Category: Lajme

Një ngjarje e rëndë tronditi Shkodrën pak ditë më parë ku 34-vjeçari Kristian Kola u ekzekutua me breshëri plumbash për arsye që ende mbeten mister për policinë.

Ende pa një përgjigje është edhe babai i Kristianit, Marash Kola, i cili në një intervistë ekskluzive për gazetaren e Shqipëria Live, Semiljana Azizi, rrëfeu se si e mori vesh lajmin fatkeq të të birit.

Ai gjithashtu shtoi se e mendon edhe hakmarrjen nëse policia nuk e zgjidh vrasjen misterioze.

“E kam marrë vesh përmes mediave të huaja, doli pas pune me shokë, ka pirë një kafe. Atentatorët i qëlluan në pabesi. Nuk është rasti i parë në Shkodër që ndodh vrasje me pagesë, por burri të vret ndër sy. Këtu 99% është dora e policisë, e Shtetit që i jep këtyre atentatorëve mundësi me vra me pare.

Djali ka punuar në ndërtim. Nuk ka pasur mundësi të bëjë punë tjetër, se ishte 10 orë në ditë në ndërtim. Unë djalin e kam pas si shok, ka pasur një natyrë të veçantë, ishte i urtë i shoqërueshëm. Nuk është marrë me asnjë aktivitet tjetër.

Ne si familje nuk kemi pasur asnjë konflikt, as asgjë. Kristiani ka pasur vetëm 1 automjet në emër të tij, nuk ka qenë i martuar, por ka qenë me një vajzë, e cila ka ndejt sa ka dash në shtëpinë tonë, është ndarë pastaj me mirëkuptim. Natën që ndodhi atentati ka qenë me një shok që rri gjithmonë. E vranë, ndejti në tokë për 1 orë, po të kishte ardhur ambulanca më herët ndoshta mund edhe të jetonte.

Unë mendoj për hakmarrje, me më dal ai që më vrau djalin do ta vras, do marr personalisht hak. Do e marr dhe te ata policë që nuk, nuk kam friks nga askush. Edhe mua mund të më vrasin pas shpine, por frikë nuk kam askush. Duhet të hiqet policia e Shkodrës, me themele, të vendoset një polici tjetër,” tha Kola.

Deklarata e motrës

Mariza Kola, motra e 34-vjeçarit Kristian Kola, i cili u ekzekutua pak ditë më parë në qendër të Shkodrës, ka rrëfyer dhimbjen dhe pasigurinë që përjeton familja pas ngjarjes tragjike.

Ajo thotë se për lajmin e trishtë e kanë marrë në telefon dhe i thanë se vëllain ia kanë vrarë.

“Më mori shoqëria dhe më dha lajmin”, tha ajo mes lotësh dhe e veshur me vellon e zisë.

Ajo hodhi poshtë çdo pretendim se vëllai i saj është i përfshirë në ndonjë ngjarje, ndërsa tregoi edhe biseden e fundit me te.

“Një ditë përpara vrasjes kam folur me të. Kam prit me fol në darkë dhe s’munda. Ai nuk ka pasur asnjë problem, gjithmonë fliste me mua ose babain. Asnjë gjë nuk dimë, asnjë gjë nuk kanë thënë. Nuk është e lehtë të fusësh djalin në dhe,” u shpreh ajo me lot në sy.

Mariza Kola theksoi gjithashtu mungesën e transparencës dhe vonesat në reagimin e institucioneve pas ngjarjes, ndërsa theksoi se “nuk janë marrë në pyetje nga policia”.

“Babën nuk e kanë lënë me pa vëllanë kur është transportuar. Është vonuar një orë ambulanca për të shkuar. Tërë Shkodrën për ta marrë në këmbë e merr për një orë,” tha ajo në Euronews, duke ngritur dyshime për mënyrën se si është menaxhuar situata nga autoritetet.

Familja e Kristian Kolës kërkon drejtësi dhe përgjigje për rrethanat e vrasjes së 34-vjeçarit, ndërsa hetimet për zbardhjen e ngjarjes vijojnë.

