Lajme Flesh

Regjimi iranian i ka paralajmëruar njerëzit të ndalojnë përdorimin e WhatsApp, Telegram dhe aplikacioneve të tjera “të bazuara në vendndodhje”, duke thënë se është një nga “metodat kryesore të Izraelit për të identifikuar dhe synuar individët”, raportoi agjencia shtetërore e lajmeve e Iranit IRIB, duke cituar një raport sigurie sot.

“Pas vrasjeve të fundit të synuara”, nga Izraeli, “përfshirë vrasjen e shkencëtarëve, raportet tregojnë se regjimi (izraelit) përdor gjurmimin e telefonave celularë për të synuar njerëzit në Iran”, tha IRIB.

Raporti tha se përdorimi i këtyre aplikacioneve është “i rrezikshëm në këto rrethana”.

Raporti gjithashtu u urdhëroi njerëzve të fiknin telefonat e tyre celularë përpara se të ndryshonin vendndodhje. “Njerëzit duhet të përmbahen nga marrja e telefonave të tyre celularë në vende të ndjeshme”, shtoi IRIB.

Raporti i sigurisë gjithashtu këshilloi publikun, “veçanërisht punonjësit e organizatave të ndjeshme, të përdorin linja të sigurta telekomunikacioni dhe të shmangin përdorimin e softuerëve të pasigurt”, sipas IRIB.

Arrestimi i 3 punonjësve të policisë Elbasan të cilët nuk parandaluan arratisjen e një personi të arrestuar për shkelje të rregullave të qarkullimit rrugor nuk është rast i shkëputur.Shifrat e zbuluara nga Agjencia e Mbikëqyrjes Policore tregojnë se brenda forcës që duhet të ruajë rendin, po shtohen zërat që llogariten në dosje penale. Vetëm në pesë muajt e parë të këtij viti, janë referuar për ndjekje penale 131 punonjës policie, një rritje me 40% krahasuar me të njëjtën periudhë të një viti me parë. Ndërkohë, 56 punonjës policie kanë rënë në pranga kryesisht për shpërdorimi i detyrës, korrupsion dhe veprimet arbitrare.

Në raste të tjera operacione të SPAK që kanë ardhur nga zbërthimi I komunikimeve të enkriptuara kanë zbuluar përfshirje të punonjësve të policisë në krim duke bashkëpunuar me grupet kriminale. Në operacionin e fundit “ura” u identifikuan dhe u caktua masë sigurie për dy punonjës policie të përfshirë .

Më herët në mars të këtij viti në një tjetër operacion në bashkëpunim me spak u caktua masë sigurie për 4 efektive të dyshuar si përfshirë në grupe kriminale. Mes tyre shef krimesh në Himarë. I dyshuar për kultivim kanabisi, shefi i Komisariatit i Policisë Kufitare në Sarandë, I dyshuar për trafikimi të narkotikëve dhe shefi i Krimeve në Komisariatin e Lushnjës, I dyshuar për ushtrimi i ndikimit të paligjshëm ndaj personave që ushtrojnë funksione publike.

Postimi i të inkriminuarve nga radhët e policisë ishte përfshirë edhe në raportin konfidencial në lidhje me sundimin e ligjit në Shqipëri hartuar nga Komisionit Europian. Sipas këtij raporti AMP ka intensifikuar veprimtarinë e saj. vitin që kaloi u pranuan mbi 1,700 ankesa nga qytetarët dhe mbi 3,300 denoncime. Ndërsa 463 punonjës policie u çuan për ndjekje penale, kryesisht për “shpërdorim detyre” dhe “korrupsion pasiv”.

Katër bombardues strategjikë u vendosën në bazën ushtarake amerikano-britanike të Diego Garcia në Oqeanin Indian të hënën, sipas një analize të imazheve satelitore ndërsa përballja ushtarake midis Izraelit dhe Iranit hyri sot në ditën e saj të pestë.

Këto avionë B-52H Stratofortress, të aftë për të mbajtur armë bërthamore ose municione të tjera të drejtuara me precizion, u panë më 16 qershor në platformën jugore të kësaj baze strategjike në Arkipelagun Chagos.

