Lajme Flesh

Në bazën ajrore të Tanagras në Greqi, u dha alarmi kur katër shtetas kinezë u panë nga autoritetet ushtarake helene duke fotografuar instalime ushtarake të ndjeshme në zonë.

Lëvizjet e tyre u konsideruan të dyshimta dhe ngritën “hije” spiunazh , pasi midis gjërave që ata regjistruan ishin avionët luftarakë Rafale.

Sipas informacioneve, katër kinezët – dy burra, një grua dhe një i ri – u vunë re fillimisht nga Siguria e Industrisë Hapësinore Helenike (EAI), e cila u kërkoi atyre të largoheshin nga zona. Megjithatë, ata shkuan në një urë aty pranë dhe vazhduan të fotografonin instalimet e ushtrisë greke dhe të Krahut të 114-të të Luftëtarëve, duke injoruar rekomandimet.

Forcat Ajrore të Krahut të 114-të u njoftuan menjëherë. Ato ndërhynë dhe gjetën individët, duke kryer më pas arrestimin e tyre. Më pas, kinezët iu dorëzuan policisë dhe u dërguan në stacionin e policisë së Tanagrës.

Informacionet fillestare tregojnë se ata kishin në zotërim një sasi të konsiderueshme materialesh fotografike nga zona, ndërsa po shqyrtohet nëse ky është një incident i izoluar apo një veprim me karakteristika të regjistrimit sistematik.

Rasti po hetohet me seriozitetin e duhur nga pala greke, ndërsa gjetjet janë vënë tashmë nën vlerësim nga shërbimet kompetente të sigurisë.

Emmanuel Macron nuk harroi të përdorte sharmin e tij francez gjatë banketit të së martës, ku gjendeshin plot të famshëm.

Gjatë kohës që bisedonte me Kate Middleton, ai u pa duke i shkelur syrin princeshës.

Kjo e fundit ishte veshur mjaft elegante me një fustan të kuq dhe një  kurorë magjepsëse, ndërsa iu bashkua princit William dhe mbretit Charles për të mirëpritur presidentin francez në Kështjellën Windsor.

Emmanuel Macron u ul midis Charles dhe Kate, ndërsa Brigitte, e cila kishte veshur një fustan të gjatë të kaltër, u gjend midis Camilla dhe princit William.

Për Kate, ky ishte banketi i parë shtetëror pas 18 muajsh si dhe pas shërimit të saj nga kanceri.

Në banket morën pjesë rreth 160 të ftuar, mes tyre princi Edward dhe Sophie, dukesha e Edinburgut.

Ndër të famshmit ishin Mick Jagger, Sir Elton John, kryeministri Keir Starmer me të shoqen, aktorja Kristin Scott Thomas etj.

Të ftuarit u ulën në një tavolinë 50 metër të gjatë, e cila ishte zbukuruar me kujdes brenda gjashtë ditëve.

Në dekor u përdorën lule dhe bimë nga kopshtet mbretërore.

Galeria fotografike (

1 / 5

)

Nga dhënia e mbështetjes për financimet e sistemeve të ujitjes në pemëtore, ullishte apo vreshta, deri te dhënia paraprake e financimit prej 30% nëse jepet garancia nga një shoqëri sigurimi apo bankë, si dhe mbulim të investimeve deri në masën 15 mln lekë për ha nëse investohet për shtim serrash diellore për kultivim të perimeve, luleshtrydheve dhe rrushit, janë ndër masat e reja që i shtohen skemës kombëtare për bujqësinë.

Qeveria ka bërë disa shtesa në VKM nr. 150, datë 6.3.2025, “Për përcaktimin e kritereve bazë të sektorëve që do të mbështeten dhe të masës së financimit nga fondi i programit për bujqësinë e zhvillimin rural, për vitin 2025”, me qëllim rritjen e mbështetjes për investime në bujqësi.

