Author: admin

Ulsi Manja ka postuar foton e një makine që ka ardhur nga Italia për të protestuar.

Ai bën ironi, duke thënë se si mund të vijë një njeri me makinë luksoze, për të protestuar për bukën e gojës.

“Edhe këta me makina të shtrenjta me siguri për bukën e gojës protestojnë!?

Çfarë shpërdorimi i lirisë. Patriotë me flamuj shqiptarë në makina të shtrenjta, që vijnë nga diaspora për të mbështetur kauza sociale, të atyre që kanë dalë për bukën e gojës. Madje, këta me makina të shtrenjta qenkan edhe më ambientalistë se këta të flamingove!

Çfarë paradoksi!

Hajde protestë, hajde”, shkruan ai.

Ajo që nuk ka kuptuar Manja, ose që bën sikur nuk e kupton, është se në Tirana nuk po protestohet për bukën e gojës, por për rrëzimin e këtij sistemi politik.

Detaje të reja kanë dalë nga ngjarja e rëndë e regjistruar mbrëmjen e së shtunës në Rrogozhinë, ku një konflikt mes dy fqinjëve përfundoi me një viktimë.

Sipas informacioneve zyrtare, viktima është Rrapush Memolla, rreth 60 vjeç, ndërsa si autor i dyshuar është arrestuar Meklan Meçe, rreth 25 vjeç. Të dy banonin pranë njëri-tjetrit në lagjen “Mollaj” të Rrogozhinës.

Ngjarja ka ndodhur rreth orës 21:50, kur për motive që paraprakisht konsiderohen të dobëta, mes dy fqinjëve ka shpërthyer një konflikt i çastit që më pas ka degraduar në përdorimin e mjeteve prerëse.

Si pasojë e plagëve të marra, Rrapush Memolla ka mbetur i plagosur rëndë dhe ka humbur jetën, ndërsa 25-vjeçari Meklan Meçe ka pësuar dëmtime në njërën dorë.

Pak pas marrjes së njoftimit, shërbimet e Policisë mbërritën në vendngjarje dhe nisën veprimet për identifikimin dhe kapjen e autorit të dyshuar. Brenda pak minutash, pas ndërhyrjes së shpejtë operacionale, policia arriti të lokalizojë dhe të arrestojë Meklan Meçen.

Grupi hetimor, nën drejtimin e Prokurorisë, po vijon punën për të zbardhur plotësisht dinamikën e konfliktit, shkaqet që çuan në përplasjen fatale mes dy fqinjëve dhe për të dokumentuar të gjitha rrethanat e ngjarjes.

Ndërkohë, trupi i viktimës do t’i nënshtrohet ekspertizës mjeko-ligjore, ndërsa pritet që në orët në vijim të dalin detaje të tjera mbi konfliktin që i mori jetën 60-vjeçarit.

Shënim: Çdo person që mund të përmendet në përmbajtjen e këtij artikulli, mbështetur mbi parimin procedural penal dhe atë universal të prezumimit të pafajësisë, konsiderohet i pafajshëm penalisht, nëse nuk ka ose deri kur të ketë një vendim të formës së prerë.

Deputetja socialiste, Sara Mila e ftuar këtë të shtunë në emisionin “Review” me Greta Topjana në Euronews Albania ka zbuluar detaje lidhur mbledhjen e Grupit Parlamentar të PS ku ndër diskutimet ishte edhe protesta. Mila gjatë fjalës së saj u shpreh se qeveria dhe PS respektojnë protestën dhe çmojmë lirinë e fjalës teksa shtoi se nuk mendohet dorëheqja e kryeministrit Edi Rama ose zgjedhje të reja.

Sipas saj, qeveria është në mes të një misioni drejt BE-së për të cilën shqiptarët në zgjedhjet e kaluara iu besuan 83 mandate. Lidhur me protestat ajo u shpreh se Rama ka kërkuar disa herë që të flasin dhe të sqarohen lidhur me ndërtimin në Zvërnec.

Ajo shtoi se me banorët e Zvërnecit, kryeministri Rama ka ezauruar një komunikim i cili ishte publik. Sipas saj ata nuk kanë parë të njëjtën gatishmëri nga ana e protestuesve teksa shtoi se qytetarët mund të jenë skeptikë.

“Ne në fakt ditën e sotme vijmë nga një ditë ku kemi pasur një mbledhje të zgjeruar në fakt, të përmuajshme, siç është bërë tashmë traditë. Çdo muaj ne bëjmë një mbledhje më të zgjeruar sesa ato që zakonisht i bëjmë çdo fillim jave me drejtuesin e grupit tonë, me zotin Taulant Balla. Patjetër që nuk mund të ishte jashtë vëmendjes ditës së sotme edhe protesta. Ndamë gjithçka me njëri-tjetrin, mendime, ide. Ishte një diskutim shumë i hapur ku gjithsecili pati momentin e vet për të thënë të tijën.

