Author: admin

Kryeministri Edi Rama mbajti fjalën sot në Kuvendin e Shqipërisë ku me krenari iu drejtua socialistëve por dhe demokratëve, duke vënë në pah rolin e vendit tonë të vogël në arenën ndërkombëtare.

Ndonëse akuzat e opozitës dhe “mllefi” i derdhur mbi të vijoi edhe përgjatë kësaj seanca, kreu i qeverisë shqiptare nuk nguroi t’i vinte në dukje ecurinë dhe përparimin që Shqipëria ka dhe bëri me dije se javën e ardhshme ai vetë do të marrë fjalën në Kuvendin e Izraelit, ashtu sikurse Donald Trump e mbajti disa javë më parë.

“Në mbyllje dua t’ju informoj se të hënën e ardhshme do të kemi një nder të jashtëzakonshëm: do t’i drejtohem Parlamentit të Izraelit si Kryeministër i Shqipërisë, në të njëjtin format që ju rezervua para disa kohësh Presidentit të SHBA Donald Trump. Privilegj që më është bërë mua dhe kësaj shumice qeverisëse për të folur në atë Kuvend”, tha kreu i qeverisë shqiptare, duke vijuar më tej me “talljen” ndaj Partisë Demokratike dhe liderin e kësja force politike, Sali Berishën.

Pjesë nga fjala e Ramës:

Një kokë e madhe nga radhët tuaja tha se 2 milionë palestinezë do të vendoseshin te kampusi i Universitetit “Aleksandër Moisiu”. Luli iku, por 7 herë 7 mbeti. Tani çoheni SPAK dhe kërkojini menjëherë urgjent atyre që paguajnë në Amerikë. Ai Latifi si është, Latif magjistari që e keni, mos e lëshoni atë, se ai ua merr humbjen fitimtarëve si me magji dhe ua bën më të madhe. Të gjitha këto denoncimet t’ia çojë kongresmenit, çojani Latifit dhe thuajini ta këndojë ai kongresmeni dhe ta merrni ju këtu dhe të thoni Kongresi Amerikan. Kongresmeni dhe Kongresi Amerikan kanë aq lidhje sa kishin amendamentet e Ndocës me PS. Mos e lini pas dore atë punën e “non grata”-s për mua në asnjë mënyrë, se siç ju kanë dalë të tëra fjalët, do ju dalë dhe fjala për “non grata”-n.

Por, e tha sot dikush. Rama po mbledh parlamentin se ka një ngërç. Ngërçi është se në Parlamentin e Shqipërisë ka vetëm një kuotë për “non grata” dhe ajo është e dhënë, është e zënë me meritë. Ai që ka marrë “non grata”-n e ka marrë me meritë. Ju do ju dalë fjala që “non grata” do hiqet në mars të 2025 dhe pavarësisht se është 2026 ju vazhdoni se në mars të 2025 do ta hiqni. Dy fjalët janë mbivendosur. Keni mbivendosur fjalët “do hiqet” dhe “do vihet” dhe vallah ai që e ka marrë atë kuotë, ai është i paarritshëm në të gjitha poshtërsitë, ligësitë që i ka bërë popullit shqiptar. Zor shumë se lëviz ajo kuotë.

Në mbyllje dua t’ju informoj se të hënën e ardhshme do të kemi një nder të jashtëzakonshëm: do t’i drejtohem Parlamentit të Izraelit si Kryeministër i Shqipërisë, në të njëjtin format që ju rezervua para disa kohësh Presidentit të SHBA Donald Trump. Privilegj që më është bërë mua dhe kësaj shumice qeverisëse për të folur në atë Kuvend.

