Month: May 2025

Një efektiv i policisë raportohet se është shpallur në kërim pasi ka qëlluar me armë në ajër, mbrëmjen e somte në fshatin Pilafe të Peshkopisë.

Polici i identifikuar dhe shpallur në kërkim është Esat Gjura, i cili dyshohet ka qëlluar me armë zjarri.

Incidenti ka ndodhur pasi janë përplasur me demokratët Xhelal Mziun dhe Xhemal Gjunkshin, teksa këta të fundit kanë bllokuar një makinë me pretendimin se shpërndanin para në këmbim të votave.

Po ashtu në kërkim është shpallur dhe një person tjetër. Mësohet se Gjura është babai i kandidatit të Partisë Socialiste, Daniel Gjura.

Njoftimi i Policisë:

Rreth orës 20.25 shtetasi Xh.Gj., (kanditat për deputet i subjektit politik Partia Demokratike), ka telefonuar në sallën operative të Drejtorisë Vendore të Policisë Dibër, i cili pretendonte se në fshatin Pilafe, njësia Administrative Tomin, kanë ndaluar një shtetas që dyshohej se shpërndante para në këmbim të votave.

Gjithashtu shtetasi Xh.Gj., paraprakisht ka pretenduar se një person teksa është larguar ka qëlluar njëherë me armë zjarri në ajër.

Menjëherë është ngritur grupi hetimor i Drejtorisë Vendore të Policisë Dibër dhe nën drejtimin e Spak dhe të Prokurorisë të Juridiksionit të Përgjithshëm Dibër po kryejnë hetimet për zbardhjen e rastit.

Kryesocialisti Edi Rama thotë se në zgjedhjet parlamentare të 11 Majit, kundërshtari i tij Sali Berisha do të marrë një përgjigje të qartë.

I ftuar në një emision televiziv, Rama iu përgjigj pyetjes së Fevziut, që solli reagimin e Berishës në rrjete sociale pak minuta më parë, ku shkruante se “Rama nuk vjen në debat sepse e di që pësoi fatin që pati Biden me Trumpin”.

Edi Rama: Nuk kam asnjë koment për atë që e quan… ai është një buf kënete që sot ka mbaruar fushata e jetës së tij dhe që ditën e diel do marri një mesazh shumë të qartë nga populli shqiptar.Blendi Fevziu: Dje tha që vetëm ai lart më largon nga PD.Edi Rama: Vetëm ai lart e largon një buf nga këneta. Këneta ka nevojë për bufin e vetë.

Blendi Fevziu: Ore pse nuk del në debat?

Edi Rama: Nuk ka asnjë shans që një katran me bojë që nuk ka lënë të gjallë e të vdekur të shtëpisë time pa e marrë zvarrë, të ketë fatin që unë t’i jap 1 minutë nga prania ime. Është tërheqje zvarrë e të vdekurve dhe të gjallëve të familjes time në mexhelis duke i pështyrë për hesapet e tij të ndyra politike.

Edmond Përbashaj, i njohur me nofkën ‘Mondi’ dhe i konsideruar si një ndër figurat më të rrezikshme të botës së krimit shqiptar në Greqi, vijon të mbajë gjallë aktivitetin e tij kriminal edhe nga brenda burgut.

Një kontroll i papritur në qelinë e tij në burgun e Nafplios ka zbuluar një telefon celular, një router portativ dhe një shufër metalike, duke treguar edhe një herë se ai nuk është ndalur për asnjë moment në drejtimin e rrjetit të tij.

Zyrtarë të lartë të policisë greke, të cilët nuk e fshehin frustrimin me situatën, kanë deklaruar për mediat se “edhe në izolim, Mondi gjen mënyra për të pasur celularë, drogë dhe kontakte me botën e jashtme”.

Ai njihet si një nga ‘bosët’ më të fortë të mafias shqiptare në Greqi, me një rrjet të përhapur të bashkëpunëtorëve, kryesisht shqiptarë, të shpërndarë në të gjithë territorin.

