet e SPAK, nuk e kishte fare me prokurorët që po i mësyjnë qeverinë. Pasi ai e di se çdo aksion ndaj tij nuk është aspak një predhë e dukshme nga topi i Altin Dumanit prej “stacionit të trenit” siç e pëlqen Rama ta quajë. Por një silurë nëndetëseje që urdhrin e goditjes e ka nga larg, po, po nga larg fare. Ekzaktësisht përtej oqeanit, nga një zyrë në Departamentin e Shtetit.

Nga ku, një zyrtar i lartë i tij u dërgua me urgjencë në Shqipëri më 31 tetor dhe nuk e takoi fare Edi Ramën. Por vetëm ministrin e Drejtësisë dhe atë të Brendshëm.

Dhe siç mësohet, Lamallarit i është kërkuar që të mos kryejë asnjë akt që do të pengojë pavarësinë e drejtësisë, e Koçiut, që policia të mos pengojë punën e SPAK, e aq më shumë të bëjë ndonjë shkelje kompetencash, për të cilat do të pendohet rëndë kjo qeveri e kjo mazhorancë.

I përgatitur për lëvizjet e forta nga SHBA, Edi Rama e ka pritur goditjen e radhës, e thjeshtë është në fazat për të negociuar, duke i çuar atyre një mesazh të koduar se si e shikon ai këtë negociatë.

Po për çfarë po negociohet?

Pikërisht për atë që Altin Dumani deklaroi në Parlament; mandatin e dytë 9 vjeçar të prokurorëve të SPAK. Dumani vetë ka ofruar një kompromis, duke mos pranuar më një mandat të dytë, por të qëndrojë sërish prokuror deri në fund të mandatit.

Për ta qartësuar më shumë për opinionin, goditjet e fundit në mazhorancë, nuk duket se janë raste penale të nisura nga investigimet e prokurorëve speciale.  Por akte të qarta e të forta që vijnë nga amerikanët dhe europianët, pikërisht kur mazhoranca e Edi Ramës, refuzoi që të zgjasë mandatin e prokurorëve të SPAK dhe kreut të tij. Një qëndrim që është bërë i qartë në vizitën e Sekretarit Amerikan të Shtetit, Antony Blinken në vitin 2024.

Nuk ndodh zakonisht që një shtet aleat të refuzojë një kërkesë që vjen nga maja e piramidës së administratës amerikane. Por atëherë kur kjo vihet re, kemi të bëjmë me një thyerje, e cila provokon trazira.

Këtë e ka ditur Edi Rama kur u ka thënë amerikanëve JO, ndaj dhe përgjegjësi i kësaj situate kaotike që po ndodh në Shqipëri është vetëm ai. Çdo sulm që i vjen nga SPAK, është mbi të gjitha një pjesë e luftës që kryeministri ka provokuar me amerikanët.

Madje jo vetëm këtu, por edhe pakti që bëri me Sali Berishën para zgjedhjeve për të ndalur zgjatjen e mandatit të SPAK. Ku si pjesë të pazarit i ktheu vulën dhe i jep leje ndërtimi.

Këtë e dinë të gjithë që janë përfshirë në politikën e lartë në vend, përkatësisht deputetë e drejtues, në mazhorancë e në opozitë. Por askush nuk e trajton kështu, duke i bërë një favor të madh Edi Ramës.

Nuk është çudi që këtë “bombë” ta shpërthejë në publik një zë brenda mazhorancës shumë shpejt, natyrisht i nxitur nga amerikanët, të cilët nuk do të rrijnë të heshtur në këtë përplasje politike me Edi Ramën.

Madje ky zë mund të jetë edhe viktimë e egër e kësaj lufte, i cili jo rastësisht këto ditë është përmendur në gazeta të mëdha amerikane si Washington Post apo The New York Times. Nisja e kësaj lufte do ta rrëzojë realisht Edi Ramën, i cili po e shikon se edhe brenda PS-së pozita e tij është blozë, ngaqë kalbësira është kthyer në gangrenë./Pamfleti

Grida Duma dhe Gjergj Luca u ulën ballë për ballë në podkastin e saj në një bisedë pasionante që siç e pranuan të dy, as Grida nuk e kishte përgatitur intervistën, dhe as Luca nuk e dinte se çfarë pyetjesh do të bëheshin, por që të dy ranë dakord se do të flisnin për gjithçka.

Luca padyshim e ngacmoi Grida Dumën mbi largimin e saj nga politika, pse nuk rezistoi aty për të pastruar partinë, e Grida Duma e ngacmoi Lucën pikërisht tek Edi Rama dhe mbrojtja që i bën atij, duke e përmendur shpeshherë në podkast si “byrazeri”.

Po një nga pikat e papritura për drejtuesen e podkastit ishte momenti kur Luca tha se mbështeste të rinjtë e PD, me idenë se ajo parti që sipas Lucës ka qenë e tija, ka nevojë për ripërtëritje. Dhe Luca e ngacmon me Salianjin, në këtë moment, ku edhe pse të dy nuk kanë dalë publikisht, e kanë pranuar bashkëjetesën mes tyre.

