Lajme Flesh

Presidenti rus Vladimir Putin tha sot se ai është gati për negociata që synojnë përfundimin e konfliktit të armatosur në Ukrainë.

Por ai hodhi poshtë çdo bisedë me homologun e tij ukrainas Volodymyr Zelensky i cili, siç tha Putin “ndodhet ilegalisht në pushtet”.

Në një intervistë me televizionin rus dhe gazetarin Pavel Zarubin, Putin tha se nuk ka parë vullnet nga Kievi për të negociuar me Moskën për t’i dhënë fund luftës.

Rusia është e hapur për bisedime, por nuk sheh “vullnet” nga ana e Ukrainës, pohoi Vladimir Putin.
Nëse Kievi vendos të negociojë me Moskën, kryetari i parlamentit ukrainas mund ta trajtojë rastin, vuri në dukje presidenti rus.

Presidenti rus vlerësoi gjithashtu se lufta në Ukrainë do të përfundonte “për dy muaj” nëse Kievi nuk do të merrte ndihmë ushtarake nga aleatët e tij perëndimor.

“Luftimet nuk do të zgjasin asnjë muaj nëse mbarojnë paratë dhe municionet. Gjithçka do të përfundonte brenda një muaji e gjysmë apo dy muaj”, tha Putin në një intervistë për televizionin rus.

Euro po fiton terren në kursin e këmbimit me lekun në ditët e fundit të janarit. Sipas kursit zyrtar të këmbimit të Bankës së Shqipërisë, monedha europiane u këmbye me 98.75 lekë, në rritje me 0.55 lekë në harkun e një jave.

Kursi euro-lek ka arritur nivelin më të lartë për vitin 2025 dhe njëkohësisht më të lartin që prej datës 16 tetor të vitit të kaluar.

Sipas agjentëve të këmbimit valutor, rritja e kursit të euros në ditët e fundit ka ardhur kryesisht për shkak të një kërkese në rritje për blerje valute nga shoqëritë tregtare për nevojat e tyre. Në 2-3 vitet e mëparshme bizneset kishin një tendencë të rrisnin kërkesën për blerje valute qysh në fund të dhjetorit, ndoshta edhe si përpjekje për të përfituar nga nivelet e ulëta të kursit.

Kjo përkonte edhe me rritjen e shpenzimeve buxhetore në ditët e fundit të vitit dhe rritjen e ofertës së lekut në treg.

Në dhjetorin e vitit të kaluar një gjë e tillë nuk ndodhi dhe kursi qëndroi në nivele të ulëta, madje Banka e Shqipërisë realizoi blerje me qëllim shmangien e rënies së mëtejshme deri në ditët e fundit të vitit. Me sa duket, këtë vit kërkesa për valutë nga bizneset po shfaqet më e vonuar, në përputhje edhe me ciklin e konsumit në ekonomi dhe rritjen e pritshme të nevojës për importe gjatë muajve në vazhdim.

Pavarësisht rritjes së ditëve të fundit, kursi i euros ngelet në rënie vjetore me afërsisht 5%.

Kursi i këmbimit euro-lek e mbylli vitin 2024 në nivelin 98.15 lekë, shumë afër nivelit minimal historik të të gjitha kohërave, të regjistruar në nëntor 2024. Në javët e para të janarit, kursi u shfaq i qëndrueshëm pranë nivelit të 98.2 lekëve, ndërsa në ditët e fundit po shfaq një tendencë të lehtë në rritje.

Vitin e kaluar kursi mesatar i këmbimit euro-lek pësoi rënie për të katërtin vit radhazi dhe preku një minimum të ri historik. Sipas Bankës së Shqipërisë, euro u këmbye mesatarisht vitin e kaluar me 100.71 lekë, niveli më i ulët i regjistruar ndonjëherë. Kursi mesatar i këmbimit të euros me lekun ka rënë me 7.4% krahasuar me vitin 2023.

Analizat e Bankës së Shqipërisë kanë arritur në përfundimin se rritja e flukseve hyrëse i detyrohet kryesisht rritjes së eksportit të shërbimeve dhe sidomos të turizmit, rritjes së investimeve të huaja, veçanërisht në pasuri të paluajtshme, ndërsa në deklarimet e tij Guvernatori Sejko nuk ka përjashtuar as rolin e prurjeve valutore informale.

