Author: admin

Ylber Jaku, vrasësi i 34-vjeçarit Rushit Sallahi pasditen e sotme në Has, ka lënë një mesazh në Facebook përpara se të kryente krimin e rëndë

Jaku, i cili ishte kthyer nga Britania e Madhe vetëm një ditë më parë, ka shkruar në rrjetet sociale arsyet pse e kanë shtyrë drejt krimit të rëndë.

Pa shumë detaje, ai lë të nënkuptohet se familja e tij ka pasur përplasje të vazhdueshme me familjen e autorit, dhe siç u raportua më herët, vetëm një ditë më parë, motra 21-vjeçare e viktimës Rushit Sallahi, i ka dhunuar prindërit e Jakut, për çka edhe u arrestua nga policia.

“Shërbimet sekrete shqiptare kanë vënë rrugeçër për të fyer anëtarët e familjes time. Më duhej të hiqja qafe njërin prej tyre, arsyeja është e qartë, për t’i dhënë një mësim të tjerëve që prisnin në radhë për t’u treguar të fortë me mua dhe familjen time”, shkruan Ylber Jaku ndër të tjera.

Dyshohet se përveç përplasjeve fizike dhe verbale, dy familjet mund të kenë patur edhe konflikt pronësie.

Një aksident i rëndë automobilistik është regjistruar këtë të mërkurë në aksin Fier-Lushnjë, në vendin e quajtur “ Kryqëzimi i Vajkanit”.

Nga informacionet paraprake mësohet se një kamion është përplasur me një autoambulancë dhe për pasojë kanë mbetur të plagosur 4 persona.

Dy prej të plagosurve ndodheshin në ambulancë, të cilët janë transportuar me urgjencë në spitalin e Fierit ku po marrin ndihmë mjekësore.

Si pasojë e bllokimit të trafikut është krijuar edhe radhë e gjatë automjetesh. Policia ndodhet në vendin e ngjarjes.

Eksperti i pasurive të paluajtshme, Indrit Abdiu, analizoi në” Top Talk Economy” situatën e pasurive të paluajtshme në vendin tonë.

Çmimet e apartamenteve po shënojnë sërish rritje, por a do të ketë ndryshime? Indrit Abdiu gjatë bisedës u ndal tek zonat ku mund të investohet dhe kur është koha e duhur për të investuar.

“Në kryeqytet është shumë e vështirëm momentalisht të gjesh banesë me çmim 1000 euro metri katror. Mesatarja në zonat qendrore llogaritet rreth 2000 euro metri katror dhe në zonat e tjera përreth mund të gjesh apartamente edhe 1300-1500 euro metri katror. Për çiftet e reja mund të konsiderohen zonat periferike që tani po zhvillohen dhe mund të gjesh apartamente me vlerë më të përballueshme, si psh zona e Paskuqanit që tani ka një plan të ri zhvillimi.

Nëse bëhet një proces rivlerësimi, që ishte hedhur si ide për t’u realizuar që në maj 2024, por mund të bëhet në 2026, kjo pritet t’i rrisë sërish çmimet. Kjo do ndodhë sepse, në momentin kur u hodh ideja për procesin e rivlerësimit, njerëzit ishin të gatshëm për ta nxjerrë pronën në treg. Por në momentin që nuk u realizua, këta individë u tërhoqën nga ky proces sepse taksa në momentin që do e shisnin pronën do ishte më e lartë. Kjo ka bërë që të ulet oferta dhe duke u ulur oferta, blerësit duke mos patur shumë opsione për të blerë, do mbeten ‘peng’ për të blerë ato pak opsione që ndodhen. Dhe nëse në këto kushte më pas do kishte rritje të ofertës, edhe rritja e kërkesës do sillte rritje të çmimeve.

Sa i përket qirave, njerëzit kanë filluar të shtyjnë tregun drejt qirave afatshkurtra se sa tek ato afatgjata. Por pronat e qirave janë rritur ndjeshëm.”– tha ai.

Kreu i Partisë Demokratike, Sali Berisha, zhvilloi mbrëmjen e sotme takimin përmbyllës të fushatës elektorale në qytetin e Elbasanit, përpara stadiumit “Elbasan Arena”. Gjatë fjalës së tij, Berisha u ndal te regjimi 12-vjeçar i qeverisjes aktuale, të cilin e cilësoi si burim të krimit dhe bandave në vend.

Ai lëshoi akuza të rënda ndaj Taulant Ballës duke e akuzuar se është i përfshirë në porositje vrasjesh dhe arrestimesh, në bashkëpunim me figura të njohura të botës së krimit dhe eksponentë të njohur kriminalë në këtë qytet.

