Osmanit, “Mirëmbrëma Yje”, është kthyer në qendër të kritikave të ashpra nga publiku, duke u akuzuar për mungesë etike dhe bullizëm televiziv.
Në panelin e të ftuarve ishin Arjan Konomi, Inida Gjata (Zhaku) dhe Zhaklin Lekatari. Gjatë një rubrike ku shfaqeshin foto të personazheve publike për t’u komentuar, situata degradoi në ofendime personale ndaj personave që nuk ishin të pranishëm në studio, konkretisht ndaj aktores Egla Ceno.
Kur në ekran u shfaq fotoja e Eglës, komentet e të ftuarve ishin të rënda. Zhaklin Lekatari u shpreh: “Homofobe,” ndërsa Inida Gjata (Zhaku) nuk u përmbajt duke thënë: “kjo është idiote komplet.”
Nga ana tjetër, Arjan Konomi e injoroi duke thënë: “nuk e njoh.” E gjithë kjo situatë u shoqërua me të qeshura nga të pranishmit, përfshirë edhe Arbanën.
Ky moment ka shkaktuar zemërim te ndjekësit në rrjetet sociale. Komentuesit e kanë cilësuar sjelljen si “aspak profesionale”, duke kritikuar Arbanën që lejoi dhe qeshi me fyerjet ndaj personave të tretë, në vend që të ruante etikën e emisionit.
Shumë prej tyre e kanë cilësuar këtë si një formë bullizmi dhe një fiksim të moderatores me personazhet e Top Channel.
Arena Channels, një grup mediatik në pronësi të Telekom Srbija, ka vendosur të hyjë në tregun shqiptar. Një javë më parë, shoqëria serbe ka krijuar kompaninë Arena News Channels Two Albania, e cila është regjistruar këtë të enjte në Qendrën Kombëtare të Biznesit.
Sipas ekstraktit, shoqëria do të ketë si objekt aktiviteti; Prodhimin, transmetimin dhe shpërndarjen e përmbajtjeve audiovizive nëpërmjet televizionit, internetit, platformave digjitale dhe rrjeteve sociale.
Ekstrakti i Arena Channels Two Albania
Po kështu pjesë e aktivitetit të saj do të jetë edhe botimi dhe administrimi i publikimeve elektronike dhe mediave online.
Dokumentat tregojnë se adresa e regjistruar e shoqërisë është në rrugën Dervish Shaba, Blloku B-1. Në të njëjtën adresë gjendet dhe televizioni Adria Med si dhe disa kompani të tjera në pronësi të biznesmenit Enver Mehmeti, por ky i fundit deklaron se shoqëria serbe nuk ka lidhje me televizionin e tij.
Arena News Channel Two Doo u themelua më 13 mars 2009 nga Goran Đaković. Në atë kohë, ajo quhej “Telecommunications Company HD-WIN doo”. Më 22 maj 2019, kompania u ble nga “Telekom Srbija” AD, çka e bën atë një kompani që indirekt zotërohet nga qeveria e Serbisë.
Aktualisht Arena Channel Group është mbajtësja e të drejtave për transmetimin e kanaleve sportive në territorin e Serbisë, Bosnje Hercegovinës, Malit të Zi dhe Kroacisë. Po kështu ky grup mediatik mban edhe liçencën e kanalit të njohur Euronews për Serbinë.
Ardhja e Arena Channel në Shqipëri përkon me disa ndryshime të rëndësishme në tregun mediatik shqiptar. Dy javë më parë, Kapitali raportoi se familja Dulaku shiti platformën Tring tek një kompani e lidhur me grupin Devolli të Kosovës.
Po kështu, gjatë muajve të fundit ka patur zëra edhe për një shitje të mundshme të platformës tjetër, Digitalb, por deri më tani kjo nuk është materializuar./Kapitali
Gazetari Almer Toska ka akuzuar drejtpërdrejt Belinda Ballukun për tentativa shantazhi dhe blerje të heshtjes politike, duke përdorur miliona euro të përfituara nga korrupsioni në koncesionet rrugore.
