Month: November 2024

Vendimi i bashkisë së Durrësit, i miratuar nga Këshilli Bashkiak, një javë më parë, për të rritur pagat e Kryetares dhe administratës është shoqëruar me polemika dhe pakënaqësi.

Ndërsa kryetarja dhe kabineti i saj do të përfitojnë rritje të ndjeshme pagash, krahasuar me punonjësit e nivelit bazë, këshilltarët e opozitës braktisën mbledhjen, duke e cilësuar vendimin si të padrejtë dhe të papërshtatshëm, veçanërisht kur në port qëndron anija me mbetje toksike.

“Dritan Burgija, kryetar i grupit të këshilltarëve demokratë kur thotë se nuk është kundër rritjes se pagave por duhet një shpërndarje me e drejtë”.

Me këtë vendim Kryetarja e Bashkisë Durrës, Emiriana Sako, rriti pagën e saj me 56,7 %, duke e çuar atë nga 1 milion e 850 mijë lekë në 2 milion e 900 mijë lekë të vjetra në muaj.

Rritje me 40,6 % u bë edhe për tre zv.kryetarët e saj, Renis Mullaj, Elio Jani dhe Gentian Kallmi, të cilët që nga data 1 shtator, sipas vendimit, do të paguhen 2 milion e 250 mijë lekë të vjetra, nga 1 milion e 600 mijë lekë që merrnin më parë. 55,6 % është rritur paga për sekretarin e përgjithshëm të bashkisë.

Në përqindje të njëjtë me pagën e kryetares së bashkisë është rritur edhe pagesa mujore për këshilltarët bashkiakë, nga 185 mijë lekë të vjetra në 290 mijë lekë.

Për drejtorët e drejtorive, rritja është në masën 55 %. Rritjen më të madhe e ka përfituar drejtuesja e kabinetit me 86,7 %, si dhe këshilltari i kryetares së bashkisë dhe zëdhënësi i institucionit me 90.8 % rritje, duke u ngritur në nivelin e drejtorit të drejtorisë.

Rritjet në nivelet e tjera variojnë, por jo në të njëjtin nivel. Për specialistët në aparatin e bashkisë, rritja është 14.3%.

Ndërkaq për strukturat në varësi të bashkisë që kanë funksione ligjzbatuese dhe shërbimesh rritja për inspektorë dhe specialistë është më e ulët.

Për kryeinspektorin e Mbrojtjes së Territorit paga rritet me 49,4 %, ndërsa për vartësit e tij vetëm 7 %, ose 50 mijë lekë më shumë se deri tani.

Diferenca më të vogla ka dhe në sektorë të tjerë si Tregu Agro-Bujqësor dhe Qendra Ekonomike e Arsimit, ndërsa për specialistët e sektorit mbështetës të stacionit zjarrfikës nuk do të ketë rritje page.

Po ashtu kritike është rritja e pagave mujore për magazinierë, shoferë, roje, pastrues dhe punonjës të tjerë administrativë, paga e të cilëve varionte nga 400 mijë-470 mijë lekë të vjetra në muaj dhe tani unifikohet në 470 mijë për të gjithë.

Rritja e pagave në nivele të ndryshme të administratës bashkiake në Durrës ka thelluar kontrastin mes të zgjedhurve, funksionarëve të lartë dhe punonjësve të shërbimeve bazë, duke nxitur debat mbi përparësitë e vendimmarrjes, veçanërisht në kohë krizash si ajo e mbetjeve toksike në port, ndërsa këshilltarët e opozitës nuk kanë pritshmëri nga institucioni i prefektit të qarkut./Tch

Qeveria shqiptare pritet të përballet me një gjobë të re nga Arbitrazhi Ndërkombëtar, e cila mund të arrijë mbi 300 milionë euro, pasi ka refuzuar që të zbatojë një vendim të formës së prerë për të paguar vullnetarisht sipërmarrësin italian, Francesko Beketi, në shumën 110 milionë euro.

