Kolegji i Posaçëm i Apelimit ka shkarkuar përfundimisht nga detyra prokuroren e Tiranës, Eranda Laze.
Vendimi u morë nga trupi gjykues i Kolegjit të Posaçëm të Apelimit, i përbërë nga Ina Rama kryesuese, Sokol Çomo relator, Albana Shtylla, Mimoza Tasi, Natasha Mulaj anëtare.
“Në përfundim të gjykimit, trupi gjykues, bazuar në nenin 66, pika 1, shkronja “b” të ligjit nr. 84/2016, “Për rivlerësimin kalimtar të gjyqtarëve dhe prokurorëve në Republikën e Shqipërisë”, në mënyrë unanime, vendosi:
Ndryshimin e vendimit nr. 811, datë 08.11.2024 të Komisionit të Pavarur të Kualifikimit dhe shkarkimin nga detyra të subjektit të rivlerësimit, znj. Eranda Laze. Ky vendim është përfundimtar dhe ka efekt të menjëhershëm. U shpall sot, më datë 29.07.2025, në Tiranë”, thuhet në njoftim.
Për një ngastër toke dhuruar bashkëshortit, trupi gjykues i KPA vlerëson se Laze nuk shpjegoi bindshëm marrëdhënien e bashkëshortit me dhuruesit.
Të pamjaftueshme për masë janë gjetur dhe udhëtimet me persona të dyshuar si të përfshirë në veprimtari kriminale, megjithëse u konstatua se tregojnë për pakujdesi.
Laze nuk arriti të provojë ligjshmërinë e burimeve për dy apartamente banimi në Tiranë, të blera për vlerën 81,284 Euro dhe të një automjeti.
Eranda Laze është motra e deputetes socialiste Ermonela Felaj.
Drafti i Kodit të ri Penal ka ngjallur reagime të shumta kritikuese.
Sot atë e kundërshtoi me shumë argumente Prokurori i Përgjithshëm Olsi Çela, i cili theksoi se ajo që kemi më shumë problem janë praktikat e procedurës penale sesa me vetë Kodin penal.
Çela theksoi gjithashtu se fryma e draftit të kodit të ri penal ka një tendencë represive që rrit potencialin e kriminalizimit të individit në shoqëri, duke zgjeruar rrethin e veprimeve që kategorizohen si të rrezikshme.
Në draftin e Kodit të Ri Penal fjala ‘burg’ haset në shumë nene.
Dhe si shembull për këtë është dhe neni 424 për kontrollin teknik të mjeteve.
Në nenin e draftit të Kodit të Ri Penal thuhet se moskryerja e kontrollit teknik të mjeteve motorike apo në kundërshtim me ligjin do të konsiderohet kundërvajtje penale që dënohet me gjobë deri në dy vite burg./VoxNews
Gjatë shekujve, dhjetëra thesare me vlerë të paçmueshme janë zhdukur pa lënë gjurmë. Nga veprat e artit deri te objektet me rëndësi kombëtare, këto pasuri të humbura kanë ngjallur kuriozitetin e historianëve, koleksionistëve dhe aventurierëve.
Disa janë vjedhur, të tjera janë zhdukur gjatë luftërave ose janë thjesht zhdukur pa asnjë shpjegim.
Dhoma e Qelibarit
Dhoma e Qelibarit u ndërtua në Pallatin e Katerinës në shekullin e 18-të, pranë Shën Petersburgut, Rusi. Dhoma përmbante mozaikë, pasqyra dhe ar, së bashku me panele të ndërtuara nga rreth 450 kg qelibar. Gjatë pushtimit nazist në vitin 1941, panelet dhe veprat e artit të dhomës u çmontuan dhe u çuan në Gjermani. Ato nuk janë parë që atëherë.
Diamanti Fiorentin
Diamanti i verdhë fiorentin 137 karatësh ka të ngjarë të ketë ardhur nga India dhe të ketë mbërritur në Evropë në fund të shekullit të 15-të. Pas rënies së Perandorisë Austriake pas Luftës së Parë Botërore, guri u çua në mërgim me Perandorin Charles I të Austrisë. Guri u vodh pas vitit 1918 dhe ndoshta u pre në diamante më të vegjël.
Poezitë e humbura të Safos
Poetja greke Safo, e cila jetoi në shekullin e 7-të p.e.s., ishte shumë e vlerësuar nga grekët e lashtë. E konsideruar si një nga poetet më të mira të kohës së saj, për fat të keq, pak nga poezitë e saj kanë mbijetuar.
