Lajme Flesh

Tërmetet e njëpasnjëshme në Santorini kanë bërë që autoritetet greke të marrin masa.

Ministri i Krizave Klimatike dhe Mbrojtjes Civile, Vasilis Kikilia, në një intervistë bëri të ditur se do të ndërtohet një port i ri evakuimi i cili do të shërbejë për ankorimin e trageteve që do të mbajnë banorët ne rast tërmeti.

“Së bashku me portin e ri në Santorini që po përgatitet, ka pasur një vendim për ngritjen e një porti evakuimi ku do të mund të ankorohen në rast emergjence tragetet me pasagjerë”.

Ministri theksoi se ekziston mundësia e një tërmeti më të madh në rajon, gjë që e bën të domosdoshëm vigjilencën e vazhdueshme dhe përgatitjen në kohë.

“Një tërmet i madh mund të shkaktojë dëme të mëdha apo edhe një cunami. Banorët e Santorinit dhe ishujve përreth duhet të dinë se, në rast të një tërmeti të madh, duhet të largohen menjëherë nga zonat bregdetare”.

Ishulli i Egjeut, i cili është një nga destinacionet më të njohura turistike, është tronditur nga mijëra tërmete që nga fundi i Janarit, duke detyruar mijëra njerëz të largohen dhe autoritetet të mbyllin shkollat.

Procesi i Primareve të Partisë Demokratike duket se ka nxitur kaos dhe pakënaqësi mes demokratëve, dy prej të cilëve deri tani kanë deklaruar publikisht largimin nga ky proces, që në të njëjtën kohë do të thotë edhe djegien e mundësisë për të kandiduar si deputetë në zgjedhjet e 11 majit.

Pas Helidon Bushatit, tërheqjen nga gara e primareve e ka njoftuar edhe Indrit Hoxha. Sekretar i PD për Emigracionin dhe Diasporën, thotë megjithatë se mbështet PD-në drejt fitores teksa shton se tërhiqet për shkak të një angazhimi të ri.

Reagimi i Indrit Hoxhës:

Të nderuar anëtarë, mbështetës dhe demokratë të palëkundur,

Pas një reflektimi të thellë dhe me përgjegjësinë më të madhe ndaj jush dhe ndaj misionit tonë të përbashkët, kam vendosur që të mos jem pjesë e garës në primaret për kandidatët për deputet. Ky nuk është një tërheqje, por një angazhim i ri për të forcuar Partinë Demokratike dhe për të mbështetur çdo përpjekje që na çon drejt fitores.

Sot, më shumë se kurrë, Shqipëria ka nevojë për një ndryshim të vërtetë. Pas viteve të një keqqeverisjeje të lodhshme dhe të korruptuar, është koha për një rotacion politik që do t’u rikthejë shqiptarëve shpresën dhe besimin tek institucionet. Ky ndryshim nuk do të vijë vetë – ai kërkon sakrificë, përkushtim dhe angazhim nga çdo demokrat dhe çdo qytetar që e do këtë vend.

Nuk ka më vend për qëndrime pasive. Është detyra jonë që me vullnet dhe vendosmëri të bëjmë gjithçka që është e nevojshme për të sjellë ndryshimin. Çdo përpjekje, çdo angazhim, çdo sakrificë është një hap drejt një Shqipërie të lirë nga korrupsioni dhe padrejtësitë.

Unë mbetem i përkushtuar, krah jush, në këtë rrugëtim. Ftoj çdo demokrat të ngrihet, të angazhohet dhe të japë kontributin e tij për triumfin e Partisë Demokratike dhe për një të ardhme më të ndritur për vendin tonë.

Koha për ndryshim është tani. Rotacioni politik nuk është thjesht një mundësi – është një domosdoshmëri për Shqipërinë.

Përpara për fitoren e Partisë Demokratike! Përpara për të ardhmen e Shqipërisë!