Në janar të këtij viti, Beketi dhe bashkëpunëtorët e tij i janë drejtuar me një kërkesë të re Gjykatës së Arbitrazhit pasi qeveria shqiptare “ka dështuar për të përmbushur detyrimet e saj sipas Traktatit Itali-Shqipëri për Mbrojtjen e Investimeve, të miratuar në vitin 1991, nuk ka zbatuar vendimin e Gjykatës së Arbitrazhit të Bankës Botërore (ICSID) “ARB 15/28”, si edhe nuk ka zbatuar vetë Konventën e Arbitrazhit”.

• “Bechetti”/ Një hap pranë marrjes së miliona eurove, Gjykata e Ekzekutimit në Bruksel rrëzon Shqipërinë!

Biznesmeni italian u bë subjekt i persekutimit politik nga qeveria e Edi Ramës, duke filluar nga viti 2013, për shkak të linjës editoriale që mbante televizioni “Agon Channel”, në pronësi të tij.

Sulmi qeveritar mbi Beketin u bë objekt shqyrtimi gjyqësor pranë Gjykatës së Arbitrazhit Ndërkombëtar.

Gjatë shqyrtimit gjyqësor, u konstatua se qeveria shqiptare përdori hetime të pabazuara për pastrimin e parave ndaj Beketit, duke e kërcënuar për arrestim të pabazë, si edhe duke i mohuar një proces të rregullt ligjor në Shqipëri.

Këto shkelje u konfirmuan nga vendimi i Arbitrazhit Ndërkombëtar, në prill të vitit 2019, në të cilën Shqipëria u gjet fajtore për “abuzim të kompetencave policore për motive që nuk ishin në mirëbesim dhe në interes të publikut”. Në përfundim qeveria shqiptare u ngarkua me një penalitet në shumën 110 milionë euro, të cilat i duheshin paguar Beketit e bashkëpunëtorëve të tij.

Kryeministri Edi Rama ka deklaruar më herët se nuk do t’i japë asnjë cent Beketit dhe qeveria e drejtuar prej tij nuk ka zbatuar vendimin e Arbitrazhit.

Në vitin 2021 dhe 2023, qeveria “Rama” dështoi në dy tentativa për anulimin dhe më tej rishikimin e vendimit të Arbitrazhit. Gjykata konfirmoi përfundimisht se qeveria shqiptare duhet të paguajë gjobvën 110 milionë euro, plus shtesa të tjera për aspekte proceduriale.

Por, qeveria e Edi Ramës ka vijuar me kokëfortësi që të mos zbatojë vendimin e formës së prerë të Gjykatës së Arbitrazhit, duke krijuar premisa që Shqipëria të marrë një tjetër gjobë të majme për shkak të mosveprimeve të saj.

Pak ditë më parë, Gjykata e Ekzekutive në Bruksel vuri në zbatimin konfiskimin në favor të biznesmenit italian të shumës prej 76 milionë euro, të mbledhura në llogaritë e kompanisë ajrore shqiptare “Albcontrol” pranë shoqërisë ajrore europiane “Eurocontrol”.

Kjo shumë është krijuar nga tarifat që paguajnë shoqëritë e huaja të fluturimeve për ulje-ngritje dhe tranzitim në hapësirën ajrore shqiptare./Syri

Prokuroria e Posaçme (SPAK) ka vendosur që dosja e prokurorit të Vlorës të arrestuar tanimë Aurel Zarka të mos publikohet për shkak se jo vetën që është në hetim por në të janë duke u hetuar një sërë çështjesh të rëndësishme me personazhe po kaq të rëndësishme.

Dosja me numër 87 datë 28/07/2024 mban shënimin “ndalohet për publikim kjo dosje ose pjesë të saj”.

Por teksa e gjithë Tirana prej muajsh është e trazuar nga kjo dosje, në tavolina e në biseda të përditshme të gjithë flasin për detaje, për episode që pritet të trondisin politikën por edhe drejtësinë vendase.

Por një panoramë më  të qartë ka dhënë Kreu i Grupit Parlamentar të Partisë Demokratike Gazment Bardhi i cili ka dolur në mbledhjen e 18 të komitetit të Stabilizim Asoçimit, shkruan kafe.al.

Ai ka vendosur që përpara eurodeputetëve të shpalos një ndër skandalet ndoshta më të mëdha të dosjes.

