Month: October 2025

Hetimet e para policore për vrasjen e nënës në Flamouli të Trikalës nga i biri i saj, flasin për grindje të shpeshta midis të dyve.

Djali 18-vjeçar e mbyti nënën e tij me një peshqir, ndërsa ajo ishte ulur e shkujdesur në divan dhe po shikonte televizor dhe më pas njoftoi policinë për krimin e rëndë. Pak minuta para vrasjes, djali ishte ulur pranë saj, i cili, duke u ngritur dhe pa thënë asgjë, shkoi në banjo, mori një peshqir dhe e mbështolli rreth qafës së 54-vjeçares, derisa ajo i ra të fikët.

18-vjeçari, i cili jetonte me të atin pasi prindërit e tij ishin të divorcuar, dyshohet se kishte grindje të shpeshta me nënën e tij, pasi nuk i miratonte, siç pretendonte, veprimet dhe sjelljet e saj. Pas vrasjes së nënës së tij, i riu, me të njëjtën qetësi, telefonoi policinë dhe u tregoi atyre se çfarë kishte bërë.

“Ejani të më arrestoni”, tha ai.

Forcat e policisë nxituan menjëherë në shtëpi dhe e gjetën gruan fatkeqe të vdekur, ndërsa arrestuan të birin. Në të njëjtën kohë, u njoftua shërbimi mjeko-ligjor i Larisës dhe materiali fotografik iu dërgua menjëherë kreut të shërbimit, i cili, bazuar në shenjat e vërejtura rreth qafës, konfirmon, në parim, vdekjen nga mbytja, informon “Protothema”.

Shenjat konfirmojnë përshkrimin e 18-vjeçarit, se si e vrau gruan që e solli në jetë.

I riu nuk ka probleme psikiatrike dhe nuk ka shfaqur as në të kaluarën, ndërsa hetimi i policisë është duke vazhduar për të përcaktuar motivet që e çuan në vrasje dhe rrethanat që mbizotëruan midis nënës dhe birit.

Mjeku Albert Troci ishte në një lidhje me emisionin “Shqipëria Live”, ku foli për gjendjen e rënduar shëndetësore të ish-kryeministrit Fatos Nano.

Ai u shpreh se ish-kryeministri ka një ngushtim të rrugëve të frymëmarrjes, teksa ka pësuar një arrest kardiak dhe kjo e ka rënduar edhe më shumë gjendjen e tij. Sipas mjekut, 72 orët e para pas arrestit kardiak janë thelbësore, për të parë nëse pacienti mund të shërohet.

“Ka një ngushtim të rrugëve të frymëmarrjes. Kjo do të thotë se mushkëria transformohet dhe krijon vështirësi në frymëmarrje. Nëse pacienti ka komplikacione edhe në rrugët e sipërme të frymëmarrjes, gjendja bëhet edhe më e rënduar. Zoti Nano ka pësuar edhe arrest kardiak më pas. Mjafton një grip i lehtë, apo një infeksion i lehtë që ta komplikojë gjendjen. Nëse një pacient shtrohet në reanimacion, dmth që ka nevojë për ndihmë në frymëmarrje. Fakti që ka patur një arrest kardiak, do të thotë që gjendja e tij është përkeqësuar.

Këto janë 72 orët më të rëndësishme. Fillimisht duhet të kuptohet çfarë e shkaktoi arrestin kardiak. Nëse ka mungesë të oksigjenit në tru, kjo mund të çojë deri në humbje të kujtesës, dëmtim të pjesëve të trurit dhe nëse kjo mungesë oksigjeni në tru zgjat për një kohë të gjatë, gjendja përkeqësohet më shumë.

Kjo gjendje shkaktohet nga mjedisi ku jeton, nëse është i ndotur ajri, nga duhani, nga kequshqyerja por edhe mund të jetë e lindur”– tha mjeku.

Euro ka pësuar rënie të mëtejshme në kursin e këmbimit me Lekun ditën e martë, duke prekur një minimum të ri historik.

Sipas kursit zyrtar të këmbimit, të Bankës së Shqipërisë, monedha europiane u këmbye sot me 96.6 lekë, niveli më i ulët i regjistruar ndonjëherë. Kursi i këmbimit vazhdon të jetë në rënie edhe me bazë vjetore, me 2.2% më pak krahasuar me të njëjtën periudhë të vitit të kaluar.

Agjentët e këmbimit valutor shprehen se tregu vazhdon të karakterizohet nga një ofertë e lartë e Euros, ndërsa kërkesa për blerje është e dobët. Kjo ka sjellë rënie të mëtejshme të nivelit të kursit dhe sidomos të çmimit në shitje (ask) të ofruar nga bankat.