Ndërkohë që Berisha mbante fjalimin, një incident i pazakontë ndodhi në turmën e simpatizantëve. Një përleshje masive shpërtheu mes pjesëmarrësve, ku sipas burimeve nga vendngjarja, shkak i konfliktit ishte një përplasje e fortë mes disa kandidatëve të listës së PD-së në Elbasan.

Ende nuk është i qartë shkaku i konfliktit të dhunshëm mes një grupi demokratësh gjatë këtij mitingu.

Në pamje duken disa persona duke u përplasur me njëri-tjetrin me grushte dhe shqelma.

Ekspertët e Universitetit Yale kanë identifikuar një gjendje shqetësuese të lidhur me vaksinat mRNA kundër COVID-19 – e cila, sipas tyre, është treguar se ndikon në biologjinë e trupit tuaj.

“Sindroma pas vaksinimit” është një sëmundje e mëparshme e paidentifikuar, që duket se shkakton intolerancë ndaj ushtrimeve fizike ose lodhje, tringëllimë në veshë (tinnitus), marramendje dhe mjegullim të trurit, ndër simptoma të tjera.

Vite pas marrjes së injeksionit fillestar dhe dozave përforcuese, pacientët mund të shfaqin gjithashtu ndryshime të dukshme biologjike – si ndryshime në qelizat imune dhe prania e proteinave të koronavirusit në gjakun e tyre.

“Nga mostrat e gjakut të pjesëmarrësve, studiuesit kërkuan veçori imune që ndryshonin midis dy grupeve. Ata zbuluan disa dallime në popullatat e qelizave imune; ata me PVS kishin nivele më të ulëta të qelizave efektore CD4+ T dhe nivele më të larta të TNF-alpha+ CD8 T, të dyja lloje të qelizave të bardha të gjakut – ndër dallime të tjera,” sipas platformës së lajmeve të Yale.

“Kjo ishte befasuese, të gjenim proteinën spike në qarkullim në një pikë kaq të vonë,” shtoi Dr. Akiko Iwasaki. “Nuk e dimë nëse niveli i proteinës spike po shkakton simptomat kronike, sepse kishte pjesëmarrës të tjerë me PVS që nuk kishin asnjë nivel të matshëm të kësaj proteine. Por mund të jetë një mekanizëm që qëndron pas kësaj sindrome.”

Për më tepër, kjo gjendje duket se riaktivizon virusin Epstein-Barr, i cili mund të shkaktojë simptoma të ngjashme me gripin, probleme nervore dhe ënjtje të nyjeve limfatike.

Këngëtari i njohur G-Bani, nëpërmjet një video, u ka bërë thirrje gjithë qytetarëve shqiptarë për të votuar numrin 1, PD-ASHM.

G-Bani thotë se tashmë të gjithë kanë mundësinë të ndryshojnë qeverisjen në vend, ndërsa e cilëson qeverinë Rama si diktaturë, njëlloj me kohën e Enver Hoxhës.

“Data 11 Maj tani afër, janë zgjedhjet. Sigurisht dhe unë përfshihem në biseda. Kam qenë qysh i vogël i ndjeshëm ndaj këtyre çështjeve, sepse kam qenë viktimë e tranzicionit ekonomik, politik.

Këtë radhë duhet t’ja japim opozitës. Harrojeni këtë përrallën që na shesin partia në pushtet.

Jo po Sala… Lëre se nuk ka Sala. Ai është lider historik, nuk ja jep Salës, duhet t’ja japësh opozitës se nuk ju jepet më këtyre që thonë ‘të kisha vite jetë ja jap liderit’, si dikur në kohën e Enverit.

Sepse gjithë dashurinë që i kemi dhënë Edi Ramës, ato vite, ja dhamë sepse menduam se do ishte diçka ndryshe, por jo se do të bëhej një Enver në vend të Enverit.

Menduam se nuk do lejonte asnjëherë dita për të thënë: Marrsh nga vitet tona, nga jeta jonë… siç i thoshin atëherë Enverit.

Tani, ky u bë tiran, diktator komplet. Nuk guxon njeri të flasë, të thotë një fjalë”, është shprehur këngëtari G-Bani.

VIDEO

Për një minutë e njëzeteshtatë sekonda, kontrollorët e trafikut ajror në Filadelfia humbën kontaktet audio dhe radar me rreth dhjetë avionë, me mbi dy mijë pasagjerë në bord që në atë moment ishin nën mbikëqyrjen e tyre.