Konkretisht vendimi i ndryshuar i botuar në Fletoren Zyrtare përfshin masa të reja financimi me përfitim 50% të vlerës totale të faturës tatimore, por jo më shumë se 15 mln lekë për ha për ndërtimin e serrave të reja diellore me perime ku të jetë i përfshirë edhe instalimi i sistemit të ujitjes

Ndërsa për ngritjen e serave të reja të prodhimit të rrushit mbështetja financiare arrin deri në 8 mln lekë për ha dhe 4 mln lekë për ha për serrat e reja të prodhimit të luleshtrydheve. Për mbjelljet e reja të pemëve frutore, ullinjve, agrumeve dhe vreshtave. Financimi të bëhet për sipërfaqe jo më pak se 0,5 ha dhe jo më shumë se 10 ha. Masa e përfitimit të jetë në 50% të vlerës totale të faturave tatimore, por jo më shumë se 800 mijë lekë/ha.

Po ashtu shtohet mbështetja për sistemet e ujitjes me pika dhe mbrojtjen nga breshëri: Fermerët që instalojnë sisteme moderne ujitjeje dhe rrjeta mbrojtëse për pemë dhe vreshta do të marrin subvencione nga 250 mijë lekë për ha deri në 1,5 mln lekë për ha.

Me financim do të mbështeten edhe fermerët që investojnë për ngritjen e linjave të përpunimit dhe etiketimit të perimeve, rrushit dhe verës, ullirit dhe vajit të ullirit në 50% të vlerës totale të faturave tatimore, por jo më shumë se 7,5 mln lekë për subjekt.

Do të mbështeten edhe investimet në agroturizëm me një masë përfitimi në 50% të vlerës totale të faturave tatimore, por jo më shumë 15 mln lekë për subjekt. Edhe për akuakulturën detare për koshat e rritjes së peshkut (vetëm për koshat dhe rrjetat), masa e përfitimit do të jetë në 50% të vlerës totale të faturave tatimore, por jo më shumë se 15 mln lekë për subjekt.

Në vendimin nr. 150, datë 6.3.2025, të Këshillit të Ministrave, “Për përcaktimin e kritereve bazë, të sektorëve që do të mbështeten dhe të masës së financimit nga fondi i programit për bujqësinë e zhvillimin rural, për vitin 2025”, bëhen shtesat e mëposhtme:

1. Në pikën 1, pas shkronjës “ç” shtohet shkronja “d”, me këtë përmbajtje: “d) mbështetjen e investimeve për rritjen e kapaciteteve prodhuese në ferma, përpunimin / tregtimin e produkteve bujqësore, si dhe zhvillimin e agroturizmit dhe të akuakulturës.”.

2. Në pikën 2.3 shtohet paragrafi, me këtë përmbajtje: “Përfituesve të financimit nga masat e mbështetjes së investimeve pas lidhjes së kontratës u paguhet paraprakisht deri në 30% të masës së financimit të kontraktuar, kundrejt garancisë së pagesës së lëshuar nga shoqëri sigurimi dhe/ose banka.”.

3. Pas pikës 2.3 shtohet pika 2.4, me këtë përmbajtje: “2.4. Mbështetje për investime për: a) ndërtimin e serrave diellore të reja për perime, luleshtrydhe dhe rrush tavoline, përfshirë edhe instalimin e sistemit të ujitjes, me sipërfaqe minimale 0.2 ha dhe sipërfaqe maksimale 2 ha.

Masa e përfitimit të jetë në 50% të vlerës totale të faturave tatimore, por jo më shumë se: – 15 000 000 (pesëmbëdhjetë milionë) lekë/ha për serrat e prodhimit të perimeve; – 8 000 000 (tetë milionë) lekë/ha për serrat e prodhimit të rrushit për tavolinë; – 4 000 000 (katër milionë) lekë/ha për serrat (tunelet plastike) të prodhimit të luleshtrydheve. b) mbjelljet e reja të pemëve frutore, ullinjve, agrumeve dhe vreshtave. Financimi të bëhet për sipërfaqe jo më pak se 0,5 ha dhe jo më shumë se 10 ha. Masa e përfitimit të jetë në 50% të vlerës totale të faturave tatimore, por jo më shumë se 800 000 (tetëqind mijë) lekë/ha.

