Lajme Flesh

Kremlini ka zbardhur pikat kryesore që presidenti rus Vladimir Putin përmendi gjatë bisedës telefonike me presidentin e SHBA, Donald Trump.

Në njoftim thuhet se pala ruse “theksoi një numër pikash të rëndësishme” që kërkonin shqyrtim të mëtejshëm, duke përfshirë “kontrollin efektiv” mbi çdo armëpushim përgjatë vijës së konfliktit dhe kërkesën e Rusisë për të ndaluar mobilizimin e ukrainasve dhe riarmatimin e forcave të saj të armatosura së bashku me kërkesën e saj më të gjerë për “eliminimin e shkaqeve rrënjësore të krizës”.

Deklarata shton gjithashtu “kushtin kryesor” të Moskës për të parandaluar përshkallëzimin e mëtejshëm të konfliktit në një kërkesë për të “ndërprerë plotësisht” ndihmën e huaj ushtarake dhe shkëmbimin e inteligjencës për Ukrainën.

Por në njoftim thuhet se Putini ka rënë dakord për një armëpushim 30-ditor në infrastrukturën energjetike dhe thotë se lideri rus ka lëshuar tashmë urdhra përkatës.

Teksti i lësuhar nga Kremlini thotë gjithashtu se Putini “iu përgjigj në mënyrë konstruktive” propozimit për një armëpushim në det, me negociata të mëtejshme për këtë çështje.

Deklarata thotë gjithashtu se Putin e informoi Trumpin për planet për një shkëmbim ruso-ukrainas të 175 të burgosurve të luftës nga secila palë, dhe “si një gjest vullneti të mirë” dhe një lirim i mëtejshëm të 23 ushtarakëve ukrainas “të plagosur rëndë”.

Leximi mbuloi gjithashtu diskutimet e tyre mbi Lindjen e Mesme dhe Detin e Kuq, si dhe shtytjen më të gjerë për “normalizimin e marrëdhënieve dypalëshe”.

Ajo që bie në sy, dhe që nuk përmendet nga Shtëpia e Bardhë, është se Kremlini thotë se Putin ka diskutuar idenë e tij me Trump për organizimin e një ndeshjeje hokej mes SHBA-së dhe Rusisë.

Putin hodhi idenë për “organizimin e ndeshjeve hokej në Shtetet e Bashkuara dhe Rusi” midis lojtarëve rusë dhe amerikanë që performojnë në NHL dhe ekuivalentin rus, KHL (Kontinental Hockey League).

Ditën kur Erion Veliaj u la në burg nga apeli i GJKKO, diçka e pazakontë ka ndodhur në makinën me të cilën kryetari i bashkisë po transferohej nga paraburgimi i Durrësit për në Apelin e GJKKO në Tiranë.

Një nga oficerët e burgjeve që shoqëronte kryetarin e bashkisë i ka dhënë këtij të fundit telefonin e tij me qëllim që Veliaj të bënte telefonata.

Mësohet se gjatë marrjeve në pyetje, oficeri i burgjeve e ka pranuar një fakt të tillë dhe ka deklaruar se e kishte bërë nga frika.

Për këtë arsye Prokuroria e Posaçme ka marrë nën hetim oficerët e burgjeve, të cilët shoqëronin kryetarin e bashkisë së Tiranës.

Kujtojmë që më 13 mars, Gjykata e Apelit në Gjykatën e Posaçme hodhi poshtë kërkesën për lirim përkundrejt garancive pasurore të kryebashkiakut të arrestuar të Tiranës Erion Veliaj, duke lënë në fuqi masën e sigurisë arrrest me burg të caktuar nga shkalla e parë një muaj më parë.

Veliaj, është një nga politikanët më të lartë të vënë nën hetim apo të arrestuar deri më sot në vend. Prokuroria thotë se ai dyshohet se ka përfituar përmes familjarëve të vet të afërm apo personalisht, pagesa apo të mira të tjera nga biznesmenë të ndryshëm në nëntë raste. Veliaj i mohon akuzat dhe pretendon se është shënjestër e një prokurorie të padrejtë.