Piktura e humbur e Rafaelit
Gjatë fillimit të shekullit të 16-të, piktori italian Raphael pikturoi “Portretin e një të riu” mbresëlënës, i cili besohet gjerësisht se është një autoportret. Piktura ishte në pronësi të Muzeut Czartoryski në Krakovë të Polonisë, por gjatë Luftës së Dytë Botërore nazistët e vodhën atë. Shumë historianë e konsiderojnë atë si pikturën më të rëndësishme të humbur që nga Lufta e Dytë Botërore.
Trofeu Jules Rimet
Kupa Jules Rimet ishte trofeu origjinal i Kupës së Botës FIFA nga viti 1930 deri në vitin 1970. Në vitin 1970, Brazili e fitoi garën për herë të tretë dhe, sipas rregullave të FIFA-s, skuadra e parë që fitonte tre herë do të fitonte zotërimin e përhershëm të trofeut. Prandaj, ai u dërgua në Brazil. Në vitin 1983, u vodh në Rio de Zhaneiro dhe nuk është parë më që atëherë.
Thesari Rumun
Thesari Rumun është një koleksion objektesh me vlerë dhe rezervave të arit të qeverisë rumune, të dërguara në Rusi për ruajtje gjatë Luftës së Parë Botërore. Por këto u konfiskuan pas Revolucionit të Tetorit dhe vetëm disa nga objektet, dhe asnjë nga rezervat e arit, janë kthyer.
Honjo Masamune
Honjo Masamune ishte një shpatë samuraji, e krijuar nga mjeshtri i shpatave Goro Masamune midis viteve 1288 dhe 1328 të erës sonë. Shpata u transmetua gjatë shekujve, por humbi gjatë pushtimit amerikan të Japonisë në vitin 1945.
Presidenti i SHBA-së, Donald Trump, tha të martën se ai dhe Zonja e Parë Melania Trump janë prekur thellësisht nga imazhet e urisë dhe të urisë që vijnë nga Gaza.
“Ajo mendon se është e tmerrshme”, tha Trump për zonjën e parë. “Dhe ajo sheh të njëjtat fotografi që shihni ju, që shohim të gjithë ne. Dhe mendoj se të gjithë, përveç nëse janë shumë zemërftohtë – ose më keq se kaq, të çmendur – nuk ka asgjë që mund të thuash përveçse është e tmerrshme kur sheh fëmijët.”
“Dhe ata janë fëmijë, e dini, pavarësisht nëse flasin për urinë apo jo, ata janë fëmijë që vuajnë nga uria”, u tha ai gazetarëve në bordin e Air Force One ndërsa udhëtonte nga Skocia për në Uashington, DC.
Komentet e Trump vijnë vetëm një ditë pasi ai njoftoi planet që Shtetet e Bashkuara të krijojnë “qendra ushqimore” në Gaza dhe pasi kundërshtoi publikisht pretendimin e kryeministrit izraelit Benjamin Netanyahu se nuk ka uri në enklavë.
“Ata fëmijë duken shumë të uritur”, tha Trump të martën.
Reshjet e shiut që shoqëruan paraditen e kësaj të marte do të spostohen në drejtim të zonave malore, ku sipas Shërbimit Meteorologjik Ushtarak, reshjet do të vijojnë edhe gjatë së mërkurës.
“Masat ajrore të paqëndrueshme, që përfshinë vendin tonë gjatë orëve të para të mëngjesit të ditës së sotme, gradualisht do të spostohen duke u pozicionuar përgjatë relieveve malore ditën e sotme, ku do të pasohen nga reshje shiu deri në orët e vona të mbrëmjes.
Ditën e nesërme, vendi ynë do të jetë nën ndikimin e kushteve atmosferike relativisht të paqëndrueshme. Moti parashikohet të jetë me alternime kthjellimesh dhe vranësira, të cilat do të jenë kryesisht të përqendruara përgjatë Ultësirës Perëndimore dhe zonave malore, aty ku edhe do të pasohen nga reshje shiu me intensitet të ulët.
E njëjta situatë meteorologjike duket se do të mbetet edhe për ditën e fundit të muajit korrik, kur moti pritet të nisë i kthjellët, por zhvillimet e mesditës do të jenë prezente kryesisht përgjatë Ultësirës Perëndimore dhe zonave malore. Vranësirat aty do të pasohen nga reshje shiu, por me intensitet të ulët,” tregon sinoptikania Besa Sherollari.
Në fundjavë moti parashikohet të jetë i kthjellët dhe temperaturat do të pësojnë rritje deri në 37 gradë
Një dalje që nuk kaloi pa u vënë re, Monika Kryemadhi e ftuar në dyert e SPAK-ut, u shfaq sot sërish përballë kamerave.
Me buzëqeshje të lehtë në fytyrë e me një palë syze dielli që sipas syrit të mprehtë të popullit shqiptar, kapin çmimin 690 euro.