“Nuk ka pasur asnjë konflikt, ka punuar me babain. Duam drejtesi, ia leme ne dore drejtesise”, tha mes lotesh e motra e Kristian Koles.

Si ndodhi ngjarja
Dy autorët, të cilët lëviznin me motor, derdhën në drejtim të të riut 8 plumba nga një armë gjysmë silenciator duke e lënë të vdekur në vend.

Nga rindërtimi i skenës së vrasjes kuptohet se qitësi ka qenë profesionist, duke mos gabuar shënjestrën dhe lëvizjet e tyre tregojnë për një studim të objektivit.

Edhe ditën e ngjarjes i riu ndoqi të njëjtin itinerar të çdo mbrëmje, duke pirë kafe në të njëjtin orar dhe të njëjtin lokal si gjithmonë.

Shpresa e grupit hetimor është varur te pamjet e kamerave të sigurisë në zonë. Nga vëzhgimi i tyre është zbuluar se autorët, të maskuar me skafandër, lëviznin me motor dhe pasi kryen vrasjen humbën gjurmët te stacioni i trenit në Shkodër.

Motivet që lidhen pas kësaj vrasjeje, ku duket se është investuar, janë ende të paqarta. Pista e parë ku policia orientoi hetimet ishte një konflikt që 34-vjeçari ka pasur rreth 1 vit e gjysmë më parë, ku ka kryer një plagosje, por pas verifikimeve kjo pistë u zbeh.

Edhe konfliktet e mundshme për biznes nuk janë një pistë e fortë. Hetuesit kanë kërkuar bashkëpunimin e familjarëve për të hedhur dritë mbi të shkuarën e 34-vjeçarit, ku mund të ketë buruar motivi i kësaj vrasjeje, por ata kanë zgjedhur të heshtin.

Moderatorja Ola Bruko ka komentuar videon që bëri xhiron e rrjeteve sociale, ku ish-CEO i kompanisë amerikane të teknologjisë Astronomer, Andy Byron, u pa i përqafuar me vartësen e tij Kristin Cabota gjatë një koncerti në Boston.

Në një postim në rrjetet sociale, Bruko shkroi: “Ky është shembulli tipik i asaj që gjithmonë kam thënë; Ka Zot, vonon por nuk harron! Kështu do përfundoni të gjithë ju që s’e keni për gjë të shkatërroni një familje apo një çift…”.

Reagimi i saj vjen pak kohë pas divorcit, ndërsa moderatorja është tashmë në një lidhje me këngëtarin Endri Stefi.

Një ngjarje e frikshme ka tronditur ish-finalisten e Big Brother Albania 4, Egli Tako, e cila përjetoi një situatë të rrezikshme gjatë një udhëtimi në Mal të Zi. Ajo humbi në male për disa orë, një përvojë që e la atë të frikësuar dhe e vetme në një ambient të panjohur.

Egli ka ndarë përjetimet e saj në rrjetet sociale, duke treguar se si u ndje kur u gjend e humbur në majat e thepisura të maleve. Ajo përshkruan momentet e panikut dhe frikës, duke e bërë këtë histori edhe më tërheqëse për ndjekësit e saj.

“Me sukses mbasi humba për rreth 3 orë komplet e vetme nëpër majat e thepisura të Maleve në Mal të Zi. Fati deshi ta gjej rrugën time pa pyetur askënd. Dhe jo, s’po e dramatizoj. Humba vërtetë,” shkruan ajo në një prej postimeve të saj, duke theksuar intensitetin e përvojës së saj.

“Këtë foton e shkrepa gjatë një aritmie disa sekondëshe për ta pasur kujtim njerëzit e dashur, në rast se nuk e gjeja më kurrë rrugën dhe çdo gjë mbaronte në ato male. S’dua të shoh më mal me sy për 5 vitet e ardhshme. I urrej malet nga sot.” – ka shkruar Egli.