Por duke qenë se lista është vërtet e shkurtër dhe kundërshtarët e bordit sapo e përfunduan numërimin, jo janë gjithë vendet, jo s’është ky, s’është ai, thuhet se numrat flasin ndonjë gjë të madhe për një vend si yni, duke u përpjekur t’u thënë shqiptarëve që prania në Bordin e Paqes ishte mekanike dhe s’kishte vlerë, dua të nënvizoj se për Shqipërinë, për mua dhe për ne konsiderohet nder çdo ftesë që nuk u bëhet të gjitha shteteve të botës, sepse ne nuk jemi as kërthiza e botës dhe as ndonjë vend me fuqi të spikatur ushtarake, por një vend i vogël që u vetëzhduk nga harta e botës për 50 vjet dhe kur e hapi derën u keqtrajtua nga jashtë dhe brenda, duke u tërhequr zvarrë sa në rrënoja piramidash, sa në duart e atyre që e keqqeverisën dhe pasqyrat e ndërkombëtarëve që u hodhën nën kurriz shqiptarëve plot gurë të pamerituar, një vend që askush, përveç meje dhe një grushti njerëzish që besuan, as nuk e imagjinuan dot që do të ngjitej këtu ku është sot. Doni ju apo s’doni ju, dhe ju na duheni këtu për t’u kujtuar shqiptarëve atë ishullin e turpit, ndërsa ne jemi këtu për të ngjitur shqiptarët në atë majën e Shqipërisë në 2023.

Ana Veizi, vajza e protestuesit të vrarë që është shpallur Dëshmor i Atdheut, Ziver Veizi, ka reaguar pas deklaratave të bëra dje nga avokati Kujtim Cakrani. Mbrojtësi ligjor i Ilir Metës është shprehur në ekran se Ziver Veizi ishte hajdut dhe u soll qëllimisht nga Greqia që të binte dëshmor.

Ajo thotë se Cakrani ka kaluar çdo limit duke e konsideruar si të pavërtetë deklaratën se babai i saju kishte precedentë penalë në Greqi dhe se ishte sjellë në Shqipëri për të nxitur trazira.

“I ashtuquajturi avokat, z. Cakrani, nuk e di sesi mund të kalojë çdo lloj limiti dhe të shpikë në një formë të tillë. Dua t’ju sqaroj ju, si emisioni Off The Record, se është e vërtetë që im atë ka ardhur nga Greqia enkas për protestën, por ai nuk ka qenë atje sepse ishte i dënuar, por sepse kishte shkuar te motra e tij, halla ime, e cila jeton atje, për një vizitë, pasi nuk ka qenë në gjendje të mirë shëndetësore.

Unë kam qenë 11 vjeç, vëllai im 14, dhe jemi takuar vazhdimisht me babanë tonë, i cili ka jetuar në Gjirokastër dhe nuk ka pasur probleme të tilla, siç i shpik avokati pas 15 vitesh. Ky është një sqarim që unë, si vajza e tij, e ndiej të nevojshëm ta bëj. Sa i përket avokatit, besoj se shumë shpejt do të shihemi me të në gjykatë për shpifje…”, shprehet Ana Veizi.

Në emisionin Off The Record me Andrea Dangllin, në A2 CNN, avokati Kujtim Cakrani pretendoi se Veizi ishte dënuar për vjedhje dhe se vendimi ishte dhënë nga gjyqtari Gramoz Levanai gjatë kohës kur ushtronte detyrën në Gjirokastër.

“Ishte një kryengritje e armatosur për të rrëzuar rendin Kushtetues, donin një 97 të dytë. Ziver Veizi, i ndjerë tashmë, kishte 20 vite që nuk vinte në Shqipëri, sepse ishte dënuar me vendim të formës së prerëse i vidhte grave unazat.

Pyesni gjykatësin Gramoz Levanai, që e ka dënuar kur ishte gjyqtar në Gjirokastër. Nuk vinte, erdhi apostafat nga Greqia vetëm për protestën.

Unë mbaj përgjegjësi për ato që them. Ky ishte kontingjenti që ishte në atë protestë. Kaq është e gjithë historia, duhet hetuar që nga fillimi. Ishte krim shtetëror se opozita ishte shtet, mos abuzoni me vendimin e gjykatës europiane”, është shprehur ai.