Në intervistën e tij në News24, ndërsa komentonte pezullimin nga detyra dhe bllokimin e pasaportës së Ballukut nga GJKKO, Toska deklaroi: “Belinda Balluku ka tentuar të negociojë fatin e saj politik duke përdorur shantazhin. Ka menduar se kishte mbështetje të fortë sepse kishte pushtet ekonomik absolut përmes korrupsionit. Ka mbushur xhepat jo vetëm të njerëzve të saj, por edhe të opozitës dhe partive të reja. Ka shpërndarë paranë e grabitur të shqiptarëve te ata që dilnin publikisht përballë saj.”
Gazetari zbuloi një detaj tronditës nga komunikimet e përgjuara: “Një deputet shumë i rëndësishëm i Partisë Demokratike, i afërt me Sali Berishën, komunikon në një grup WhatsApp-i me Evis Berberin. Deputeti i shkruan: ‘Na duhen lekë për molotovë’. Berberi i përgjigjet: ‘Keni shumë pak njerëz, pse nuk organizoheni më mirë?’ dhe deputeti ia kthen: ‘Nuk kemi financa’. Kjo tregon se deri në çfarë niveli ka arritur blerja copë-copë e opozitës nga Belinda Balluku.”
Gazetari Almer Toska ka deklaruar dje se në dosjen e SPAK për Tunelin e Llogarasë ka disa komunikime të përgjuara, mes deputetit të Partisë Demokratike (Belind Këlliçi) dhe ish kreut të ARRSH Evis Berberin, i cili është në burg me disa masa sigurie për korupsion me tenderat e rrugëve dhe pastrim parash. Në këto mesazhe, sipas gazetarit pranë PD-së, diskutohen çështje të organizimit dhe financave për protestat para Bashkisë së Tiranës, kundër Erion Veliajt.
“Një deputet shumë i rëndësishëm i Partisë Demokratike, i afërt me Sali Berishën, komunikon në një grup WhatsApp-i me Evis Berberin. Deputeti i shkruan: ‘Na duhen lekë për molotovë’. Berberi i përgjigjet: ‘Keni shumë pak njerëz, pse nuk organizoheni më mirë?’ dhe deputeti ia kthen: ‘Nuk kemi financa’”, tha Toska. Deklaratat u bënë gjatë një interviste në kanalin News 24.
Ndërkaq, disa burime theksojnë se në dosjen e Tunelit të Llogarasë rezulton i përfshirë në komunikime edhe Sekretari i Përgjithshëm i PD-së, Flamur Noka, i cili është akuzuar nga Gaz Bardhi se posedon edhe një vilë në Gjirin e Lalzit në emrin e një biznesmeni. Gjithsesi, avokatja Alesia Balliu tha dje në një studio televizive se Flamur Noka ka miqësi me zv/kryeministren Balluku.
“Ata e braktisën parlamentin pasi nuk kanë interes të debatojnë me argument me Ballukun, sepse ajo është mikeshë shumë e mirë e Nokës. Ata e ruajnë për të mos e atakuar. Dhe kur e atakojnë, mbajnë atë klounin, çunin e Fahriut, që kërkojnë ti bëjë moral të pandehurës Balluku, duke qenë vetë djali i një spiuni dhe që vjen nga një familje hajdutësh“, tha Balliu. /Prapaskena
Në Komisionin e Ligjeve, ku po diskutohej miratimi i buxhetit për vitin 2026, është regjistruar një debat i fortë mes deputetëve socialistë. Tensionet u ndezën pas diskutimit mbi një kërkesë të bashkëkryetarit të komisionit, Oerd Bylykbashi, që të ishte i pranishëm gjatë shqyrtimit të projektligjit për komisionet hetimore.
Kryetari i Komisionit, Ulsi Manja, propozoi një ndërprerje prej 20 minutash në mënyrë që Bylykbashi të mbërrinte dhe të mbante qëndrimin e grupit parlamentar të Partisë Demokratike. Por propozimi nuk u mirëprit nga deputetja socialiste e Fierit, Zegjine Çaushi, e cila reagoi menjëherë duke pyetur pse duhej pritur përfaqësuesi i opozitës.
Debati që shkaktoi tension
Replika e shkurtër e Çaushit solli një reagim të ashpër të Manjës, i cili e cilësoi të papranueshme mënyrën e kundërshtimit të saj dhe theksoi se brenda grupit parlamentar ekziston hierarki që duhet respektuar.