Gjatë atyre momenteve të frikshme, Egli ndjeu se paniku po e kapte, duke menduar për mundësinë e mosdaljes më kurrë nga mali. Ajo e ndau një foto të vetes si kujtim, një veprim që tregon thellësinë e frikës që përjetoi.

Fatmirësisht, pas disa orësh të pasigurisë, Egli arriti të gjejë rrugën e duhur dhe të shpëtojë nga situata e rrezikshme. Kjo përvojë e ka lënë atë me një ndjenjë të thellë frike ndaj maleve, një ndjenjë që ajo e ndan me ndjekësit e saj.

“I urrej malet nga sot,” shkruan ajo, duke treguar se si një aventurë e tillë mund të kthehet në një traumë të thellë.

Kjo ngjarje na kujton se natyra, edhe pse e bukur, mund të jetë gjithashtu e rrezikshme dhe e paparashikueshme. Me këtë përvojë, Egli Tako na tregon se ndonjëherë aventurat më të mira mund të kthehen në situata të rrezikshme.

Një 33-vjeçar e ka pësuar keq në Tiranë, pasi sipas policisë, në momentin që ka tentuar të vjedhë me dhunë në një banesë në kryeqytet, është përballur me të zotin e shtëpisë, i cili ka arritur ta neutralizojë duke e goditur me grushte.

Në lidhje me këtë ngjarje, policia ka bërë arrestimin në flagrancë të shtetasit A.Z., 33 vjeç, ndërsa ka proceduar penalisht pronarin e banesës me arsyetimin se ka vepruar në kushtet e vetëgjyqësisë.

“U arrestua shtetasi A.Z., 33 vjeç, si dhe u referuan materialet në Prokurori, ku nisi procedimi në gjendje të lirë për shtetasin S.L., pasi dyshohet se 33-vjeçari ka tentuar të vjedhë me dhunë në banesën e shtetasit S.L., i cili, me vetëgjyqësi, e ka goditur me grushte”, thuhet në njoftimin e policisë.

Këto janë pamjet kur autori Ragip Gila 29 vjeç largohet me makinën tip BMW, që ia vodhi një qytetari nën kërcënimin e armës, pasi kishte kryer masakrën me 2 të vrarë dhe 2 të plagosur në Shkodër.

Në këtë video duket qartë makina tip BMW ngjyrë gri (në rreth të kuq), e cila drejtohet nga Ragip Gila, dhe qarkullon në mes të Shkodrës në tentativë për t’u arratisur pas krimit të rëndë.

29-vjeçari u largua me makinën BMW deri në lagjen Skënderbeg. Për shkak të ndjekjes nga policia, bëri aksident duke u përplasur me disa mjete.

BMW-në e braktisi dhe u largua në këmbë duke tentuar të kalonte lumin Kir. Por aty u kap nga forcat Shqiponja.

Ragip Gila vrau 2 persona dhe plagosi 2 të tjerë mëngjesin e kësaj të hëne (8 shtator) në një lokal pranë bashkisë së qytetit. Ai ishte i armatosur me dy armë dhe antiplumb.

29-vjeçari mbërriti para lokalit me një motor. Hyri brenda lokalit dhe hapi zjarr duke shkaktuar masakrën. Më pas doli nga dera e dytë e lokalit dhe eci në këmbë për disa metra, pasi motorin e kishte braktisur.

Nga kjo masakër me armë mbetën të vrarë Armando Pali dhe Liridon Kraja (Lushi). Ndërsa u plagosën Erogen Brajoviç alias Erogen Vaso, dhe kamerierja 25-vjeçare e lokalit ku ndodhi masakra.

Dinamika, viktimat dhe të plagosurit:

Armando Pali dhe Erogen Brajoviç ishin duke pirë kafe në një lokal pranë Bashkisë së Shkodrës, kur autori qëlloi me breshëri plumbash në drejtim të tyre. Burime nga grupi hetimor bëjnë se shënjestër e atentatit dyshohet se ka qenë Erogen Brajoviç.