Pjesë nga biseda në podkast:

Gjergj Luca: Kam bërë fushatë për Edi Ramën, në gjithë Shqipërinë. Por kudo që ka rënë biseda, në Elbasan, për udhëheqësin politik të Elbasanit, u kam thënë: Dëgjoni këtu, ky është familje e madhe, i djathtë në gen, ju ka ardh një çun i mirë. Eshtë një çun pa mllefe. Eshtë cun qytetar. Kudo e kam thënë edhe përpara mediave.

Grida Duma: Më tremb shumë kjo mua…

Gjergj Luca: Po pse për Salianjin tat ça kam thënë?

Grida Duma: (Qesh)

Gjergj Luca: Pse qesh?

Grida Duma: Ore nuk më kompromenton dot duke më folur për Salianjin tim…

Gjergj Luca: Pse të kompromentoj, nuk jam tip që kompromentoj njeri…

Grida Duma: Se do dal dhe aty…

Gjergj Luca: Ore për Salianjin tat. Po të bëj muhabet. Unë, ti nuk e di. Unë e du fort. Kam respekt. Pyete. Jam parë gjithmonë mirë me të. E kam ngacmu se unë nuk rri dot, e kam vu aty në Maliq te zona e vet, e kam vu te tabela e emulacionit…

Grida Duma: E ke vënë edhe atë?

Gjergj Luca: E kam vu aty…

Grida Duma: Po unë nuk jam aty fare?

Gjergj Luca: Jooo, po ti je te zemra ime se je grintë!

(Qeshin)

Grida Duma: E di ça më tremb mua?

Gjergj Luca: Cfarë të tremb?

Grida Duma: Që jeni kaq të poshtër….

Gjergj Luca: Falemnderit, është kompliment i madh shumë…me të qujt të poshtër sot është kompliment i madh.

Grida Duma: Ti thua që unë bëj fushatë për byrazerin tim…

Gjergj Luca: Patjetër…po ai është lideri im!

Grida Duma: ….por ama thua: unë i mbështes këta të rinjtë këtej se kur hyj te tavolina ime që bëj fushatë për byrazerin tim, them se ky është familje e madhe! Ekzaktësisht këtë bëjnë komunistët Luc…

Gjergj Luca: Po edhe këtë ma the o Grida! Pupupu. Nuk do ta bëj më!

Grida Duma: E kupton, të vrasin natën e të qajnë ditën! Këtej të japin kontributin, këtej të japin shpirtin, se leku sot quhet shpirt…

Gjergj Luca: Mua më njifke pak. Leku për mua ska asnjë vlerë. Dorëzohem përpara teje dhe unë si komunist që jam, kam bërë gjithë Tiranën blu kur s’kishte një njeri të PD. Te Rozafa Palace përnotë, pyeti ish deputetët e asaj kohe, kam bërë mbrëmje me 2-3 mijë vetë. Dhe këta komunistët e tu, ditën që erdhën në pushtet, pas tre muajve më grabitën biznesin. // Të drejtat e pamjeve © Top Channel

Shefi i diplomacisë greke, Giorgos Gerapetritis ka hartuar një plan të ri veprimi për marrëdhëniet me Tiranën zyrtare, plan që do t’ia paraqesë më 16 dhjetor homologes së re shqiptare Elisa Spiropali në të parën vizitë në Athinë.

Në krye të axhendës së takimit të dy Ministrave të Jashtëm në Athinë muajin e ardhshëm do të jetë diskutimi për ndarjen e detit.

Procesi i anëtarësimit të Shqipërisë në BE, marrëdhëniet mes të dyja shteteve fqinjë janë gjithashtu në axhendën e Gerapetritis për takimin e dhjetorit në tokën helene.

Udhërrëfyesi i ri Athinë–Tiranë u hartua sipas mediave greke pas rizgjedhjes së Edi Ramës për një mandat të katërt qeverisës, me premtimin popullor për anëtarësim të vendit të shqiponjave në BE deri në vitin 2030.

Çështja pezull e zonave ekonomike detare në detin Jon greko-shqiptare thuhet se në Athinë po fiton tani një vrull të ri në dritën e lëvizshmërisë më të gjerë në rajon dhe të projekteve të ndryshme të energjisë.

Greqia dhe Shqipëria kishin rënë dakord që në vitin 2020 ta paraqisnin mosmarrëveshjen për delimitimin e ZEE-së në Gjykatën Ndërkombëtare të Drejtësisë në Hagë, por kjo çështje dypalëshe ka mbetur ende pezull.

Shqipëria do të ketë nevojë që të mbështetet te fqinji jugor edhe për faktin se plani i saj për përfundimin e bisedimeve të pranimit në BE deri në vitin 2027, përkon me kohën kur Greqia do të mbajë presidencën e Këshillit Evropian.

Ballkani në fokus të Greqisë

Burime diplomatike kanë folur së fundmi për një “ritëm të jashtëzakonshëm” për sa i përket shpejtësisë me të cilën Shqipëria po përparon në negociatat e saj të pranimit, në një kohë kur vetëm pak ditë më parë BE hapi kapitullin e fundit të pranimit, me Ministrinë e Jashtme të Shqipërisë që arriti qëllimin e “hapjes së plotë deri në vitin 2025”.