Debati i plotë: Manja: “Për projektligjin për komisionet hetimore do propozoj 20 minuta pushim, meqenëse nënkryetari i Komisionit, Oerd Bylykbashi ka kërkuar që në shqyrtimin e tij të jetë prezent për të mbajtur një qëndrim në emër të grupit parlamentar të PD.”
Zegjine Çaushi: “Pse duhet pritur?”
Manja (i irrituar): “Zegjine, grupi parlamentar ka hierarki. Kështu që mund të mësohesh me këtë lloj hierarkie sepse është kërkesë që është dakordësuar që dje. Është një ligj që do të duhet të ketë edhe qëndrimin e tyre. Takohemi pas 20 minutash.”
Ish- drejtuesi i policisë Shemsi Prençi deklaroi në Report Tv se Belinda Balluku tentoi të arratiset ndaj edhe GJKKO i ndaloi daljen jashtë vendit dhe e pezulloi sot nga detyra e zv.kryeminstres, pasi kishte informacion lidhur me këtë.
I ftuar në emision ‘Frontline’ në Report Tv, ai tha se Balluku tashmë që është në liri, ka mundësi që të intimidojë vartësit e saj dhe të prish votat.
‘Unë e kam thënë që do të pezullohej nga detyra, duke parë nivelin e korrupsionit dhe shpërdorimit të fondeve publike që ajo ka bërë, por SPAK është i detyruar që nga sot e tutje të bëjë kërkesë në Kuvend për ti hequr imunitetin sepse paraqet rrezikshmëri të madhe, madje ka pasur zëra se do të arratisej si Ahmetaj ndaj SPAK i kanë bllokuar pasaportën, pra kanë përshpejtuar veprimet. Ky është pezullim i përkohshëm. Ajo ka mundësi që të intimidojë vartësit e saj, dhe unë them se prokuroria dhe gjykata kanë vepruar drejt duke vepruar sipas ligjit procedurës penale’, tha ai.
Po ashtu Prenci shtoi qe e pritshme eshte qe Rama do e zevendesoje Ballukun me Ulsi Manjen, sepse ai ishte personi qe ai thirri ne Kryeministri, si nje konjukturagjiu me i rendishem nga partia socialiste, dhe ai si jurist te marre persiper te mbroje Belinda Ballukun ne kushtetuese dhe te marre persiper detyrat
Avokati Edmond Petraj, tha se kryeministri Edi Rama do ta zëvendësojë Ballukun. Petraj tha se vendimi i GJKKO për pezullimin nga detyra nuk diskutohet, ndërsa theksoi se pezullimi është shkarkim.
‘Kemi të bëjmë në këtë rast me numrin 2 të qeverisë. Po pezullimi është shkarkim, problemi është që duhet parë se si do të vejë situata. Po unë them se Rama do zëvendësojë Ballukun. Të thotë ajo mungojnë hekurat dhe betoni në tunel kjo është një gjë shumë e rëndë. Duhet parë nëse është zbatuar projekti si duhet’, tha ai.
Ilir Alimehmeti, deklaroi se kryeministri Edi Rama duhet që ta shkarkojë Belinda Ballukun nga posti i zv.kryeministres pas vendimit për pezullimin nga detyra ditën e sotme nga GJKKO. Ai tha se nëse Ballukun e lënë në liri, ajo mund të prish provat.
‘Ky është rast i parë sepse është në detyrë dhe ajo duhet që të jepte dorëheqjen kur u morë e pandehur dhe kryeministri duhet që ta shkarkonte dhe u desh GJKKO të mësojë moralin politikë sesi funksionon dhe kjo duhet që të ishte bërë më herët. Rama nuk duhet që ta kishte riemëruar. Nëse kemi dy zvendës kryeministri njëri në arrati dhe tjetrës i është marrë pasaporta kryeministri ka përgjegjësit e vet dhe Ballukun as që e ka shkarkuar. Të vjedhës sasi kaq të madhe parash dhe as punën mos ta bësh mirë kjo është e tmerrshme. Unë prisja dorëheqjen që kur u thirr në SPAK’, tha ai.
Për avokatin Indrit Sefa, pas pezullimit nga detyra Balluku nuk mund të firmosë asnjë dokument. Ai tha se vendimin e gjykatës do e zbatojë qeveria.