Sipas informacioneve nga autoritetet greke, Përbashaj ka krijuar një sistem të sofistikuar brenda burgjeve përmes bashkëpunimeve me zyrtarë të korruptuar, përfshirë edhe zëvendësdrejtorin e një prej burgjeve ku ka qëndruar më herët.

Me ndihmën e tyre, ai ka futur kontrabandë drogë, ka organizuar trafikun dhe ka pastruar paratë përmes mensës së burgut, duke krijuar një ‘dyqan të vërtetë kriminal’ brenda mureve të institucionit penal.

Laboratorët mjeko-ligjorë grekë janë duke analizuar celularin dhe pajisjet e sekuestruara në kërkim të provave që mund të lidhin Mondin me krimet e fundit të ndodhura në vend, përfshirë vrasjen e një shtetasi shqiptar në Thrakomedones disa muaj më parë, shpërthime me bombë, si dhe trafik droge.

Përbashaj ka kaluar nëpër shumicën e burgjeve të Greqisë dhe në çdo rast ka arritur të ruajë kontrollin mbi rrjetin e tij të jashtëm, duke përdorur ndikim, frikë dhe korrupsion.

Aktualisht, ndaj tij është hapur një çështje e re penale, që pritet të shkojë në gjykim në muajt e ardhshëm.

Autoritetet greke po përballen me sfida serioze për të thyer ndikimin e tij brenda sistemit penitenciar dhe jashtë tij, ndërsa çështja e Edmond Përbashajt po shihet si një test i vërtetë për integritetin e institucioneve të drejtësisë dhe sigurisë në vend.

Ylber Jaku, autori i dyshuar i vrasjes së 34-vjeçarit Reshit Sallahu më 7 Maj në fshatin Pla të Hasit, ka heshtur para oficerëve të policisë dhe gjykatës.

Avokatja e caktuar nga shteti për 41 vjeçarin ka treguar se Ylber Jaku, i cili u paraqit sot në Gjykatë ku iu caktua masa “arrest me burg”, është shprehur se kërkon përfaqësues të ambasadës angleze.

Ylber Jaku ka deklaruar se është shtetas britanik, ndërsa është i martuar me një grua angleze, si edhe ka dy vajza.

“Gjykata vendosi arrest me burg sepse kemi të bëjmë me veprën penale të vrasjes. Në pretendimet e fundit i pyetur nga gykata, Ylber Jaku u shpreh se nuk ka asnjë pretendim.

Nuk kërkonte as avokat dhe nuk foli në lidhje me rastin sepse thotë “unë kam parë se si janë rropatur prindërit e mi 20 vite, nuk kam besim dhe nuk flas tek kjo drejtësi”. Kërkon përfaqësues nga ambasada angleze në vijimësi të procesit të tij. Ai është shtetas angleze dhe gruan angleze si edhe dy vajza.

Ylber Jaku nuk ka dhënë asnjë dëshmi as para oficerit të policisë gjyësore dhe as para gjyktës, shprehet vetëm që s’kam besim tek kjo drejtësi si shtetas anglez, të jetë përfaqësues i ambasadës angleze që ti shpjegoj rastin se çfarë ka ndodhur me rastine prindërve të tij dhe neglizhenca e institucioneve, pushtetit lokal dhe policisë, ka bërë atë që unë sot përfundova këtu”, tha avokatja e tij.

Sherri për pronat

Krimi i rëndë është shënuar pasditen e 7 Majit, ku Ylber Jaku, 41 vjeç, i ka marrë jetën fqinjit të tij, Reshit Sallahu, 34 vjeç, në afërsi të shtëpisë së tij.

Prita fatale që iu zu 34-vjeçarit erdhi nga një konflikt i përshkallëzuar prej të paktën 20 vjetësh, për të cilin janë në dijeni të gjitha institucionet dhe askush nuk ka ndërhyrë ta zgjidhë dhe as ta shuajë.

Mirëpo agravimi i ashpër ndodhi dy ditë më parë, kur motra e viktimës sulmon më sëpatë prindërit e autorit, duke i plagosur rëndë. Pas ngjarjes, djali i çiftit ka mbërritur në fshatin Pla duke e pritur Reshit Sallahun të kthehet në banesë.