Gjatë darkës informale në Bruksel, në të cilën mori pjesë George Gerapetritis në kuadër të Këshillit të Punëve të Jashtme, Ballkani Perëndimor ishte në qendër të diskutimit.

Ministri i Jashtëm grek u paraqiti dje homologëve të tij qëllimin e Athinës për të ndërmarrë, në kuadër të presidencës greke, një iniciativë që do të ketë të bëjë me rrugën evropiane të Ballkanit Perëndimor në lidhje me vizionin që duhet t’u jepet popujve në sfondin e këtij procesi.

Ministria e Jashtme greke, nëpërmjet kreut të diplomacisë greke, e ka bërë të qartë se e konsideron të nevojshme të paraqesë në lidhje me çështjet që secila presidencë vendos në axhendë me Ballkanin Perëndimor në sfondin e situatës jashtëzakonisht komplekse që mbizotëron në rajon për shkak të tensioneve dhe nacionalizmave në rritje.

Gjergj Luca ka thënë se nuk ka marrë nga qeveria e Edi Ramës asnjë lek për investimin e tij. Nëse kjo e bën oligark, atëherë le ta quajnë, por qeverisë i ka paguar sikurse tha “lek më lek”, 1.4 miliardët që i kërkuan për Fish City, edhe pse ai mori ca rrënoja të shkatërruara që nuk e kishin atë vlerë, por që i vlerësuan të tilla pasi e ndërtoi.

Në rrëfimin për Grida Dumën në Podkast ai tregon sesi nga smira Arben Ahmetaj ndërmori “gjobën moderne” ndaj Lucës, duke thënë se ky ishte zhgënjimi më i madh pasi “Fish City” u bë një markë e njohur brenda dhe jashtë vendit.

Pjesë nga biseda në Podkastin e Grida Dumës me Gjergj Lucën:

Gjergj Luca: Kur ka ardh Ed Rama në pushtet, unë e kam takuar afro një vit pas zgjedhjes, kur ai ka pasur 50 vjetorin. Ishin nja tre shokë, isha ul me Netën, me gruan time, pimë nganjë gotë në një lokal, një ambient shumë i vogël edhe e kam takuar Edin pas një viti: dhe më tha si s’erdhe njëherë me më taku! I thashë: ore jam duke punuar, shyqyr që mu hapën rrugët për të punuar, se punoj nga 20 orë në ditë. Ze be në Zot e në kokë të djalit! Po ca do bësh më tha? I thashë atë punë që di me bë. Po ca: se ti ke bërë kazino, tallava, peshk, ca do bësh. I thashë: do merrem me peshk! Po si me peshk më tha. Nuk do kthehesh prapë te historia e kazinove? I thashë: O Ed, ishalla do Zoti ti rri 4 vjet, rri 8 vjet kryeministër! Po ti me mendjen që ke mund të rrish edhe 4 muaj. Dhe unë e di shumë mirë që po të kthehem prapë te kazinotë kur të vijnë këta të tjerët, se e hëngra njëherë më çuan në fund. Dhe nuk ishte puna se më mbyllën kazinotë dhe jetën e natës. Problemi është se pas tre muajve këta njerëz u morën me biznesin e shpirtit tim dhe më mbyllën peshkun. Dhe me peshkun aty mbarova. I thashë më ler të merrem me këtë punë që nuk krijoj xhelozi. Të tjerët kanë ecur shumë përpara meje, kanë kaluar tetë vjet. Dhe unë do merrem me këtë punë që di me bë.

Dhe aty në Elbasan më ka çuar një katunar që kishte një fabrikë peshku në Pogradec. Dhe më ka thënë: ore janë këto që i jepte Saliu me 1 euro. Dhe kam shkuar kam marr një kapanon gjoja me një euro, 1000 metra katrorë. E kam bërë atë mes makinave që ishin të mbarume të shkatërrume. Dhe aty e kam marrë në telefon Ed Ramën dhe i thashë: Unë e bëra kapanonin e parë dhe e futa në punë dhe dua të ftoj gjithë klientët e mi nga Italia, nga Spanja, Suedia, që të vijnë të shohin që unë rifillova punë se më kanë dash e më kanë respektu. Dhe më thotë: patjetër, e kam dhe detyrë që të vij.

Dhe nuk e harroj është futur te kjo rezerva që ka qenë në mes të makinave të sekuestruara nga prokuroria, e pashtruar me pluhur. Unë kisha thërritur nja 11 biznesmenë dhe ata vetë kishin një turnover të gjithë bashkë 5 – 6 miliardë. Dhe jemi futur në bodrum, dhe i thashë: kujdes kokën mos i bish betonit, dhe kisha pikturuar në bodrum ato përrallat e mia të fëmijërisë. Ishte ulur me nja dy deputet, dhe ai ka qenë suporti më i madh që më ka dhënë miku im i fëmijërisë, kryeministri shqiptar, dhe u ul me ata njerëz të fuqishëm bilioner. Dhe ata filluan më dhanë punë, hapësira. Unë i kam pasur miq që erdhën, por kur panë edhe këtë, më dhanë suport. Historitë e tjera janë të ditura: unë nuk kam përfituar një lekë nga kjo qeveri; nuk jam investitor strategjik, kam ikur në katundet më të humbura si në Maliq e Gramsh…

Grida Duma: Oligark je?

