Author: admin

Si do të ndikojnë yjet tek ti këtë javë? Lexo parashikimin për dashurinë, punën dhe fatin për secilën shenjë nga data 14 deri më 20 korrik 2025 nga Artemis.

Disa pritet të përfitojnë nga mundësi të reja në punë, disa do përjetojnë zhvillime të rëndësishme në jetën personale, ndërsa disa duhet të shmangin keqkuptime dhe lodhje të panevojshme.

Ky horoskop jep udhëzime të qarta dhe praktike për të përballuar më mirë ditët në vijim.

Dashi (21 mars – 20 prill)

Kjo javë të shtyn drejt veprimit, por duhet të jesh i kujdesshëm me reagimet e tua. Midis datave 16 dhe 18 do ndihesh më i irrituar se zakonisht dhe mund të përfshihesh në debate. Mos harxho energji duke u munduar të kesh gjithmonë të drejtë – kjo mund të të izolojë. Në fundjavë situata përmirësohet, sidomos në marrëdhëniet personale. Trego më shumë mirëkuptim dhe dëgjo të tjerët.

Dashuria: Fundjava sjell më shumë harmoni.

Puna: Jo çdo konflikt ka vlerë – zgjidh betejat.

Fati: I ndryshueshëm, më i mirë në fundjavë.

—

Demi (21 prill – 20 maj)

Kjo javë është e mirë për ndjenjat, por vetëm nëse heq dorë nga nevoja për të pasur kontroll mbi gjithçka. Je i/e prirur të bëhesh kokëfortë, gjë që mund të dëmtojë marrëdhëniet me të afërmit. Nga data 15 korrik e tutje, Venusi të ndihmon në dashuri dhe krijimtari. Është një moment i mirë për të rishikuar një projekt të vjetër. Fundjava është e favorshme për pushim dhe për të qëndruar në ambiente të qeta.

Dashuria: Pozitive pas datës 15.

Puna: Rishikim i ideve të mëparshme.

Fati: I mirë nëse tregohesh i/e hapur.

—

Binjakët (21 maj – 21 qershor)

Ke shumë mendime dhe ide, por mund të shpërqendrohesh lehtësisht. Nëse nuk ndalon për të reflektuar, rrezikon të bësh gabime apo të krijosh keqkuptime me të tjerët. Datat 17 dhe 19 janë të përshtatshme për të zgjidhur një problem emocional apo komunikues. Fundjava është më pozitive dhe do ndihesh më i/e relaksuar.

Dashuria: Duhen sqarime dhe qartësi.

Puna: Fokusohu – mos u shpërndaj në shumë drejtime.

Fati: I luhatshëm, varet nga përqendrimi yt.

—

Gaforrja (22 qershor – 22 korrik)

Java nis e qetë, por rreth datave 17 dhe 18 mund të ndjesh presion emocional për shkak të ngjarjeve të së kaluarës. Mos lejo që këto mendime të të mbajnë pas. Duhet të lëshosh çka nuk të bën më mirë. Data 20 është shumë e favorshme për një hap të rëndësishëm në dashuri ose për të marrë një vendim personal.

Dashuria: Mundësi për hapje ose vendim të qartë.

Puna: Pa ndryshime të mëdha këtë javë.

Fati: I qëndrueshëm nëse ndjek logjikën dhe jo vetëm emocionet.

—

Luani (23 korrik – 22 gusht)

Ke mundësi të mira për të shkëlqyer këtë javë, sidomos në punë. Datat 16 dhe 19 janë pozitive për lajme apo zhvillime të reja. Por duhet të kujdesesh për sjelljen me të tjerët – bashkëpunimi është kyç. Në dashuri, shmang sjelljen egoiste. Fundjava është e favorshme për marrëdhënie të ngushta dhe pasion.

Dashuria: E mirë nëse je më i/e përulur.

Puna: Mundësi për sukses nëse nuk punon vetëm.

Fati: I lartë nëse respekton të tjerët.

—

Virgjëresha (23 gusht – 22 shtator)

Ke qenë nën presion dhe tani është koha për pak pushim dhe për aktivitete që të sjellin kënaqësi. Java është e mirë për të kaluar kohë me veten, për të bërë diçka kreative apo për të dalë nga rutina. Datat 15 dhe 18 janë të mira për njohje të reja ose për të bërë zgjedhje të reja në jetën personale. Mos kërko perfeksion në gjithçka.