Këshilli i Ministrave duhet që të mblidhet për të zbatuar vendimin e GJKKO. Balluku do të jetë e pezulluar në funksion nuk qëndron dot, nuk merr dot asnjë vendim nuk firmos dot. Rri e pezulluar me vendim gjykate. Rama mund të emëroj sa zv.kryeministra të dojë, por ligjërisht Balluku në funksion e saj është e pezulluar do të dalë vendim i Këshillit të Ministrave i cili do e pezullojë dhe do e çojë çështjen në GJK për interpretim përfundimtar’, tha ai.
Belinda Balluku u pezullua nga detyra me vendim të GJKKO-së, pasi SPAK e heton për shkelje në tenderët e Llogarasë dhe Unazës së Madhe me vlerë 210 milionë euro. Që prej mesditës së sotme për 8 orë ajo ka qenë në Kryeministri, ku iu bashkua edhe Ulsi Manja për konsultime juridike.
Pas gati 5 vitesh nga një prej ngjarjeve më të rënduara që tronditi opinionin publik shqiptar, Gjykata e Lartë ka dhënë vendimin përfundimtar në çështjen penale ndaj ish-efektivit të forcave “Shqiponja”, Nevaldo Hajdaraj, i akuzuar për vrasjen me dashje të 25-vjeçarit Klodian Rasha.
Me këtë vendim, Gjykata e Lartë ka rrëzuar rekursin e paraqitur nga Hajdaraj, duke lënë në fuqi vendimin e Gjykatës së Apelit, e cila e kishte shpallur fajtor për vrasje me dashje dhe e kishte dënuar me 18 vite burg. Por për shkak të përfitimit nga gjykimi i shkurtuar, Hajdaraj do të vuajë 12 vite burgim efektiv.
Po ashtu, u rrëzua edhe rekursi i Prokurorisë, e cila kishte kërkuar dënimin maksimal prej 20 vitesh dhe mospranimin e gjykimit të shkurtuar, duke pretenduar se rrethanat e veçanta të ngjarjes nuk përmbushnin kushtet për këtë procedurë. Por Gjykata e Lartë nuk i pranoi këto argumente dhe i qëndroi vendimit të Apelit.
Si ndodhi vrasja e Klodian Rashës? Ngjarja e rëndë ndodhi në orët e para të mëngjesit të 8 dhjetorit 2020 në Tiranë, gjatë orës policore të vendosur për shkak të pandemisë. Klodian Rasha, një 25-vjeçar që po ecte në rrugë pranë banesës së tij, u qëllua për vdekje nga efektivi Nevaldo Hajdaraj.
Sipas akt-ekspertimit dhe pamjeve filmike të sekuestruara nga Prokuroria e Tiranës, Rasha ishte në ikje e sipër, ndërsa Hajdaraj kishte hapur zjarr nga një distancë prej 4–5 metrash. Në një moment, ish-polici u shtri në trotuar dhe qëlloi dy herë me armën e shërbimit, një nga plumbat duke e goditur viktimën në shpinë, duke i shkaktuar vdekjen e menjëhershme.
Ngjarja shkaktoi reagime të forta në publik dhe në politikë. Mijëra qytetarë dolën në protestë në ditët që pasuan, duke kërkuar drejtësi për të riun dhe duke denoncuar dhunën policore. Si pasojë e presionit publik, atëherë-ministri i Brendshëm Sandër Lleshaj dha dorëheqjen.
Babai i Klodian Rashës: “Drejtësia është e verbër” Pas vendimit të Gjykatës së Lartë, babai i Klodian Rashës, Qazim Rasha, është shprehur i zhgënjyer. Ai e cilësoi dënimin si “të butë” dhe tha se “drejtësia shqiptare ka zgjedhur të mbyllë sytë përballë një vrasjeje të qartë, të dokumentuar dhe të rëndë”.
“Për një jetë të marrë padrejtësisht, për një djalë që nuk mbante armë, që vraponte për të shpëtuar, për një veprim që shkatërroi familjen time, 12 vite janë një tallje. Ky është një dënim për të larë ndërgjegjen e shtetit, jo për të dhënë drejtësi”, u shpreh ai për mediat.
Mbyllet procesi penal, por jo dhimbja publike Me vendimin e Gjykatës së Lartë, mbyllet përfundimisht procesi penal ndaj Nevaldo Hajdarajt, duke i dhënë fund një sage gjyqësore që la plagë të thella në shoqërinë shqiptare. Megjithatë, debati për përdorimin e forcës nga strukturat e rendit, abuzimin me armën e shërbimit dhe mungesën e transparencës në rastet e ngjashme mbetet ende i hapur.