Gjergj Luca: Po ca oligarku mi Grida me peshk. Unë tallem me këtë punë. Nëse flitet për një oligark që ka Shqipëria për ti ngrejt reputacionin në të gjithë Evropën e Mesdheun, si një firmë prodhuese që ndeshet dhëmbë për dhëmbë me flotën spanjolle, italiane, turke, franceze dhe krenaria e këtij vendi dhe flamurit shqiptar është ROZAFA. Dhe nëse një njeri që i jep krenari Shqipërisë quhet oligark, atëherë unë jam kryeoligarku i Shqipërisë. Sepse fjala oligark përdoret për njerëzit që i kanë bërë lekët kollaj dhe për njerëzit që kanë marrë benefite prej shtetit.

Grida Duma: Konkurrencë me ty bën dot dikush në fushën e peshkimit?

Gjergj Luca: Atje ku e kemi ne konkurencen quhet det. Dhe në det dalin 300 – 400 anije që ndeshen me njëra tjetrën. Anijet fillojnë nga 25 metra në 50 metra. Ne dalim në det që të gjithë. Dikush për pasion ka investuar në elektronikë. Dikush nuk e ka pasur mundësinë. Unë nuk them se ata që merren me peshkim kanë mundësitë e mia. Se unë jam marrë edhe me biznese të tjera. Pse më thonë mua peshkimin, kur unë jam burri më i suksesshëm në restorant: në restoracionet Made in Albania. Dhe unë turnover që kam nga restorantet e kam të lartë, por nuk mund të jetë më i lartë se peshkimi. Se peshkimi është një det i hapur që ne ndeshemi që të gjithë me një markatë të hapur që është e gjithë bota që ne kemi të drejtë të shesim. Ndërsa restorantet i kam kufizuar në nivelin shqiptar. Tani po filloj të mendoj drejt Europës dhe Amerikës. Dhe Amerika po bë bëhet treg kryesor sepse eksportoj përditë me avion. Dhe atje po filloj të bëj magazinat. Mendoj se do të eci shumë mirë me seafood dhe mendoj se këto produktet e detit që i kemi perfekte për mua është armë e fortë për të hapur bizneset që të investoj në flotë. Po nuk është vetëm kjo, janë fabrikat. Pra unë kam potencial më shumë sesa të tjerët. Por ndihma që më ka dhënë shteti, më beso, ka qenë zero. Madje më ka grabit shteti shqiptar. Po i referohem kësaj partisë tjetër. Kemi pasur një ministër financash që më puthte 12 herë kur më takonte. Dhe unë kenaqesha me thënë të drejtën që e ulte veten në nivelin e tavolinës siç e gjente tavolinën. Dhe ky ministër financash, i shtynte letrat e mia për privatizim sa më shumë se: “e do shumë ai i gjati atje”. Tia shtyjmë. Dhe ky zotnia që më shtynte letrat mua derisa iku nga ministër financash, kur unë kërkoja të privatizoja sepse kisha hedhur gjithë lekët e mia në Elbasan dhe nuk kisha më kapital për të hedhur në treg për të blerë “shrims” (karkalec), dhe për ta blerë atë duheshin 10 a 15 milionë euro garanci, bëj një skandal të madh dhe vijnë për ta privatizuar. Dhe më vënë metrin Grida, te ato godina që ishin të gjitha në tokë, dhe mi masin si godina që ekzistonin më parë. Unë jap një dokumentar: shifini si kanë qenë, dhe si janë bërë dhe pse po i vini metrin. Dhe kur kam shkuar për firmën e privatizimit, po prisnim dy vetë: u ulën përballë meje. Këto godina janë tha me 1100 euro metri katror. Kush godina mor i them unë. Dhe më qisin një preventiv, 1.4 miliardë. Dhe kam bërë skandal në sy të ministres, Anila Denaj: Mua doni me më grabit ju. Unë kam besuar te shteti im. Dhe bëj një turnover që ia kaloj edhe Kurumit me hekur, unë ia kaloj me eksporte. Dhe ju më thoni mua 1.4 miliardë lekë për ato godina që duhet të më kishit dhënë lekë. Kam marrë dhe rezervat e shtetit e kam paguar nja 400 milionë te ministria e mbrojtjes.

Grida Duma: Po pse duhet të të jepnin lekë?

Gjergj Luca: Do vij dhe aty. Më ndihmoi drejtori i bankës dhe i mbarova dhe i kalova ato lekë.

Grida Duma: Dmth i pagove ato lekë?

Gjergj Luca: Lek më lek! I pagova dhe ika në punë timen që ti lija kolateral në bankë dhe të vazhdoja punën. Tani Grida, po si mos të më jepshin lekë këta mua që i mora rezervat e shtetit dhe i investova nga e para? Që mora një vend të mbaruar, një vend kanceri dhe e ktheva në jetë? Dhe erdhën gjithë njerëzit e zonës për të punuar. Dhe shitën lopët nëpër shtëpia dhe punonin gjithë ato gra. E ktheva me kopësht fëmijësh, me kinema, me teater, bënin jetë sociale. Rrinin nëpër shtëpia. Si ky shtet të mos më respektojë. Tani a mund të marrësh një fëmër, 300 vjet copë copë, të thyme e të mbarume, dhe ta bësh një nuse të bukur. Të dashurohen me nusen tatë. Vijnë nga gjithë bota në Fish City dhe dashurohen. Dhe Fish City është kthyer në një monument shqiptar. E kam bërë kaq të lakmueshme.

