Category: Lajme

Dashi

E diela ju sjell mundësi për të kaluar momente të veçanta me njerëzit që doni. Në dashuri, një surprizë e vogël mund t’ju bëjë të buzëqeshni. Beqarët mund të marrin vëmendje nga dikush që nuk e prisnin. Mundohuni të mos e ngarkoni veten me shqetësimet e javës që po lëmë pas.

Demi

Sot do të ndiheni më të qetë dhe më të gatshëm për t’u përqendruar te gjërat që ju bëjnë të lumtur. Në marrëdhënien në çift, një moment romantik mund të sjellë më shumë afërsi. Beqarët mund të kenë një njohje interesante. Një shëtitje ose një takim me miqtë do t’ju ndihmojë të largoni lodhjen.

Binjakët

Kjo e diel mund të sjellë lajme të këndshme dhe biseda që do t’ju përmirësojnë humorin. Në dashuri, është momenti i duhur për të shprehur atë që ndieni. Mos lejoni që keqkuptimet e vogla t’ju prishin ditën. Një ide që ju vjen sot mund të jetë e vlefshme për planet tuaja të ardhshme.

Gaforrja

Do të keni nevojë për më shumë qetësi dhe afërsi me familjen. Disa emocione të mbledhura gjatë ditëve të fundit mund të dalin në sipërfaqe, por një bisedë e sinqertë do t’ju ndihmojë të ndiheni më mirë. Në dashuri, mos kini frikë të tregoni ndjenjat. Kujdesuni për veten dhe mos u merrni me problemet e të tjerëve më shumë sesa duhet.

Luani

Yjet ju nxisin të shijoni ditën dhe të mos mendoni shumë për përgjegjësitë. Në dashuri, mund të përjetoni momente të bukura dhe plot pasion. Beqarët do të kenë mundësi të tërheqin vëmendjen e dikujt të veçantë. Një ftesë e papritur mund ta bëjë këtë të diel edhe më interesante.

Virgjëresha

E diela është një mundësi e mirë për të reflektuar dhe për të lënë pas stresin. Në dashuri, përpiquni të mos analizoni çdo fjalë apo veprim të partnerit. Ndonjëherë, gjërat e bukura ndodhin natyrshëm. Një lajm nga një person i afërt mund t’ju sjellë gëzim dhe t’ju ndryshojë planet për mirë.

Peshorja

Kjo ditë mund t’ju sjellë harmoni dhe emocione të këndshme. Do të ndiheni më të hapur për të kaluar kohë me njerëzit që ju kuptojnë. Në dashuri, një gjest romantik mund të forcojë lidhjen tuaj. Beqarët mund të përjetojnë një afrim të papritur. Mos e lini pas dore një dëshirë personale që e keni shtyrë prej kohësh.

Akrepi

Sot mund të ndiheni më emocionalë se zakonisht, por kjo do t’ju ndihmojë të kuptoni më mirë ndjenjat tuaja. Në dashuri, shmangni debatet për gjëra të vogla dhe përqendrohuni te momentet pozitive. Beqarët mund të marrin një sinjal interesant nga dikush që u pëlqen. Dita është e përshtatshme për pushim dhe reflektim.

Shigjetari

Një energji e re do t’ju shoqërojë gjatë kësaj të diele. Do të keni dëshirë të dilni, të udhëtoni ose të provoni diçka ndryshe. Në dashuri, spontaniteti mund t’ju sjellë momente të paharrueshme. Një takim me miqtë mund të jetë pikërisht ajo që ju nevojitet për ta mbyllur javën me humor të mirë.

Bricjapi

Kjo e diel ju ndihmon të gjeni ekuilibrin mes përgjegjësive dhe jetës personale. Mundohuni të mos mendoni vazhdimisht për punën. Në dashuri, partneri mund të ketë nevojë për më shumë vëmendje dhe përkushtim. Një bisedë e ngrohtë me familjen do t’ju japë siguri dhe qetësi shpirtërore.

Ujori

Do të jetë një ditë e përshtatshme për ide të reja dhe për të kaluar kohë me njerëzit që ju frymëzojnë. Në dashuri, një bisedë e papritur mund të zgjojë emocione që nuk i keni ndier prej kohësh. Beqarët mund të njohin dikë përmes rrethit të tyre shoqëror. Besojini intuitës, por mos nxitoni në vendime.

