Aktivizimi i Edon Zhegrovës në ndeshjen ndaj Dortmund, pavarësisht dyshimeve për problemet fizike, në minutën e 87-të të ndeshjes Juve–Borussia Dortmund arriti t’i bëjë për vete tifozët bardhezi në vetëm dhjetë minuta.
Ishte ai që dha shkëndijën për golin e 4–4 në minutën e 96-të me pasimin e shërbyer te Vlahovic pas një driblimi, që solli golin e Kelly-t.
Një çlirim edhe për vetë Zhegrovën, i cili, pasi luftoi me pubalgjinë gjatë gjithë sezonit të kaluar, po kërkon ende formën më të mirë, prandaj u mendua se nuk do të ishte as në stol në Champions League.
Megjithatë, rikuperimi i tij fizik bëri që trajneri Igor Tudor ta thërriste. Jo thjesht për të qenë në listë, por sepse, nëse ndeshja do ta kërkonte, ai donte të mbështetej tek sulmuesi nga Kosova.
Sportmediaset raporton se në takimin e së shtunës kundër Veronës, sulmuesi i krahut mund të jetë sërish në fushë, këtë herë më gjatë. Yildiz ka nevojë për një pushim, por do të ishte çudi ta shikoje Zhegrovën menjëherë titullar, një rrezik që Tudor nuk dëshiron ta marrë ende.
Për Zhegrovën, megjithatë, kthimi në fushë me vazhdimësi pas muajsh makthi është tashmë një fitore.
Me vullnetin e tij, ai duhet të tregojë se vendin e titullarit e dëshiron dhe ta fitojë atë.
Babai i viktimës shqiptare në tragjedinë e Tempi-t nis grevë urie para Parlamentit grek, kërkon zhvarrimin e të birit
Athinë, 19 shtator 2025 – Prej pesë ditësh, para godinës qendrore të Parlamentit grek, Panajot (Pano) Ruçi, babai i 22-vjeçarit Denis Ruçi që humbi jetën në aksidentin hekurudhor të Tempi-t më 28 shkurt 2023, ka nisur një grevë urie.
Fillimisht ai ka refuzuar si ushqimin ashtu edhe ujin, ndërsa tani vazhdon me grevë urie, duke kërkuar që autoritetet të lejojnë zhvarrimin e trupit të të birit.
Kërkesat e tij janë: drejtësi për fëmijën e tij dhe leje për zhvarrosjen e trupit, kërkesë që deri më tani është refuzuar nga gjykata e Larisës.
Denis Ruçi ishte një nga 57 viktimat e tragjedisë më të rëndë hekurudhore në Greqi, e cila tronditi opinionin publik brenda dhe jashtë vendit.
Babai i tij deklaron se në arkivolin e të birit “ka elementë që nuk duan të bëhen publikë” dhe se nuk do të tërhiqet nga protesta derisa të marrë përgjigje nga autoritetet.
“Dua të vërtetën e nuk iki derisa të më dëgjojnë” thotë babai shqiptar që gjendet në grevë në Athinë për vdekjen e të birit.
Denis Ruçi, 22 vjeçar, ishte një ndër viktimat e tragjedisë në Tempi, ku më shkurt të 2023, përplasja e një treni i mori jetën 57 personave.
“Unë nuk dua asgjë, përveç të vërtetës për djalin tim. Nuk do të largohem derisa të më dëgjojnë.
Grevë urie dhe etjeje për Denisin, për të gjithë fëmijët, për drejtësinë dhe të vërtetën, që të mos humbasë më asnjë jetë për fitimet e tyre.
Nuk kam mundur të fle për dy vjet e gjysmë. I kam dhënë një premtim djalit tim: nuk do t’i fal ata që shkaktuan këtë tragjedi. Për shkak të tyre, të gjithë këta fëmijë u larguan nga jeta në mënyrë kaq të padrejtë”, -tha babai i 22 vjeçarit.
Ruçi ka zgjedhur të protestojë pranë monumentit të Demokracisë, përballë Parlamentit, ku ka ngritur një pankartë dhe thotë se kërkesa e tij është e thjeshtë: të marrë të drejtën ligjore për të bërë një ekshtëfim dhe varrim të denjë për të birin.
Protesta e tij ka tërhequr vëmendjen e kalimtarëve, qytetarëve dhe familjarëve të tjerë të viktimave, të cilët kanë shprehur mbështetje. Ende nuk ka një reagim zyrtar nga autoritetet greke për kërkesën e tij.