Dashuria: Njohje apo takime interesante.

Puna: Jepi përparësi gjërave që të frymëzojnë.

Fati: I mirë nëse ndalon së analizuar çdo detaj.

—

Peshorja (23 shtator – 22 tetor)

Kjo javë sjell pak tension, sidomos në marrëdhëniet familjare apo në punë. Nga data 16 korrik e tutje, do ndihesh sikur je në mes të një konflikti ku duhet të zgjedhësh anë. Mos përpiqu gjithmonë të jesh neutral – është momenti të tregosh qëndrim. Intuita jote është e fortë dhe mund të të udhëheqë drejt vendimit të duhur. Nëse ndihesh i lodhur, lejoje veten të pushosh. Fundjava është e qetë dhe e përshtatshme për të kaluar kohë me dikë që të bën mirë.

Dashuria: Rregullim i klimës emocionale në fundjavë.

Puna: Duhen vendime konkrete, jo thjesht pajtime.

Fati: I ndjeshëm ndaj lodhjes – pushimi është i rëndësishëm.

—

Akrepi (23 tetor – 22 nëntor)

Kjo është një javë ku do ndjesh shumë intensitet brenda vetes. Ke nevojë të heqësh qafe marrëdhënie ose situata që nuk të bëjnë mirë. Datat 17 dhe 20 janë të favorshme për të bërë pastrim emocional ose për të marrë një vendim të madh. Kujdes me sjelljen posesive apo manipulimin – nëse i bie kësaj rruge, rrezikon të humbasësh njerëz të rëndësishëm. Hapja dhe sinqeriteti do të sjellin rezultate shumë më të mira sesa kontrolli.

Dashuria: Kërko sinqeritet, jo dominim.

Puna: Mundësi për rinisje të një projekti që të motivon.

Fati: I mirë nëse reflekton dhe pastron terrenin.

—

Shigjetari (23 nëntor – 21 dhjetor)

Je në kërkim të përvojave të reja dhe java do të të sjellë mundësi të tilla, sidomos pas datës 15. Mund të hapen dyer për udhëtime, projekte, apo për të njohur njerëz të rinj. Mos u nxit për të marrë vendime të menjëhershme – vepro, por me mend në kokë. Data 18 është shumë e përshtatshme për të bërë qartësi në marrëdhënie, sidomos në dashuri. Nëse ke një e vërtetë për të thënë, thuaje tani.

Dashuria: Mundësi për pajtime apo ndarje të qarta.

Puna: Hapje drejt iniciativave të reja.

Fati: I favorshëm nëse je i hapur, por i matur.

—

Bricjapi (22 dhjetor – 20 janar)

Ke qenë shumë i përqendruar në punë dhe përgjegjësi, por trupi dhe mendja po të kërkojnë pushim. Kjo javë nuk të favorizon nëse e tepron me kokëfortësinë apo me tendencën për të mos kërkuar ndihmë. Datat 16 deri 19 mund të sjellin disa sinjale që të tregojnë se ke nevojë të ndalosh pak. Nëse ul mbrojtjen dhe lejon pak më shumë ndjeshmëri, fundjava do të të sjellë kënaqësi në marrëdhënie personale.

Dashuria: Përmirësohet nëse lëshon kontrollin.

Puna: Tregohu fleksibël për të shmangur përplasje.

Fati: Më i mirë në fundjavë nëse relaksohesh.

—

Ujori (21 janar – 19 shkurt)

Kjo javë është e favorshme për ndryshime, ide të reja dhe komunikim të drejtpërdrejtë. Nga data 15 deri më 18, do ndihesh më i frymëzuar për të folur hapur – dhe duhet ta bësh, edhe nëse ndonjë e vërtetë është e pakëndshme. Kujdes vetëm me mënyrën e të shprehurit, që të mos krijosh keqkuptime. Fundjava është shumë e mirë për të eksperimentuar, për të krijuar, apo për të kaluar kohë me dikë që ndan interesat e tua.

Dashuria: Hapje ndaj njohjeve të reja ose bisedë e rëndësishme.

Puna: Mundësi për të çuar një ide përpara.

Fati: I mirë nëse nuk e mbys frymëzimin me dyshime.