DESHMIA E VELIAJT NE APELIN E GJKKO

Gjatë seancës kryebashkiaku Veliaj ka kundërshtuar dosjen e SPAK, duke u shprehur se provat e reja janë “çimka dhe telefonatat e tij me djalin, si edhe familjen”.

Sipas të dhënave, mësohet se nga seanca në Apelin e GJKKO-së, Erion Veliaj ka pretenduar se SPAK ka përgjuar 1 muaj bisedat e tij familjare që sipas kryebashkiakut kanë të bëjnë intervistat në media.

“Ju nuk keni konsideruar prova të reja sulmet publike të Sali Berishës ndaj SPAK. Por keni konsideruar prova të reja çimkat dhe telefonatat e mia me djalin dhe familjen dhe interesimin tim për intervista në TV kryesore”, – mësohet se është shprehur Erion Veliaj.

Ai ka kërkuar seancë me dyer të hapura duke u shprehur se: “Unë jam ende kryetar bashkie në detyrë, i votuar nga çerek milioni njerëz. Unë i qëndroj çdo postimi që kam bërë në rrjetet sociale”.

Arrestimi

Erion Veliaj u arrestua nga SPAK më 10 shkurt me akuzën e krijimit të një skeme korruptive mes kompanive të bashkëshortes dhe një grupi biznesmenësh pranë tij, me vlerë transaksionesh më shumë se 1 milion euro.

Në “detyrim paraqitje” janë bashkëshortja e Veliajt, Ajola Xoxa dhe pesë biznesmenë, mes të cilëve, Shkëlqim Fusha i kompanisë “Fusha”, Gentian Sula i kompanisë “Agi Kons” dhe Fatmir Bektashi i kompanisë “Kontakt”.

Nën hetim është dhe deputetja socialiste, Klotilda Bushka, njëherazi kryetare e Komisionit të Ligjeve, e cila dyshohet për kryerjen e veprimeve aktive që pengojnë zbulimin e të vërtetës në rastin e çështjes penale në ngarkim të Veliajt dhe të proceduarve të tjerë.

Ndaj tyre SPAK ka ngritur disa akuza, ku sipas materialit të gjykatës, mësohet se janë fiksuar disa episode që implikojnë edhe kreun e Bashkisë së Tiranës.

Një grup të rinjsh kanë gjetur në një vilë të braktisur trupat e pajetë të një çifti të moshuarish në Verona.

Duke mbërritur para vilës dhe mos dëgjuar zhurmë që vinte nga brenda, as duke parë asnjë lëvizje, kanë hyrë brenda. Të moshuarit kishin muaj që kishin ndërruar jetë.

Zbulimi makabër u bë herët pasditen e së shtunës nga tre djem që po praktikonin “urbex “, një neologjizëm anglez që në italisht do të thotë “eksplorim urban”. Ky është një aktivitet që përfshin sipërmarrjen në strukturat e braktisura, qofshin ato ndërtesa apo rrënoja të vërteta.

Por në këtë rast konkret, në realitet, zona në fjalë nuk është asgjë tjetër veçse “urbane”: Montericco ndodhet në kodrat midis komunave të Veronës dhe Negrar, një fshat i lindur në vitet ’60 dhe i mbushur me vila dhe vila për borgjezinë e pasur të qytetit të sapolindur. Mes tyre është edhe ai i bashkëshortëve Steffenoni.

Vdekja midis tetorit dhe nëntorit

Dy trupat në gjendje të dekompozuar, u identifikuan të dy trupat: ai i Marco Steffenoni, një dentist 75-vjeçar dhe gruaja e tij Maria Teresa Nizzola, një vit më e madhe.

Të dy, sipas dëshmive të para të dhëna nga njerëz që i njihnin, bënin një jetë të tërhequr dhe kishin pak ndërveprim shoqëror.