Botuesi dhe gazetari i njohur Filip Çakuli i ka dërguar një pyetje direkte mbrëmjen e sotme Sali Berishës, e cila ka shkaktuar të qeshura në studion e emisionit “Opinion”, me liderin demokrat që e mori me sportivitet dhe këtë e transmetoi dhe përmes ekranit.

“Nëse Edi Rama është Ramaduro, kreu i narkoshtetit, i mafias, etj, si e lejon Amerika që familjarët e tij ta takojnë? Ajo është vajza e Presidenti Donald Trump…”, thuhej ndër të tjera në pyetjen që gazetari i dërgoi moderatorit Blendi Fevziu dhe ai ia lexoi Sali Berishës.

E menjëhhershme ishte dhe përgjigja e ish-kryeministrit, i cili pasi pyeti dy herë Fevziun dhe u sigurua që e kishte dëgjuar mirë emrin e dërguesit të mesazhit, u shpreh:

“Filip, po ç’të shtyn ty të bëhesh avokati i Edi Ramës?! Si mund të më bësh ti mua një pyetje publike për avokatinë e Edi Ramës?!”

Kjo përgjigje shkaktoi të qeshura në studio dhe vetë lideri demokrat ju drejtua Filip Çakulit me një pyetje retorike, e cila është në qendër të diskurtsit publik të opozitës: “Pse ka katër muaj që nuk vjen asnjë mesazh tjetër nga Qeveria amerikane për kartelet e drogës?!”

Kujtojmë se Sali Berisha dhe botuesi Filip Çakuli kanë një histori të gjatë përplasjesh. Me urdhër të tij, kur ishte President, siç ka pohuar gazetari Mero Baze, botuesi Filip Çakuli është arrestuar nga operativët e SHIK-ut të kohës dhe u mbajt 24 orë në qeli për një karikaturë.

Ngjarja ka ndodhur në Maj 1995, 30 vite më parë, dhe organizatat ndërkombëtare i bën thirrje Shqipërisë që të lironte nga qelia botuesin e revistës “Hosteni”. Të nesërmen, Filip Çakuli u la i lirë.

Një ngjarje e rëndë ka ndodhur këtë të enjte në kryeqytet, dyshohet se një 30-vjeçare është vetëhedhur nga kati i tretë i një pallati.

Sipas njoftimit të policisë, ngjarja ka ndodhur në rrugën “Ilia Dilo Sheperi”, ku shtetasja E. Sh., 30 vjeçe, është vetëhedhur nga kati i tretë i pallatit.

Si pasoje e plagëve të marra ajo ka ndërruar jetë në vendngjarje.

Familjarët e viktimës janë shprehur se ajo vuante nga depresioni.

Njoftimi i policisë

Dyshohet se është vetëhedhur nga kati i tretë i një pallati në rrugën “Ilia Dilo Sheperi”, shtetasja E. Sh., 30 vjeçe, e cila si pasojë ka humbur jetën.

Familjarët e saj kanë deklaruar se vuante nga depresioni.

Në Davos po diskutohet për të ardhmen e Groenlandës dhe të botës, por në fjalimin e tij të gjatë, Donald Trump gjeti kohë të komentojë edhe pamjen e re të presidentit francez, Emmanuel Macron.

“E dëgjova dje teksa fliste me ato syzet e bukura të diellit. Çfarë ka ndodhur? E pashë duke u shtirur si i fortë”, tha Trump.

Syzet që Macron mban prej rreth një jave, për shkak të një hemorragjie nënkonjuktivale, një shqetësim jo serioz shëndetësor kanë tërhequr vëmendje të madhe publike. Kjo vëmendje ka qenë e favorshme për sipërmarrësin italian Stefano Fulchir, pronar i kompanisë iVision Tech, e cila në vitin 2023 bleu shtëpinë franceze të syzeve Henry Jullien. Kjo kompani prodhon në Lons-le-Saunier (rajoni Jura) modelin Pacific S01, me çmim 659 euro.