Me një pushkë, që nuk dihet se ku e ka gjetur, ai ka qëlluar mbi të 8 herë duke i marrë jetën në vend. Autori Ylber Jaku i ka pritur policinë në shtëpinë e tij bashkë me armën e krimit, ndërkohë që para se sa të mbërrinte në shtëpinë e tij, ai ka vizituar të atin e të ëmën në spitalin Ushtarak.

Kur ka parë gjendjen e rënduar të tyre, ai është nisur për në Has duke kryer edhe krimin e rëndë. Po ashtu mësohet se konflikti mes dy familjeve fqinje është denoncuar me dhjetëra herë dhe askush nuk ka reaguar për të ardhur në ngjarjen e rëndë të dy ditëve të njëpasnjëshme, me një të vrarë, dy të plagosur dhe dy persona të arrestuar.

Prej më shumë se një dekade, qytetarët shqiptarë janë ushqyer me premtimin e një shëndetësie falas, por realiteti ka qenë krejt ndryshe: vuajtje falas, shërbime të përçmuara dhe një sistem që sa vjen e zhbëhet. Me mbi 400 milionë euro të shpërdoruara në koncesione dhe PPP abuzive, shëndetësia publike është kthyer në një makth të përditshëm për pacientët dhe një fushë minash për profesionistët. Në vend të reformës së premtuar, sot qarkullojnë sinjale shqetësuese se spitali “Nënë Tereza” mund t’i dorëzohet privatit në mandatin e katërt të Edi Ramës. Marrëveshjet me spitalet e huaja, në vend që të japin shpresë, po ngjallin frikën se sistemit po i vjen fundi si i tillë publik.

Qytetarët do të paguajnë për çdo shërbim, përveç rastit kur shkojnë në gjendje urgjente, një prag i frikshëm për një vend që ka vuajtur gjatë mungesën e aksesit dhe cilësisë në kujdesin shëndetësor. Në vend të transparencës, shohim një tjetër maskë të vendosur mbi një mashtrim të vjetër. Në vend të ekselencës së premtuar, populli rrezikon të mbetet nën mëshirën e tregut dhe monopoleve. Por kur besimi në shtet kthehet në faturë për jetë, atëherë propaganda nuk shëron më. Kjo nuk është reformë, por është tradhti e heshtur ndaj një të drejte themelore: shëndetësisë për të gjithë. Rama përpiqet ta shesë këtë zhvillim si hap drejt modernizimit, por në thelb është vetëm një dorëzim i spitalit publik në duart e biznesit privat. Qytetarët nuk kanë nevojë për marrëveshje me spitalet më të mira të botës, nëse nuk kanë para për të hyrë në derën e spitalit të lagjes.

Ky është një përçmim i hapur ndaj dhimbjes së përditshme të mijëra njerëzve që presin me orë për një analizë apo një mjek specialist. Mjekët largohen, infermierët demoralizohen, pacientët paguajnë dhe qeveria flet për “eksperienca ndërkombëtare”. Megjithatë kjo panoramë tregon se po zhduket koncepti i shëndetësisë si shërbim publik dhe po zëvendësohet me logjikën e tregut: kush paguan, jeton. Pra Edi Rama nuk po bën reformë, po bën largimin përfundimtar të shtetit nga përgjegjësia më e madhe që ka, kujdesi për jetën e qytetarit. Kështu që nëse ky është transformimi i shumëpërfolur i sistemit, atëherë është koha që qytetarët të kuptojnë se po i dorëzohen privatit edhe jetët e tyre, jo vetëm taksat.

Konkretisht sinjalet se qytetarët do të paguajnë shërbimet dhe vetëm kur shkojnë urgjencë nuk do ta fusin dorën në xhep në spitalet publike, respektivisht në spitalin “Nënë Tereza” në Tiranë i ka dhënë vetë kryeministri Edi Rama. Ky i fundit teksa ishte i ftuar në një studio televizive këtë të enjte, zbuloi se ka një plan ambicioz për transformimin e sektorit të shëndetësisë në Shqipëri, me fokus të veçantë tek Onkologjiku dhe QSUT. Në bashkëpunim me institucione të njohura ndërkombëtare si SHIBA në Izrael dhe San Raffaele në Itali, synohet krijimi i qendrave të ekselencës në nivel rajonal dhe evropian. Inovacioni teknologjik, përfshirë laboratorët me inteligjencë artificiale, pritet të hapë horizonte të reja për mjekët shqiptarë. Deri në fund të dekadës, Rama premton një sistem shëndetësor që konkurron me më të mirët në Europë.

