Category: Lajme

Sarah dhe DJ PM i kanë dhënë fund historisë së tyre të dashurisë.

Dyshja ka qenë prej kohësh një nga çiftet më të komentuar në rrjetet sociale, ndërsa prej disa javësh kishin nisur edhe dyshimet se mes tyre diçka nuk po shkonte. “Fakti” që ndezi më shumë aludimet ishte fakti që Sarah dhe PM nuk e ndiqnin më njëri-tjetrin në Instagram.

Ndarjen e ka konfirmuar vetë Sarah. Gjatë një sesioni pyetje-përgjigje në Instagram, një ndjekës e pyeti nëse ajo dhe DJ PM ishin ende bashkë“Jo, ne nuk jemi më bashkë. U bë disa muaj që jemi ndarë (shumë përpara se të dilte lajmi). Disa gjëra janë të shkruara për të mos zgjatur gjithmonë, por e mira është që, kur marrin fund, të ruajmë respekt për njëri-tjetrin”, u shpreh ajo.

Sarah sqaroi se e ndiente të nevojshme ta ndante këtë me publikun për shkak të njerëzve që i kanë ndjekur dhe mbështetur gjatë gjithë rrugëtimit të tyre, që nga ditët e “Big Brother VIP” e deri më sot.

Megjithatë, duket se kjo është e gjitha sa i përket historisë së ndarjes. Sarah nuk ka dhënë detaje mbi arsyet që çuan në fundin e lidhjes dhe nga mënyra si është shprehur, duket se preferon ta lërë këtë pjesë pas.

Pas përfundimit të “Big Brother VIP Albania”, Sarah dhe PM vazhduan lidhjen larg kamerave, por edhe me momente të shumta publike, nga eventet dhe udhëtimet e përbashkëta te postimet në rrjete sociale. Por, pas disa vitesh bashkë, duket se rrugët e tyre janë ndarë.

Qeveria ka ndryshuar procedurat për regjistrimin e objekteve pa dokument pronësie dhe oborreve në përdorim, duke vendosur dy trajtime të ndryshme në varësi të mënyrës se si nis procesi.

Nëse prona evidentohet nga vetë Agjencia Shtetërore e Kadastrës, gjatë kontrolleve dhe regjistrimeve në terren, qytetari mund ta ndjekë procedurën pa paguar tarifën administrative. Por nëse ai vendos të aplikojë vetë në platformën “e-Albania”, duhet të paguajë 10 mijë lekë.

Sipas vendimit të miratuar nga Këshilli i Ministrave, aplikimi individual për kalimin e pronësisë duhet të kryhet online. Tarifa prej 10 mijë lekësh shlyhet në momentin e paraqitjes së kërkesës.

Kjo pagesë nuk kthehet edhe nëse Kadastra, pas shqyrtimit të dosjes, vendos ta refuzojë kërkesën. Qytetari paguan, pra, për zhvillimin e procedurës administrative dhe jo për garantimin e marrjes së dokumentit të pronësisë.

Ndryshe do të veprohet kur procedurën e nis vetë ASHK-ja. Kadastra mund t’i evidentojë këto pasuri gjatë regjistrimit fillestar, përmirësimit të të dhënave të një zone kadastrale ose verifikimeve të organizuara në terren sipas blloqeve të përcaktuara në planveprim.

Në momentin e kontrollit, punonjësit e ASHK-së duhet t’i japin poseduesit formularin për deklarimin e të dhënave dhe ta përfshijnë pronën në procedurën administrative. Për objektet që përdoren si banesa, në këtë rast nuk aplikohet tarifa standarde prej 10 mijë lekësh.

Kjo krijon një ndryshim të drejtpërdrejtë mes qytetarëve. Personi që pret që Kadastra të mbërrijë në zonën e tij mund ta nisë procesin pa tarifë, ndërsa ai që kërkon ta zgjidhë vetë çështjen dhe aplikon menjëherë në “e-Albania” duhet të paguajë shumën e plotë.

Megjithatë, përjashtimi vlen vetëm për tarifën administrative dhe për objektet me funksion banimi të evidentuara nga ASHK-ja. Ai nuk do të thotë se kalimi i pronësisë kryhet në çdo rast pa asnjë pagesë tjetër.