“Padyshim se ne do ta publikojmë (vendimin) nëse prokuroria dhe Gjykata nuk veprojnë ndaj ministrave të Edi Ramës që permenden në këtë dosje. Dhe të nderuar kolegë, mos më besoni mua, gjejeni vendimin numër 87 datë 28.07.2024, lexoni vetëm 8 faqe, nga faqja 63 deri në faqen 70 dhe do të shikoni sesi deputetë, madje ministra të Edi Ramës, ndërhyjnë në Prokurorinë e Posaçme dhe në Policinë e Shetit për të hequr konfskimet ndaj pasurive të Grupeve kriminale.

Bëhet fjalë për një nga grupet më të rrezikshme kriminale në qytetin e Elbasanit ku rezulton se një deputet, madje një ministër në detyrë i Edi Ramës ka ndërhyrë në Prokurorinë e Poasçme me emër dhe me mbiemër prokurori dhe në Policinë e Shtetit në kuadër të OFL-së për çliruar pasuritë e sekuestruara nga policia dhe prokuroria dhe policia ndaj një grupi kriminal.

Dhe e dini çfarë ka ndodhur kolegë? Janë çliruar pasuritë. Ai grup kriminal I ka të gjitha pasuritë, falë ndërhyrjes politike në polici dhe në prokurori dhe gjykata.

Jo me akuzat e opozitës, por janë përgjimet zyrtare të prokurorisë. Ne do të presim dhe do të respektojmë punën e SPAK-ut, Por transparencën Shqiptarëve dhe miqve të Shqipërisë do ja themi”, tha Gazment Bardhi.

Sot pyetja që presin të gjithë të marrë përgjigje është: Kush është ministri që u shërben bandave?

A e dinit që Françeska Murati kishte një motër? Ndoshta mund ta keni ditur por asnjëherë nuk e kishit parë deri ditën e djeshme.

Në puntatën e së dielës në “Pa Filtra”, Ronaldo Sharka ka përshëndetur motrën e ish-banores së “Big Brother VIP 3”, e cila po rrinte ulur në publik për të mbështetur motrën e saj gjatë xhirimeve.

“Vdekjen e dija, por që ti të kishe motër… E paske një copë ylli”, u shpreh Ronaldo Sharka në nisje të emisionit.

Kjo është hera e parë që ajo shfaqet në publik…

Partia e Lirisë i është drejtuar me një shkresë Drejtorit të Përgjithshëm të Policisë së Shtetit, Ilir Proda dhe ministrit të Brendshëm, Ervin Hoxha, ku u kërkojnë informacion për arrestimin e Ilir Metës.

Në një deklaratë, Sekretari i Përgjithshëm i PL-së, Tedi Blushi thotë se duan të kenë informacion se kush janë emrat e punonjësve të pretenduar të policisë, të cilët kryen sipas tij aktin e rëndë ndaj Ilir Metës.

Sipas Blushit, këto dy institucione duhet të kthejnë përgjigje brenda datës 7 nëntor.

Blushi thekson ndër të tjera se arrestimi i Ilir Metës është bërë në kundërshtim me ligjin. Ai thotë se nëse nuk i përcillen emrat do të ndiqet rruga e drejtësisë, duke i kallëzuar penalisht.

“Ilir Proda do të jeta ai që do të mbajë përgjegjësi penale dhe ne do ta kallëzojmë për dy vepra penale, moskallëzim krimi dhe shpërdorim detyre”, tha Blushi.

Efi Dhedhes ka befasuar fansat e saj me një ndryshim të papritur të look-ut!

Ajo ka vendosur të ndryshojë ngjyrën e flokëve nga e zezë në një bjonde, duke dhënë një pamje më të freskët dhe më të ndritshme.

“Kush je ti dhe çfarë i ke bërë Efit” shkruan Efi në postim.

VoxNews ka siguruar foton e Izmir Sakices, njërit prej 2 personave në kërkim policor për t’u marrë në pyetje për atentatin e ndodhur në Shkodër më 30 tetor. 

Sakica dhe Samuel Troshani, janë po ashtu në kërkim për një tjetër ngjarje të ndodhur më herët më 23 gusht 2024 në Bushat të Shkodrës. 