“Sa i takon sektorit të shëndetësisë në jemi futur me kokë për një transformim, sikundër është sektori i onkologjikut. Ne kemi përbë një marrëveshje me spitalin e tetë në botë SHIBA-s, të Izraelit , që ta bëjmë Onkologjikun një spital ekselent në botë. Po diskutojmë për hapjen e një laboratori rajonal të AI pjesë e instilacionit të laboratorëve të SHIBA-s, që do të na japë mundësi të përfitojmë nga puna e laboratorëve të tjerë të këtij instalacioni duke hapur një mundësi të re për mjekët që duan të sjellin inovacion dhe zgjidhje të reja përmes teknologjisë. Po ashtu kemi bërë marrëveshje me memorandumi mes QSUT dhe Universitetit të Mjekësisë në Tiranë me Qendrën Spitalore Universitare të ekselencës evropiane “San Raffaele” dhe universitetin “Vita- Salute San Raffaele”. QSUT do të kthehet në një qendër ekselence në rajon dhe Evropë.

Synimi është që deri në 2030, nga njëra anë QSUT të pësojë atë transformim që grupi i San Raffaeles ka sjellë në Poloni, duke u përfshirë drejtpërdrejt në të gjitha proceset, menaxhimin e qendrës, në organizimin e gjithë jetës përditshme të qendrës dhe duke bashkuar në kuptimin e vërtetë profesionistët e të dyja anëve, San Raffaeles dhe QSUT. E njëjta ambicie është edhe për universitetin. Kemi shembullin e Universitetit BOKU të Vjenës, që ka filluar procesin e shkrirjes me UBT, që në fund të kësaj dekade, të vijnë studentë nga e gjithë Evropa për të studiuar me të gjithë parametrat e Universitetit të Vjenës dhe për të marrë një diplomë të njëjtë. Qëllimi është i njëjti që Universiteti i Mjekësisë të merret e njëjta diplomë si të atij i San Raffaeles dhe Tirana të jetë degë e universitetit të San Raffaeles. Ky është objektivi i fundit të dekadës”, deklaroi Rama tek emisioni “Top Story” në “Top Channel”.Sot.com.al

Në politikë, por jo vetëm, ajo shquhet për natyrën e drejtpërdrejtë që ka. E kemi fjalën për Rudina Hajdarin, që ndonëse disi më e distancuar nga politika, gjithnjë është në ndjekje të zhvillimeve të ngjarjeve në vendin tonë.

Si një personazh shumë i dashur edhe larg fokusit politikë, jeta e saj private ka qenë shpesh herë në fokus të mediave, pasi edhe vetë ajo është treguar transparente teksa ka folur për këtë pjesë. Ishte vera e shkuar, kur u zbulua edhe lidhja e re e ish-deputetes me Tan Kazazin, një regjisor i njohur në vendin tonë. Ka qenë vetë Rudina, që në rrjetet sociale ka publikuar edhe fotot me partnerin e saj të ri.

E ulur në prehrin e tij dhe të dy shumë të qeshur, Rudina shkruan: “E bekuar”. Lidhja e re dukej e konsoliduar, aq sa çifti të publikojë foto në rrjetet sociale. Përgjatë gjithë këtë viti, çifti u shfaq shumë shpesh së bashku, duke e bërë këtë lidhje familjare. Rudina shfaqej pranë nënës së Tanit, sakaq regjisori ishte me të në SHBA, ku edhe festonin së bashku festat. Por pas gati 1 vit lidhjeje, duket se diçka ka ndodhur mes kësaj dysheje kaq simpatike.