“Zakonisht prodhojmë rreth njëqind palë syze Pacific në vit, por me këtë ekspozim mediatik rrezikojmë të duhet të prodhojmë deri në një mijë, sepse tani të gjithë duan të blejnë të njëjtin model”, tha Fulchir për radion RTL.

Ai shtoi se kompania ishte veçanërisht e emocionuar nga ky interes, pasi presidenti Macron kishte porositur syze edhe më herët. “Në vitin 2024 ai bëri një porosi për t’ia dhuruar një ministri dhe më pas vendosi të merrte një palë edhe për vete. Presidenti këmbënguli që syzet të ishin tërësisht të punuara me dorë në Francë dhe nuk pranoi t’ia dhuronim, dëshironte t’i blinte vetë”, theksoi Fulchir.

Nuk bëhet fjalë, pra, siç u mendua fillimisht, për modelin Ray-Ban Aviator të njohur nga filmi Top Gun, i veshur nga aktori Tom Cruise. Shtëpia Henry Jullien publikoi në Instagram një foto të Macronit në Davos, duke sqaruar se ‘modeli Pacific S01 vjen nga koleksioni prestigjioz Doublè Or. Korniza metalike me ngjyrë argjendi kombinohet në mënyrë perfekte me lentet blu, duke krijuar një ekuilibër ideal mes modernitetit dhe finesës’.

Një javë më parë, Macron e trajtoi me humor problemin me syrin, duke thënë se do të zgjasë për ca kohë dhe se “syri i tigrit”, si në filmin Rocky, është shenjë e vendosmërisë së Francës.

Tensionet mes njeriut më të pasur në botë, Elon Musk, dhe drejtuesit të Ryanair, Michael O’Leary, kanë shpërthyer për shkak të një konflikti mbi mundësinë e instalimit të terminaleve Starlink në avionët e kompanisë.

Në një intervistë, O’Leary u shpreh: “Mos i kushtoni asnjë vëmendje Elon Musk. Ai është një idiot, dhe nuk kupton asgjë nga fluturimet dhe rezistenca aerodinamike. Antena do të na kushtonte 250 milionë dollarë në vit vetëm për penalitete karburanti. Pasagjerët tanë nuk do ta paguanin atë”.

Reagimi i Musk nuk vonoi. Ai në platformën X e quajti O’Leary “plotësisht idiot”. Më pas, llogaria zyrtare e Ryanair në X ironizoi duke pyetur Musk nëse ka “nevojë për Wi-Fi” pas një ndërprerjeje shërbimi.

Në përgjigje, Musk hapi një sondazh mbi mundësinë e blerjes së Ryanair. Megjithatë, një operacion i tillë nuk do të ishte i lehtë dhe ndoshta do të kushtonte më shumë se blerja e Twitter.

Vlera e Ryanair llogaritet rreth 20 miliardë euro, dhe një ofertë armiqësore do të përfshinte një shtesë prej 30-50 për qind mbi këtë vlerë.

Për më tepër, rregullat e Bashkimit Europian kërkojnë që kompanitë ajrore europiane të jenë të kontrolluara të paktën 50 për qind nga individë dhe entitete brenda BE-së.

Bes Kallaku duket se po jeton një kapitull të ri në jetën e tij sentimentale dhe këtë herë ka zgjedhur ta ndajë hapur me publikun.

Aktori i humorit, i cili prej kohësh ka qenë në fokus për jetën private, ka dhënë së fundmi një sinjal të fortë se është i dashuruar dhe më i lumtur se kurrë.

Përmes një InstaStory që ka marrë vëmendje të madhe, Besi publikoi një foto ku shihen dy duar të shtrënguara, një imazh i thjeshtë në pamje të parë, por me një simbolikë të fortë.

Ajo që bie menjëherë në sy është tatuazhi në parakrahun e tij, ku lexohet emri “Ejona”, i shoqëruar nga data “25.12.2025”, një ditë që duket se ka një domethënie të veçantë për çiftin. Në sfond dëgjohej kënga “I’ll Love You Forever”, duke e përforcuar edhe më shumë mesazhin romantik.