Përfitojnë pagesë shtesë fermerët që instalojnë sistemet e ujitjes me pika. Masa e përfitimit të jetë në 50% të vlerës totale të faturave tatimore, por jo më shumë se 250 000 (dyqind e pesëdhjetë mijë) lekë/ha.

c) rrjeta për mbrojtjen e prodhimit nga breshëri në blloqet ekzistuese me pemë frutore, agrume dhe vreshta. Masa e përfitimit të jetë në 50% të vlerës totale të faturave tatimore, por jo më shumë se 1 500 000 (një milion e pesëqind mijë) lekë/ha. Financimi të bëhet për sipërfaqe jo më pak se 1 (një) ha dhe jo më shumë se 5 (pesë) ha.

ç) sistemet e ujitjes me pika në pemëtore, ullishte, agrume dhe vreshta ekzistuese. Masa e përfitimit të jetë në 50% të vlerës totale të faturave tatimore, por jo më shumë se 250 000 (dyqind e pesëdhjetë mijë) lekë/ha. Financimi të bëhet për sipërfaqe jo më pak se 1 (një) ha dhe jo më shumë se 10 ha.

d) ndërtimin e ambienteve të reja për mbarështimin e kafshëve dhe të stabilimenteve për rritjen e shpendëve, përfshirë pajisjet/sistemet e nevojshme, me kapacitet jo më pak se 10 (dhjetë) lopë, jo më pak se 100 (njëqind) të imëta, jo më pak se 10 (dhjetë) dosa dhe jo më pak se 10 000 (dhjetë mijë) shpendë. Masa e përfitimit të jetë në 50% të vlerës totale të faturave tatimore, por jo më shumë se 15 000 000 (pesëmbëdhjetë milionë) lekë për subjekt.

dh) mekanizimin dhe modernizimin e proceseve të punës në fermat bujqësore e blegtorale. Masa e përfitimit të jetë në 50% të vlerës totale të faturave tatimore, por jo më shumë se 5 000 000 (pesë milionë) lekë për subjekt.

e) linja/makineri/pajisje për përpunimin, seleksionimin, paketimin dhe etiketimin e perimeve, frutave, rrushit dhe verës, ullirit dhe vajit të ullirit në 50% të vlerës totale të faturave tatimore, por jo më shumë se 7 500 000 (shtatë milionë e pesëqind mijë) lekë për subjekt.

ë) investime në agroturizëm me një masë përfitimi në 50% të vlerës totale të faturave tatimore, por jo më shumë 15 000 000 lekë (pesëmbëdhjetë milionë) për subjekt. f) akuakulturën detare për koshat e rritjes së peshkut (vetëm për koshat dhe rrjetat).

Masa e përfitimit të jetë në 50% të vlerës totale të faturave tatimore, por jo më shumë se 15 000 000 (pesëmbëdhjetë milionë) lekë për subjekt.

Fondi total për mbështetje për investime të jetë në vlerën 2 (dy) miliardë lekë dhe të përdoret për vitin 2025 deri në 537,8 milionë lekë të akorduara në programin buxhetor 04250, “Zhvillimi rural duke mbështetur prodhimin bujqësor, blegtoral, agroindustrinë dhe marketingun”, në shpenzime korrente, duke vijuar plotësimin e vlerës së plotë në buxhetin e vitit 2026, si pjesë e PBA-së 2026–2028.”

II. Ngarkohet Ministria e Bujqësisë dhe Zhvillimit Rural për zbatimin e këtij vendimi. Ky vendim hyn në fuqi pas botimit në Fletoren Zyrtare./ Monitor

Presidenti i SHBA-së, Donald Trump, zbuloi një vit më parë në një takim privat me donatorët se kishte kërcënuar të “bombardonte Moskën” për të dekurajuar Presidentin rus Vladimir Putin nga objektivi i tij për të pushtuar Ukrainën. CNN raporton se ka siguruar një seri regjistrimesh audio që lidheshin me takimet me donatorët e mbajtura në vitin 2024 nga kandidati i atëhershëm republikan për zgjedhjet presidenciale të atij viti.