Dyshohet se ka pasur shkëmbim zjarri mes tyre dhe 2 vëllezërve Andrea e Aleksandër Prendi.

Izmir Sakica

Gjatë shkëmbimit të armëve u qëllua me breshëri plumbash në një mjet të blinduar ‘Audi’, por nuk pati të lënduar. Për këtë ngjarje në polici u shoqërua dhe Safet Bajri por më pas u la i lirë.

Ky është automjeti tip “Range Rover” i cili u përdor nga autorët në atentatin e 30 tetorit në Shkodër ku humbën jetën 4 persona, Hamza Lici, Arlind Bushati dhe çifti i bashkëshortëve, Flutura dhe Bashkim Basha.

Siç dhe kemi bërë me dije më herët automjeti i cili u përdor nga atentatorët është vjedhur disa muaj më parë në qytetin e Durrësit.

Policia ka arritur të zbulojë se ajo është e njëjta makinë që ishte denoncuar disa muaj më parë nga pronari i saj në qytetin bregdetar.

Kjo e dhënë e përftuar nga grupi hetimor, ka dalë pas këqyrjes së numrit të mbetur në shasinë e mjetit i cili u gjet i djegur vetëm disa minuta pas atentatit në Dobraç të Shkodër, së bashku me dy automatikët të cilët dyshohet se u përdorën në ngjarje.

Ndërkohë, sipas informacioneve të përftuara nga burimet e policisë së Shkodrës, makina e cila u përdor nga autorët ka dalë nga rrugica ku ndodhet shtëpia e Astmer Bilalit, i cili aktualisht ndodhet në qeli si i arrestuar në kuadër të dosjes “Metamorfoza”.

Autorët më pas i janë vënë pas automjetit tip “Benz” me të cilin po udhëtonin Arlind Bushati, Hamza Lici si dhe personi i tretë i paidentifikuar deri më tani, duke i qëlluar me breshëri automatiku.

Si pasojë e breshërisë humbën jetën Hamza Lici, Arlind Bushati si dhe çifti i pafajshëm i bashkëshoretëve, Flutura dhe Bashkim Basha të cilët ndodheshin në vendin dhe kohën e gabuar.

Presidenti i Partisë së Lirisë, Ilir Meta ka folur nga qelia për Gazetën Panorama, duke dhënë argumentet pse është kundër arrestimit të tij.

Ai po ashtu shprehet se ka pasur oferta për t’u arratisur, por nuk është në karakterin e tij për të bërë këto veprime, ndërsa thekson se arrestimi i tij ishte një akt ekstrem.

“Dihet botërisht se unë gjithmonë kam qenë i hapur dhe u jam përgjigjur ftesave të SPAK-ut dhe çdo institucioni të drejtësisë. Po kështu, unë i kam pasur të gjitha mundësitë (edhe ofertat) për t’u larguar nga vendi dhe kjo jo vetëm s’ka ndodhur, por s’ka lidhje me karakterin tim, për më shumë që do justifikoja akuzat false të Ramaformës dhe do braktisja, ata që më kanë zgjedhur dhe më mbështesin”, tha ndër të tjera Ilir Meta.

Meta nuk e quan burgosje, por izolim me qëllim për të dobësuar aktivitetin e Partisë së Lirisë dhe veprimtarinë opozitare.

Ish-Presidentit shprehet se burgun e njeh që nga koha kur vizitonte Fatos Nanon, herë me leje dhe herë pa leje.

INTERVISTA

Z.Meta, u bënë gati dy javë nga arrestimi juaj në burg. Si ndiheni? E prisnit prangosjen…?

Ka një moment interesant kur Mbretëresha e Britanisë së Madhe priti Vaclav Havelin si President i parë demokratik i Çekosllovakisë. Ajo e pyet se si ndihej që ndodhej në Pallatin Mbretëror të Madhërisë së Saj, kur vetëm disa kohë më parë kishte qenë në burgjet e regjimit komunist. “Madhëria Juaj – i thotë Haveli – edhe sikur të më vënë prangat përsëri sapo të dal nga pallati juaj, nuk më bën më përshtypje”.