Peshqit

E diela ju sjell dëshirën për dashuri, qetësi dhe momente të bukura. Mund të ndiheni më të lidhur me partnerin dhe të gjeni kohë për një aktivitet që ju bashkon. Beqarët mund të marrin një vëmendje të veçantë nga dikush. Në aspektin personal, mos harroni se edhe ju meritoni pushim, përkëdhelje dhe kujdes.

Qëndrìmet e disa prej figurave shqiptare me njohje ndërkombëtare pas vendimit të Dhomave të Specializuara në Hagë kanë marrë jehonë edhe në mediat serbe. Në vëmendje kanë qenë veçanërisht futbollisti Granit Xhaka dhe këngëtaret Dua Lipa e Rita Ora.

Të tre kanë përdorur rrjetet sociale për të shpërndarë mesazhe që lidhen me Ushtrinë Çlirimtare të Kosovës dhe katër ish-drejtuesit e saj, Hashim Thaçi, Kadri Veseli, Jakup Krasniqi dhe Rexhep Selimi.

Xhaka publikoi në Instagram një imazh ku shfaqeshin katër ish-krerët e UÇK-së, të shoqëruar me mesazhin: “Luftuan në tokën e tyre, për lirinë e atdheut. Liria ka emër.” Në pjesën e poshtme të postimit shfaqej edhe simbolika e UÇK-së.

Reagimeve iu bashkua edhe Dua Lipa. Këngëtarja rishpërndau postime të babait të saj, Dukagjin Lipa, mes të cilave një imazh me emblemën e UÇK-së dhe mbishkrimin “Liria ka emër”. Në një tjetër postim ajo publikoi të dhëna që lidhen me viktimat dhe pasojat e luftës në Kosovë.

Rita Ora zgjodhi gjithashtu Instagramin për reagimin e saj. Ajo rishpërndau një publikim të “Image of Kosovo”, ku shfaqej emblema e UÇK-së dhe një mesazh që i referohej luftës për Kosovën. Ndryshe nga Xhaka, Ora nuk publikoi një deklaratë të drejtpërdrejtë për aktgjykimin.

Postimet e tyre kanë tërhequr vëmendje edhe jashtë Kosovës, përfshirë raportime kritike në mediat serbe. Në këto raportime, qëndrimet e figurave shqiptare janë interpretuar përmes këndvështrimit të mediave për vendimin e Hagës dhe ish-drejtuesit e UÇK-së.

Kështu, reagimet e Xhakës, Lipës dhe Orës, të shpërndara fillimisht përmes profileve të tyre në rrjetet sociale, janë kthyer në një tjetër pjesë të debatit publik që ka pasuar aktgjykimin ndaj katër ish-krerëve të UÇK-së.

Gazetari Artan Hoxha ka zbuluar shifrat e të ardhurave nga grupet kriminale.

Duke folur për gazetarin Blendi Fevziut, Hoxha solli si shembull një grup nga Elbasani, të njohur në atë periudhë si “Grupi i Dubait”.

Ai deklaroi se ky ishte grupi i parë shqiptar që kishte kaluar kufirin e 1 miliard dollarëve, ndërsa në momentin kur u godit nga autoritetet kishte arritur, në mbi 3 miliardë dollarë fitime.

“Grupi i parë shqiptar që kaloi 1 miliard dollarë. Dhe në momentin kur u godit i kishte kaluar mbi 3 miliardë dollarë”, deklaroi Artan Hoxha.

Edhe pse gazetari nuk e tha, bëhet fjalë për grupin e drejtuar nga Franc Çopja, tashmë i ekstraduar në Belgjikë për vrasjen e Arjan Spahiut dhe Hajdar Çopja, rezident në Dubai.

Sipas gazetarit, përmasat financiare të grupit kishin tërhequr edhe vëmendjen e autoriteteve belge, të cilat kishin bërë përpjekje të mëdha për të kapur personin që lidhej me të. Hoxha tregoi se informacionet e siguruara nga autoritetet e huaja flasin edhe për blerjen e një sasie prej një ton ari, në lingota dhe monedha, pasuri që dyshohet se mund të jetë futur në Shqipëri.