Grida Duma: Po si ka mundësi që keto njerëz i ka zgjedhur ai dhe kjo është xhelozi?

Gjergj Luca: Jo kjo është smirëzi, ose poshtërsi për ti bërë presion dikujt tjetër të kapë ndonjë gjë.

Grida Duma: Pse nuk pate urrejtje?

Gjergj Luca: Kisha një urrejtje të madhe. Po ka një cak. Unë vija nga Myslym Shyri, ai vinte nga Gjirokastra pas 6 motrave. Ai kishte marrë një dashuri të madhe, unë vija nga rruga. Ishim të ndryshëm. // Të drejtat e pamjeve © Top Channel

Policia Rrugore arrestoi një shofer të dehur që po ngiste me 230 km/orë në Rrugën Kombëtare Athinë-Lamia dhe publikoi një video të momentit kur radarët e saj “kapin” shoferin e rrezikshëm. Videoja tregon oficerët e policisë duke përdorur një pajisje radari që zbulon automjetin, i cili po lëviz me 110 km/orë mbi shpejtësinë e lejuar në Rrugën Kombëtare, dhe duke filluar një ndjekje me një motoçiklist të ELAS.

Vihet re se shoferit iu bë një alkotest, i cili tregoi se ai po drejtonte nën ndikimin e alkoolit. Shikoni momentin kur radari i Policisë Rrugore zbulon automjetin dhe fillon ndjekjen:

Gjatë operacionit të madh nga Policia Rrugore në Atikë, u kryen gjithsej 5,528 alkoteste . Nga këto, u konfirmuan 91 shkelje për drejtim mjeti nën ndikimin e alkoolit, ndërsa u arrestuan 3 shoferë, pasi leximi i alkoolit tejkaloi 0.60 mg/l .

Njoftimi i ELAS-it në lidhje me kontrollet e kryera në orët e para të së shtunës: Si pjesë e veprimeve të synuara dhe kontrolleve të trafikut nga Drejtoria e Policisë Rrugore të Atikës për të parandaluar drejtimin e automjeteve nën ndikimin e alkoolit dhe për të identifikuar sjelljet kriminale të drejtimit të automjeteve, një ekspeditë e posaçme u krye nga orët e para të mëngjesit të 21 nëntorit deri në orët e para të mëngjesit të 22 nëntorit 2025 në të gjithë pellgun e Prefekturës së Atikës, në të cilën morën pjesë Oficerët e Policisë nga Grupet e Kontrollit dhe Parandalimit të Aksidenteve Rrugore (O.E.P.T.A.) dhe Departamentet e Policisë Rrugore të Drejtorisë së Policisë Rrugore të Atikës.

Në këtë kontekst, u kryen -5,528- alkoteste dhe u konfirmuan -91- shkelje, për drejtim automjeti nën ndikimin e alkoolit, ndërsa -3- shoferë u arrestuan nën ndikimin e alkoolit me një lexim mbi 0.60 mg/l.

Përveç kësaj, në orët e para të 22-11-2025, oficerët e policisë nga Ekipet e Kontrollit dhe Parandalimit të Aksidenteve Rrugore (O.E.P.T.A.) arrestuan një drejtues makine i cili, siç u përcaktua nga një pajisje radari, po ngiste makinën në autostradën N.E.O. Athinë-Lamia me 230 km/orë, në vend të limitit maksimal të lejuar prej 100 km/orë, duke rezultuar në rrezik për përdoruesit e tjerë të rrugës, ndërsa kur iu nënshtrua një alkotesti, rezultoi pozitiv.

“Kontrollet për të parandaluar drejtimin e mjetit në gjendje të dehur dhe për të identifikuar sjelljet kriminale të drejtimit do të vazhdojnë me intensitet të pandërprerë

SHIKO VIDEON KËTU

Nga Nju Jork për INA, Beqir SINA

Mbrëmja e 22 nëntorit 2025 solli një atmosferë të paprecedentë në zemër të New York-ut. Në kuadër të Muajit Shqiptar dhe 113-vjetorit të Pavarësisë, organizata Albanian Roots – nën drejtimin e Marko Kepit, Bujar Gjatës, Bedrana Dukës dhe “Mjeshtres së Madhe” Agjelina Nikës – organizoi paradën e makinave shqiptare në Times Square, shoqëruar me një program kulturor njëorësh.

Dhjetëra automjete të zbukuruara me flamuj shqiptarë dhe amerikanë parakaluan në Broadway dhe Seventh Avenue, ndërsa në qendër të sheshit u hap një flamur gjigand kuq e zi. Valltarë dhe këngëtarë të rinj me veshje tradicionale sollën vallet e Tropojës, Labërisë dhe Çamërisë nën dritat e neonit, duke tërhequr vëmendjen e turistëve dhe qytetarëve që mbushën sheshin me kamera në duar dhe kureshtje për festën “me kaq shumë shpirt”.

