Category: Lajme

Në shumë raste faktet e dokumentuara rreth shqiptarëve ndër shekuj janë lexuar subjektivisht nga historianët grekë. Edhe pse mbetet i ndikuar nga nacionalizmi i zakonshëm i historianëve grekë, Dhimitri Bethanis pranon se ilirët janë të lashtë, po aq sa grekë”>grekët. Një fakt i pakundërshtueshëm historik, por i pranuar hapur nga një historian grek, përbën risi.

Në kundërshtim nga historianët e tjerë grekë ai e sheh figurën e Skënderbeut si shqiptare, duke dalluar elementin përbashkues të heroit tonë kombëtar. Sipas historianit, Skënderbeu bashkoi grekë”>grekët e shqiptarët kundër armikut të përbashkët, Turqisë.
Bethanis thekson idenë që Shqipëria dhe Greqia përgjatë gjithë historisë kanë qenë vende vllazërore, ndërsa shprehet se janë disa historianë të paditur shqiptarë dhe grekë që po krijojnë armiqësi të kota.

Sipas tij, ilirët janë të lashtë dhe gjuha shqipe është më e vjetër se latinishtja, por ai sajon disa ura komunikimi, kur komenton alfabetin. Ai shprehet se shqiptarët nuk kanë pasur alfabet dhe deri në krijimin e alfabetit që njohim sot, kanë përdorur shkronjat greke. Por, kjo ka gjasë të jetë e pavërtetë. Nëse i referohemi teorisë së Aristidh Kolës që thotë se “shtrati iliro-helen është i përbashkët, ai pellazgjik”, mund të dalë e vërtetë e kundërta, pra që alfabeti grek të jetë pellazg, pse jo ilir.

Megjithatë dokumentet për të faktuar njërën apo tjetrën tezë, nuk ka si gjenden në thellësi të kohëve mijëra vjet të lashta.
Historiani grek, Dhimitri Bethanis flet edhe për elemente të tjera përbashkuese mes Greqisë e Shqipërisë, të cilat edhe pse janë të rreme nuk vënë në dyshim faktin më të rëndësishëm historik, që edhe Bethanis thekson në këtë material: Ilirët janë popull i lashtë.

Një video e akademikes greke, Helene Glykatzi-Ahrweiler është bërë virale në rrjetet sociale. Videoja është përhapur gjerësisht, për shkak se Glykatzi-Ahrweiler shprehet se në vitin 1831, në Athinë ekzistonin vetëm 8000 shtëpi, shumica prej tyre ishin shqiptare. Kjo deklaratë e saj hapi jo pak debate në rrjete sociale, duke zgjuar kështu edhe reagime të shumta nga qytetarët grekë në faqet e ndryshme në internet, ku kjo video është publikuar.

“Greqia nuk ekzistonte, kështu që për të ngushëlluar veten, çfarë bënë ata? Pikërisht! 8000 shtëpi në Athinë në vitin 1831, gjysma e tyre pa çati. Dhe shumica prej tyre u përkisnin shqiptarëve. Fjalori i parë shqip greqisht u krijua nga Botsaris (Boçari) (Gjeneral dhe hero i Luftës së Pavarësisë Greke). “Botsaris krijoi fjalorin e parë shqip – greqisht sepse të gjithë ushtarët e tij ishin shqiptarë”, është shprehur akademikja.

Helene Glykatzi-Ahrweiler është sot 94 vjeçe. Akademikja greke, që ia ka kushtuar një pjesë të jetës studimeve mbi Bizantin, ka qenë gruaja e parë, që ka drejtuar Universitetin e Sorbonës. Gjithashtu, ajo ka qenë edhe drejtuese në Universitetin e Europës dhe presidente e Bordit në Qendrën Kulturore Europiane në Delfi.

Çamët dhe arvanitasit që jetojnë në Greqi përbëjnë një komunitet prej afro 3 milionë banorësh, ndonëse sot jo të gjithë flasin shqip. Çfarë zbuluan dhe dokumentuan priftërinjtë arbëreshë Antonio Belushi dhe Jani Kapareli nga viti 1965 deri në 1995. Rrënjët arbërore që zgjaten deri në Athinë dhe represioni i autoriteteve greke në vite

DOKUMENTI

Recensioni i prof. Peter Priftit (1924-2010) mbi veprën “Kërkime dhe studime ndër arbërorët e Helladhës – prej rrënjës arbëreshe në Itali në mëmëzën arbërore në Helladhë”*. Vepër e Papa Andon Bellushit, botuar me 1994

Faksimile e kopertinës së librit të Antonio Bellusci-it “Ricerche e studi tra gli arberori dell’ Ellade – Da radici arbëreshe in Italia a matrici arberore in Grecia (Kërkime dhe studime ndër arbërorët e Greqisë – prej rrënjës arbëreshe në Itali në mëmëzën arbërore në Greqi)

Në ditët tona vëmendja e botës shqiptare është përqendruar me të drejtë në çështjen e madhe të Kosovës. Ajo përbën sot fushën më të madhe të luftës për liri nga një zgjedhë e rëndë, për pavarësi dhe për bashkimin eventual të të gjithë trojeve shqiptare. Shkurt, është çështja kyç që i jep formë dhe frymë çastit historik para të cilit gjendet sot bota shqiptare.

Megjithatë, shqiptarët një sy dhe një vesh e kanë patur gjithmonë në drejtim të shqiptarëve të Greqisë. Në një mënyrë ose tjetër, janë interesuar për fatin e vëllezërve dhe motrave çame, si edhe për gjendjen e shqiptarëve të vjetër, që u vendosën gati kudo në Greqi që në kohët e lashta të mesjetës.

Një nga këta shqiptarë është prifti i njohur arbëresh, Andon Bellushi (Papa Antonio Bellusci). Të parët e tij, ashtu si të parët e shumicës së arbëreshëve, emigruan nga Greqia që në kohën e Skënderbeut, në vitin 1434. U larguan që të mos binin në duart e shkelësve turq. U larguan me lot në sy që të ruanin mënyrën e jetës së tyre, gjuhën shqipe dhe çdo gjë të shtrenjtë, të trashëguar brez pas brezi nga gjyshët dhe stërgjyshët e tyre.

MALLI PËR MORENË

I nxitur nga një mall i papërshkrueshëm për vendin e prejardhjes, për Morenë e bukur, papa Bellushi udhëtoi në Greqi për të parën herë në vitin 1965. Ai udhëtoi atje jo vetëm si një “pilgrim” i përmalluar, por edhe si njeri i shkencës, si etnograf i pasionuar për të mbledhur folklorin e “arbërorëve”, sikundër quhen zakonisht shqiptarët e Greqisë. (Një tjetër emër për ta është “arvanitë”). Pas vizitës së parë, ai u kthye herë pas here në Greqi, për të vazhduar dhe rafinuar punën e nisur.