Të dhënat e bilancit të pagesave treguan se flukset valutore hyrëse edhe për 2024 kanë qenë të larta, por në tërësi deficiti i llogarisë korrente është rritur krahasuar me vitin 2023.

Për 9-mujorin 2024 pozicioni i jashtëm i ekonomisë rezultoi në deficit, për një vlerë totale prej 230 milionë eurosh. Ky pozicion është përkeqësuar ndjeshëm krahasuar me një vit më parë, me një rritje prej 9.5 herë të deficitit të jashtëm, por sidoqoftë ky deficit ishte në vlerën e dytë më të ulët historike, pas vitit 2023.

Sipas statistikave të Bankës së Shqipërisë, investimet e huaja direkte vazhdojnë të mbulojnë vlerën e deficitit të llogarisë korrente. Për 9-mujorin 2024, vlera progresive e investimeve të huaja direkte arriti në 1.16 miliardë euro, shifër kjo 6.6% më e lartë krahasuar me të njëjtën periudhë të një viti më parë. Nga ana tjetër, edhe politika fiskale ka luajtur një rol shtesë në forcimin e lekut në kursin e këmbimit.

Suficiti buxhetor rekord në pjesë më të madhe të vitit ka ulur ofertën e monedhës vendase dhe ka shtyrë më tej në rënie kursin euro-lek. Sipas të dhënave të Ministrisë së Financave, për 11-mujorin 2024, suficiti buxhetor kishte blerën rekord të 71.7 miliardë lekëve, në rritje me 90% krahasuar me të njëjtën periudhë të një viti më parë./Monitor

Ditën e sotme, emri i Gjestit ka qenë shumë i përmendur në media.

U hodh hipoteza se Gjesti ka qenë ose është i martuar jashtë. Sipas burimeve të ‘Prive’, Gjesti nuk ka qenë asnjëherë i martuar.

Ai ka bashkëjetuar me vajzën e quajtur Diellza prej një kohe të gjatë.

“Gjesti dhe Diellza kanë bashkëjetuar 4 vjet. Ajo është nga Prishtina, por nuk ka të bëjë botën e të famshmëve. Është përpjekur shumë për të mirën e Gjestit, por ai ia ka kthyer shpesh me të keq. Jo, nuk kanë qenë të martuar. Vetëm bashkëjetesë’, u shpreh burimi për Prive.al.

Thuhet se ata kanë qenë bashkë deri para hyrjes së Gjestit në sezonin e tretë të BBVK. Pas grindjeve të vazhdueshme, gjërat mes tyre nuk kanë qenë krejtësisht të mbyllura në raportin mes tyre.

Deputeti demokrat Myslim Murrizi ka sulmuar Adriatik Lapajn dhe Endrit Shabanin, duke i akuzuar si njerëz të përdorur nga George Soros përpara zgjedhjeve të 11 majit.

Sipas tij, Lapaj dhe Shabani janë të kurdisur nga filantropi me ndikim global, kurse për Arlind Qorin ai shprehet se është komunist bio.

“Nga Fondacioni Soros kane lindur dy nga partite e reja qe do ‘bejne’ dhe do ‘thurin’ Shqiperine sipas rrobaqepësit Aleks Soros. Fondacioni Soros mbeshtet, ideon dhe financon partine e Adriatikut dhe te Endrit si dy parti te majta ekstreme qe fillimisht e filluan karrierën si shoqeri e hapur deri ne shqyerje pastaj kaluan tek Aleanca Kuqezi, pastaj ‘ustai’ u dha porosi te krijojne dy parti te ndryshme me nje qellim te vetem qe te mbajne ‘gjalle’ frymen sorrosiane.

Nuk e njoh dhe nuk e paragjykoj Arlind Qorrin qe eshte i MAJTE DHE KOMUNIST BIO, por kur shoh sherret mes tyre kuptoj qe e gjitha eshte lufte per elektoratin e majte se per lgbq jane te urdheruar te ndahen mes ketyre dy subjekteve dhe rilindjes”, shkruan Murrizi.