SPAK vijon hetimet për një sërë çështjesh që përfshijnë shpenzimet dhe pasurinë e saj dhe të bashkëshortit, Ilir Meta.
Qytetari shkruan:
“Pershendetje JOQ, Monika Kryemadhja del nga SPAK dhe me syze 690€ thot: “skemi bere harxhime te medha, na akuzojne pa te drejte”
Ndërkohë që hetimet vazhdojnë, opinioni publik mbetet në pritje jo vetëm për rezultatet e SPAK, por edhe për daljet e Kryemadhit që si duket, nuk kursen aksesorët luksozë.
Të paktën pesë kompani kanë kaluar fazën e parë të tenderit që lidhet me mbikëqyrjen e punimeve dhe të gjitha kontratave të furnizimit dhe instalimeve elektro-mekanike (E&M).
Në faqen e prokurimeve të BERZH u renditën edhe emrat e kompanive të cilat do të vijojnë tani me fazën e dytë.
Tenderi është pjesë e projektit rehabilitimi i linjës hekurudhore Vorë – Hani i Hotit dhe konkretisht për procedurën “Konsulencë për mbikëqyrjen e punimeve dhe të gjitha kontratave të furnizimit dhe instalimeve elektro-mekanike (E&M)”.
Aplikimet u dorëzuan në 10 qershor teksa njoftimi për emrat e kompanive u bënë në datë 28 korrik 2025.
Lista e kompanive që kanë kaluar fazën e parë të përzgjedhjes, ndër të cilat janë disa konsorciume ndërkombëtare si:
ALTINOK – DMEC – IPSA Joint Venture Turkey DB E&C – Typsa – Abkons Germany Hill International N.V. – TUMAS Turkısh Engıneerıng Consultıng & Contractıng Co. – PLANET S.A. – SYSTEMA Consulting S.A. Netherlands (the) JV SUEZ Consulting (SAFEGE) and Eptisa Servicios de Ingenieria S.L., France SYSTRA – ARDANUY Projekti Vorë-Hani i Hotit
Kosto totale e projektit është rreth 356 milionë euro, teksa do të jetë bashkëfinancim nga një sërë institucionesh financiare ndërkombëtare.
Kështu 98.7 milionë euro janë hua nga BERZH dhe 100 milionë euro të tjera nga Banka Europiane e Investimeve.
Kësaj i shtohen edhe 133 milionë euro grant investimi nga Bashkimi Europian por edhe fonde te buxhetit. Projekti synon rehabilitimin dhe ndërtimin e 120 kilometrave linjë hekurudhore.
Projekti është pjesë e zgjatimit të Rrjetit Kryesor të Transportit Trans-Europian TEN-T në Ballkanin Perëndimor, i cili do të lidhë Shqipërinë me rrjetet hekurudhore rajonale dhe europiane përmes Korridorit X pan-Europian.
Hekurudha Vorë-Hani Hotit kalon në shtatë bashki dhe përshkon Ultësirën Perëndimore të Shqipërisë, me drejtim nga Jugu në Veri. Hekurudha lidh qendrat urbane të Vorës, Mamurrasit, Laçit, Milotit, Lezhës, Shkodrës dhe Koplikut.
Ajo kalon kufirin shtetëror Shqipëri/Mal i Zi në Hanin e Hotit (km 140). Sipas ndarjes administrative, hekurudha përshkon territoret e shtatë bashkive (Vorë, Krujë, Kurbin, Lezhë, Vau Dejës, Shkodër dhe Malësi e Madhe)./Monitor
Arben Meçe- SPAK ka gati akuzat për çiftin Meta-Kryemadhi. Prokuroria ka mbyllur hetimet dhe është gati të depozitojë në Gjykatën e Posaçme dosjen që përfshiu tre hetime në një, aferën CEZ-DIA, skandalin e lobimit të LSI në SHBA dhe hetimin pasuror.
Kryemadhi është paraqitur në SPAK për të marrë dosjen, ndërsa merret zyrtarisht e pandehur edhe nëna e saj.
Avokati i Ilir Metës kërkoi shtyrjen e komunikimit të akuzës, me pretendimin se është me pushime.
Juristi Arben Meçe, i ftuar në një emision televiziv, foli mbi këtë zhvillim të fundit, ndërsa tha se në këtë dosje, Prokuroria e Posaçme ka ndjekur metodën “ndiq paratë” dhe në këtë kuadër zinxhiri i hetimit ka prekur familjarët dhe lidhjet e afërta të Ilir Metës.
Ai theksoi se Meta është kujdesuar që korrupsionin të mos e firmosë me dorën e vet, por skema që ka ngritur ka bërë që paratë dhe përfitimet t’i shkojnë atij.