Për një orë Times Square u shndërrua në një “Shqipëri të vogël”, ku thirrjet “Albania! Albania!” dhe “USA! USA!” bashkoheshin në një kor të vetëm.

Por nata kulmore e flamurit kuq e zi solli edhe një njoftim historik. Në një billboard gjigand, drejtuesit e Albanian Roots shpallën se New York Yankees do t’i dedikojnë më 19 maj 2026 një ndeshje të tërë komunitetit shqiptaro-amerikan – Dita Zyrtare e Trashëgimisë Shqiptare, e para e këtij lloji në një stadium amerikan të Major League Baseball.

Ngjarja do të sjellë një paradë shqiptare brenda fushës ikonike të Yankee Stadium, ku pjesëmarrësit do të marrin falas kapela dhe bluza “Yankees & Kuq e Zi” (edicion i kufizuar), si dhe akses në një seksion të posaçëm kuq e zi. Biletat do të blihen vetëm përmes linkut zyrtar të Albanian Roots: albanianroots.com/yankees.

“Është momenti të tregojmë sa të mëdhenj jemi kur jemi të bashkuar,” – u shprehën drejtuesit e Rrënjëve Shqiptare, duke ftuar komunitetin të mbushë stadiumin legjendar ku kanë luajtur Babe Ruth dhe Derek Jeter.

Nga Times Square te Yankee Stadium, rruga është hapur. Kjo ngjarje synon të kthehet në një traditë ku çdo shqiptar në Amerikë ndihet më i fortë, më krenar dhe më i bashkuar se kurrë.(INA)

Altin Dumani është më i vendosur se kurrë në ditët e fund të largimit të tij të “lavdishëm”, për të bërë detyrat që i kanë ngarkuar Partia, Liria, Drejtësia e Drapërit dhe “shumatorja e ofiqeve” të uzurpuara pa dashje, por me qëllim, që nuk i ka patur kurrë asnjë shtetar shqiptare në 120 vite shtet, atë të Kryministrit, Kryeprokurorit, të Presidentit dhe pushtet absolut me një vulë dhe një firmë, nga çdo gjykatës sharlatan i GJKKO në çdo shkallë.

Atij, i mjafton një Erion nga gjykata dhe një Angon pa emër e identitet, pa nam dhe nishan, për të marrë në dorë fatet e vendit, duke vendosur se kush do të drejtoi vendin si qeveritar, kryeqeveritar, kush do e fitoi tenderin, pse nuk e ka fituar humbësi dhe të qaj me lot për gjithë tendërhumbësat, duke marrë përsipër kapacitete profesinale, ligjore dhe intelektuale që kurrë nuk mund t’i ketë struktuar e drejtuar dhe për pak ditë.
prej tij

Të gjitha këto gjetje imagjinare sipas bisedave telefonike janë përdorur si akuza të forta, por ligjiërisht nuk përbëjnë asnjë provë, e nëse ekzistojnë janë thjeshtë indicie për të gjetur fakte konkrete, fizike, përndryshe janë një rrezik i madh për drejtësinë e vërtet dhe janë si provat e inkuzitorëve me shtriga dhe djaj, në periudhën e tmerreshme të inkuzicionit.

Me yryshin që kanë marrë disa “delirant” në strukturën e SPAK, keq e më keq do t’i ketë punët shteti dhe qeveria e majtë. Dumani nuk largohet pa formuar edhe qeverinë e re teknike, sepse pothuajse e ka kryer… një hap larg është. Asgjë nuk e pengon për të pezulluar nga detyra kryeministrin e Shqipërisë Edi Rama, sepse ai nuk është i zgjedhur por i vetëshpallur kryeministër, njëlloj si Balluku… as më shumë e as më pak.

Me një Erion të tretë, pas Erioni Banit që shkarkoi Veliajn edhe Erion Çelë që shkarkoi zv. kryeministren, sepse Eriona dhe bidona radhe ka plot drejtësia, Edi Rama na e merr të keqen… ikën për “shkarpa”!

Nëse nuk e beson po i’u sigurojmë se shumë shpejt Edi Rama do merret i pandehur, pas nje letre anonime të dërguar nga Nesti Angoni i dytë, i cili disponon 6 biseda të Ramës me Belën që tenderin ta fitoi Kallashi që i plotëson të gjitha kushte, pak më i shtrenjtë, por nën fondin limit. Kurse Pallashi plotëson vetëm 7 nga 11 kushtet dhe natyrisht si më i lirë mund të bëjë ndonjë birë, duke e ditur se i lirë për pleh ose falas është vetëm m*ti.

Por, për djajtë që kanë dalë nga shishja e vettingut dhe sharlatanët që deri tani kanë hetuar me dhjetëra raste të Shkeljes e Barazisë në Tendera dhe asnjë rast korrupsioni ose vjedhjeje, kjo eshtë “lufta e vërtetë” në emër të drejtësisë. Populli duhet ta marri vesh se vepër kriminale më të rëndë e më të madhe se kjo: Të fitoj ca miliona Kallashi kur duhet t’i fitonte Pallashi…nuk ka!