Nga hetimet e para të kryera në vendngjarje nga mjekësia ligjore, duket se vdekja e bashkëshortëve mund të ketë ndodhur në periudhën tetor-nëntor. Këtë e vërteton, përveç gjendjes së avancuar të dekompozimit të trupave, edhe një faturë që daton në tetor, e gjetur nga hetuesit në shtëpi; e fundit që çifti do të paguante, përpara se të gjenin vdekjen brenda katër mureve të tyre.

Një histori e ngjashme me zbulimin e aktorit Gene Hackman

Për të ditur shkaqet e vdekjes së bashkëshortëve Steffenoni, tani do të duhet të presim autopsinë e trupave që është urdhëruar nga prokurori publik kujdestar që po koordinon hetimet. Shkaku i vdekjes mund të ketë qenë monoksidi i karbonit i lëshuar nga një oxhak i ndezur për ngrohje, por për momentin çdo hipotezë po shqyrtohet.

Marco Steffenoni u diplomua për Mjekësi dhe Kirurgji në Universitetin e Padovës në vitin 1977, dhe më pas u specializua në stomatologji dhe protetikë dentare. Ai është ende i regjistruar në Urdhrin.

Prej vitesh, ai kishte ordinancën e tij dentare në Via Cappello, në qendrën historike të Veronës, praktikisht pranë shtëpisë së Zhulietës. Së bashku me gruan e tij, në buen retiro të Montericco-s, ai kishte hapur një fermë të lidhur me ullishtën që rrethon shtëpinë.

Historia tragjike i ngjan shumë asaj që përfshin aktorin e famshëm amerikan Gene Hackman dhe gruan e tij Betsy Arakawa, të cilët u gjetën të vdekur në shtëpinë e tyre në Santa Fe, New Mexico më 26 shkurt, disa ditë pas datës së vërtetë të vdekjes së tyre./Top Channel

Finalistja e BBVK, Xheneta Fetahu është ”arratisur” në Dubai.

Sipas mediave modelja atje ka shkuar me të dashurin e saj të ri, i cili quhet Remzi Azemi, i njohur me nofkën ”bisha”.

Dyshja kanë postuar fotografi nga i njëjti vend në Dubai, madje duket se po kalojnë shumë mirë bashkë.

Duke shikuar edhe Instagramin e Xhenetës, kemi parë se dyshja janë bërë edhe follow, madje ”Bisha” nuk ndjek edhe shumë persona, por modelen po.

Gazetarja Klodiana Lala ka dhënë detaje nga përgjimi që SPAK i ka bërë kryebashkiakut të arrestuar Erion Veliaj në paraburgimin e Durrësit, në kuadër të procesit hetimor të nisur ndaj tij për korrupsion e pastrim parash.

E ftuar në A Show nën moderimin e Adi Krastës në Syri Tv, Lala ka treguar sekuenca të përgjimeve të reja ndaj Veliajt, të bëra përmes telefonatave nga brenda paraburgimit të familjarët e tij.

“Ministrin që ma bëri kështu e s’më doli në mbrojtje se fal, për 7 breza do ta shkrij”, është një nga citimet që dyshohet të ketë folur kryebashkiaku Veliaj me familjarët apo edhe intimidimi i dëshmitarëve të dosjes, duke shkuar deri aty sa t’i udhëzojë se si duhet të sillen në raport me hetimin penal ndaj tij.

“Në dosjen Veliaj ka keqinterpretime të qëllimta. Pas izolimit të Veliajt ka pasur dyshim të arsyeshëm që brenda institucionit ka pasur celular, i futur në mënyrë të paligjshme. Është vendosur kontroll nga Drejtoria e Burgjeve dhe Ministria e Drejtësisë dhe grupi i gatshëm ka shkuar në qelinë e Veliajt dhe e kanë ‘përmbysur’.

E vetmja mundësi kontakti me familjen, avokatin, e njerëzit e besuar, ishte kabina telefonike brenda paraburgimit. SPAK ka marrë autorizim të veçantë për të përgjuar vëllain, bashkëshorten dhe njerëz që mund të flisnin me Veliajn.

Fokusi s’ka qenë historia mediatike, sikurse është tentuar të trajtohej, por se ka pasur dyshime të arsyeshme që Veliaj intimidonte dëshmitarët.