Të aftë për të mbajtur rreth 32 ton armë, këta avionë me rreze të gjatë veprimi mbërritën në bazë rreth mesit të majit, sipas analizës së imazheve satelitore nga Planet Labs.

Baza e Diego Garcias, e cila u zgjerua pas Revolucionit Iranian të vitit 1979, luajti një rol të rëndësishëm për Shtetet e Bashkuara në luftërat që zhvilloi në Irak (1990-1991, 2003-2011) dhe në Afganistan në vitin 2001.

Agjencia France-Presse raportoi gjithashtu mbërritjen e një avioni transporti C-17 Globemaster III në bazë të hënën. Forcat Ajrore të SHBA-së thonë se ky model avioni mund të transportojë “shpejt” trupa, si dhe “të gjitha llojet e ngarkesave në bazat kryesore operative ose direkt në bazat e avancuara brenda zonave të vendosjes”.

Gjashtë avionë të tjerë të parë në pistë më 16 qershor me shumë gjasa ishin avionë ajrorë të furnizimit me karburant KC-135 Stratotanker, avionë të përdorur për të furnizuar me karburant avionë të tjerë në fluturim. Gjashtë avionë të ngjashëm shihen në fotot e 2 majit.

Edhe pse Donald Trump tha sot se dëshiron një “fund të vërtetë” të konfliktit midis Izraelit dhe Iranit, SHBA-të njoftuan gjithashtu dje, të hënën, se do të vendosin “burime shtesë” në rajonin që përfshin Lindjen e Mesme dhe do të forcojnë “mekanizmat e saj mbrojtës”.

Aeroplanmbajtësja amerikane Nimitz, e cila po kalonte tranzit në Detin e Kinës Jugore, u drejtua në perëndim drejt Lindjes së Mesme të hënën, sipas faqes së internetit Marine Traffic, e cila gjurmon pozicionet e anijeve në të gjithë botën në kohë reale.

Uashingtoni gjithashtu ridislokoi rreth 30 avionë amerikanë të furnizimit me karburant në bazat në Evropë.

Cilat janë bombarduesit amerikanë B-2: ata mbajnë “superbombën” e përdorur për të shkatërruar bunkerët në thellësi të mëdha

Pajisja u zhvillua në gjysmën e parë të viteve 2000 me qëllim përdorimin kundër vendeve armiqësore. Më pas u modifikua për të rritur fuqinë e saj shkatërruese me anë të inovacioneve.

Në ditët e fundit të marsit, gjashtë avionë amerikanë B-2 zbarkuan në Diego Garcia, një atol në Oqeanin Indian që ndahet me britanikët. Mbërritja u lidh menjëherë me mundësinë e veprimeve në Jemen, kundër Huthëve dhe ndoshta, në të ardhmen, kundër Iranit. Sepse “Spirit”, siç njihet në zhargon, ishte i vetmi avion që mund të mbante GBU 57, superbombën 14-tonëshe të projektuar për të shkatërruar bunkerë në thellësi të mëdha. Domethënë, një objektiv i ngjashëm me centralin bërthamor iranian të Fordow, të ndërtuar brenda një mali.

Pajisja u zhvillua në gjysmën e parë të viteve 2000 me qëllim përdorimin kundër vendeve armiqësore, nga Koreja e Veriut deri te Republika Islamike. Më pas u modifikua për të rritur fuqinë e saj shkatërruese me inovacione që nuk u zbuluan kurrë plotësisht për arsye sigurie. GBU duhet të depërtojë në “guaskën” mbrojtëse dhe më pas të shpërthejë në mënyrë që të amplifikojë efektet brenda objektivit. Duket se përditësimet e fundit kanë zgjeruar aftësitë e saj edhe nëse nuk kemi të dhëna të sakta mbi thellësinë dhe pozicionin e asaj që fshihet në bunker.