Ndaj për të shuar stuhin e “zëmërimit popullor”, për gjëmën qê i ka bërë vendit humbja e tenderit nga Pallashi, pa vullnet por i “tromaksur” nga ky krim tenderash, Presidenti me kërkesen e madhërisë së tij Altin Dumani i parë, do dekretoi qeverinë teknike, ku pa asnjë dyshim kryeministër teknik do jetë tekniku më i madhe e Lojrave Olimpike për pushtet, Sali Rama i Tretë, duke larguar Edi Ramën e katërt.

12 vjet duke kërkuar qeveri teknike më në fund u erdhi fati në derë, e gjetën njeriun që jo qeveri emëron e shkarkon, por i bënë funksionarët e shtetit të kërcejnë pupthi para tij, falë dozës së injorancë së atyre që bëjnë ligjet.

Mesi i Dhjetorit na gjen me qeveri teknike me kompetent të PD-së dhe me ca ushtarë të trembur të PS-së!

Rroftë SPAK, rrnoftë qeveria teknika, rroftë demonkracia…do jenë sloganet e festave të fund vitit!

Mos e merrni seriozisht, sepse edhe ndodh edhe nuk ndodh, por në mos qoftë e vërtetë… u sajoft, që të gëzoi ca ditë festash të bukura në fund të vitit edhe opozita e “shkalafitur”, që ka vite që e ëndëron këtë ditë! /Ekskluzive.al

Prej dhjetorit 2011 Ilir Kumbaro ish drejtor në SHIK i dënuar me 15 vite burg në mungesë për rrëmbimin e Remzi Hoxhës iu zhduk drejtësisë britanike, në ditën kur gjykata në Londër do të jepte vendimin për ekstradimin drejt Shqipërisë.

Që nga ky moment për ish zyrtarin e lartë të shërbimit inteligjent shqiptarë askush nuk mund të thoshte se ku fshihej. Ka patur të dhëna të pa konfirmuara se Ilir Kumbaro mund të kishte dalë ilegalisht nga Anglia.

Gazeta prestigjioze britanike The Telegraph i ka kushtuar një shkrim këtë të diel Ilir Kumbaros.

Për herë tregohet një e dhënë e re e cila sugjeron vendfshehjen e Ilir Kumbaros.

“Ai u pa për herë të fundit duke bërë pazar në një supermarket në Cardiff me bashkëshorten e tij në vitin 2016, sipas një burimi shqiptar” shkruan kjo gazetë.

“Kjo është një e dhënë e re cila del për herë të parë pas 14 vitesh, nga ajo që mund të quhet “Misteri i Kumbaros” se si ish punonjësi i ish Sigurimit të Shtetit e më pas drejtor drejtorie në SHIK iu iku drejtësisë britanike e cila edhe pse kanë kaluar 14 vite nuk e ka arkivuar dosjen për kërkimet ndaj tij” thotë gazetari i Top Channel Muhamed Veliu i cili e ka ndjekur këtë çështje prej ditës së parë kur Ilir Kumbaro u zbulua dhe u arrestua në  2008 në zonën Fulham.

Shkrimi i The Telegraph përkthyer nga Top Channel:

Scotland Yard po u bën thirrje qytetarëve që të ndihmojnë në gjetjen e një ish-shefi shqiptar të spiunazhit që ndodhet në arrati në Mbretërinë e Bashkuar, i akuzuar për rrëmbimin dhe torturimin e kundërshtarëve politikë.

Ilir Kumbaro po kërkohet  nga Policia Metropolitane prej 14 vitesh, pasi ai u arratis nga Londra ndërsa ishte i lirë me kusht, përpara një seance ekstradimi në dhjetor 2011.

Kumbaro, tani në të 70-at, kërkohet në Shqipëri për urdhërimin e rrëmbimit dhe torturës së tre burrave në vitin 1995, të cilët dyshoheshin se po komplotonin kundër presidentit të atëhershëm, Sali Berisha.

Policia Metropolitane ka lëshuar një apel të ri për informacion në lidhje me Kumbaron përmes organizatës bamirëse Crimestoppers.

The Telegraph mësoi se hetuesit po bëjnë kërkime dhe po ndjekin pista të reja për vendndodhjen e Kumbaros.

Ai u pa për herë të fundit duke bërë pazar në një supermarket në Cardiff me bashkëshorten e tij në vitin 2016, sipas një burimi shqiptar.

Rikapja e Kumbaros do t’i sillte një farë qetësimi familjes së Remzi Hoxhës, një biznesmen shqiptar-maqedonas, i cili u rrëmbye në veri të Tiranës më 21 tetor 1995 dhe u torturua në një magazinë, bashkë me Zizo Kristopullin dhe Avdyl Loshajn, me urdhër të Kumbaros – atëherë shef i shërbimit të inteligjencës të Shqipërisë  (SHIK).

Hoxha, baba i pesë fëmijëve, nuk është parë më kurrë.

I biri, Ardian Hoxha, i tha The Telegraph: “Jemi shumë të lumtur që më në fund autoritetet britanike janë riangazhuar me çështjen e Ilir Kumbaros, personit që rrëmbeu, torturoi fizikisht dhe vrau babain tim.”

