Month: April 2025

Me një tabelë në dorë, presidenti amerikan Donald Trump zbuloi të mërkurën tarifat e shumëpërfolura për të gjitha vendet duke nisur nga ato më kryesoret.

Ai tregoi se Kina “i ngarkon” Shteteve të Bashkuara një tarifë prej 67 për qind, kështu që Shtetet e Bashkuara do t’i ngarkojnë Kinës një tarifë prej 34 për qind.

Grafiku tregoi gjithashtu se Shtetet e Bashkuara do t’i ngarkojnë Bashkimit Evropian një tarifë 20 për qind, Vietnamit një tarifë 46 për qind, Tajvani 32 për qind, Japonia 24 për qind, India 26 për qind, Koreja e Jugut 25 për qind, Tajlanda 36 për qind.

Trump njoftoi gjithashtu një “tarifë bazë minimale” prej 10 për qind për vendet e tjera për të “ndihmuar në rindërtimin” e ekonomisë amerikane.

Fillimisht ai deklaroi se dita e sotme është “një nga ditët më të rëndësishme” në historinë amerikane, pasi ai pritet të nënshkruajë një urdhër për vendosjen e tarifave reciproke për vende të ndryshme.

“Ne kemi një lajm shumë, shumë të mirë sot”, theksoi shefi i Shtëpisë së Bardhë. “Shumë gjëra të mira po ndodhin për vendin tonë”.

Ai deklaroi se së shpejti do të nënshkruajë një “urdhër ekzekutiv historik që vendos tarifa reciproke për vendet në mbarë botën”.

“Reciproke. Kjo do të thotë se ata na e bëjnë neve dhe ne ua bëjmë atyre. Shumë e thjeshtë. Nuk mund të bëhet më e thjeshtë se kaq”, shtoi presidenti Trump.

“Është shpallja jonë e pavarësisë ekonomike”, tha Trump duke njoftuar masat e reja.

Presidenti tha se Shtetet e Bashkuara do të përdorin paratë e gjeneruara nga tarifat për të “ulur taksat tona dhe për të paguar borxhin tonë kombëtar”.

Sipas tij, 2 prilli do të mbahet mend përgjithmonë si “dita kur industria amerikane rilindi”.

“Prej dekadash vendi ynë është plaçkitur, përdhunuar nga kombet e afërta dhe të largëta, si nga aleatët ashtu edhe nga armiqtë”, vijoi ai.

Trump shpall tarifën 25% për të gjithë prodhuesit e huaj të automjeteve

Në vijim të fjalës së tij, presidenti amerikan Donald Trump deklaroi se kur bëhet fjalë për tregtinë, ndonjëherë “miku (është) më i keq se armiku”.

Ai thotë se mbi 80 për qind e makinave të prodhuara në Korenë e Jugut shiten në Korenë e Jugut, dhe mbi 90 për qind e makinave të shitura në Japoni janë prodhuar në Japoni, dhe se makinat e prodhuara në SHBA përfaqësojnë vetëm një pjesë të vogël në ato vende.

“Ford shet shumë pak” në vendet e tjera, thotë Trump, një çekuilibër që ka “shkatërruar” industritë amerikane.

“Kjo është arsyeja pse në mesnatë ne do të vendosim një tarifë 25 për qind për të gjitha automobilat e prodhimit të huaj”, tha Trump. “Këto ditë kanë mbaruar”.

Ai vazhdon të kritikojë BE-në dhe vendet aziatike për vendosjen e tarifave ndaj automobilave të prodhuar në SHBA.

Trump shtoi gjithashtu se masat që përdorin vendet e tjera janë gjithashtu “jomonetare”.

Greqia po armatoset. Sipas një vendimi qeveritar, shteti grek do të shpenzojë 25 miliardë euro për pajisjet e mbrojtjes gjatë 12 viteve të ardhshme. Plani sipas qeverisë greke kërkon të përforcojë aftësitë ushtarake të vendit dhe të nxisë industrinë e saj vendase. Plani i ri afatgjatë është i pari i këtij lloji për vendin dhe vjen ndërsa kombet në të gjithë Europën po kërkojnë të rrisin shpenzimet ushtarake përballë agresionit të vazhdueshëm të Rusisë në Ukrainë dhe një tërheqjeje të sigurisë së SHBA-së në kontinent.