—

Peshqit (20 shkurt – 20 mars)

Këtë javë do të ndihesh pak i shpërndarë emocionalisht. Është koha të kthehesh me këmbë në tokë dhe të marrësh vendime të qarta. Më 16 korrik është një moment i mirë për të shprehur ndjenjat apo për të bërë një gjest romantik. Më 18 korrik të këshillohet të shmangësh zhurmat dhe të qëndrosh në qetësi për të reflektuar. Vendos kufij në marrëdhëniet që nuk të respektojnë dhe mëso të thuash “jo” kur duhet.

Dashuria: E ndjeshme, por kërkon vendime.

Puna: Nuk është prioritet këtë javë – përqendrohu te vetja.

Fati: Më i mirë kur e ruan qetësinë dhe distancën nga ata që të lodhin. /noa.al

Kur Egli mbrëmë puthi bluzën me fytyrën e Gjestit në koncert, shumë e panë si një moment romantik. Por për opinionistin Anaid Kaloti, kjo ishte një skenë e sajuar dhe një përpjekje e fundit për të rikthyer famën e humbur.

Përmes një postimi të gjatë dhe simbolik me titullin “Kur ra fama”, Kaloti rrëfen një episod që, sipas tij, ndodhi menjëherë pas përfundimit të Big Brother VIP Kosova, ku ai u takua me Eglin dhe Gjestin në një hotel luksoz. “Plaku” në fabul, që i referohet vetes, i kishte dhënë një këshillë çiftit:

“Duhet ta ruani këtë gjë para publikut… që ju besuan dhe ju deshën bashkë!”

Ai tregon se Egli ka qenë e gatshme të vazhdonte lidhjen: “Egli ishte dakort”, – shkruan Anaidi, ndërsa për Gjestin thotë:
“Kingi ishte i lidhur me dikë tjetër dhe nuk donte që ‘goca ti hynte thellit’, duke vazhduar lojën sikur kishte më shumë hallin e kësaj se të asaj tjetrës.”

Për më tepër, ai zbërthen mënyrën se si Gjestit, sipas tij, nuk i interesonte më aspak Egli: “Ai nuk e donte atë dhe e shihte si një leckë këpucësh të përdorur disa herë… sa vjen moment që ke nevojë ta kapësh për të fshirë këpucët sërish, se të bëhen gishtat pis.”

Ironia e tij vazhdon edhe më tej, duke nënvizuar përpjekjet e kota për të rikthyer vëmendjen:

“CA TË BËJMË, CA TË BËJMË!!! Provojmë njëherë bëjmë si zemërmirë, takohemi te sëmurët nëpër koncerte, bëjmë si njerëz të drejtë të Zotit! Nuk ecë!”

Pika kulmore e reagimit është kur Anaidi përshkruan momentin e skenës së fundit, që u bë virale:
“Moren të dy nga një bluzë me fytyrat e njëri-tjetrit, e puthën bluzën në skenë para publikut, për të gënjyer kësaj here jo vetëm publikun por edhe veten… QESHARAKE! Asnje nuk reagoi, askush nuk i besoi, as ata vetë që puthën rreckën që dje fshinë këmbët!”

Dhe përmbyllja e tij është një metaforë për ata që e shijojnë famën përkohësisht: “Sa më lart të ngjitesh, aq më të vështirë do e kesh të ngrihesh kur të biesh poshtë.”

Një reagim i drejtëpërdrejtë dhe i mbushur me thumbime, që hedh dritë mbi një raport të brishtë, një dashuri të pambaruar dhe një famë që, sipas Anaidit, po përpiqet të mbahet me fije pambuku.

Mes paralajmërimeve për një konflikt të mundshëm të madh me Rusinë, Gjermania do të presë një nga stërvitjet ushtarake më të rëndësishme të NATO-s në vitet e fundit, në fund të shtatorit.

Hamburgu do të presë “Red Storm Bravo” nga 25 deri më 27 shtator, një stërvitje tre-ditore, ditë e natë, që simulon reagimin e shpejtë të Aleancës ndaj një sulmi të mundshëm rus në krahun lindor të NATO-s.