Jon Henley – The Guardian

Ata u mblodhën duke buzëqeshur, por detyra që kishin marrë përsipër ishte e madhe. Pas dhjetëra samitesh në të cilat një BE hezituese dhe e përçarë nuk kishte arritur të binte dakord për ndonjë plan të përbashkët për përfundimin e luftës në Ukrainë, ky takim, papritmas dhe në mënyrë jetike duhej të ishte ndryshe.

Udhëheqësit e Francës, Gjermanisë, Polonisë, Italisë, Spanjës dhe Danimarkës, bashkë me kryeministrin e Britanisë dhe krerët e NATO-s, Komisionit Evropian dhe Këshillit Europian, mbërritën në Paris të tronditur nga një javë historike.

Të hënën e kaluar, nënpresidenti i SHBA, JD Vance, i kishte thënë Europës se “rregullimi i tepërt” i teknologjive potencialisht të dëmshme ishte i gabuar. Dy ditë më vonë, Donald Trump i telefonoi Vladimir Putinit për të nisur bisedimet mes SHBA-së dhe Rusisë për përfundimin e luftës.

Në të njëjtën ditë, sekretari i mbrojtjes i SHBA-së, Pete Hegseth, u tha homologëve të tij europianë në një takim në Bruksel se SHBA nuk ishte më “kryesisht e fokusuar” në sigurinë e Evropës dhe kontinenti do të duhej të merrte drejtimin në mbrojtjen e Ukrainës.

Të premten erdhi grushti i Vance. Një sulm i dhunshëm ideologjik që akuzonte demokracitë evropiane për shtypjen e fjalës së lirë, përkulje ndaj multikulturalizmit dhe largim nga votuesit për shkak të frikës. Harrojeni Rusinë: kërcënimi i vërtetë për Evropën, tha ai, ishte “nga brenda”.

Zëvendëspresidenti i SHBA-së refuzoi më pas të takonte kancelarin gjerman, Olaf Scholz. Në vend të tij takoi Alice Weidel, udhëheqësen e ekstremit të djathtë AfD, një parti që agjencia gjermane e sigurisë e mban nën vëzhgim si një kërcënim potencial për demokracinë.

Në 5 ditë, liderët u ndërgjegjësuan forcërisht për tre realitete: së pari, SHBA-ja dhe Evropa duket se nuk i ndajnë më vlerat që, që nga viti 1945, kishin mbështetur aleancën transatlantike. Së dyti, Evropa nuk mund të mbështetej më tek SHBA për ta mbrojtur atë.

Së treti – për pyetjen e menjëhershme për të cilën Evropa po priste me padurim një përgjigje – plani i SHBA, për aq sa ekziston në të vërtetë, nuk dukej se përfshinte një vend në tryezë për Evropën (përfshirë edhe çështjen e Ukrainës).

Samiti i Parisit i së hënës u thirr nga presidenti francez, Emmanuel Macron, sepse, sipas fjalëve të një këshilltari të Elysee, “tani është e nevojshme që evropianët të bëjnë më shumë, më mirë dhe në një mënyrë koherente, për sigurinë tonë kolektive”.

Ata që morën pjesë u konsideruan si më të vendosurit, por edhe më të pasurit, një koalicion jo vetëm i vullnetarëve, por të aftëve – duke përfshirë Britaninë, jo më një anëtare e BE-së, por një kontribuues i madh në Ukrainë dhe një forcë e fuqishme ushtarake evropiane.

Me të mbërritur në Paris, presidentja e Komisionit Evropian, Ursula von der Leyen, tha se siguria e Evropës ishte “në një pikë kthese. Po, bëhet fjalë për Ukrainën, por edhe për ne. Ne kemi nevojë për një mentalitet urgjent. Ne kemi nevojë për një rritje në mbrojtje. Dhe ne kemi nevojë për të dyja tani”.

Por samiti i së hënës ka të ngjarë të jetë i pari nga shumë në rrugën drejt një politike koherente të sigurisë për Ukrainën dhe për Evropën më gjerësisht. Mjedisi i sigurisë së Evropës mund të ketë ndryshuar rrënjësisht, por duket se Evropa jo.