Dhe flet qartë për dëshmitarët. Ministrin që ma bëri kështu e s’më doli në mbrojtje, se fal, për 7 breza do ta shkrij…etj.

Këto prova janë përdorur për të lënë në fuqi masën e sigurisë ‘arrest në burg’.’Ols violina, Ols kafka’, s’mund të mbrohet kështu Erion Veliaj. Ka disa korniza ligjore mbrojtja, nëse ka prova le t’i çojë në institucione”, u shpreh Lala.

Gazetarja Lala bëri dhe një panoramë të përgjithshme të situatës politike dhe të drejtësisë në të cilën ndodhet vendi, duke theksuar se Shqipëria është në gjendjen e saj më kritike.

Sipas Lalës, duhet një reagim popullor që gjërat të ndryshojnë, pasi keqqeverisja u ka vënë ‘këmbën në fyt’ qytetarëve.

“Shqipëria është në situatën e saj më kritike. Duhet të ketë një reagim popullor për t’i ndryshuar gjërat.

Jemi në një situatë kaotike, e keqja është korrupsioni i një qeverisjeje 12-vjeçare, u ka vënë këmbën në fyt qytetarëve, korrupsionin, me njerëz të krimit në parlament e administratë dhe kur reagon një prokurori, ka bërë hapa domethënës.

Arrestimi i Veliajt, që edhe nga burgu tregon se s’ka limite, edhe pse ndaj tij rëndojnë akuzat për korrupsion pasiv dhe pastrim parash, dyshime.

S’e besoj të jetë parë kjo sjellje e politikës shqiptare dhe të kësaj mazhorance socialiste dhe kur janë nën akuzë kanë një arrogancë të pashoqe. Situata është kaq kaotike, sa ne media kemi harruar njerëzit e thjeshtë.

Edhe politika duhet të kalojë në sitë, pasi do të ketë më shumë kredibilitet. Komunikimet në sky ecc, s’mund të përdoren si provë e vetme në proceset penale.

Duhet të shërbejnë si indicie për SPAK, nëse shkojnë paralelisht me prova të tjera, atëherë duhet të përdoren si prova. GJK e mori në shqyrtim kur e kërkoi Berisha për nenin që SPAK përgjonte anëtarët e GJK, përgjimi i anëtarëve të GJK nga prokuroria.

Në disa momente duheshin rregulla të qarta të lojës. Gani Dizdari, ishte i vetmi që e ngriti zërin në atë kohë. ‘Do shkatërroni sistemin’, pati thënë.

Në kohën kur korrupsioni është kaq kapilar dhe krimi deri në qeveri, etja për të çuar përpara drejtësisë zyrtarët e lartë nga ana e qytetarëve është shumë e madhe. Duhen bërë disa shembuj”, theksoi ndër të tjera gazetarja Klodiana Lala.

Në tregun e këmbimit valutor shqiptar të ditës së sotme, një dollar do të blihet me 90.8 lekë dhe do shitet me 92 lekë.

Ndërkohë monedha evropiane euro do blihet me 99 lekë dhe do shitet me 99.7 lekë.

Franga zvicerane sot në tregun shqiptar do blihet me 102.5 lekë dhe do shitet me 103.7 lekë.

Ndërsa paundi britanik do blihet me 117.6 lekë dhe do shitet me 118.8 lekë.

Zjarri masiv që përfshiu klubin e natës “Pulse” në Koçan, Maqedonia e Veriut, ka shkaktuar një tragjedi të rëndë, duke marrë jetën e të paktën 59 personave. Ngjarja, e cila ka tronditur opinionin publik, ndodhi gjatë një koncerti ku ndodheshin rreth 500 persona.

Mes viktimave është edhe Andrej Gorgievski, një nga themeluesit e grupit të njohur të hip-hop-itDNK. Sipas dëshmitarëve, Gorgievski fillimisht arriti të largohej nga ndërtesa, por u rikthye për të ndihmuar të tjerët. Fatkeqësisht, ai mbeti i bllokuar nga shembja e tavanit, duke humbur jetën së bashku me dhjetëra persona të tjerë, përfshirë disa të mitur.