Disa vlerësime thonë se deri në 800,000 njerëz do të marrin pjesë në stërvitje. Ushtarët do të praktikojnë lëvizjen e trupave nëpër qytet, duke ofruar ndihmë mjekësore dhe duke evakuuar të plagosurit në kushte reale. Rrugët e Hamburgut do të mbushen me konvoje ushtarake, automjete transporti, spitale të lëvizshme dhe helikopterë, ndërsa qyteti do të luajë një rol kyç si një qendër logjistike në rast të një konflikti.

“Kërcënimi është real. Ne tashmë po shohim sulme ndaj infrastrukturës sonë”, paralajmëron Kapiteni i Bundeswehr-it Kurt Leonards, duke përmendur raste të sabotimit industrial, spiunazhit dhe vrasjeve të planifikuara.

I vendosur në Gjermaninë veriore, Hamburgu ka një nga portet më të mëdha në Evropë, një infrastrukturë të zhvilluar transporti dhe qasje të drejtpërdrejtë në rrugët baltike. Në rast lufte, ai do të bëhej porta kryesore për furnizimet dhe vendosjen e forcave aleate në Poloni dhe shtetet Baltike. Afërsia e tij me Skandinavinë dhe Evropën Lindore e bën atë një pikë kyçe për reagimin e shpejtë ushtarak të NATO-s.

Një raport i ri i Bundeswehr-it thotë konkretisht se Rusia nën Vladimir Putinin po përgatitet për luftë kundër NATO-s. Presidenti lituanez Gitanas Nausëda paralajmëron se një sulm i ri rus mund të ndodhë brenda 4-5 vitesh, ndërsa komuniteti i inteligjencës lituaneze vlerëson se Rusia përfaqëson një kërcënim afatgjatë për sigurinë e të gjithë Aleancës së Atlantikut të Veriut.

Në të njëjtën kohë, jeta e përditshme në Gjermani po ndryshon. Industria ushtarake po shënon të ardhura rekord, me Rheinmetall që pritet të gjenerojë një xhiro prej 10 miliardë eurosh në vitin 2024. Gjithnjë e më shumë studime shkencore po shqyrtojnë skenarë për shpërthimin e Luftës së Tretë Botërore, ndërsa qytetarët po përjetojnë një ndjenjë gjithnjë e më të theksuar pasigurie dhe frike, raporton Spiegel.

Thirrjet në linjën e ndihmës psikologjike të Gjermanisë arritën në 1.3 milion vitin e kaluar, shumë prej të cilave përmendën luftën dhe paqëndrueshmërinë globale si burim ankthi. Disa po përgatiten për më të keqen, të tjerë po ikin nga vendi dhe të tjerë po u kërkojnë politikanëve të sigurojnë paqen ndërsa ka ende kohë.

Hamburgu do të bëhet skena e ushtrimeve ushtarake në vjeshtë, por edhe një simbol i një realiteti të ri në të cilin Gjermania duket gjithnjë e më shumë si një vend që beson se lufta është një e kaluar e largët. Kolonat ushtarake, paralajmërimet për kërcënime dhe frika midis qytetarëve thonë një gjë: koha e sigurisë që merrej si e mirëqenë po kalon ngadalë në histori./A2

Nga e hëna e datës 21 korrik, kompania OSHEE grup do të nis zbatimin e skemës për pagesën me këste të detyrimeve të papaguara ndër vite.

Thuajse çdo vit kompania ofron akt-marrëveshje me abonentët, të cilët ndahen në tre kategori, familjet në nevojë dhe pensionistët, familjet dhe bizneset.

Enea Karakaçi, administrator i përgjithshëm i “OSHEE Grup”, gjatë një interviste për një emision televiziv dha disa detaje mbi këtë skemë.

“Skema e re vlen për çdo abonent që ka një debi të akumuluar ndër vite. Ne i japim mundësi që sipas kushteve financiare të paguajë detyrimet me këste deri në 20 vite, duke ulur deri në 70% kamatëvonesat. Kushti për të arritur këtë skemë është që abonenti të mos ketë detyrime të reja të vitit 2024-2025”, sqaroi Karakaçi.

Thuajse çdo vit kompania ofron skema lehtësuese për abonentët. Por a kanë ato rezultat?

“Vitin që shkoi ne arritëm të lidhnim 7 mijë aktmarrëveshje me klientë familjarë dhe biznese. Ka një reagim pozitiv të qytetarëve dhe për herë të parë detyrimet e papaguara në vitin që lamë pas u ulën. Ne u bëjmë thirrje qytetarëve që nga ky muaj të përfitojnë nga skemat e pagesave me këste”, tha Karakaçi.