Nëse i hedhim një sy rrjeteve sociale, Tani dhe Rudina nuk ndiqen më me njëri-tjetrin. Nga ana tjetër, në profilet e tyre janë zhdukur të gjitha pozat që kishin së bashku, duke na bërë të mendojmë se kjo lidhje po përballet me një krizë në këtë momente. Në profilin e ish-deputetes postimet e reja janë përgjithësisht nga udhëtimet e ndryshme që ajo ka bërë, por dukshëm në to mungon Tani.

Nga ana tjetër, regjisori, postimet e tij i ka më të pakta, ku e vetmja shenjë e Rudinës, është një foto e bërë mes miqsh dhe të afërm të tyre, në vitin e shkuar. Vetë protagonistët e kësaj historie deri më tani nuk kanë preferuar që të flasin publikisht për romancën e tyre, ndaj edhe duket disi e vështirë që të flasin rreth mundësisë së krizës që po kalojnë, pas gati 1 viti lidhjeje.

Advertisements

Kujtojmë se Rudina Hajdari i dha fund martesës me Muçjon Demirajn pak vite më parë, me të cilin ishte njohur në Nju Jork në moshë fare të re, më pas aty kanë organizuar edhe dasmën.

Ndarja e tyre u konfirmua edhe nga vetë Rudina, e cila tha se marrëdhënia e tyre ishte ftohur. Kjo për shkak të vështirësisë së lidhjes në distancë, pasi Rudina rikthye në Shqipëri, për t’u marrë me politikë. Që nga rikthimi i saj në Shqipëri, ajo ka qenë e angazhuar me politikë, duke u shprehur se tashmë politika do të jetë pjesë e angazhimeve të saj edhe të mëtejshme. Larg Parlamentit, Rudina duket se ka pasur kohë të lirë të jetë më e pranishme si pranë vajzës së saj, por edhe të ketë një jetë më sociale.

“Marrëdhënia në distancë është shumë e vështirë, sepse që në vitin 2017 kemi këtë histori që jemi larg njëri-tjetrit. E padyshim që ka krijuar një ftohje në marrëdhënie, por ne mundohemi që të bëjmë më të mirën sepse kemi një vajzë. Kjo e bën marrëdhënien pak më të komplikuar. Duke marrë parasysh që vajza po rritet dhe kupton akoma më shumë, mundohemi që të bëjmë më të mirën të mundshme”, u shpreh në atë kohë Rudina.

Një nga talentet më të ndritur të futbollit spanjoll, Lamine Jamal, përjetoi një moment komik e të pazakontë në publik.Teksa ndodhej në një ambient të hapur, disa vajza e ndaluan dhe i kërkuan që tju bënte foto, jo si person i famshëm, por thjesht si një djalë që u duk i përshtatshëm për të shtypur butonin e aparatit.

Në videon e publikuar nga La Gazzetta dello Sport, shihet qartë se askush nga grupi nuk e njeh se bëhet fjalë për sulmuesin 17-vjeçar të Barcelonës dhe të përfaqësueses spanjolle. Kur njëra nga vajzat e pyet për emrin, ai përgjigjet thjesht dhe me buzëqeshje: “Ryan.” (VIDEO)

Pas shkrepjes së fotos, dikush në grup fillon të dyshojë dhe pyet: “A nuk është Lamine Jamal?”

Kjo shkakton një reagim të menjëhershëm dhe gazmor tek të tjerët, të cilat nuk e fshihnin dot habinë dhe entuziazmin që një prej yjeve të futbollit europian ndodhej përpara tyre.

Ky moment, i cili është bërë viral, ka ngjallur reagime të shumta në rrjetet sociale. Përdoruesit kanë vlerësuar thjeshtësinë dhe përulësinë e Jamalit, i cili, pavarësisht famës së madhe dhe presionit të madh të karrierës, duket se i merr gjërat me sportivitet dhe humor.

Ky episod dëshmon edhe një herë se, përkundër miliona ndjekësve dhe vëmendjes së medias, ka ende vende dhe momente kur edhe më të famshmit mund të kalojnë pa u njohur.

Parkimi i automjetit, jo vetëm është kthyer në mision të pamundur, por edhe kushton tepër shtrenjtë në Tiranë. Shpenzimet janë të larta, si për blerje vendesh parkimi të nëndheshme, por edhe për qëndrim ditor dhe mujor të mjetit.