Nga atentati mbeti i vrarë Armando Pali dhe Liridon Kraja (Lushi) 31 vjeç, truproja i Erogen Brajoviç. 31-vjeçari ndërroi jetë në spital. Truproja e Erogen Brajoviç, ndërroi jetë në spital pas plagëve të marra nga breshëria e plumbave.

Kurse të plagosur mbetën shënjestra e dyshuar, Erogen Brajoviç dhe kamarierja 25-vjeçare e lokalit, Meri Kaceri. Erogen Brajoviç, i cili mori tre plumba, ndodhet në spitalin e Traumës në Tiranë.

Skeda e autorit Ragip Gila:

Ragip Gila nuk është emër i panjohur për policinë. Ai ishte arrestuar në fund të dhjetorit 2023 me një arsenal armësh në Shkodër, si dhe ju gjet një sasi droge.

Ai u dënua nga Gjykata e Shkodrës me 5 vite burgim për prodhim dhe shitje narkotikësh, në aplikim të gjykimit të shkurtuar dënimi iu ul në 3.4 vite burg. Ai nuk është dënuar për armëmbajtjen pa leje dhe nuk dihet se çfarë ka ndodhur me këtë proces gjyqësor.

Report Tv ka siguruar edhe vendimin e lirimit nga qelia të Ragip Gilës, më 4 mars 2025. Gila qëndroi në qeli më shumë se 1 vit, deri në sa në 4 mars të këtij viti, Ragip Gila u lirua përfundimisht. Në zbatim të nenit 59 të Kodit të Procedurës Penale, Ragip Gila u lirua me kusht nga Gjykata e Shkodrës. Dënimi i tij u pezullua dhe për 5 vite do të ishte në shërbim prove, kohë gjatë së cilës nuk duhet të kryente vepër penale, të mos shoqërohej me persona me precedent penal dhe të mos posedonte armë. 6 muaj më pas, Ragip Gila shkaktoi një masakër në mes të Shkodrës./Lajm nga REPORT TV

Detaje të reja janë zbardhur nga atentati i ndodhur sot (8 shtator) në Shkodër, ku dy persona humbën jetën dhe dy të tjerë mbetën të plagosur. Ragip Gila, 30 vjeç, i arrestuar si autori i dyshuar i ngjarjes, ka dhënë deklaratën e tij të parë para hetuesve, duke pohuar se objektivi i tij ishte vetëm një person, Erogen Vaso.

“Objektivi im ishte vetëm Erogen Vaso pas një problemi personal me të,” ka deklaruar Gila në polici, duke sqaruar se nuk kishte synuar të qëllonte të tjerë persona në vendngjarje. Sipas dëshmisë së tij, Gila pretendon se kishte një konflikt të vazhdueshëm me Vason:

“Erogen Vaso ka ndenjur duke më kërcënuar dhe kisha probleme me të. Më ka bërë si i fortë dhe më ka çuar fjalë. E kam pasur personale vetëm me të dhe doja të qëlloja vetëm atë,” mësohet të ketë thënë ai gjatë marrjes në pyetje.

Ngjarja e rëndë çoi në vdekjen e Armando Palit dhe Liridon Krajës, ndërsa të plagosur mbetën Erogen Vaso, që dyshohet të ketë qenë objektivi i atentatit, dhe kamarierja Meri Kaceri, e cila ndodhej rastësisht në vendin e gabuar.

Gila u arrestua pas një ndjekjeje nga policia, gjatë së cilës u rrëzua nga një lartësi poshtë shinave të trenit në shtratin e lumit Kir, duke pësuar një dëmtim në këmbë. Në ato momente, ai është detyruar të dorëzohet, duke thënë:

“E kam hedhur armën, jam dorëzuar, më dhemb këmba shumë.”

Menjëherë pas arrestimit, ai u dërgua për trajtim mjekësor dhe më pas dha deklaratën e parë. Policia dyshon për porositës të mundshëm. Megjithatë, policia nuk e ka marrë të mirëqenë versionin e dhënë nga Gila.