Nëse trualli rezulton pronë private e një personi të tretë, përfituesi mund të detyrohet të paguajë vlerën e tokës sipas çmimit favorizues të përcaktuar nga ligji. Për rrjedhojë, “regjistrim pa tarifë” do të thotë vetëm heqje e pagesës prej 10 mijë lekësh për shërbimin e Kadastrës.

Rregulli i ri mund t’i vendosë qytetarët përpara një zgjedhjeje: të aplikojnë menjëherë dhe të paguajnë një tarifë që nuk rimbursohet, ose të presin që prona e tyre të përfshihet në kontrollet dhe planveprimet e ardhshme të Kadastrës. /skyweb.al

Rikthimii i Borditë të Transaprencës ka sjellë uljen e çmimeve të naftës e benzinës. Nafta është ulur me 10 lekë për litër, në 219 lekë. Rënia më e fortë është për benzinën që ka zbritur në 195 lekë, nga 219 lekë.

Buxheti arkëtoi 18 milionë euro më shumë në mars-korrik, vetëm nga shtrenjtimi i naftës dhe benzinës

Sipas njoftimit zyrtar, Bordi i Transaparencës dhe Kufizimit të Përkohshëm të çmimeve të tregtimit me shumicë/pakicë të nënprodukteve të naftës dhe të gazit, në mbështetje të Vendimit të Këshillit të Ministrave nr. 711, datë 16.09.2026 “Për shpalljen e situatës së veçantë në tregun e hidrokarbureve”, në zbatim të nenit 21/3 dhe nenit 21/5 të Ligjit 8450, datë 24.2.1999 “Për përpunimin, transportimin dhe tregtimin e naftës, të gazit dhe nënprodukteve të tyre”, të ndryshuar, si dhe të Aktit Normativ nr. 1, Datë 3.4.2026 “Për një shtesë në ligjin nr. 61/2012, “Për akcizat në Republikën e Shqipërisë,” të ndryshuar, zhvilloi mbledhjen e parë.

Kështu Bordi i Transparencës në datë 19 Shtator 2026, vendosi:

Çmimi i shitjes me pakicë i nënproduktit gazoil i standardit SSH EN 590 të jetë jo më shumë se 219 lekë/litri, ndërsa i shitjes me shumicë jo më shumë se 207 lekë/litër.

Çmimi i shitjes me pakicë i nënproduktit benzinë e standardit SSH EN të jetë jo më shumë se 195 lekë/litri, ndërsa i shitjes me shumicë jo më shumë se 183 lekë/litër.

Çmimet e caktuara nga Bordi do të hynë në fuqi sot datë 19 ora 16.00 dhe do të jenë të vlefshme deri në mbledhjen e ardhshme të bordit ku do të pasqyrohen ndryshimet e çmimeve të shitjes.

Tërheqim vëmendjen e çdo operatori të shitjes me shumicë dhe pakicë të nënprodukteve të naftës mbi detyrimin e zbatimit të këtij vendimi.

Në rast të shkeljeve të konstatuara nga operatorë të ndryshëm do të vendoset pezullimi i aktivitetit.

Ministria e Ekonomisë dhe Inovacionit sëbashku me Ministrinë e Financave dhe Ministrinë e Infrastrukturës dhe Energjisë janë angazhuar të mbrojnë interesat e konsumatorëve shqiptarë dhe ruajtjes së parimeve të konkurrencës së ndershme në treg, përfundon njoftimi.

Tre ditë më parë, pas rritjes së lartë të çmimeve të naftës dhe benzinës qeveria miratoi vendimin për ringritjen e Bordit të Transparencës së karburanteve.

Një lajm i trishtë ka tronditur botën e muzikës. Ben Saunders, këngëtari holandez që shkroi historinë si fituesi i parë i “The Voice of Holland”, është gjetur i pajetë në moshën 43-vjeçare. Saunders u gjet i vdekur më 15 shtator në Rijkerswoerdse Plassen, një zonë e njohur pranë Arnhem, në Holandë. Sipas autoriteteve, trupi u gjet gjatë një operacioni kërkimi dhe u nxor nga liqeni rreth orës 13:20 me kohën lokale.