Kështu që për shkak të eksperiencave të ndryshme dhe shumë të vështira në këto 34 vite, që nga dhjetori ‘90 e deri tani, vështirë të tronditem nga diçka, aq më tepër që prej vitesh unë e kam faktuar se në vend ka ndodhur një grusht shteti përmes shndërrimit të Reformës në Drejtësi në Ramaformë dhe sot këtu nuk sundon ligji dhe shteti i së drejtës, por një juntë policore, gjyqësore e bandash.

Por nuk u dukët aq i qetë në momentin e arrestimit?

Ai nuk ishte arrestim, por rrëmbim i mirëfilltë, ashtu siç veprojnë vetëm bandat. Si mund të inskenohet për minuta të tëra bllokimi i trafikut në një nga akset kryesore të hyrjes në kryeqytet nga dhjetëra forca me maska, me armatim të rëndë dhe me makina private, të cilat bënin veprime fiktive sikur kontrollonin makinat e qytetarëve për të ardhur si banditë te makina ku udhëtoja unë bashkë me sekretarin për organizimin të Partisë së Lirisë, Artimis Peca?!

Sjellja e tyre ishte banditeske, rrugaçërore duke hyrë me forcë në automjet bashkë me automatikët me maska në kokë, pa pranuar të identifikohen se kush janë, se çfarë përfaqësojnë dhe pa paraqitur asnjë dokument ligjor apo shkresë zyrtare që urdhëronte ndalimin tim. Ndaj unë refuzova të pranoja rrëmbimin, duke besuar se mund të ishin edhe banditë si ata që rrëmbyen ishKryeministrin e Italisë, Aldo Moro. Edhe ata me uniforma policie e bënë rrëmbimin.

Me gënjeshtrat e pacipa se unë kam ushtruar dhunë duan vetëm të justifikojnë paligjshmërinë ekstreme, dhunimin e Kushtetutës dhe të ligjit, por edhe të vetë urdhrit për “arrest” të SPAK-ut. Po kështu, ata prangosën dhe rrëmbyen edhe sekretarin për organizimin të PL, Artimis Peca, për të cilin nuk kishte pasur asnjë urdhër ndalimi.

Njëkohësisht ata nuk na lejuan të kontaktojmë me avokatët dhe nuk na njohën me të drejtat tona sipas ligjit. Vetëm pas 2 orësh në Drejtorinë e Policisë, m’u dha vendimi gjyqësor, ndërsa Artimis Peca u lirua pasi nuk kishte asnjë vendim. Pra, ata kafshë, se punonjës policie s’mund t’i quash, po të kishin qenë edhe dy persona të tjerë në makinë me mua, do t’i kishin arrestuar po njësoj si Artimisin, pra për “qejf”.

Ky është rrumpallështeti i Edi Ramës, që nuk do ta ketë të gjatë. Sikur të silleshin kështu me bandat narkopolicët e Edi Ramës, nuk do ndodhnin tragjedi si kjo e Shkodrës.

E njihnit më herët burgun…?

E njoh burgun herët, që nga vitet ‘93-‘94 kur vizitoja Fatos Nanon në burgun e Bënçës edhe pa leje, edhe me leje. Po kështu nuk ndjehem i burgosur, por thjesht i izoluar në mënyrë ekstreme dhe të paligjshme vetëm për arsye shumë të forta politike. Së pari, për të paralizuar aktivitetin e Partisë së Lirisë, si forca e dytë opozitare dhe për të dobësuar reagimin dhe veprimin opozitar.

Sepse s’kishte asnjë arsye për këtë akt ekstrem kur dihet botërisht se unë gjithmonë kam qenë i hapur dhe u jam përgjigjur ftesave të SPAK-ut dhe çdo institucioni të drejtësisë. Po kështu, unë i kam pasur të gjitha mundësitë (edhe ofertat) për t’u larguar nga vendi dhe kjo jo vetëm s’ka ndodhur, por s’ka lidhje me karakterin tim, për më shumë që do justifikoja akuzat false të Ramaformës dhe do braktisja, ata që më kanë zgjedhur dhe më mbështesin.

