Author: admin

Në Shqipëri, paga mesatare mujore bruto për vitin 2024, sipas INSTAT, arriti në 77.5 mijë lekë/ muaj, ose rreth 770 euro.

Në krahasim me një vit më parë, paga u rrit me 9.8% në vlerë nominale, ndërsa rritja reale, e indeksuar me inflacionin ishte 7.6%.

Në krahasim me vitin 2014 (viti më i hershëm që ka informacion INSTAT), kur ishte 40.5 mijë lekë, paga në vlerë nominale është rritur me 70%, ndërsa e indeksuar me inflacionin, rritja reduktohet në 42.4%.

Ritmet e rritjes së pagave kanë qenë më të forta dy vitet e fundit, të ndikuara kryesisht nga pagat e administratës, pas politikës së qeverisë që përdori buxhetin për të ndryshuar strukturën e pagave në administratën publike, në një garë për të barazuar pagat me rajonit.

Pavarësisht kësaj lëvizjeje, rajoni ka ecur shumë më shpejt në rritjen e pagave, sipas të dhënave që Monitor përpunoi bazuar në instituteve statistikore përkatëse. Me përjashtim të Kosovës, pagat në Shqipëri mbeten rreth 30% më të ulëta se në vendet e tjera të rajonit.

Paga më e lartë mesatare mujore bruto është në Serbi, më 1150 euro në muaj (135,403 dinarë serbë). Në Bosnjë dhe Hercegovinë, paga është gati 1100 euro (2140 Bam). Në Mal të Zi paga është 1083 euro. Edhe Maqedonia e Veriut paguan mesatarisht punonjësit me më shumë se një mijë euro në muaj, konkretisht 62 mijë dinarë maqedonas, ose 1020 euro në muaj.

Paga në euro në Shqipëri rezulton e rritur artificialisht për shkak të zhvlerësimit të euros, teksa fuqia blerëse reale për të ardhurat në lekë ka rënë për shkak të shtrenjtimit të vazhdueshëm të çmimeve tre vitet e fundit (6.7% në 2022, 4.8% në 2023 dhe 2.2% në 2024-n). Nëse konvertohet me kursin e vitit 2022, për të shmangur fryrjen nga kursi, paga mesatare në ekonomi në 2024 ishte 650 euro, sërish 40% më e ulët se mesatarja e rajonit.

Të dhënat e ndara për sektorin privat dhe shtetëror janë të disponueshme vetëm për Shqipërinë dhe Serbinë. Ato tregojnë “shtrembërimin” e tregut në Shqipëri, me një diferencë prej 30%, ndërsa në Serbi, si shteti dhe privati, kanë “fuqi” të paguajnë njësoj.

Në Serbi, sektori privat paguan mesatarisht 1100 euro në muaj, ndërsa në Shqipëri 690 euro, për vitin 2024.

Në Shqipëri, në fillim të vitit 2022, administrata paguhej mesatarisht 20% më shumë se privati, ndërsa në tremujorin e fundit 2024, diferenca në paga arriti në 30%. Edhe një aksion i tatimeve në muajt e fundit 2024 për të luftuar informalitetin e pagave të privati nuk arriti që të nxiste sipërmarrjet që të paguanin më shumë punonjësit.

Tre vitet e fundit treguan që rritja e pagave me urdhër administrativ është e destinuar të jetë një praktikë e dështuar. Forma më e mirë për rritjen e pagave në ekonomi lidhet me rritjen e produktivitetit.

Kjo do të thotë se pagat rriten në përputhje me përmirësimin e aftësive dhe efikasitetit të punonjësve, duke sjellë përfitime reale në prodhim dhe fitime më të larta për kompani, në vend që të rriten administrativisht pa asnjë përmirësim në performancë./Monitor

Presidenti i PL-së, Ilir Meta, i cili kandidon në listën e hapur të PD-së në Tiranë, u ka kërkuar qytetarëve votën më 11 Maj.

Në një postim nga qelia drejtuar qytetarëve Meta u shpreh se “vota juaj për mua është përgjegjësi e lartë”.

“Do t’i përkushtohem me të gjitha fuqitë dhe eksperiencën time”, tha kreu i PL-së.