Një artikull i New York Times shkruan se ushtrime të shumta të kryera nga Pentagoni kanë konfirmuar se disa “kalime” të B-2 janë të nevojshme: një “lançim” i parë, i ndjekur me shpejtësi nga të tjerë. Si një çekiç që ngul një gozhdë. Edhe më shumë nëse duhet të shpojë mbrojtjet rreth centrifugave Fordow, të vendosura – sipas disa ekspertëve – 90-100 metra nën tokë.

Izraeli ka bombarduesit e vet të bunkerëve dhe ka demonstruar përdorimin e tyre shkatërrues në eliminimin e udhëheqësve kryesorë të Hezbollahut libanez. Edhe në atë rast, forcat ajrore përdorën taktikën e goditjes, me një numër të madh bombash (60-80), të hedhura njëra pas tjetrës në një sërë ndërtesash në zonën jugore të Bejrutit.

Është gjithashtu e mundshme që të ketë përdorur të njëjtën metodë për të prerë kokën e udhëheqësve ushtarakë iranianë në fazën e parë të ofensivës duke i vendosur ata në një qendër komande.

Por këto armë nuk janë të mjaftueshme për të sulmuar një pjesë të tuneleve ku Irani ka fshehur raketa ose objekte kërkimore shkencore. Prandaj, lind nevoja për të pasur mbështetjen e Shteteve të Bashkuara me GBU 57 për të provuar të godasë në mënyrë efektive Fordow.

Për objektivat e tjera, arsenali i saj është i mjaftueshëm: Burime të IAEA-s kanë zbuluar se sulmet ndaj Natanz, një pikë tjetër kyçe, do të kishin shkaktuar dëme serioze në centrifugat për pasurimin e uraniumit, duke përfshirë ato të vendosura në pjesën nëntokësore.

Teknikët përsërisin se “mali” Fordow është themelor në zhvillimin e programit, por, në të njëjtën kohë, ata përsërisin se çdo sulm vetëm sa mund t’i ngadalësojë përpjekjet e Teheranit.

Por le të fillojmë nga fillimi, nga B2-të. Avionët qëndruan në Diego Garcia për rreth një muaj dhe më pas u kthyen në Shtetet e Bashkuara të zëvendësuar nga B52-të, një tjetër mjet strategjik që megjithatë nuk mund ta mbajë superbombën.

Gjithashtu në pistë ishin luftëtarë F15, shoqërimi i nevojshëm për bombarduesit.

Nuk është e qartë se çfarë e përcaktoi kthimin e një avioni që nuk është vetëm një mjet i rëndësishëm, por edhe “sinjal” i mundshëm i aspekteve operacionale. Në fakt, sapo u fol për një pjesëmarrje të mundshme amerikane në “fushatën” në Iran, “Spirit” dhe bomba e tij u thirrën menjëherë.

Dita e sotme, 18 Qershor 2025, pritet të karakterizohet nga një përmirësim i ndjeshëm i kushteve të motit në pjesën më të madhe të territorit shqiptar.

Pas disa ditësh me vranësira dhe reshje sporadike, moti do të rikthehet i kthjellët në shumë zona të vendit, ndërkohë që në disa rajone malore mund të ketë reshje të izoluara gjatë pasdites.

Sipas parashikimeve të fundit nga Instituti i Gjeoshkencave, Mjedisit dhe Ndryshimeve Klimatike, mëngjesi i ditës së nesërme do të nisë me kthjellime në zonat bregdetare dhe të ultësirës perëndimore, ndërsa vranësirat do të jenë më të shpeshta në verilindje dhe juglindje.

Temperaturat do të pësojnë rritje graduale, ku maksimumet do të arrijnë në 34°C në qytete si Elbasan, Berat dhe Fier, ndërsa në bregdet do të variojnë nga 28°C në Durrës deri në 31°C në Vlorë. Minimumet në mëngjes do të jenë të ulëta në zonat malore, me Kukësin dhe Peshkopinë që zbresin deri në 13–14°C.

Në Tiranë, dita do të jetë me diell, me vranësira kalimtare pasdite. Temperaturat do të shkojnë nga 19°C në mëngjes deri në 33°C në mesditë. Era do të jetë e lehtë deri mesatare nga veriperëndimi, me shpejtësi 20 km/h.