Megjithatë, nëse ka diçka për të cilën i gjithë grupi parlamentar është në unison, është fakti se padiskutim respektojmë protestën dhe çmojmë shumë lirinë e fjalës dhe veprimit në të. Por në asnjë moment në fakt nuk e shohim këtë protestë siç shumë herë edhe është diskutuar në media apo është folur në fakt edhe në studio të ndryshme televizive, ku mund të jetë dorëheqja një opsion apo ku mund të jenë zgjedhjet e parakohshme një opsion tjetër.

Ne jemi në mes të një procesi të cilit ia kemi premtuar shqiptarëve të paktën një vit e pak më parë kur morëm edhe 83 mandate. Jemi në mes të një procesi negociatash me Bashkimin Europian. Gjithçka po shkon mirë dhe mbarë në atë aspekt.

Ju vetë e keni parë progresin e Shqipërisë, jo vetëm në fjalë në fakt që mund të themi ne si përfaqësues të Partisë Socialiste të mazhorancës, por faktike ato që vetë Bashkimi Europian thotë. Jemi në gjysmë të rrugës për të mbyllur disa prej kapitujve më të rëndësishëm dhe po vrapojmë drejt targetit që të mund t’i mbyllim ato të gjitha në vitin 2027. Prandaj nuk shohim realisht arsye për të ndalur këtë hap, për të ndalur këtë sfidë që kemi me veten, me historinë e për të cilën në fakt shqiptarët na besuan”, tha ajo ndër të tjera.

Gazetari Elton Tozaj ka bërë publike disa detaje të reja nga prapaskenat e edicionit të tretë të “Ferma VIP”, gjatë një lidhjeje live në emisionin “Radar Albania”.

Sipas tij, shpallja e Mimoza Ahmetit si fituese e spektaklit nuk ka qenë zgjedhja fillestare e drejtuesve dhe stafit të produksionit, por ka ardhur si rezultat i mbështetjes së jashtëzakonshme që ajo mori nga publiku gjatë gjithë rrugëtimit të saj në fermë.

Tozaj u shpreh se Mimoza Ahmeti arriti të krijojë një lidhje të fortë dhe të menjëhershme me shikuesit, duke fituar simpatinë e tyre përmes karakterit, qëndrimeve dhe mënyrës së saj të të shprehurit. Sipas gazetarit, reagimi i publikut ishte aq i madh saqë organizatorët e formatit nuk kishin mundësi të shpërfillnin vullnetin e audiencës.

“U detyruan t’ia jepnin Mozës”, deklaroi ai, duke lënë të kuptohet se drejtuesit e programit kishin një preferencë tjetër për fituesin e këtij sezoni.

Sipas pretendimeve të Tozajt, nëse vendimi do të varej nga preferencat e Arbana Osmanit dhe Eduart Grishajt, fitues i “Ferma VIP 3” do të ishte balerini dhe koreografi i njohur Ilir Shaqiri.

Megjithatë, mbështetja masive e publikut për Mimoza Ahmetin ndryshoi rrjedhën e ngjarjeve dhe ndikoi drejtpërdrejt në rezultatin final. Në fund, poetja dhe shkrimtarja e njohur u shpall fituese e edicionit të tretë të “Ferma VIP”, duke lënë pas në garën finale emra të njohur si Ilir Shaqiri, Elvis Pupa, Soni Malaj dhe DJ Bujaka.

Deri më tani, nuk ka pasur një reagim zyrtar nga Arbana Osmani, Eduart Grishaj apo produksioni i programit lidhur me këto pretendime. Për rrjedhojë, deklaratat e Elton Tozajt mbeten në nivelin e një pretendimi të bërë publik në media dhe nuk janë konfirmuar nga personat e përfshirë në realizimin e spektaklit.

Dashi

E diela fillon pak e përgjumur, por më pas forca dhe energjia kthehen pasdite. Mbrëmja do të jetë shumë e vlefshme për sa i përket ndjenjave.

Kontaktet favorizohen në këto 24 orë. Nëse po kaloni një histori të komplikuar, jini të kujdesshëm.

Demi

Ju mund të ndiheni paksa të hutuar në pjesën e dytë të së dielës. Prandaj, duhet pak kujdes, veçanërisht nëse ka diçka për të diskutuar në ndjenja dhe në familje ose diçka që nuk mund ta kuptoni mirë.

Përgjegjësitë e reja kanë të bëjnë me familjen, kjo ndoshta peshon edhe më shumë sesa pritej dhe gjithashtu përfshin shpenzime më të mëdha për shtëpinë.

Binjakët

Që në momentin kur Mërkuri filloi këtë ndikim të rëndësishëm në shenjën tuaj, ju nuk keni mungesë të krijimtarisë dhe fatit edhe në vendin e punës.

Në përgjithësi, tani keni mundësinë të shfrytëzoni sa më mirë idetë që ju vijnë në mendje në këtë kohë.

Gaforrja

Ndryshoni pozicionin tuaj për një çështje të kontestuar shumë. Rryma e mendimit është kthyer dhe ju nuk doni të kapeni në rrymat e kryqëzuara.