“Greqia mund të jetë e vogël në përmasa, por rëndësia e saj gjeopolitike është e madhe,” u tha të mërkurën ligjvënësve kryeministri Kyriakos Mitsotakis. Më tej ai shtoi se, “Ministri i Mbrojtjes e di se ka 25 miliardë euro në dispozicion për kohëzgjatjen e programit. Ai tani do të duhet të prioritizojë dhe të bëjë zgjedhjet që janë kritike dhe të nevojshme, theksoi Mitsotakis.

Ndryshe nga shumë homologë të BE-së, Greqia nuk është e panjohur në politikat e shpenzimeve qeveritare. Ajo ka qenë historikisht një nga anëtarët e NATO-s me shpenzimet më të larta të mbrojtjes si pjesë e prodhimit të saj ekonomik, duke tejkaluar rregullisht objektivin prej 2% të PBB-së së aleancës edhe në kulmin e problemeve të saj financiare.

Kjo vjen kryesisht për shkak të rivalitetit të saj të gjatë me Turqinë fqinje, një burim tensionesh të përhershme që i ka detyruar të dy vendet të mbajnë aftësi të forta parandaluese. Gjatë pesë viteve të fundit, Greqia e bëri këtë duke blerë 24 avionë luftarakë dhe fregata Rafale nga Franca dhe duke porositur deri në 40 avionë gjuajtës F-35 nga SHBA.

Tani, me Evropën e përqendruar në lehtësimin e investimeve më të mëdha në mbrojtje, duke përfshirë një hapësirë më të madhe fiskale, Greqia kërkon të vendosë një rrugë të qartë për vitet në vijim.

Strategjia parashikon gjithashtu integrimin e teknologjive të reja të mbrojtjes në aftësitë e Greqisë për të llogaritur natyrën në ndryshim të luftës. Kjo përfshin më shumë mjete ajrore pa pilot, sisteme drone dhe anti-drone, përdorimin e AI si dhe metodat e sigurisë kibernetike, tha kryeministri.

Të dielën Mitsotakis udhëtoi për në Izrael për t’u takuar me homologun e tij izraelit Benjamin Netanyahu, si dhe me zyrtarë nga ministria e mbrojtjes e vendit dhe drejtues të lartë nga sektori i tij ushtarak. Lideri grek diskutoi mundësinë e zgjerimit të bashkëpunimit me ta, duke vënë theksin tek inovacioni dhe aftësitë teknologjike.

Dashi

Kjo ditë nuk do të jetë aspak në ritmin e duhur, pasi do të jetë e mbushur me probleme të sferës profesionale dhe ekonomike. Është një periudhë e mbushur me ulje-ngritje, ku duhet të tregoheni të durueshëm, në pritje të ditëve më të mira.

Demi

Tregohuni të kujdesshëm me shpenzimet, pasi kohëve të fundit kanë qenë të shumta. Me gjasë mund të jeni përballur me situata të paparashikueshme, por tashmë duhet munduar që ta mblidhni dorën sa më shumë, aty ku është e mundur. Sa i takon ndjenjave, situata është e tensionuar.

Binjakët

Kjo e enjte do të jetë mjaft pozitive, ku do të ketë përmirësime të ndjeshme në dashuri. Mjaft të favorizuara janë takimet, ndaj përfitoni. Keni nevojë që të argëtoheni.

Gaforrja

Ju pret një ditë e mbushur me tensione lidhur me sferën profesionale. Ndiheni disi të lodhur për shkak të detyrave të reja dhe përgjegjësive të shumta. Mundohuni që të mos nervozoheni.

Luani

Venusi do të jetë në anën tuaj dhe kjo gjë do të bëjë që të ndiheni më të fortë. Yjet favorizojnë të gjitha projektet e reja, si dhe historitë e reja të dashurisë.

Virgjëresha

Kjo e enjte do të jetë e mbushur me nervozizëm dhe aspak në ritmin e duhur sa i takon punës. Do të ndiheni të pakënaqur, për shkak se nuk do të vlerësoheni siç duhet. Lidhur me disa projekte do të ketë ngadalësime, ende pa nisur mirë.

Peshorja

Kjo ditë do të jetë mjaft pozitive dhe gjatë saj do të merrni vendime të rëndësishme, madje edhe drastike. Kjo gjë mund të ndodhë edhe në dashuri, nëse jeni përballur me keqkuptime të cilat i keni konsideruar të pazgjidhshme.

Akrepi

Do të ndiheni të lodhur gjatë gjithë kësaj të enjteje dhe nuk do të keni aspak dëshirë për të bërë asgjë, shkruan noa.al. Mundohuni që të shkarkoni nervozizmin tek të tjerët, sidomos tek njeriu i zemrës.