Ky libër: “Kërkime dhe studime ndër arbërorët e Helladhës”, është fryti i asaj pune të madhe. Në këtë vëllim Bellushi vë në dukje lidhjen e ngushtë që ekziston midis arbëreshëve dhe arbërorëve. Në një takim me arbërorët në Tebë më 1990, ai tha: “Ne flasim ashtu si flisni ju këtu… Kemi gjuhën tuaj, zemrën tuaj. Kemi ritin (fenë) tuaj. Kemi emrin tuaj.” (f.173) Kënga e Moresë, ka thënë Bellushi, “mbajti të gjallë në zemrat tona nostalgjinë për Morenë”. Këtë ndjenjë e ka shprehur bukur edhe peshkopi arbëresh Ercole Lupinacci me fjalët: “E kemi pasur gjithmonë këtë dëshirë të fortë, të njihemi me Dheun e gjyshëve, që i kujtojmë me mall në këngët tona popullore.” (f.101) Lidhja me shqiptarët e Greqisë duket në emrat e vendeve (toponimet) dhe fshatrave të arbëreshëve, në emrat e tyre personale, në shërbesat fetare, dhe, mbi të gjitha, në mënyrën e të folurit, në gjuhën e tyre të përditshme. Nga bisedat që pati autori me arbërorët, bëhet e qartë se shqiptarët e Greqisë dhe ata të Italisë nuk kanë aspak vështirësi për t’u marrë vesh, për të komunikuar me njëri-tjetrin, sepse të dyja palët flasin të njëjtin dialekt – një toskërishte të vjetër. (Është një dialekt ky që tingëllon disi arkaik në veshin e folësit të shqipes moderne). Të bëjnë përshtypje takimet dhe bisedat shumë të ngrohta që pati Bellushi me arbërorët. Ai u prit me plot përzemërsi dhe u nderua si vëlla sepse – siç u shpreh historiani arbëror, Aristidhis Kolljas – ai dhe arbërorët hodhën “urën midis Greqisë dhe Italisë që të gjejë vëllai vëllanë”. (f.92)

ARRITJET E PUNËS ME ARBËRORËT NË GREQI

Duke filluar nga viti 1965, autori i kësaj vepre “fotografoi” gjuhën dhe zakonet e arbërorëve me kujdesin dhe ndërgjegjen e shkencëtarit, duke i inçizuar me trak. Gjatë afro 30 vjetëve ai mblodhi një thesar të dhënash mbi historinë dhe folklorin e arbërorëve: përralla, legjenda, fjalë të urta, mallkime, këngë dhe bisedime – trashëgim kulturor ky i ruajtur shekuj me radhë. Regjistrimet e bisedave dhe këngëve përbëjnë material të pastër etnografik, sepse Bellushi i la njerëzit të flisnin dhe të këndonin shqipen që dinin. Pra, i mori ato dhe i botoi në këtë libër ashtu siç ia dëgjoi veshi, pa i korrigjuar, pa i ndryshuar.

Ja, disa nga rezultatet e punës së palodhur që bëri në Greqi. Sa shqiptarë ka në Greqi, nuk dihet saktësisht. Po një arbëror i shkolluar në Athinë i tha autorit se në Greqi ka 3 milionë “arvanitë”, veçse jo të gjithë flasin shqip. (f.59) Libri ka një listë të gjatë të krahinave dhe fshatrave ku banojnë arbërorët – 696 fshatra në nja 15 krahina. Në këtë listë gjen emra fshatrash si Qiuteza, Vithkuqi, Blushi, Matranga, Variboba, Dara, që dëshmojnë për lidhjet e tyre me fshatrat e Shqipërisë, si edhe me emra të njohur të arbëreshëve në Itali.

Bellushi u njoh mirë me kulturën e lashtë të arbërorëve. Besa e shqiptarit, thotë ai, rron në trojet e shqiptarëve të Greqisë. Ata krenohen me këtë kryevirtyt të racës shqiptare, të cilën e shprehin me frazën, “arvanit-besalith”. Ne “nuk themi fjalë në erë”, i tha një arvanit papa Bellushit. (f.135) Për të zbuluar botën e tyre të përditshme në mënyrë më të imtë, Bellushi i pyeti arbërorët për gjërat më të thjeshta. “Si e bëni bukën, djathin? Si i punoni vreshtat? Si i rrjepni dhitë? Si i ruani bagëtitë nga ujqit?” Pastaj pyet çfarë zogj kanë andej, si u thonë maleve që kanë afër, cilët janë katundet arbërore rreth e përqark? I pyet, gjithashtu, të recitojnë numrat (l,2,3…), ditët e javës dhe muajt e vitit. Përgjigjet që mori ishin pothuaj të njëjta nga një krahinë te tjetra, gjë që tregon se në thelb kultura e shqiptarëve në Greqi është e njëjtë kudo. Autori mblodhi me qindra këngë, shumica e të cilave bëjnë fjalë për dashurinë. Ja, disa radhë të shkëputura nga këto këngë:

Eja të të puth një herë,
Tani që kam pirë verë.
Prapa malit kam një pus,
Eja vashë të të puth.
Prapa malit kam shtëpinë,
Eja vashëzë të rrimë.

Libri hedh dritë edhe mbi figurat arbërore që i kanë bërë shërbime të çmuara popullit shqiptar në Greqi, burra si: I ndjeri Jorgo Marougas, redaktor i shquar i revistës “Dialogoi”, Aristidhis Koljas, autori i librit “Arvanites” (1983), veprës kryesore për njohjen e arbërorëve, Vangjelis Ljapis, folklorist, autor dhe avokat për mbrojtjen e të drejtave të arvanitëve; dr. Jorgo Haxhisotiriov, i njohur si mjek në Athinë, si shkencëtar dhe si mbledhës i folklorit arbëror. Ka edhe të tjerë.

GJENDJA E GJUHËS SHQIPE

Arbërorët janë krenarë për gjuhën e tyre. Një nga këngët që këndojnë në krahinën e Korintit thotë:

Kjo gjuhë arbërishte
Është gjuhë trimërishte.
E fliste Admiral Miaulli,
Boçari dhe gjithë Suli (f.327)

Nga intervistat e shumta që pati autori me arbërorët, bëhet e qartë se ata e duan gjuhën shqipe me zemër, dhe kënaqen kur flasin shqip. Prandaj kanë merak ta ruajnë dhe t’ua lënë trashëgim fëmijëve. Ky merak duket edhe në ndonjë këngë të tyre, si, p.sh. në radhët: “Arvanitete të këndomi/ Gluhenë të mos harromi”. Papa Bellushi pyeti herë pas here kudo që vajti: “Do të rrojë gjuha arbërore?” “Nuk e di,-iu përgjegj një burrë,-sepse është një gjuhë që nuk mësohet në shkollë dhe nuk shkruhet”. Dhe vërtet bisedat e Bellushit me arbërorët zbuluan një konflikt midis atyre që duan ta ruajnë gjuhën me çdo kusht, dhe atyre që preferojnë greqishten, sepse ajo shkruhet. Po në përgjithësi ata kanë besim në të ardhmen e gjuhës. Kanë po ato ndjenja që shfaqi një plak nga Korinthi kur tha: “Unë kam tri vasha me shkollë. Po kur më vinë këtu në shtëpi, flasin arbërisht. Greqishten nuk e flasim neve këtu”. (f.349)