“I thashë Putinit, “nëse hyn në Ukrainë, do ta bombardoj Moskën”. “Nuk kam zgjidhje tjetër’”, thotë Trump në një nga regjistrimet. “Dhe ai tha: “Nuk të besoj”. Por ai më besoi 10 përqind”, shton presidenti aktual i SHBA.

Trump thotë se i bëri një kërcënim të ngjashëm Presidentit kinez Xi Jinping nëse ai do të pushtonte Tajvanin, duke thënë se do të urdhëronte bombardimin e Pekinit. “Ai mendonte se isha i çmendur”, thotë Trump, duke iu referuar Xi-t, “por ne kurrë nuk patëm probleme”.

Deklaratat u sollën nga gazetarët Josh Dawsey, Tyler Pager dhe Isaac Arnsdorf në një libër të titulluar “2024”, që pritet të dalë këtë vit. Ato i referohen një sërë ngjarjesh të klasifikuara që ndodhën në Florida dhe Nju Jork. Regjistrimet, të patransmetuara kurrë më parë, zbulojnë një anë më të drejtpërdrejtë dhe agresive të presidentit amerikan, i cili u përpoq t’ua paraqiste veten donatorëve si i vetmi i aftë për të shmangur konflikte si ato në Ukrainë dhe Rripin e Gazës, duke kritikuar punën e ish-Presidentit Joe Biden.

Gjatë takimeve, Trump përshkroi gjithashtu qasjen e tij ndaj protestave pro-palestineze në universitetet amerikane, duke premtuar se, nëse rizgjidhej, do të përjashtonte studentët e huaj të përfshirë në ato lëvizje. “Ata që protestojnë duhet të dëbohen nga Shtetet e Bashkuara”, tha ai, duke shtuar se kjo do t’i “jepte fund” këtij fenomeni.

Në një tjetër ngjarje, Trump tregoi se si bindi një donator, fillimisht i gatshëm të ofronte 1 milion dollarë në këmbim të një dreke, që të rriste kontributin e tij në 25 milionë dollarë. “Dhe ai e bëri. Ai më dha 25 milionë dollarë. Ai është i çmendur”, tha ai, duke pretenduar aftësinë e tij për të bindur donatorët e mëdhenj të hapnin portofolet e tyre: “Duhet të kesh guximin të kërkosh”.

Ekspertja e Ekonomisë, Briseida Shehaj, ka ngritur alarmin për prishjet e ndërtimeve që po ndodhin në Theth, duke i cilësuar si një proces të paralajmëruar prej vitesh, që tani po prek qytetarët në çdo cep të Shqipërisë.

E ftuar në një emision televiziv, Shehaj tha se “ky është një zjarr që do t’ju vijë juve dhe është pak por e sigurt që do t’i shkojë çdo shqiptari, edhe atij në fshatrat më të humbur”.

Ajo përmendi si shembuj Astirin, Unazën e Re, 5 Majin dhe prishjet pas tërmetit, ku sipas saj u abuzua me justifikimin e emergjencës. “Kemi paralajmëruar prej kohësh se kjo do të ndodhte. Kjo është një kronikë e paralajmëruar, e nuk kemi pse sot të mblidhemi për të analizuar Edi Ramën. Ai është i qartë”, deklaroi Shehaj.

Ekspertja u shpreh e habitur që ende ka qytetarë që e shohin situatën si të largët: “Ajo që më bën habi është që ky popull vazhdon të thotë ‘larg zjarrit shtëpisë sime’, sikur nuk po e kupton se askush nuk do t’i shpëtojë këtij fenomeni”.