Pa përmendur avionët e tjerë që po afroheshin dhe avionët privatë. Një kohë e pafund, edhe sepse nuk kishte asgjë tjetër për të bërë veçse të prisnin rikthimin sinjalit të sistemeve. Kur gjithçka u rikthye në funksion në sallën e qendrës së kontrollit, më në fund të merrnin frymë të lehtësuar: Avionët ishin ende në fluturim.

Blackout-i
Këto janë disa nga detajet më të pabesueshme të problemit informatik që ndodhi më 28 prill në Tracon, kontrolli terminal i Filadelfias, qendra që menaxhon një pjesë të rëndësishme të trafikut ajror, që solli pezullimin për disa orë të lëvizjeve në një nga aeroportet kryesore të Nju Jorkut.

Anulimet
Pasojat ndihen ende sot. United Airlines, operatori kryesor po anulon mesatarisht 35 fluturime në ditë, një në dhjetë nga ato të planifikuara, deri sa situata të rikthehet në normalitet. Dhe mund të duhet ende kohë, pasi siç ka sqaruar Administrata Federale e Aviacionit (FAA) ka mungesë stafi në qendrën e radarit: disa nga kontrollorët e përfshirë kanë marrë pushim për t’u rikuperuar nga stresi i shkaktuar nga disa blackout-e të fundit.

Brenda “Tracon”-it
Gjithçka nis pak pas orës 13:30 më 28 prill. Në atë moment, kontrollorët e sektorit të “Tracon” në Filadelfia që po menaxhonin fluturimet drejt Newark-ut, shohin monitorët e tyre që fiken papritmas. Mundohen të lidhen me pilotët përmes radios, por konstatuan se nuk funksionon as sistemi i komunikimit.

Britma dhe sharje
Në atë moment sipas rrëfimit në biseda me kolegët nga ata që ishin në sallë dëgjohen britma dhe sharje, nis një garë për të njoftuar sektorët e tjerë të qendrës radar për të ngadalësuar trafikun, devijuar avionët që po vinin dhe për të shmangur ndonjë katastrofë në qiell. Kontrollorët nuk mund të bënin gjë tjetër përveçse të prisnin që sinjali i sistemeve të rikthehej. Ndërprerja zgjati 87 sekonda.

“Nuk e dimë ku ndodheni”
Rreth orës 13:45 mbetet ende ndonjë problem. “Nuk funksionon radari, nuk e dimë ku ndodheni”, i thotë një kontrollor pilotëve të fluturimit United nga Charleston për në Newark, duke u kërkuar të shikojnë përreth vetes. Nga frika e ndonjë defekti tjetër dhe për të shmangur incidente, në orën 13:53 FAA vendos një «ndalim tokësor» për Newark: Ndalohen në aeroportet e nisjes të gjithë avionët që ishin nisur drejt këtij aeroporti. Ky ndalim zgjat deri në orën pesë të pasdites. Ndërkohë, ishte e nevojshme të zëvendësohen 5 kontrollorë që ndaluan së punuari për shkak të “traumës” së pësuar nga ngjarja.

Mungesa e sistemeve të dublimit
“E vetmja anë pozitive e kësaj ngjarjeje, nëse mund ta quajmë kështu, ishte fakti që ndodhi në një orar ku volumi i trafikut nuk ishte maksimal dhe distanca midis avionëve është zakonisht më e madhe”, tha një burim. Struktura informatike e disa qendrave radar në SHBA është kaq e vjetër sa që nuk ekziston “sistem dublues”: Nëse ndodh një blackout, nuk ka ndonjë sistem paralel që merr përsipër funksionin, ndaj duhet pritur derisa gjithçka të rikthehet.

Konfirmimi
“Kolegët e qendrës në Filadelfia humbën përkohësisht radarët dhe komunikimet me avionët që kishin nën kontroll, duke mos qenë në gjendje t’i shihnin, t’i dëgjonin apo të flisnin me ta”, konfirmoi në një deklaratë Shoqata Kombëtare e Kontrollorëve të Trafikut Ajror. Dhe lë të kuptohet se kjo nuk ishte ndërprerja e parë. Disa ekspertë theksojnë se këto janë probleme shumë të veçanta dhe të rrezikshme.

Ndikimi në Newark
Që atëherë janë anuluar mbi 400 fluturime dhe mbi 1.500 kanë pasur vonesa vetëm në Newark, sipas platformës FlightAware. Ndërsa CEO i United, Scott Kirby, në një mesazh për klientët shkroi se “për shumë vite kemi qenë të qartë dhe kemi përsëritur nevojën për përmirësimin e sistemit të kontrollit të trafikut ajror në Newark”. Sistem që, sipas tij në ditët e fundit ka pasur probleme në më shumë se një rast.