Në veri, Shkodra dhe Tropoja pritet të përjetojnë mot të kthjellët paradite, ndërsa pasdite mund të ketë reshje afatshkurtra shiu në zonat e larta. Ndërkohë, në Lezhë dhe Malësinë e Madhe moti do të mbetet i qëndrueshëm.

Në jug, Gjirokastra dhe Tepelena do të shohin një rritje të ndjeshme të temperaturave, ndërsa reshje të lehta parashikohen në zonat përreth Ersekës dhe Kolonjës në orët e vona të pasdites.

Parashikimi i erës dhe detit: Era do të fryjë nga drejtimi veriperëndimor me intensitet të ulët, ndërsa deti do të jetë i qetë në brigjet shqiptare, duke favorizuar lundrimet dhe aktivitetet detare.

Për të identifikuar liderët ushtarakë, shkencëtarët dhe vendet për të goditur, inteligjenca izraelite përdori burra dhe gra të integruar në mënyrë perfekte në Iran. Një legjion i huaj agjentësh dyfish sekret, sepse ata u rekrutuan larg Izraelit: këta janë ekzekutorët pa emër që thuhet lejuan Mossad-in të depërtonte në rrugët e Teheranit dhe shkretëtirat e bazave të raketave, duke i lejuar ata të gjenin rezidencat e njerëzve dhe shkencëtarëve kryesorë të regjimit që punuan për bombën atomike.

Burra dhe veçanërisht vajza, të përzgjedhur në vende që nuk ngjallin dyshime dhe të trajnuar për vite përpara se të hyjnë në veprim. Hipoteza u formulua në vitin 2021, kur dronët e nisur nga territori iranian i vunë flakën një qendre kërkimore bërthamore.

Konfirmimi erdhi vitin e kaluar, kur një rrjet spiunësh izraelitë u arrestua në Turqi: ata ishin kryesisht qytetarë palestinezë ose sirianë, të punësuar nga inteligjenca e shtetit hebre. Të rinjtë që i përkisnin pakicave shiite të Afganistanit, diasporës libaneze dhe ish-republikave sovjetike të Azisë dyshohet se u përzgjodhën për misionet në Iran.

Përveç tyre, do të kishte evropianë, amerikano-jugorë dhe arabë, të zgjedhur nga qytetarët e vendeve me interesa të forta ekonomike në Teheran, të cilët mund të gjejnë më lehtë strehë.

Mossad-i fillimisht, shpesh ua besonte operacionet e tij hebrenjve që u rritën në komunitetet evropiane, amerikane ose arabe. Sot edhe ata kanë nevojë për njerëz që janë në gjendje të përshtaten në një komb të mbyllur dhe mosbesues si Republika Islamike.

Më të mirat ishin vajzat, të afta për t’u ftuar në vilat e të fuqishmëve në kodrat e Teheranit, si dhe në ndërtimin e bombave apo gjuajtjen me saktësi.

Disa prej tyre, gjatë natës mes të enjtes dhe të premtes, do të kishin “shënjuar” shtëpitë e krerëve të Pasdaranit me tregues lazer: një gjurmë e ndjekur nga raketat “Spice” të hedhura nga avionët luftëtarët e valës së parë.

Të tjera shoqëruan në shkretëtirë patrullat e sulmuesve që zbritën nga qielli për të goditur armët kundërajrore vetëlëvizëse nga pas dhe për të shpërndarë retë e dronëve vrasës pranë vendeve të fshehta të raketave balistike. Më pas ato u zhdukën pa gjurmë.

Prej 72 orësh drejtuesit e teokracisë jetojnë në psikozën e kolonës së pestë: kudo ka arrestime dhe kontrolle.