Gjatë gjithë udhëtimeve që bëri në Greqi, meraku më i madh i papa Bellushit ishte për gjuhën shqipe, por edhe për kulturën e arbërorëve, dhe me të drejtë, sepse nga të gjitha anët ai dëgjoi ankime për grekët. Grekët nuk lejojnë hapjen e shkollave shqipe. Nuk i lejojnë shqiptarët as të këndojnë këngët e tyre. “S’kemi mundësi të shkruajmë gjuhën tonë,” thotë arbërori. “S’kemi botime, as fetare, as popullore, as letrare. S’na lejojnë… Jemi si një trup pa shpirt”. (f.426) “Këtu gjuha jonë flitet vetëm midis mureve të shtëpive. Ajo s’ka banesë as në liturgji, as në shkollë, as në shtyp, askund”. Kështu foli plaku 72- vjeçar Dhimitri Gonos në More. (f.419) Priftërinjtë i ndalojnë fëmijët arbërorë të flasin shqip, se “është e mallkuar”. Një burrë i tha Bellushit se kur ishte djalë i vogël në shkollë, mësuesi i rrihte nxënësit shqiptarë po të thonin ndonjë fjalë shqip, dhe i detyronte të shkruanin ato fjalë njëqind herë në dërrasën e zezë. (f.233)

Grekët i shohin shqiptarët si vllehë, d.m.th. pa rrënjë, pa shtëpi, pa tokën e tyre, sikur ata nuk ekzistojnë si popull me kombësinë e vet. Edhe emrat shqip të fshatrave të tyre nuk i durojnë, dhe i kanë ndryshuar e u kanë vënë emra greke. (Megjithatë, populli vazhdon të përdorë emrat e tyre të vjetër shqip). Thonë se shqiptarët nuk ekzistojnë fare. Përgjigjen shqiptarët: “Një e rremë e madhe! Në Korinth, në Beoci, në Atika, në Eube, në Argolidhë, në More, në Thebe arbërorët i gjen si milingonat nga të gjitha anët”. (f.426)

Arbërorët e dinë mirë rolin e shqiptarëve në Revolucionin për Pavarësinë e Greqisë. “Greqinë e kanë ngjallur arbërorët”, thonë ata me këmbëngulje. Por kjo e vërtetë historike nuk u bën përshtypje grekëve. Ata e mohojnë kombësinë shqiptare të herojve të revolucionit grek si Boçari, Miaulli, Xhavella, Kollokotroni, etj. duke thënë se ata ishin grekë që kishin mësuar të flisnin shqip!! Më e keqja është se ka edhe arbërorë që s’duan të thonë se janë shqiptarë. E mohojnë kombësinë e tyre dhe zemërohen po t’ua kujtosh.

UDHËTIM NË MORE MË 1970

Me interes të veçantë është udhëtimi që bëri Bellushi në More më 1970, i shoqëruar nga prifti arbëresh Jani Kaparelli. Përshkrimi i këtij udhëtimi përbën një dokument me vlerë të rrallë. Në hapësirën e gati 20 faqeve, (409-427), autori shkruan për mallin e pafund që kanë arbëreshët për Morenë, sepse, sikurse thotë ai, arbërorët e Moresë dhe arbëreshët “janë lidhur ngushtë nga historia, nga gjuha e nga besa… Jemi si mish e thua”. Ai bën fjalë për takimet e ngrohta bisedat e përzemërta, këngët që kënduan së bashku me shqiptarët e Moresë, të cilat mishëronin gëzimin e tyre të përbashkët, hidhërimin, vajtimin, besën, mundimet, dhe afërsitë shpirtërore që kanë njohur gjatë shekujve.

Pastaj shkruan për prelatin simpatik grek të Moresë, dhespot Stefanos i cili, ndryshe nga qëndrimi zyrtar i grekëve, i mirëpriti arbëreshët dhe tha me gojën e tij se, “këtu janë shumë katunde arbërore”. (f.415) Madje, ai lëshoi një kartë, të hartuar në formën e një “leje” për vizitorët, ku ai përmendte me emër fshatrat e Moresë që donin të vizitonin Bellushi dhe Kaperelli.

“Ky është i pari dokument grek”, thotë Bellushi, “ku shkruhet se në More gjenden edhe sot katunde arbërore!” Dhe si i tillë “ka një rëndësi historike të madhe”. (f.416)

Me gjithë gjendjen e rëndë të arbërorëve që gjeti autori në Greqi, për shkak të shtypjes së gjuhës dhe kulturës së tyre, ai nuk u dekurajua, nuk u dorëzua. I mbrujtur me ndjenja të thella atdhedashurie dhe i nxitur nga një mall përvëlues historik (që buron nga thellësia e shekujve), papa Bellushi, më se fundi, del fitues si etnograf, si shërbëtor i urtë i Zotit dhe si burrë i Besës shqiptare. Ai e afirmon vetveten si optimist për të ardhmen e shqiptarëve të Greqisë. Shpirti i Arbërit rron, thotë Bellushi, “i freskët, i gjallë, i thjeshtë”. Rron në këngët arbërore rron dhe do të rrojë, se “ajo ka rrënjë të thella”, dhe “flitet nga të mëdhenjtë e nga të vegjlit”. (f.424)

Arben Llalla

Në vitin 1937, Hasan Tahsin Pasha zhvarroset dhe eshtrat e tij u varrosën për herë të dytë në varrezat e shqiptarëve në Selanik, në varrin familjar Mesarea. Pasi u prishën varrezat shqiptare më 1983, përsëri zhvarroset dhe rivarroset në varrezat e Malakopit, ku eshtrat qëndruan 23 vite. Në tokat ku gjendeshin varrezat e shqiptarëve në Selanik u ndërtuan pallate, rrugë e një pjesë mbeti lulishte dhe njihet me emrin Parku Triandhria.

Më 2006, eshtrat e Hasan Tahsin Pashës do të zhvarrosen për të tretën herë për t’u rivarrosur me nderime të larta ushtarake bashkë me eshtrat e djalit të tij, Qenanit, në Muzeun e Luftërave Ballkanike që ndodhet 25 kilometra larg Selanikut në drejtim të qytetit të Edesës. Ndërtes që është kthyer në Muze, ka shërbyer për bisedime midis gjeneral Mesaresë dhe komandantit të Ushtrisë greke, Kostandinit, nga 25-26 Tetori 1912.

Hasan Tahsin Pashë Mesarea kishte shtatë fëmijë, prej të cilëve vetëm tre jetuan: dy djem dhe një vajzë. Njëri nga djemtë e tij, Qemal Mesarea, ka qenë ambasador i Shqipërisë në Athinë më 1933-1934. Ai u martua me një greke dhe vdiq në vitin 1968. Vajza e vetme u martua në Turqi. Kurse, djali tjetër i Hasan Tahsin Pashës quhej Qenan Mesarea (1889-1965). Gjenerali Hasan Mesarea ka shërbyer si komandant i përgjithshëm i trupave osmane në Jemen, Siri, Irak, Qipro, Kretë dhe në Selanik. Gjatë kohës që ka shërbyer në Kretë ai lidhi miqësi me Venizelon, i cili pas dhurimit pa luftë të qytetit të Selanikut e ndihmoi më vonë familjen Mesarea që të largohej për në Francë dhe të fitonte shtetësinë greke. H

asan Tahsi Mesarea i përket ajkës së shqiptarëve që kanë studiuar në shkollën e mesme Zosimea të Janinës. Siç dihet, në këtë gjimnaz kanë ndjekur mësimet Konstadin Kristoforidhi, Ismail Qemali, Hoxhë Hasan Tahsimi, Ali Asllani, Abedin Pash Dino, Naim dhe Sami Frashëri, Sali Nivica, Aleksandër Xhuvani, etj.