Ngjarja e dhjetorit 2020 u shndërrua në një simbol të pakënaqësisë ndaj sistemit të drejtësisë dhe strukturave shtetërore, ndërsa emri i Klodian Rashës vazhdon të përmendet në çdo protestë ku kërkohet llogaridhënie për jetën e qytetarëve përballë autoritetit të shtetit.
Prokuroria e Posaçme Kundër Korrupsionit dhe Krimit të Organizuar ka nisur hetimet për heqjen e gjobës 120 milionë euro të Bankers Petroleum.
SPAK ka sekuestruar dokumentacionin në Ministrinë e Financave dhe Drejtorinë e Përgjithshme të Doganave mbi praktikën e heqjes së gjobës më të madhe të vendosur ndonjëherë nga autoritetet fiskale të vendit.
Kapitali shkruan se ka lexuar një përgjigje zyrtare të Ministrisë së Financave ku konfirmon sekuestrimin e dokumentacionit nga SPAK.
Gjoba 120 milionë euro mbi Bankers Petroleum u vendos në vitin 2019 nga dogana e Fierit pas një hetimi dyvjeçar të kryer nga Drejtoria e Përgjithshme e Doganave.
Sipas këtij hetimi të kryer nga doganat, Bankers Petroleum ka shmangur të paktën 30 milionë euro detyrim akcize përmes solarit të prodhuar nga ARMO në rafinerinë e Ballshit.
Mbi këtë detyrim është zbatuar edhe gjoba trefish prej 90 milionë euro sic parashikonte ligji i procedurave duke e çuar shumën totale që duhet të paguante kompania në 120 milionë euro.
Por menjëherë pas plotësimit të procesverbalit të gjobës nga dega e doganës së Fierit, Bankers Petroleum u ankua në ministrinë e Infrastrukturës dhe Energjisë duke e cilësuar gjobën si të paligjshme, pasi sipas saj ajo nuk ka patur detyrim për të paguar akcizën e holluesit.
Belinda Ballukiu iu drejtua me shkresë ministrisë së Financave duke i kërkuar që të konsultohej me avokaturën e Shtetit.
Rrjedhimisht, ministrja e atëhershme e Financave, Anila Denaj udhëzoi doganën që të pezullonte përkohësisht vendosjen e gjobës, me qëllim që kjo çështje të konsultohej me Avokaturën e Shtetit për të mos e ekspozuar Shqipërinë përballë rrezikut të një arbitrazhi.
Pas udhëzimit të ministrisë së Financave, Dogana e Fierit e pezulloi vendosjen e gjobës. Kjo ishte zanafilla e një kalvari neglizhencë dhe paligjshmërie.
Ligji shqiptar përcakton se çdo vendim përfundimtar mbi gjobat administrative duhet të përpunohet brenda 6 muajsh nga momenti i vendosjes. Por në këtë rast, gjoba u mbajt pezull për gati 7 vite, pavarësisht korrenspodencës mes institucioneve. Vetëm një muaj më parë, Dogana e Fierit vendosi riaktivizimin e gjobës 120 milionë euroshe, pasi e kishte mbajtur të pezulluar për vite të tëra.
Gazheli e mbajti gjobën pezull
Portali Skyweb.al raportoi pak ditë më parë mbi ekzistencën e të paktën dy shkresave, sipas të cilave drejtuesit e Doganës së Fierit i kanë rikujtuar kreut të Doganave, Gent Gazheli gjobën ndaj Bankers, duke e njoftuar për nevojën që të procesohej, pasi po mbahej pezull prej tij.
Megjithatë, pavarësisht njoftimeve me email dhe me shkresë zyrtare, vendimi nuk u trajtua nga Drejtoria e Përgjithshme e Doganave.
Skyweb.al ka mësuar se gjatë vitit 2021, Gazheli është njoftuar disa herë nga ish-kreu i Doganës së Fierit, Olti Kuke për afatin ligjor të gjobës, por sërish nuk ka marrë asnjë vendim, duke e mbajtur çështjen të pezulluar.