Lapaj i është kundërpërgjigjur menjëherë Murrizit, duke i replikuar me një koment në postimin e tij në Facebook. Sipas tij, Murrizi shtiret sikur është në betejë politike me socialistët, por në fakt në dy vitet e fundit ka marrë një licencë miniere dhe ka dokumente që e vërtetojnë këtë.

“Une jam avokat, o Myslim. Une mbroj ke te dua. Ky eshte profesioni im. Po ti ne kohen kur je ne lufte me regjimin, si ke arritur te marresh licence miniere?”, komenton Lapaj.

“Thuaji popullit a te ka dhene qeveria Rama nje licence miniere ne 2 vitet e fundit? I kam une dokumentat. Ne fakt kam dokumentat per te gjithe ju. Nese mendoni se me gelltitni kollaj, do bindeni rruges qe me keni nenvleresuar”, shkruan kryetari i Lëvizjes Shqipëria Bëhet më tej në komentin e tij.

Kryeministri Edi Rama në Departamentin e Gazetarisë të Universitetit të Tiranës, ku është investuar në laboratorin e mediave digjitale me teknologjinë më të avancuar, ka zhvilluar një podcast me dy studente, të cilat e kanë pyetur për planet e mbylljes së TikTok

“Mendoj se për momentin nuk kemi një zgjidhje tjetër. Jemi në dialog me Tiktok, me i parashtruar zgjidhjet tona. E mira është se ata nuk kanë qenë refraktarë ndaj këtyre shqetësimeve. Dhe kemi rënë dakord në një kohë të arsyeshme kur ata të jenë gati, do të na paraqesin disa propozim për ti adresuar këto shqetësimi.
Meqë jeni këtu departamenti i gazetarisë dhe jeni rojtarët e gjuhës. Një nga pikat është që Tiktok nuk e ka filtrin për gjuhën shqipe. Dhe kështu nëse një gjuhë tjetër nuk arrin dot fjalët që nuk duhen përdorur që të zënë hapësirën virtuale të TikTok, në shqip duke mos qenë filtra…

Kam përshtypjen se edhe pse është një sfidë të vetme për t’i mundur të rinjtë të këtë fushë, një VPN e një shteti tjetër nuk do ta kenë të lehtë. Megjithatë kurrë mos thuaj kurrë me këtë brez që po na vjen…”, tha Rama.

Një trafikant droge shumë i kërkuar u kap pasi autoritetet gjurmuan llogarinë e mediave sociale të gruas së tij dhe gjetën vendndodhjen gjatë pushimeve luksoze të çiftit në Evropë.

Luis Manuel Picado Grijalba, 43 vjeç, u arrestua në një aeroport të Londrës në dhjetor pasi akuzohej për trafik kokaine nga Kosta Rika në SHBA.

Grijabla kërkohej nga DEA për muaj të tërë për përfshirjen e tij të dyshuar në trafikun ndërkombëtar të drogës, tha Randall Zúniga, drejtori i Departamentit të Hetimeve të Kosta Rikës (OIJ).

Bosi i drogës – i cili rrallë udhëtonte me gruan e tij 32-vjeçare – thuhet se bleu bileta avioni me vlerë 20,000 dollarë për të fluturuar me gruan dhe familjen e tij në Evropë, shkruan NY Post.

Grijabla, i cili është shtetas i natyralizuar i Kosta Rikës, takoi gruan e tij në Paris dhe kishte planifikuar të kalonte Vitin e Ri me familjen e tij në Angli përpara arrestimit.

Për të dokumentuar pushimet, gruaja e Grijablas, Estefania McDonald Rodriguez, bëri disa postime në një llogari tashmë të fshirë në Instagram gjatë udhëtimeve të saj evropiane.

Një postim kapi çiftin duke pozuar nën kullën Eifel në Paris.

Zúniga tha se Rodriguez udhëtonte shpesh jashtë vendit dhe postonte aventurat e saj në mediat sociale.

Agjentët e DEA-s, të cilët kishin gjurmuar Grijablan që kur ai u ngrit nga aeroporti Juan Santamaría i Kosta Rikës, përdorën postimin e çiftit në Paris për të gjeturvendndodhjen e mbretit të dyshuar të drogës.