Historia e Hasan Tahsin Mesarea është një nga historitë e shumta të ushtarakëve shqiptarë që i kanë shërbyer ushtrive të huaja. Rrugëtimi i Hasan Tahsin Mesaresë nisi në vitin 1845, në fshatin Mesarea, në Jugun e Shqipërisë (Mesare ndodhet në rrethin e Kolonjës) dhe përfundoi më 2006, në Veriun e Greqisë, në qytetin e Selanikut. Historianët grekë çlirim e Selanikut ia dedikojnë komandanti të ushtrisë greke, Konstandin apo Venizelosit, por këto merita janë të pavlera përpara aktit human të gjeneralit Mesaresë i cili preferoi më mirë dorëzimin me nder se sa të derdhej gjaku lum. Në çastin e dhurimit të Selanikut, gjeneral Mesarea kishte 26 mijë ushtarë nën komandë dhe preferoi më mirë tu shpëtonte jetën se sa të vriteshin.

Pas luftimeve të gjata midis forcave turke dhe forcave të ushtrisë greke në Greqinë e Veriut, u arrit armëpushimi. Gjenerali turk me kombësi shqiptare, Hasan Tahsin Pasha, në 26 tetor 1912 kishte firmosur dhurimin e qytetit grekëve dhe po përgatitej të largohej bashkë me Ushtrinë për në Turqi. Më 27 tetor, të dërguarit e kryegjeneralit të Ushtrisë bullgare Teodorov, duke mbajtur flamurin e bardhë u takuan me gjeneral Hasan Tahsin. Bullgarët përfaqësoheshin nga një kolonel, dy oficerë dhe kapiteni Standov që më pas u bë ambasador i Bullgarisë në Paris. Gjatë bisedës, kapiten Standovi shprehu befasinë dhe pakënaqësinë për dorëzimin e Selanikut grekëve, pasi siç tha ai, Ushtria bullgare kishte hyrë duke luftuar disa herë në Selanik. Prandaj, gëzonte të drejtën që të marrë në dorëzim në emër të naltmadhnisë së tij, Carit të Bullgarisë. Por, gjeneral Hasan Tahsini u kujtoi bullgarëve që Ushtria turke kishte pasur kundërshtar lufte për Selanikun vetëm Ushtrinë greke.

Koloneli kryetar i përfaqësueses bullgare, mbas këtyre fjalëve u përgjigj me tërbim se para pak orëve Ushtria bullgare kishte luftuar kundra Ushtrisë turke në rrethinat e Selanikut. Prandaj, duhej të përgatitej menjëherë një shkresë e posaçme, sipas të cilës qyteti i Selanikut i dorëzohej Ushtrisë bullgare. Ndonëse tashmë i mundur, gjenerali Hasan Tahsin Pasha me kryelartësi tha se jo. Atëherë, me diplomaci ndërhyri kapiten Standovi për të qetësuar përshtypjen e keqe që kishte lënë koloneli bullgar, duke thënë që mbas një përgjigje pozitive për bullgarët, Hasan Tahsin Pasha do të vlerësohej nga kryegjenerali Todorov dhe Ushtria e tij.

Pas dy orë bisedime, pa bindur gjeneral Tahsinin, Standovi shprehu dëshirë të bisedonte vetëm për vetëm me djalin e gjeneralit, adjutantin Qenan Mesarea. Pasi kaluan në një sallë veçmas, Standovi nxori nga çanta e tij një çek të një banke londineze me një shumë marramendëse, që ia dha adjutant Mesarea duke pëshpëritur se çeku ishte shpërblimi për një firmë të thjeshtë të babait të tij. Në atë çast Qenan Mesarea mbeti i hutuar dhe u kthye në zyrë duke refuzuar shpërblimin. Pasi dështuan kërcënimet dhe shpërblimet e ndryshme, përfaqësuesit bullgarë kërkuan që gjeneral Hasan Tahsin Pasha t’u jepte një kopje të protokollit të dorëzimit të Selanikut forcave të Ushtrisë greke. Pasi morën kopjen e protokollit të dorëzimit të qytetit të Selanikut forcave greke, përfaqësuesit e Ushtrisë bullgare u larguan për të mos u kthyer më kurrë.

UGSH reagon ndaj vendimit të autoriteteve kufitare greke për shpalljen e gazetarit Artan Hoxha si person i padëshirueshëm, pasi Greqia në mënyrë absurde ka shtuar numrin e masave të njëjta ndaj gazetarëve shqiptarë.

Unioni i Gazetarëve Shqiptarë kërkon reagimin e shtetit shqiptar dhe organizatave ndërkombëtare të lirive themelore.

Tiranë 24.11.2025

Përmes një dokumenti të firmosur dhe vulosur nga autoritetet e kontrollit kufitar, në pikën e kalimit në Kakavie, gazetarit investigativ Artan Hoxha i është konfirmuar urdhri i shpalljes si person i padëshiruar në Greqi.

Arsyeja e konfirmuar në dy gjuhë, në letrën që i është dhënë gazetarit është shprehur të jetë se:

“Cënon sigurinë e brendshme të BE-së (ose të një shteti të vetëm të BE-së)”.

Asnjë sqarim tjetër specifik nuk i është komunikuar gazetarit të shpallur si person i padëshirueshëm dhe me rrezikshmëri për shtetin grek. Gazetari Hoxha nuk ka pasur dhe nuk ka qenë asnjëherë në ndjekje penale apo me probleme ligjore në këtë shtet, apo në ndonjë gjykatë të vendeve të BE.

Kjo është një masë ekstreme, por që shton numrin e gazetarëve shqiptarë të ndaluar të shkelin në teritorin e Republikës së Greqisë. Prej shumë vitesh një masë e tillë është shpallur për gazetarin e njohur Marin Mema. Sikundër njëjtë i është komunikuar urdhëri edhe Enrik Mehmetit.

Ndërkohë që kohë pas kohe gazetarë të ndryshëm janë penguar dhe mbajtur në seanca intervistimesh nga punonjës të policisë dhe shërbimeve greke në pikat kufitare dhe ato aeroportuale të shtetit fqinj, pa u dhënë arsye zyrtare të pengimit apo vonesës për kalim kufitar.

Unioni i Gazetarëve Shqiptarë prej vitesh ka ripërsëritur kërkesat për dhënien e arsyes zyrtare ndaj këtyre masave ekstreme ndaj gazetarëve shqiptarë. UGSH u është drejtuar për solidaritet dhe reagime organizatave ndërkombëtare të gazetarëve si dhe institucioneve diplomatike.

Eshtë momenti që për këto raste të shtuara, Ministria jonë për Europën dhe Punët e Jashtme të  kërkojë shpjegime dhe të aktivizojë mekanizmat e veta paritare, duke kërkuar shpjegime dhe mundësisht të ofrojë mbështetje për proceset e ndjekjes së çështjeve në rrugë ligjore.

UGSH shpreh dyshimin se segmente dhe individë të ekstremizmit politik dhe nacionalist në Greqi ndikojnë mbi struktura të shërbimeve dhe policisë greke për hartim listash të gazetarëve shqiptarë, që mbrojnë dhe raportojnë për të vërteta historike të shqiptarëve në Greqi  dhe për afera dhe kriminalitet politik të homogjenëve grekë të shndërruar në shtetas grekë pas viteve ‘90-të.