Postimi i Metës:

Çdo qytetar, më 11 maj, do të kryejë aktin final të çlirimit të Shqipërisë nga plaçkitësit dhe grabitqarët që vjedhin çdo ditë djersën dhe mundin e tij.

Vota juaj për mua është një përgjegjësi e lartë, të cilës do t’i përkushtohem me të gjitha fuqitë dhe eksperiencën time.

Vota juaj për mua do të shndërrohet në projekte zhvillimi dhe në mbrojtje, pa asnjë kompromis, të barazisë suaj përpara ligjit dhe në ndëshkimin e narkoqeverisë plaçkitëse dhe shitëse të kufijve të Shqipërisë.

🗳🇦🇱 VOTO NR.1 Koalicionin “PD-Aleanca për Shqipërinë Madhështore”

🗳🇦🇱 VOTO ILIR METAJ, deputet në Qarkun Tiranë

495770417_1228739351954631_809303995308022493_n

Rregulla më të ashpra për migracionin dhe më pak punëtorë nga Ballkani Perëndimor, sipas marrëveshjes së re të koalicionit në GjermaniMarkus Söder, CSU, Friedrich Merz, CDU, Lars Klingbeil, SPD, Saskia Esken, SPD,

Në një moment me sfida të mëdha për Europën dhe ekonominë botërore, drejtuesit e tri partive të koalicionit të ardhshëm qeveritar në Gjermani,Unioni Kristian-Demokrat (CDU), Partia Socialdemokrate e Gjermanisë (SPD) si edhe Unioni Kristian-Social (CSU) prezantuan të mërkurën, më 9 prill 2025, në Berlin marrëveshjen e tyre për bashkëqeverisje.

Kryetari i CDU-së dhe kancelari i ardhshëm i mundshëm, Friedrich Merz, e cilësoi dokumentin si një sinjal të qartë për Europën dhe një garanci se “Europa mund të mbështetet te Gjermania”.

Reformë e thellë ekonomike dhe sociale

Për të ndezur motorin e ekonomisë gjermane që tashmë ka hyrë në vitin e tretë të recesionit, parlamenti gjerman kishte miratur më parë një paketë masash qindra milionëshe. Por tarifat e presidentit amerikan e detyrojnë koalicionin e mundshëm të ardhshëm që të marrë masa shtesë për lehtësimin e industrisë: Për shembull duke ulur taksat për sipërmarrjet, reduktimin e tatimeve mbi energjinë dhe përjashtimin nga tatimi të orëve shtesë të punës. Po ashtu, qeveria e ardhshme synon të lehtësojë të ashtuquajturin “pension aktiv”, që i lejon edhe pensionistët për të punuar pa tatime.

Një tjetër objektiv madhor është reduktimi drastik i burokracisë, me qëllim që Gjermania të bëhet më atraktive si për investitorët, ashtu edhe për profesionistët që kërkojnë një vend për të jetuar. Për këtë arsye, koalicioni synon të krijojë një Ministri të Digjitalizimit, e cila do të përqendrohet pikërisht në këtë çështje. “Pajisjet e vjetra, si faksi, duhet të dalin jashtë përdorimit,” tha në mënyrë simbolike bashkëkryetari i SPD-së, Lars Klingbeil, dhe shtoi: “Tregjet ndërkombëtare duhet të marrin sinjal të qartë se këtu mund të investohet.

Ashpërsohet politika e migracionit

Në marrëveshjen e koalicionit vihet re edhe një kthesë e dukshme në politikën e migracionit. Kryetari konservator Merz njoftoi masa të reja si kontrollet dhe kthimet në kufi, përfundimin e programeve të pranimit vullnetar, si për shembull për refugjatë nga Afganistani, dhe pezullimin e bashkimit familjar për refugjatët e luftës. Ukrainasit që do të vijnë tani e tutje në Gjermani nuk do të përfitojnë automatikisht ndihma sociale. Qeveria e re dëshiron gjithashtu të ndryshojë ligjin e shtetësisë: “Nuk do të ketë më shtetësi të përshpejtuar pas vetëm tre vitesh qëndrimi në Gjermani,” theksoi Merz.