Ajo ka “armiqtë” e saj brenda: qeveritë populiste, të ekstremit të djathtë, miqësore ndaj Moskës, pro Trump-it që do të bllokojnë një politikë të përbashkët sigurie aty ku të munden. Ministri i Jashtëm i Hungarisë, Péter Szijjártó, nuk humbi kohë duke shigjetuar samitin e së hënës.

Takimi ishte një mbledhje e “liderëve evropianë pro-luftës, anti-Trump, të frustruar” që synonte “parandalimin e një marrëveshjeje paqeje në Ukrainë”, tha ai, duke shtuar se ndryshe nga ata, Budapesti “mbështet ambiciet e Donald Trump … dhe dëshiron paqen në Ukrainë”.

Robert Fico, kryeministri populist i Sllovakisë, gjithashtu u vu në lëvizje. Zyrtarët e BE-së nuk kanë mandat për të përcaktuar rolin e Evropës në ndonjë armëpushim në Ukrainë, tha ai, duke shtuar se diskutimet nuk kishin të bënin me BE-në dhe pjesëmarrja e tyre dëmton besimin tek BE-ja.

Vendet që nuk ishin ftuar në bisedimet e Parisit po ankohen gjithashtu. “Edhe brenda BE-së, jo të gjitha shtetet trajtohen në mënyrë të barabartë” – tha presidentja pro-evropiane e Sllovenisë, Nataša Pirc Musar. “Kjo nuk është Evropa që ne aspirojmë [ose] Evropa që kërkon të respektohet.”

Udhëheqësit e tjerë i frikësohen ndikimit të një rritjeje të madhe të shpenzimeve të mbrojtjes në politikën e brendshme tashmë të acaruar. Sipas NATO-s, Portugalia, Italia, Spanja, Belgjika, Kroacia, Luksemburgu dhe Sllovenia shpenzojnë të gjitha më pak se objektivi prej 2% i PBB-së për mbrojtjen.

Ka sfida të fuqishme në perspektivë për një huamarrje të përbashkët – të cilën Gjermania, ndër të tjera, e kundërshton fuqishëm – për të financuar nevojat e sigurisë kolektive të Evropës dhe mbi përdorimin e aseteve të ngrira ruse.

Që tani ka ndasi rreth garancive të sigurisë së Ukrainës të pasluftës. Macron ideoi mundësinë e një force eventuale paqeruajtëse evropiane në Ukrainë vitin e kaluar dhe kryeministri britanik, Keir Starmer tha të dielën se Mbretëria e Bashkuar ishte e përgatitur për të vendosur trupa në terren. Suedia ndoqi shembullin të hënën.

Holanda tha se kishte një “jo negative” në lidhje me idenë, por Gjermania tha se ishte “e parakohshme” dhe Polonia – e cila shpenzon më shumë se 4% të PBB-së së saj për mbrojtjen, më shumë se çdo anëtar tjetër i NATO-s tha se “nuk po planifikonte të dërgonte asnjë ushtar polake”.

Diplomatët e BE-së pranojnë se qëndrimi ideologjik brutal, transaksional dhe pa turp i administratës Trump mund të copëtojë unitetin tashmë të brishtë të Evropës. Nëse do të ndodhë apo jo, thonë ata, mund të varet nga procesi i të cilit takimi i Parisit i së hënës është vetëm hapi i parë.

Kryebashkiaku Erion Veliaj është kapur sërish duke gënjyer.

Në një reagim të bërë së fundi në rrjetet sociale, ku sulmon me një gjuhë intimiduese prokurorin Olsi Dado, thotë se qelizat telefonike të publikuara në dosjen hetimore të SPAK-ut që tregojnë se është zotërues i vilës në Qerret janë bërë në kohë fushate.

Por faktet e zbardhura në vendimin e gjykatës tregojnë krejt të kundërtën.

Sipas të dhënave të marra nga SPAK-u në kompaninë telefonike ka rezultuar se numri i Veliajt ka pasur logime të shpeshta në zonën e Qerretit. Nga kjo analizë rezulton se këto logime janë kryesisht gjatë fundjavave, por ka edhe logime të cilat janë gjatë ditëve të caktuara të javës të vitit 2023 etj.

