Lajme Flesh

Ambasada e SHBA-ve në Tiranë ka ndarë në rrjete sociale një numër kontakti për të gjithë ata që mund të kenë informacion mbi trafikun e drogës të grupeve kriminale shqiptare.

Ambasada u bën thirrje qytetarëve që të sinjalizojnë DEA-n dhe të japin informacionet që kanë mbi trafikun e narkotikëve dhe se të gjitha të dhënat do të mbahen të fshehta.

Ambasada thekson se SHBA mbetet e përkushtuar të bashkëpunojë me autoritetet shqiptare në luftën kundër drogës dhe pastrimit të parave.

Njoftimi i Ambasadës:

Linja e sinjalizimit të Agjencisë së ShBA Kundër Narkotikëve është aktive. DEA nxit këdo që ka informacion në lidhje me trafikun e drogës ose pastrimin e të ardhurave nga droga ta ndajë informacionin me personelin e DEA-s në WhatsApp në: +1 571 502-7846 ose me email në: albania_DEA_tipline@state.gov. Të gjitha të dhënat do të mbahen të fshehta.

Falënderimet tona për të gjithë ata individë që kanë dorëzuar të dhëna të besueshme që kanë mbështetur operacionet e DEA-s.

Shtetet e Bashkuara janë të përkushtuara të punojnë me Shqipërinë për të luftuar trafikun e drogës dhe pastrimin e parave të lidhura me të, me qëllim mbrojtjen e qytetarëve të të dy vendeve tona dhe parandalimin e hyrjes së drogave të paligjshme në Shtetet e Bashkuara.

Deputetja e Partisë Demokratike, Flutura Açka ka komentuar zhvillimet pas zgjedhjeve parlamentare të 11 majit. Ajo ka ngritur akuza dhe ka kritikuar sjelljen e opozitës gjatë fushatës, sidomos në raport me institucionet e drejtësisë.

“Në fakt nuk ka një reflektim nga opozita në raport me SPAK. Edhe kjo më shqetëson. Kur e sheh që pëlqyeshmëria e shqiptarëve ndaj SPAK shkon në 75 përqind dhe në retorikën opozitare ne e sulmojmë, nuk ishte mendoj e duhura”, tha Açka.

Sipas saj, sulmet e vazhdueshme nga ish-kryeministri Berisha ndaj SPAK ndikuan negativisht në perceptimin e publikut për opozitën.

“Unë mendoj që një nga arsyet ishte dhe sulmi që Berisha i bënte SPAK, por që mos të lexosh mirë vullnetin e shqiptarëve në momentin që kërkon votat e tyre, mendoj që ka qenë e gabuar”, tha Açka.

Deputetja kritikoi përqendrimin e fushatës elektorale vetëm tek figura e Berishës, duke lënë në hije ekipin dhe alternativën politike të PD-së.

“Një tjetër problem i zgjedhjeve ishte përqendrimi i zgjedhjeve tek zoti Berisha. Do duket që ajo gjëja personale e tij, që nga shtatori i 2021 e sot. Iu mbart edhe partisë edhe fushata u përqendrua për të mbajtur figurën e tij në qendër, duke harruar që ne erdhëm në zgjedhje me një ekip”, u shpreh ajo.

Duke analizuar rezultatet e votimit, Açka u shpreh se opozita ka humbur mbi 140 mijë vota dhe sipas saj, ky është rezultat i vendimeve të gabuara dhe përpjekjes për të siguruar pozicione personale.

“Ne na kanë munguar mbi 140 mijë vota në 11 Maj. Këta që nxituan për të marrë listën e sigurt për të mbrojtur veten e tyre, të gjithë këta bishta që ne na mbetën rrugës i mori Rama. Projekti ka qenë që të mbahet lista personale që është një nga shkeljet”, tha Açka.

Ajo ngriti shqetësime edhe për mënyrën se si janë përzgjedhur kandidatët për deputetë, duke theksuar se disa kanë shkuar në Kuvend pa vota.