Burime nga grupi hetimor bëjnë me dije se po verifikohet nëse 30-vjeçari ka vepruar i vetëm apo ka qenë pjesë e një skenari të organizuar nga persona të tjerë që mund ta kenë porositur vrasjen e 43-vjeçarit Erogen Vaso, aktualisht i shtruar në Spitalin Ushtarak në Tiranë.

Ish-prokurori Ervin Karanxha ka folur sot në një emision televiziv, në lidhje me Nuredin Dumanin dhe shtrimin e tij në spital.

Lidhur me teoritë se Dumani është tentuar të helmohet apo të vritet në burg nga kundërshtarët për të ndaluar dëshmitë e tij mbi ngjarjet kriminale, ish-prokurori tha se kjo nuk është e mundur.

Sipas Karanxhës, Dumani është gjatë gjithë kohës nën vëzhgim për shkak të statusit që ai mban, si “i penduar i drejtësisë”.

Nuredin Dumani në RREZIK për jetën? Gazetarja zbardh TË VËRTETËN, ja çfarë ndodhi në Urgjencë me të penduarin e drejtësisë

“Rreziku që Nuredin Dumani të helmohet apo t’i ndodhë diçka tjetër, është shumë i vogël. Kjo sepse ai është gjithë kohën nën vëzhgim për shkak se është i penduar. Siguria e tij është shumë e lartë. Megjithatë, gjendja e tij shëndetësore duhet monitoruar për të shmangur çdo përkeqësim. Dumani përfiton mbrojtje nga shteti deri në fund të jetës. Pra edhe në rast lirimi, ai do duhet të mbrohet dhe sigurohet nga shteti deri në fund të jetës.”-, tha ish-prokurori.

Sot, i ftuar në një , gazetari Bashkim Hoxha u ballafaqua me kureshtjen e qytetarëve për formimin e qeverisë së re.

Një qytetare telefonoi gjatë transmetimit live për të pyetur se çfarë pritet të ndodhë më 11 shtator, kur kryeministri Edi Rama do të shpallë kabinetin e tij të ri, Rama 4.

Pritshmëritë dhe spekulimet mbi emrat e ministrave kanë qenë të shumta, por Hoxha vendosi të japë një përgjigje të qartë, duke e vendosur realitetin mbi parashikimet.

“Kërkohet një parashikim për një vendim të paparashikueshëm. Sipas praktikave që ka kryeministri Rama, ai qeverinë e shpall si surprizë, madje edhe për vetë ministrat, të cilët e mësojnë aty në mbledhjen e Asamblesë. Siç e dëgjojmë edhe ne, siç e mëson edhe publiku. Por, nga ana tjetër, unë nuk e ndjek politikën në mënyrë të veçantë. Politikën e shoh vetëm në raportin që ka me qytetarët dhe me problematikat e jetës së tyre. Prandaj nuk mund të jem parashikues i mirë në këtë rast. Nuk mund të parashikohet asgjë për diçka të paparashikueshme. Rama një ditë para mund të thotë: ‘Dua qeveri me profesionistë.’ Një ditë tjetër thotë: ‘Jo, e dua me politikanë.’ Varet si e mendon dhe si informohet.” – u shpreh Hoxha.

Erogen Vaso alias Erogen Brajoviç, 43 vjeç, besohet se ishte shënjestra e atentatit të sotëm në Shkodër, ku mbeti i plagosur, ndërsa humbën jetë shoku i tij Armando Pali dhe truproja Liridon Kraja. E plagosur mbeti kamerierja 25-vjeçare Meri Kaceri. Autori i masakrës, 29-vjeçari Gagip Gila, dyshohet se është kontraktuar nga një prej grupeve kundërshtare të Bajrave.

Tre besohet se janë arsyet se pse kundështarët e Bajrave kanë piketuar pikërisht Erogen Vason alias Erogen Brajoviç me qëllim për t’a eliminuar.