Çmimet për blerjen e posteve në parkim të nëndheshëm në komplekset rezidenciale nisin nga 13 mijë euro dhe arrijnë deri në 60 – 80 mijë euro.

Kryetari i Shoqatës së Ndërtuesve të Shqipërisë, Erjon Harizi, pohon se çmimet e shitjes janë shumë të lidhura me pozicionin gjeografik dhe zhvillimin urban të zonës.

“Në zonat periferike si Kinostudio apo afër Rrugës Bardhyl, çmimet variojnë nga 15,000 deri në 25,000 euro për një post parkimi standard në ndërtimet e reja. Në Unazën e Vogël dhe zonat pak më afër qendrës, çmimet shkojnë nga 20,000 deri në 30,000 euro.

Ndërsa në zonat qendrore si ish-Blloku, Komuna e Parisit, Stadiumi ‘Selman Stërmasi’ dhe rruga e ‘Kosovarëve’, çmimet rriten ndjeshëm, duke arritur nga 25,000 deri në 35,000 euro, me raste të rralla që kalojnë edhe 50,000 – 80,000 euro për vende me akses të kufizuar ose në godina luksoze.

Në ‘Astir’, ku ndërtimi është i dendur por më i ri, çmimet qëndrojnë në mesatarisht rreth 13,000 deri në 18,000 euro”.

Në godinat e reja rezidenciale, ndërtuesit nuk ofrojnë më garazhe të mirëfillta, të mbyllura me qepen, por janë vende apo poste parkime. Duke qenë të nëndheshme nuk lejohet mbyllja e tyre, për shkak të rreziqeve nga rastet e rënies së zjarrit.

Çmime të larta shitje për vende parkimi po ofrohen edhe në zona të tjera të kryeqytetit.

Në objektet rezidenciale në Kashar, çmimi i shitjes së vendeve të parkimit varion nga 8,000 euro, 10,000, 12,000 deri në 15,000 euro çmimi maksimal, sipas ndërtuesit Hajredin Fratari.

Në ndërtimet e reja që pritet të nisin prej tij në zonën e Liqenit të Thatë, çmimet e shitjes së garazheve do të ofrohen nga 25,000 euro.

Për dy objektet e reja, sipërfaqja e banimit do të zërë 5,000 metra katror dhe për parkimet 4,300 metra katror, duke projektuar dy vende parkimi për çdo apartament.

Çmimet e shitjes për zona të tjera

Nga vëzhgimi i “Monitor”, çmimet e shitjes së vendeve të parkimit në zona të ndryshme të kryeqytetit nisin nga 13,000 euro në periferinë e Paskuqanit deri në 60,000 euro në ndërtimin e ri tek ish-Ekspozita.

Në ndërtimet e reja në Paskuqan, parkimet e nëndheshme ofrohen me çmime 13,000 euro.

Në një nga objektet e reja që po ndërtohet në rrugën e “Kokonozëve”, çmimi i shitjes për poste të nëndheshme parkimi është 20,000 euro, sipas zyrës së shitjes. Oferta është e kufizuar.

Në Kinostudio, te kompleksi “Arlis”, sipas zyrës së shitjes, çmimi i shitjes për një vend parkimi është 25,000 euro.

Në rezidencën OXA, në vijën e parë të ndërtimit në Bulevardin e Ri, çmimi i ofruar për një vend parkimi me sipërfaqe 40 metra katror, sipas zyrës së shitjes arrin në 35,000 euro (objekti sapo ka filluar punimet).

Në kompleksin rezidencial “SanPaolo Bulevard”, që po ndërtohet, sipas zyrës së shitjes, çmimet variojnë nga 23,000 deri në 25,000 euro. Objekti është në vijën e dytë të ndërtimit dhe në fazën e karabinasë. Në fazën e gropës, vendet e parkimit u shitën 17,000 euro. Rritja është nga 32 deri në 35%.

