Author: admin

Pas indicieve të dhëna në veprimet indirekte në rrjetet sociale, ka ardhur konfirmimi i ndarjes mes dy ish-banorëve të Big Brother 5, Brikena dhe Mateo.

Ka qenë vetë Brikena, ajo që ka konfirmuar lajmin përmes rrjeteve sociale në një komunikim në rrjetet sociale në grupin e saj të fansave në “Instagram”. Përmes një mesazhi të gjatë të publikuar në grupin e saj të fansave, ajo bëri të ditur se marrëdhënia me Mateon ka përfunduar, duke theksuar se gjithçka ka ndodhur me respekt të ndërsjellë.

“Përshëndetje të gjithëve! Nuk e kam pasur të lehtë të shkruaj këtë mesazh deri më sot, sepse gjithmonë kam preferuar që gjërat personale t’i mbaj private. Megjithatë, duke parë interesimin dhe pyetjet e shumta, mendoj se tani më shumë se kurrë ju detyrohem një sqarim.Po, unë dhe Mateo nuk jemi më bashkë. Dua të theksoj se nuk ka pasur asnjë mungesë respekti nga asnjëri prej nesh. Kjo është një gjë që dua ta them qartë, sepse nuk do të doja që të krijoheshin histori apo aludime që nuk janë të vërteta.

Kam ende respekt për të dhe për gjithçka kemi kaluar bashkë. Ka qenë një pjesë e rëndësishme e jetës sime dhe për këtë do të jem gjithmonë mirënjohëse. Ndonjëherë në jetë rrugët ndahen, por kjo nuk do të thotë se duhet të ketë urrejtje apo fajësime.

Për momentin kam vendosur edhe të largohem nga disa grupe. Jo sepse nuk ju vlerësoj apo nuk ju dua, por sepse më bën keq të shoh postime, komente apo diskutime rreth kësaj situate. Kam nevojë për pak qetësi dhe kohë për veten time.

Ju falënderoj nga zemra për gjithë dashurinë, mbështetjen dhe respektin që më keni dhënë gjithmonë. Do t’ju jem mirënjohëse pafund për çdo fjalë të mirë dhe për çdo moment që keni qenë pranë meje. Me dashuri”, shkruan Brikena në mesazhin e saj për fansat.

Këngëtari i njohur i muzikës shqìptare, Sinan Vllasaliu, po kalon një periudhë të vështirë shëndetësore pas një aksidenti që e detyroi t’i nënshtrohej një ndërhyrjeje kirurgjikale.

Lajmi është bërë i ditur nga vajza e tij, Edona, e cila ka publikuar në profilin e saj në “Instagram” një fotografi të artistit nga spitali, duke treguar se ai po rikuperohet nën kujdesin e mjekëve.

Edona zbuloi gjithashtu se aksidenti ndikoi drejtpërdrejt edhe në angazhimet profesionale të këngëtarit. Sinan Vllasaliu ishte ftuar të performonte në dasmën e yllit me famë botërore, Dua Lipa, por për shkak të gjendjes së tij shëndetësore nuk arriti të ishte pjesë e kësaj ngjarjeje të veçantë.

“Në momentet më të vështira, përkujdesja, fjala e mirë dhe puna juaj na dhanë forcë dhe shpresë.

Babi im, i cili me shumë dashuri për muzikën ishte i ftuar të këndonte edhe në dasmën e Dua Lipa, fatkeqësisht nuk mundi të ishte prezent për shkak të këtij aksidenti. Megjithatë, sot mbi të gjitha jemi mirënjohës që ai është në duar të sigurta dhe po rikuperohet.

Faleminderit pafund secilit mjek, infermier dhe çdo anëtari të stafit për kujdesin, durimin dhe zemrën që treguat. Mirësia juaj nuk harrohet.❤️🙏”, shkruan vajza e Sinanit krahas fotos.

Postimi i saj ka ngjallur reagime të shumta në rrjetet sociale, ku ndjekës të shumtë dhe kolegë të këngëtarit i kanë uruar Sinan Vllasaliut shërim sa më të shpejtë dhe rikthim në skenë.

Reagimi i fundit i moderatores Alketa Vejsiu lidhur me protestat në Tiranë ka shkaktuar një valë të madhe debatesh dhe mjaft pakënaqësi mes ndjekësve të saj në rrjetet sociale.