Nën emër dhe datë, aktori ka shtuar edhe një frazë poetike: “Trëndafil në kohë lufte”, një dedikim që lë të kuptohet se kjo dashuri ka lindur dhe është forcuar mes periudhash të vështira apo ndryshimesh të mëdha në jetën e tij.

Sipas burimeve për “Prive by Liberta Spahiu”, kjo romancë nuk është e re.

Bes Kallaku dhe partnerja e tij kanë disa muaj që janë në një lidhje të qëndrueshme, por kanë preferuar ta mbajnë larg vëmendjes së publikut deri tani.

Ashtu siç e deklaroi sot paradite, kryetari i Partisë Demokratike Sali Berisha e ritheksoi se është pro investimit në ishullin e Sazanit.

Ai kujtoi në emisionin “Opinion” marrëveshjen e tij të dikurshme me ish-kryeministrin italian Silvio Berlusconi, për një projekt që do të zhvillonte ishullin. Por, ky i fundit nuk arriti të realizohej.

Berisha: Zvërneci është investim kryekëput privat. Unë dhe ju, asnjëri nga ne s’ka parë një dokument që është tokë publike e dhënë. Atëherë si mund të jem unë kur ka ujdi të plotë mes privatëve?! Janë të mirëpritur!

Vijmë te Sazani, është tokë publike, nuk ka pronar. Sazani ka një histori, e vërteta është se i ndjeri Fatos Nano…

-Edhe më herët, Ilir Meta kur ka qenë kryeministër, u ngrit ideja e një rrjeti kazinosh, projekti i parë është në vitin 2000…

Berisha: Unë bisedova me Berlusconi-n, në atë kohë zhvillimi i Sazanit ishte i komplikuar, edhe sot nuk është i thjeshtë, dy pëllëmbë plazh ka apo s’ka. Silvio u interesua shumë, bëri projektin, mirëpo erdhi kriza financiare e 2008-ës, atij i ranë aksionet dhe projekti mbeti. Si mund ta kundërshtoj unë në një kohë kur unë vetë isha përpjekur që të jepej për zhvillim?!

Personalisht nuk do ngrihesha në protestë teksa unë e kam dhënë atë një herë, tani nuk mund të hiqem si ai që nuk jam! Ka një specifikë, nuk kam parë deri sot biznesmen të ofrojë investim 2 miliard euro!

Megjithatë, akuzoi kryeministrin Edi Rama, se “u ka dhënë biznesmenëve shqiptarë toka shumë herë më të çmuara se Sazani”.

Luksemburgu ka hyrë në histori duke u bërë vendi i parë në botë që ofron transport publik falas në shkallë kombëtare. Që nga rrugët urbane më të frekuentuara deri te zonat piktoreske rurale, banorët, udhëtarët ditorë dhe turistët mund të udhëtojnë pa pagesë me autobusë, tramvaje dhe trena të klasit të dytë në të gjithë territorin e vendit.

Kjo nismë konsiderohet një hap revolucionar, që jo vetëm po transformon lëvizjen e përditshme, por po ndryshon rrënjësisht edhe përvojën turistike në Luksemburg.

Reforma historike hyri në fuqi më 1 mars 2020, kur qeveria hoqi tarifat për të gjitha shërbimet e transportit publik brenda vendit. Politika përfshin autobusët, tramvajet dhe trenat e klasit standard, ndërsa përjashton vetëm shërbimet e klasit të parë dhe linjat ndërkombëtare. Për lëvizjet brenda kufijve kombëtarë, udhëtimi është plotësisht falas, pa bileta dhe pa barriera.

Vendimi për transport falas nuk ishte thjesht një masë sociale, por pjesë e një vizioni më të gjerë për një të ardhme më të gjelbër dhe më të aksesueshme. Luksemburgu synon të ulë ndjeshëm trafikun e dendur, një problem i kahershëm në vend, si dhe të reduktojë emetimet e karbonit në përputhje me objektivat ambicioze klimatike. Duke hequr pengesat financiare, qeveria po inkurajon qytetarët dhe vizitorët të zgjedhin transportin publik në vend të automjeteve private.