Përgjysmohet numri i migrantëve të punës nga Ballkani Perëndimor

Koalicioni synon gjithashtu të kufizojë rregulloren e Ballkanit Perëndimor, e cila deri më tani lejonte ardhjen e rreth 50 mijë punëtorëve të pakualifikuar në vit. Numri do të përgjysmohet në 25 mijë. Politika e migracionit ishte ndër temat kryesore të fushatës, për shkak të barrës financiare mbi komunat. Si tregues i ashpërsimit, Ministria e Brendshme do t’i kalojë partisë bavareze Unionit Kristian-Social (CSU).

Procesi i Berlinit mbetet i rëndësishëm

Sipas marrëveshjes, integrimi i gjashtë vendeve të Ballkanit Perëndimor, si edhe i Ukrainës dhe Moldavisë, në Bashkimin Evropian (BE) konsiderohet interes strategjik i ndërsjellë. Prandaj, Procesi i Berlinit – një nismë e ish-kancelares Angela Merkel – do të mbetet aktive si platformë për t’u ofruar vendeve të rajonit perspektiva të qarta dhe të qëndrueshme për anëtarësim në BE.

CDU merr Ministrinë e Jashtme

Për herë të parë pas dekadash, Ministria e Jashtme do t’i kalojë Unionit Kristian-Demokrat. Nuk është bërë ende e ditur se kush do ta drejtojë atë, por në media përfliten disa emra. Ndër më të përfolurit është Johann David Wadephul, nënkryetar i grupit parlamentar CDU/CSU dhe një njohës i vjetër i rajonit të Ballkanit Perëndimor. 62-vjeçari është themelues i grupit parlamentar për Ballkanin Perëndimor brenda CDU/CSU-së në Bundestag, një grupim ky që ka luajtuar një rol të fuqishëm në formulimin e politikave evropiane ndaj Ballkanit Perëndimor gjatë periudhës së qeverisjes së ish-kancelares Angela Merkel.

Qeveria e re gjermane pritet të formohet në fillim të muajit maj, pasi marrëveshja të miratohet edhe nga baza e tri partive./DW

Mjeku Shkëlqim Balili thotë se për të qenë të fuqishëm në pleqëri është e domosdoshme të kemi një stil jetese të shëndetshëm.

I ftuar në News24, ai u shpreh se aktiviteti fizik, dieta e balancuar, gjumi cilësor dhe menaxhimi i stresit janë faktorët kryesorë që ndikojnë në jetëgjatësi dhe mirëqenie.

Sipas mjekut, plakja fillon që në moshën 40-44 vjeç dhe nëse nuk kujdesemi për trupin dhe mendjen rrezikojmë probleme serioze si mbipesha, diabeti, sëmundjet e zemrës dhe çrregullime neurologjike si demenca dhe parkinsoni. Balili shprehet se aktiviteti fizik është shumë i rëndësishëm.

“Zoti e ka bërë njeriun me një energji të pashtershme, që të jetojë maksimumi deri në 150 vjet dhe jeta normale është deri në 100 vjeç dhe kjo kuptohet nga mënyra e jetesës dhe dieta. Është aktiviteti fizik, dieta, gjumi dhe përballimi i stresit. Stresi kronik të krijon gjendje psikologjike dhe të krijon plakje të parakohshme. Sapo fillon rritja, nis plakja. Etapa e parë është lindja, fëmijëria, puberteti, adoleshenca, periudha e riprodhimit te femrat, premonopauzën dhe monopauzën dhe gratë sot jetojnë më shumë sesa dikur. Gratë vuajnë në monopauzë. Ka gra që kanë probleme në këtë moshë. Edhe burrat kanë androgenezë, që do të thotë kur bie testosteroni, që bie që 40 vjeç. Burri mund të lindë deri në 90 vjeç. Por nëse njerëzit nuk ushqehen mirë, futen problemet, si mbipesha, rritja e sëmundjeve të zemrës, diabeti, demenca dhe parkinsoni. Por, kryesisht është diabeti, sëmundja e zemrës. Shenjat e plakjes nisin që 40-44 vjeç, kur njerëzit s’kanë fuqi të ngrihen. Njeriu duhet të bëjë gjumë cilësor 7-8 orë, sepse gjumi është shumë i rëndësishëm. Duhet aktivitet sa më i madh fizik. Shqiptarët rrinë shumë në kafe, duhet të bëjnë stërvitje”, tha mjeku.

Një shtëpi në Shrewsbury Close, në zonën Bloxwich të Walsall ka shpërthyer në flakë duke lënë të plagosur katër persona.