Përmes një postimi të gjatë të ndarë në disa imazhe, Vejsiu u shpreh se e ka ndjekur me interes atë që e quajti “Revolucioni i Flamingove”, duke e vlerësuar pjesëmarrjen e shoqërisë civile, qytetarëve dhe të rinjve si një imazh të bukur të një Shqipërie të lirë dhe demokratike.

Ajo shpjegoi se fillimisht ishte rezervuar për të folur pasi nuk është eksperte, por vendosi të ndajë mendimin e saj të lirë.

Në qëndrimin e saj, moderatorja theksoi se mbështet zhvillimin e vendit dhe investimet e huaja strategjike, duke përmendur projekte si ai i Sazanit dhe Zvërnecit.

Sipas saj, marka ekskluzive të hotelerisë si Aman, Four Seasons apo The Peninsula do të sillnin një nivel tjetër turizmi elitar në Shqipëri. Vejsiu argumentoi se natyra dhe zhvillimi mund të bashkëjetojnë nëse ndiqet një model “i gjelbër”, duke u shprehur: “Pse mos t’i duam dhe pretendojme të dyja? Duam edhe Amanin, duam edhe Flamingot!”.

Megjithatë, ajo pranoi se ky proces kërkon transparencë të plotë publike, plane të rrepta mjedisore, paga dinjitoze për shqiptarët dhe ruajtjen e plazheve publike. Ajo shtroi pyetjen nëse mund ta shohim këtë situatë nën një dritë tjetër: “Po sikur të mos mendojmë: ‘Shqipëria po shitet’, por të themi: ‘Shqipëria po zhvillohet’?”.

Ky qëndrim nuk u prit mirë nga një pjesë e konsiderueshme e publikut, të cilët e akuzuan moderatoren për hipokrizi dhe shkëputje nga realiteti.

Një prej komentuesve më të spikatur i shkroi: “Ti e do Shqipërinë aq shumë, sa fëmijët i ke lindur jashtë saj, u ke vënë emra të huaj, i shkollon jashtë dhe pushimet i kalon jashtë. E megjithatë gjen kohë të na japësh leksione për dashurinë ndaj atdheut dhe të na shpjegosh se ne nuk dimë të dallojme investimin nga shitja. Shqipëria nuk ka nevojë për poezi patriotike të shkruara nga komoditeti i jetës larg realitetit të përditshëm të shqiptarëve. Shqipëria ka nevojë për ndershmëri, për përgjegjësi dhe për njerëz që e duan jo vetëm me fjalë, por edhe me vepra. Vazhdo të shfrytëzosh afërsinë me pushtetin kur të shërben ty dhe interesave të biznesit të familjes tënde, por mos u përpiq t’ua paraqesësh shqiptarëve si dhuratë atë që shumë prej tyre e shohin si humbje të identitetit, të hapësirave publike dhe të së drejtës për të vendosur mbi vendin e tyre. Shqipëria është e shqiptarëve. Nuk është dekor për propagandë, nuk është markë për marketing dhe nuk është për shitje.”.

Kritikat vijuan edhe nga ndjekës të tjerë, të cilët e cilësuan reagimin si një “qokë” apo “për sy e faqe”.

Ndërsa një tjetër përdorues njoftoi se do të ndalonte së ndjekuri atë në rrjetet sociale: “I’m unfollowing one of my favorite people.”.

Përballë këtyre komenteve, Alketa Vejsiu reagoi në mënyrë të drejtpërdrejtë për t’u mbrojtur, duke mohuar çdo lloj privilegji. Ajo u përgjigj: “Paguaj taksat, marr risqet e biznesit, më dhemb koka se shteti dhe tatimet të mbyllin llogaritë, përmbarimi të merr biznesin, bankat të sekuestrojnë. Qeveria s’të ndihmon dot. Kush ja del, ja del me punë si të gjithë. Privilegje s’di të kem marrë… Kam punuar në vendin tim. Do punoja në një vend të huaj njësoj, e s’do paragjykohesha. Por kam vendosur ta bëj në vendin tim… Dhe jam shumë e lumtur për këtë gjë”.

Kur u akuzua për qëndrimin e saj, ajo u shpreh thjesht: “Kur mesazhi s’të pëlqen, mos vrit mesazherin!”, duke shtuar më tej se foli vetëm sepse është e lirë dhe nuk ka frikë nga askush apo asgjë.