Luani

Të vërtetat e shëmtuara vazhdojnë të shfaqen, por kurrë nuk keni pritur që ato të jenë kaq inkriminuese.

Virgjëresha

Nëse çështjet private po hyjnë në punë, shkrimet janë në mur. Ju duhet më shumë produktivitet.

Peshorja

Thuaj lamtumirë fiksimit dhe vlerësoni momentin. Në punë mund të merrni oferta që nuk duhet t’i refuzoni.

Akrepi

Ju thatë se do të largoheshit nëse gjërat do të arrinin një pikë të caktuar, por duhet të mendoni përsëri. Ajo që kishte kuptim atëherë do të ishte katastrofike tani.

Shigjetari

Dita do të jetë e favorshme, por nëse duhet të bëni një takim në dashuri, situata do të jetë edhe më mirë të dielën, shkruan noa.al. Mundohuni që të mbani nën kontroll nervozizmin.

Bricjapi

Dikush që ishte në arrati tani është kthyer. Është mirë që jeni pak diplomat.

Jini të lumtur kur e shihni dhe ai do të bëjë të njëjtën gjë.

Ujori

E diela do të jetë nën ritmin e duhur, por nga java në vijim, mund të hasni në probleme me paratë. Ndiheni të lodhur, ndaj mbani larg personat që ju mërzisin.

Peshqit

Ju jeni tepër të përqendruar në gabimet dhe jo sa duhet në të drejtat. Nëse vërtet dëshironi një rezultat më pozitiv, merrni një qasje më rehabilituese.

Një mesazh rrëqethës dhe plot dhimbje është shpërndarë së fundmi në rrjetet sociale nga bashkëshortja e të ndjerit, Shpat Kasapi. Përmes një video në “Instastory” me një pamje nga retë gjatë një fotoje nga avioni, Selvije Jao ka ndarë me ndjekësit një projekt mjaft të veçantë e të ndjerë që Shpati kishte lënë pas.

Bëhet fjalë për një këngë të titulluar “NANA”, e cila trajton një temë mjaft të ndjeshme për shoqërinë shqiptare: kurbetin dhe mallin e nënës për djalin.

“Ah Shpat… Të qanë të gjitha nënat shqiptare, dhe sot po i lë botës një këngë që flet për mallin e një djali në gurbet, që ëndërron ditën kur do të kthehet e do ta gjejë nënën duke e pritur,” shkruan ajo në nisje të mesazhit.

Më tej, ajo shton se kjo këngë sot merr një peshë edhe më të rëndë, duke pasur parasysh ikjen e parakohshme të artistit:

“Sa e rëndë tingëllon sot kjo këngë… sepse një nënë ende pret zërin e djalit të saj, përqafimin e tij dhe trokitjen e tij në derë …”

Në mbyllje të dedikimit, bashkëshortja e tij thekson se publikimi i këtyre materialeve “në sirtar” është një amanet dhe një detyrë për të mbajtur gjallë kujtimin dhe zërin e tij.

“Shpati ka lënë pas disa këngë që nuk arriti t’i publikojë, dhe edhe pse zemra më dhemb, e ndiej se kam për detyrë t’jua sjell juve, që zëri i tij të vazhdojë të jetojë mes nesh. Së shpejti në YouTube ‘NANA’.”

Projekti pritet të lançohet së shpejti në platformën YouTube dhe padyshim do të jetë një dedikim i ndjerë që do të prekë zemrat e të gjithë artdashësve dhe atyre që e deshën muzikën e tij.

VIDEO

Transkriptet e reja të zbardhura nga komunikimet sekrete në rrjetin SkyECC mes personave nën hetim, Alfred Hamzai dhe Ardian Zykaj, nxjerrin në dritë një skenë tejet të rëndë të ndërthurjes së krimit të organizuar, pastrimit të parave në ndërtim dhe tentativës për të kapur një prej mediave më të mëdha në vend, televizionin Top Channel.

Në qendër të kësaj marrëveshjeje, ku flitet për miliona euro dhe investitorë të fuqishëm, shfaqet si urë lidhëse dhe garant i plotfuqishëm emri i Besnik Myftarit, një drejtori të Top Channel, të cilit në përgjime anëtarët e grupit të Arubas i referohen si Beso ose Besua.

Komunikimet e nëntorit të vitit 2020, që Zoom.al ka mundur t’i shohë, tregojnë se “Grupi i Arubas”, drejtues i të cilit ishte Artur Shehu, nuk po synonte vetëm investimin e parave të drogës në ndërtim në Tiranë, por edhe blerjen e ndikimit mediatik për t’u bërë të paprekshëm.

Më 7 nëntor 2020, Ardian Zykaj i shkruan Alfred Hamzait duke i shpjeguar skemën se si blerja e një toke prej 300 m² te ish-restorant “Juvenilja” në Tiranë, për vetëm 100 mijë euro, do të kthehej në një fitim prej miliona eurosh në ndërtim. Por përfitimi më i madh ishte futja në media.