“Në momentin kur është goditur, autoritetet belge kanë lëvizur çdo gur për ta marrë me patjetër atë person. Dhe kemi të bëjmë me një grup që të paktën nga informacionet që janë siguruar nga autoritetet e huaja, dhe po e kërkojnë… si the ti për thesarit, ishte thesari i Kartelit të Medellinit, se s’është gjetur akoma. Por të paktën, ka blerë 1 ton ar, në lingota dhe në monedha, e cila mendohet që është pasuri që mund të jetë futur në Shqipëri. Pjesa tjetër pastaj janë blerë, është blerë një makineri për prerje diamantesh, por nuk janë gjetur diamantet dhe rezervat e tjera. Dhe pjesa tjetër, investimi tjetër që ai ka bërë është, përveç Shqipërisë, se Shqipëria është një, si të them, një treg i vogël”, deklaroi Hoxha.

Hoxha vijoi duke thënë se Shqipëria ishte një treg tepër i vogël për përmasat financiare që kishte arritur një grup i tillë. Sipas tij, një pjesë e konsiderueshme e parave ishte orientuar drejt Dubait, veçanërisht në sektorin e pasurive të paluajtshme dhe të ndërtimit.

“Është treg shumë i vogël për një lloj investitori të tillë. Por në Dubai, në nëntor, në tetor të vitit 2022, ai kishte një investim prej 260 milionë dollarësh në real estate dhe në ndërtim”, u shpreh Hoxha.

Gazetari tregoi gjithashtu se grupi kishte rënë në sy të autoriteteve për shkak të shpejtësisë me të cilën kishte krijuar pasurinë dhe sasive të mëdha të parave që kishte arritur të gjeneronte.

“Ky ka qenë grupi që ra më shumë në sy sepse u bë i pasur shumë shpejt dhe kaloi sasi”, deklaroi Hoxha

Emri i Alket Rizait, i shumëkërkuari pas arratisjes nga burgu ku mbahej, është rikthyer në vëmendje në Greqi edhe për një tjetër çështje të rëndë.

Bëhet fjalë për vrasjen e një të burgosuri në burgun e Domokosit më 15 shkurt 2026, ku dëshmitë dhe materialet hetimore dyshohet se e vendosin Rizain në zonën ku ndodhi krimi.Sipas televizionit grek SKAI, viktima, Antonis Papadatos, u vra me tre plumba brenda ambienteve të burgut. Për vrasjen është akuzuar një shtetas bullgar, i dënuar me burgim të përjetshëm, i cili ka marrë përsipër autorësinë e krimit.

Çështja, megjithatë, mbetet e hapur për sa i përket rrethanave të plota të ngjarjes. Në paraburgim ndodhet edhe drejtuesi i burgut të Domokosit, i cili ishte i pranishëm në momentin e vrasjes dhe më pas u mor në pyetje nga policia.

Dëshmitë që përmendin Alket RizainSipas dëshmive të përfshira në dosje, Rizai dyshohet se ndodhej në zonën e burgut në momentin kur ndodhi vrasja. Një punonjës i burgut ka deklaruar se dëgjoi të shtënat dhe më pas pa Alket Rizain duke dalë nga zona e burgut të vjetër.

Në pamjet e kamerave të sigurisë, sipas raportimeve të SKAI-t, Rizai shihet duke lëvizur drejt zonës kryesore të burgut, i shoqëruar nga persona të tjerë.

Sipas kronologjisë së rindërtuar nga hetuesit, pak para vrasjes, i burgosuri bullgar i kërkoi Papadatosit të dilte nga qelia dhe ta ndiqte. Të dy kaluan nëpër korridoret që çonin drejt pjesës kryesore të burgut.

Më pas, në zonën e administratës, ndodheshin viktima, i burgosuri bullgar dhe drejtuesi i burgut. Sipas materialeve të publikuara nga mediat greke, kjo zonë konsiderohet një pikë e verbër e kamerave të sigurisë.

Aty, Papadatos u qëllua tre herë, një herë në pjesën e pasme të kokës dhe dy herë në fytyrë.