Policia holandeze ka konfirmuar ngjarjen, ndërsa ka bërë të ditur se nuk ka dyshime për një vepër penale. Megjithatë, shkaku i vdekjes së këngëtarit nuk është bërë ende publik. Lajmi është konfirmuar edhe nga familja e Saunders. Vëllai i tij, Dean Saunders, ka ndarë në rrjetet sociale një dedikim prekës për të vëllanë.

“Vëllai im i vogël ka ndërruar jetë. Nuk kam përjetuar kurrë një dhimbje të tillë si ajo që po ndiej tani. Çfarë dite e tmerrshme për të gjithë ne”, shkroi Dean, duke shtuar se familja do të duhet të mësojë të jetojë me këtë humbje. Në një tjetër postim, ai i dha lamtumirën të vëllait me fjalët: “Do të jesh gjithmonë në zemrën time.”

Ben Saunders u bë i njohur për publikun në vitin 2011, kur fitoi sezonin e parë të “The Voice of Holland”, duke u bërë kështu fituesi i parë në historinë e gjithë ekskluzivitetit “The Voice”. Programi holandez, i nisur në vitin 2010, do të shndërrohej më pas në një format televiziv të suksesshëm në shumë vende të botës.

Por karriera e tij muzikore kishte nisur shumë më herët. Në vitin 2000, Saunders mori pjesë në programin holandez “Alles voor de band: Follow That Dream” dhe u bë pjesë e grupit Follow That Dream, ku këndonte së bashku me vëllain e tij Dean. Grupi u nda një vit më vonë. Pas triumfit në “The Voice”, Ben publikoi albumet “You Thought You Knew Me By Now” në vitin 2011 dhe “Heart & Soul” në vitin 2012. Më vonë, ai u angazhua edhe në një tjetër pasion, duke hapur së bashku me vëllain e tij një studio tatuazhesh.

Shërbimet sociale në Angli i kanë kërkuar ndihmë publikut për lokalizimin e katër të rinjve shqiptarë të kategorizuar si të “zhdukur”.

Sipas të dhënave të publikuara nga organizata “Missing People” (“Njerëz të Humbur”), të cilave u referohet gazetari i Top Channel Muhamed Veliu njëri prej tyre kërkohet që prej vitit 2018.

Ai është Bledar Ismailaj në kohën e “zhdukjes” ishte 17 vjeç dhe jetonte në zonën e Kings Lynn, Norfolk.

Ervis Ndreca 17 vjeç është një tjetër i ri që kërkohet pasi është larguar nga shërbimet sociale në Hove, East Sussex prej datës 14/07/2022

Nga zona Sussex është shpallur si i “zhdukur” Akil Dervishi edhe ky i moshës 17 vjeç i parë për herë të fundit në 04/05/2022.

Sikurse kërkohet ndihma e publikun në gjetjen e Denis Haliaj 17 vjeç i cili pasi kishte mbërritur në Angli ishte akomoduar në Manchester. Kontakti i fundit me Denisin ishte në 15/08/2021.

Sipas një raporti të BBC të dhjetorit 2022 “deri në 20 për qind e fëmijëve emigrantë shqiptarë që u vendosën pranë një këshilli lokal në Angli në vitin 2022 janë klasifikuar si të zhdukur.

Këshilli rajonal i Kentit pranoi 197 fëmijë emigrantë shqiptarë të pashoqëruar deri më 31 tetor 2022, por shifrat tregojnë se 39 prej tyre janë zhdukur.

Raportet e medias britanike theksojnë se këta fëmijë të konsideruar si të zhdukur janë në risk ekstrem për t’u bërë viktimë e trafikimit njerëzor, skllavërisë moderne, shfrytëzimit për punë në ndërtim ose lavazhe makinash, si dhe shfrytëzimit kriminal në ferma kanabisi ose në rrjetet e shpërndarjes së drogës (“county lines”).

Kjo është 58-vjeçarja Lumturi Patushi, e cila humbi jetën në mënyrë tragjike pasi u godit me thlkë nga bashkëshorti i saj, Hysni Patushi.