Duke folur për shtetin ligjor, Shehaj theksoi se çdo rast duhet të ndjekë rrugën gjyqësore dhe qytetarët nuk mund të preken pa vendim gjykate: “Nëse konstaton paligjshmëri, ia jep në dorë letrën, dhe ai nëse ka dokumente, ndjek rrugën gjyqësore. Nuk e prek dot pa u mbyllur ajo rrugë”.

Sipas saj, kryeministri Rama është i vetëdijshëm për gjithçka ndodh: “E di që aty ka rezervime, turistë, por nuk i intereson fare. I ka mashtruar të gjithë – biznesin e vogël, profesionistët – dhe vazhdon të mashtrojë siç i do kokrra e qejfit”.

Duke iu referuar ndërhyrjes në Theth, Shehaj aludoi për interesa të fshehura: “Nëse po bëhet aty, do të thotë që ajo tokë do dalë ose shtet, ose investitor strategjik”.

Gjithashtu, Shehaj u bëri thirrje shqiptarëve që ende nuk e kanë kuptuar rrezikun: “Edhe ai në fshatin më të humbur, po pati ndonjë liqen, pellg apo cep mali të bukur, të bëhet gati, se do i vijë radha shumë shpejt”.

Shehaj:

Kjo është një kronikë e e paralajmëruar, pra kur ne i kemi thirrje shqiptarëve kur bëhesh Astiri, kur bëhesh Unaza e Re, kur bëhesh 5 Maji, kur u bë masakra me justifikimin e tërmetit, u kemi thënë vazhdimisht që më së shikoni larg vetes, ky është një zjarr që do t’ju vijë juve dhe është pak por e sigurt që do i shkojë çdo shqiptari dhe atij në fshatrat më të humbur që ne s’i dimë as emrin, por do i shkojë mu në derë të shtëpisë dhe do i thotë je ndërtim pa leje.

Kjo është një kronikë e paralajmëruar dhe kjo do i ndodhë të gjithëve, pra ne nuk kemi përse, sot të mblidhemi dhe të analizojmë Edi Ramën, Edi Rama ky është.

Ajo që mua më bën habi, është që ky popull akoma vazhdon edhe thotë ‘larg zjarrit shtëpisë sime’.

Minimalisht, flasim në një shtet ligjor, në momentin që ti e konstaton një paligjshmëri, do t’i japësh një letër në dorë dhe ai minimalisht nëse ka dokumente të tjera, të ketë mundësi të ndjekë rrugën gjyqësore dhe ti nuk mund ta prekësh atë pa mbaruar rruga gjyqësore.

Rama e di shumë mirë që aty ka rezervime, Rama e di shumë mirë që aty ka turistë. Rama i di të gjitha këto dhe nuk i intereson fare kjo gjë, sepse nuk i ka interesuar për asgjë, nuk është se po habitemi.
Rama i tha dhe biznesit të vogël që s’do kesh taksa, dhe i vuri taksa, Rama çfarë nuk u tha profesionistëve që mezi po i kemi me pikatore në këtë vend dhe prapë u bë ajo lloj taksimi që u bëri.

Rama ka mashtruar dhe vazhdon të mashtrojë siç i do kokrra e qejfit.
Ishim zgjedhjet, ishte në fushatë, ai vajti dhe gënjeu atje në fushatë, ua di hallin tha.
Nëse kjo po bëhet në një zonë të caktuar të Thethit do të thotë që aty ka një interes, që kjo toka do na dali edhe shtet, do na dali edhe një investitor strategjik, pra aludojmë ne tani.

Për ata shqiptarë që akoma nuk e kanë shpëlarë trurin dhe pse është tashmë shumë vonë, duhet të kuptojë edhe ai në fshatin më të humbur që po pati ndonjë liqen, ndonjë rreke, ndonjë pellg, ndonjë cep mali të bukur, të bëhet gati, se do i vijë radha shumë shpejt.

Polumbarët dhe ekipet e tjera të Policisë së Shtetit vijojnë prej pasdites së djeshme të kërkojnë trupin e Arben Anamalit, kapiteni i një anije të vogël turistike që u hodh dje në ujërat e Liqenit të Shkodrës për të shpëtuar dy turistë nga mbytja, por vetë nuk doli më nga uji.