I lindur dhe rritur në Shkup, Gorgievski ishte një nga figurat kryesore të hip-hop-it maqedonas. Ai e themeloi DNK në fillim të viteve 2000 së bashku me Vladimir Blažev (Panço), i cili ndodhet në spital me djegie të rënda. Grupi DNK u bë i njohur për temat sociale, miqësinë dhe dashurinë në tekstet e tyre, duke prodhuar hite si Fala, Ako utre me nema, Srce, Amajlija dhe Romani.

Ndër viktimat e tragjedisë janë gjithashtu tastieristi Filip Stefanovski, kitaristi Aleksandar Kolarov, bateristi Gorđi Gorđiev dhe vokalistja mbështetëse Sara Projkovska. Mes të ndjerëve janë edhe beatboxeri Martin Atanasovski (Martin Buco) dhe Igor Velkov, një tjetër baterist i grupit.

Këngëtarja e njohur maqedonase, Kaliopi, reagoi në rrjetet sociale, duke shkruar: “Andrej… Zemra ime po copëtohet. Humanizmi yt shkëlqeu edhe në çastet e fundit, duke shpëtuar jetë. Nuk duhej të ishte kështu… Ndihem e pikëlluar dhe e zemëruar.”

Autoritetet maqedonase kanë nisur hetimet për shkaqet e zjarrit, ndërsa sipas të dhënave paraprake, ai dyshohet të jetë shkaktuar nga efektet skenike vizuale që ndezën një pjesë të çatisë prej druri. Klubi rezulton të ketë funksionuar me një licencë të falsifikuar dhe me mungesa të rënda në kushtet e sigurisë.

Pronari i klubit, i cili tentoi të largohej nga vendi, është arrestuar së bashku me 19 persona të tjerë, përfshirë ish-zyrtarë shtetërorë. Kryeministri i Maqedonisë së Veriut, Hristijan Mickoski, e cilësoi ngjarjen si një “vrasje masive”, duke premtuar ndëshkime të rrepta për përgjegjësit.

Tragjedia ka shkaktuar një valë pikëllimi dhe zemërimi në vend, ndërsa qeveria ka shpallur shtatë ditë zie kombëtare në nder të viktimave.

Endrit Thaçi, djali i Hashim Thaçit, ka ndarë emocione dhe kujtime të thella për babanë e tij pas ndarjes nga jeta të gjyshit, Haxhi Thaçit. Ai në mbledhjen komemorative që po mbahet për të ndjerin, falënderoi të gjithë për mbështetjen dhe bëri një fjalim emocionues:

“Gjyshi asnjëherë nuk është dorëzuar përballë sëmundjeve. Shpresa për të takuar babin dhe bashkëluftarin e tij në Hagë ishte më e madhe sesa dhimbja e sëmundjeve. Besimi në pafajësinë e tyre ishte më i hekurt sesa aktakuza e padrejtë në muajt e fundit. Në çdo ditë, ai priste që babi të hapte derën e spitalit. Nuk u dorëzua dhe u rikthye në jetë shumë herë. Tre orë bisedim ato ditë u bënë orët më të rëndësishme të jetës së tij, një bisedë baba e bir, që të dy kërkonin lirinë që jemi.

Vdekjen e pash në fytyrën e babait kur doli nga spitali. Gjyshi i mbajti të gjithë vuajtjet dhe dhimbjet që kaluam si popull. Por këto katër vite nuk i mbijetoi vuajtjeve dhe dhimbjes nga padrejtësia, një sëmundje e pasherueshme për njerëz të fortë, krenarë dhe me dinjitet. Dhe siç thoshte shpesh gjyshi, ‘me vdek pa u korit’, por as sot nuk jemi koritur. Fatkeqësisht, babain nuk e lejuan ta marrë lamtumirën e fundit me ne sot. Nuk e lejuan që t’i ofroja një grusht dheu të Drenicës mbi ballë, por në vend të babait sot ka ardhur Kosova, Shqipëria, Maqedonia dhe Lugina”, tha Thaçi.