Sipas të dhënave të bëra publike për ngjarjen, konflikti mes çiftit dyshohet se nisi për shkak të mungesës së Lumturisë në banesën e tyre. 58-vjeçarja kalonte pjesën më të madhe të kohës në shtëpinë e vajzës së saj, ku kujdesej për katër fëmijët e mitur.

Kjo situatë dyshohet se ka shkaktuar përplasje të vazhdueshme mes bashkëshortëve. Ditën e ngjarjes, Hysni Patushi, i cili sipas raportimeve kishte konsumuar alkool, u largua nga banesa e çiftit në zonën e “Don Boskos” dhe shkoi drejt banesës së vajzës së tyre në “Rrugën Ranorama”, ku ndodhi krimi.

Vrasja ndodhi në prani të nipërve të çiftit, ndërsa pas ngjarjes autori u largua nga vendi i krimit dhe hodhi thikën jashtë pallatit.

Më pas, ai shkoi në Kamëz, ku u takua me një të afërm. Sipas raportimeve, i afërmi e bindi të vetëdorëzohej në polici. Hysni Patushi më pas pranoi autorësinë e krimit dhe gjatë dëshmisë e lidhi përshkallëzimin e konfliktit me konsumimin e alkoolit.

Hetuesit arritën të gjejnë dhe sekuestrojnë edhe thikën e përdorur në krim, me ndihmën e pamjeve të kamerave të sigurisë.

Sipas të dhënave të bëra publike, kjo nuk ishte hera e parë që Patushi akuzohej për dhunë ndaj bashkëshortes. Në vitin 2017 ai ishte arrestuar për dhunë në familje ndaj Lumturisë, me të cilën kishte shtatë fëmijë.

Një 25 vjeçar shqiptar është vràrë me armë zjarri gjatë një tentative vjedhjeje në Baldissero d’Alba, në provincën e Cuneos në Itali.

Mediat italiane raportojnë se i riu shqiptar, kishte hyrë bashkë me disa të tjerë, për të grabitur në një shtëpi fshati në rinovim, por u vra nga pronari italian që qëlloi me armë zjarri në mes të natës kur dërgjoi zhurma.

Ngjarja e rëndë u shënua rreth orës 02:00, dhe pronari 35 vjeçar italian ishte vetëm në shtëpi.

Pasi dëgjoi zhurmat, mori armën që e posedonte me leje dhe qëlloi. Pak çaste më vonë, vetë pronari i shtëpisë telefonoi policinë.

Punonjësit e emergjencës u përpoqën ta shpëtonin të riun shqiptar, por pa sukses.

Një ngjarje e rëndë ka trondìtur Tiranën paraditen e sotme, ku një 68-vjeçar ka vrarë me thikë bashkëshorten e tij 58-vjeçare dhe u arratis.

Policia bën me dije se ka arrestuar Hysni Patushin, 68 vjeç, në zonën e Kamzës.

“Vrau me mjet prerës bashkëshorten, vihet në pranga 68-vjeçari. Në vijim të informacionit paraprak të dhënë pak më parë, bëjmë me dije se, shtetasi H. P., 68 vjeç, i dyshuar se ka goditur me mjet prerës bashkëshorten e tij, shtetasen L. P., 58 vjeçe, e cila si pasojë ka humbur jetën, është lokalizuar dhe vënë në pranga nga shërbimet e Policisë. Grupi hetimor vijon punën për dokumentimin e plotë të rrethanave të rastit”, njofton policia.

Sipas raportimeve, ngjarja ka ndodhur në banesën e çiftit, ndërsa në momentin e krimit në shtëpi ndodheshin edhe dy të mitur, nipër të çiftit, si dhe dhëndri i tyre, i cili jetonte në banesën e vjehrrit.

Mësohet se goditja me thikë ka qenë fatale për 58-vjeçaren Lumturie Patushi, e cila ka ndërruar jetë.

Sipas të dhënave paraprake, çifti kishte pasur probleme edhe më herët. Dy të miturit dhe dhëndri janë marrë në pyetje nga grupi hetimor, në përpjekje për të zbardhur rrethanat e plota të ngjarjes.