Në kulla, çmimet e parkimeve arrijnë 60 mijë euro

Në kullën “Ekspozita Building”, që po ndërtohet në zonën e ish-ekspozitës “Shqipëria Sot”, çmimet e shitjes së posteve të parkimit janë 60,000 euro. Agjentët imobiliarë të agjencisë “Future Home” (agjencia që po shet poste parkimi në këtë objekt të dhëna me klering) pohuan se sipërfaqja e posteve të parkimit është rreth 43 metër katror.

Ndërsa zyra e shitjes për “West Residence”, një objekt i ndërtuar pranë Presidencës, pohoi se shitjet kanë përfunduar, si për poste parkimi edhe për apartamente banimi. Sipas agjencive të shitblerjes së pasurive të paluajtshme, çmimet e shitjes në këtë objekt arritën deri në 60,000 euro.

Rritja e çmimeve, e ndikuar nga kërkesa

Për ndërtuesit, rritja e çmimeve është nxitur nga kërkesa e lartë, për shkak të shtimit të përdoruesve të autoveturave dhe mungesës së hapësirave publike.

“Me këtë shtim të lartë të numrit të makinave në Tiranë, blerja e parkimit është e domosdoshme, pasi edhe hapësirat publike janë të kufizuara dhe nuk ke ku mund të lësh mjetin.

Parkimet publike janë të pakta në numër, ndërsa marrja e gjobave të kushton sa dyfishi i parkimit.

Për rrjedhojë, kërkesa për blerje parkimi është e lartë, duke sjellë edhe rritje të çmimit të shitjes, por edhe të tarifave ditore për qëndrim të mjetit”, thotë ndërtuesi Hajredin Fratari.

Pas vitit 2022, kërkesa për blerje të vendeve të parkimit në objektet rezidenciale në Tiranë është rritur, veçanërisht në zona ku mungesa e tyre është lartë. Interesi në rritje për blerje të vendeve të parkimit për ndërtuesit është arsyeja kryesore e shtrenjtimit të çmimeve të shitjes.

“Në vitet 2010-2022 ka pasur një stok të madh për shitje në lidhje me parkimet, kjo si rezultat që investimet bëheshin vetëm për banim dhe blerja e një parkimi ishte një kosto thjesht e shtuar për blerësin.

Pas këtyre viteve, kërkesa për blerje të parkimeve vazhdoi të rritet, veçanërisht në zonat me mungesë.

Në lagje si: Komuna e Parisit dhe ish-Blloku, ku trafiku dhe fluksi ditor janë të larta, pronarët e apartamenteve kërkojnë gjithnjë e më shumë garazhe për lehtësi personale dhe për të rritur vlerën e pronës.

Ndërkohë, investitorët kanë filluar t’i shohin vendet e parkimit si pasuri të vlefshme, për shkak të mundësisë së qirasë stabël”, pohon zoti Harizi, nga Shoqata e Ndërtuesve.

Në Tiranë llogaritet se dy banorë zotërojnë një makinë

Në Tiranë, në fund të vitit 2024 kishte rreth 330 mijë makina aktive, sipas të dhënave nga Drejtoria e Përgjithshme e Shërbimit Rrugor.

Për një popullsi në Bashkinë Tiranë prej 600 mijë banorë, sipas Censit të fundit të INSTAT (750 mijë për gjithë prefekturën Tiranë), rezulton se ka 500- 550 autovetura, ose një makinë për dy banorë.

Kjo shifër është shumë më e lartë se mesatarja e vendit prej rreth 300 automjete për 1 mijë banorë (ndër më të ulëta në Europë) dhe në linjë me mesataren e Bashkimit Europian.

Në Tiranë është përqendruar numri më i lartë i mjeteve rrugore, duke zënë rreth 35% të totalit të mjeteve rrugore që qarkullojnë në Shqipëri.

Vetëm në vitin 2024, sipas DPSHTRR në Tiranë u regjistruan për herë të parë 41.1 mijë automjete, ose 41% e të gjitha automjeteve të regjistruara në vend (99.4 mijë gjithsej).

Krahas mjeteve të regjistruara në Tiranë, në kryeqytet hyjnë dhe makinat e rretheve, duke rënduar trafikun çdo ditë.

Deri në qershor të vitit 2024 në vend ishin të regjistruara 914 mijë mjete, (nga të cilat 738 mijë ishin autovetura).

