Lajme Flesh

Një ngjarje e rëndë është shënuar në orët e mbrëmjes së kësaj të marte në ishullin Kios, Greqi, ku një gomone me emigrantë të paligjshëm është përplasur me një motoskaf të Rojës Bregdetare Helene.

Sipas medias greke, Protothema, regjistrohen të paktën 14 emigrantë të vdekur, disa të lënduar, e disa të tjerë të zhdukur, si pasojë e kësaj përplasje.

Raportohet se Roja Bregdetare vuri re gomonen me emigrantët e paligjshëm, duke u bërë me sinjal që të ndalonin e të ktheheshin. Ky moment ka bërë që personat që po trafikonin emigrantët, të kryenin manovra të rrezikshme duke përfunduar kështu në përmbysjen e tyre.

Ende nuk dihet numri i saktë i emigrantëve që ndodheshin në gomone. Të paktën 24 emigrantë janë shpëtuar, mes tyre dhe një grua shtatzënë. Pjesa tjetër deri më tani rezultojnë të zhdukur.

Po kështu, ekziston dyshimi që të ketë pasur të shtëna nga gomonja e emigrantëve drejt mjetit të Rojës Bregdetare, por diçka e tillë nuk është e konfirmuar.

Po vijojnë kërkimet për gjetjen e personave të zhdukur.

Administrata e qytetit të Romës ka vendosur një tarifë hyrjeje prej dy eurosh për ata që duan të afrohen deri tek bordura e shatërvanit. Kjo masë synon të rregullojë fluksin e vizitorëve dhe të mbrojë këtë monument.

Dhjetëra-mijëra vetë vizitojnë çdo ditë Shatërvanin e Trevit për të bërë fotografi ose për të hedhur një monedhë në ujë. Por duke filluar nga 2 shkurti hyrja në zonën direkt pranë bordurës së shatërvanit të famshëm në Itali do të kushtojë dy euro. Kurse sheshi i madh përpara shatërvanit do të vazhdojë të jetë i lirë për t’u vizituar.

Sipas autoriteteve të qytetit të Romës sistemi i ri synon të menaxhojë më mirë fluksin e vizitorëve në një nga atraksionet turistike më të njohura të kryeqytetit italian dhe të parandalojë tejmbushjen e zonës nga turistët. Administrata e qytetit deklaroi se përmes kësaj tarife synon “t’i kundërvihet tejmbushjes së zonës, të përmirësojë përvojën e vizitorëve dhe të mbrojë një nga monumentet më të dashur të qytetit”.

Nga kjo masë, e cila zbatohet për herë të parë, janë të përjashtuar banorët e Romës si dhe personat me aftësi të kufizuara dhe personat që i shoqërojnë, si dhe fëmijët nën gjashtë vjeç.

Tejmbushje nga turistët

Administrata e qytetit të  Romës e kishte kufizuar numrin e vizitorëve të Shatërvanit të Trevi që rreth para një vit. Rreth shtërvatit lejohen të jenë njëkohësisht jo më shumë se 400 vetë.

Sipas të dhënave vitin e kaluar Shatërvanin e Trevit e vizituan më shumë se dhjetë milionë vizitorë. Në ditët e pikut kjo shifër shkonte deri në 70,000 vetë.

Disa turistë dhe kryetari i Bashkisë së Romës duke hedhur një monedhë në ujë tek Shatërvani i TrevitDisa turistë dhe kryetari i Bashkisë së Romës duke hedhur një monedhë në ujë tek Shatërvani i Trevit

Tradita e vizitorëve të Romës për të hedhur një monedhë duke shprehur një dëshirë nisi nga viti 1954 frymëzuar nga filmi “Three Coins in the Fountain”.

Një ngjarje e rëndë ka tronditur Australinë Perëndimore, pasi dy prindër dhe dy djemtë e tyre adoleshentë me autizëm janë gjetur të pajetë brenda banesës së tyre në një lagje elitare të Perth-it.

Trupat e pajetë të Jarrod Clune, 50 vjeç, Maiwenna Goasdoue, 49 vjeç, si dhe të djemve të tyre Leon, 16 vjeç dhe Otis, 14 vjeç, u gjetën në shtëpinë familjare në Mosman Park. Të dy fëmijët vuanin nga autizëm i rëndë dhe ishin joverbalë, shkruan The Sun.