Tragjedia e Tempi-t, ku dy trena u përplasën me shpejtësi të lartë, u shkaktoi vdekjen dhjetëra udhëtarëve, kryesisht të rinj studentë. Hetimet për ngjarjen vijojnë ende, ndërsa shumë familje kërkojnë drejtësi dhe transparencë për shkaqet e vërteta të aksidentit dhe për përgjegjësitë shtetërore.
Dosja gjyqësore është voluminoze, me rreth 60 mijë faqe dhe përfshin 36 të pandehur persona jo-politikë, shumica me akuza për krime të rënda si shkelje të sigurisë së transportit dhe vrasje nga pakujdesia.
Procesi gjyqësor pritet të nisë në shkurt të vitit 2026. /noa.al
Deputeti demokrat Igli Cara në një studio televizive komentoi zhvillimet e fundit politike, duke u ndalur në veçanti te skenat në Parlament, ku në 30 minuta seancë pa debat, u votëbesua qeveria e re, “Rama 4”.
Cara u shpreh se Rama është “i pangopur në luftën e tij për pushtet”. Sipas ligjvënësit të PD, kryeministri do një opozitë që të mos ekzistojë dhe të mos ketë asnjë zë kundër që e bezdis.
I pyetur nëse ka një skenar nga kryeministri Edi Rama për përçarjen e PD ashtu siç ndodhi me PASOK-un në Greqi, Cara u përgjigj duke thënë se plani është shpërbërja e opozitës.
“Jam dakord, Rama pretendon që të mos ketë një opozitë trë shëndoshë përballë dhe me të gjitha mënyrat do ta godasë opozitën edhe me lëvizje të papranueshme. E keni parë që thotë se do dërgojmë oferta edhe për përfaqësues të opozitës. Rama synon të bëjë pikërisht këtë, shpërbërjen e opozitës. Opozitës i del një detyrë e madhe. Përballë një Rame të tillë, i duhet një opozitë mbi të gjithë që të sheshojë problemet brenda vetes. S’kemi asnjë moment për të humbur. Unë besoj se së shpejti PD do të bëjë veprimet e duhura për tu përballur me Ramën edhe në Parlament por edhe me protesta”, tha Igli Cara
Policia e Korçës ka arrestuar 27-vjeçarin Kostandin Dramolli, i cili njihet me emrin si reper “Çekiçi 14”.
Sipas autoriteve policore, ai është vënë në pranga pasi nuk i është bindur urdhrit të uniformave blu për të ndaluar, në aksin rrugor “Qafë Plloçë-Qukës”.
“Oficeri i Policisë Gjyqësore arrestoi në flagrancë shtetasin K. D., 27 vjeç, banues në Korçë, pasi në aksin “Qafë Plloçë-Qukës”, nuk i është bindur urdhrit të punonjësit të Policisë Rrugore, për të ndaluar automjetin”, thuhet në njoftimin e policisë.
Ngjarja ka ndodhur dy ditë më parë, ku Kostandin Dramolli e ka filmuar veten teksa drejton automjetin dhe tenton të arratiset, teksa është duke u ndjejur nga Policia. Ai e ka publikuar videon vetë në rrjetet sociale, teksa krahas saj, shkruan: “Estrada dëgjohemi kur të dal nga burgu”.
Kostandin Dramolli, i njohur si “Çekiçi 14”, u bë i njohur pak kohë më parë, kur filmoi veten duke qëlluar me gur Bashkinë e Korçës për të kundërshtuar aksionin e Edi Ramës për të liruar hapësirat publike. Ai më parë ka qenë futbollist, ku ka luajtur si portier në Kategorinë Superiore edhe me ekipin e Bylisit.
Një ngjarje e rëndë është shënuar ditën e sotme në një banesë në Kasandra të Halkidikisë në Greqi.
Ngjarja ka ndodhur brenda një banesë të marrë me qira në zonën e Kipsa, kur një shtetas ka hyrë brenda dhe pasi ka grabitur 2000 euro dhe një celular, ka plagosur me thikë një turiste 25-vjeçare nga Ukraina.
Një ditë më parë u arratis nga burgu, shqiptari grabit dhe
25-vjeçarja është transportuar e plagosur në qendrën shëndetësore të Kasandras, ku po i nënshtrohet mjekimit. Përmes fotografive, e huaja ka identifikuar autorin e dyshuar, për kapjen e të cilit ka nisur një operacion i gjerë i policisë greke.