51 vjeçari bëri një akt heroik që është vlerësuar nga të gjithë, madje edhe Presidenti Bajram Begaj e ka cilësuar një “model shoqëror”.

Drejtoria Vendore e Policisë Shkodër njoftoi se informacioni për ngjarjen u mor rreth orës 16:32, pasi kapiteni i anijes turistike dyshohet se gjatë përpjekjes për të shpëtuar dy turistë që kishin rënë në ujë, është mbytur.

Menjëherë pas marrjes së njoftimit, shërbimet e Policisë mbërritën në vendngjarje dhe grupi hetimor po punon për sqarimin e plotë të rrethanave, ndërsa polumbarët vijojnë k ërkimet për gjetjen e trupit të Arben Anamalit.

Hetimet dhe pyetja e dy turistëve pritet të zbardhin dinamikën e ngjarjes, nëse ata kanë rënë aksidentalisht në ujërat e Liqenit të Shkodrës, apo gjatë xhiros me anijen turistike janë hedhur për t’u larë pa jelekët e shpëtimit.

Një tjetër detaj që pritet të sqarohet nga hetimet është dhe fakti se përse dy turistët që rrezikuan të mbyteshin nuk kishin jelekët e shpëtimit të vendosur, pra kemi të bëjmë me shkelje të rregullave apo pakujdesi e momentit që fatkeqësisht është mbyllur me një viktimë.

Udhëtarët e linjës Beograd–Tiranë kanë mbetur të bllokuar në aeroportin “Nikola Tesla” në kryeqytetin e Serbisë.

Ngjarja sipas gazetarit Blendi Fevziu, ka ndodhur pasditen e së martës.

Ai ka publikuar pamjet që thotë se i ka pranuar nga njëri prej udhëtarëve shqiptarë që duhej të ishte pjesë e këtij fluturimi.

Sipas tij, ata kanë mbetur të bllokuar në autobusin që bartë pasagjerët në pistë deri të aeroplani.

Për shkak të temperaturave të larta dhe mungesës së kondicionerit në autobus, udhëtarët shqiptarë janë gjetur në vështirësi.

Në video dëgjohen qytetarët duke kërkuar ndihmë nga policia serbe, teksa vërehet se të njëjtit kanë thyer xhamin e autobusit për të marrë ajër.

“Kjo nuk është normale, ne po vdesim këtu. Këtu ka edhe një fëmijë 2-vjeç. Hapeni derën”, dëgjohet duke thënë me zë të lartë njëri nga udhëtarët që gjendej brenda autobusit, derisa policët nuk reagojnë.

Ndër të tjera, Fevziu përmes Instastoryt i lut lexuesit që nëse kanë pamje të ngjarjeve sikur kjo që t’ia dërgojnë atij personalisht.

VIDEO

Këngëtari Renis Gjoka ka ndarë me ndjekësit e tij në rrjetet sociale një moment të veçantë dhe tepër të ndjerë nga jeta e tij personale.

Përmes një postimi në Instagram, ai ka publikuar një foto ku shfaqen tre fëmijët e tij, përfshirë foshnjën e sapolindur, që mbahet me kujdes dhe dashuri nga dy motrat më të mëdha.

Në përshkrimin e fotos, Gjoka ka zgjedhur fjalë të thjeshta, por plot emocion, për të njoftuar ardhjen në jetë të djalit të tij të vogël:

“Mirë se erdhe, shoku im i vogël, në këtë udhëtim përmes dritës dhe hijes. Do jem këtu për të të ndihmuar të ecësh nëpër të gjitha sfidat. Zoti të bekoftë.”

Ky është fëmija i tretë për këngëtarin, i cili rrallë ndan detaje nga jeta e tij familjare, por këtë herë ka zgjedhur të ndajë një copëz intime me ndjekësit e tij, duke përcjellë një mesazh përkujdesjeje, përkushtimi dhe bekimi atëror.