Vetëm pak ditë më parë, pas shpërthimit të skandalit dhe referimit të dosjes nga Prokuroria e Fierit drejt SPAK-ut, Drejtoria e Doganave ka rikthyer në vëmendje çështjen, duke tentuar të procesojë vonë një vendim që duhej marrë pesë vite më parë./Kapital
Presidenti i Serbisë është akuzuar për përfshirje në skandalin e njohur si “safari i snajperëve” në Sarajevë gjatë Luftës së Bosnjës, ku dyshohet se të huaj të pasur paguanin shuma të mëdha për të qëlluar mbi civilë.
Aleksandar Vuçiç dyshohet se ka qenë i pranishëm në një nga pozicionet ushtarake mbi qytet, nga ku thuhet se këta të huaj paguanin për të qëlluar banorët gjatë rrethimit të Sarajevës, nga viti 1992 deri në vitin 1996.
Janë publikuar edhe pamje video që pretendohet se e tregojnë atë si i ri, teksa udhëton me një automjet me katër rrota, në bagazhin e të cilit ndodhej një kafkë njerëzore me një përkrenare të kaltër të paqeruajtësve të Kombeve të Bashkuara.
Pretendimet kundër Vuçiç, të cilat ai i mohon kategorikisht, janë ngritur nga gazetari investigativ kroat Domagoj Margetiç. Ky i fundit ka paraqitur një ankesë ndaj presidentit pranë prokurorëve italianë, të cilët tashmë po hetojnë akuzat se italianë, rusë dhe amerikanë kanë marrë pjesë në “safari me snajperë” gjatë konfliktit.
Margetiç deklaroi: “Kam informuar zyrën e prokurorit publik për të gjitha njohuritë e mia lidhur me përfshirjen e Aleksandar Vuçiç në safaritë njerëzore në Sarajevën e kohës së luftës. Kam bashkëngjitur të gjitha provat: materialet video, dokumentacionin fotografik, audio dhe atë mediatik të asaj periudhe.”
Në parashtresën e tij, ai pretendon se Vuçiç ishte “anëtar i një njësie paraushtarake nën kontrollin e Partisë Radikale Serbe gjatë viteve 1992–1993”. Sipas tij, njësia ishte e stacionuar në pozicion lufte pranë varrezave hebraike në Sarajevë, të cilat ishin përdorur si pikë snajperësh nga forcat serbe.
Gjatë rrethimit, më shumë se 10,000 njerëz u vranë nga bombardimet dhe zjarri i snajperëve.
Margetiç shton se informacionet “e vendosin Vuçiçin pa asnjë dyshim në kohën dhe vendin e këtyre krimeve”. Ai citon pamje filmike të vitit 1993 që, sipas tij, e tregojnë Vuçiçin duke mbajtur një pushkë. Ndërkohë, mbështetësit e presidentit serb i kanë hedhur poshtë pretendimet duke thënë se objekti në video nuk ishte armë, por një trekëmbësh kamere televizive, pasi Vuçiç në atë kohë punonte si gazetar.
Prokurorët në Milano hapën hetime pasi morën informacion se italianë të pasur ishin ndër të huajt që paguanin për të qëlluar civilë boshnjakë. Dyshohet se mbi gratë, fëmijët dhe burrat me uniformë vendoseshin edhe “shpërblime”.
“Turistët e luftës” dyshohet se organizoheshin nga milicitë serbe të Bosnjës nën komandën e Radovan Karaxhiçit.
Zëdhënësja e presidentit, Suzana Vasiljeviç, tha për The Telegraph: “Pretendimet e gazetarit Domagoj Margetiç përfaqësojnë një rast tipik të dezinformimit dashakeq, të ndërtuar me qëllim të cënimit të besueshmërisë institucionale të Republikës së Serbisë dhe presidentit të saj. Presidenti Vuçiç nuk ka marrë pjesë në aktivitete luftarake, nuk ka përdorur armë dhe nuk ka pasur rol në asnjë operacion lufte.” Ajo shtoi se akuzat janë “të motivuara politikisht” dhe synojnë të “minojnë reputacionin ndërkombëtar të Serbisë”.
Një dokumentar i publikuar në vitin 2022 nga një regjisor slloven, me titull “Sarajevo Safari”, ngriti akuza të ngjashme për të huaj që merrnin pjesë në “safari lufte gjatë fundjavës”.