Së pari, Erogen Bajri (Bajroviç/Vaso) konsiderohet si truri financiar i Bajrave. Erogen Bajri prezantohej si biznesmen dhe pretendonte për lidhje politike në qarqe të larta. Bajri njihet si pronar faktik i disa bizneseve me vlerë miliona euro në Shkodër, si hotel, bare dhe restorante, në emra të njerëzve të besuar. Ka dyshime se bizneset janë produkt i aktivitetit kriminal të grupit Bajri. Duke shënjestruar Erogenin, rivalët kanë dashur të godasin edhe nga ana ekonomike Bajrat.

Së dyti, Erogen Bajri është vëllai i Denis Bajrit, pjesë grupit, i cili sipas SPAK, në gusht të vitit 2020, vrau Gjin Ndojin allias Gjin Boriçin, në Vaun e Dejës, me urdhër të Behar Bajrit. Vrasja ishte porosi e Vis Martinaj, i cili në këmbim kishte marrë përsipër të vriste Kleant Musabelliun, pasi kishte plagosur Pëllumb Gjokën. Grupi rival mund t’a ketë shënjestruar Erogen Bajrin për t’u hakmarrë.

Së treti, duke u paraqitur si biznesmen dhe faktor me lidhje politike, Erogen Bajri shfaqej dhe ishte prezent në mjedise publike, ndonëse me truprojë. Si i tillë, Erogen Bajri mund të jetë konsideruar nga kundështarët e Bajrave si objekt i mundshëm për t’u goditur, pasi figurat kryesore të grupit ndodhen në burg. Por, edhe kur ishin jashtë, ata zbatonin një protokoll të rreptë sigurie, me makina të blinduara, mungesë ekspozimi etj.

Behar Bajri, lista e zezë me armiqtë

Se kush fshihet pas masakrës së sotme, kjo i takon drejtësisë. Por, në bisedat me shokët e tij në Sky Ecc, Behar Bajri kishte një listë me njerëzit që duhet t’i hiqte qafet, të cilët i konsideronte kundërsharë dhe të rrezikshëm.

Referuar dosjeve të SPAK-ut, në krye të listës që Behar Bajri planifikonte dhe shprehte dëshirën për t’i eliminuar qëndronin; Ibrahim Lici, i njohur si ‘Fantazma’ dhe Dorian Duli, i njohur si ‘dora e vdekjes’, i cili përshkruhej si një personazh tepër i rrezikshëm, që qëllonte fatalisht deri në 300 m. (Në tetor 2024, në maskrën e Dobraçit, u vra edhe Hamza Lici, vëllai i Ibrahim Licit).

Teksa për Braçen shfaqje herë pas herë njëfarë nënvlerësimi, Behar Bajri ishte fiksuar për të hequr sa më parë qafet Dor Dulin, një personazh me precedentë penalë, por siç duket shumë i rrezikshëm nëse dikush i afrohej.

Behar Bajri kishte shprehur dëshirën për të eliminuar edhe Genc Tafilin, të cilin e shihte si një person që rrinte me armiqtë e tij, përfshirë edhe Bardhok Pllanaj, i vrarë në prill 2021 në Shkodër. Vrasja e Pllanajt ka mbetur pa autor. Palët janë prishur për disa pika bastesh. Pikat e Tafilit administroheshin nga Dor Duli.

Lulzim Kulla, një personazh me precedentë penalë dhe objekt antentash, konsiderohet kundërshtar nga Pëllumb Gjoka, por edhe nga Behar Bajri. Lul Kulla është dhëndër i Licëve. Kulla ishte objekt i një atentati mafioz në janar 2018. Për atentatin ishte kontraktuar një grup nga Elbasani; Endri Çopja, Argel Lulaj dhe Serxho Teta, që besohet se ishin ushtarë. Ka dyshime se në atentat është implikuar edhe Boran Bërçana, i ekzekutuar më pas bashkë me bashkëshorten.