Pretendimi i autorit të dyshuar për vrasjen

I burgosuri bullgar, i cili ka marrë përsipër vrasjen, ka dhënë një version tjetër të ngjarjes. Sipas tij, Papadatos kishte tentuar të vriste drejtuesin e burgut me një revolver që e kishte fshehur në veshje.

Ai pretendon se ndërhyri për t’i marrë armën dhe se gjatë përleshjes ajo u shkrep, duke shkaktuar plagët fatale të Papadatosit.

Megjithatë, sipas raportimeve të medias greke, hetuesit dyshojnë se ngjarja mund të ketë qenë një ekzekutim i porositur dhe jo një incident i rastësishëm.

Rizai mohon përfshirjen

Vetë Alket Rizai ka mohuar të ketë qenë i përfshirë në vrasje. Ai ka deklaruar se nuk ndodhej në burgun e vjetër në momentin kur ndodhi krimi dhe se nuk kishte arsye për të ndërhyrë në një ngjarje të tillë.

Megjithatë, sipas raportimeve, gjatë hetimeve janë gjetur gjurmë gjaku në këpucët e tij dhe gjurmë baruti në rrobat e tij.

Sipas dosjes, Rizai nuk është akuzuar për vrasjen dhe në këtë çështje konsiderohet dëshmitar.

Ndërkohë, avokati i drejtuesit të burgut, Dimitris Gavelas, ka deklaruar se klienti i tij ndodhej në vendin e ngjarjes, por sipas tij nuk kishte mundësi ta parandalonte atë. Ai ka thënë se mbrojtja do të mbështetet në atë që rezulton nga dosja e çështjes.

Por Alket Rizai ende eshte në kërkim pas arratisjes

Emri i Alket Rizait është rikthyer në vëmendje edhe për shkak të arratisjes së tij nga burgu, ndërsa autoritetet greke vijojnë kërkimet për gjetjen e tij. Gjithashtu, ai dyshohet se ka qenë i përfshirë në një incident me të shtëna në një bar plazhi në Anavyssos.

Sipas informacioneve të raportuara në Greqi, një prej pistave të hetimit lidhet me mundësinë që Rizai të ketë kaluar drejt Shqipërisë përmes veriut të Greqisë. Megjithatë, kjo mbetet një hipotezë e hetuesve dhe nuk është konfirmuar zyrtarisht.

Një aksident i rëndë ka ndodhur në mëngjesin e sotëm në San Donà di Piave, pranë Venedikut, ku 42-vjeçarja shqiptare, mamaja e tre fëmijëve e identifikuar si Lavdije Istrefi, është përplasur nga një kamion plehrash.

Përplasja rezultoi fatale për të, pasi shqiptarja humbi jetën në vendngjarje.

Ngjarja merr përmasa më tragjike pasi mësohet se aksidenti ndodhi para syve të vajzës 9-vjeçare të shqiptares.

Sakaq, mediat italiane shkruajnë se kamioni i plehrave po kthehej djathtas në një rrugë anësore në kryqëzimin me Via Paolo VI kur mori përpara shqiptaren.

42-vjeçarja po dërgonte vajzën e saj në shkollë, kur papritmas kamioni i plehrave i mori jetën. Fatmirësisht raportohet se vogëlushja e saj e kishte kaluar rrugën e gëzon shëndet të plotë, ndërsa thuhet se është në gjendje shoku pasi pa mamanë e saj duke dhënë frymën e fundit.

Vdekja e shqiptares bëhet akoma më tronditëse pasi mësohet se shkaku i aksidentit fatal që i mori jetën janë bërë pasqyrat e kamionit, të cilat nuk mundësonin një pamje të qartë.

Ndërsa raportohet se në vendngjarje dolën menjëherë autoritetet vendase të cilat punuan për të ngritur me vinç kamionin për të nxjerrë nga shqiptaren, duke ngritur dyshimet se Lavdije Istrefi pas përplasjes ngeci nën rrotat e mjetit të tonazhit të rëndë.