Lidhur me videon e fundit që pretendohet se e tregon Vuçiçin me automjetin ku shihet një kafkë, një burim serb tha se makina nuk ishte e tij dhe se “automjete të tilla gjendeshin kudo në zonën e luftës”.
Pretendimet për ardhjen e të huajve të pasur për “safari snajperësh” janë mbështetur edhe nga ish-diplomati italian Michael Giffoni, i cili shërbeu si zëvendëskryetar i misionit diplomatik të Italisë në Sarajevë. Ai deklaroi se sapo mbërriti në qytet, në vitin 1994, iu tha: “Po organizohen safari. Shumë të pasur po vijnë këtu – disa janë gjuetarë, të tjerë biznesmenë. Ushtria dhe paraushtarakët i çojnë në kodrat mbi Sarajevë dhe ata paguajnë për këtë.”
Sipas tij, shërbimi italian i inteligjencës SISMI u informua për turizmin e luftës dhe, në bashkëpunim me inteligjencën boshnjake, arriti të ndalonte mbërritjen e italianëve. Megjithatë, autoritetet italiane nuk arritën të identifikonin asnjë shtetas të tyre që mund të ketë marrë pjesë në të shtënat ndaj civilëve. “Po të kishim pasur një emër, do ta kishim ndjekur penalisht,” tha Giffoni.
Ekspertë të Ballkanit thanë për The Telegraph se akuzat mund të jenë të vërteta, por kërkojnë trajtim të kujdesshëm. Dr. Helena Ivanov, nga Henry Jackson Society, deklaroi: “Shumë gjëra të tmerrshme ndodhën gjatë luftës, por pati edhe histori që rezultuan të rreme. Pretendime tronditëse duhet të hetohen plotësisht dhe me transparencë.”
Videoja ku duket Vuçiç me automjetin e zbukuruar me një kafkë u publikua nga eksperti i Ballkanit, Jasmin Mujanovic. Ai tha se ka “prova në rritje, përfshirë dëshmi nga Gjykata Ndërkombëtare Penale për ish-Jugosllavinë, për ekzistencën e ‘safarive njerëzore’ të kryera nga forcat nacionaliste serbe për llogari të turistëve të pasur të huaj”.
Mujanovic theksoi se akuzat janë “të besueshme”, por kërkojnë “prova të jashtëzakonshme” për t’u konfirmuar. Ai shtoi se çështja duhet të hetohet nga agjencitë italiane dhe ato ndërkombëtare: “Shpresojmë që këto të rezultojnë thjesht legjenda urbane, duke pasur parasysh tmerrin që nënkuptojnë. Por nëse janë të vërteta, duhet të ngrihen akuza të rënda penale ndaj të gjithë atyre që janë përfshirë.”
Tirana ka pritur samitin e Growth Plan “Our Pathway to the EU”, tryeza mes liderëve të Ballkanit Perëndimor dhe Komisioneres për Zgjerimin e Bashkimit Europian, Marta Kos.
Në fjalën e tij Kryeministri Edi Rama tha:
“Mirëse u rikthyet në Tiranë, qyteti ku besimi te Europa është kaq i madh, sa edhe një veteran i vjetër i BE, si një adoleshent në dashuri. Ballkani Perëndimor ka zgjedhur të ecë përpara së bashku, me udhërrëfyes drejt lirive dhe mundësive drejt tregut të përbashkët europian.
Më mirë vonë se kurrë, pas gjithë atyre shanseve kur trenat e bashkëpunimit u nisën dhe ne mbetëm në platformë. Më lini ta them ndryshe, Europa nuk është ndërtuar duke ndenjur në pritje por duke vepruar. Sot më lejoni të rendis disa fakte konkrete. 7 dyer, për tu çelur. Tarifat Roaming mes Ballkanit Perëndimor dhe BE-së do të përfundojmë në 2026.
Tashmë me finalizimin e bazës ligjore nga komisioni, ka një program që do i japë fund tarifave. Do të jetë suksesi ynë i ardhshëm pas SEPA. Roaming ka të bëjë me heqjen e një kufiri tjetër artificial. Një identitet një akses, një jetë digjitale në mbarë BE-në. Në 2027 do të jemi në pritje aty për BE-në. Pikalimet kufitare, nga pengesa në motorë zhvillimi. Kemi rënë dakord për 16 përparësi për kalimet kufitare”, tha Rama.