Ai është identifikuar si Ylli Shkalla, 27 vjeç, nga Tirana. Ai rezulton të jetë arratisur një ditë më parë nga burgu i Kasandras në Halkidiki.
Ai po vuante dënim në gjysmë liri në këtë burg bujqësor ku edhe punonte. Shkalla rezulton i arrestuar në shkurt 2017 për 9 vjedhje të kryera në bashkëpunim në Tiranë
Perry Beenen dhe familja e tij mezi prisnin pushimet e tyre në Shqipëri. Muajin e kaluar, familja nga Veldhoven më në fund ia doli mbanë, ata morën me qira një makinë për të eksploruar destinacionin e ardhshëm të pushimeve. Por pas një aksidenti, pushimet e tyre u shndërruan në një makth.
Në muajt e fundit, Ministria e Punëve të Jashtme dhe vende të tjera evropiane kanë marrë raportime për arrestime pas aksidenteve rrugore në Shqipëri. Ministria e Punëve të Jashtme kohët e fundit lëshoi një paralajmërim të qartë për holandezët në lidhje me këtë. Rrugët e vendit janë gjithashtu të këqija dhe drejtimi agresiv i automjeteve është i zakonshëm.
Perry Beenen nga Veldhoven di gjithçka rreth kësaj. Muajin e kaluar, ai, familja e tij dhe një familje tjetër ishin me pushime në vendin e Evropës Lindore. Java e parë e udhëtimit të tyre ishte tërësisht për diellin, plazhin dhe kulturën. Ata udhëtuan nëpër vend me makinën e tyre me qira. Më 6 gusht, udhëtimi vazhdoi për në një qytet me rreth 30,000 banorë në jug të Shqipërisë, ku kishin rezervuar një hotel.
Pasi mbërritën atje, gjërat shkuan shumë keq, Perry u largua nga hoteli drejt një parkingu dhe u godit pothuajse menjëherë ballë për ballë. Jastëkët e ajrit u hapën dhe xhamat u thyen nga përplasja. I shtangur dhe i tmeruar, Perry doli jashtë. Oficerët e policisë mbërritën shpejt në vendin e aksidentit. Megjithatë, sipas Perry-t, trajtimi i aksidentit ishte shumë i ndryshëm nga ai që janë mësuar në Holandë.
“Në Holandë, plotëson një formular kërkese për dëmshpërblim. Por unë nuk e vura re këtë. Policia vazhdoi të bënte të njëjtat pyetje dhe më duhej të tregoja dokumentet e makinës tri herë. Ishte shumë kaotike. Pak para se të më hipnin në furgonin e policisë, munda ta shikoja gruan time për herë të fundit. Na thanë se ishte një formalitet,” tha Perry.
Pasi kamioni i rimorkimit mori makinën, Perry dhe gruaja e tij Annelies u çuan në stacionin e policisë me një makinë policie. Por doli të mos ishte kështu. Perry ai tani e di përmendësh numrin e artikullit nga dosja penale u akuzua për shkaktimin e një aksidenti në të cilin dikush u plagos. Pak më vonë, banori i Veldhoven u transportua në një burg.
“Pak para se të më fusnin në furgonin e policisë, munda ta shikoja gruan time për herë të fundit. Pastaj përfundosh në një qeli që të jep ndjesinë e viteve 1960. Më dhanë ato batanije me qime nën të cilat flije kur ishe fëmijë. Kishte edhe një tualet të vogël dhe një lavaman. Kishte edhe mbetje të jashtëqitjeve të minjve,” tha ai.
Perry nuk qëndroi në burg për orë të tëra, por për gjashtë ditë. Ai pati kontakt vetëm me avokatin e tij. Në fund, u vendos që ai të lirohej me kusht. Gruaja e tij, Annelies, shkonte nga një bankomat në tjetrin dhe ecte me tufa me para në dorë. Nxjerrja e Perry-t nga burgu kushtoi gjithsej 12,000 euro. Perry dëshiron t’i paralajmërojë turistët e tjerë holandezë për Shqipërinë me historinë e tij.
“Pastaj del jashtë dhe të gjithë qëndrojnë aty. Ne të gjithë qamë jashtë derës. Mendoni me kujdes para se të shkoni atje. Nuk është Bashkimi Evropian. Ligjet dhe rregulloret janë të ndryshme, dhe ata mezi flasin anglisht. Unë nuk do të shkoj më kurrë atje,” tha Perry.