“Diçka nuk shkon, ka deputetë që shkojnë në parlament pa vota. Mbyllën veten e tyre dhe lanë në listë vota të pakonfiguruara”, vijoi Açka.

Açka tha gjithashtu se opozita duhet të reflektojë thellë për braktisjen e votuesve, përfshirë diasporën që, sipas saj, ka votuar për Edi Ramën.

“Kemi një lloj qëndrimi mbi këtë që po ndodh. Përse ne po na braktisin edhe si është e mundur që diaspora votoi Edi Ramën. Faji që na takon duhet ta marrim. Sigurisht që ka faj dhe Berisha se me atë që mëtoi nga shtatori e këtej nuk po mban një qëndrim koherent. Humbja e thellë, Berisha duhej të jepte dorëheqjen, ka gjasë në një parti familjare”, përfundoi ajo.

Një ngjarje e pazakontë dhe befasuese ka tronditur Lisbonën fundjavën e kaluar, ndonëse është bërë publike vetëm në orët e fundit. Teksa qyteti festonte titullin kampion të fituar nga Sporting Lisbona në “Primeira Liga”, një incident i papritur e ktheu atmosferën festive në një çështje serioze, që rrezikoi të merrte përmasa ndërkombëtare.

Sipas burimeve të shumta në median portugeze, trofeu zyrtar i “UEFA Women’s Champions League”, i cili ndodhej në stadiumin “José Alvalade” si pjesë e promovimit të finales së madhe të 25 majit, është vjedhur gjatë festimeve masive të tifozëve të Sportingut.

Trofeu, që pritej të ngritej nga një prej dy superfuqive të futbollit europian të femrave, Barcelona apo Arsenal, u zhduk në mënyrë misterioze nga hapësira e ekspozimit publik në ambientet e stadiumit.

Finalja e Champions League për femra është ngjarja më e rëndësishme e futbollit të klubeve në Europë për këtë kategori, dhe për herë të parë do të zhvillohet në Lisbonë, një vlerësim i madh për Portugalinë si organizatore. Në prag të këtij eventi, UEFA e kishte vendosur trofeun në një zonë të hapur për publikun, për të nxitur interesin dhe rritur vizibilitetin e ngjarjes.

Incidenti ndodhi të dielën, kur mijëra tifozë të Sporting Lisbona mbushën rrugët e kryeqytetit për të festuar titullin e 20-të kampion në historinë e klubit. Në kulmin e festimeve, me hyrje të pakontrolluara dhe turmë të dendur, kupa u zhduk në mënyrë misterioze, duke shkaktuar shqetësim në radhët e organizatorëve dhe UEFA-s, që u vu në dijeni menjëherë pas ngjarjes.

Policia portugeze ndërhyri shpejt, duke nisur një hetim intensiv për të zbardhur rrethanat e zhdukjes. Pas një operacioni që zgjati disa orë, autoritetet arritën të gjejnë trofeun dhe ta rikuperojnë pa dëmtime. Megjithatë, mbetet ende mister se si kupa arriti të zhdukej në mënyrë aq të lehtë nga një vend që supozohej të ishte i siguruar. Asnjë person nuk është arrestuar deri më tani, ndërsa hetimet për identifikimin e autorëve të mundshëm vazhdojnë.

Ky incident ka shkaktuar nervozizëm në radhët e UEFA-s, që po monitoron nga afër situatën dhe ka kërkuar rishikim të protokolleve të sigurisë për ditët në vijim. Finalja e 25 majit pritet të jetë një spektakël i madh sportiv mes Barcelonës (për femra), kampione në fuqi e Europës, dhe Arsenalit, një nga ekipet më të suksesshme në Angli.

UEFA nuk ka dhënë ende një koment zyrtar mbi ngjarjen, por burime pranë organizatës e kanë cilësuar incidentin si “shqetësues” dhe kanë kërkuar rritje të menjëhershme të masave të sigurisë në Lisbonë.

Ngjarja, ndonëse e përfunduar me rikuperimin e trofeut, tregon se edhe në ditët më festive të futbollit, mungesa e organizimit dhe kontrollit mund ta kthejë një moment krenarie në problem diplomatik me përmasa europiane.