Sula e quan burgimin e Salianjit poltik dhe thotë se pas lirimit të tij asnjë nga kryesia e PD nuk denjoi ta priste.

Deputeti i Partisë Demokratike, Dashnor Sula me anë të një statusi në rrjetet sociale ka reaguar për lirimin nga burgu të Ervin Salianjit dhe reagimin e strukturave të PD për lirimin e tij.

Më tej, Sula shkruan se udhëheqësit në PD ishin më të gëzuar kur u burgos Salianji se sa dje që u lirua nga qelia. Kjo situatë, Sula thotë se tregon që po në PD po zihen për postet brenda partisë dhe Salianji është një kandidat potencial për postet në PD. Deputeti shprehet se jabë bërë të gjtihë bashkë për ta sfumuar Salianjin në parti.

Postimi i Dashnor Sulës:

E percollën me “oiiiii”, e pritën me xhelozi.

Dje doli nga burgimi politik Ervin Salianji, pas afro 10 muajsh izolim te padrejtë. Për Salianjin, me pranga në duar është një medalje sakrifice në interes publik.

Por, dje paradite Salianji doli nga burgu dhe para se të takonte familjen e tij biologjike, u drejtua për te familja politike për të takuar anëtarët e familjes politike. Për tu vlerësuar!

Feedbacku që mori?!

Asnjë nga udhëheqësia nuk denjoi ta priste. Nuk e kuptoj se ku shkuan të gjithë ata te devotshmit që ishin gati që të ngujoheshin për të mos e lejuar që të ekzekutohej vendimi gjykatës?!

Pse ishin më të gëzuar ata udhëheqës madhorë kur Salianji po shkonte në burg se sa tani që doli. Dje do duhet që të ishte një moment feste për Partinë Demokratike, por në fakt ndodhi e kundërta.

Ajo që ndodhi dje në PD, dëshmon më së miri situatën ku ndodhet partia. Nuk kanë mendjen as për të fituar dhe as për të fituar por po zihen për ato postet brenda partisë dhe ndonjë post në Parlament.

Për postet në parti, Salianji është një kandidat potencial ndaj “galloshet” janë bërë të gjithë bashkë për ta sfumuar pa ardhur Salianjin. Edhe një herë PD dëshmon se nuk synon maksimalizim por do të ruaj statuskuon. Janë luftëtarët më të paepur për të luftuar njëri-tjetrin.

Të tjera detaje mësohen lidhur me ngjarjen e rëndë që ndodhi mbrëmjen e djeshme në zonën e Shkopetit, ku një i ri u gjet i mbytur në liqen.

Gazetari Besar Bajraktaraj raporton se një makinë dyshohet se ka shkuar në afërsi të banesës së 23-vjeçarit Renis Dobra, në Zenisht, dhe e kanë marrë të riun dhe kanë shkuar rreth 30 kilometra më larg. Aty dyshohet se e kanë dhunuar dhe kanë kërkuar informacione nga ai, por më pas e kanë vrarë.

Të riun e kanë hedhur bashkë me makinën tip “Benz” në liqen, por gjatë kohës që makina binte poshtë, trupi ka dalë nga makina pak metra pa rënë në ujë.

Për grupin hetimor ka disa pista ku janë përqendruar hetimet. Sipas burimeve, viktima rezulton me precedent të mëparshëm penal për lëndë narkotike në Gjermani, kur ishte në moshën 20-vjeç. Po vlerësohet si pistë, por hetimet janë përqendruar tek ndonjë parcelë kanabisi ose sherr për ndonjë vajzë.

I riu kishte një ditë që ishte raportuar i zhdukur nga familja. Menjëherë pas kallëzimit, shërbimet e Policisë nisën kërkimet dhe, pas disa orësh, u gjet trupi i pajetë i 23-vjeçarit pranë liqenit të Shkopetit. Viktima kishte shenja mavijosje në qafë, çka ngriti dyshimet e para për policinë se atë e kishin mbytur dhe makinën ia kishin hedhur në liqen. /tvklan.al