Udhëheqësit po kërkojnë furishëm strehimore, por në të njëjtën kohë duhet të komunikojnë me njëri-tjetrin për të menaxhuar zhvillimet dramatike të situatës: telefonatat dhe bisedat, sado të koduara, bëhen gjurmë elektronike që nuk u shpëtojnë avionëve spiunë të Mossad duke i lejuar ata të drejtojnë agjentët në terren drejt drejtimeve të reja. Me një kthesë të mundshme: tani që ata kanë kontrollin e plotë të ajrit dhe nuk kanë më frikë nga zjarri kundërajror, izraelitët mund të guxojnë të nisin sulmet e parashutistëve kundër bunkerëve të raketave nëntokësore ose laboratorëve bërthamorë, ku bombat nuk mund të depërtojnë.

Ata kanë bërë tashmë diçka të ngjashme në Siri. Veprimi në tunelet iraniane mund të jetë shumë i rrezikshëm, por nuk duket se ka ndonjë alternativë për të pushtuar bazat e gërmuara në barkun e maleve. Marrë nga La Peppublika.

Një ngjarje tragjike ndodhi në Greqi ku 12-vjeçari shqiptar, Kleoni dhe shoku i tij, Spiros (i cili hyri në ujë për ta shpëtuar) u mbytën në lumin Arahtho të Artës.

Dy të miturit u nxorën nga uji nga një emigrant shqiptar me origjinë nga Berat, por pavarësisht ndihmës mjekësore u shpallën klinikisht të vdekur dhe prindërit e tyre vendosën të dhuronin organet.

Kleoni 12-vjeçar do të prehet në Shqipëri, ndërsa autoritetet greke i kanë dhënë leje babait të të miturit të marrë pjesë në varrim.

I ati i viktimës ishte i shqetësuar se nëse do merrte pjesë në funeralin e të birit, nuk do të ishte në gjendje të kthehej në Greqi.

Ministri i Imigracionit, Makis Voridis, duke folur për Action 24, njoftoi se “shteti grek do t’i japë një leje qëndrimi për arsye humanitare, që do t’i lejojë babait të shkojë dhe të kthehet, me qëllim që të marrë pjesë në shërbimin mortor në Shqipëri”.

Siç theksoi Voridis, “ky është një lehtësim për lëvizjen e tij”, duke shtuar se tashmë ekziston një kuadër institucional që parashikon raste të tilla “të jashtëzakonshme”.

Ndërkohë veshka dhe pankreasi i djalit 12-vjeçar do të transplantohen në Patra në vend të Selanikut, pas një vendimi të marrë nga mjekët. Marrësi do të jetë një burrë 40-vjeçar nga Peloponezi perëndimor.

Procesi i marrjes dhe transplantimit të organeve të dy djemve filloi të hënën. Pavarësisht dhimbjes, prindërit e të dy fëmijëve treguan forcë dhe solidaritet të madh, duke u dhënë “dritën jeshile” mjekëve për të marrë organet e vogëlushve.

Transplantet e para të organeve të 14-vjeçarit janë kryer tashmë, me marrësit që kanë pranuar dhuratat e jetës nga dy fëmijët.

Një automjet i bllokuar nga policia lëvizte lirisht në qytetin e Fierit, kur duhej të qendronte te pika e bllokimit e Policisë së Shtetit.

Automjeti tip “Fiat” iu bllokua një banori të Fierit, pasi u kap me 1 cigare hashash për përdorim personal. Por, pronari e ka parë në lëvizje. Madje, polici që duhet t’a ruante i thotë se e morën në Komisariat.

Në redaksinë e emisionit “Fiks Fare” u ankua Genci dhe Igli Taka, të cilët dyshojnë se mjeti lëvizte nga punonjës policie. “Djalin e kanë kapur dy a tri herë, e kanë mbajtur disa ditë brenda dhe e kanë liruar. Tani djali gabim e ka, por s’kam çfarë t’i bëj është përdorues i lëndëve narkotike. Ka ikur në Gjermani dhe ka punuar dhe unë e detyrova që të kthehej se ne, prindërit e tij, jemi të sëmurë dhe s’ka kush të kujdeset. Të dy me ilaçe dhe nuk lëvizim dot” thotë babai, duke shtuar se i ka kërkuar që të marrë edhe një makinë.