Aksidenti i shqiptares ka tronditur të gjithë sidomos personat që ishin të pranishëm në vendngjarje dhe stafin e shkollës së vajzës së saj, e cila raportohet se ditën e sotme, të tronditur për vdekjen e shqiptares kanë pezulluar mësimin.

Një ngjarje e rëndë ka ndodhur në Libi, ku një avion i cili sapo ishte ulur, u përfshi nga flakët.

Avioni privat Cessna Citation shpërtheu në flakë kur doli nga pista pas uljes në në Aeroportin Ndërkombëtar të Misratës.

Në bordin e avionit ndodheshin tre persona, një pasagjer dhe dy pilotët, ndërsa mediat raportojnë se askush nuk mbeti i lënduar.

Sa i përket pilotëve, prokurorët ngritën dyshimet se të dy ishin nën efektin e alkoolit dhe janë vendosur menjëherë nën hetime./Top Channel

Qeveria propozoi të krijojë rezervën strategjike të naftës në pronësi të shtetit shqiptar, por një pjesë e kostos së saj do të përballohet nga operatorët privatë, të cilët pritet që këtë kosto ta transferojnë në çmimin final të pakicës.

Edhe vetë qeveria ka ranuar në raport e saj se sigurimi i fondeve do të kërkojë, ndër të tjera, vendosjen e tarifës që do të aplikohet mbi sasitë e produkteve energjetike hidrokarbure, çka do të sjellë rritje të ngarkesës financiare në zinxhir dhe do të reflektohet në rezultatin final të çmimit të shitjes te konsumatori.

Rezerva synon të përdoret në raste emergjencash, kur importet mund të ndërpriten dhe vendi ka nevojë të garantojë furnizimin me karburant për shërbime jetike, si ambulancat apo mjetet e ushtrisë.

Projektligji, në nenin 8, përcakton se rezerva do të krijohet përmes depozitimit të naftës nga një Autoriteti shtetëror që do të krijohet dhe në marrëveshje me operatorë privatë të licencuar. Në këtë mënyrë, kompanitë private do të ngarkohen të depozitojnë fizikisht karburant për llogari të shtetit, me qëllim krijimin e rezervës së sigurisë.

Por përveç detyrimit për depozitimin fizik të produktit, operatorët do të ngarkohen edhe me një pagesë të përcaktuar në projektligj si “tarifa e rezervës së sigurisë”. Kjo tarifë do të shkojë në një fond që do të përdoret për mbulimin e shpenzimeve të krijimit të rezervës fizike, mirëmbajtjes, monitorimit dhe kostove të tjera të skemës. Ndërsa pjesa tjetër e shpenzimeve për mirëmbajtjen e rezervës, sipas draftit do të mbulohen edhe përmes kredive, të ardhurat nga buxheti i shtetit, të ardhurat nga shitja e rezervave etj.

Shoqata e Hidrokarbureve ngre shqetësime për mënyrën se si qeveria parashikon ta financojë modelin e ri të propozuar për krijimin e sigurisë së naftës.

Sipas tyre, drafti nuk përcakton asnjë kosto se sa do të kushtojë blerja e karburantit për rezervën, magazinimi dhe rinovimi i stokut, ndërsa mbetet i paqartë edhe trajtimi i humbjeve në rast se çmimi i karburantit bie pasi rezerva është blerë.

Projektligji përcakton një tarifë mbi produktet hidrokarbure të akcizës, për të cilën Shoqata e Hidrokarbureve argumenton së pari, se kjo pagesë nuk mund të konsiderohet si tarifë për një shërbim, pasi nuk bëhet fjalë për një shërbim që shteti i ofron kompanive, por për financimin e një detyrimi publik përmes një tarife të vendosur mbi karburantet.

Kjo pagesë, sipas Shoqatës të Hidrokarbureve do të kthehet në një kosto shtesë për konsumatorin, pasi do të përfshihet në çmimin e karburantit. Për këtë arsye Shoqata e Hidrokarbureve e konsideron “taksë të fshehtë”, antikushtetuese pasi niveli i saj nuk do të miratohet nga Parlamenti, por nëpërmjet vendimit të ministrive të linjës.