Aktet e ndalimit dhe të shpalljes së gazetarëve si persona të rrezikshëm dhe të padëshirueshëm, nga shtete fqinje si Greqia, janë precedentë të rrezikshëm dhe sjellje kundër lirisë së qarkullimit, shprehjes së lirë dhe raportimit mediatik.

Zyra Informuese

Unioni i Gazetarëve Shqiptarë

Autoritetet greke kanë shpallur “non grata” gazetarin investigativ Artan Hoxha, duke e cilësuar si person të padëshirueshëm dhe kërcënim për rendin publik. Me këtë vendim, Hoxhës i ndalohet hyrja në Greqi për një periudhë të pacaktuar.

Ngjarja ndodhi një ditë më parë, teksa gazetari po udhëtonte drejt Janinës dhe u ndalua nga policia kufitare greke në pikën e Kakavijës.

Në sportelin e kontrollit të pasaportave, autoritetet greke e informuan se nuk mund të hynte në territorin e tyre, pasi konsiderohej rrezik për rendin publik dhe sigurinë e brendshme. Pas ndalimit, iu mor pasaporta dhe ai u mbajt për rreth një orë nga policia.

Rreth orës 10:30, Hoxhës iu komunikua vendimi për shpalljen “non grata”, vendim i cili rezulton të jetë marrë që në fillim të vitit 2024. Në dokumentin zyrtar të dorëzuar gazetarit, theksohen dy pika kryesore:

-Ai klasifikohet si person i padëshirueshëm.

-Konsiderohet kërcënim potencial për rendin publik, sigurinë e brendshme, shëndetin publik ose marrëdhëniet ndërkombëtare të një apo disa shteteve të Bashkimit Europian.

Pas këtij komunikimi, autoritetet greke i vendosën kryq me stilolaps vulës së hyrjes në pasaportë dhe i kërkuan të largohej menjëherë nga territori grek.

Vula ne pasaporten e Hoxhes

Ky nuk është rasti i parë kur gazetarë shqiptarë përballen me masa të tilla nga autoritetet helene. Më herët, një vendim i ngjashëm është marrë ndaj gazetarit të Top Channel, Marin Mema. Sipas vëzhguesve, këto masa lidhen me raportimet që prekin çështje të ndjeshme për interesat kombëtare greke.

Vendimi për shpalljen “non grata” ndaj Hoxhës, sipas autoriteteve, lidhet me periudhën e zgjedhjeve për Parlamentin Europian në 2024-ën, kur Fredi Beleri, me shtetësi shqiptare dhe greke, kandidonte për eurodeputet nën siglën e partisë së Mitsotakisit.

Hoxha ka raportuar prej vitesh mbi aktivitetin e Belerit, përfshirë denoncimet për “Masakrën e Peshkëpisë” të vitit 1994, ku u vranë dy Dëshmorë të Atdheut. Për këtë çështje, gazetari është përballur edhe në procese gjyqësore në gjykatat shqiptare gjatë viteve 2023–2024.

Për më shumë se dy dekada, Artan Hoxha ka publikuar qindra investigime në Gazetën Shqiptare dhe News24, lidhur me veprimtari që cënojnë interesat e Shqipërisë: nga skandali i varrezave të ushtarëve grekë në territor shqiptar, tek zhvarrimet e paligjshme në Koshinë dhe një seri e gjatë shkrimesh mbi Masakrën e Peshkëpisë.

Ai ka argumentuar vazhdimisht me dokumente dhe prova se në sulmin e vitit 1994 ishin të përfshirë pjesëtarë të policisë greke dhe anëtarë të organizatës paraushtarake MAVI, mes të cilëve edhe Fredi Beleri.

Në vitin 2018, Hoxha publikoi ekskluzivisht pamjet e ngjarjes së Bularatit, ku tregonte se Konstandinos Kacifas nuk ishte “martir” i simboleve greke, por një person i armatosur që hapi zjarr ndaj policisë.

Ndërsa gjatë fushatës së vitit 2024, ai bashkëpunoi me disa media greke për artikuj që tregonin se si Beleri kishte ndihmuar persona të dënuar apo të kërkuar t’i shpëtonin drejtësisë greke, duke i paraqitur si minoritarë të mbrojtjes së objekteve fetare.

Vendimi i së dielës duket se është kulmi i një tensioni të vjetër mes gazetarit dhe autoriteteve greke, të cilat, pavarësisht statusit të vendit si anëtar i BE-së, vijojnë të ndërmarrin masa të diskutueshme ndaj gazetarëve shqiptarë që ekspozojnë çështje të ndjeshme për Athinën.

Fjoralba Dule, mësuesja nga Korça nuk arriti që të fitonte betejën me kancerin! Pavarësisht forcës që mësuese Fjorin e karakterizonte, dashurisë për jetën, sëmundja e keqe doli e pamëshirshme dhe e shkëputi atë përgjithmonë nga gjiri i ngrohtë i familjes, duke ja hequr kështu mundësinë për të parë duke u rritur dy engjëjt e saj të cilët i donte fort.

Përpos familjarëve, humbja e saj ka lënë në zi të gjithë komunitetin e juglindjes, të cilët patën fatin të njohin një njeri si ajo ishte, plot vlera, gojë ëmbël dhe që gjithmonë dhe kurdoherë ishte aty, për nxënësit e saj.

Në dhimbje të madhe janë dhe kolegët e Fjorit të cilët këtë dhimbje që po ua mban shpirti e kanë shprehur mes rreshtave nëpër rrjetet sociale.

Një prej tyre ka qenë edhe Danjela, kolegia e saj, por dhe mësuesja e birit të Fjoralbës, Gentonit, të cilin e “dogji malli” përgjatë gjithë kësaj kohe kur e ëma ishte duke u kuruar në Stamboll.

“E mira Fjori….Luftove shumë me sëmundjen e rëndë sepse ti ishte plot jetë dhe dashuri. Të jepte forcë të luftoje dashuria dhe meraku për fëmijët e tu të mrekullueshëm. Gentoni dhe ti, kishit shumë mall për njëri-tjetrin dhe herë pas here të dërgonim foto që të çmalleshe sado pak.

Vetëm para pak ditësh në një detyre klase, Gentoni i formoi të gjitha fjalitë rreth teje dhe Pegit. – Të ka marrë malli?- e pyeta. -Po, më tha dhe uli kokën. Qofsh e Parajsës e dashur Fjori! Do të na mungosh të gjithëve”, shkruan ajo.

Fjori, do të kujtohet gjithmonë nga miqtë, të afërmit, familjarët e nxënësit e saj, si një njeri plot dritë e dashuri dhe e përkushtuar në profesionin e saj. Sëmundja e tmerrshme e mposhti, por kujtimi i saj do të jetojë përgjithmonë në zemrat e atyre që e deshën dhe e respektuan.

Presioni diplomatik, negociatat për mandatin e SPAK dhe lëvizjet që po trazojnë mazhorancën socialiste.

Sali Berisha është i vetmi që ka komentuar persiatjen e gjatë të Edi Ramës, duke sjellë modelin e prokurorit amerikan Robert H. Jackson.

Sipas kreut të opozitës, Rama ka tentuar të shantazhojë prokurorët, pasi në qasje kishte një frazë ku e quan një prokuror, vrasës.

Edhe pse i ashpër, qëndrimi i Sali Berishës, fshihte një lloj kënaqësie të dukshme për hyrjen në linjën e hapur të sulmit ndaj SPAK, edhe të kolegut të tij “të dashur-armik”.