Ιsh-banorja e “Big Brother VIP 4”, Egli Tako, ka tërhequr gjithë vëmendjen e ndjekësve në “Instagram” me një postim të bërë së fundmi.

Imazhi në fjalë është bardh e zi dhe Egli provokon me taka të larta dhe këmbët që marrin vëmendjen.

“Sneak peek from today’s shoot”, ka shkruar Tako krahas fotos në “Instastory”, duke shtuar edhe një emoji të habitur, si për të paralajmëruar ndjekësit se kjo është vetëm një ‘hint’ nga ajo që po vjen.

Pas daljes nga shtëpia më e famshme në Shqipëri, Egli ka treguar përmes postimeve në rrjetet sociale se ajo është duke punuar fort për projektet e saj muzikore.

Madje nga këto postime është lënë të kuptohet se ajo është duke bashkëpunuar me këngëtaren e dashur për publikun, Fifi. Edhe kjo e fundit herë pas here ka bërë postime në profilet e saj në rrjetet sociale ku ka etiketuar edhe Eglin.

Prokuroria e Posaçme kundër Korrupsionit dhe Krimit të Organizuar është duke goditur njëra pas tjetrës grupet kriminale në vendin tonë. “Çelësi” i hapjes së dyerve enigmatike për prokurorinë ka qenë dhe vijon të jetë Nuredin Dumani, krimineli i rrezikshëm i cili nga një vrasës me pagesë është kthyer në “pentiton” e drejtësisë.

Për herë të parë në Inside Story në Top Channel është zbuluar edhe marrëveshja që Dumani ka firmosur me drejtësinë shqiptarë.

Në vitin 2022, pas transferimit në spitalin e burgut, në prani të ish-drejtorit të Përgjithshëm të Policisë të asokohe dhe ish-drejtorit të Krimeve, Dumani shprehu gatishmërinë për bashkëpunim, duke premtuar zbardhjen e krimeve e dosjeve të cilat kishin zënë pluhur prej vitesh.

Kjo kërkesë e tija menjëherë thuhet se u delegua te prokurori Altin Dumani, Doloreza Musabelliu dhe Behar Dibra, të cilët për dy javë me radhë dëgjuan rrëfimet e tij ku dhe më pas, në 18 maj të 2022 i ofruan të bëhej bashkëpunëtor me drejtësinë.

Në dëshminë e siguruar nga Inside Story, Dumani, rrëfen se krimi i parë që kreu, ka qenë shitja e një arme, një krim i cili e futi në një rrugë pa krye dhe e çoi në rrugën e një vrasësi me pagesë të pamëshirshëm.

Por, sipas tij pasi u tradhtua nga “shokët” dhe pasiguria për jetën e tij e shtynë që të marrë vendimin për të bashkëpunuar me drejtësinë dhe për të shkatërruar grupet kriminale që dikur i kishte shërbyer.

“Personi nën hetim Nuredin Dumani, merr përsipër të bashkëpunojë me Prokurorinë e Posaçme Kundër Korrupsionit dhe Krimit të Organizuar duke dëshmuar dhe dhënë informacion të plotë e pa asnjë rezervë ose kusht për të gjitha faktet, ngjarjet dhe rrethanat që shërbejnë si prova vendimtare, për zbulimin, hetimin, gjykimin e të gjithë krimeve të rënda të kryera nga ai dhe të gjithë bashkëpunëtorët e tij.

Kjo Marrëveshje bashkëpunimi mund të revokohet nga pala e akuzës, kur vërtetohet se bashkëpunëtori i drejtësisë bën deklarime të rreme, mban rezerva lidhur me faktet, ngjarjet dhe rrethanat që provohet se ka dijeni, ose kur ai me dashje shkel kushtet e përcaktuara në këtë akt-marrëveshje”, thuhet në marrëveshjen e përpiluar mes drejtësisë dhe Dumanit e publikuar kjo për herë të parë.