“Dhe televizioni me Beson eshte top fare. Beheni të pa prekshëm fare, derman. kurse televizionin dhe ëebsaiti si te doj dermani tha. Ne jemi nga krahu Besos” – i shkruan Zykaj mikut të tij Alfred Hamzai.

Plani ecën përpara me shpejtësi. Më 23 nëntor 2020, Zykaj raporton se ka mbyllur takimin me “çunat e Capricos”, vëllezërit Adrian dhe Erjon Rama, për të ndarë përqindjet e tokës. Madje, për të treguar se gjithçka ishte e koordinuar, grupi fillon të lëvizë paratë e para zyrtare përmes bankave për të nisur kapjen e strukturës mediatike.

“Se fola me Beson. Do bëjmë pagës në bankë për televizionin”, -shkruan Zykaj.

Roli i Besnik Myftarit – Besos: “Asi nën mëngë” që flet direkt me Ramën

Nga i gjithë fashikulli i përgjimeve, Besnik Myftari (Besua) nuk rezulton thjesht një bashkëpunëtor, por garanti absolut i operacionit, njeriu që hapte dyert e lejeve të ndërtimit në nivelet më të larta shtetërore dhe që, siç del nga komunikimet, dyshohet se kishte akses të drejtpërdrejtë te Kryeministri Edi Rama.

Sipas mesazheve, Myftari ishte ai që bënte llogaritë e fitimit, që siguronte grupin e strukturuar se lejet ishin të garantuara dhe që sillte mesazhe nga kreu i qeverisë.

Drita jeshile nga Rama: Që në fillim, grupi ndihej i sigurt sepse Besua kishte marrë konfirmimin nga kryeministri:

“Po Besua ma siguroj që do ndërtohet aty. Se i tha Rama. Dhe toka aty vlen se fiton në ndërtim shumë fare”, – vijon Zykaj.

Besoja jep garanci. Kur vjen puna te prishja e “Juveniljes” dhe ndërtimi i pallatit të madh, Zykaj qetëson Hamzain se mbështetja është e blinduar.

“Po po, Besua ka ndërhyrë që do ndërtohet… ai ma bëri llogarinë. Del Besua Garant”.

Nga “Juvenilja” në Palasë: “Marrim lejen, flas me Ramën direkt”

Ndikimi i Besnik Myftarit (Besos) nuk kufizohej vetëm te projekti te “Juvenilja”. Ai shfaqet në përgjime si njeriu që lëvizte kapitale të mëdha investitorësh dhe garantonte leje ndërtimi direkt nga zyra e kryeministrit për zonat më strategjike të bregdetit jugor, siç është Palasa.

Më 23 nëntor 2020, Zykaj zbulon një bisedë tjetër të rëndësishme me Myftarin.

“Dhe një gjë më tha Besua. Shumë e rëndësishme: kam ca investitorë të fortë shumë dhe flas me Ramën direkt. Për tokën në Palasë e marrim lejen” – vijojnë komunikimet.

Në mars të vitit 2021, frytet e ndërhyrjeve të Besos bëhen realitet. Toka e blerë me paratë e “zarfeve” të lënë nëpër banakë (siç përshkruhet në faqen 23 të dosjes) përfshihet zyrtarisht në lejen e ndërtimit.

“Besua e kish futur në leje atë tokën që del në emrin tonë. Aty bëmë bingo më duket. Dhe Besua u fut që të tregojë se u mori lejen atyre te Rama”, – rezulton nga bisedat në SkyEcc.

Këto komunikime të SkyEcc zbulojnë skemën e frikshme se si funksionon një pjesë e rëndësishme e ekonomisë në Shqipëri. Ndërsa në publik flitet për investime strategjike, në prapaskenë, trafikantët trajtojnë lejet e ndërtimit në Tiranë dhe bregdet apo aksione në televizioneve kombëtare si plaçkë që ndahet me përqindje, duke përdorur njohjet direkte me pushtetin si garanci për të shndërruar milionat eurot e përfituara nga droga në miliona të tjera të pastruara. /Zoom.al

Ministri i Jashtëm i Italisë, Antonio Tajani, ka njoftuar anulimin e vizitës së tij të planifikuar në Shtetet e Bashkuara më 21-22 qershor, pas deklaratave që i atribuohen presidentit amerikan Donald Trump ndaj kryeministres italiane Giorgia Meloni.

Në një reagim publik, Tajani i cilësoi deklaratat si “serioze dhe ofenduese”, duke theksuar se ato prekin jo vetëm kryeministren, por edhe gjithë Italinë. Për këtë arsye, ai bëri të ditur se ka vendosur të mos zhvillojë vizitën e tij zyrtare në Washington në datat e planifikuara.

Vendimi i Tajanit vjen në një moment tensionesh të ndjeshme diplomatike, duke shtuar presionin mbi marrëdhëniet mes Romës dhe Washingtonit, ndërsa deri më tani nuk ka pasur një reagim zyrtar nga pala amerikane lidhur me këtë çështje.