DEA donte të kapte Grijablan në Evropë në vend të Kosta Rikës, pasi shteti i Amerikës Qendrore ndalon ekstradimin e qytetarëve të tij.

Prokurori i Përgjithshëm i Kosta Rikës, Carlo Diaz, vlerësoi arrestimin e DEA, por vuri në dukje se zyra e tij nuk kishte ngritur asnjë akuzë kundër Grijabla.

Mijëra kanaçe dhe shishe xhami me markën Coca-Cola janë tërhequr nga tregu europian.

Përfaqësuesi i prodhuesit të njohur në Belgjikë ka bërë të ditur se një sasi e madhe produktesh po tërhiqet për shkak të niveleve të larta të kloratit.

Produktet që do të tërhiqen nga tregu përfshijnë Coca-Cola, Sprite, Fanta, Fuze Tea, Minute Maid, Nalu, Royal Bliss dhe Tropico, të cilat janë shpërndarë në Belgjikë, Holandë, Britani të Madhe, Gjermani, Francë dhe Luksemburg që nga muaji nëntor.

Kjo tërheqje ka të bëjë me produktet që kanë një kod prodhimi nga 328GE deri në 338GE, i cili gjendet në fundin e kanaçeve ose në qafën ose etiketën e shisheve të xhamit. Konsumatorëve u kërkohet të mos i konsumojnë këto produkte dhe t’i kthejnë ato në pikat e shitjes për të marrë rimbursim të plotë.

“Edhe pse nuk kemi një numër të saktë, bëhet fjalë për një sasi të konsiderueshme produktesh të tërhequr”, deklaroi Coca-Cola Europacific Partners Belgium për Agjencinë Franceze të Lajmeve (AFP).

“Pjesa më e madhe e produkteve të prekura dhe të pashitura tashmë është larguar nga raftet e dyqaneve, dhe ne po vazhdojmë të marrim masa për të tërhequr nga tregu të gjitha produktet e mbetura, ”shtoi kompania, duke theksuar se është “në kontakt të vazhdueshëm me autoritetet kompetente në secilin prej tregjeve të prekura.”

Klorati, një nënprodukt i klorit, është një substancë dezinfektuese që përdoret për trajtimin e ujit të pijshëm. “Në fabrikën tonë në Gent po kryejmë teste në kuadër të procedurave tona të kontrollit dhe përputhshmërisë me rregulloret. Këto teste kanë zbuluar nivele të larta të kloratit,” ka sqaruar kompania.

Nga Elton Qyno

“Ora News” zbardh të plotë dëshminë e njërit prej punonjësve të policisë “Shqiponja” në Shkodër, i cili ishte i pranishëm në çastet e para pas ndodhjes së masakrës së “Dobraçit”, ku mbetën të vrarë Hamza Lici, Arlind Bushati dhe çifti i bashkëshortëve, Bashkim e Flutura Basha.

Do të duheshin disa minuta dhe konstatimi i vrimave të plumbave në “Benz”-in e zi, për të kuptuar se nuk kishin të bënin me një aksident por me një ngjarje të rëndë kriminale.

“…Në kohën kur ne kishim mbërritur në vendin e ngjarjes i raportoj Sallës së Komandimit DVP-Shkodër se, nuk kemi të bëjmë me një aksident rrugorë por kemi të bëjmë me një ngjarje kriminale me përdorim të armëve të zjarrit…”- ka rrëfyer tek oficerët e AMP-së, Viktor Logu.

Vetëm pak ditë pas ngjarjes, Logu u arrestua nga AMP-ja së bashku me tre kolegët e tij, Julian Stërkaj, Marte Martini dhe Blerim Kurmekaj, pasi nuk kishin kryer veprimin e shoqërimit të personit që dyshohet se ishte i kërkuari, Ibrahim Lici.

Por sipas Viktor Logut, shoqërimi i tij nuk është kryer pasi ai dhe kolegët e tij kishin menduar se ai ishte një person i rastit që po ndihmonte të plagosurit. Logu ka treguar se ky person mund të jetë larguar në këmbë ose me ambulancë.