Automjeti është tip Fiat. Babai dhe vetë djali pohojnë se e kanë parë mjetin duke lëvizur lirisht në qytetin e Fierit. “Shkojmë te Policia e Fierit dhe na thonë se është te pika e bllokimit. Ne e kemi parë në lëvizje, se e njohim nga pjesa e pasme, pasi në vend të shenjës Fiat ka një shenjë tjetër, tip pistolete” thotë djali. Ai shton se ka shkuar te policia disa herë, por asnjë përgjigje, ndërsa thotë se përveç policisë askush s’mund t’a marrë makinën nga pika e bllokimit.

Pas denoncimit, djali shkoi te pika e bllokimit. Takon punonjësin e policisë, teksa i kërkon që të shohë makinën. Polici i thotë se aty është dhe ai nuk lejohet që ta shohë pasi është e bllokuar. Djali e pyet se e ka parë makinën në lëvizje në Fier dhe nëse ka ndonjë dokument a procesverbal se përse ka lëvizur. Polici i thotë se shko pyet te Komisariati se ata e dinë. Ai pranon se mjeti ka lëvizur nga pika e bllokimit, por nuk jep detaje. Madje, i thotë që të largohet se tani as foto s’do që t’i bëjë mjetit.

Grupi i Fiks Fare shkoi te pika e bllokimit dhe takoi policin, të cilin e gjejnë me një bluzë të bardhë. E pyesin nëse është polic, ndërsa thotë se po, dhe uniformën e ka lënë te vendroja. Polici thotë se makina është brenda në pikë, por nuk pranon që Fiksi ta filmojë pasi duhet autorizim.

Gazetarët e pyesin se përse lëviz makina, ndërsa ai largohet dhe mbyll derën nga brenda. Qendron disa minuta dhe del, teksa Fiksi e pyet se kush e lejoi makinën që të dalë. Ai pranon se ka dalë dhe se ka shkuar në komisariat.

Fiksi telefonin oficerin e Policisë Gjyqësore që ka bërë veprimet dhe ka sekuestruar makinën tip Fiat. OPGj thotë se makina është bllokuar, ka një vendim dhe më pas është futur në pikën e bllokimit. Fiksi i thotë se makina ka lëvizur dhe se është parë duke lëvizur në qytetin e Fierit. OPGj thotë se s’ka dijeni dhe se makina aktualisht është në pikën e bllokimit.

Fiksi e kërkon që ta shohin, ndërsa OPGj i thotë se po dhe i kërkon grupit të Fiksit që t’a marrin në Drejtorinë e Policisë së Fierit, pasi pika e bllokimit është në afërsi të qytetit të Patosit. Makina e Fiks Fare shkon te drejtoria bashkë me qytetarin dhe kur shkon atje, OPGj telefonon Fiksin dhe thotë se ka ardhur shkresa dhe se qytetari të paraqitet për t’a firmosur dhe për t’a marrë që sot makinën.

Denoncuesi rikthehet te Pika e Bllokimit me letrën e OPGJ-së, ndërkohë që më vonë vjen edhe oficeri me makinën e policisë. Ai thotë se s’ka dijeni që makina të ketë dalë dhe se mjeti ka qenë te pika e bllokimit. Qytetari merr makinën. “Te vendi që e mora e kontrollova disa ditë më parë dhe s’e gjeta. Kësaj herë më thanë se është dhe e mora. Është në gjendje pune. Falenderoj emisionin ‘Fiks Fare’ që më ndihmoi për ta marrë” përfundon Igli.

***

Pika e Bllokimit të makinave në Fier

Qytetari – Jam prapë ai djali, dua të shihja pak atë FIAT-in.

Polici – Po për çfarë do t’a shikosh ti atë?

Qytetari – Dua të shikoj gjërat fizike të mjetit unë.

Polici – Nuk të lejohet pa shkresa, FIAT-i aty është. Merr shkresë nga Ilia (Oficeri) dhe hajde këtu. Mjeti aty është, do që t’i bëj unë fotografi atje?

Qytetari – Po. E mira është që t’a shikoj edhe vetë unë.

Polici – Jo, nuk lejohet brenda.

Qytetari – Mund të vemi ta shikojmë bashkë?

Polici – Jo!