Emisari amerikan për misione të veçanta, Richard Grenell, ka ndarë të njëjtin qëndrim me  kryeministrin e Shqipërisë Edi Rama, i cili e cilësoi si “të tuprshme”, ndalimin nga Gjykata Speciale e Hagës të Hashim Thaçit për të marrë pjesë në varrimin e babait Haxhi Thaçi.

Grenell e shpërndau postimin e Edi Ramës për Gjykatën Speciale.

“Një poshtërim i ri nga një tribunal i turpshëm dhe i paturp, që e ka shndërruar drejtësinë ndërkombëtare në një farsë, të drejtat demokratike në fjalë boshe dhe vullnetin e mirë të Kuvendit të Kosovës në bumerangun më brutal”, ka shkruar Rama në “X”, të hënën.

Grenell vazhdimisht ka kritikuar mënyrën sesi Hashim Thaçi po mbahet në paraburgim në Hagë.

(Balkan Web)

Duke u kthyer nga Fieri, kryeministri Edi Rama u është përgjigjur ndjekësve në Facebook. Në rubrikën “Sy m’sy”, një prej komentuesve i kërkonte me ironi Ramës që t’i thoshte kryeministres italiane Giorgia Meloni për të marrë pasaportën italiane.

Në përgjigje të tij kreu i qeverisë i kërkoi që të bashkojë votat për PS-në në 11 maj për të marrë pasaportën europiane në 2030-ën.

“Nuk kam pse i them Melonit për pasaportën italiane. E jotja nuk më duhet mbrapsht, se kam timen njësoj si tënden. Por ne të dy duhet të bëhemi bashkë më 11 maj dhe të futim Shqipërinë në BE brenda 2030-ës dhe marrim pasaportën europiane të Shqipërisë. Një pasaportë njësoj si Italia, Gjermania e francezja. Mos e mendo dy herë më jep votën më 11 maj dhe unë e PS do të japim pasaportën e BE-së”, u përgjigj kreu i qeverisë.

Një tjetër komentues i kujton kryeministrit premtimet e bëra në vitin 2013 kur erdhi në pushtet nga 300 mijë vendet e punës te 24 orë ujë në ditë. Rama tha se premtimi i parë është tejkaluar ndërsa premtimi për ujë 24 orë përfundon në mandatin e katërt.

“Kur ne morëm detyrën Shqipëria kishte 1 milion e 23 mijë të punësuar, 1 milion 327 mijë ishte numri i tyre në mbyllje të 2024. Tani gënjej unë? Shiko librin e sigurimeve janë mbi 300 mijë sesa kur ne morëm detyrën. Vetëm 4 zona urbane me ujë 24 orë gjetëm kur morëm detyrën. Sot kemi 48 urbane dhe 98 rurale. Në mandatin e katërt mbyllet dhe kjo plagë e vjetër”.

I pyetur nga ndjekësit se kush e ka penguar këto 12 vjet për të anëtarësuar Shqipërinë në BE, Rama u përgjigj

“Pasaporta europiane merret kur bëhet shtet dhe nuk bëhet si komentet në FB, po të paralajmëroj që kur ta marrësh atë pasaportë në dorë, do të vijë zor nga vetja për ato që mendon e thua sot”.

Një tjetri që tha se nuk dëshiron të anëtarësohet në BE në kushtet ku ndodhet Europa sot, Rama i kujtoi Ukrainën dhe luftën e saj trevjeçare për t’u anëtarësuar BE. Sipas tij BE është shpëtimi nga e shkuara.

“Po nuk shkove në Europë ka vetëm një rrugë kthimi, vetëm në gropë. Janë pa mend ukrainasit që vriten prej 3 vitesh se duan të jenë më të dy këmbët në Europë? Po moldavët pse duan? Po estonezët, lituanezët ku do ishin sot po të mos ishin në BE? BE është shpëtimi nga rikthimi i së shkuarës, vetëm BE i jep fund kësaj historie kthimesh tragjike”.