Protesta kundër projektit të Zvërnecit në Tiranë është kthyer në çështjen e ditës në vendin tonë, ku qytetarët dalin çdo ditë në tubim në orën 18:00 përpara Kryeministrisë. Por ajo që ka ngritur shumë pikëpyetje është se kush e organizon këtë protestë dhe kush qëndron në krye të saj.

Edhe pse ditën e djeshme një pjesë e protestuesve deklaroi se përfaqësohet nga një grup nismëtar patriotësh, pa zbuluar emrat e koordinatorëve, dhe renditi pesë kërkesat e tyre për qeverinë shqiptare, ende nuk dihet se cilët janë drejtuesit. Ndërkohë, ka pasur shumë zëra kundër idesë që protesta të drejtohet nga disa persona, duke kërkuar që ajo të mbetet e lirë.

Një pjesë e qytetarëve kanë kërkuar që në krye të protestës të jetë gazetari i njohur Marin Mema, i cili njihet si një nga figurat më të dashura të publikut në botën e medias.

Lidhur me këtë, në komentet në Instagram është lakuar shpesh emri i tij si drejtues i protestës, por duket se gazetari u ka dhënë fund këtyre zërave.

Gjatë një replike në një koment, Mema ka bërë me dije se ka qenë në protestë dhe do të dalë sërish, por dëshiron t’i qëndrojë larg politikës, pasi sipas tij, ajo nuk është për njerëz idealistë si ai.

“Kam dalë dhe do të dal! Kam folur kur shumë të tjerë heshtën! Politikën nuk e dua! Nuk është për njerëz idealistë si unë”, i është përgjigjur gazetari një komenti në Instagram.

Ka një përmirësim të ndjeshëm në gjendjen shëndetësore të efektivit të policisë, Edison Adri, i cili mbeti i plagosur rëndë gjatë një incidenti të regjistruar tri ditë më parë në Lozhan të Korçës.

Burime të sigurta nga Spitali i Traumës në kryeqytet bëjnë me dije se efektivi Adri ka dalë sot nga gjendja e komës, ku ndodhej që prej ditës së ngjarjes.

Stabilizohet gjendja, por mbetet nën monitorim intensiv

Mjekët e Traumës konfirmojnë se parametrat jetësorë të punonjësit të policisë tashmë paraqiten më të stabilizuar krahasuar me ditët e mëparshme, kur situata e tij shëndetësore vlerësohej mjaft kritike.

Megjithatë, ai po mbahet në monitorim të vazhdueshëm dhe po ndiqet me kujdes të veçantë nga ekipi mjekësor për të shmangur çdo komplikacion të mundshëm gjatë fazës së rikuperimit.

Hetimet në vijim për ngjarjen në Lozhan

Edison Adri u plagos rëndë gjatë kryerjes së detyrës në zonën e Lozhanit në rrethin e Korçës, në rrethana që ende po hetohen imtësisht.

Ndërsa efektivi po luftonte për jetën në spital, strukturat e Policisë së Shtetit dhe grupi hetimor kanë vijuar punën intensive në terren për të zbardhur dinamikën e plotë të këtij incidenti të rëndë dhe për të vënë përpara përgjegjësisë ligjore autorët e përfshirë.

Është publikuar pasditen e sotme fotoja e autorit të ngjarjs së rëndë të ndodhur mëngjesin e sotëm të zona e njohur si “Kthesa e Kamzës”, ku Dorian Kasa për pak sa nuk i mori jetën efektivit të Rrugores, Loren Ramës.

Siç mund ta shikoni dhe në foton e siguruar nga ilirianews.al, ky është i riu Dorian Kasa i cili tentoi t’i merrte armën e shërbimit efektivit, e pastaj ta godiste me thikë. Por falë reagimit të shpejtë të efektivit, u shmang tragjedia.

Policia e Shtetit bën me dije se ngjarja e rëndë ka ndodhur rreth orës 8 të mëngjesit, kur Dorian Kasa i është afruar efektivit Loren Rama i cili po menaxhonte trafikun, ka tentuar t’i marrë armën e shërbimit dhe i ka vendosur thikën në fyt.

“Tentoi të godiste me mjet prerës dhe t’i merrte armën e shërbimit një punonjësi të Policisë Rrugore në krye të detyrës, neutralizohet dhe vihet në pranga menjëherë autori. Sekuestrohet mjeti prerës (thikë). Specialistët për Hetimin e Krimeve të Rënda ndaj Personit arrestuan në flagrancë, për veprat penale “Vrasja e punonjësve të Policisë së Shtetit”, mbetur në tentativë, dhe “Prodhimi, mbajtja, blerja apo shitja pa leje e armëve të ftohta”, shtetasin D. K., 38 vjeç” njoftoi sot Policia.