Është në stilin e tij që kënaqësinë ta tregojë me një mazokizëm politik që tashmë është kthyer në një model në gjithë politikën shqiptare, veçanërisht në atë që e konsiderojmë “të djathtë”.

Sali Berishës i leverdiste ta kthente këtë çështje në drejtimin që kërkon ai, por e vërteta duket se fle diku tjetër.

Edi Rama, ‘pamfletin’ e tij në lidhje me veprimet e SPAK, nuk e kishte fare me prokurorët që po i mësyjnë qeverinë. Pasi ai e di se çdo aksion ndaj tij nuk është aspak një predhë e dukshme nga topi i Altin Dumanit prej “stacionit të trenit” siç e pëlqen Rama ta quajë. Por një silurë nëndetëseje që urdhrin e goditjes e ka nga larg, po, po nga larg fare. Ekzaktësisht përtej oqeanit, nga një zyrë në Departamentin e Shtetit.

Nga ku, një zyrtar i lartë i tij u dërgua me urgjencë në Shqipëri më 31 tetor dhe nuk e takoi fare Edi Ramën. Por vetëm ministrin e Drejtësisë dhe atë të Brendshëm.

Dhe siç mësohet, Lamallarit i është kërkuar që të mos kryejë asnjë akt që do të pengojë pavarësinë e drejtësisë, e Koçiut, që policia të mos pengojë punën e SPAK, e aq më shumë të bëjë ndonjë shkelje kompetencash, për të cilat do të pendohet rëndë kjo qeveri e kjo mazhorancë.

I përgatitur për lëvizjet e forta nga SHBA, Edi Rama e ka pritur goditjen e radhës, e thjeshtë është në fazat për të negociuar, duke i çuar atyre një mesazh të koduar se si e shikon ai këtë negociatë.

Po për çfarë po negociohet?

Pikërisht për atë që Altin Dumani deklaroi në Parlament; mandatin e dytë 9 vjeçar të prokurorëve të SPAK. Dumani vetë ka ofruar një kompromis, duke mos pranuar më një mandat të dytë, por të qëndrojë sërish prokuror deri në fund të mandatit.

Për ta qartësuar më shumë për opinionin, goditjet e fundit në mazhorancë, nuk duket se janë raste penale të nisura nga investigimet e prokurorëve speciale.  Por akte të qarta e të forta që vijnë nga amerikanët dhe europianët, pikërisht kur mazhoranca e Edi Ramës, refuzoi që të zgjasë mandatin e prokurorëve të SPAK dhe kreut të tij. Një qëndrim që është bërë i qartë në vizitën e Sekretarit Amerikan të Shtetit, Antony Blinken në vitin 2024.

Nuk ndodh zakonisht që një shtet aleat të refuzojë një kërkesë që vjen nga maja e piramidës së administratës amerikane. Por atëherë kur kjo vihet re, kemi të bëjmë me një thyerje, e cila provokon trazira.

Këtë e ka ditur Edi Rama kur u ka thënë amerikanëve JO, ndaj dhe përgjegjësi i kësaj situate kaotike që po ndodh në Shqipëri është vetëm ai. Çdo sulm që i vjen nga SPAK, është mbi të gjitha një pjesë e luftës që kryeministri ka provokuar me amerikanët.

Madje jo vetëm këtu, por edhe pakti që bëri me Sali Berishën para zgjedhjeve për të ndalur zgjatjen e mandatit të SPAK. Ku si pjesë të pazarit i ktheu vulën dhe i jep leje ndërtimi.

Këtë e dinë të gjithë që janë përfshirë në politikën e lartë në vend, përkatësisht deputetë e drejtues, në mazhorancë e në opozitë. Por askush nuk e trajton kështu, duke i bërë një favor të madh Edi Ramës.

Nuk është çudi që këtë “bombë” ta shpërthejë në publik një zë brenda mazhorancës shumë shpejt, natyrisht i nxitur nga amerikanët, të cilët nuk do të rrijnë të heshtur në këtë përplasje politike me Edi Ramën.

Madje ky zë mund të jetë edhe viktimë e egër e kësaj lufte, i cili jo rastësisht këto ditë është përmendur në gazeta të mëdha amerikane si Washington Post apo The New York Times. Nisja e kësaj lufte do ta rrëzojë realisht Edi Ramën, i cili po e shikon se edhe brenda PS-së pozita e tij është blozë, ngaqë kalbësira është kthyer në gangrenë./Pamfleti

Grida Duma dhe Gjergj Luca u ulën ballë për ballë në podkastin e saj në një bisedë pasionante që siç e pranuan të dy, as Grida nuk e kishte përgatitur intervistën, dhe as Luca nuk e dinte se çfarë pyetjesh do të bëheshin, por që të dy ranë dakord se do të flisnin për gjithçka.

Luca padyshim e ngacmoi Grida Dumën mbi largimin e saj nga politika, pse nuk rezistoi aty për të pastruar partinë, e Grida Duma e ngacmoi Lucën pikërisht tek Edi Rama dhe mbrojtja që i bën atij, duke e përmendur shpeshherë në podkast si “byrazeri”.

Po një nga pikat e papritura për drejtuesen e podkastit ishte momenti kur Luca tha se mbështeste të rinjtë e PD, me idenë se ajo parti që sipas Lucës ka qenë e tija, ka nevojë për ripërtëritje. Dhe Luca e ngacmon me Salianjin, në këtë moment, ku edhe pse të dy nuk kanë dalë publikisht, e kanë pranuar bashkëjetesën mes tyre.

Pjesë nga biseda në podkast:

Gjergj Luca: Kam bërë fushatë për Edi Ramën, në gjithë Shqipërinë. Por kudo që ka rënë biseda, në Elbasan, për udhëheqësin politik të Elbasanit, u kam thënë: Dëgjoni këtu, ky është familje e madhe, i djathtë në gen, ju ka ardh një çun i mirë. Eshtë një çun pa mllefe. Eshtë cun qytetar. Kudo e kam thënë edhe përpara mediave.

Grida Duma: Më tremb shumë kjo mua…

Gjergj Luca: Po pse për Salianjin tat ça kam thënë?

Grida Duma: (Qesh)

Gjergj Luca: Pse qesh?

Grida Duma: Ore nuk më kompromenton dot duke më folur për Salianjin tim…

Gjergj Luca: Pse të kompromentoj, nuk jam tip që kompromentoj njeri…

Grida Duma: Se do dal dhe aty…

Gjergj Luca: Ore për Salianjin tat. Po të bëj muhabet. Unë, ti nuk e di. Unë e du fort. Kam respekt. Pyete. Jam parë gjithmonë mirë me të. E kam ngacmu se unë nuk rri dot, e kam vu aty në Maliq te zona e vet, e kam vu te tabela e emulacionit…

Grida Duma: E ke vënë edhe atë?

Gjergj Luca: E kam vu aty…

Grida Duma: Po unë nuk jam aty fare?

Gjergj Luca: Jooo, po ti je te zemra ime se je grintë!

(Qeshin)

Grida Duma: E di ça më tremb mua?

Gjergj Luca: Cfarë të tremb?

Grida Duma: Që jeni kaq të poshtër….

Gjergj Luca: Falemnderit, është kompliment i madh shumë…me të qujt të poshtër sot është kompliment i madh.

Grida Duma: Ti thua që unë bëj fushatë për byrazerin tim…

Gjergj Luca: Patjetër…po ai është lideri im!