Nga përgjimet në dosjen Metamorfoza del që Lul Kulla, i cili i mbijetoi atentatit, konsiderohet si kundërshtar nga Pëllumb Gjoka dhe Bajrat. Në 9 korrik 2020, Behar Bajri informon Pëllumb Gjokën se Luk Kulla ka shok Gëzim Çelën në Patok, dhe se Çela ka lidhje me Bardhokun, duke iu referuar Bardhok Pllanajt, i vrarë më pas. Nga ana tjetër, Pëllumb Gjoka e informon Behar Bajrin të mos bënte lëvizje dhe të ruhej pasi kishte informacion se në Shkodër po lëvizte Lul Kulla.

Ndërkaq, duke urdhëruar vrasjen e shokut, Gjin Ndoj, Behar Bajri ka hapur një front të ri armiqësie edhe me familjen e të ndjerit.

Behar Bajru ka qenë i dyshuar për vrasjen e të fejuarës së tij, Fabjola Bajri, 16-vjeçe më 20 qershor 2002, me të njëjtën pistoletë që kishte vrarë shtetasin Arben Tuzi. Ngjarja u raportua si vetëvrasje atëkohë. E reja, pata se të humbiste jetën me dy plumba, i kishte telefonuar për ditë me radhë policisë që t’a shpëtonin, ndërsa familja e saj u kërcënua dhe u detyrua të largohej nga Shkodra.

Gjithashtu Behar është dyshuar edhe për vjedhje më 14 janar 1999 në Dobraç, si dhe dy vrasje në atë kohë në lagjen “Vojo Kushi”, ku u ekzekutuan vëlelzërit Osman e Artur Alibali, por që përsëri munguan provat.

Behar Bajri ka vrarë në Dobraç edhe Petrit Demirin, punonjës i Policisë Rrugore në Komisariatin e Policisë Shkodër, për të cilën u dënua me vetëm 2 vite burg. Bajri është akuzuar edhe për përdhunimin e dy vajzave të mitura në 2006, por sërish ia ka hedhur drejtësisë.

Albert Keraj, gjyqtari që liroi autorin e masakrës së sotme

Masakra e sotme në Shkodër mban vulën e drejrësisë së krimbur. Ragip Gila rezulton një emër i njohur për drejtësinë shqiptare pasi në muajin mars ai kishte lënë qelinë. Albert Keraj është gjyqtari që liroi Ragip Gilën më 4 mars 2025.

Gila nuk ka vuajtur as 1.5 vite të plota dënim për një vepër penale që parashikohej 5-15 vite. Në bazë të vendimit, Gila u deklarua fajtor dhe fillimisht u dënua me 5 vite burg, por duke u bazuar në nenin 406 të Kodit të Procedurës Penale, dënimi iu ul me një të tretën, duke u përcaktuar në 3 vite e 4 muaj burgim.

Megjithatë, në zbatim të nenit 59 të Kodit Penal, gjykata urdhëroi pezullimin e ekzekutimit të dënimit me burgim, duke e vendosur të pandehurin në një periudhë prove prej 5 vitesh. Gjatë kësaj kohe, sipas vendimit të marrë nga gjykatësi Keraj, i riu ishte i detyruar që të mos kryejë asnjë vepër penale dhe të mbante kontakte të rregullat me Degën e Shërbimit të Provës në Shkodër.

Gjykata gjithashtu urdhëroi që Gila të mos zotërojë dhe të mos përdorë armë zjarri pa leje për një periudhë prej 1 viti. Po ashtu, u vendos shuarja e masës së sigurisë së arrestit me burg, duke u urdhëruar lirimi i menjëhershëm i të pandehurit nga qelia, nëse nuk mbahet për ndonjë arsye tjetër.

Policia e Elbasanit ka finalizuar me sukses megaoperacionin “First Day”, duke goditur një rrjet të madh shpërndarjeje droge në qark.

Në kuadër të këtij operacioni janë arrestuar 30 persona dhe 14 të tjerë janë shpallur në kërkim. Operacioni u zhvillua në disa qytete të Elbasanit, pranë shkollave dhe lokaleve.