Llogaritë e tyre për të më bllokuar e “lodhur” gjatë 10 muajve të fundit nuk funksionuan. As përpjekja e tyre për të prishur Konventën historike të 27 prillit, që miratoi 5 Prioritetet për 4 milionë shqiptarë plus. Dështuan edhe përpjekjet e mëpasshme për të bllokuar organizimin e Partisë së Lirisë dhe veprimtarinë e saj financiare, aq sa financierja e PL për 20 vite u largua nga detyra vetëm duke lënë çelësat te roja e partisë dhe pa bërë asnjë dorëzim, detyrë e sqarim të problemeve të trashëguara.

Por zgjedhjet po afrojnë dhe koha nuk u priste më ndaj vepruan në këtë mënyrë banditeske. Duan të çorodisin e trembin opozitën e vërtetë dhe të krijojnë hapësira për partiçkat ‘fake’ opozitare, që ushqehen nga regjimi, nga qeveria, bashkia dhe fondacionet famëkeqe të rekrutimit dhe shpëlarjes së mendjes të të rinjve.

Pra, ju akuzoni se SPAK çdo gjë e bën në interesin e Edi Ramës për të fituar zgjedhjet? Ku e mbështesni këtë që thoni?

Afërmendsh që po. A nuk ishte SPAK që e hoqi nga vetja “Dosjen 184” të Dibrës, të cilën e mori vesh e gjithë bota se si Edi Rama dhe ministrat e tij blinin votat? A nuk ishte SPAK në zgjedhjet e 2021, që denoncimet e opozitës për blerjet e manipulimet që po bëheshin në Elbasan nga zyrtarët e lartë të PS-së nuk i hetoi, por ia kaloi për kompetencë Prokurorisë së Elbasanit, që ishte në konflikt interesi sepse vëllai i prokurorit ishte në listën e PS për deputet?

Dhe më pas ndodhi edhe tragjedia e Elbasanit. Apo harruat se si në vend të hetonte Qeverinë dhe AKSH për keqpërdorimin e të dhënave të qytetarëve nga patronazhistët, SPAK hetoi dy gazetarët që publikuan lajmin, aq sa organizatat ndërkombëtare të medias reaguan gjerësisht. Edhe procedimi për “Metamorfozën” u bë vetëm pasi u grabitën zgjedhjet në Bashkinë e Shkodrës, edhe pse dosja ishte aty prej kohësh dhe e servirur nga agjencitë ndërkombëtare.

SPAK vepron vetëm me regji të Edi Ramës dhe në interes të garantimit të pandëshkueshmërisë së tij. Ndërkohë faktet dhe provat penale për Edi Ramën ulërasin prej vitesh, që nga inceneratori që nuk ekziston dhe quhet “krim intelektual” që tek kompania që përfiton bonus nga qeveria ende pa qenë e regjistruar dhe raste pa fund që opozita i ka denoncuar vazhdimisht.

Si i konsideroni akuzat e SPAK-ut ndaj jush?

Për fletërrufenë 165 faqe të SPAK-ut kundër meje mund të them me bindje të plotë se nuk ekziston asnjë fakt apo provë penale, por vetëm një tablo sinoptike “fake” e mbushur me thashetheme dhe insinuata nga njerëz që kanë pasur probleme me drejtësinë, si rasti i atij kallëzuesit të Fredi Belerit, që ishte një bashkëpunëtor i policisë. Nuk ekziston asnjë akt, asnjë vendim, asnjë veprim në kundërshtim me ligjin nga Ilir Meta dhe detyrimisht asnjë pasojë në dëm të interesit publik e shtetëror.

Në dosjen e Prokurorisë, akuza e parë ndaj jush renditet çështja CEZ-DIA, në gjykimin tuaj si qëndron e vërteta…?

Këtë çështje e kam ezauruar në publik prej gati 10 vitesh. Ajo është hetuar disa herë dhe Dumani me zell të madh e ka rimarrë përsipër në dhjetor 2019, pra në kulmin e përplasjeve të mia si President i Republikës me Edi Ramën dhe McGonigalët që donin të rrëmbenin tërësisht Gjykatën Kushtetuese me betime si ajo noterja te Lana. Ai e ka marrë përsipër në këmbim të premtimit se do bënte karrierë. Për më shumë se 4 vite erdhi vërdallë intervistave të inskenuara nga Dritan Prifti me personazhe absurde dhe pa asnjë integritet.