Qasja e FAA
FAA ka shpjeguar se po “punon për të siguruar që pajisjet aktuale të telekomunikacionit të jenë më të besueshme në zonën e Nju Jorkut”. Dhe kujtoi se kur ndodhin probleme me personelin apo pajisjet, agjencia federale e aviacionit do të garantojë sigurinë duke ngadalësuar ritmin e mbërritjeve në aeroport.

Mungesa e kontrollorëve
FAA nuk e përmendi mungesën e kontrollorëve të trafikut ajror. Në të gjithë vendin mungojnë rreth 3 mijë nga niveli i konsideruar optimal dhe për të formuar të rinj duhen vite. Jo vetëm kaq, në dekadat e fundit, agjencia federale e aviacionit është përballur me vështirësi të lidhura me plakjen e sistemeve të kontrollit të trafikut ajror, thuhet në një raport të dhjetorit të kaluar nga Zyra e Përgjegjësisë Qeveritare.

Fushata elektorale në Shqipëri është drejt fundit! Nga liderët e dy partive, Edi Rama dhe Sali Berisha, kandidatët e tyre dhe emrat e rinj në politikë, dolën përpara popullit me stilin e tyre dhe me kombinime jo të paqëllimshme.

Një ditë më parë në emisionin “Ftesë në 5”, në Top Channel, u ngritën pyetjet “si janë veshur përgjatë fushatës, qoftë burrat apo gratë që garojnë?”. “Çfarë mesazhesh përçuan me veshjen që zgjodhën përgjatë ditëve të fushatës elektorale?”.

Ish-kryeministri, Sali Berisha, nuk e tradhtoi stilin e një jete, me kostum dhe këmishë, por kësaj radhe shtoi edhe një kapele blu me numrin 1, numri rendor në fletën e votimit.

Detaji te cepi i dorës te Rama që askush nuk e di! Çfarë mesazhi jep kryeministri me veshjen e tij në fushatë?

Stilistja e njohur, Rezarta Skifteri, u shpreh se kreu i Partisë Demokratike ka ardhur më sport kësaj radhe, por që akoma mbetet nën kornizat e klasikes së tij.

“Mua në këtë fushatë më ka pëlqyer goxha. Sali Berisha është sigurisht më ndryshe, më sport, po ngelet nën kornizat e klasikes së tij. Gjë që unë edhe kur kam qenë në moshë të vogël kur ka dalë Sala, mbaj gjithmonë mend kollare dhe papion. Është gjithmonë e njëjtë, figura që nuk gabonte asnjëherë, në çdo dalje të tij ka qenë me këtë element”, tha Skifteri.

Ndërkohë ekspertja e çështjeve të komunikimit, Anisa Bahiti, u ndal te mesazhi që ish-kryeministri ka dashur që të japë me paraqitjen e tij me kapelën e minatorit.

“Me kapelën e minatorit ka një kod shumë të thjeshtë në gjuhën e politikës dhe ndërmjet atij që del përpara popullit. Është për të treguar se shiko ‘unë jam këtu me ju, për ju, me hallet tuaja’. Çfarë bëri Barack Obama në fushatën e tij? Një nga gjërat më interesante dhe koduese si të themi, ishte se sa herë bënte fjalimet bënte një intervistë, merrte këmishën e tij dhe e përthyente lart. Çfarë do të thotë kjo? Do të thotë ‘unë jam njëjtë si ju, unë jam me popullin tim’. Zelensky ça ngjyre përdor? Jeshile të errët, ushtarake, që do të thotë ‘shumë afër popullit tim dhe me popullin tim’ dhe nuk e ndërron atë”, tha Bahiti.

Ndërsa sipas gazetarit të njohur, Milaim Zeka, politikanët janë duke iu përshtatur elektoratit.

“Ti mund të kesh një hotel me 5 yje, në qoftë se klientelën e ke me 1 yll, është krejt muhabet koti. Këta po i përshtaten elektoratit. Berisha në këtë rast iu ka përshtatur minatorëve, askujt tjetër. Edi Rama e sheh që pjesa dërrmuese e këtij populli janë tallava, domethënë muzika tallava, mendimi tallava, fjalimet tallava, veshjet tallava. Veshja ka shumë rëndësi sidomos në fushata”, tha Zeka.

Këshilluesja e imazhit, Esmeralda Zoto, u shpreh se Sali Berisha është për t’u përgëzuar në këtë fushatë elektorale.

“Për t’u përgëzuar është lideri Sali Berisha që mua më ka surprizuar këtë fushatë. Një moment fantastik ishte hyrja e tij me syze aviatori”, tha Zoto.