Anulimi pritet të ketë jehonë në marrëdhëniet transatlantike, veçanërisht në kontekstin e bashkëpunimit politik dhe të sigurisë mes dy vendeve.

Vetë kryeministrja italiane Giorgia Melonie ka akuzuar presidentin amerikan Donald Trump se ka “shpikur plotësisht” një histori lidhur me marrëdhënien e tyre gjatë samitit të G7 Summit në Francë.

Reagimi i Melonit erdhi pasi Trump, në një intervistë për një kanal televiziv italian, deklaroi se ajo “iu lut” për të bërë një fotografi me të gjatë samitit, duke shtuar se ai kishte pranuar vetëm nga keqardhja. Sipas raportimeve të mediave, Trump kishte thënë se Meloni “e donte me çdo kusht një foto” dhe se ai “nuk do ta kishte bërë, por e bëri nga keqardhja”.

Kryeministrja italiane i ka cilësuar këto deklarata si të pavërteta dhe ka shprehur habi për mënyrën se si ato janë paraqitur publikisht, duke theksuar se ato “nuk kanë asnjë bazë reale”.

Sipas saj, komentet e presidentit amerikan përbëjnë një shtrembërim të fakteve dhe një qëndrim që nuk pasqyron realitetin e marrëdhënieve mes dy liderëve gjatë samitit.

Ja si u zbulua vila në pronësi të Belinda Ballukut në bashkëpunim me Viola Haxhiademin, si është zhdukur nga hetimet dhe mediat prona e Maksim Hetemajt
Prokurorët e Posaçëm (SPAK) kanë konfirmuar, se si vila në bregdet është produkt i një afere korruptive, që Belinda Balluku e ka përfituar fal një tenderi 1 milionë euro kur mbante postin e drejtoreshës së Albcontrol, dhe në këtë rast regjistrimi i u bë duke përdorur Igli Taren dhe një prej bashkëpunëtoreve të saj më të ngushta Joana Bushin. Në njoftimin zyrtar SPAK konfirmon se ndjekja e hetimeve me metoda speciale, grumbullimi i provave dixhitale dhe provave të tjera të administruara deri në këtë fazë të hetimeve paraprake, rezultojnë të dhëna për fakte penale të reja në ngarkim të të pandehurës Belinda Balluku, për veprat penale “Korrupsion pasiv i personave që ushtrojnë funksione publike”, dhe “Pastrimi i produkteve të veprës penale apo i veprimtarisë kriminale”.

Rasti korruptiv lidhet me tenderin me objekt “Rikonstruksioni i godinës teknologjike të Albcontrol për përmirësimin e kushteve”, me fond limit 88,651,633 (tetëdhjetë e tetë milion e gjashtëqind e pesëdhjetë e një mijë e gjashtëqind e tridhjetë e tre) lekë, si dhe “Shtesë kontrate për ‘Rikonstruksionin e godinës teknologjike të Albcontrol për përmirësimin e kushteve’”, me vlerë 14,161,814 (katërmbëdhjetë milion e njëqind e gjashtëdhjetë e një mijë e tetëqind e katërmbëdhjetë) lekë pa TVSH. Në lidhje me këtë procedurë, rezulton se shtetasja Belinda Balluku, në cilësinë e titullares së autoritetit kontraktor “Albcontrol” sh.a, me detyrën e Drejtoreshës së Përgjithshme, në bashkëpunim me shtetasin Evis Berberi, me detyrën e Shefit të Sektorit të Prokurimeve, si dhe anëtarët e Njësisë së Prokurimit, shtetasit S.P., E.N. dhe A.M., kanë paracaktuar fituesin e këtij tenderi.

Këto veprime lidhen me fazën e përgatitjes së projektit dhe zhvillimit të procedurës, në përcaktimin e kritereve dhe miratimin e dokumenteve të tenderit, duke paracaktuar dhe krijuar avantazhe dhe privilegje të padrejta për shoqërinë fituese të procedurës së prokurimit, operatorin ekonomik “Eurocol” sh.p.k. Favorizimi i shoqërisë fituese ka vazhduar edhe në momentin e lidhjes së kontratës, duke i ofruar parapagim të menjëhershëm në vlerën 50% të kontratës, si dhe gjatë zbatimit të kontratës dhe shtesës së saj. Nga hetimi rezulton se shtetasja Belinda Balluku, për shkak të funksionit të saj publik si Drejtore e Përgjithshme e Albcontrol sh.a, në këmbim të favorizimit të shoqërisë “Eurocol” sh.p.k. në procedurën e sipërcituar, ka kërkuar dhe marrë përfitim të parregullt, i cili, referuar kontratës së porosisë, është në vlerën 145,000 (njëqind e dyzet e pesë mijë) euro, që konsiston në pasuri të paluajtshme, konkretisht vilën me nr. F6, në resortin turistik “Ëhite Rocks”, Gjilekë, Dhërmi, Bashkia Himarë, Qarku Vlorë, me zhvillues shoqërinë “Eurocol” sh.p.k. Përfitimi i parregullt është kërkuar gjatë kohës së zhvillimit të kësaj procedure prokurimi, ku rezulton se në atë kohë shoqëria “Eurocol” sh.p.k. kishte aplikuar dhe ishte pajisur me Lejen Zhvillimore Komplekse nr. 2385/1 prot., datë 27.3.2015, të miratuar me Vendimin e Këshillit Kombëtar të Territorit nr. 7, datë 7.3.2014, “Për miratimin e lejes zhvillimore komplekse për resortin turistik në fshatin Gjilekë, Dhërmi, Bashkia Himarë, Qarku Vlorë”.