Qytetari – Po si jo?!

Polici – Të lutëm s’i bëj as fotografi. Këtu është futur me letra ajo, nuk të njoh ty unë, njoh letrat.

Qytetari – Ore erdhëm e pamë bashkë?

Polici – Po, ishte gabimi im që të futa brenda.

Qytetari – Po ishte makina?

Polici – Ishte!

Qytetari – Ku ishte?

Polici – Aty ishte.

Qytetari – Nuk e kam parë!

Polici – Ka qenë në komisariat, nga komisariati ka ardhur këtu. Të thashë unë që në komisariat s’të japin shpjegime?

Qytetari – Jo.

Polici – Hë të thashë unë?

Qytetari – Jo se me letra më rezultonte se ishte këtu makina.

Polici – Jo.

Qytetari – Ne e pamë në dosje bashkë, e pamë bashkë?

Polici – Po e pe në dosje po ishte marrë për verifikim në komisariat. Ik merr oficerin këtu dhe nëse s’është makina do të mbaj unë përgjegjësi.

Qytetari – Ok po e marr unë në telefon.

Polici – E bëra unë problem atë që e mbajnë atje ata …

Qytetari – Po e marr unë në telefon.

Polici – Nuk ka mundësi se vete unë në burg. Po makinën e kishin marrë ata, e kishin çuar atje.

Qytetari – (Telefonon Oficerin)

Oficer – Alo!

Qytetari – O Ilia si je ti?

Oficeri – Mirë si je ti.

Qytetari – Ore jam te pika e bllokimit me këtë rojën …

Polici – Ik merr shkresat do të fus unë. Unë atë ditë e bëra problem e të thashë që …

Qytetari – Mjeti nuk ishte …

Polici – Edhe njëherë, mjeti ka qenë në komisariat! Ishte shënimi që ka dalë në datën.

Qytetari – Po ça date?

Polici – Në datën 16.

Qytetari – Ore mjetin e pamë bashkë që s’ishte aty.

Polici – Edhe njëherë. Atë ditë kishte ikur, e ke me shkrim.

Qytetari – Kishte ikur?

Polici – Ka dalë me shënim!

Qytetari – Me ça urdhri, më trego urdhrin?

Polici – Ka dalë me shënim ore.

Qytetari – Më trego urdhrin!

Polici – Ore ka vajtur në komisariat ore.

***

Ballafaqimi i grupit të Fiks Fare me policin e Pikës së Bllokimit

Gazetari – Ti je roje këtu?

Polici – Jam polic, s’jam roje!

Gazetari – Ëë polic! Të pash me A… (bluzë)!

Polici – U bëra me djersë

Gazetari – Ne për një makinë, na thanë që s’është këtu!

Polici – Po.

Gazetari – Është kjo AB899NU e Gencit.

Polici – Po, ja do ta …

Gazetari – Është këtu brenda apo jo?

Polici – Po.

Gazetari – Do na e tregosh?

Polici – Po.

Polici – (Mbyllet te vendroja) Një sekondë, prit!

Gazetari – Po mos e kyç!

Gazetari – Është aty brenda?

Polici – E garantuar, të garantoj unë.

Gazetari – Po pse lëviz kjo nga pika e bllokimit? Pse ka lëvizur?

Polici – S’ka lëvizur!

Gazetari – Sapo it he Iglit …

Polici – Ka shkuar në komisariat!

Gazetari – Po pse ka qenë në komisariat?

Polici – Për verifikim ata.

Gazetari – E morën ata të komisariatit?

Polici – Po!

Gazetari – Ke mbajtur procesverbal që ka dalë për në komisariat?

Polici – Po ore.

Gazetari – Në ça date? Në ça date ka dalë? Kur ka ardhur?

Polici – Këtu nuk lejohet këtu, dale të marr shefin unë dhe të jap …

Gazetari – Tani kur ka dalë, kur ka dalë?

Polici – Ta jap unë me data, të marr shefin unë edhe … Të marr shefin unë!

Gazetari – Sot është këtu brenda?

Polici – Po.

Gazetari – Kur e kanë sjellë?