Për turizmin, kjo politikë ka pasur ndikim të menjëhershëm. Vizitorët mund të eksplorojnë lirshëm atraksionet kulturore dhe natyrore të vendit, pa u shqetësuar për koston e lëvizjes. Nga qendra historike e Luksemburgut, e përfshirë në listën e Trashëgimisë Botërore të UNESCO-s, te fshatrat piktoreske dhe parqet natyrore në veri, transporti falas ka nxitur eksplorimin spontan dhe ka përmirësuar ndjeshëm përvojën turistike.

Një tjetër shtyllë kryesore e kësaj nisme është ndikimi mjedisor. Duke e bërë transportin publik zgjedhjen më të lehtë dhe më tërheqëse, Luksemburgu synon të ulë ndotjen e ajrit dhe emetimet nga automjetet private.

Kjo masë është pjesë e një strategjie më të gjerë për të arritur neutralitetin klimatik deri në vitin 2050, e cila përfshin edhe investime në autobusë elektrikë, infrastrukturë për biçikleta dhe zgjidhje të tjera të qëndrueshme të mobilitetit.

Autoritetet kanë theksuar se skema e transportit falas do të vazhdojë të përmirësohet. Planet për të ardhmen përfshijnë rritjen e frekuencës së shërbimeve, modernizimin e infrastrukturës dhe integrimin e mëtejshëm të mjeteve ekologjike të transportit, për të krijuar një sistem sa më efikas dhe funksional.

Modeli i Luksemburgut ka tërhequr vëmendjen ndërkombëtare dhe po shihet si burim frymëzimi për vende të tjera. Ndërsa disa qytete evropiane kanë aplikuar transport falas në nivel lokal, Luksemburgu mbetet i pari që e ka zbatuar këtë politikë në shkallë kombëtare. Ky hap e pozicionon vendin si lider global në politikat e transportit të qëndrueshëm dhe turizmit të gjelbër.

Moti i keq që goditi Ano Glyfadan në Greqi shkaktoi përmbytje të mëdha, duke kthyer rrugët e zonës në lumenj të furishëm. Në këto kushte, një incident dramatik ka ndodhur, ku një grua u shpëtua në minutën e fundit nga dy burra që rrezikuan jetën për ta nxjerrë nga ujërat e rrëmbyeshëm.

Sipas dëshmive dhe videove të publikuara në mediat greke, gruaja po përpiqej të kalonte një rrugë të mbushur me ujë kur nivel i tij u rrit papritur dhe kërcënonte ta merrte me vete. Dy burra që ishin pranë ranë menjëherë në ujë dhe arritën ta tërhiqnin atë në vend të sigurt. Për fat të mirë, gruaja shpëtoi, falë veprimit të shpejtë të dy burrave, të cilët rrezikuan jetën e tyre për ta shpëtuar.

Ndërkohë, disa blloqe më larg një tjetër grua u rrëmbye nga uji dhe humbi jetën. Ky rast tronditi banorët e zonës dhe i dha një dimension të ri dramës që po shkaktonin shiu dhe erërat e forta.

Përveç përmbytjeve, moti i keq ka shkaktuar dëme të shumta, me makina, koshat e plehrave dhe objekte të tjera që janë marrë nga rrjedha e ujit, duke e bërë lëvizjen e këmbësorëve dhe shoferëve shumë të rrezikshme. Imazhet e publikuara nga mediat tregojnë makina që rrëshqasin dhe godasin objekte të tjera, duke shtuar frikën e qytetarëve.

Autoritetet kanë paralajmëruar banorët që të shmangin lëvizjet në zona të përmbytura dhe të jenë shumë të kujdesshëm, pasi moti i keq pritet të vazhdojë të shkaktojë probleme në zonë.

VIDEO