Shërbimet e emergjencës u njoftuan rreth orës 08:15 të mëngjesit të së premtes nga një punonjëse kujdesi, e cila vizitonte rregullisht familjen, por nuk kishte arritur të kontaktonte me ta. Ajo gjeti pranë banesës një shënim paralajmërues që këshillonte të mos hynte brenda dhe udhëzonte që të njoftohej policia.

Brenda shtëpisë, policia gjeti të pajetë katër anëtarët e familjes, si edhe dy qentë dhe një mace. Autoritetet thanë se vdekjet nuk dukeshin të dhunshme dhe nuk janë përdorur armë, ndërsa trupat u gjetën në pjesë të ndryshme të banesës.

Të shtunën u zbulua edhe një shënim i dytë, që besohet të ketë qenë një letër, e cila ndihmoi hetuesit të arrinin në përfundimin se bëhej fjalë për një vrasje të dyfishtë të ndjekur nga vetëvrasja. Sipas mediave lokale, letra përmbante edhe detaje mbi planifikimin e financave të familjes, duke sugjeruar se prindërit kishin vendosur t’i jepnin fund jetës së bashku.

Detektivja në detyrë e Policisë së Australisë Perëndimore, Jessica Securo, deklaroi se nuk kishte asnjë histori të raportuar më parë për dhunë në familje. “Kjo është një ngjarje tragjike dhe shkatërruese, ku një familje ka humbur jetën dhe ndikimi do të ndihet në të gjithë komunitetin,” tha ajo.

Sipas policisë, të dy djemtë përballeshin me sfida serioze shëndetësore, ndërsa besohet se familja kishte humbur një pjesë të financimit shtetëror për mbështetjen e njërin prej fëmijëve me aftësi të kufizuara.

Leon, Otis dhe babai i tyre kishin ndjekur më parë Christ Church Grammar, një nga shkollat private më prestigjioze në Perth. Mediat raportojnë se Otis ishte përjashtuar nga shkolla dy vite më parë pas një incidenti, ndërsa një mësuese ka treguar se prindërit ishin të përkushtuar dhe të dashur, por të rraskapitur nga mungesa e gjumit, pasi fëmijët nuk flinin gjatë natës.

Ajo shtoi se prindërit kishin kërkuar ndihmë profesionale në mënyrë të vazhdueshme, përfshirë terapi dhe konsultime edhe jashtë shtetit./Top Channel

Një incident me lëndime trupore është raportuar sot rreth orës 11:00 në fshatin Osek Hilë të Gjakovës.

Sipas zëdhënëses së Policisë për rajonin e Gjakovës, Vlera Krasniqi, një mashkull i moshës madhore, pas një mosmarrëveshjeje, ka lënduar veten dhe kushërirën e tij, po ashtu të moshës madhore.

Dyshohet se lëndimet janë shkaktuar me mjet të mprehtë dhe, sipas policisë, bëhet fjalë për lëndime të lehta trupore.

Të dy personat e përfshirë kanë marrë trajtim mjekësor.

Njësitet policore kanë dalë në vendin e ngjarjes dhe po ndërmarrin veprimet e nevojshme hetimore.

Forcat amerikane kanë rrëzuar një dron iranian Shahed-139 që iu afrua “agresivisht” anijes aeroportuale USS Abraham Lincoln në Detin Arabik, njoftoi të martën Komanda Qendrore e SHBA-ve. Sipas zëdhënësit të komandës, Kapitenit Tim Hawkins, droni vazhdoi të afrohej drejt anijes pavarësisht masave të ndërmarra nga forcat amerikane për të de-eskaluar situatën.

Anija USS Abraham Lincoln ndodhej rreth 500 milje detare (rreth 800 km) larg bregut jugor të Iranit në momentin e incidentit. Nuk pati humbje jete ose dëme materiale në anije, sipas njoftimit. Droni u rrëzua nga një avion luftarak F-35C i dislokuar në Lincoln. Ky incident ndodhi vetëm disa orë pasi forcat iraniane kërcënuan një anije tregtare me flamur dhe ekuipazh amerikan, Stena Imperative, e cila po kalonte në ngushticën e Hormuzit.

Sipas njoftimit të SHBA-ve, dy anije iraniane dhe një dron Mohajer iu afruan me shpejtësi anijes dhe kërcënuan të pushtonin dhe të sekuestronin tanker-in. USS McFaul dhe mbështetja ajrore nga Forcat Ajrore amerikane siguruan largimin e Stena Imperative-s, i cili tani po lundron i sigurt.