Kumbaro iku në Mbretërinë e Bashkuar në vitin 1996 dhe kërkoi azil me emrin e rremë Shaqa Shatri.

Ai i bindi zyrtarët e emigracionit se ishte një refugjat kosovar që po ikte nga persekutimi i Serbisë.

Ministria e Brendshme i dha Kumbaros leje të pacaktuar qëndrimi dhe i lëshoi një pasaportë britanike.

Për 13 vjet, ai jetoi një jetë të dyfishtë në një banesë komunale në Fulham, në perëndim të Londrës, dhe mbijetoi me mijëra paund nga ndihmat sociale.

Policia Metropolitane nisi kërkimin aktiv për Kumbaron në qershor 2008, pas një kërkese nga autoritetet shqiptare.

Mashtrimi i tij mori fund kur ai tërhoqi vëmendjen e detektivëve duke përdorur, në mënyrë të pashpjegueshme, emrin e tij të vërtetë për të kërkuar përfitime të tjera për depresion dhe çrregullim post-traumatik.

Më 2 shtator, detektivët e njësisë së ekstradimit të Scotland Yard, të udhëhequr nga detektiv sergenti Peter Rance, arrestuan burrin që prezantohej si z. Shatri në banesën e tij në Fulham.

Kur u vu në pranga, Kumbaro thuhet se u ka thënë oficerëve: “Nuk jam Ilir Kumbaro, jam Shaqa Shatri” dhe se të tjerët në banesë ishin kushërira e tij, Naxhie Axemi, dhe një mik mashkull i quajtur Ervin Kumbaro (i biri).

Kumbaro duhej të paraqitej në gjykatën e magjistratëve të Westminster më 1 dhjetor 2011, por ai u arratis ndërsa ishte me kusht përpara seancës së ekstradimit dhe mendohet se është fshehur mes miqve në Mbretërinë e Bashkuar jashtë Londrës.

Ardian Hoxha tha: “Ne e kishim humbur besimin te sistemi i drejtësisë së Britanisë së Madhe, por duket se ende ka individë të nderuar që duan të shohin drejtësinë të vihet në vend.

“Nëse autoritetet britanike vërtet duan ta gjejnë Ilir Kumbaron, mund ta bëjnë shumë lehtë, pasi fëmijët dhe familja e tij jetojnë në Londër, dhe ka shumë mënyra për ta gjurmuar, lokalizuar dhe sjellë para drejtësisë.”

Në vitin 2012, ish-gjykata e krimeve të rënda në Tiranë e dënoi Kumbaron në mungesë me 15 vjet burg për rrëmbimin dhe torturimin e Hoxhës.

Misteri rreth zhdukjes së Hoxhës është thelluar pas një sërë vdekjesh të atyre më të lidhur me rastin.

Bashkim Gazidede, ish-kreu i SHIK-ut dhe personi që urdhëroi marrjen në pyetje, vdiq në Turqi në vitin 2008.

Budjon Meçe, një ish-oficer i SHIK-ut që, sipas prokurorisë, torturoi personalisht Hoxhën në Lezhë, vdiq në Tiranë në vitin 2018.

Xhevat Hana, ish-prokurori që hetoi rrëmbimin dhe këmbënguli në ekstradimin e Kumbaros, vdiq papritur në një spital italian në vitin 2012.

John Jones, ish-avokati mbrojtës i Kumbaros, vrau veten në Londër në vitin 2016.

Top Channel

Një pecetë e vendosur në dorezën e derës së makinës mund të jetë shenjë se automjeti juaj është vënë në shënjestër për vjedhje, ndaj duhet të njoftoni menjëherë autoritetet.

Bandat që vjedhin automjete gjejnë vazhdimisht mënyra të reja për të hyrë në to dhe, përpara se të kalojnë në veprimin e vjedhjes, anëtarët e tyre kryejnë një hetim të imtësishëm dhe organizojnë me kujdes mënyrën e veprimit.

Për të rritur shanset e suksesit, shpesh ata e “shënojnë” makinën që kanë vënë në shënjestër – një praktikë e ngjashme me atë që përdoret edhe në vjedhjet e banesave.

Sipas mediave spanjolle, një nga mënyrat më të përdorura për të shënuar një makinë është ajo e pecetës, që vendoset në një nga dorezat e dyerve të automjetit të synuar.
Kështu, ata u komunikojnë pjesëtarëve të tjerë të grupit se makina e zgjedhur është “fiksuar” dhe se duhet të nisë mbledhja e informacionit për rutinën e pronarit, vendet ku ai e parkojnë, e kështu me radhë.

Nëse peceta mbetet për një kohë të gjatë në dorezë, kuptohet gjithashtu se makina me shumë gjasa nuk përdoret shpesh nga pronari, gjë që e bën një objektiv më të lehtë.

Siç është e dukshme, praninë e një peceteje në dorezën e një makine nuk duhet ta konsiderojnë drejtuesit si një rastësi, por të dyshojnë menjëherë, pasi është shumë e mundshme që automjeti i tyre të ketë tërhequr vëmendjen e një bande.

Në një situatë të tillë, rekomandohet të kontaktohen menjëherë autoritetet policore, për të frenuar veprimtarinë e grupit kriminal.

© BalkanWeb