Gjykata e Posaçme kundër Korrupsionit dhe Krimit të Organizuar pezulloi sot nga detyra dhe vendosi nën masën e “arrestit shtëpiak” shefen e inteligjencës së vendit, Vlora Hyseni. Pak orë më vonë Hyseni u shkarkua nga detyra.
Shefja e SHISH, Hyseni dyshohet për zbulimin e informacionit të klasifikuar personave të paautorizuar. Hetimi është zhvilluar falë materialeve të sekuestruara nga biznesmeni Ergys Agasi, i cili akuzohet se ka qenë i lidhur me një grup të strukturuar kriminal të përfshirë në manipulimin e tenderëve dhe korrupsion.
Hyseni ndodhej jashtë Shqipërisë kur u dha vendimi, që do të thotë se urdhri i arrestit shtëpiak nuk është ekzekutuar ende fizikisht. Ajo u vetëdorëzua pasditen e sotme në policinë e Kosovës.
Kryeministri Edi Rama, i cili po merrte pjesë në Asamblenë e Përgjithshme të Kombeve të Bashkuara në Nju Jork, njoftoi pasditen e sotme se e ka shkarkuar Hysenin nga detyra dhe do të konsultohet me presidentin Bajram Begaj për pasuesen e saj në detyrë.
Vlora Hyseni, më parë ka shërbyer në Kosovë si zëvendës-shefe e inteligjencës. Në qershor 2021, presidentja Vjosa Osmani dhe kryeministri Albin Kurti firmosën shkarkimin e Hysenit nga posti i zëvendësdrejtores, ndërsa vendimi publik nuk jepte një arsye konkrete për largimin.
Vetëm pak muaj pas largimit nga AKI, Hyseni u emërua në Tiranë këshilltare për sigurinë e kryeministrit Edi Rama dhe në vitin 2023 iu besua posti i lartë, në krye të SHISH.
Ndërkaq, vendimi i sotëm shënon herën e parë në historinë e Shqipërisë që një masë sigurie arrest shtëpiak lëshohet kundër një shefi të inteligjencës shtetërore në detyrë.
Arrestimi ose ndjekja penale e një shefi të inteligjencës kombëtare në detyrë ose ish-shefi është ngjarje e rrallë kudo në botë. Pak udhëheqës të lartë të inteligjencës në mbarë globin janë përballur me akuza penale, arrestime ose dënime për rrjedhje të sekreteve shtetërore, korrupsion, tradhti ose abuzim me pushtetin.
Rastet më të spikatura gjatë 10 viteve të fundit, kur një drejtues apo ish-shef i shërbimeve ineligjente, është hetuar ose dënuar në arenën ndërkombëtare:
Brazili (2026): Alexandre Ramagem , ish-shefi i agjencisë së inteligjencës braziliane (Abin) nën Jair Bolsonaro, u dënua me 16 vjet burg për shndërrimin e agjencisë në një njësi klandestine për të spiunuar në mënyrë të paligjshme kundërshtarët politikë dhe gjyqtarët e Gjykatës së Lartë. Pasi u largua nga vendi, ai u arrestua nga agjentët amerikanë të ICE në prill 2026.
Ukrainë (2025/2026): Kolonel Dmytro Kozyura , ish-shefi i shtabit të qendrës antiterrorizëm të Shërbimit të Sigurisë së Ukrainës (SBU), u arrestua dhe më vonë u dënua me burgim të përjetshëm për tradhti të lartë. Ai u kap duke përdorur një vend të sigurt për t’i kaluar sekrete të klasifikuara ushtarake dhe udhëheqëse FSB-së së Rusisë.
Afrika e Jugut (2025): Dumisani Khumalo, shefi i inteligjencës kriminale të policisë së Afrikës së Jugut, u arrestua në aeroport dhe u nxor në gjyq së bashku me oficerë të tjerë të lartë me akuza për mashtrim, korrupsion dhe abuzim të dyshuar të fondeve të inteligjencës së klasifikuar.
Venezuela (2025): Hugo Carvajal , ish-drejtori i inteligjencës ushtarake të Venezuelës, për një kohë të gjatë, u ekstradua në Shtetet e Bashkuara dhe u deklarua fajtor ndaj akuzave për narkoterrorizëm dhe trafik droge në një gjykatë të Nju Jorkut, pasi mbrojti sindikatat e drogës ndërsa drejtonte agjencinë.
Pakistan (2024/2025): Faiz Hamid , ish-shefi i Inteligjencës (ISI) të Pakistanit, u arrestua nga ushtria në vitin 2024. Në dhjetor 2025, një gjykatë ushtarake e dënoi atë me 14 vjet burg për shkelje të Aktit të Sekreteve Zyrtare, keqpërdorim të autoritetit dhe ndërhyrje në politikën e brendshme. Hers e parë që një shef i ISI-t u gjykua nga gjykata ushtarake në Pakistan.
Danimarkë (2021): Lars Findsen , kreu i agjencisë së inteligjencës së jashtme (FE) të Danimarkës, u arrestua në Aeroportin e Kopenhagës dhe kaloi më shumë se një muaj në burg. Ai u akuzua për rrjedhje informacioni shumë të klasifikuar dhe sekreteve shtetërore te gazetarët. Akuzat penale me rrezik të lartë kundër tij dhe ish-ministrit të mbrojtjes të Danimarkës u rrëzuan në vitin 2023 pasi gjykata e lartë vendosi që gjyqet nuk mund të zhvilloheshin tërësisht në fshehtësi.
Kanada (2019): Cameron Ortis , kreu civil i njësisë së inteligjencës (RCMP), u arrestua dhe u dënua me 14 vjet burg në fillim të vitit 2024 për rrjedhjen e materialeve sekrete operacionale te grupet kriminale. /MAPO.al/