Ndërkohë në muajin tetor të vitit 2025, Qeveria miratoi projektligjin për krijimin e rezervave të sigurisë së naftës, por një dokument zyrtar që shoqëroi nismën gjatë fazës së konsultimit përcaktonte qartë se tarifa për financimin e skemës do të ndikojë në çmimin final të karburanteve.

Raporti i Vlerësimit të Ndikimit, i hartuar nga Ministria e Infrastrukturës dhe Energjisë gjatë fazës së konsultimit, evidenton një efekt potencial të drejtpërdrejtë në çmimin që paguhet në treg.

Dokumenti analizon disa alternativa dhe përcakton si opsion të preferuar Opsionin 1, hartimin dhe miratimin e një ligji të ri për rezervat e sigurisë.

Në analizën e ndikimeve të politikës, Ministria parashikon se krijimi dhe funksionimi i sistemit do të financohet, ndër të tjera, përmes një tarife mbi sasitë e produkteve hidrokarbure.

“Sigurimi i fondeve do të kërkojë, ndër të tjera, vendosjen e tarifës që do të aplikohet mbi sasitë e produkteve energjetike hidrokarbure”, thuhet në raport. Sipas të njëjtit dokument, kjo do të sjellë rritje të ngarkesës financiare në zinxhir dhe do të reflektohet në rezultatin final të çmimit të shitjes te konsumatori.

Më tej, në pjesën ku analizohen kostot për bizneset, raporti është edhe më i drejtpërdrejtë. Ai parashikon vendosjen e tarifës mbi produktet hidrokarbure që i nënshtrohen akcizës dhe shton se “kjo do të ndikojë në çmimin final të shitjes së nënprodukteve në tregun vendas”.

Edhe përmbledhja ekzekutive e raportit parashikon tarifa financiare për bizneset. Sipas saj, këto kosto vlerësohen si minimale dhe tarifat do të mblidhen pasi produkti të jetë shitur për konsumatorin final.

Raporti nuk jep një përllogaritje se sa mund të jetë efekti në lekë për litër. Niveli i tarifës nuk përcaktohet në vlerësimin e ndikimit dhe kostot nuk janë kuantifikuar, diçka që nuk e bën ende te mundur të përcaktohet ndikimi real i rritjes së çmimit.

Vetë mekanizmi gjithsesi ishte parashikuar që në fazën e konsultimit: Ministria e Infrastrukturës dhe Energjisë, së bashku me Ministrinë e Financave, do t’i propozonin Këshillit të Ministrave tarifën për krijimin dhe mbajtjen e rezervës së sigurisë, të aplikuar mbi produktet hidrokarbure që i nënshtrohen akcizës.

Edhe pa këtë taksë, Shqipëria, ndër vendet më të varfra të Europës është e treta më e shtrenjë në vlerë, me naftën që tregtohet aktualisht në gati 2.5 euro, në nivele gati të njëjta me Norvegjinë dhe Danimarkën. E matur sipas guqisë blerëse, nafta është 2.6 herë më e shtrenjtë se mesatarja europiane.

Arsyeja kryesore lidhet me barrën e rëndë të taksave, që përbëjnë gati gjysmën e çmimit, nga rreth 30% që e ka rëndesën rajoni, teksa ky i fundit ka zbatuar vazhdimisht dhe lehtësi fiskale. Por, në vend të që ulët taksat, qeveria, në kulmin e krizës, ndërmori një veprim që pritet të rrisë edhe më tej çmimin./Monitor

Një aksident i rëndë rrugor me tre viktima shqiptare është regjistruar në orët e para të mëngjesit të së enjtes në Glyfada të Athinës.

Ngjarja ndodhi rreth orës 02:00 në bulevardin Poseidonos, pranë kryqëzimit me rrugën Kalypsous, në drejtim të Athinës. Në automjet udhëtonin pesë persona, kur për shkaqe që po hetohen, drejtuesi humbi kontrollin dhe makina doli nga rruga, duke u përplasur me forcë me një mur betoni pranë një hoteli.

Goditja ishte e fuqishme dhe automjeti pësoi dëmtime të mëdha. Për nxjerrjen e personave të bllokuar në makinë u desh ndërhyrja e forcave zjarrfikëse. Tetë efektivë, të mbështetur nga tre automjete dhe pajisje të posaçme, morën pjesë në operacionin e shpëtimit.