Logu, ka treguar se në vendngjarje ka pasur dhe persona të tjerë dhe asnjëri prej tyre nuk është shoqëruar, pasi disa minuta më pas ai dhe kolegët e tij, janë zhvendosur nga vendi i ngjarjes për të ngritur një postbllok në dalje të Shkodrës, tek “Kisha e Zojës”.

Situatën në vendngjarje, e ka marrë policia kriminale dhe prokuroria, ndërsa nuk ka asnjë rrethanë se si u largua nga vendngjarja, personi i dyshuar si Ibrahim Lici.

Në dëshminë e tij punonjësi i policisë Shkodër ka treguar se:

“Më 30 tetor 2024, kam qenë i planizuar me shërbim në qytet nga ora 14:00 deri në ora 22:00 dhe rreth orës 15:45 minuta, kemi dëgjuar në radio nga Salla e Komandimit e DVP-Shkodër, se ka ndodhë një aksident rrugor tek SMT-ja, me dëme në persona. Ne menjëherë kemi lëvizur nga vendi i shërbimit i kryqëzimit “Kirasit” në drejtim të rrotondos së “Dobraçit”, për t’i ardhur në ndihmë qarkullimit rrugor. Pasi kemi shkuar në vendin e ngjarjes, kemi zbritur nga automjeti dhe kemi konstatuar një automjet të tipit “Benz” me ngjyrë të zezë me targa të huaja, i cili kishte dalë nga rruga dhe përplasur me një shtyllë dhe mur. Në një distancë rreth 4 metra nga automjeti, në rrugë ishte i rrëzuar një motor. Në vendin e ngjarjes kemi konstatuar tre persona të shtrirë në tokë, ku dy ishin të seksit mashkull dhe një ishte e seksit femër një burrë i moshës më të vjetër kishte akoma shenja jete, ndërsa, dy tjerët nuk kishin reagime. Më pas, kemi shikuar automjetin dhe brenda mjetit kemi konstatuar një person, i cili ishte pasagjer në vendin e parë, i cili kishte shenja jete. Në vendin e ngjarjes kishte disa persona të tjerë. Sqaroj se para nesh në vendin e ngjarjes ishin oficerët e qarkullimit rrugor Indrit Neziri, Përparim Papa dhe Rrok Frroku, të cilët po lironin drejtimin e rrugës nga lëvizja e mjeteve. Gjatë kohës që unë po shikoja personin e shtrirë në tokë nëse kishte shenja jete, në afërsi tij kam konstatuar një person të ulur afër një personi të shtrirë në tokë, të cilin unë nuk e kam identifikuar se kush ishte. Por thjesht kam menduar se po i jepte ndihmë personit të shtrirë në tokë. Gjithashtu, aty afër kam konstatuar një grua në këmbë dhe disa persona të tjerë, të cilët nuk i kam njohur…”.

Më tej Logu ka sqaruar se thënë se: “…Sqaroj se, në shërbim kam qenë me oficerët e policisë Blerim Kurmekaj përgjegjës Juljan Sterkaj Shofer dhe Marte Martini. Në kohën kur ne kishim mbërritur në vendin e ngjarjes i raportoj Sallës së Komandimit DVP-Shkodër se, nuk kemi të bëjmë me një aksident rrugor, por kemi të bëjmë me një ngjarje kriminale me përdorim te armëve të zjarrit…”.

Në këto momente Logu ka treguar se më pas e ka thërritur Blerim Kurmekaj dhe i ka thënë “bëj bllokimin e automjeteve që mos të futen në vendin e ngjarjes dhe vendos shiritin për kufizimin dhe ruajtjen e vendit të ngjarjes”.

“…Unë kam dalë me shërbim tek “5 Heronjtë” duke ju dhënë drejtim në rrugën e unazës që mos të futej në vendin e ngjarjes deri sa kanë ardhur shërbimet e tjera. Kur ka ardhur shërbimi i patrullës së përgjithshme, unë kam ardhur përsëri në vendin e ngjarjes ku jam takuar me kolegët dhe kemi lëvizur pikë kontrolli tek “Kisha e Zojës” në dalje të qytetit, ku kemi qëndruar deri në ora 22:00 minuta. Sqaroj se unë kam kryer vetëm këto detyra në vendin e ngjarjes, kam ndaluar automjetet që të hynin në vendin e ngjarjes dhe kam vendosur shiritin kufizues dhe ruajtjes së vendit të ngjarjes…”.