Burimi i prurjeve valutore është i vështirë të identifikohet në kohë reale. Hipotezat kryesore ngelen prurjet e lidhura me turizmin dhe me investimin në pasuri të paluajtshme.

Në treg ngelet sidoqoftë i fortë perceptimi për ndikimin e lartë edhe të prurjeve informale të valutës.

Të dhënat e Bilancit të Pagesave treguan se deficiti i llogarisë korrente u rrit për tremujorin e dytë të vitit, me 19% me bazë vjetore, por, për të gjithë 6-mujorin 2025, ai ngeli në rënie, 3.1% më pak krahasuar me të njëjtën periudhë të vitit të kaluar.

As blerjet e vazhdueshme të valutës nga Banka e Shqipërisë nuk e kanë frenuar dot rënien e mëtejshme të Euros. Vitin e kaluar, Banka e Shqipërisë bleu 933 milionë euro, ndërsa sipas deklaratave të Guvernatorit Sejko në Kuvendin e Shqipërisë, për nëntë muajt e parë të këtij vitit blerjet kanë arritur në rreth 800 milionë euro.

Këto shifra tregojnë qartë për ofertën e lartë të Euros në tregun valutor. Në mungesë të blerjeve të Bankës së Shqipërisë, kursi i këmbimit të monedhës europiane do të ishte në nivele edhe më të ulëta.

Paralelisht, rënia e Euros dhe forcimi i monedhës vendase në vitet e fundit është ndikuar paralelisht edhe nga politika fiskale më shtrënguese, me ulje të deficitit buxhetor dhe të borxhit publik.

Për të tretin vit radhazi, balanca buxhetore po qëndron pozitive në pjesën më të madhe të vitit. Mbështetur në të dhënat e Ministrisë së Financave, në fund të 9-mujorit 2025 suficiti buxhetor kishte vlerën e 47.1 miliardë lekëve. Megjithatë, suficiti paraqitet në nivele më të ulëta krahasuar me të njëjtën periudhë të një viti më parë, në rënie me 32%.

Zhvlerësimi i Euros bën më të lirë importin e mallrave dhe shërbimeve dhe vlerësohet se ka qenë një ndër faktorët që ka përcaktuar nivelet e ulëta të inflacionit në dy vitet e fundit. Por, nga ana tjetër, rënia e Euros ndikon negativisht eksportet e mallrave dhe shërbimeve shqiptare dhe ul konkurrueshmërinë e tyre./Monitor

Gjykata Penale e Tiranës ka shpallur fajtore aktoren Egla Ceno për veprën penale të “Shpifjes”, duke e dënuar me një gjobë prej 1 milion lekësh të vjetra.

Egla Ceno, fituese e edicionit të fundit të “Big Brother VIP”, kishte deklaruar gjatë një emisioni televiziv se ishte ngacmuar seksualisht nga një moderator televiziv, duke përmendur mbiemrin “Kodra”.

Pas kësaj deklarate, Saimir Kodra reagoi publikisht dhe iu drejtua Gjykatës së Juridiksionit të Përgjithshëm në Tiranë, duke kërkuar shpalljen fajtore të aktores për dëmtim të imazhit dhe reputacionit të tij.

Gjatë procesit gjyqësor, Egla Ceno paraqiti disa versione mbrojtjeje. Fillimisht, ajo deklaroi se kishte frikë të paraqitej në gjykatë. Më pas, tha se nuk e kishte përmendur emrin e plotë të moderatorit, duke u justifikuar se kishte thënë vetëm mbiemrin “Kodra”.

Në një seancë tjetër, ajo ndryshoi sërish qëndrim, duke pohuar se deklaratat e saj kishin karakter simbolik dhe nuk kishin të bënin personalisht me Saimir Kodrën.

Gjykata vlerësoi se deklaratat e Egla Cenos përbënin shpifje dhe dëm të padrejtë ndaj figurës publike të moderatorit, duke vendosur dënimin me gjobë.

Polonia e ka paralajmëruar presidentin rus Vladimir Putin, se nuk mund të fluturojë nëpër hapësirën ajrore polake për të takuar Donald Trump në Budapest, sepse në atë rast autoritetet polake mund të detyrohen të ekzekutojnë urdhrin e arrestit të lëshuar kundër tij nga Gjykata Ndërkombëtare Penale e Hagës.

Gjykata Ndërkombëtare me seli në Hagë, lëshoi ​​një urdhër-arresti kundër presidentit rus në vitin 2023, për rrëmbimin e qindra fëmijëve nga Ukraina dhe transferimin e tyre në Rusi. Moska nuk e njeh Gjykatën Ndërkombëtare Penale dhe juridiksionin e saj dhe i mohon akuzat.