Tre nga pesë personat që ndodheshin në automjet nuk mundën t’u mbijetonin plagëve të marra. Sipas informacioneve të bëra publike nga autoritetet greke, dy prej viktimave janë të rinj të moshës 23 dhe 26 vjeç, ndërsa identiteti i viktimës së tretë nuk ishte bërë ende publik në raportimet e para.

Dy personat e tjerë që ndodheshin në makinë, të dy 18 vjeç, u dërguan me urgjencë në spital. Njëri prej tyre raportohet se ndodhet në gjendje kritike dhe është intubuar, ndërsa 18-vjeçari tjetër ka pësuar dëmtime të shumta dhe po mbahet nën kujdesin e mjekëve.

Autoritetet greke kanë nisur hetimet për të përcaktuar rrethanat e plota të aksidentit. Mediat vendase raportojnë se një nga pistat që po shqyrtohet është mundësia që automjeti të ketë qenë i përfshirë në një garë shpejtësie me një makinë tjetër.

Një tjetër element që po verifikohet është nëse të rinjtë po regjistronin një video për TikTok në momentet përpara përplasjes. Këto dyshime mbeten pjesë e hetimit dhe ende nuk janë konfirmuar përfundimisht nga autoritetet.

Kryeministri Edi Rama së bashku me ministren Delina Ibrahimaj dhe ministrin e Financave Petrit Malaj zhvilloi një takim me përfaqësues të supermarketeve dhe furnitorëve kryesorë në vend, në kuadër të nismës për rritjen e transparencës mbi çmimet e produkteve.

Në fokus të takimit ishte platforma e re digjitale “Price Ëatch Albania”, e njohur si “Pasqyra e Çmimeve”, e cila pritet të vihet së shpejti në funksion.

Platforma synon t’u mundësojë qytetarëve një pasqyrë më të qartë mbi çmimet e produkteve në treg dhe ndryshimet e tyre.

Gjatë fjalës së saj, ministrja Delinda Ibrahimaj, u ndal te ecuria e kursit të këmbimit dhe ndikimi i tij në çmimet e konsumit.

Ajo tha se forcimi i lekut kundrejt valutave të huaja duhet të ishte reflektuar edhe në uljen e çmimeve.

Gjatë viteve të fundit kemi pasur rritje çmimesh, kryesisht nga tregu i jashtëm. Kemi pasur iniciativa të përbashkëta për të ulur çmimet. Ne nuk kemi në dorë të afekjtojmë tregun ndërkombëtar, por të jemi transparent me publikun shqiptar. Në vitet e fundit ne kemi parë dukuri që duhet të kishin ndikuar në uljen e çmimit. Forcimi i lekut dhe rënia e euros duhet të kishte ndikuar e të ishin produktet më lirë. Inflacioni në 6 mujorin e parë ka qenë në rënie. Produktet vendase janë më të shtrenjta. Supermareteve u la kohë 2 javë dhe vetëm njëri kthehu përgjigje për çmimet e produkteve në rafte. Duke ndjekur shembullin e Greqisë, për një listë produktesh marketet ti shisnin më lirë dhe ti mbanin këto çmime deri në fund të vitit.

Kompanitë duhet të mendojnë për të mirën publike dhe të mirën e konsumatorit, kur kemi çmime të rritura dhe mbi mesataren e rajonit.

Kryetari i pezulluar i Bashkisë së Tiranës, Erion Veliaj, është transportuar mesditën e sotme me ambulancë nga burgu i Durrësit drejt një spitali privat në kryeqytet.

Lëvizja e tij vjen ndërkohë që të gjitha shkallët e gjyqësorit kanë rrëzuar kërkesat e tij për zbutjen e masës së sigurisë “arrest me burg”.

Deri më tani nuk janë bërë të ditura shkaqet zyrtare të këtij shtrimi shëndetësor apo nëse bëhet fjalë për një kontroll rutinë.

Më parë, Veliaj kishte lënë qelinë për një ndërhyrje mjekësore, pas së cilës u rikthye sërish në ambientet e vuajtjes së dënimit nën shoqërimin e forcave të policisë.