Festimet marramendëse të martesës së Dua Lipa dhe Callum Turner në Palermo të Siçilisë nuk kanë sjellë vetëm atmosferë festive dhe të ftuar VIP, por edhe pakënaqësi nga një pjesë e banorëve vendas.

Sipas raportimeve të mediave britanike, këngëtarja thuhet se ka paguar rreth 5 mijë paund si kompensim për banorët që jetojnë pranë zonave të prekura nga organizimi i dasmës, pas ankesave për kufizimet dhe bllokimet e vendosura gjatë eventit.

Festimet, të cilat zgjasin tre ditë, kanë sjellë mbylljen e disa zonave publike në qendër të Palermos, përfshirë dy sheshe të njohura, duke shkaktuar reagime të përziera mes qytetarëve dhe bizneseve lokale.

Pakënaqësia e disa banorëve u shfaq edhe përmes grafiteve protestuese të shkruara në mure dhe kolona pranë vendeve ku po zhvillohen aktivitetet e dasmës. Një nga mesazhet më të komentuara thuhet se deklaronte se “Palermo nuk është me qira”, duke kritikuar kufizimet e vendosura për shkak të ceremonisë luksoze.

Ndërkohë, shumë qytetarë mbetën të zhgënjyer pasi nuk u lejuan t’i afroheshin zonave ku po mbërrinin të ftuarit VIP për pritjen e mirëseardhjes. Forca të shumta policie dhe ekipe private sigurie kanë rrethuar vendet kryesore të festimeve, duke kufizuar hyrjen e publikut.

Nga ana tjetër, autoritetet lokale kanë mbrojtur organizimin e eventit. Kryetari i Palermos, Roberto Lagalla, deklaroi se zgjedhja e qytetit nga Dua Lipa për dasmën e saj përfaqëson një promovim të rëndësishëm ndërkombëtar për Palermon dhe pritet të sjellë përfitime ekonomike për zonën.

Sipas raportimeve, çifti po qëndron në hotelin luksoz Villa Igiea, ku thuhet se kanë rezervuar një kat të tërë për familjarët dhe të ftuarit e tyre.

Ceremonia kryesore pritet të zhvillohet në Villa Valguarnera, ndërsa kostoja totale e festimeve raportohet të arrijë në rreth 1.5 milionë euro. Për sigurinë janë angazhuar më shumë se 50 truproja, ndërsa në zonat përreth janë vendosur masa të rrepta, përfshirë ndalimin e fluturimeve me dronë.

Gjatë qëndrimit të saj në Ferma VIP, Soni ka folur shpesh për historinë e saj të dashurisë me Florin, duke surprizuar publikun me rrëfimet e sinqerta për marrëdhënien e tyre. Madje, në një prej bisedave në fermë, ajo i bëri edhe një thirrje spontane artistit.

“Po dronë, pse nuk më ke sjellë këtu? Moza, thuaju të më sjellin një dron, të lutem”, ishte shprehur ajo me humor.Por Flori vendosi t’i përgjigjej në një mënyrë krejt të veçantë. Në vend të një droni, ai i dhuroi një spektakël me plot 300 dronë që ndriçuan qiellin, duke krijuar një performancë mbresëlënëse vizuale.

Në qiell u shfaq edhe një dedikim i veçantë: “Jo 1 dron, por 300 dronë për ty”, ndërsa dronët formuan edhe portretin e Soni Malajt. “Të gjithë jeni të shkëlqyshëm”, përshëndeti gjithashtu Flori me spekraklin e dronave fermerët.

Surpriza e emocionoi dukshëm këngëtaren, ndërsa fermerët e tjerë vunë re ndryshimin në gjendjen e saj emocionale. Sipas tyre, ky gjest solli një tjetër energji te Soni në ditët e fundit të qëndrimit në Ferma VIP.

Prania e gazetares së njohur Klodiana Lala në mesin e protestave të fundit që kanë tronditur opinionin publik ka sjellë një dritë të re mbi atë që po ndodh realisht në terren. E njohur për investigimet e saj të guximshme në fushën e kronikës së zezë, Lala ka zbritur vetë në vijën e parë të përplasjeve, duke sjellë dëshmi tronditëse dhe detaje që hedhin poshtë variantet zyrtare të autoriteteve.