“Nuk mund të garantoj që një gjykatë e pavarur polake nuk do ta urdhërojë qeverinë të detyrojë aeroplanin të ulet me qëllim që të dorëzojë të dyshuarin në gjykatën e Hagës”, tha ministri i Jashtëm polak Radoslaw Sikorski, për “Radio Rodzina”.

Urdhër-arresti ndërkombëtar i GJND-së i detyron gjykatat e shteteve anëtare të vazhdojnë me arrestimin e Putinit nëse ai shkel në territorin e tyre.

“Unë besoj se pala ruse është në dijeni të kësaj. Dhe, si pasojë, nëse ky samit do të zhvillohet, shpresoj me pjesëmarrjen e viktimës së sulmit, aeroplani do të përdorë një rrugë tjetër”, shpjegoi Sikorski.

Hungaria, kryeministri i së cilës mban marrëdhënie të mira me Putinin, ka thënë se do të sigurojë që presidenti rus të mund të hyjë dhe të dalë nga vendi. Megjithatë, nëse dëshiron të shmangë hapësirën ajrore ukrainase, delegacioni rus do të detyrohet të kalojë nëpër hapësirën ajrore të të paktën një vendi të Bashkimit Evropian.

Të gjitha vendet e Bashkimit Evropian janë anëtare të Gjykatës Ndërkombëtare Penale. Hungaria në veçanti është në proces tërheqjeje.

Greqia është tronditur sot nga një krim i rëndë në familje, ku djali 18-vjeçar mbyti me peshqir nënën e tij teksa shihnin së bashku televizor, në Trikala të Larisës.

Policia arrestoi adoleshentin që i telefonoi vetë për krimin, duke rrëfyer edhe ngjarjen në zonën e Flamoulit.

Pasi kreu aktin e tij të tmerrshëm dhe në gjendje të qetë, 18-vjeçari telefonoi policinë, tha se vrau nënën e tij dhe qëndroi brenda në shtëpinë e tij duke pritur që policia ta arrestonte.

I riu, në një gjendje plotësisht të qetë psikologjike, foli me policinë dhe përshkroi arsyet që e çuan në këtë akt.

“Gjithmonë kam dashur ta vras ??nënën time, sepse ajo nuk më kushtonte vëmendje, debatonte me mua dhe kishte shumë lidhje”, i ka thënë ai hetuesve.

Me këto fjalë, 18-vjeçari nga Trikala i përshkroi policisë, sipas informacioneve nga “Protothema”, edhe arsyet që e çuan sot në vrasjen e nënës së tij, e cila dyshohet se ishte divorcuar nga babai i tij.

Në fakt, pretendohet se nënë e bir kanë pasur grindje të shpeshta, megjithëse sot nuk ishin grindur dhe të dy thjesht po shikonin televizor.

“Pa ndodhur asgjë mes nesh, u ngrita, vendosa, mora peshqirin e saj, ia vura rreth qafës, e mbyta dhe e vrava”, thuhet se i tha 18-vjeçari policisë.

Trupi i gruas do të transferohet në shërbimin mjeko-ligjor të Larisës për të kryer autopsinë.

Moderatorja Arbana Osmani ka shkaktuar një valë të fortë kritikash në rrjetet sociale, pasi njoftoi se i ftuari i radhës në emisionin e saj “Mirëmbrëma Yje” do të jetë reperi Fero, i cili njihet për akuzat e rënda për dhunë ndaj ish-partneres, Arbenita Ismajli.

Ky reagim negativ është i dyti për këtë sezon, pasi Arbana u kritikua ashpër edhe kur ftoi në emision Princ Lekën, pas skandalit në pallatin Mbretëror dhe aludimeve për tradhti ndaj ish-bashkëshortes, Elia Zaharia.

Shkak i shpërthimit të fundit të ndjekësve është Fero, i cili u denoncua në Polici nga Arbenita pas ndarjes dhe është akuzuar publikisht në rrjetet sociale për dhunë, çka i ka ndaluar edhe takimin me vajzën.

Edhe pse Fero në emision synon të rrëfejë versionin e tij mbi ngjarjen, ndjekësit e konsiderojnë dhënien e hapësirës televizive si promovim të dhunës.

Komentet në rrjet ishin të shumta dhe të ashpra. Disa prej tyre ishin: “Tmerr, dhunuesit i jepet hapësirë publike,” “E paske vendos këtë vit të promovosh tradhtarët dhe dhunuesit,” dhe “Arbana paska marrë listën e dhunuesve në polici dhe paska vendose me i intervistu.”