Famullitari Dom Vlash Palaj, në meshën e mbajtur ditën e sotme në Shkodër, ka dhënë një mesazh të fortë lidhur me situatën e krijuar në Theth ditët e fundit.

Ai është shprehur kundër aksioneve të qeverisë për prishjen e ndërtimeve pa leje, ku thekson se e gjithë çështja mund të zgjidhet me dialog mes të dy palëve.

“Për shkak se populli jonë vazhdon fatkeqësisht me kenë i mbushun prapë me armiqësi, me urrejtje, me nji varfni të theksume shpirtnore, atëherë nuk merr parasysh se atij tjetrit je duke ia shkatërru jetën, edhe pse ai tjetri ndoshta ka jetu e ka vepru në mënyrë të gabume.”, thote Dom Vlash Palaj.

Gjithashtu ai shprehet se marrëdhëniet mes njerëzve nuk zgjidhen me ndëshkime e dënime, ndërsa bën thirrje për një rrugëzgjidhje që të jetë në të mirën e të gjithëve.

Më tej ai thotë se kjo situatë të sjell kujtimë nga e shkuara kur njerëzit vritenin për uje e tokë, ndërsa sot po vriten për disa kabina dërrasash.

Në fund të fjalës së tij, Dom Vlash Palaj këshillon emigrantët që gjatë pushimeve të tyre në Shqipëri të shmangin Thethin, sepse sipas tij “aty humbni qetësinë mendore dhe shpirtnore, e si pasojë, edhe fizikisht nuk keni me gjet paqe.”

FJALA E FAMULLITARIT:

“Një konflikt i madh atje në Theth, më vjen shumë keq për ato njerëzit e shkretë sepse i joshën, i rrejtën, i blenë, i shfrytëzuan, i vjelën për nga ana monetare, dhe në fund i hodhën, i tradhtuan, i dogjën, i shkatërruan, do t’i gjobisin e do t’i burgosin. Faik Konica thotë nji fjalë, e cila, duhet të na bajnë të reflektojmë. E keqja ma e madhe e Shqipnisë janë shqiptarët. Por, cilët shqiptarë? Ato, të cilët s’i kanë mësu ende fjalët e jetës. Krishti thotë: Në qoftë se don me zgjidh problemin me vëllaun tand, me të afërmin tand, jena pjesë e nji kombi. Shqipnia është një fshat i vogël me e krahasu me vendet e tjera.

Merre përpara vëllaun tand, ulu me të, mos e kushtëzo dialogun tand në kohë. Kërko ta bindësh se cila është e mira dhe e vërteta. Por, mundet me të ndodh që s’ndigjon. Atëherë, të lutem, mos e dëno, mos e gjyko as mos e paragjyko, sepse nuk je ti Zoti i jetës së tij. Thirri edhe 2-3 dëshmitarë, edhe në praninë e tyre, thuaji edhe njiherë. E në qoftë se edhe ato nuk i ndigjon, e prapë nuk ndigjon, prapë mos u dorëzo. Ftoje krejt bashkësinë. Uluni të gjithë së bashku. Diskutoni sesi mund të zgjidhet problemi i këtij personi. Mund të ndodhin që as ato nuk i ndigjon. Atëherë, kur ke ba edhe tentativën e tretë, dhe i ke vu në dijeni të gjithë, atëherë kur nuk merr vesh, leçite – veçoje, thotë. Sepse nuk e don të mirën. Kurse, në atë realitet të atij fshati malor, ça vërejmë? A thua se jena armiq të njeni-tjetrit. Më besoni, të krishtenë të dashtun, dhe ju ftoj që të mendoni seriozisht në lidhje me këtë gja.

Për shkak se populli jonë vazhdon fatkeqësisht me kenë i mbushun prapë me armiqësi, me urrejtje, me nji varfni të theksume shpirtnore, atëherë nuk merr parasysh se atij tjetrit je duke ia shkatërru jetën, edhe pse ai tjetri ndoshta ka jetu e ka vepru në mënyrë të gabume. Por, kurrë ti mos merr pretendimin se je Zoti i tjetrit. Kërkoni të bindni njeni-tjetrin e të gjeni nji rrugëzgjidhje, e cila, është në të mirën e të gjithëve. Nuk është ligji mbi çdo gja.