Shigjetari

Kjo e enjte do të jetë pozitive dhe paralajmëron një periudhë rikuperimi, pas një faze në vend numëro, sidomos sa i takon dashurisë. Mundohuni që të jeni më entuziast, pasi në të kundërt rrezikoni që të mërziteni.

Bricjapi

Mund të ketë probleme në sferën sentimentale lidhur me të kaluarën, por që do arrini që ti kapërceni, sidomos nëse arrini që të rifitoni besimin dhe optimizmin. Yjet do të kenë ndikim pozitiv për të lindurit e kësaj shenje, duke bërë që ta rimerrni veten.

Ujori

Duhet të mundoheni që të rishikoni shpenzimet, pasi keni nxjerrë shumë më shumë nga sa kanë hyrë. Mund të ketë debate, pikërisht lidhur me paratë.

Peshqit

Kjo ditë do të nxjerrë në pah disa probleme në dashuri, ku mund të ketë tensione, ndoshta për shkak të problemeve që keni patur më parë. Mundohuni që të sqaroni gjithçka sa më parë.

Publiku u trondit teksa këngëtari i njohur turk Volkan Konak u rrëzua gjatë koncertit të tij në Qipro të dielën mbrëma.

Artisti 58-vjeçar u rrëzua teksa këndonte. Ai mori ndihmën mjekësore dhe u dërgua me urgjencë në Spitalin Shtetëror të Famagustës, ku ndërroi jetë pak kohë më vonë.

Videoja e shembjes së Volkan Konak është bërë virale në 24 orët e fundit. Këngëtari shfaqet në skenë me anëtarët e grupit të tij. Teksa ecte drejt fundit të skenës, ai papritur u rrëzua. Sapo e kuptuan këtë, anëtarët e grupit të tij dhe organizatorët e ngjarjes nxituan drejt tij. Ai vetë dukej i pajetë.

Me gjithë përpjekjet, këngëtari nuk mundi të rikthehej në jetë. Në orën 12:42 të mëngjesit u konfirmua vdekja e tij.

Kreu i Partisë Demokratike, Sali Berisha ka bërë një premtim se nuk do të “ketë urbanizim pa legalizim”. Madje, për ta bërë edhe më të besueshëm për banorët premtimin e tij, Berisha ka firmosur “live” përpara tyre një letër.

Dokumenti me 6 pika që kreu i PD-së firmosi kishte të bënte me legalizimin e banesave, si një kontrate e tij me banorët.

Ja çfarë përmban ky premtim i Berishës:

1. Shpronësim i drejtë sipas vlerës reale të tregut.

2. Trajtim me bonus qiraje të përshtatshme

3. Rishikim i projektit për të shmangur prishjet e panevojshme

4. Legalizim i përshpejtuar i banesave

5. Përfshirja e banorëve në vendimmarrje

6. Mbrojtje ligjore e pronës dhe siguri juridike

Tajvani është rrethuar përsëri nga ushtria kineze. Kjo pasi Pekini ka nisur stërvitjet ushtarake në shkallë të gjerë rreth Tajvanit, raundi i fundit në fushatën e përshkallëzuar të Pekinit për të pohuar pretendimet e saj për sovranitet dhe për të shtypur përpjekjet e kombit ishull për të ruajtur pavarësinë de facto të tij.

Stërvitjet filluan ndërsa Presidenti i Tajvanit Lai Ching kërkon të përmirësojë gatishmërinë ushtarake dhe civile për një sulm të mundshëm kinez dhe të forcojë shoqërinë për t’u mbrojtur kundër spiunazhit dhe infiltrimeve të tjera nga Kina, të cilën muajin e kaluar ai e quajti një “forcë të huaj armiqësore”.

Ushtria Çlirimtare Popullore tha se forcat detare, ajrore, tokësore dhe raketore po praktikonin “marrjen e kontrollit të plotë, sulmet mbi objektivat detare dhe tokësore dhe operacionet e bllokadës”.

Roja Bregdetare e Kinës njoftoi gjithashtu “patrulla të zbatimit të ligjit”, të cilat tha se do të ushtronin inspektimin, përgjimin dhe ndalimin e “anijeve të pajustifikuara”.

Lëvizjet e së martës dukej se përfshinin manovrat detare më gjithëpërfshirëse deri më tani. Sipas ministrisë së mbrojtjes së Tajvanit, 19 anije të PLA operuan në ujërat pranë Tajvanit midis të hënës dhe të martës në mëngjes.