Shumica e tyre kishin problem me drejtësinë si Elvis Mataj, i cili ka qenë krahu i djathtë i Kastriot Ismailit në DIA dhe i denoncuar nga ky i fundit në Prokurori për mashtrim e vjedhje. “Rilindja” ia mbylli këtë çështje për ta përdorur në Arbitrazh në Vjenë kundër Kastriot Ismailit. Plus kësaj i mbylli edhe problemet që kishte me drejtësinë bashkëshortja e tij. Këtë personazh s’e kam takuar kurrë që nga viti 2005 kur të rinjtë e LRI e përzunë si mashtrues dhe intimidues femrash. Ndërsa nga intervista e sajuar e Vojsava Ismailit, të cilën e refuzova ta takoja si kryetar Parlamenti dhe për këtë kam njoftuar Prokurorinë e Tiranës më 2016, kanë vendosur në fletërrufe shpikjet që asaj i kanë servirur, por nuk i kanë vënë të vetmen të vërtetë që ajo ka thënë ndoshta pa dashje se, “Kastrioti lidhjet me CEZ-in i kishte krijuar vetë dhe jo nga politikanët shqiptarë”.

Dhe këtë të vërtetë SPAK-u e di shumë mirë se sa herë ka qenë Kastriot Ismaili në Çeki përpara shtatorit 2009 kur unë kalova nga opozita në qeveri. Ashtu siç SPAK i di shumë mirë lidhjet e partneres së tij amerikane në Çeki etj.. Nuk ekziston asnjë akt favorizues nga ana ime për Kastriot Ismailin dhe asnjë përfitim prej tij. Gjithçka është manipulim.

Unë njohjen dhe miqësinë me Kastriot Ismailin e kam deklaruar edhe në SPAK, që e kam pasur që në fillim të viteve ‘90. Ai ishte partner zyrtar i CEZ-it dhe i përzgjedhuri i tyre. Lidhur me spekulimin se unë gjoja kam ndërhyrë që ERE të ulë çmimin në dëm të KESH dhe favor të CEZ ky është një mashtrim i pacipë. Së pari, ERE është një ent i pavarur nga Qeveria dhe përjashtohet çdo ndikim dhe së dyti vendimi i ERE u kundërshtua nga ana jonë në të gjitha gjykatat si ministri nëpërmjet KESH-it që ishte në varësinë tonë.

Cila është përgjigjja juaj për sa u përket akuzave për lobingjet?

Me bindje të plotë konfirmoj se çdo veprim apo autorizim nga ana ime ka qenë në përputhje me ligjet shqiptare dhe amerikane. Madje, kur kam konstatuar në janar 2017 se një avokat greko-amerikan, Fideszis, kishte firmosur në emër të LSI me kompaninë “McKeon”, e kam denoncuar te presidenti i kompanisë, duke i bërë të qartë se ai s’kishte pasur autorizim nga ne për të firmosur dhe së dyti, kishte vendosur si terma bashkëpunimi çështje që ne nuk na interesonin.

Pas këtij denoncimi, Presidenti i McKeon i bëri letër zyrtare FARA (Departamenti i Drejtësisë) ku i kërkonte zëvendësimin e asaj marrëveshjeje për arsye se personi s’kishte qenë i paautorizuar nga LSI. Po kështu, pagesa prej 15.000 USD si parapagim për negociata për një marrëveshje të mundshme, që nuk u finalizua, është bërë me vendim të Kryesisë të LSI e përmes sistemit banker. SPAK e di shumë mirë se nëse ka diferenca midis pagesave të deklaruara nga LSI në KQZ dhe atyre që kanë deklaruar kompanitë e lobimit në FARA (Departamenti i Drejtësisë), se kush i ka bërë dhe si i ka bërë, por nuk i intereson ta zbardhë si çështje, sepse objektivi i vetëm i kësaj organizate policeske antiopozitë është të krijojë sa më shumë mjegull dhe tymnajë për Ilir Metën, ndërkohë që unë kurrë nuk kam autorizuar njeri për të bërë pagesa të parregullta dhe as kam qenë në dijeninë e tyre.