Çfarë ka bërë Erion Veliaj në Qerret fundjavave?

Në qeliza tregohet se Ajola Xoxa në vitin 2020 ka qenë në Qerret. Kështu tregohet dhe nga komunikimet që shoferi i Ajolës ka shkëmbyer me Olsi Eftimin, personin që merrej me punimet në vilë.

“Shtetasi Armand Manahasa shpjegon ndër të tjera se nga muaji shkurt i vitit 2019 deri në nëntor të vitit 2021 ka qenë i punësuar si shofer personal i shtetases Ajola Xoxa. Këtë shtetase e njeh nëpërmjet babait të saj, Arben Xoxa, i cili ka vdekur në muajin shkurt të vitit 2019. Shtetasi Armand Manahasa ka shpjeguar se e ka shoqëruar shtetasen Ajola Xoxa, përveç shtëpisë së saj tek ‘Kodra e Diellit’ dhe zyrat në ‘Sky Tower’, edhe në fshatin Qerret, tek një vilë brenda kompleksit ‘Marea’. Deklaruesi shprehet se ka filluar të shoqërojë shtetasen Ajola Xoxa dhe nënën e saj në Qerret, tek kompleksi në fjalë, në periudhën 2019-2020, Gjithashtu, në disa raste ka shoqëruar dhe pastruesen e saj që quhej Ela. Deklaruesi shprehet se shpesh ka transportuar në vilën brenda kompleksit edhe sende personale shtëpiake si edhe rroba të ndryshme.

I pyetur rreth një mesazhi të shkëmbyer me shtetasin Olsi Efthimi më datë 16.07.2020, ku i drejtohet duke e pyetur ‘Do shkoni në Qerret sot?’, të cilit Olsi Efthimi i përgjigjet ‘Jo nuk do shkojmë se ka ditëlindjen’, deklaruesi shprehet se komunikimi është bërë me këtë shtetas pasi ai shoqërohej herë pas here me Ajola Xoxën, dhe në dijeninë e tij shkonte (Olsi Efthimi) tek vila në Qerret, pasi merrej me arredimin e saj, me punë dhe aspekte të tjera. I pyetur nëse kishte qenë në ambientet e brendshme të banesës shtetases Ajola Xoxa, deklaruesi shprehet se nuk ka qenë asnjëherë. Deklaruesi ka shtuar se banesa ndodhej në katin e dytë të banimit, ndërsa në katin tjetër sipër-katit të banimit ku banonte Ajola, ajo po kryente punime të cilat ndiqeshin nga shtetasi Olsi Efthimi”, thuhet në dosjen hetimore.

Çfarë fushate kishte në kohë pandemie, po në 2022-shin cila fushatë ishte që dalin qelizat atje.

Se mirë Erion Veliaj justifikohet për 2023-shin, por në kohët e tjera?

Mos vallë SPAK-u ka ndonjë qelizë tjetër që na del atje pikërisht te dera e shtëpisë? Se mos ka dhe ndonjë foto pastaj dhe si do ta justifikojë i shkreti?

“Konkretisht, më datë 01.08.2021, ora 7:52 p.m., shtetasi Driant Zeneli i shkruan Ajola Xoxës:

Driant Zeneli-A të ka marrë malli për Qerretin? -Ne erdhem sot.

Ajola Xoxa i përgjigjet: Ajo aty në fund është shtëpia jonë”, sqarohet në dosje.

Sipas të dhënave, ashtu siç e përmendëm më lart, edhe dëshmitarë të tjerë e identifikojnë vilën në Qerret si e Erionit, vetë Erioni në gjykatë tha ajo është vila ime.

Ai mund të ketë qenë 87 herë në zonat që pretendon, por ka dhe qelizat e tij që i ka në Qerret. Erion Veliaj kërkon të fokusohet vetëm te qelizat e fushatës që të justifikojë veten.

Vila që quhej vila e Erionit tani ekzistoka, por nuk është e Erionit, por e vjehrrit të tij të ndjerë.