Raportimi nga vija e zjarrit: Çfarë pa Klodiana Lala?
Gjatë ndjekjes live të situatës së tensionuar, ku banorët dhe aktivistët janë përplasur me forcat e rendit dhe kompanitë private të sigurisë, gazetarja ka vënë theksin te përdorimi i tepruar i forcës dhe te mungesa e transparencës. Lala bëri me dije se pas skenave të dhunës fshihen interesa shumë më të mëdha sesa thjesht një tubim i paligjshëm.

Sipas saj, presioni ndaj qytetarëve që ngrihen për të drejtat e tyre po bëhet gjithnjë e më i strukturuar. Ajo ka denoncuar faktin se shoqërimet masive dhe procedimet penale ndaj protestuesve shpesh përdoren si një mjet për t’u mbyllur gojën atyre, me qëllim që të mos bëhen pengesë për projekte të caktuara.

Mesazhi i fortë: “Krimet nuk fshihen dot nën uniformë”
Ajo që e bëri reagimin e gazetares të qarkullojë me shpejtësi në rrjetet sociale ishte deklarata e saj e drejtpërdrejtë lidhur me sjelljen e forcave të sigurisë. Lala u shpreh se asnjë tentativë për të manipuluar procesverbalet apo për të fajësuar qytetarët nuk do të mbetet pa u zbardhur.

“Kur policia apo privatët tejkalojnë kompetencat dhe ushtrojnë dhunë ndaj qytetarëve të pambrojtur, kjo nuk është më ruajtje e rendit, por është shkelje e ligjit. Çdo provë do të nxirret dhe çdo manipulim do të çmontohet,” ka thënë Lala nga terreni, duke i dhënë një mesazh të qartë si institucioneve, ashtu edhe grupeve të interesit që përpiqen të fshehin të vërtetën.

Ish ministrja e Jashtme dhe deputete aktuale e Partisë Socialiste, Elisa Spiropali bën thirrje publike për një marrëveshje të re për Shqipërinë dhe flet për ndryshim pushteti.

“Shqipëria ka hyrë në një moment ku nuk i duhet të provojë se dëshiron të ecë përpara. Këtë e ka dëshmuar. Ka nevojë të tregojë se di të ndërtojë një shtet që funksionon edhe kur pushteti ndryshon, edhe kur interesat përplasen, edhe kur askush nuk e vëren”, shkruan ajo.

Kjo është hera e parë që Spiropali flet për largimin e Ramës si kryeministër, qyshkur se ai e shkarkoi pak muaj më parë si ministre.

Por kjo është dhe dalja e tretë e saj kundër Ramës, çka e vë kryeministrin para sfidës nëse ai do ta tolerojë më Spiropalin. Pak javë më parë kur u pyet për deklaratat e deputetes së tij, Rama tha se dy herë rresht ajo “kishte dalë nga rreshti” dhe paralajmëroi se nëse kjo do të ndodhte për herë të tretë, e ardhmja politike e Spiropalit do të ishte në dorën e vendimeve të tij.

Një Marrëveshje e re për Shqipërinë

Nga Elisa Spiropali

Isha fëmijë kur nga pëshpërimat e familjarëve dhe ecejaket e farefisit mora vesh se në Sheshin Skënderbej diçka e pabesueshme, por e vërtetë kishte ndodhur.

Më vonë kuptova se diçkaja e jashtëzakonëshme që deri atë ditë nuk mund as të ëndërrohej, ishte një fakt kokëfortë, një realitet i prekshëm, një “herezi” që askujt nuk i lejohej ta shihte as në ëndërr: ishte një protestë spontane dhe e heshtur e qytetarëve të Tiranës kundër regjimit diktatorial të asaj kohe.

Protestat e zhurmshme dhe krijuese të këtyre ditëve, krahasuar me protestën e heshtur të atëhershme, nuk janë lapsus psikologjik, nuk janë déjà vu, nuk janë lajthitje cerebrale. Janë fakte sa të ndryshme dhe të ngjashme, që në kohën dhe rrethanat e tyre, kanë secila rëndësinë dhe efektet e veta, për të nxjerrë mësimet respektive, dhe, si të tilla, duhen shqyrtuar me seriozitetin dhe përgjegjësinë që meritojnë.