Vila

Pra siç thekson SPAK, ka prova të reja që konfirmojnë se Belinda Balluku përkundër dhënies së këtij tenderi në vlerë mbi 1 milionë euro ka kërkuar si ryshfet vilën në bregdet. Jo vetëm korrupsion, por SPAK akuzon ish/zv-kryeministren edhe për Pastrim Parash, duke fshehur dhe regjistruar në emër të personave të tjerë përfitimet e korrupsionit. Hetimet kanë evidentuar gjithashtu përdorimin e veprimeve juridike të dyshuara si fiktive, me qëllim fshehjen e origjinës dhe pronësisë reale të pasurisë. Pasuria e vendosur nën “sekuestro preventive” përbëhet nga një “Vilë individuale dy katëshe tip Begonia me Nr.F6, parcela e rrethuar në dispozicion të vilës është jo më pak se 300 m2. Vila F6, brenda kësaj parcele, ka një sipërfaqe prej 103m2 (kati përdhe 54 m2 dhe kati i parë mbi përdhe 49 m2). Vila F6 ka edhe verandën 34m2. Vendparkimi ndodhet brenda sipërfaqes së parcelës.

[Referuar kontratës së porosisë me nr.1059 rep, nr.650 kol, datë 05.12.2018] Siç konfirmohet nga kontrata e porosisë, fill pas emërimit të Belinda Ballukut si ministre e Infrastrukturës dhe Energjisë, do të shpërblehej dhe pushonte në vilën e siguruar nga korrupsioni, si bashkëpunëtore e Edi Ramës. Në vijim të hetimeve të zhvilluara në kuadër të procedimit penal nr. 136/2025, pas kërkesës së paraqitur nga Prokuroria e Posaçme, Gjykata e Posaçme e Shkallës së Parë, me vendimin nr.412, datë 3.6.2026, ka vendosur masën e sigurimit pasuror “sekuestro preventive” mbi pasurinë e paluajtshme, në pronësinë indirekte të shtetases Belinda Balluku, që ndodhet në resortin turistik “White Rocks”, Gjilekë, Dhërmi, Bashkia Himarë.

Për të fshehur këtë pasuri, produkt të korrupsuionit, Belinda Balluku ka përdorur një nga njerëzit e saj më të afërt për shumë vite, ish-futbollistin Igli Tare. E bashkë me të, SPAK akuzon edhe ish-shefen e kabinetit të Ballukut, Joana Bushi, një prej personazheve kyç të karrierën dhe aferat e ish. Zv/ kryeministres. Rezulton se shtetasja Belinda Balluku ka kryer veprimin fiktiv të kontratës së porosisë nr. 1059, datë 5.12.2018, të lidhur mes shtetasit Igli Tare dhe pronarit të shoqërisë “Eurocol” sh.p.k., shtetasit Pandeli Carapuli. Veprimet e kundërligjshme në formën e pastrimit të produkteve të veprës penale kanë vijuar nga shtetasit Belinda Balluku, Igli Tare dhe Jona Bushi, duke kryer veprimin tjetër fiktiv, atë të kontratës së qirasë (kontratë dore), datë 25.5.2022, dhe amendamentin e kësaj kontrate, datë 26.4.2024.

Vila e vartëses së Ballukut dhe misteri i pronës së Maksim Hetemajt

Vila me nr.F6 ndodhet në një nga zonat elitare të Dhërmiut. Ndërsa ngjitur me vilën e Ballukut, burime bëjnë me dije se dyshohet se është dhe vila e vartëses së saj, Viola Haxhiademi, me detyrë Sekretare e Përgjithshme e Ministrisë së Energjetikës dhe Infrastrukturës, si edhe vila tjetër e Maksim Hetemajt ish-drejtor në Albcontrol, tashmë Drejtori Ekzekutiv i Autoritetit të Aviacionit Civil. Për këtë të fundit hetimet dhe mediat kanë qenë të heshtura pasi askush deri më sot nuk e ka përmendur pronën e Hetemajt të dyshuar të fituar nga korrupsioni si pjesë e “bandës Balluku”.