Ligji është mbi çdo gja, atëherë kur ne kena shkel mbi njerëzinë tonë dhe kena shkel atë prani Hyjnore, e cila, e ka stolis jetën njerëzore për me gjet rrugëzgjidhje ma paqësore dhe ma dialoguese mes vëlleznish. Duhet me dit gjithmonë me u marr vesh, sepse nuk zgjidhet raporti i vëllaznisë me gjykime e me dënime. Por, ato të cilët, janë skllevër të jetës, skllevër të sjelljeve të saj, ato s’marrin parasysh se tjetrit i shkatërrohet jeta. Dashtë Zoti që të piqen edhe ato kushtet kulturore, historike, njerëzore e të lartësohemi disi në ndërgjegjen tonë. Përndryshe, s’kena me pas kurrë paqe.

Ashtu siç shumë njerëz kanë humbur jetët e tyre, kena shumë, shumë kujtesë të keqe nga e shkumja, sepse janë vra për nji copë tokë, për nji vijë ujit, e sot tuj u vra për disa kabina dërrasash, të cilat, përbajnë e shprehin nji sakrificë të nji popullit, që historikisht ka vuajt e don me mujt me jetu e me pa vetvedin se është disi i sigurt në atë dinjitetin e jetës së tij. Por ja që, ka prapë shumë ligësi dhe nuk din me u marr vesh për të mirën.

Zoti ia shndrittë mendjen çdokujt e çdokush dittë me u naltësu në atë dinjitetin e të kenunit njerëz të shprehjes së njerëzisë, sepse jena të gjithë bij të të njëjtit Atë, që i bjen me kenë vëllezën e motra mes nesh. Pa harru se duhet me i dhanë mirëseardhjen emigrantëve, uroj që të kaloni ditë të paqta, plot me bekime shpirtnore, qetësi e liri mendore, por edhe me pushim fizik. Sepse pushimet duhet të jenë integrale, domethënë të gjitha aspektet e jetës njerëzore. Fatkeqësisht, ju këshilloj të mos shkoni në Theth, se aty humbni qetësinë mendore dhe shpirtnore, e si pasojë, edhe fizikisht nuk keni me gjet paqe. Nuk është faji juaj. Faji kuptohet është i atyre, të cilët, janë ma shumë të prirun me ba keq dhe me shkatërru, sesa me ndërtu. Kujdes, sepse ato të cilët janë më të padrejtit, bajnë çmos me kenë të dhunshëm për me imponu drejtësinë e tyre të tjerëve”

Çfarë po ndodh në Theth?

Në Theth ka nisur një perplasje mes autoriteteve policore dhe banorëve të zonës, për shkak të urdhërit të kryeministrit Rama për prishjen e ndërtimeve pa leje.

Banorët kanë kundërshtuar këtë urdhër, duke kërkuar dialog mes tyre dhe shtyrje të afatit deri në përfundim të sezonit turistik.

Por këto kërkesa të banorëve, duket se kanë rënë në vesh të shurdhët, pasi IKMT po vijon me shembjen e strukturave pa leje. Në këto kushte, banorët në shenjë proteste kanë paralajmëruar se do të mbyllin fare bujtinat.

Një grua shtatzënë, gati nëntë muajshe shtatzënë, ra nga kati i dytë i një ndërtese në Terni të Italisë.

Pavarësisht përpjekjeve të mjekëve, foshnja nuk ia doli të mbijetonte ndërsa gruaja ndodhet e shtruar në spital në gjendje të rëndë për jetën.

Hetuesit ngrenë dyshime se gruaja ka tentuar vetëvrasjen, ndërsa incidenti ndodhi të dielën në mëngjes.

Hetimet e policisë, zbuluan se ajo po trajtohej për një sërë problemesh shëndetësore, teksa gruaja jeton me bashkëshortin e saj dhe çifti nuk ka fëmijë të tjerë.

Një ngjarje e rëndë ka ndodhur mbrëmjen e së dielës në rrugën “Ferdinand Paparisto” në Tiranë.

Sipas policisë, një 81-vjeçar është gjetur i pajetë në banesën e tij.