Ajola shkonte atje se ashtu kishte ca punë dhe Erioni shkonte atje me celular se ashtu kishte disa punë.

Kështu e justifikon Erioni meqenëse kam qenë në fushatë të Kavajës paskam qenë në Qerret te vila.

Këto janë vetëm disa nga faktet që vërtetojnë se Erion Veliaj po gënjen sërish për vilën e tij në Qerret të cilën do t’ia faturojë Arben Xoxës.

Por këto nuk janë asgjë më shumë e as më pak se budallallëqet e radhës që thjesht dhe vetëm më shumë sesa mbrojtje po e fundosin kryebashkiakun e Tiranës në detyrë, i cili ndodhet pas hekurave në paraburgimin e Durrësit./ CNA.al

Një ngjarje e rëndë u regjistrua paraditen e sotme në qytetin e Shkodrës, ku 44-vjeçarja Anila Prendushi u plagos me plumb në kokë nga partneri i saj, 34-vjeçari Kolë Manaj, i cili më pas vrau veten.

E teksa autoritetet po punojnë për zbardhjen e plotë të kësaj ngjarje, dy janë pistat të cilat po hetohen, ajo e xhelozisë dhe pamundësia ekonomike. Mësohet se 44-vjeçarja ishte e vetmja që çonte të ardhura në shtëpi, pasi partneri i saj me të cilin kishte 5 vite që bashkëjetonte ishte i papunë.

Ajo punonte si psikologe në Bashkinë e Shkodrës dhe për të gjithë ata që e njohin është një punonjëse e përkushtuar dhe tepër profesioniste. Kështu është shprehur për Euronews Albania edhe një nga kolegët e saj me të cilin kishte punuar vite më parë.

Klajdi Xhelilaj, tregoi se 44-vjeçarja është një nga profesionistet më të mira në fushën e saj dhe se gjithë qyteti i Shkodrës gëzon respekt për të.

“Në një nga organizatat kam pasur privilegjin të punoj me Anilën dhe besoj se është një nga ekspertet më të mira në zonën e Shkodrës, është një person sakrifikues për të gjitha grupet e margjinalizuara. Termi krim pasioni nuk është i përshtatshëm se ku ka pasion nuk duhet të ketë dhunë, por tolerancë.

Po më duhet të të them që për mua është një nga më profesionistët, një profesioniste që është krenari jo vetëm për ata që kanë punuar me të , por për të gjithë qytetin. Anila ka bërë maksimumin për të ofruar shërbime sa më cilësore.

Për mua Anila është një nga profesionistet më të mira në qytetin e Shkodrës, njëri sakrifikues që ka punuar për mbrojtjen e fëmijëve. Gëzon respektin e të gjithëve në Shkodër”, tha ai.

Kryebashkiaku Erion Veliaj që pas arrestimit të tij më 10 shkurt të këtij viti ka ardhur në rrjetet sociale me disa postime, ku ka shënjestruar prokurorin e çështjes së tij Ols Dadon si dhe gjyqtarin Erion Bani.

Përpos akuzave për njerëzit e drejtësisë, Veliaj ka përsëritur disa herë që gjyqi i tij është politik dhe se arrestimin e e ka quajtur si të padrejtë.

Pas vendimit të GJKKO-së ku la në fuqi masën e sigurisë “arrest me burg” për kryebashkiakun Veliaj, ky i fundit ndodhet në burgun e Durrësit. Gazetarja Anila Hoxha së fundmi ka zbuluar të tjera detaje duke bërë me dije se kryebashkiaku Veliaj vijon të qëndrojë i vetëm në qeli.

Ndërkohë, vetë ajo ka kërkuar një përgjigje zyrtare nga Drejtoria e Burgut lidhur me postimet që kryebashkiaku Veliaj bën nga qelia.

“Përpos hetimit financiar, ka edhe një hetim administrativ nga Policia e Shtetit që i është kërkuar nga Gjykata plani i masave për dy tubime nga mbështetësit e Sali Berishës nga njëra anë, dhe po ashtu pse nuk ka pasur plan masash për tubimin nga mbështetësit e Erion Veliajt. Veliaj vijon të qëndrojë i vetëm në qeli në burgun e Durrësit. Një ditë më parë ai është takuar nga vëllai i tij.