Hetimet

Nga ana tjetër sinjalizimi që besohet se ka ardhur në SPAK nga një ambasadë e huaj që vepron në Shqipëri, sqaronte se vila luksoze i ishte dhuruar Belinda Ballukut, nga biznesmeni Pandeli Carapuli. Por hetimi i thelluar i kryer gjatë këtyre muajve ka nxjerrë zbuluar manovrat e përdorura nga zyrtarja e lartë, Belinda Balluku. Teksa kompania e Carapulit ka fituar dy tenderat, kanë filluar të rrjedhin dhe pagesat financiare nga “Albcontrol” tek shoqëria “Eurocol”. Mirëpo në pamundësi për të marrë vilën luksoze në emrin e saj apo familjarëve të afërm, Belinda Balluku në atë kohë drejtoreshë,ka zgjedhur një figurë të njohur të sportit Shqiptar dhe ai Italian. Vlera e kësaj kontrate porosie të firmosur mes Tares dhe Carapulit në atë kohë ishte 145 mijë euro. Verifikimet e kryera nga SPAK, kanë zbuluar se Igli Tare ka paguar përmes një banke të Nivelit të Dytë në Shqipëri, shumën 70 mijë euro. Ndërsa pjesa tjetër e mbetur si diferenca prej 75 mijë euro, nuk ka asnjë gjurmë se në çfarë mënyre është paguar, pasi nuk ka një transaksion bankar.

Hetimi i SPAK ka provuar se Tare nuk e ka paguar vetë shifrën 70 mijë euro, por ka autorizuar me prokurë vëllain e tij, Agron Tare, që të kryente transaksionin 70 mijë euro në bankë. SPAK, pretendon se Tare nuk ka qënë asnjëherë dhe ska jetuar në vilën luksoze në Gjilekë. Dhe këtë fakt grupi i hetimit e mbështet në deklarimet e punonjësve të kompleksit, mirëmbajtësit e vilës, që tregojnë se në atë pasuri nuk e kanë parë kurrë, Igli Taren. Sipas punonjëse në këtë pasuri vinte Belinda Balluku dhe ata e kanë krijuar bindjen se vila i përkiste pikërisht kësaj zyrtare. Gjithashtu, Igli Tare, nuk është marrë fare as me mobilimin dhe arredimin e kësaj Vile luksoze, pasi me një gjë të tillë është marrë vetë, Belinda Balluku dhe familjarët e saj.

Një fakt i tillë sipas dosjes së SPAK, është provuar nga gjetja e komunikimeve me shkrim, mesazheve zanore dhe fotografive në telefonat e personave në hetim, ku faktohet qartazi që mobilimin e ka ndjekur Balluku dhe rrethi i saj miqësor. Ndërkohë kur kishin kaluar 3 vite e 5 muaj nga firmosja e kontratës së porosisë me Carapulin dhe kur Igli Tare, nuk kishte shkuar asnjëherë të shikonte vilën luksoze që kishte blerë, çuditërisht ai firmos një kontratë dore jo para noterit, ku pranonte që i jepte me qera pasurinë vilën F-6, shtetases Joana Bushi. Mësohet se SPAK, nuk ka konstatuar mandate pagesash apo transaksione bankare të kryera nga Joana Bushi në drejtim të llogarive bankare të ish-futbollistit, Igli Tare. Është pretenduar se pagesat janë bërë në rrugë informale. Por pavarësisht se juridikisht në letra prona është në emër të Igli Tares dhe ky i fundit nuk ka shkuar asnjëherë, por ja ka lënë me qera Joana Bushit, vilën luksoze e gëzon Belinda Balluku dhe familjarët e saj. Ndaj prokurorët e SPAK, Dritan Prençi dhe Dorina Bejko, në datën 3 qershor 2026 vendosën të sekuestrojnë këtë vilë, si të provuar se i përket, Belinda Ballukut.

Kuvendi miratoi paketën e re të masave që ashpërson ndëshkimet për drejtimin nën efektin e alkoolit, përdorimin e celularit dhe shkeljet e shoferëve pa patentë.

Kuvendi i Shqipërisë ka miratuar me 84 vota ndryshimet në Kodin Rrugor, një paketë e gjerë masash që synon rritjen e sigurisë në rrugë dhe ashpërsimin e ndëshkimeve për shkelësit.

Ndryshimet, të propozuara nga deputetët socialistë Erion Braçe dhe Ulsi Manja, sjellin rregulla të reja për shoferët e rinj, masa më të forta ndaj drejtuesve që kapen në gjendje të dehur dhe ndëshkime më të ashpra për përdorimin e telefonit gjatë drejtimit të mjeteve.

Një nga risitë kryesore të ligjit është heqja e përhershme e patentës për drejtuesit që kapen përsëritës duke drejtuar mjetin nën efektin e alkoolit. Sipas ndryshimeve të miratuara, nëse një shofer konstatohet me mbi 0.5 gram alkool për litër gjak dhe është ndëshkuar më parë për të njëjtën shkelje, në rast përsëritjeje do t’i hiqet përgjithmonë leja e drejtimit.