What’s done cannot be undone. Ç’u bë, nuk mund të ç’bëhet, thotë Lady Makbeth në skenën somnambul tek ecën në gjumë me qiri në dorë.

Është kollaj protestave të sotme t’u sillesh rrotull me llafe boshe, me konspiracione dhe hamëndje shterpe: Cilin krim kreu Lady Makbethi, pse i iku gjumi, pse ngrihej natën somnambul, pse mbante qiri në dorë?

Tani që të gjithë Makbethat vrasës dhe Hamletat dyshues kanë dalë sheshit dhe kanë hyrë në lojë, tani që vrasja është bërë, gjaku është derdhur, ndërgjegjet janë tronditur, gjumi është prishur, çfarë duhet bërë diçka tjetër? Jo diçka dosido. Diçka shekspiriane. Diçka e qëndrueshme. Diçka që po u bë, nuk zhbëhet.

Për fat, kjo pyetje ka përgjigje.

Çka duhet bërë sot është një marrëveshje e re për Shqipërinë.

Çdo epokë ka pyetjen e vet themelore. Për shumë vite pyetja e Shqipërisë ishte si të ndërtonte shtetin. Sot pyetja është tjetër. Si ta bëjë shtetin më të madh se pushteti dhe Institucionin më të fortë se ai që e ushtron pushtetin. Pikërisht këtu fillon nevoja për një marrëveshje të re për Shqipërinë.

Shqipëria ka hyrë tashmë në një fazë të historisë së saj ku sfida më e madhe nuk është më ndërtimi i pushtetit. Pushteti është ndërtuar. Institucionet ekzistojnë. Administrata ekziston. Ligjet ekzistojnë. Ekonomia është më e fortë se dikur. Demokracia është më e konsoliduar se në vitet e para të tranzicionit. Shqipëria e ka rritur reputacionin e saj në botë dhe duhet ta mbrojë me çdo kusht emrin e saj. Sfida e kohës sonë është diçka tjetër. Është aftësia e pushetit për të vendosur kufij brenda vetvetes.

Për më tepër se tridhjetë vjet Shqipëria ka jetuar me ankthin e mungesës. Mungonin institucionet. Mungonin rrugët. Mungonin investimet. Mungonte siguria. Mungonte shteti. Breza të tërë u rritën me bindjen se problemi kryesor i vendit ishte, në mos mungesa e shtetit, dobësia e shtetit.

Sot për herë të parë po përballemi me një pyetje tjetër. Çfarë ndodh kur pushteti bëhet më i fortë se mekanizmat e po atij shteti që duhet ta kontrollojnë. Çfarë ndodh kur problemet e administratës shtohen më shpejt se llogaridhënia. Çfarë ndodh kur stabiliteti fillon të ngatërrohet me shkaqe dhe pasoja pa lidhje, të pa adresuara.

Kjo është arsyeja pse Shqipëria ka nevojë për një marrëveshje të re me vetveten.

Një marrëveshje ku forca e shtetit të mos matet vetëm nga ajo që ndërton, por edhe nga pakësimi i aftësisë për të kontrolluar, ose ajo që me vetdijë pranon të mos kontrollojë. Një marrëveshje ku institucionet që mbikëqyrin pushtetin të jenë po aq, dhe më të afta se vetë pushteti.

Një marrëveshje ku parlamenti të mos jetë vetëm vendi ku miratohen vendime, por vendi ku dëgjohet shoqëria.

Një marrëveshje ku republika parlamentare të ushtrojë të gjitha funksionet e saj përfaqësuese, kontrolluese dhe monitoruese, sepse demokracia dobësohet sa herë që një pushtet rritet më shpejt se kontrolli mbi të.

Në zemër të kësaj marrëveshjeje qëndron një ide e thjeshtë. Askush nuk është mbi ligjin dhe askush nuk është nën ligjin. Të tre pushtetet duhet të qëndrojnë brenda kufijve të tyre kushtetues. Drejtësia duhet të ketë forcën të hetojë dhe gjykojë. Parlamenti duhet të ketë forcën të kontrollojë. Qeveria duhet të ketë forcën të qeverisë. Por asnjëri nuk duhet të marrë pushtetin e tjetrit. Sepse aty fillon deformimi i shtetit.