Dy vitet e fundit numri i mjeteve të regjistruara në vend është rritur ndjeshëm për shkak të importeve masive nga Koreja e Jugut, që tregton mjete me çmim ekonomik.

Sipas DPSHTRR, në 2024-n u regjistruan për herë të parë 18.8 mijë automjete që kishin origjinën nga Koreja e Jugut, duke kaluar në shtetin më të madh importues, me 19% të totalit.

Shqiptarët, më pak makina se europianët në raport me popullsinë

Shqiptarët vijojnë të kenë më pak se gjysma e makinave në krahasim me mesataren e Bashkimit Europian prej 570 automjetesh për 1,000 banorë.

Sipas të dhënave të Eurostat, në vitin 2023, në Shqipëri kishte 253 makina pasagjerësh për 1 mijë banorë, duke vijuar të renditemi të tretët, duke lënë pas Kosovën që pati 205 mjete për 1 mijë banorë dhe Turqinë me 178 makina për 1 mijë banorë.

Në vitin 2024, ky treguesi, i rishikuar me popullsinë e re të censit dhe numrit të makinave të reja të regjistruara ka arritur në rreth 300, por sërish mbetet ndër më të ulëtit në Europë.

Ndër vendet e rajonit me numrin më të lartë të automjeteve për 1 mijë banorë është Mali i Zi, me 393 makina, dhe Serbia, me 362 makina.

Në vitin 2023, numri mesatar i makinave të pasagjerëve për 1000 banorë në BE ishte 570. Krahasuar me 2022, numri mesatar i makinave të pasagjerëve në vendet e BE-së është rritur 1,2%.

Në Europë, numrin më të lartë të makinave për pasagjerë e kishte Italia, me 694 autovetura, e ndjekur nga Qipro, me 665 autovetura, Finlanda, 664 dhe Islanda, 642./Monitor

Prishtina u trondit ditën e djeshme nga një ngjarje e rëndë që ndodhi në “Rrugën B”, ku dizajneri i njohur kosovar Festim Isufi u gjet pa shenja jete në banesën e tij.

Ngjarja ka shkaktuar pikëllim të thellë në opinionin publik dhe në rrethin artistik ku ai ishte një figurë e njohur dhe shumë e dashur. Festim Isufi është gjetur i vdekur si pasojë e plagëve me thikë, ndërsa gruaja e tij e plagosur me thikë ka shpëtuar dhe ndodhet jashtë rrezikut për jetë.

Ndërkohë, ditën e sotme për vdekjen e Festimit ka reaguar gruaja e tij, Rina, përmes një postimi në Instagram.

Ajo ka ndarë një fotografi me të shoqin, duke i dhënë lamtumirën: Prehu i qetë jeta jem, humbja jote e papritshme na ka lënë me dhimbje të papërshkrueshme. Të du e të kujtoj si njeri të mirë, të buzëqeshur si ishe.

Një ngjarje tragjike është konfirmuar sot në zonën e Holtës, Gramsh, ku dy punëtorë kanë humbur jetën pas rrëshqitjes së një masivi dheu gjatë punimeve në një kantier ndërtimi hidrocentrali.

Sipas njoftimit zyrtar të Policisë, viktimat janë identifikuar si shtetasit Abas Basha 22 vjeç dhe Egzon Lleshi 32 vjeç, të cilët ndodheshin në punë në momentin kur ndodhi fatkeqësia. Masivi i dheut dyshohet të ketë rrëshkitur aksidentalisht, duke i zënë poshtë punëtorët.

Ngjarja ndodhi pranë një kanali që furnizon me ujë hidrocentralin në ndërtim, ndërsa autoritetet policore dhe grupet mjekësore mbërritën menjëherë në vendin e ngjarjes pas marrjes së njoftimit.

Grupi hetimor po vijon punën për të zbardhur plotësisht rrethanat dhe për të dokumentuar ligjërisht këtë ngjarje të rëndë, që vjen vetëm pak ditë pas një tjetër aksidenti fatal në Klos, ku një 29-vjeçar humbi jetën nga shembja e një masivi kromi.