Sipas policisë, shtëpia shërbente si ‘fole’ për kultivimin e lëndëve narkotike, ndërsa pasojë e shpërthimit dyshohet të jetë bërë rrjedhja e gazit nga një bombol.

Një shqiptarë në Birmingham në dijeni të rrethanave të kësaj ngjarje i tha Top Channel se dy shqiptarët e djegur brenda kësaj shtëpie bari janë nga Tepelena.

Njëri prej tyre ka 30% djegie në trup ndërsa tjetri ndodhet në spital në gjendje të rëndë me djegie 60%.

Gjashtëdhjetë e pesë zjarrfikës u thirrën për të shuar flakët, ndërsa policia vijon hetimet tashmë për dokumentin e plotë të rastit./ TCh

Në një intervistë për median greke LiFO, ish-Presidenti i Shqipërisë dhe lideri i PD, Sali Berisha, ka komentuar zhvillimet politike në Shqipëri dhe marrëdhëniet me Greqinë, vetëm pak ditë përpara zgjedhjeve parlamentare që do të mbahen më 11 maj.

Berisha ka theksuar se marrëveshja për Zonën Ekonomike Ekskluzive (EEZ), e arritur gjatë qeverisjes së tij me Greqinë, ishte ‘më e mira e mundshme’, ndërsa ka akuzuar Kryeministrin aktual, Edi Rama, se e bllokoi atë për interesa politike dhe të jashtme.

Sipas LiFO, Berisha, 80 vjeç, ish-kardiolog dhe figurë kyçe e tranzicionit demokratik në Shqipëri, dhe shfaqet sot më i matur dhe më i shqetësuar për të ardhmen e vendit. Ai ka qenë President nga 1992 deri më 1997, Kryeministër nga 2005 deri më 2013 dhe sot vazhdon të mbetet një aktor i rëndësishëm politik.

“Jam shumë i lumtur dhe shumë optimist që do të heqim qafe qeverinë e Edi Ramës, e cila nuk respekton asnjë ligj, asnjë rregull, asnjë kriter, asnjë standard”, u shpreh Berisha në intervistën për LiFO.

Gazetarët grekë e pyetën për marrëdhëniet greko-shqiptare dhe mundësinë për përmirësimin e tyre.

“Absolutisht”, u përgjigj ai. “Mund të ishin më mirë. Nuk ka asnjë arsye pse të mos jenë më mirë dhe jam thellësisht i bindur për këtë.”

Berisha përmendi nënshkrimin e Traktatit të Miqësisë dhe Bashkëpunimit më 1996 me Presidentin grek Costis Stefanopoulos, duke e cilësuar si një arritje historike që zgjidhi shumë prej problemeve të trashëguara mes dy vendeve.

Media greke kujton se marrëdhëniet mes qeverisë së Berishës dhe asaj të Kostas Karamanlisit ishin të ngushta, duke kulmuar me firmosjen e Marrëveshjes për Delimitimin e Shelfit Kontinental dhe Zonave të Tjera Detare, e cila konsiderohej një sukses për të dyja palët. Por marrëveshja nuk u ratifikua kurrë, pasi pas ardhjes në pushtet të George Papandreut në Greqi dhe ndërhyrjes së opozitës shqiptare të udhëhequr nga Edi Rama, ajo u çua në Gjykatën Kushtetuese të Shqipërisë, ku u bllokua.

“Edi Rama ishte njeriu që, sipas bindjes sime të thellë, veproi kundër interesit kombëtar të Shqipërisë, duke bllokuar një marrëveshje që ishte më e mira që mund të kishim pasur. Ishte një marrëveshje fitimtare për të dyja palët”, tha Berisha për LiFO.

Ai shtoi gjithashtu se vendimi për ta dërguar marrëveshjen në Gjykatën Kushtetuese mund të ketë ardhur si rezultat i presioneve të jashtme.

“Edi Rama ndoshta, nga presioni i Rexhep Tajip Erdogan, e dërgoi në Gjykatë Kushtetuese,” përfundon ai.

Berisha shprehu dhe një respekt të madh për ish-Kryepeshkopin të Kishës Ortodokse Autoqefale të Shqipërisë, Anastas Janullatos.