Ligji vendos gjithashtu një regjim të posaçëm prove për shoferët e rinj gjatë dy viteve të para pas marrjes së patentës. Për këtë kategori parashikohet tolerancë zero ndaj alkoolit, kufizim shpejtësie deri në 90 km/h në autostrada dhe 80 km/h jashtë qendrave të banuara, si dhe ndalim qarkullimi nga ora 24:00 deri në 06:00 pa një shoqërues që disponon patentë prej të paktën tre vitesh.

Shkelja e këtyre rregullave do të dënohet me gjobë nga 5 mijë deri në 15 mijë lekë, pezullim të patentës për një muaj dhe heqje pikësh. Nëse shoferi i ri kryen dy shkelje, periudha e provës do të zgjatet edhe me një vit tjetër.

Një tjetër ndryshim i rëndësishëm lidhet me përdorimin e telefonit celular. Ndalimi nuk do të vlejë më vetëm për drejtuesit e automjeteve, por edhe për ata që përdorin biçikleta, motomjete deri në 50 cc dhe monopatina me motor.

Paketa e re ashpërson edhe masat ndaj personave që drejtojnë mjetin pa patentë. Përveç pasojave penale, personat e kapur pa leje drejtimi nuk do të mund të regjistrohen në autoshkollë për një vit. Për të miturit, ndalimi do të zgjasë deri në dy vjet nga momenti kur fitojnë të drejtën ligjore për të aplikuar për patentë.

Po ashtu, Kuvendi miratoi rritjen e gjobave për manovrat e rrezikshme dhe agresive në rrugë. Ndëshkimet për ndryshimet e shpeshta të korsive pa sinjalizim, sjelljet agresive dhe veprimet që krijojnë rrezik për përdoruesit e rrugës rriten nga 10-40 mijë lekë në 20-60 mijë lekë.

Sipas propozuesve, ndryshimet synojnë uljen e numrit të aksidenteve, rritjen e sigurisë rrugore dhe përafrimin e legjislacionit shqiptar me standardet europiane në këtë fushë.

Ndryshimet e propozuara:

Neni 6

Në nenin 127, pika 3.1, bëhet ndryshimi si më poshtë:

Pas togfjalëshit “shkelur.” hiqet fjalia “I njëjti rregull aplikohet edhe për lejet e drejtimit të lëshuara nga shteti shqiptar në rastin kur kundërvajtësi jep pëlqimin.”

Neni 7

Në nenin 139 bëhen këto ndryshime:

Në pikën 5, pas togfjalëshit “shpejtësi” shtohen fjalët “duke sjellë rrezik serioz për përdoruesit e rrugës, sidomos në zonat urbane, përfshirë manovrat agresive, ndryshimet e shpeshta të korsisë pa sinjalizim dhe sjelljet jo sociale në rrugë”.

Në pikën 7 bëhet ndryshimi si më poshtë:

Pas togfjalëshit “tërheqëse” hiqen fjalët “të barrës dhe të shalës”.

Në pikën 8 bëhet ndryshimi si më poshtë:

Masa e gjobës “nga dhjetë mijë deri në dyzet mijë lekë” bëhet “nga njëzet mijë deri në gjashtëdhjetë mijë lekë”.

Para nenit 5 të projektligjit shtohen nenet 9 dhe 10 me këtë përmbajtje, ndërsa neni 5 rinumërohet neni 11:

Neni 9

Titulli i nenit 171 ndryshohet nga “Përdorimi i syzeve optike dhe i aparateve të tjera gjatë drejtimit të mjetit” në “Përdorimi i aparateve telefonike dhe i pajisjeve digjitale të komunikimit, i syzeve optike dhe i pajisjeve të tjera gjatë drejtimit të mjetit”.

Në nenin 171, pas pikës 2 shtohen pikat 2.1 dhe 2.2 me këtë përmbajtje:

“2.1 Ndalohet gjithashtu përdorimi i telefonit celular të mbajtur me dorë gjatë drejtimit të mjeteve të tjera, përfshirë biçikletat, motomjetet deri në 50 ç dhe monopatinat me motor.

2.2 Mbajtësi i lejedrejtimit të mjetit, të cilit gjatë lëshimit ose rinovimit të lejedrejtimit i është vendosur kushti për korrigjimin e të metave organike ose të aftësive të ulëta anatomike a funksionale nëpërmjet syzeve optike ose aparateve të tjera të caktuara, është i detyruar t’i përdorë ato gjatë drejtimit të mjetit.”

Në pikën 4, pas togfjalëshit “neni”, fjalët “tre herë brenda të njëjtit vit” zëvendësohen me fjalët “dy herë brenda të njëjtit vit”.

Neni 10

Në nenin 184, pas pikës 11 shtohet pika 11.1 me këtë përmbajtje:

“11.1 Kur nga verifikimet e parashikuara në pikat e këtij neni rezulton një vlerë alkoolike më e lartë se 0,5 gram për litër (g/l) në gjakun e drejtuesit të mjetit dhe ky drejtues është konstatuar e ndëshkuar më parë për drejtim mjeti nën ndikimin e alkoolit ose në gjendje të dehur, në rast përsëritjeje merret masa e heqjes së lejes së drejtimit përgjithmonë.”