Një tjetër shkruante: “Bravo, ashtu, vazhdoni promovoni dhunues,” dhe “Sezoni i parë ishte për t’u argëtuar, i dyti për gjyqle publike.” Ky zemërim i publikut tregon qartë se zgjedhjet e Arbanës po ndikojnë te perceptimi i formatit të saj.

Me rishikimin e fundit të buxhetit të shtetit qeveria ka vendosur që të rrisë fondet për shpërblimin e fundvitetit për pensionistët.

Nga 37.5 milionë euro që ishte parashikuar fondi për shpërblimin e fundvitit në buxhetin fillestar, vlera është rritur në 97 milionë euro.

“Shpërblimi i fundvitit për pensionistët, i cili në vijimësi ka shënuar si rritje të frekuencës, si edhe një trend rritës të masës së përfitimit, ka gjithmonë në fokus përmirësimin e nivelit të plotësimit të nevojave të kategorisë vulnerabël të pensionistëve, duke krijuar një siguri në pritshmëritë e kësaj shtrese prej rreth 756 mijë pensionistësh, krahas një besimi të shtuar të tyre për një qasje të vëmendshme dhe suportuese nga ana e qeverisë”, thuhet në relacion.

Bonusi i fundvitit edhe për këtë vit pritet të jetë i ndarë, pensionistët që marrin deri në 20 mijë lekë në muaj të marrin më shumë, dhe kush merr mbi këtë vlerë të ketë bonus më të ulët.

Një 26-vjeçar nga Tropoja është zhdukur në rrethana misterioze, ndërsa kishte dalë ditën e hënë me nënën e tij për të mbledhur gështenja në mal.

Ata kanë qenë në zonën e Kamenicës, në Bajram Curri, kur i riu është larguar dhe ka humbur kontaktet me nënën e tij.

Kallëzimi për zhdukjen është bërë këtë të martë në Komisariatin e Policisë së Tropojës nga familjarët e 26-vjeçarit F. T., banues në Bajram Curri.

Shërbimet e Policisë, në bashkëpunim me autoritetet e Kosovës, ekipin e kërkim-shpëtimit dhe banorët e zonës, po vijojnë kontrollet intensive në terren, nga toka dhe me dronë, për gjetjen e tij.

Në panelin e organizuar nga Chatham House me temën “Ballkani Perëndimor dhe Bashkimi Europian”, Kryeministri Edi Rama u përgjigj edhe një pyetje nga një i ri shqiptar, duke adresuar sfidat dhe mundësitë që lidhen me emigracionin dhe rolin e diasporës për Shqipërinë.

Duke iu drejtuar të rinjve shqiptarë që ndjekin arsimin në Britani, Rama theksoi se fakti që ata zgjedhin të ndjekin rrugën e tyre jashtë vendit nuk është humbje për Shqipërinë, por përfitim. “Nuk e shoh këtë si humbje për vendin tonë, por si përfitim,” u shpreh Rama. Ai shtoi se në kohën moderne, nuk jetojmë më në një botë me kufij të ndarë dhe qëndrime të thjeshta, por në një realitet me lidhje dhe lëvizje të shumta midis vendeve.

Kryeministri vuri në dukje se brenda vetë Britanisë ekzistojnë qytete të vogla që janë boshatisur nga të rinjtë, të cilët kërkojnë mundësi më të mira në metropolet si Londra. “Nuk ka një çelës magjik për ta kthyer situatën mbrapsht, as një shkop magjik për ta bërë Shqipërinë vendin ideal si Londra apo Parisi. Është një proces,” tha Rama, duke nënvizuar rëndësinë e krijimit të mundësive dhe përmirësimit të cilësisë së jetës në Shqipëri.

Ai gjithashtu theksoi se përkundër largimeve, janë edhe më shumë njerëz që po kthehen në Shqipëri në krahasim me pesë vite më parë, por sfida mbetet që të përmirësohet niveli i pagave dhe mundësitë për të rinjtë në vend.

Rama përmendi edhe komunitetin shqiptar në Britani, duke thënë: “Komuniteti ynë i shqiptarëve këtu po i jep shumë Britanisë, saqë politikanët britanikë që etiketojnë shqiptarët ta mbyllin gojën, ta mbyllin atë dreq goje dhe mos i përmendin për asgjë veçse pozitive, kushdo që i prek duhet ta mbyllë atë dreq goje, përveç meje që duhet të them diçka, por s’po i prek”.

Ai theksoi se “varkat e vogla kanë sjellë shumë njerëz me ëndrra dhe ambicie, dhe që i bëjnë nder shoqërisë britanike”.