Kush është Nuredin Dumani

Shumë vite më parë 41 vjeçari nga Dibra e me banim në Durrës, ka qenë i lidhur me një rrjet prostitucioni që doli në dritë pas denoncimit të një vajze të trafikuar në Francë. Sipas dëshmisë së të resë nga Durrësi, Dumani ishte tutori i rrjetit që i mashtronte vajzat duke u propozuar martesë, në rast refuzimi i kërcënonte se do të vriste familjarët e tyre. Po ashtu, Nuredin Dumani ka provuar qelinë edhe për akuzën e vjedhjes.

I cilësuar si një ndër vrasësit me pagesë më të rrezikshëm në Shqipëri, është përfshirë në disa vrasje. Nuk ka kursyer as miqtë e tij. Dumani dyshohet se ka marrë pjesë në ekzekutimin e dy vëllezërve Haxhia në Shënavlash të Durrësit, Viktor dhe Besmir Haxhia.

Gjithashtu, ai dyshohet se ka marrë pjesë në vrasjen e Anxhelo Avdylit dhe Dorian Shkozës, po në qytetin bregdetar. Motivet zyrtarisht nuk dihen, por thuhet se ata janë përfshirë në disa ngjarje kriminale dhe më pas ka lindur nevoja për “spastrime” mes radhëve. Në këto ngjarje, Dumani dyshohet se ka bashkëpunuar me mikun e tij Talo Çela. Dy miq që më vonë u kthyen në armiq të përbetuar.

Nuredin Dumani akuzohet se për shkak të “prishjes së pazareve” me mikun Talo Çela, i ekzekutoi këtij të fundit vëllain, shkruan newsbomb.al. Bujar Çela, një taksist në të zezë u vra për shkak të miqësisë së prishur mes vëllait të tij dhe Nuredin Dumanit.

Saga e vrasjeve ky dyshohet se është përfshirë ai nuk përfundon këtu. Më 20 korrik 2020, në mes të Elbasanit ekzekutohet me armë zjarri Emiljano Ramazani, baba i katër fëmijëve. Kamerat e sigurisë fiksuan në vendngjarje Klevis Kapllanin, mikun e ngushtë të Nuredin Dumanit. Ky i fundit ishte i pranishëm në Elbasan, por nuk dihet nëse ka qëlluar apo ishte vetëm vëzhgues.

Hetuesit kishin dyshime të forta se këto vrasje lidheshin me 4.6 milionë eurot e grabitura në Rinas.

Dy muaj pas vrasjes së Emiljano Ramazanit në Elbasan, Nuredin Dumani ekzekuton vetë shokun e tij, Klevis Kapllanin. Ishte pikërisht ky i fundit që e ndihmoi dhe tërhoqi këmbëzën duke i marrë jetën babait të katër fëmijëve më 20 korrik.

Kur i kishte eleminuar të gjithë shokët dhe bashkëpunëtorët, ai u fokusua te i vetmi i mbijetuar. Miku me të cilin tashmë ishte armik i përbetuar, Talo Çela, ishte i vetmi objektiv që i kishte mbetur. Ama dhe ky i fundit nuk ja falte gjakun e të vëllait dhe shokëve të vrarë.

Pasditja e 30 marsit të vitit 2022 mund të kishte prodhuar viktimën e radhës. Nuredin Dumani ishte nisur të vriste armikun e tij të fundit por nga atentator u kthye në pre. Ai ra “viktimë” e atentatit që do të kryente vetë në kryqëzimin e Peqinit, pasi Talo Çela ishte vënë në dijeni dhe e priste.

Breshëri plumbash në rrugën Elbasan-Peqin. Natyra e atentatit dhe mënyra e organizimit ngriti në këmbë Policinë dhe vuri në lëvizje Forcat Speciale, sepse u kuptua që nuk bëhej fjalë për ngjarje ordinere por një “larje hesapesh mes kokash”. Makina ku udhëtonte Nuredin Dumani u sulmua me breshëri automatiku nga një makinë tjetër ku dyshohet se ishte Talo Çela.