Ngjarjet ndodhin në një periudhë të tensionuar midis SHBA-ve dhe Iranit, që u rrit pas protestave të mëdha në Iran që nisën në fund të dhjetorit, kundër krizës ekonomike dhe qeverisjes së regjimit. Presidenti Donald Trump kishte premtuar në janar se do të shpëtonte iranianët nga shtypja e dhunshme e protestave, duke transformuar më pas këtë qasje në një fushatë presioni për të detyruar Iranin të negociojë mbi programin bërthamor.

Trump theksoi të hënën se preferon të arrihet një marrëveshje me Iranin, duke mos përjashtuar mundësinë e veprimeve ushtarake nëse bisedimet dështojnë. “Ne po flasim me Iranin. Nëse mund të arrijmë diçka, do të jetë e mirë, nëse jo, do të ndodhin gjëra të këqija”, tha ai. Incidenti u regjistrua vetëm disa orë pasi presidenti iranian urdhëroi ministrin e jashtëm të “ndjekë negociata të drejta dhe të barabarta” me SHBA-të, një nga sinjalet e para nga Teherani që tregon gatishmëri për negociata, pas dështimit të bisedimeve gjatë verës së kaluar.

Turqia ka luajtur një rol në prapaskenë për të mundësuar këto bisedime, ndërkohë që i dërguari amerikan për Lindjen e Mesme, Steve Witkoff, është në një vizitë rajonale. Megjithatë, një zyrtar turk tha se vendi dhe data e takimeve mbeten të pasigurta, duke theksuar gatishmërinë e Ankarasë për të mbështetur procesin e negociatave.

Analistët paralajmërojnë se përplasjet e tilla në ujërat ndërkombëtare mund të rrisin tensionet dhe të komplikojnë më tej marrëdhëniet midis SHBA-ve dhe Iranit, veçanërisht në një periudhë kur presioni diplomatik për marrëveshje bërthamore është në rritje.

Kledina Skëndo, punonjëse në Sektorin e Monitorimit të Lejeve Mjedisore pranë Agjencisë Kombëtare të Mjedisit (AKM), është përfshirë në hetimet e Prokurorisë së Durrësit për skandalin e mbetjeve të rrezikshme të eksportuara nga porti i Durrësit.

Ajo ka marrë masën e sigurisë ‘arrest në shtëpi’, si pjesë e një procedimi penal që ka përfshirë disa zyrtarë dhe ish-zyrtarë të lidhur me aktivitetin e kompanisë.

Skëndo ka qenë gjithashtu kandidate për deputete e Partisë Socialiste, e renditur e 34-ta në listën e Tiranës gjatë zgjedhjeve parlamentare të 11 majit 2025.

Brezi i ri i grave shqiptare nuk është më siç i kujtonim, shkruan mesia greke ku pretendon se vajzat e reja shqiptare qě po rriten në Greqi ushqehen mirë, vishen mirë fhe ekspozohen si vajzat e perëndimit, dhe me bukurinë e tyre tundojnë meshkujt

(VIDEO) “Ato nuk kanë asnjë lidhje me nënat e tyre që kishin ardhur në Greqi dhe në vende të tjera, të vuajtura dhe të rraskapitura nga një regjim totalitar si ai komunist, dhe kërkonin, së bashku me bashkëshortët e tyre, të krijonin një jetë më të mirë në dhe të huaj.

Pavarësisht se sa të këqija ishin gënjeshtrat, ata ia dolën mbanë: Ata arritën të bëheshin pjesë e klasës së mesme kudo që shkuan, ndërsa vetë Shqipëria nuk ka asnjë ngjashmëri me shtetin e dështuar të viteve ’90.

Sigurisht, vajzat e tyre lindën në mjedise të favorshme me ushqim të mirë dhe një jetë të rehatshme, të ushqyera me stilin perëndimor të jetesës, dhe tani ato “tiranizojnë” edhe popullsinë mashkullore pasi janë gra shumë të bukura që janë mësuar edhe me kodin aktual të veshjes së kohës” shkruan media helene, pronews. gr.

Artan Shkreli është larguar nga detyra në krye të Institutit të Ndërtimit dhe në vend të tij është emëruar Persida Shkrepa.

Lajmin e ikjes se Artan Shkrelit dhe emerimin e ri, e ka ndarë në rrjetet sociale zv.kryeministrja Belinda Balluku, e cila i ka uruar suksese në këtë detyrë dhe sfidë të re.