Tre vajzat e mitura të moshave 10, 7 dhe 3 vjeçe në qytetin e Korçës përfunduan në spital ditën e djeshme pasi konsumuan disa karamele që gjetën në afërsi të një koshi mbeturinash.
Më vonë u zbulua se karamelet përmbanin esencë kanabisi, ndërsa detaje të reja kanë dalë në dritë së fundmi.
Karamelet që kanë konsumuar vajzat e mitura janë të llojit Camino, dhe secila prej tyre përmban 10 miligram THC.
THC është përbërësi kryesor kimik psikoaktiv në kanabis që shkakton efektet ‘dehëse’ që njerëzit përjetojnë kur përdorin kanabis ose produkte të tjera të tij.
Këto produkte janë të ndaluara në mënyrë strikte të përdoren nga personat nën moshën 21 vjeç pasi mund të shkaktojnë probleme shëndetësore.
Për shkak të konsumimit të këtyre karameleve, vajza 3-vjeçare në spitalin e Korçës u vendos në intubim pasi u paraqit në urgjencë me simptoma të rënduara të sistemit nervor.
Kryeministri Edi Rama ka bërë me dije se tashmë e gjithë Shqipëria do të mbulohet në çdo cep me kamera sigurie për të evidentuar në kohë reale çdo shkelje të ligjit.
“Transformimi teknologjik, një tjetër problem i madh. Na janë dashur muaj të tërë për të konkluduar në këtë sistem këtu, marrëveshjen më të rëndësishme për sigurinë me Emiratet e Bashkuara që tani më në fund u konkludua dhe që do të na japë mundësinë të kemi qytete inteligjente, mbulim me kamera inteligjente tërësisht nga rrugët, tek shkollat, brenda shkollës e klasës, për të na dhënë nivel sigurie të një standardi të lartë amerikan.
Rama tha se nëpër shkolla do të ketë një sistem video-regjistrimi brenda tyre.
Po kështu, pamjet do të mund t’i shikojnë edhe prindërit.
“Siguria më e lartë në shkolla ku do t’i vendoset drejtorive të shkollave dhe prindërve sistemi i regjistrimit për veprimtaritë brenda shkollës dhe do jetë i aksesueshëm në çdo rast nga Policia e Shtetit. Siguri më e lartë në mbrojtjen e territorit, plazheve, lumenjve, pyjeve përmes survejimit ajror me dronë dhe satelitorë, por na mungon edhe një komponent i fundit për ta bërë përfundimisht në kohë reale çdo cënim të territorit. Jo siç e kemi sot, që mund ta bëjmë në mënyrën periodike”, tha Kryeministri Edi Rama.
Erion Veliaj ka depozituar një kërkesë të jetë i pranishëm në mbledhjen e Këshillit Bashkiak për shkarkimin e tij nga detyra.
Veliaj, i cili ndodhet në qeli prej datës 11 Shkurt, ka kërkuar të jetë i pranishëm për një proces të rregullt ligjor.
Kërkesa e Veliajt drejtuar Anëtarëve të Këshillit Bashkiak të Tiranës:
E nderuar kryetare dhe anëtarë të Këshillit Bashkiak,
Jam informuar nga media se, më datë 23 shtator 2025, do të mbahet mbledhja e Këshillit Bashkiak të Tiranës, me objekt miratimin e propozimit drejtuar Këshillit të Ministrave për shkarkimin tim nga funksioni i Kryetarit të Bashkisë, me arsyetimin e mungesës mbi tre muaj në detyrë.
Dua të theksoj qartë se kjo mungesë nuk është pasojë e vullnetit tim, por rrjedhojë e një mase sigurie disproporcionale dhe që do të kundërshtohet në çdo instancë gjyqësore, deri në Gjykatën Evropiane të të Drejtave të Njeriut.
Kjo masë nuk ka izoluar vetëm qytetarin Erion Veliaj, por ka paralizuar qeverisjen e kryeqytetit, duke lënë pa drejtues të zgjedhur mbi 1 milion qytetarë të Tiranës. Sistemi gjyqësor, në mungesë të një përgjegjësie të plotë për fuqinë dhe pasojat e vendimeve të tij, nuk mori parasysh se masa e sigurimit duhej të balanconte interesin publik të hetimit penal me interesin po aq madhor të garantimit të qeverisjes vendore. Kjo është arsyeja reale që ka prodhuar krizën e sotme politike, institucionale dhe kushtetuese. Shkaktar i saj nuk është as Kryetari i Partisë Socialiste, as Partia Socialiste, as ju këshilltarë, por një vendimmarrje gjyqësore që ka ndërprerë në mënyrë të padrejtë një mandat kushtetues. Çdo përpjekje për ta fshehur këtë të vërtetë nuk i shërben zgjidhjes, por e devijon atë.