Për pasojë, Dumani mbeti u plagosur dhe u nis drejt Fierit. I strehuar në një apartament në lagjen “Apolonia”, telefonoi në spital dhe kërkoi ndihmë. Por, spitali vuri në dijeni sallën operative dhe në Fier ishte e gjithë Policia. I shumëkërkuari dhe një nga personat me rrezikshmëri të lartë shoqërore ishte tashmë në duart e Policisë.

Artan Lame është ende gjallë, por në gjendje kome.

Lajmi është konfirmuar live në emisionin Opinion, ku gazetari Blendi Fevziu tregoi se familjarët i kanë pohuar se gjendja e ish-kreut të Kadastrës është kritike, por zemra e tij rreh ende.

“Miku im është ende gjallë. Pas operacionit nuk ka arritur të zgjohet dhe ndodhet në gjendje kome. Por zemra e tij ende rreh”, tha gazetari.

Prokuroria e Posaçme kundër Korrupsionit dhe Krimit të Organizuar ka regjistruar procedimin penal Nr. 27 të vitit 2024, që bën fjalë për veprat penale të “Korrupsioni pasiv i funksionarëve të lartë shtetërorë ose i të zgjedhurve vendorë”, “Korrupsioni aktiv i funksionarëve të lartë shtetërore ose të zgjedhurve vendorë”, “Pastrimi i produkteve të veprës penale ose veprimtarisë kriminale”, “Refuzimi për deklarimin, mosdeklarimi, fshehja ose deklarimi i rremë i pasurive, interesave privatë të personave të zgjedhur dhe nëpunësve publikë ose i çdo personi tjetër që ka detyrimin ligjor për deklarim”, “Deklaratat e rreme  përpara oficerit të policisë gjyqësore” dhe “Veprime që pengojnë zbulimin e së vërtetës”,  parashikuar nga neni 260, 245, 287/2, 257/a/2, 305/b e 301 i Kodit Penal.  

Pas kryerjes së veprimeve hetimore në kuadër të këtij procedimi penal, Prokuroria e Posaçme ka arritur në konkluzionin se ekzistojnë të dhëna konkrete që të çojnë në dyshimin e arsyeshëm se shtetasit nën hetim E. V. dhe A. X. kanë konsumuar edhe elementët e veprës penale të “Refuzimi për deklarimin, mosdeklarimi, fshehja ose deklarimi i rremë i pasurive, interesave privatë të personave të zgjedhur dhe nëpunësve publikë ose i çdo personi tjetër që ka detyrimin ligjor për deklarim”, parashikuar nga neni 257/a/2 i Kodit Penal. Për këtë shkak, më datë 20.05.2025 emrat e këtyre shtetasve janë regjistruar në regjistrin e njoftimit të veprave penale, duke i atribuuar veprën penale cituar më lart.

Në  vijim, me kërkesën e Prokurorisë së Posaçme të datës 20.05.2025, Gjykata e Posaçme e Shkallës së Parë për Korrupsionin dhe Krimin e Organizuar me vendimin Nr. 342 Akti datë 22.05.2025 ka vendosur:

1. Caktimin e masës së sigurimit pasuror “sekuestro preventive”, mbi pasurinë e paluajtshme:

Pasuria nr. dhe shtesë me numër pasurie, ‏regjistruar në ASHK  në emër të subjektit tregtar “A. K.” shpk;

Nga të dhënat konkrete të mbledhura deri në këtë fazë të hetimit paraprak, ekziston dyshimi i arsyeshëm i bazuar në prova se shtetasit nën hetim E. V.  dhe A. X. kanë interesa pasurore faktike mbi dy pasuri (njëra prej të cilave shtesë pasurie), të cilat janë fqinje me apartamentin që ndodhet në Selitë, (rezidenca Kodra e Diellit), ku aktualisht këta shtetas jetojnë.

Një ngjarje tragjike ka ndodhur në Durrës, ku një grua ka humbur jetën gjatë një ndërhyrjeje kirurgjikale.