“Me një karrierë të spikatur si arkitekte, profesionalizmi, përkushtimi dhe përvoja e saj janë një garanci e fortë për drejtimin dhe zhvillimin e këtij institucioni kaq të rëndësishëm, si edhe për forcimin e rolit të tij në shërbim të industrisë së ndërtimit në vend”, shkruan zëvendëskryeministrja.

Më herët, Shkrepa ishte një nga kandidatet më të reja për deputete në zgjedhjet e 11 majit në kryeqytet.

Janë zbardhur emrat e personave të dyshuar si autorët kryesorë të atentatit që tronditi mbrëmjen e djeshme zonën e Rrilës në qytetin e Lezhës, ku mbeti i plagosur pronari i berberhanës, Sokol Daci.

Burimet bëjnë me dije se organizatorë të këtij atentati dyshohet se janë djemtë e familjes së ish-deputetit socialist, Arben Ndoka.

Më konkretisht mësohet se bëhet fjalë për: Gerardo Ndoka, Eliseo Ndoka dhe Kevin Ndoka, të cilët thuhet se prej orësh janë në kërkim nga policia.

Sakaq mësohet se në vendngjarje, në berberhanen në emër të Sokol Dacit ka qenë i pranishëm dhe djali i biznesmenit të ndjerë Ardian Nikulaj, Andri Nikulaj.

Deri më tani rezulton se shënjestër të këtij atentati kanë qenë nipi dhe djali i Ardian Nikulaj, pasi dyshohet se ngjarja ndodhi për shkaqe hakmarrjeje.

Kevin Ndoka ka qenë i shpallur në kërkim prej kohësh nga policia e Lezhës në lidhje me një konflikt të dhunshëm që ai ka pasur me shtetasi Gjergj dhe Nikolin Marku.

Kujtojmë se atentati u organizua mbrëmjen e djeshme në një berberhanë në zonën e Rrilës të qytetit të Lezhës, ku mbeti i plagosur me 4 plumba berberi Sokol Daci, i cili aktualisht mësohet se është në gjendje kritike me jetën.

Detaje të reja nga atentati në Lezhë, polici qëlloi me 10 plumba drejt autorëve! Merando Nikulaj shpallet në kërkim

Atentati ndaj nipit të Nikulajt në Lezhë, ndalohet me urdhër të Prokurorisë efektivi i policisë! Iu përgjigj me armë autorëve
Atentati i organizuar ndaj nipit të Nikulajve, Merando, ka dështuar pasi u ngatërrua shënjestra e cila ishte i riu i sipërpërmendur, por plumbat kapën berberin. Ky i fundit momentin kur u hap zjarr ndaj biznesit të tij mendohet se ka qenë duke qethur Nikulajn.

Dyshohet se nga të shtënat me armë zjarri ka mbetur i plagosur dhe Merando Nikulaj, i cili thuhet se po merr trajtim mjekësor në një klinikë private.

Kujtojmë se ditën e sotme, pas atentatit të ndodhur mbrëmjen e djeshme në Rrilë të Lezhës, me urdhër të Prokurorisë është ndaluar një efektiv policie, shtetasi Besart Kovaçi, i cili akuzohet për veprën penale të shpërdorimit të detyrës

Sipas burimeve, gjatë sulmit me armë zjarri, efektivi i policisë i është kundërpërgjigjur autorëve duke përdorur armë zjarri.

Nga verifikimet rezulton se arma e shërbimit e policit kishte 15 fishekë, ndërsa në pistoletë janë gjetur 5, duke ngritur dyshimet se ai ka qëlluar 10 herë. Ndërkohë, grupi hetimor në vendngjarje dyshon edhe për përdorimin e një arme të tretë, për të cilën kanë nisur hetimet.

Dyshohet se edhe 21-vjeçari ka mbetur i plagosur gjatë atentatit, pasi ai është kapur nga kamerat e sigurisë në vështirësi për të ecur, por ai nuk është gjetur në asnjë prej klinikave private. Për këtë arsye, është shpallur në kërkim policor për t’u marrë në pyetje lidhur me ngjarjen. Newsbomb

120 makina, vila me qira 24 mijë franga në muaj, targa speciale, 1,5 milionë franga dëm, kredi të papaguara. Një sheh nga Kosova përfshiu familjen e tij prej gjashtë anëtarësh, si dhe dy ndihmës, në mashtrime sistematike. Nga një gjykatë zvicerane ai u dënua me 3 vjet e gjysmë burg – dhe 3 vjet ndalimhyrje në Zvicër, raporton gazetari Enver Robelli.