“Më datë 13.07.2025, rreth orës 20:05, në rrugën “Ferdinand Paparisto”, shtetasi A. Gj. ka njoftuar Sallën Operative të DVP Tiranë se në banesë ka konstatuar pa shenja jete babain e tij, shtetasin R. Gj., rreth 81 vjeç, i cili dyshohet se është vetëvrarë me mjet prerës”, njofton policia.

Menjëherë pas njoftimit, në vendngjarje kanë mbërritur shërbimet e Policisë dhe grupi hetimor, të cilët po punojnë për të zbardhur plotësisht rrethanat dhe motivet e kësaj ngjarjeje tragjike.

Kreu i Partisë Mundësia, Agron Shehaj ka reaguar sot lidhur me prishjen e ndërtimeve pa leje në Theth.

Përmes një video-postimi në rrjetet sociale, Shehaj hedh dyshime se kryeministri Edi Rama ka një plan për Thethin.

Shehaj akuzon Ramën se planin prër Thethin do ta zbatojë për veten dhe për miqtë e vet.

“Thethi, i tëri, mund të vlejë 200, 500 apo edhe mbi 1 miliard euro. Por problemi i madh është se pronarët e tokave në Theth, banorët e zonës, janë në thelb pronarët e ligjshëm, por nuk kanë dokumentet. Edhe sikur t’i kishin, s’mund të ndërtojnë dot, sepse kanë nevojë për leje, dhe leja jepet vetëm nga Edi Rama.

Një pronë merr vlerë vetëm kur ka leje ndërtimi. Nëse Edi Rama nuk e jep lejen, atëherë pronarët nuk mund ta gëzojnë pronën e tyre.

E vërteta është që Edi Rama ka një plan për Thethin, ashtu siç kishte për jugun. Por problemi i vërtetë është se në atë plan nuk ka vend për pronarët e tokës në Theth.

Kjo është arsyeja pse sot ai po i shemb ndërtimet e tyre, po i zhvesh nga prona dhe po i përjashton nga çdo zhvillim. Sepse Rama ka një plan. Dhe atë plan do ta zbatojë për veten dhe për miqtë e vet, siç e bëri me “pikat e vogla” të bregdetit shqiptar, që sot nuk i gëzojnë më pronarët e tokës, por miqtë e ngushtë të Edi Ramës”,-shprehet Shehaj.

Pas shumë spekulimesh, ribashkimesh dhe heshtjeje publike, duket se historia mes Romeo Veshajt dhe Heidi Bacit ka marrë fund.

Dyshja, që prej kohësh janë kthyer në një ndër çiftet më të komentuara të showbiz-it shqiptar, janë bërë unfollow në Instagram, një sinjal i qartë se raporti i tyre nuk është më ai i mëparshmi.

Vetëm në maj të këtij viti, Heidi dhe Romeo u panë sërish në shoqërinë e njëri-tjetrit dhe u rindoqën me njëri-tjetrin në rrjete sociale, duke ngritur dyshimet për një rikthim romantik. Por mesa duket, gjithçka është mbyllur sërish, dhe këtë herë, ndoshta përfundimisht.

Në një intervistë të dhënë në qershor të këtij viti në emisionin “Goca & Gra”, Heidi u shpreh hapur për gjendjen e saj emocionale dhe sentimentale, duke lënë të kuptohet se është në një periudhë të paqartë të jetës së saj.

“Situata ime është shumë e komplikuar. Kur t’i vendos gjërat në vijë, do ju përditësoj. Kjo situata ime është e ndërlikuar, kështu që kam konfuzion. S’e di”, – tha Heidi gjatë intervistës.

Romeo dhe Heidi nisën lidhjen e tyre gjatë “Big Brother VIP Albania 3”, ku publiku i pa të afrohen gradualisht e më pas të bëhen një ndër çiftet më të dashura të edicionit. Marrëdhënia e tyre ka kaluar nëpër ulje-ngritje të vazhdueshme, por gjithmonë kanë qenë në qendër të vëmendjes.

Megjithëse deklaratat e Heidit muajin e kaluar lanë pak vend për shpresë, unfollow-i duket se tregon se këtë herë, romanca e tyre është mbyllur përfundimisht.