Grida Duma: ….por ama thua: unë i mbështes këta të rinjtë këtej se kur hyj te tavolina ime që bëj fushatë për byrazerin tim, them se ky është familje e madhe! Ekzaktësisht këtë bëjnë komunistët Luc…

Gjergj Luca: Po edhe këtë ma the o Grida! Pupupu. Nuk do ta bëj më!

Grida Duma: E kupton, të vrasin natën e të qajnë ditën! Këtej të japin kontributin, këtej të japin shpirtin, se leku sot quhet shpirt…

Gjergj Luca: Mua më njifke pak. Leku për mua ska asnjë vlerë. Dorëzohem përpara teje dhe unë si komunist që jam, kam bërë gjithë Tiranën blu kur s’kishte një njeri të PD. Te Rozafa Palace përnotë, pyeti ish deputetët e asaj kohe, kam bërë mbrëmje me 2-3 mijë vetë. Dhe këta komunistët e tu, ditën që erdhën në pushtet, pas tre muajve më grabitën biznesin. // Të drejtat e pamjeve © Top Channel

Shefi i diplomacisë greke, Giorgos Gerapetritis ka hartuar një plan të ri veprimi për marrëdhëniet me Tiranën zyrtare, plan që do t’ia paraqesë më 16 dhjetor homologes së re shqiptare Elisa Spiropali në të parën vizitë në Athinë.

Në krye të axhendës së takimit të dy Ministrave të Jashtëm në Athinë muajin e ardhshëm do të jetë diskutimi për ndarjen e detit.

Procesi i anëtarësimit të Shqipërisë në BE, marrëdhëniet mes të dyja shteteve fqinjë janë gjithashtu në axhendën e Gerapetritis për takimin e dhjetorit në tokën helene.

Udhërrëfyesi i ri Athinë–Tiranë u hartua sipas mediave greke pas rizgjedhjes së Edi Ramës për një mandat të katërt qeverisës, me premtimin popullor për anëtarësim të vendit të shqiponjave në BE deri në vitin 2030.

Çështja pezull e zonave ekonomike detare në detin Jon greko-shqiptare thuhet se në Athinë po fiton tani një vrull të ri në dritën e lëvizshmërisë më të gjerë në rajon dhe të projekteve të ndryshme të energjisë.

Greqia dhe Shqipëria kishin rënë dakord që në vitin 2020 ta paraqisnin mosmarrëveshjen për delimitimin e ZEE-së në Gjykatën Ndërkombëtare të Drejtësisë në Hagë, por kjo çështje dypalëshe ka mbetur ende pezull.

Shqipëria do të ketë nevojë që të mbështetet te fqinji jugor edhe për faktin se plani i saj për përfundimin e bisedimeve të pranimit në BE deri në vitin 2027, përkon me kohën kur Greqia do të mbajë presidencën e Këshillit Evropian.

Ballkani në fokus të Greqisë

Burime diplomatike kanë folur së fundmi për një “ritëm të jashtëzakonshëm” për sa i përket shpejtësisë me të cilën Shqipëria po përparon në negociatat e saj të pranimit, në një kohë kur vetëm pak ditë më parë BE hapi kapitullin e fundit të pranimit, me Ministrinë e Jashtme të Shqipërisë që arriti qëllimin e “hapjes së plotë deri në vitin 2025”.

Gjatë darkës informale në Bruksel, në të cilën mori pjesë George Gerapetritis në kuadër të Këshillit të Punëve të Jashtme, Ballkani Perëndimor ishte në qendër të diskutimit.

Ministri i Jashtëm grek u paraqiti dje homologëve të tij qëllimin e Athinës për të ndërmarrë, në kuadër të presidencës greke, një iniciativë që do të ketë të bëjë me rrugën evropiane të Ballkanit Perëndimor në lidhje me vizionin që duhet t’u jepet popujve në sfondin e këtij procesi.

Ministria e Jashtme greke, nëpërmjet kreut të diplomacisë greke, e ka bërë të qartë se e konsideron të nevojshme të paraqesë në lidhje me çështjet që secila presidencë vendos në axhendë me Ballkanin Perëndimor në sfondin e situatës jashtëzakonisht komplekse që mbizotëron në rajon për shkak të tensioneve dhe nacionalizmave në rritje.

Gjergj Luca ka thënë se nuk ka marrë nga qeveria e Edi Ramës asnjë lek për investimin e tij. Nëse kjo e bën oligark, atëherë le ta quajnë, por qeverisë i ka paguar sikurse tha “lek më lek”, 1.4 miliardët që i kërkuan për Fish City, edhe pse ai mori ca rrënoja të shkatërruara që nuk e kishin atë vlerë, por që i vlerësuan të tilla pasi e ndërtoi.

Në rrëfimin për Grida Dumën në Podkast ai tregon sesi nga smira Arben Ahmetaj ndërmori “gjobën moderne” ndaj Lucës, duke thënë se ky ishte zhgënjimi më i madh pasi “Fish City” u bë një markë e njohur brenda dhe jashtë vendit.

Pjesë nga biseda në Podkastin e Grida Dumës me Gjergj Lucën:

Gjergj Luca: Kur ka ardh Ed Rama në pushtet, unë e kam takuar afro një vit pas zgjedhjes, kur ai ka pasur 50 vjetorin. Ishin nja tre shokë, isha ul me Netën, me gruan time, pimë nganjë gotë në një lokal, një ambient shumë i vogël edhe e kam takuar Edin pas një viti: dhe më tha si s’erdhe njëherë me më taku! I thashë: ore jam duke punuar, shyqyr që mu hapën rrugët për të punuar, se punoj nga 20 orë në ditë. Ze be në Zot e në kokë të djalit! Po ca do bësh më tha? I thashë atë punë që di me bë. Po ca: se ti ke bërë kazino, tallava, peshk, ca do bësh. I thashë: do merrem me peshk! Po si me peshk më tha. Nuk do kthehesh prapë te historia e kazinove? I thashë: O Ed, ishalla do Zoti ti rri 4 vjet, rri 8 vjet kryeministër! Po ti me mendjen që ke mund të rrish edhe 4 muaj. Dhe unë e di shumë mirë që po të kthehem prapë te kazinotë kur të vijnë këta të tjerët, se e hëngra njëherë më çuan në fund. Dhe nuk ishte puna se më mbyllën kazinotë dhe jetën e natës. Problemi është se pas tre muajve këta njerëz u morën me biznesin e shpirtit tim dhe më mbyllën peshkun. Dhe me peshkun aty mbarova. I thashë më ler të merrem me këtë punë që nuk krijoj xhelozi. Të tjerët kanë ecur shumë përpara meje, kanë kaluar tetë vjet. Dhe unë do merrem me këtë punë që di me bë.

Dhe aty në Elbasan më ka çuar një katunar që kishte një fabrikë peshku në Pogradec. Dhe më ka thënë: ore janë këto që i jepte Saliu me 1 euro. Dhe kam shkuar kam marr një kapanon gjoja me një euro, 1000 metra katrorë. E kam bërë atë mes makinave që ishin të mbarume të shkatërrume. Dhe aty e kam marrë në telefon Ed Ramën dhe i thashë: Unë e bëra kapanonin e parë dhe e futa në punë dhe dua të ftoj gjithë klientët e mi nga Italia, nga Spanja, Suedia, që të vijnë të shohin që unë rifillova punë se më kanë dash e më kanë respektu. Dhe më thotë: patjetër, e kam dhe detyrë që të vij.