Aeroplanmbajtësja kineze Shandong hyri të hënën në zonën e reagimit të ushtrisë tajvaneze, një zonë e vetëshpallur që shtrihet përtej ujërave territoriale dhe hapësirës ajrore të saj, ku forcat e armatosura monitorojnë dhe vënë nën hije lëvizjet ushtarake të huaja.

Roja bregdetare e Kinës i quajti stërvitjet e saj “veprime konkrete për të ushtruar juridiksion dhe kontroll legjitim mbi ishullin në përputhje me parimin e një Kine”. Ai publikoi një hartë që tregonte se të paktën tre flotilje po vepronin rreth Tajvanit.

Një zyrtar i lartë i sigurisë së Tajvanit i tha Reuters, se Pekini duhej të shmangte çdo “konfrontim të perceptuar” me Uashingtonin përpara bisedimeve tregtare SHBA-Kinë, dhe kështu Tajvani është bërë një pretekst.

“Tajvani është justifikimi i tyre më i mirë. Kjo është arsyeja pse ata zgjodhën të nisin stërvitje të tilla ushtarake sapo sekretari amerikan i mbrojtjes të largohej nga Azia,” tha zyrtari tajvanez.

Ngjarjet e këtyre orëve nuk mund të klasifikohen si lojërat e zakonshme ushtarake dhe propagandistike. Sipas analistëve, Pekini dëshiron t’i dërgojë një mesazh Shtëpisë së Bardhë. Loja për jetën e ishullit që për më shumë se shtatëdhjetë vjet i ka rezistuar ambicieve kineze të inkorporimit po luhet në aksin Uashington-Pekin.

Dhe me siguri politika e jashtme e Donald Trump, e cila ndëshkon aleatët me tarifa, “këshillon” Kanadanë të bëhet territori i pesëdhjetë e një i Shteteve të Bashkuara, pretendon Kanalin e Panamasë, kërcënon Groenlandën me pushtim, mund ta bëjë Xi Jinping të mendojë se ka ardhur koha për të ndërmarrë veprime në Tajvan.

Xi sigurisht e pa se si Trump e trajtoi ukrainasin Zelensky si një “diktator pa legjitimitet”, në mënyrë që të vendoste një armëpushim dhe të afrohej më shumë me Putinin.

Dhe duke denoncuar Lai Ching si një “provokator separatist”, Xi sugjeron që lideri tajvanez duhet të trajtohet në të njëjtën mënyrë që Trump e ka trajtuar udhëheqësin ukrainas.

Presidenti amerikan Donald Trump u ka thënë njerëzve në rrethin e tij të ngushtë se Elon Musk së shpejti do të japë dorëheqjen nga posti i tij në qeverinë amerikane, shkruan Politico.

Sipas raportit, Musk do të japë dorëheqjen në javët e ardhshme si kreu i Departamentit të Efikasitetit të Qeverisë (Doge), i cili u formua me qëllim të shkurtimit drastik të shpenzimeve qeveritare.

Sipas të njëjtit raport, presidenti republikan mbetet i kënaqur me iniciativën e Musk dhe Doge, por ata kanë vendosur bashkërisht ditët e fundit se së shpejti do të vijë koha që Musk të kthehet në bizneset e tij dhe të marrë një rol mbështetës, sipas tre personave të afërt me Trump, të cilët folën në kushte anonimiteti.

Tesla po përjeton një “ulje” në shitje kohët e fundit dhe Musk kërkon të gjejë mënyra për ta ringjallur atë.

Tërheqja e Musk vjen pasi disa të brendshëm dhe shumë aleatë të jashtëm të administratës Trump janë frustruar me sjelljen e tij të paparashikueshme dhe e shohin gjithnjë e më shumë miliarderin si një përgjegjësi politike, një dinamikë që u shfaq plotësisht të martën kur një gjykatës konservator Musk e kishte mbështetur fuqimisht humbi nominimin e tij për një vend në Gjykatën e Lartë të Wisconsin me 10 pikë diferencë.

Ai gjithashtu përfaqëson një ndryshim të mprehtë në marrëdhëniet Trump-Musk nga një muaj më parë, kur zyrtarët e Shtëpisë së Bardhë dhe aleatët parashikuan se Musk ishte “këtu për të qëndruar” dhe se presidenti i SHBA do të gjente një mënyrë për të kapërcyer afatin 130-ditor.

Një zyrtar i lartë i administratës tha se Musk do të mbajë një rol jozyrtar si këshilltar dhe të vazhdojë të jetë një fytyrë e rastësishme rreth ambienteve të Shtëpisë së Bardhë. Një tjetër paralajmëroi se kushdo që mendon se Musk do të zhduket tërësisht nga orbita e Trump, po “mashtron veten”.