Sipas Meçes, nëse metoda që po ndiqet në rastin “Meta” do rezultojë e suksesshme, atëherë kjo qasje do të kthehet siç tha ai në një “tmerr për të gjithë pushtetarët” në Shqipëri.
“Çështja është e lidhur me hetimin pasuror. SPAK po zbaton metodën “ndiq paratë”. Rasti i familjes Meta dallon shumë nga të gjithë njerëzit e korruptuar, sepse Meta është kujdesuar që asnjëherë të mos vendosë firma. Nuk ka impklime formale me firmë të Metës. Zarfet , lekët dhe valixhet i shkonin Metës. Ka përdorur skema korruptive pa shënuar asgjë në letër. SPAK ka filluar të zbulojë të gjithë mekanizmin se si këto njerëz kanë poseduar vlera të mëdha monetare. Pastrimi i parave është në themel. Do kemi gjëra interesante mbi një procedurë, e cila ka zbërthyer një mekanizëm, që ka funksionuar në Shqipëri dhe që do të bëjë një precedent dhe do jetë tmerri i të gjithë pushtetarëve. Nëse kjo do jetë e suksesshëm atëherë metodat do jetë shumë efektive për goditjen e krimit politik në Shqipëri.”, tha ai.
Për të marrë një leje ndërtimi në Bashkinë e Tiranës firmat duhet te paguanin shumën e parave nën petkun e sponsorizimve në kompanitë e bashkëshortes së kryebashkiakut, Ajola Xoxës.
Ka qenë dëshmia e të penduarës së drejtësisë financieres Adela Kondakçiu, e cila tregon për një nga episodet se se si firma Palushi SHPK ka transferuar ne kompanitë e Ajolës 50 mijë euro dhe më pas edhe shifra të tjera, në momentin që do të merrte lejen e ndërtimit.
Biznesmeni Meriman Palushi kishte planifikuar që të paguante 50 mijë euro për sponsorizimet e aktiviteteve të kryera nga rrjeti i organizatave jo-qeveritare të Ajola Xoxës, bashkëshortes së kryetarit të arrestuar të Bashkisë së Tiranës, Erion Veliaj.
Por, shuma fillestare e sponsorizimit të dyshuar për Ajolën mund të rritej në vlerën e 70-80 mijë eurove, pasi Bashkia e Tiranës, e drejtuar nga bashkëshorti i saj, Veliaj të miratonte një leje ndërtimi për kompaninë “Palushi” shpk.
Ky detaj i deklaruar pranë prokurorëve të SPAK-ut nga financierja Adela Kondakçiu forcon dyshimet e organit hetimor se sponsorizimet e kryera nga kompani të ndryshme në favor të organizatave të Ajola Xoxes ishin fiktive dhe se ato shërbenin si akte korruptive, në këmbim të firmës që lëshonte kryebashkiaku për lejet e ndërtimit në Tiranë.
Financierja Kondakçiu, e cila në Prill 2025 ka marrë statusin e bashkëpunëtores së drejtësisë, ka deklaruar para prokurorëve episode të ndryshme, mes të cilëve një bisedë me arkitekten private, Albana Koçollari.
E pyetur lidhur me pagesat e kryera nga “Palushi” shpk, Adela Kondakçiu deklaron se konfirmimin për pagesën 50 mijë euro sponsorizime e ka marrë nga shtetasja Koçollari. Kjo e fundit i kishte thënë financieres se shuma e sponsorizimit për kompanitë e lidhura me Ajola Xoxën mund të shkonin në vlerën e 70 mijë-80 mijë eurove dhe se kjo vlerë do të saktësohej pasi të dilte leja e ndërtimit për kompaninë “Palushi” shpk.
Deklaruesja Adela Kondakçiu deklaron se nuk ka dijeni se për çfarë leje ndërtimi bëhet fjalë.
Po ashtu, financierja thotë se, pasi ka informuar Ajola Xoxën se kompania private kishte paguar 50 mijë euro, bashkëshortja e Veliajt kishte shprehur shqetësimin se përse kjo vlerë ishte e ulët.
Adela Kondakçiu, sipas asaj që ka deklaruar para prokurorëve, ka qetësuar Ajolën, duke i thënë se, pas bisedës me arkitekten Koçollari, pjesa tjetër e pagesës nga “Palushi” shpk do të paguhej në një moment të dytë.
Të dhënat nga burime të hapura tregojnë se kompania “Palushi” shpk ka marrë të paktën dy leje ndërtimi në Tiranë, gjatë kohës që bashkia drejtohet nga Erion Veliaj./Syri Tv