“Ai erdhi si grek i madh dhe iku edhe si një shqiptar i madh. Ringjalli Kishën me përkushtim, në mënyrë të jashtëzakonshme”, thotë Berisha, duke theksuar se respekti për të ishte i gjerë, përtej komunitetit ortodoks. / LiFO – Marrë nga Syri.net

Policia e Sarandës ka kapur në flagrancë në Sarandë shtetasin Ergys Isufi me 1 (një) dozë lëndë narkotike e llojit kokainë, ky njëherazi është edhe kandidat për deputet i partisë politike “Shqipëria Bëhet”.

Në kohën kur u pikas nga policia Ergys Isufi ka tentuar të ikë me vrap por është kapur nga policia.

Policia e Sarandës po ushtron kontroll në banesën e Isufi

Goditi me gur, xhamin e një bankomati, identifikohet, kapet dhe arrestohet 50-vjeçari.

50-vjeçari, i proceduar penalisht disa herë, për shkatërrim prone.

Shërbimet e Komisariatit të Policisë Korçë, menjëherë pas marrjes së njoftimit se në lagjen nr. 9 Korçë, një shtetas kishte goditur me gur, bankomatin e një banke të nivelit të dytë, kanë organizuar punën për identifikimin dhe kapjen e tij.

Si rezultat i veprimeve të shpejta hetimore, bazuar dhe në informacionet e siguruara në rrugë operative, specialistët për Hetimin e Krimeve të Komisariatit të Policisë Korçë identifikuan dhe arrestuan në flagrancë shtetasin V. N. alias P. N., 50 vjeç, banues në Pukë, për veprën penale “Shkatërrimi i pronës”.

Nga verifikimet rezultoi se ky shtetas ishte shpallur në kërkim nga Komisariati i Policisë Lezhë, për veprën penale “Shkatërrimi i pronës” dhe ishte proceduar penalisht disa herë, për këtë vepër penale.

Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Korçë, për veprime të mëtejshme.

Drejtuesja politike për Diasporën nga radhët e Partisë Demokratike, Jozefina Topalli, ka ngritur sot akuza mbi procesin e votimit të shqiptarëve emigrantë në Greqi, duke kërkuar ndërhyrje urgjente nga KQZ, SPAK dhe misioni i OSBE-ODIHR.

Gjatë një konference për shtyp nga selia blu, Topalli deklaroi se persona të paidentifikuar kanë arritur të marrin në dorëzim fletë votimi në pikat e shpërndarjes në Greqi, duke shkelur rëndë parimet e identifikimit dhe ligjshmërisë.

“Kërkojmë një hetim penal nga SPAK për të zbuluar se kush po i merr fletët e votimit pa identifikim dhe pa firmë. KQZ duhet të auditojë çdo kuti votimi, mënyrën e transportit dhe personat që kanë ndërhyrë në këtë proces,” – u shpreh Topalli.

Ajo shtoi se Partia Demokratike i kërkon OSBE-së dhe ODIHR-it të vendosin monitorim ndërkombëtar në Greqi, për të garantuar integritetin e votës së emigrantëve shqiptarë.

E rëndë në Itali, gruaja vret me thikë burrin, më pas bëhet ‘pishman’ dhe telefonon ambulancën
Një ngjarje tragjike ka ndodhur mëngjesin e sotëm në Milano, ku një i ri nga Kosova, E.A., 24 vjeç, humbi jetën pasi ra nga kati i tretë i një pallati ndërsa ishte duke punuar në një ndërhyrje në fasadë.

I riu, i cili kishte 6 vite që jetonte në Itali, po kryente punime mirëmbajtjeje në një apartament rreth orës 09:30, kur rrëshqiti nga skela dhe ra nga një lartësi prej rreth 12 metrash, duke gjetur vdekjen në vend. Prindërit dhe njëri prej vëllezërve të tij jetojnë në Kosovë, ndërsa një vëlla tjetër banon në Austri.

“Ai ishte një djalë i mirë, një mik i imi”, tha një bashkëatdhetar i të ndjerit, i cili ndodhej në vendngjarje në momentin e aksidentit.

Prokuroria Publike e Milanos ka nisur hetimet, ndërsa trupi i viktimës do t’i nënshtrohet autopsisë për të përcaktuar shkakun e saktë të vdekjes dhe për të verifikuar kushtet e sigurisë në të cilat punonte 24-vjeçari