Galeria fotografike (

1 / 2

)

Mediat opozitare ruse dhe ato britanike i kanë bërë jehonë një skandali të ri seksual që ka përfshirë Kremlinin, pasi u zbulua se ministri i ri i Mbrojtjes, Andrej Belousov, i cili njihet edhe si njeri i afërt me Putinin ka përdorur avionë ushtarakë të llojit Iljushin-76 (me vlerë mbi 100 milionë dollarë), për të transportuar të dashurën e tij sekrete nëpër Rusi.

23-vjeçarja Maria Shalaeva nga Jekaterinburgu, ka postuar në rrjetet sociale video dhe foto ku tregon se është dërguar me avion ushtarak në një udhëtim fundjave në Rostov mbi Don, aty ku ndodhet edhe selia kryesore e Forcave të Armatosura ruse.

Në postimet e saj, tashmë të fshira, biondja simpatike shkruan se ka udhëtuar në një aeroport të mbyllur për civilët, dhe se i dashuri i saj “nga Kremlini” i kishte organizuar një trajtim për manikyr atje.

“Kush thotë se avionët nuk fluturojnë në Rostov? Fluturojnë, por jo për të gjithë. Gjithsesi, ja ku jam prapë në Rostov. Nuk mund ta lë”, ka shkruar ajo.

A scandal is brewing in Russia after 23-year-old blogger Maria Shalaeva posted a video of her and her son flying to Rostov on a military plane.

Note: Rostov-on-Don Airport has been closed since February 24, 2022 for an indefinite period.

On her Instagram page (Instagram is… pic.twitter.com/YOTiZUQ74J

— Natalka (@NatalkaKyiv) July 11, 2025

Ajo ka zbuluar gjithashtu se e ka marrë me vete në udhëtim edhe djalin e saj trevjeçar, Tim, duke ngritur dyshime se fëmija mund të jetë i biri i të dashurit të saj, Belousov. “Tre vjeç, dhe tashmë ka fluturuar me avion ushtarak!”, ka shkruar Marija.

Sakaq, në një nga videot e postuara, duket një burrë me flokë të thinjura me shpinë, duke ngritur dyshime se mund të jetë vetë 66-vjeçari Belousov, ministri i ri i Mbrojtjes i Rusisë dhe burokrat i afërt me Putinin. Edhe pse nuk ka prova përfundimtare, burime të pavarura si media bjelloruse Nexta kanë përmendur Belousovin si të përfshirë në këtë aferë seksuale.

Shalaeva, e cila ka një histori postimesh provokuese, në disa prej tyre ka lënë të kuptohet se partneri i saj është pikërisht Belousov. “Ai nuk është ushtarak! As FSB! E di kush është, por nuk guxoj të them”, ka shkruar ajo.

Skandali ka ngjallur zemërim në qarqet ushtarake dhe të sigurisë, sidomos për shkak të mundësisë së rrjedhjes së informacionit të ndjeshëm përmes postimeve të saj. Një nga fotografitë e postuara tregon detaje të avionëve që fluturojnë në Rostov dhe se kush ia ka organizuar fluturimin.

Një zyrtar ushtarak në pension, gjeneral-majori Vladimir Popov, është shprehur se “të gjithë do të gjenden dhe do të ndëshkohen.” Ai ka theksuar se përgjegjësia kryesore bie mbi ministrin e Mbrojtjes dhe se nuk do të tolerohen akte të tilla të papërgjegjshme.

Sakaq, blogeri pro-Kremlinit Andrej Medvedev shtoi se “Shërbimi kundërzbulues ushtarak ka punë me bollëk”.

“Mund të imagjinoj sa informacion marrin SBU dhe agjencitë perëndimore vetëm duke ndjekur rrjetet sociale”, shtoi ai.

Skandali shpërtheu në një moment të ndjeshëm për Kremlinin, pas vdekjes misterioze të ish-ministrit të Transportit, Roman Starovoit, i cili u shkarkua më 7 korrik dhe u gjet i vdekur vetëm disa orë më pas. Edhe pse zyrtarisht u raportua si vetëvrasje me armë zjarri, media të pavarura ruse si SOTA raportojnë se trupi i tij kishte shenja dhune dhe torturash.

Ky zhvillim e thellon më tej krizën e besimit në elitën qeverisëse ruse dhe ngre pyetje serioze për sigurinë kombëtare dhe moralin e udhëheqjes së lartë.

Galeria fotografike (

1 / 9

)