Ndërkohë kam kërkuar dhe një përgjigje zyrtare nga Drejtoria e Burgut se ku e gjen telefonin për të bërë ato postime në rrjetet sociale, por më është thënë që si çdo i burgosur apo i paraburgosur, ka dhënë një listë numrash të personave që do të telefonohen. Ata i telefonon nga numri i paraburgimit, dhe siç duket ata përcjellin mesazhet e tij”, tha ajo për Top Channel.

Teksa SPAK, finalizoi në 9 shkurt 2025 një hetim me objekt pasurinë dhe korrupsionin e kryebashkiakut të Tiranës, Erion Veliaj, duke çuar në arrestimin e tij dhe bashkëshortes Ajola Xoxe, një tjetër dosje voluminoze pritet të sjellë probleme ligjore për Veliaj.

Probleme këta që tregojnë se shumë shpejt SPAK, do finalizojë një tjetër aksion arrestimesh, ku në fokus të masave të sigurimit për arrest do jetë sërish Erion Veliaj për “Shpërdorim detyre” dhe zyrtarë të tjerë e biznesmenë.
Kjo dosje pritet të kthehet si çështja nr. 2 kundër kryebashkiakut Erion Veliaj.

Gazetari Elton Qyno ka mësuar se bëhet fjalë për një dosje penale që mban Nr. 255, ku në fokus ka kontratën financiare për ndërtimin e landfillin dhe inceneratorit të Tiranës.

Kjo është një dosje, ku SPAK ka zbuluar një gropë të zezë financiare, ku megjithëse nga ana e bashkisë Tiranë që drejtohej nga Erion Veliaj, janë paguar dhjetëra milionë euro për ndërtimin e objektit të inceneratorit, asnjë objekt i tillë deri më tani nuk është ndërtuar në teren.

Hetimet kanë nisur në kuadër të procedimit penal nr.255 të vitit 2020, për veprat penale të “Mashtrim me pasoja të rënda” në bashkëpunim, “Shpërdorim i detyrës”, “Korrupsion pasiv i funksionarëve të lartë shtetërorë ose të zgjedhurve vendorë dhe “Pastrimi i produkteve të veprës penale apo i veprimtarisë kriminale”.

Hapi i parë i rëndësishëm për këtë çështje është hedhur në 28 korrik 2023, kur me kërkesë të SPAK Gjykata e Posaçme miratoi sekuestrimin e kompanisë “Integrated Energy BV SPV” dhe aseteve të saj, kompani kjo që ishte shpallur fituese për ndërtimin e inceneratorit.

Tashmë hetimet kanë përparuar ndjeshëm, ku prokurorët e SPAK kanë nxjerrë në dritë një mekanizëm të ndërlikuar transaksionesh të cilat tregojnë dyshime të forta për implikimin në veprime kriminale të zyrtarëve të bashkisë së Tiranës dhe abuzimin me detyrën të kryebashkiakut Veliaj.

Një ngjarje e rëndë ka tronditur Brazilin, kur një futbollist, i cili ishte gati për të luajtur, ndërroi jetë për shkak të disa problemeve shëndetësore.

Gabriel Popo pasi u nda nga jeta në moshën 26-vjeçare.

Ai ishte gati të luante në një ndeshje për XV de Jau kundër Uniao Suzano, e cila u anulua pas incidentit.

Mesfushori pësoi një problem shëndetësor dhe u dërgua me urgjencë në spitalin në Sao Paulo, ku më pas ndërroi jetë.

Klubi i tij bëri homazhe në një deklaratë ku shkruhej: “Gabriel Popo, përgjithmonë në zemrat tona.

Asgjë nuk na përgatit për lamtumirë si kjo. Popo na la shumë shpejt, por gëzimi, talenti dhe pasioni i tij për futbollin do të mbeten të gjallë tek secili prej nesh.

Popo, do të luajmë, do ta veshim këtë fanellë dhe do të kthehemi më të fortë për ty!”.