Një adoleshent shqiptar 16-vjeçar, Marvin Gjuzi, është shpallur i zhdukur në Irlandë dhe autoritetet lokale janë në kërkim të tij prej disa ditësh.

Policia irlandeze ka publikuar një njoftim zyrtar ku jepen të dhënat e Marvin Gjuzit dhe është shpërndarë gjithashtu edhe fotografia e tij.

Sipas informacionit të publikuar, ai është parë për herë të fundit më 1 maj, rreth orës 13:00, duke lëvizur në drejtim të Monagh Bypass.

Në njoftim theksohet shqetësimi për sigurinë e të riut dhe u bëhet thirrje qytetarëve që, nëse kanë ndonjë informacion mbi vendndodhjen e tij, të kontaktojnë policinë në numrin 101 dhe të përmendin referencën 1569 – 01/05/25.

Nadir Elezaj, u paraqit në Gjykatën e Kurorës së Liverpoolit të premten, më 25 prill, ku u dënua me një total prej 39 muajsh burgim në një Institucion për të rinj. Ai u dënua gjithashtu për dy vepra penale në Merseyside: prodhim kanabisi dhe vjedhje të energjisë elektrike. Një nga oficerët e ndoqi, Elezaj u arrestua dhe u kontrollua për posedim droge. Policia i gjeti të riut shqiptar një numër qesesh me kanabis që i kishte hedhur në shkurre.

Elezaj dha emrin e tij dhe pretendoi se kishte mbërritur në Ipswich një ditë më parë, duke deklaruar se nuk jetonte aty. Ai refuzoi të jepte kodin PIN për telefonin e tij. Oficerët ishin në dijeni të rasteve të tjera ku personat e arrestuar për furnizim me kanabis blinin biçikleta, ndaj policia bëri hetime në një shitës me pakicë në zonë rreth shitjeve të fundit dhe oficerëve iu dha një adresë në Wherstead Road.

Qiradhënësi u dha leje oficerëve për të kontrolluar ambientet ku jetonte adoleshenti dhe në papafingo u gjet një portofol që mbante kartën e identitetit të Elezajt, së bashku me një patentë shoferi rumune të falsifikuar që tregonte foton e tij, por me një emër tjetër. 162 qese kanabisi u gjetën nën shtrat. Dhoma e ndenjes kishte gjithashtu një shtrat ku u gjetën 139 qese kanabisi, si dhe një total prej mbi 2,220 £ cash. Vlera totale e kanabisit të sekuestruar në vendin e arrestimit dhe në banesën ku u gjet portofoli i Elezajt ishte rreth 12,500 £.

Kur u mor në pyetje, Elezaj mohoi përfshirjen e tij në shitjen e drogës dhe përgjigjja e tij ndaj pyetjeve ishte: pa koment. Ai u lirua nga policia, me kusht që të banonte në akomodimin e tij për të rinj në Kent dhe të paraqitej rregullisht në stacionin lokal të policisë. Analiza e telefonit të Elezajt dha prova të mëtejshme për përfshirjen e tij në furnizimin me kanabis, gjurmët e gishtërinjve të tij u gjetën në paketimet e kanabisit të sekuestruare nga policia në banesën e tij në Wherstead Road.

Elezaj nuk iu përgjigj kërkesës për lirim me kusht dhe nuk u paraqit asnjë herë në stacionin e policisë në Kent dhe punonjësit e qendrës për të rinj ku ai duhej të akomodohej njoftuan se ai ishte larguar. Shërbimi i Prokurorisë së Kurorës më pas autorizoi akuza për veprat penale në Suffolk më 6 shtator 2024. Më 21 shkurt 2025 Elezaj u kap nga Policia e Merseyside në një fabrikë kanabisi. Ai u akuzua dhe u la në paraburgim si për veprat penale në Merseyside ashtu edhe për ato të kryera në Suffolk.

“Nadir Elezaj ka treguar përbuzjen e tij të qartë për sistemin e drejtësisë, pasi u kap nga ne për vepra penale të drogës në Suffolk, ai nuk e përmbushi lirimin me kusht dhe u zhvendos në Merseyside ku vazhdoi të kryente të njëjtin aktivitet”, tha Rreshteri Dave Logan, i ekipit Sentinel South.

“Ai u gjet si rezultat i bastisjeve proaktive që synonin bandat e krimit të organizuar dhe ne jemi mirënjohës ndaj kolegëve tanë në Policinë e Merseyside për gjetjen e tij dhe sjelljen e tij para drejtësisë”, përfundoi Logan.