Kujtojmë se Sipas mediave zviceriane, ky imam i cili në rrjete sociale u predikonte mirësinë gati 8000 ndjekësve të tij, tani akuzohet nga drejtësia zvicerane si truri i një skeme komplekse të krimeve ekonomike që ka shkaktuar dëme në vlerë prej miliona frangash.

Në këtë skemë kriminale, ka qënë i përfshirë jo vetëm imami por edhe një rreth i gjerë familjar i tij, i cili përfshinte ish-bashkëshorten, vajzën, tre djemtë e tij dhe dy bashkëpunëtorë të tjerë. Në total 8 persona u përballën me drejtësinë në një seri veprash kriminale të lidhura njëra me tjetrën që shtrihen në një periudhë dhjetëvjeçare.

Sipas aktakuzës, i dyshuari kryesor, imami, 57-vjeçar se i çoi kompanitë në falimentim gjatë një periudhe prej rreth dhjetë vitesh, përdori kredi hipotekare jo për rinovimin e pronës, por për shpenzime private, dhe mori kredi bankare në mënyrë mashtruese për shpenzime private duke përdorur kompani fiktive.

Ai akuzohet më tej për evazion fiskal dhe për marrje mashtruese të kredive për Covid-19 përmes deklaratave të rreme. Ai dyshohet gjithashtu se ka deklaruar paga mujore fiktive për djemtë dhe ish-gruan e tij me qëllim që të siguronte lejet e tyre të qëndrimit nga autoritetet.

“Hetimet e policisë kishin nisur me një bastisje në një vilë luksoze afër Zürichut, për të cilën shehu paguante qira marramendëse prej 24 mijë frangash në muaj. Gjatë operacionit, hetuesit konfiskuan dokumente dhe pajisje elektronike; po ashtu u zbulua një sistem kompleks i firmave fiktive që shërbenin si mbulesë për pasurimin e paligjshëm. Sipas prokurorisë, ky sheh luante rolin e një sipërmarrësi të patundshmërive, duke mashtruar bankat dhe shtetin zviceran me bilance të falsifikua” ka raportuar më tej në artikullin e tij Robelli.

I cili më tej ka shkruar se ndonëse para zyrave të shtetit imam-shehu deklaronte se ishte i varefër, familja e tij kishte një flotë  prej 120 makinash. Mes tyre bien në sy vetura të tipit Porsche Panamera, disa modele Mercedes dhe një Hummer H2 Luxury. Si merakli i veturave shehu shpenzoi rreth 100 mijë franga vetëm për blerjen e tri tabelave të regjistrimit me numra të veçantë, të cilat në Zvicër shiten në ankand si simbole prestigji.

Si u dënuan faliljarët e imamit?

Sipas raportimit të bërë nga Enver Robelli: Sa i përket anëtarëve të tjerë të familjes, përfshirë ish-bashkëshorten dhe katër fëmijët, gjykata vendosi t’i lirojë nga akuzat ose t’i dënojë me gjoba minimale. Arsyetimi i gjykatës ishte se brenda familjes mbretëronte një strukturë strikte patriarkale ku shehu vendoste për çdo gjë. Fëmijët dëshmuan se kishin nënshkruar dokumente verbërisht për shkak të besimit ndaj babait dhe nuk kishin njohuri për financat. Madje, për shkak të muajve të kaluar në paraburgim, vajza dhe njëri nga djemtë e tij do të dëmshpërblehen me rreth 70 mijë franga nga shteti, pasi gjykata vlerësoi se nuk mund të ketë “përgjegjësi kolektive” për mëkatet e kryefamiljarit.

Gjatë procesit, shehu kërkoi falje duke u arsyetuar se si prijës fetar nuk dëshironte të figuronte publikisht si pronar biznesesh, andaj përdori anëtarët e familjes. Gjykatësja ishte e bindur se energjia kriminale e shehut kosovar ishte rritur me kalimin e kohës dhe dënimet e mëparshme me gjoba nuk kishin pasur asnjë efekt reflektimi tek ai. Njëri ndihmës i shehut u dënua me kusht, aktgjykimi për tjetrin do të pasojë më vonë.

https://www.facebook.com/plugins/post.php?href=https%3A%2F%2Fwww.facebook.com%2Fenver.robelli%2Fposts%2Fpfbid0291CQjMmCpzC7pBff61iFzMWNh7qmNS3iUTgXoXDEFrcF5PHvyRmDC4NKMxj3aTNWl&show_text=true&width=500