Gazetarja Klodiana Lala, e ftuar në emisionin Open në News 24 ka dhënë detaje të reja në lidhje me ngjarjen e rëndë në Shkodër, ku Kolë Mani ka plagosur rëndë bashkëjetuesen Anila Prendushin dhe më pas ka kryer vetëvrasje. Lala tha se Prendushi ka një plagë në kokë dhe i është nënshtruar një ndërhyrje kirurgjikale. Sipas saj, shanset që Prendushi të mbijetojë janë të pakta.

Më tej, Lala tregoi edhe dinamikën e ngjarjes. Ajo u shpreh se Kolë Mani ka inskenuar një ngjarje sikur do i jepte fund jetës në banesë dhe i ka dërguar video Prendushit. Ajo ka shkuar për t’i thënë se nuk duhet të vrasësh veten. Anila Prendushi ka dalë nga puna, është ngjitur në makinë me idenë për t’u sqaruar. Kolë Mani menjëherë e ka qëlluar me armë, duket se ka menduar se Anila ka ndërruar jetë (por në fakt është plagosur rëndë) e më pas i ka dhënë fund jetës së tij.

Klodiana Lala: Anila Prendushi është në gjendje të rëndë shëndetësore. Është në Spitalin e Traumës. Ka një plagë në kokë, i është nënshtruar një ndërhyrje kirurgjikale dhe shpresat për të shpëtuar janë të pakta. Është nënë e tre fëmijëve dhe është një ngjarje tepër tragjike për të gjithë. Prendushi është divorcuar me bashkëshortin, me të cilin kishte tre fëmijë të mitur. Rreth 1 vit e gjysmë më pas ka krijuar një lidhje me Kolë Manajn. Fillimisht kanë shkuar mirë.

Rreth tre javë më parë kanë nisur problemet mes çiftit, për arsye, që urojmë të mbijetojë dhe vetë Anila ta tregojë. Kolë Mani ka inskenuar një ngjarje sikur do i jepte fund jetës në banesë dhe i ka dërguar video Prendushit. Ajo ka shkuar për t’i thënë se nuk duhet të vrasësh veten. Anila ka dalë nga puna, është ngjitur në makinë me idenë për t’u sqaruar. Kolë Mani e ka qëlluar me armë, duket se ka menduar se Anila ka ndërruar jetë (por në fakt është plagosur rëndë) e më pas i ka dhënë fund jetës së tij

Kryedemokrati Sali Berisha ka vijuar akuzat e tij ndaj kryeministrit Edi Rama, duke e cilësuar sjelljen e tij ndaj Erion Veliajt si hipokrite dhe të qëllimshme.

“Lotët e krokodilit të Edi Ramës për Erion Veliajn janë kuptuar gjerësisht që janë të tilla. A nuk është vetë Rama ai që e vuri Veliajn në ‘valën e persekutimit’? I preu foton kur i dha çelësin e qytetit Ali Ahmetit, paralajmëroi arrestime dhe dërgoi Belinda Ballukun për të drejtuar partinë,” deklaroi Berisha.

Ai i bëri thirrje socialistëve të analizojnë sjelljen e Ramës, duke përdorur një krahasim të pazakontë: “Ua thashë dje, lexoni për zogun sqepkëpucë. Ai zog ha zogjtë e tij. T’i biem shkurt, Rama ushqehet duke eliminuar njerëzit e vet.”

“Lotët e krokodilit të Edi Ramës për Erion Veliajn janë kuptuar gjerësisht që janë të tilla. A nuk është Edi Rama që e vuri Erion Veliajn në ëake persekutim, i preu foton kur i dha ccelësin e qytetit Ali Ahmetit, paralajmëroi se do të ketë arrestime, dërgoi Belinda Ballukun për të drejtuar partinë. Unë socialistëve ua thash dje, lexoni pak për zogun sqepkëpucë. Ua them këtu, ai zog ka një ha zogjtë e tij, t’i biem shkurt, ky zog ushqehet me zogjtë e tij”, tha ai.