Një shoqëri demokratike nuk matet vetëm nga qeveria që ka. Matet edhe nga opozita që prodhon. Opozita nuk është aksident i sistemit. Nuk është pengesë për zhvillimin. Nuk është problem për stabilitetin. Opozita është shqisa që paralajmëron kur pushteti humbet kontaktin me realitetin. Shoqëritë që humbin opozitarizmin nuk humbin vetëm debatin. Humbin aftësinë për të korrigjuar vetveten.

Prandaj Shqipëria ka nevojë për më shumë garë, dhe jo për më pak. Ka nevojë për një sistem të ri zgjedhor që prodhon përfaqësim real dhe jo vetëm riprodhim të elitave ekzistuese. Ka nevojë për zgjedhje ku qytetari të ndjejë se vota e tij ndryshon ekuilibrat, dhe jo vetëm statistikat. Ka nevojë për një kulturë politike ku rotacioni nuk shihet si katastrofë dhe fitorja nuk shihet si pronësi.

Po aq e rëndësishme është liria e medias. Sepse nuk ka demokraci të fortë me media të pabesueshme. Nuk ka qytetar të lirë pa informacion të lirë. Nuk ka kontroll mbi pushtetin kur informacioni bëhet i varur nga pushteti ose dezinformimi. Shqipërisë i duhet një hapësirë publike ku gazetari të mos ketë nevojë për leje për të pyetur dhe ku media të mos ketë nevojë për favore për të mbijetuar.

Në të njëjtën mënyrë duhet të ndryshojë edhe marrëdhënia mes ekonomisë dhe politikës. Vitet e ardhshme nuk do të fitohen nga ai që ka më shumë asete. Do të fitohen nga ai që ka më shumë dije. Nga ai që ka më shumë teknologji. Nga ai që ka më shumë ide. Shqipëria nuk mund të mbetet një vend ku afërsia me pushtetin vlen më shumë se aftësia për të krijuar vlerë. Një ekonomi moderne fillon në momentin kur fiton ai që prodhon më mirë e më lirë, dhe jo ai që favorizohet nga pushteti.

Kjo lidhet drejtpërdrejt me brezin e ri. Shqipëria nuk ka më luksin të humbasë njerëzit e saj më të aftë. Gara, merita, mundësia, dhe jo kontrolli, janë thelbi i ndryshimit. Çdo i ri që largohet nuk merr me vete vetëm një vend pune. Merr me vete energji, dije, kreativitet dhe të ardhme. Vendi ka nevojë të krijojë kushte që mendja, puna dhe talenti të kenë më shumë vlerë se lidhja, ndërhyrja, inventarizimi apo privilegji.

Po aq vendimtare është cilësia e shërbimeve publike. Arsimi nuk mund të vazhdojë të trajtohet si sektor administrativ. Ai është fabrika ku prodhohet e ardhmja e vendit. Ai është thelbi i gjithçkaje që na rrethon, në të tashmen dhe në të ardhmen. Shëndetësia nuk mund të matet vetëm me shifrat e investimeve, godina, mjete etj. Ajo matet me sigurinë që ndien qytetari kur ka nevojë për të. Një shtet modern nuk ndërtohet vetëm me llaç e tulla. Ndërtohet me dije, shëndet, besim dhe dinjitet.

Pikërisht këtu fillon edhe beteja kundër korrupsionit. Jo vetëm në sallat e gjyqeve. Jo vetëm në dosjet hetimore. Por në kulturën e përditshme të shtetit. Korrupsioni është bindja e ngulitur se rregulli mund të anashkalohet pa pasoja. Se ligji mund të negociohet. Se pushteti mund të përdoret si privilegj. Se abuzimi mund të normalizohet dhe të glorifikohet. Lufta kundër tij është mbi të gjitha një betejë morale për mënyrën si e kuptojmë shtetin.

Shqipëria ka hyrë në një moment ku nuk i duhet të provojë se dëshiron të ecë përpara. Këtë e ka dëshmuar. Ka nevojë të tregojë se di të ndërtojë një shtet që funksionon edhe kur pushteti ndryshon, edhe kur interesat përplasen, edhe kur askush nuk e vëren.

Një vend nuk bëhet europian kur bind të tjerët për atë që europian është. Bëhet europian kur qytetarët e tij ndihen të mbrojtur nga e drejta, të respektuar nga shteti, të lirë për të ndërtuar jetën e tyre pa kërkuar leje nga askush.

Kjo është marrëveshja e re të cilën Shqipëria duhet ta realizojë brenda vetes.