Polici – Zotëri është brenda.

Gazetari – Kur e kanë sjellë?

Polici – Unë erdha mora shërbimin sot ishte brenda.

Gazetari – Kur ka ardhur, na e shiko dhe na e verifiko pak.

Polici – Po mirë të flas me shefat.

Gazetari – Po na e shiko te procesverbali.

Polici – Të flas me shefat, të lutem, të lutem. Diç çik nga dera.

Gazetari – Mos më prek …

Polici – Po të jetë po ashtu ik mos na … Unë them ik nga dera komunikojmë bashkë.

Gazetari – Mos më shty.

Polici – S’po të shtyj! (Futet sërish brenda vendrojes dhe kyç derën)

Polici – Urdhëro zotëri?

Gazetari – Mundesh?

Polici – Jo nuk mundesh pa autorizim. Mjeti s’ka lëvizur, aty është. Merr autorizim atje dhe hajde. Merrni autorizimin atje dhe mjetin e keni brenda.

/Emisioni “Fiks Fare”

Një tjetër prapaskenë e çuditshme ka ardhur për trajnerin Silvinjo dhe mënyrën sesi ai po e menaxhon situatën në grup. Në ndeshjet e fundit ra në sy lënia jashtë e mbrojtësit Enea Mihaj. Por përse ndodhi ky përjashtim? Gazetari Altin Sulce, ka treguar prapaskenën se çfarë ka ndodhur në këtë rast. Sipas tij, Silvinjo i ka kërkuar Enea Mihajt që të vinte tre ditë para grumbullimit në Tiranë. Ndërkohë Enea Mihaj martohej të dielën dhe Shqipëria grumbullohej të hënën.

Madje mbrojtësi ka marrë edhe leje nga Silvinjo, të paktën e ka kërkuar një gjë të tillë, pasi trajneri i Shqipërisë e ka refuzuar. Tërësisht e habitshme jo vetëm për faktin se një gjë e tillë është prioritet, pra kurorëzimi i një cifti dhe krijimi i familjes, vecanërisht duke ditur se nuk do të humbiste thuajse asnjë ditë stërvitje, por edhe për faktin se Enea Mihaj vjen i fundit në rend kur bëhet fjalë për qendër mbrojtësit dhe nuk është përdorur thuajse kurrë.

“Unë kam një informacion, Mihaj nuk është grumbulluar pasi Silvinjo i ka thënë: “Hajde tre ditë para grumbullimit”. Ekipi kombëtar grumbullohej të hënën, ndërkohë Mihaj kishte dasmën, do të martohej. Silvinjo nuk ishte dakort, ndërsa për Mihajn kishte vetëm një zgjidhje, të shtynte martesën, ndërkohë që ekipi të hënën do të grumbullohej gjithsesi. Mihaj kishte kërkuar leje, martohej të dielën, por Silvinjo e kërkon ditë para”, tha Sulce.

Modelja e njohur shqiptare Adrola Dushi dhe reperi kosovar Capital T po e bëjnë gjithnjë e më të dukshme lidhjen e tyre, duke ndarë herë pas here momente të ëmbla me ndjekësit e tyre në rrjetet sociale.

Pak javë më parë, çifti u pa së bashku në Toskanë të Italisë, një nga vendet më romantike për pushime.

Capital T publikoi disa foto nga udhëtimi, ndër to edhe një ku shihet dora e kapur e modeles bukuroshe — një detaj që s’u shpëtoi fansave.

Së fundmi, shkëmbimet e tyre në Instagram kanë ngritur akoma më shumë dyshimet, ose më saktë, i kanë kthyer ato në një siguri për ndjekësit.

Në një postim të Adrolës nga pushimet, Capital T nuk ngurroi të komentonte me një zemër të kuqe, ndërsa modelja komentoi në fotot e reperit me një përshkrim shumë më romantik: “Ky është tipi im”.

Epo, dashuria duket qartë se është në ajër për këtë çift simpatik. Tani neve na mbetet vetëm të pyesim: A do të kemi dasmë këtë verë, apo do na surprizojnë papritur?