Sipas njoftimit të policisë, ka nisur një procedim penal ndaj mjekut 59-vjeçar, I. Sh., banues në Durrës, i cili akuzohet për veprën “Neglizhenca në trajtimin mjekësor”.

Mjeku është hetuar për humbjen e jetës së 54-vjeçares, M. Xh., banuese gjithashtu në Durrës, e cila ka ndërruar jetë në klinikën e tij gjatë procedurës kirurgjikale. Hetimet janë duke vijuar për të sqaruar rrethanat e ngjarjes.

Njoftimi i policisë:

U referuan materialet në Prokurori, ku nisi procedimi në gjendje të lirë për veprën “Neglizhenca në trajtimin mjekësor”, për shtetasin I. Sh., 59-vjeç, banues në Durrës, me detyrë mjek, pasi në klinikën e tij, ka humbur jetën gjatë një ndërhyrjeje kirurgjikale, shtetasja M. Xh., 54-vjeçe, banuese në Durrës.

Një ngjarje e rëndë është shënuar më 21 maj 2025 në fshatin Kamenicë, ku një fëmijë i mitur, vetëm 2 vjeç, ka rënë aksidentalisht nga ballkoni i katit të dytë të banesës së tij.

Për pasojë, i mituri ka pësuar dëmtime dhe është transportuar menjëherë drejt spitalit për të marrë ndihmën mjekësore të nevojshme.

Fatmirësisht, burime nga spitali bëjnë me dije se fëmija ndodhet jashtë rrezikut për jetën dhe po trajtohet nën kujdesin e mjekëve.

Policia Rrugore e Tiranës ka nisur një plan të posaçëm masash për të përforcuar sigurinë në rrugët e kryeqytetit. Me praninë e shtuar të forcave të rendit dhe përdorimin e pajisjeve inteligjente, kontrollet janë përqendruar te drejtuesit e mjeteve dhe motomjeteve, me synimin për të parandaluar shkeljet që rrezikojnë jetën dhe shëndetin e qytetarëve. Gjatë 72 orëve të fundit, janë proceduar penalisht 14 drejtues mjetesh, janë bllokuar 13 automjete dhe janë vendosur rreth 6000 masa administrative. Kontrollet vijojnë në të gjithë territorin e Tiranës.

Njoftimi i Policisë Rrugore në Tiranë:

Policia Rrugore e Tiranës intensifikon kontrollet, me objektivin e vetëm, përmbushjen e parametrave të sigurisë rrugore. Plani i posaçëm i masave po monitorohet në terren, nga shefi i Komisariatit të Policisë Rrugore. Plani konsiston në monitorimin me pajisje inteligjente dhe në praninë e shtuar të shërbimeve të Policisë Rrugore, me objektiv kryerjen e kontrolleve për:

drejtuesit e motomjeteve, për vënien e kaskës mbrojtëse;

drejtuesit e mjeteve, për:

✅dhënien përparësi këmbësorëve, në vija të bardha;

✅mospërdorimin e celularit, gjatë drejtimit të mjetit;

✅vënien e rripit te sigurimit;

✅mosdrejtimin e mjetit, në efektin e alkoolit/në gjendje të dehur;

✅respektimin e limiteve të shpejtësisë;

✅moderimin e shpejtësisë në zona të banuara;

✅parandalimin e parakalimeve të gabuara;

✅konstatimin e parkimeve të gabuara që pengojnë qarkullimin.

❌janë arrestuar/proceduar penalisht 14 drejtues mjetesh, për shkelje të rregullave të qarkullimit rrugor;

❌janë bllokuar 13 automjete;

❌janë vënë rreth 6000 masa administrative.

Shefi i Komisariatit të Policisë Rrugore Drejtues Lorenc Shehu, apel qytetarëve për respektim maksimal të rregullave të qarkullimit rrugor, si e vetmja mënyrë për të kontribuar në përmbushjen e parametrave të sigurisë rrugore dhe për të parandaluar aksidentet me pasoja për jetën dhe shëndetin. Kontrollet vijojnë në të gjithë territorin e kryeqytetit.