Shënim: Çdo person që mund të përmendet në përmbajtjen e këtij artikulli, mbështetur mbi parimin procedural penal dhe atë universal të prezumimit të pafajësisë, konsiderohet i pafajshëm penalisht, nëse nuk ka ose deri kur të ketë një vendim të formës së prerë.

Kryeministri Edi Rama ka ndarë në rrjetet sociale pamje nga aksi rrugor Elbasan–Papër, duke bërë me dije përfundimin e Lotit 2 të këtij segmenti.

Përmes postimit, Rama ka uruar qƴtetarët për një javë të mbarë, duke shoqëruar mesazhin me pamjet e rrugës së përfunduar.

VIDEO

Artan Myrtaj sapo ishte liruar nga burgu kur u qëllua për vdekje pranë zonës së njohur si “Agjencia e Vjetër” në Sarandë, mëngjesin e sotëm. Në ngjarje mbeti i plagosur edhe Xhevdet Skëndaj, një kalimtar i rastit.

Myrtaj, 44 vjeç, i njohur me nofkën “Tani i Ruzhdiut”, kishte precedentë të mëparshëm penalë.

Ai u arrestua në vitin 2025, pasi dyshohej se ishte përfshirë në ngjarjen e ndodhur më 17 korrik 2025, në lagjen nr. 4 të Sarandës, ku u plagosën me armë zjarri Ernest Lama dhe Gëzim Hajdaraj, nga Kamza.

Nga hetimet rezultoi se autori i dyshuar i plagosjes ishte 44-vjeçari Ramadan Zoto.

Ndërsa Artan Myrtaj, Klaus Jacaj dhe Erjon Canaj dyshohej se e kishin ndihmuar Zoton të arratisej pas krimit. Për këtë arsye, ndaj tyre rëndonte akuza e “përkrahjes së autorit të krimit”.

Pikërisht plagosja e dy miqve të Ervis Lamajt, i konsideruar si kreu i një grupi të rrezikshëm kriminal, dyshohet se u bë shkak për nisjen e një sage të përgjakshme hakmarrjeje.

Fillimisht u vra me tritol Isuf Jacaj, babai i Klaus Jacajt. Më pas, tritol iu vendos edhe pronës së Ramadan Zotos.

Ky i fundit ndodhet në paraburgim së bashku me Klaus Jacajn, ndërsa Artan Myrtaj sapo ishte liruar nga burgu kur u ekzekutua mëngjesin e sotëm.

Në kërkim, si i dyshuar për përfshirje në plagosjen e Lamajt dhe Hajdarajt, mbetet vetëm Erjon Canaj.

Shkak i konfliktit mes palëve dyshohet se janë pronat.

Grupi i Ervis Lamajt dyshohet se ka fituar terren në Sarandë dhe se është përfshirë në një sërë ngjarjesh kriminale, përfshirë atentate mafioze dhe zhdukje personash.

Në kuadër të hetimit po verifikohet edhe një pistë që e lidh ngjarjen me atentatin ndaj Rexhep Isamilit, i cili u qëllua në një pikë karburanti.

Po ashtu, në vëmendjen e autoriteteve janë edhe ngjarje të tjera të rënda të viteve të fundit, përfshirë atentatin me tritol ndaj Isuf Jacajt, si dhe zhdukjen e Leonard Thodhorit dhe Fatmir Krasniqit, të cilët rezultojnë të zhdukur që prej vitit 2023.

Megjithatë, deri në këto momente nuk ka një konfirmim zyrtar që i lidh këto ngjarje me ekzekutimin e Artan Myrtajt.

Këto janë pista që po verifikohen nga grupi hetimor dhe autoritetet pritet të përcaktojnë nëse mes ngjarjeve ekziston një lidhje konkrete.

Pas atentatit, në vendngjarje kanë mbërritur forca të shumta policie dhe grupi hetimor, ndërsa janë ngritur pika kontrolli dhe po punohet për identifikimin dhe kapjen e autorëve.

Hetuesit po analizojnë kamerat e sigurisë në zonën ku ndodhi atentati, ndërsa pritet të mblidhen edhe prova të tjera që mund të ndihmojnë në zbardhjen e dinamikës së ngjarjes dhe motivit të ekzekutimit.