Ndërsa momentin e Ibrahim Licit, punonjësi i policisë e shpjegon kështu duke pohuar se:

“…ishte një person i ulur në tokë dhe po i jepte ndihmë personit të shtrirë në tokë, që ishte afër me automjetin e ndaluar. Nuk kam shoqëruar personat dëshmitarë në vendin e ngjarjes dhe as bllokuar vendin e ngjarjes, por kam vendosur shiritin dhe bllokimin e rrugës tek kryqëzimi, për mos bllokuar vendin e ngjarjes. Sqaroj se, në fillim e kam konstatuar këtë person të ulur në tokë, dhe sikur po i jepje ndihmë personit të dëmtuar dhe shtrirë në tokë dhe unë kam lëvizur bllokuar rrugën tek kryqëzimi për mos hyrjen e automjeteve në vendin e ngjarjes. Unë nuk e kam konstatuar këtë gjë, pasi nuk isha prezent tek vendi i ngjarjes më pas. Nuk kemi identifikuar asnjë person…”.

Biznesmeni Elton Iliriani, me aprovimin e familjarëve të Parashqevi Simakut, ka zbuluar detaje nga jeta e saj personale dhe divorci me ish-bashkëshortin Robert Nolfe, me të cilin ka një djalë, Luke.

Iliriani ka lexuar një deklaratë të gjatë të bërë nga Robert Nolfe, i cili ka hedhur dritë mbi arsyet e ndarjes nga këngëtarja, si dhe arsyet se përse gjykata vendosur që kujdestarinë e djalit t’ia jepte atij.

Sipas deklaratës së Nolfe, ai tregon se në hapat e parë të divorcit, ai nuk ka kërkuar kujdestarinë e djalit, por ka kërkuar që ta takojë atë vetëm dy herë në javë, dhe si dhe ka pranuar për shumë vite të paguante dhe qiranë e banesës ku jetonte Simakut, gjë që sipas tij e ka bërë nga viti 2007 kur ka nisur divorci, deri në vitin 2018.

Por dy vite pas ndarjes ai tregon se Simaku nisi të sillej në mënyrë të ashpër me djalin, duke e izoluar atë si nga i ati, është edhe nga jeta sociale, apo dhe nga shkolla. Sipas tij ajo refuzonte edhe që ta dërgonte për kontrolle mjekësore. Këtu ka qenë pika e kthesës që ka bërë që çështja të shkojë në gjykatë, e më pas kujdestarinë ta fitonte ai.

Këtë rrugëtim, e ka sqaruar më tej Ilriani përmes një reagimi në rrjetet sociale.

Kanë dalë në shitje biletat për sfidën mes Shqipërisë dhe Andorrës, e vlefshme për kualifikueset e Botërorit 2026.

Ndeshja është planifikuar të luhet më 24 Mars, në stadiumin “Arena Kombëtare”, duke nisur nga ora 20:45.

Çmimet variojnë nga 2 mijë lekë të reja si biletat më të lira, deri në 35 mijë lekë të reja ato më të shtrenjtat.

Ashtu si të gjitha takimet e Kombëtares edhe ndeshja me Adorrën, do të transmetohet ekskluzivisht në TV Klan.

FSHF ka njoftuar se biletat do të shiten vetëm ONLINE në këtë link:

Biletat e ndeshjes: Shqipëri – Andorra

Procedura se si blihet bileta online:

Fillimisht ju duhet të regjistroheni në platformë duke përdorur një adresë e-mail.

Më pas, zgjidhni tribunën e stadiumit dhe më pas përzgjidhni ulësen.

Pasi keni përzgjedhur ulëset, duhet të plotësoni në tabelën dialoguese të dhënat për biletat (mbiemër, emër, e-mail)

Në fund procedoni me pagesën, duke plotësuar të dhënat e kartës tuaj. Pasi të konfirmohet pagesa, bileta do të mbërrijë në adresën e-mail me të cilën jeni regjistruar në platformë.