Luizi dhe Kiara janë një nga çiftet më të ndjekura të momentit.

Çifti janë prindër të një vajze të quajtur Luna Mari, por mesa duket Luizi ka ndarë disa detaje të vogla që Kiara është shtatzënë për herë të dytë.

Në imazhet e fundit që ka publikuar moderatorja dhe komenti i këngëtarit ka marrë gjithë vëmendjen ku shprehet: “Siç e shikoni pra zonja dhe zotërinj, me rastin e rikthimit të linjave që Kiara dëshironte (që për mua është kukull edhe po të futet në thes) besoj se ka ardhur koha ta bëjmë Lunën me një motër”.

Andaj ndjekësit kanë aluduar se ndoshta këto janë detajet e para që zbuloi Luizi.

Nëse ka diçka të sigurt për Cristiano Ronaldon, është se atij nuk i pëlqen të zëvendësohet asnjëherë gjatë një ndeshje.

Në rastet kur kjo ndodh, ai nuk ngurron ta shfaqë hapur zhgënjimin. Të njëjtën gjë bëri edhe në sfidën e fundit të Al Nassr ndaj Al Khoolod.

Ronaldo u pa i zhgënjyer kur trajneri Stefano Pioli vendosi ta zëvendësojë.

Tekniku italian mund të ketë menduar se ky zëvendësim do e ruante Ronaldon nga lodhja, por rrezikon t’i kushtojë stolin e sauditëve.

Sipas raportimeve nga mediat pranë klubit, thuhet se në dhomat e zhveshjes ka pasur një përballje të ashpër mes të dyve, e cila mund të ketë pasoja.

Pioli rrezikon shkarkimin nga drejtimi i Al Nassr. Përveç përplasjes me Ronaldon, i cili është padyshim më i rëndësishmi në skuadër për shumë faktorë, Pioli nuk ka në favor as rezultatet.

Vendi i tretë në renditje, 10 pikë pas kryesuesve të Al Ittihad, e bëjnë edhe më të mundshëm vendimin për shkarkim.

Në Itali janë disa skuadra që po ndjekin me kujdes situatën e Piolit, pasi do të ndryshojnë trajner në verë. Roma duket në avantazh për momentin, por javët e ardhshme do të jenë vendimtare.

Portali WebLajm raporton se disa javë më parë, pas mesnate, sistemi i alarmit në SPAK u aktivizua. Oficerët e BKH-së morën një sinjal telefonik që tregonte se dikush kishte hyrë në mënyrë të paautorizuar në rrjetin e tyre.

Sipas WebLajm.com, ndër kompjuterët ku Arnold Rrokaj – i arrestuar për këtë ngjarje – kishte akses, ishin edhe ato të prokurorëve Behar Dibra, Enkeleida Millonai dhe Elida Kaçkini.

Këta tre hetues po punojnë mbi dosje të rëndësishme që përfshijnë raste nga krimi i organizuar deri te zyrtarët e dyshuar për korrupsion.

Menjëherë pas sinjalit të alarmit, agjentët e BKH-së dhe stafi i Teknologjisë së Informacionit u paraqitën në punë atë mesnatë. Nga hetimet rezultoi se autor i këtij veprimi ishte Arnold Rrokaj, i cili i kishte shpërndarë materialet e marra te Zambak Gjonaj ish zyrtar i burgut Vlorë dhe më pas te shokët dhe të njohurit e tij.

Portali WebLajm raporton më tej se disa nga këto materiale kanë përfunduar në celularin e ish-kreut të burgjeve, Agim Ismaili, si dhe te Dritan Palnikaj, aktualisht sekretar në Ministrinë e Arsimit.

Palnikaj u pyet disa ditë më parë nga SPAK, ndërsa telefoni i tij u kontrollua nga hetuesit.

Ndër materialet e vjedhura nga email-et e prokurorëve ndodhen edhe ato që lidhen me zyrtarë të hetuar, çështjen e inceneratorëve dhe krimin e organizuar. Falë ndërhyrjes në kohë, u parandalua aksesimi nga Rrokaj i rrjetit të laboratorit sekret dhe kompjuterëve të drejtuesve të SPAK.

Ky skandal dhe ndërhyrje e paautorizuar është ende duke u hetuar. Ndërsa disa materiale rezultojnë të kenë përfunduar edhe tek telefona politikanësh./WebLajm