Dhe nuk e harroj është futur te kjo rezerva që ka qenë në mes të makinave të sekuestruara nga prokuroria, e pashtruar me pluhur. Unë kisha thërritur nja 11 biznesmenë dhe ata vetë kishin një turnover të gjithë bashkë 5 – 6 miliardë. Dhe jemi futur në bodrum, dhe i thashë: kujdes kokën mos i bish betonit, dhe kisha pikturuar në bodrum ato përrallat e mia të fëmijërisë. Ishte ulur me nja dy deputet, dhe ai ka qenë suporti më i madh që më ka dhënë miku im i fëmijërisë, kryeministri shqiptar, dhe u ul me ata njerëz të fuqishëm bilioner. Dhe ata filluan më dhanë punë, hapësira. Unë i kam pasur miq që erdhën, por kur panë edhe këtë, më dhanë suport. Historitë e tjera janë të ditura: unë nuk kam përfituar një lekë nga kjo qeveri; nuk jam investitor strategjik, kam ikur në katundet më të humbura si në Maliq e Gramsh…

Grida Duma: Oligark je?

Gjergj Luca: Po ca oligarku mi Grida me peshk. Unë tallem me këtë punë. Nëse flitet për një oligark që ka Shqipëria për ti ngrejt reputacionin në të gjithë Evropën e Mesdheun, si një firmë prodhuese që ndeshet dhëmbë për dhëmbë me flotën spanjolle, italiane, turke, franceze dhe krenaria e këtij vendi dhe flamurit shqiptar është ROZAFA. Dhe nëse një njeri që i jep krenari Shqipërisë quhet oligark, atëherë unë jam kryeoligarku i Shqipërisë. Sepse fjala oligark përdoret për njerëzit që i kanë bërë lekët kollaj dhe për njerëzit që kanë marrë benefite prej shtetit.

Grida Duma: Konkurrencë me ty bën dot dikush në fushën e peshkimit?

Gjergj Luca: Atje ku e kemi ne konkurencen quhet det. Dhe në det dalin 300 – 400 anije që ndeshen me njëra tjetrën. Anijet fillojnë nga 25 metra në 50 metra. Ne dalim në det që të gjithë. Dikush për pasion ka investuar në elektronikë. Dikush nuk e ka pasur mundësinë. Unë nuk them se ata që merren me peshkim kanë mundësitë e mia. Se unë jam marrë edhe me biznese të tjera. Pse më thonë mua peshkimin, kur unë jam burri më i suksesshëm në restorant: në restoracionet Made in Albania. Dhe unë turnover që kam nga restorantet e kam të lartë, por nuk mund të jetë më i lartë se peshkimi. Se peshkimi është një det i hapur që ne ndeshemi që të gjithë me një markatë të hapur që është e gjithë bota që ne kemi të drejtë të shesim. Ndërsa restorantet i kam kufizuar në nivelin shqiptar. Tani po filloj të mendoj drejt Europës dhe Amerikës. Dhe Amerika po bë bëhet treg kryesor sepse eksportoj përditë me avion. Dhe atje po filloj të bëj magazinat. Mendoj se do të eci shumë mirë me seafood dhe mendoj se këto produktet e detit që i kemi perfekte për mua është armë e fortë për të hapur bizneset që të investoj në flotë. Po nuk është vetëm kjo, janë fabrikat. Pra unë kam potencial më shumë sesa të tjerët. Por ndihma që më ka dhënë shteti, më beso, ka qenë zero. Madje më ka grabit shteti shqiptar. Po i referohem kësaj partisë tjetër. Kemi pasur një ministër financash që më puthte 12 herë kur më takonte. Dhe unë kenaqesha me thënë të drejtën që e ulte veten në nivelin e tavolinës siç e gjente tavolinën. Dhe ky ministër financash, i shtynte letrat e mia për privatizim sa më shumë se: “e do shumë ai i gjati atje”. Tia shtyjmë. Dhe ky zotnia që më shtynte letrat mua derisa iku nga ministër financash, kur unë kërkoja të privatizoja sepse kisha hedhur gjithë lekët e mia në Elbasan dhe nuk kisha më kapital për të hedhur në treg për të blerë “shrims” (karkalec), dhe për ta blerë atë duheshin 10 a 15 milionë euro garanci, bëj një skandal të madh dhe vijnë për ta privatizuar. Dhe më vënë metrin Grida, te ato godina që ishin të gjitha në tokë, dhe mi masin si godina që ekzistonin më parë. Unë jap një dokumentar: shifini si kanë qenë, dhe si janë bërë dhe pse po i vini metrin. Dhe kur kam shkuar për firmën e privatizimit, po prisnim dy vetë: u ulën përballë meje. Këto godina janë tha me 1100 euro metri katror. Kush godina mor i them unë. Dhe më qisin një preventiv, 1.4 miliardë. Dhe kam bërë skandal në sy të ministres, Anila Denaj: Mua doni me më grabit ju. Unë kam besuar te shteti im. Dhe bëj një turnover që ia kaloj edhe Kurumit me hekur, unë ia kaloj me eksporte. Dhe ju më thoni mua 1.4 miliardë lekë për ato godina që duhet të më kishit dhënë lekë. Kam marrë dhe rezervat e shtetit e kam paguar nja 400 milionë te ministria e mbrojtjes.

Grida Duma: Po pse duhet të të jepnin lekë?

Gjergj Luca: Do vij dhe aty. Më ndihmoi drejtori i bankës dhe i mbarova dhe i kalova ato lekë.

Grida Duma: Dmth i pagove ato lekë?

Gjergj Luca: Lek më lek! I pagova dhe ika në punë timen që ti lija kolateral në bankë dhe të vazhdoja punën. Tani Grida, po si mos të më jepshin lekë këta mua që i mora rezervat e shtetit dhe i investova nga e para? Që mora një vend të mbaruar, një vend kanceri dhe e ktheva në jetë? Dhe erdhën gjithë njerëzit e zonës për të punuar. Dhe shitën lopët nëpër shtëpia dhe punonin gjithë ato gra. E ktheva me kopësht fëmijësh, me kinema, me teater, bënin jetë sociale. Rrinin nëpër shtëpia. Si ky shtet të mos më respektojë. Tani a mund të marrësh një fëmër, 300 vjet copë copë, të thyme e të mbarume, dhe ta bësh një nuse të bukur. Të dashurohen me nusen tatë. Vijnë nga gjithë bota në Fish City dhe dashurohen. Dhe Fish City është kthyer në një monument shqiptar. E kam bërë kaq të lakmueshme.

Grida Duma: Po si ka mundësi që keto njerëz i ka zgjedhur ai dhe kjo është xhelozi?

Gjergj Luca: Jo kjo është smirëzi, ose poshtërsi për ti bërë presion dikujt tjetër të kapë ndonjë gjë.

Grida Duma: Pse nuk pate urrejtje?

Gjergj Luca: Kisha një urrejtje të madhe. Po ka një cak. Unë vija nga Myslym Shyri, ai vinte nga Gjirokastra pas 6 motrave. Ai kishte marrë një dashuri të madhe, unë vija nga rruga. Ishim të ndryshëm. // Të drejtat e pamjeve © Top Channel