Po lidhur me ndërhyrjen tuaj të pretenduar nga SPAK për të ndryshuar një ligj në interes të një biznesmeni? 

Ky është një trillim i SPAK-ut, pasi dihet procedura e ligjbërjes në Kuvend si fillon dhe mbaron dhe unë s’kam asnjë lidhje me këtë rast. Kryetari i Kuvendit është vetëm një deputet në votim si gjithë të tjerët. Po për 65 deputetët e Edi Ramës që e kanë votuar këtë ndryshim ç’do të thoshte SPAK? Të paktën të përfshinte në akuzë edhe Edi Ramën si bashkëpunëtorin tim në këtë rast. Por SPAK as emrin s’guxon t’ia përmendë Edi Ramës, as te ndryshimi i destinacionit të klubit “Partizani” për të cilin mbahet prej prof. dr. Sali Berisha, lideri i Partisë Demokratike, as tek inceneratori e asgjëkund.

Z.Meta si i mbani lidhjet me Partinë e Lirisë dhe cila është perspektiva…?

Izolimi im është shumë i thellë dhe kuptohet, kjo bëhet për të më pamundësuar mbrojtjen nga akuzat e turpshme të SPAK-ut, por edhe për të dëmtuar aktivitetin tim politik dhe të Partisë së Lirisë. Jam shumë i kënaqur me solidaritetin e kolegëve dhe miqve anembanë vendit.

Unë u kërkoj të gjithëve të trefishojnë përpjekjet e tyre në publik dhe terren, të përshkallëzojnë veprimin opozitar, të mos ndalen së afirmuari 5 prioritetet tona që janë kyçe për të kaluar nga narkoshtet te shteti i së drejtës dhe nga narkoekonomia, te Shqipëria fuqi eksportuese përmes mbështetjes së prodhimit vendës, të bujqësisë e blegtorisë me pagesa direkte, të industrisë dhe sidomos të mbështetjes për kompanitë eksportuese.

Jam çdo ditë në lidhje me sekretarin e përgjithshëm të Partisë së Lirisë, Tedi Blushi dhe drejtues të tjerë kryesorë dhe kjo është një mundësi e shkëlqyer për ata që të rriten dhe forcohen në kushtet e një lufte të pamëshirshme, pa rregulla, pa moral, por që ne do ta fitojmë./ Gazeta Panorama

Deklarata e fortë e Monika Kryemadhit se zotëron disa mesazhe me Edi Ramën, është diskutuar ditë ne sotme në një emision televiziv.

Avokati Edmond Petraj tha se Kryemadhi duhet të shkojë të flasë në SPAK, pasi dosjet do vijojnë të hetohen
“Dosjet që janë në proces do të kalojnë të gjithë fazën e hetimit paraprak. Është thjesht një procedurë, çdo kush që thirret nga Prokuroria e Posaçme, që ka dijeni për ngjarjet do thirret të tregojë se çfarë di. Nuk e di se për cilën dosje po fliste Kryemadhi pasi atje janë 3 kallëzime. Janë të treja në proces dhe të treja nën hetim. Kështu që për këtë pikë ajo do shkojë atje të paraqitet patjetër.”- tha Petraj.

Edhe gazetari Ermal Peci i bëri tirrje Kryemadhit që të shkojë t’i dorëzojë të gjitha provat në SPAK, teksa shtoi se çdo politikan duhet të japë llogari për dosjet e bujshme që po hetohen.

“Monika Kryemadhi atë telefon të shkojë ta dorëzojë në SPAK dhe t’i tregojë provat se si Edi Rama është peshku i madh. Monika Kryemadhi të tregojë çfarë di, të shkojë të flasë. Ndryshe nga Ilir Meta, Kryemadhi edhe kur e ka pasur përballë Altin Dumani nuk e ka sulmuar. Në këto momente, çdo politikan shqiptar duhet të shkojë të japë përgjigje para SPAK-ut.”- u shpreh gazetari.