Mungesa e imponuar nga një masë paraprake, jo nga një vendim përfundimtar fajësie, nuk është as mungesë e vullnetshme, as shkelje e rëndë kushtetuese, por cenim i hapur i parimit të përfaqësimit demokratik dhe një precedent i rrezikshëm për qeverisjen vendore.
E mirëkuptoj shqetësimin tuaj për të kërkuar një zgjidhje politike. Por nuk mund të mirëkuptoj që kjo krizë, e shkaktuar nga gjykata dhe ku “viktimë” është vetëqeverisja vendore, të “zgjidhet” me një tjetër shkelje të Kushtetutës po nga vetë pushteti vendor. Një vendim i tillë do të zëvendësonte vullnetin e 160 mijë zgjedhësve, të cilët kanë folur politikisht, me një akt të pajustifikuar juridikisht, duke krijuar precedent të rrezikshëm për demokracinë vendore.
E kam thënë dhe e përsëris, dhe dua të më besoni siç keni bërë gjithë këto vite: nuk bëhet fjalë për interesin tim personal. Mandati nuk është i imi, por i qytetarëve të Tiranës, të cilët për herë të tretë më kanë dhënë nderin e jetës sime duke më besuar drejtimin e qytetit. Mandati nuk më ka mbrojtur mua, përkundrazi, është arsyeja pse unë sot jam i izoluar, por ai më detyron të mbroj kontratën katërvjeçare që qytetarët kanë firmosur me votën e tyre. Kam detyrimin të mbroj çdo pikë djerse që kemi derdhur së bashku për ta fituar atë besim.
Kryetari i Bashkisë së Tiranës është organ kushtetues që ka të drejtën dhe Këshilli Bashkiak i Tiranës ka detyrimin të respektojë procesin e rregullt ligjor në çdo vendimmarrje që bën. Për këto arsye dhe në respekt të parimit kushtetues të procesit të rregullt ligjor dhe të së drejtës për t’u dëgjuar, kërkoj të jem i pranishëm dhe të dëgjohem në mbledhjen e këshillit bashkiak, për të dhënë sqarimet e nevojshme para se të merret vendimi për propozimin e shkarkimit tim.
Transfertat e parave në 41 shtete të Europës do të bëhen më të lira pas datës 7 tetor. Për të dërguar 100 euro, bankat do të mbajnë vetëm 1 euro komision, nga 10 që mbajnë aktualisht.
Aktualisht, nëse dërgon 100 euro nga Shqipëria në Itali përmes një banke apo zyre transfertash, shuma që arrin te marrësi është 88–90 euro.
Pjesa e munguar merret nga banka si komision, që arrin deri në 10%.
E njëjta logjikë aplikohet edhe për shuma më të mëdha, si për shembull 500 euro drejt Gjermanisë, ku komisioni mund të shkojë deri në 15 euro.
Por nga 7 tetori, këto tarifa do të bien ndjeshëm. Për të njëjtat dërgesa, komisionet e bankave do të variojnë nga 1 deri në 3 euro.
Me përfshirjen e Shqipërisë në sistemin SEPA, Këshilli Evropian i Pagesave ka publikuar listën e shteteve që do të përfitojnë nga komisionet e ulëta.
Në tetor, Shqipëria, Mali i Zi, Maqedonia e Veriut dhe Moldavia do t’u bashkohen vendeve të BE-së, Zonës Ekonomike Evropiane dhe disa vendeve të tjera evropiane jashtë BE-së.
Kjo do të thotë se komisionet e transfertave do të jenë të ulëta në 41 shtete, përfshirë 27 vende të BE-së, si dhe Islandën, Lihtenshtajnin, Norvegjinë, Zvicrën, Britaninë e Madhe, Monakon, San Marinon, Andorën dhe Vatikanin.
Sipas dokumentit zyrtar, institucionet shqiptare të licencuara nga Banka e Shqipërisë janë të autorizuara të marrin pjesë në skemat SEPA. Vlerësohet që qytetarët shqiptarë do të kursejnë deri në 20 milionë euro në vit nga komisionet.
Ky zhvillim përfaqëson një hap përpara në integrimin e tregut financiar shqiptar me atë evropian, duke rritur efikasitetin, ulur kostot dhe rritur sigurinë e transfertave ndërkufitare në euro.