Gjatë kontrollit u sekuestruan armë zjarri, drogë, para dhe sende të tjera të paligjshme. Hetimet vijojnë për të zbardhur të gjithë rrjetin kriminal të përfshirë.

Në orët e mbrëmjes 7 nga të arrestuarit, emrat e të cilëve janë siguruar nga Euronews Albania, janë transferuar nën masa të rrepta sigurie drejt Tiranës.

“Strukturat për Hetimin e Krimeve të DVP Elbasan, në bashkëpunim të ngushtë me Prokurorinë, pas një hetimi të thelluar të ndjekur me metoda speciale prej disa muajsh, finalizuan megaoperacionin policor të koduar “First Day”, që kishte në fokus goditjen e personave të përfshirë në shitjen dhe shpërndarjen e lëndëve narkotike, e shtrirë në kohë dhe vënde të ndryshme, kryesisht pranë ambienteve të shkollave, lokaleve dhe më gjerë, në Elbasan, Librazhd, Gramsh, Cërrik, Peqin, Belsh dhe Perrenjas.

Në kuadër të këtij operacioni u ekzekutuan masat e sigurisë “Arrest në burg”, për veprën penale “Prodhimi dhe shitja e narkotikëve”, për shtetasit: A. B., 42 vjeç, E. S., 48 vjeç, Sh. B., 56 vjeç, A. (A.) B., 52 vjeç, F. Th., 34 vjeç, H. G., 64 vjeç, G. T., 37 vjeç, M. B., 45 vjeç, P. Q., 50 vjeç, S. B., 38 vjeç, D. E., 38 vjeç, M. Q., 38 vjeç, Sh. Sh., 46 vjeç, B. G., 64 vjeç, I. K., 38 vjeç, M. E., 36 vjeç, I. F., 45 vjeç të gjithë banues në Elbasan, K. H., 34 vjeç, A. K., 50 vjeç, banues në Peqin;, I. B., 41 vjeç, K. Ç., 24 vjeç, F. R., 24 vjeç, K. K., 30 vjeç, M. B., 24 vjeç, banues në Librazhd, P. T., 30 vjeç, banues në Prrenjas.

Nga hetimi u dokumentua aktiviteti kriminal i këtyre shtetasve, të përfshirë në veprimtari kriminale në fushën e shitjes dhe shpërndarjes së lëndëve narkotike, të cilët vepronin në mënyrë të organizuar në grupe të vogla ose individualisht, në të gjithë qarkun Elbasan.

Gjithashtu, u arrestuan në flagrancë shtetasit: J. A., 32 vjeç, për veprën penale “Prodhimi dhe shitja e narkotikëve”, A. T., 31 vjeç, për veprat penale “Prodhimi dhe shitja e narkotikëve”, “Mbajtja pa leje dhe prodhimi i armëve, armëve shpërthyese dhe municionit”, dhe “Ruajtja dhe depozitimi i mallrave kontrabandë”, V. D., 36 vjeç, për veprën penale “Prodhimi dhe mbajtja pa leje e armëve të gjuetisë”; N. D., 43 vjeç, për veprën penale “Prodhimi dhe shitja e narkotikëve” dhe L. Xh., 50 vjeç, për veprën penale “Prodhimi dhe shitja e narkotikëve” si dhe u referuan materialet në Prokurori ku nisi procedimi penal për shtetasin H. D., 57 vjeç.

Gjatë këtij operacioni janë sekuestruar sasi lënde narkotike kokainë dhe kanabis, armë zjarri pistoletë dhe kallashnikov, armë gjahu, sasi e konsiderueshme municioni luftarak, peshore elektronike, thika, përforcues grushti, steka duhani të dyshuara të kontrabanduara, laptop, tablet, DVR, targa automjetesh (shqiptare dhe belge), shuma parash në euro, paund, dollar, franga zvicerane dhe 24 celularë”, bëri me dije policia.

Emrat e 7 prej të arrestuarve

Eris Skilja

Klodian Hakballa

Mariglen Qosja

Bardhyl Grami

Mikel Dezhani

Shyqyri Bica

Arjan Bica